ᤕᤷᤔᤡᤕᤠ 40 - LIFOTNT

ᤕᤷᤔᤡᤕᤠᤴ ᤃᤍᤗᤩᤠᤜ᤺ᤴᤏᤢ ᤕᤢᤱ

¹ ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤸᤗᤧ ᤕᤷᤔᤡᤕᤠᤴ ᤖᤠᤔᤠᤗᤠᤶ ᤗᤧᤖᤢᤀᤠᤱ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ॥ ᤂᤢᤏᤧ᤹ ᤕᤖᤢᤛᤗᤧᤔ ᤜᤧᤰᤁᤩᤠᤱ ᤕᤜᤢᤍᤠᤗᤠᤶ ᤌᤰᤁᤪᤱᤅᤡᤸᤗᤧ ᤔᤧᤄᤣ᤺ᤰᤂᤢᤛᤡᤀᤠᤱ ᤒᤣᤒᤡᤗᤥᤏ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖ ᤔᤧᤒᤳᤇᤧᤒᤠ ᤔᤏᤠᤜᤠ᤹ᤏᤢ ᤛᤥᤖᤡᤰ ᤕᤷᤔᤡᤕᤠᤴ ᤋᤢᤔᤢ॥

² ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤔᤥᤒᤠᤸᤗᤧ ᤕᤷᤔᤡᤕᤠᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤗᤠᤈᤣ᤹ᤀᤥ ᤔᤧᤰᤔᤠᤛᤡᤔᤧᤴ ᤋᤠᤖᤢᤀᤠᤱ ᤘᤠ᤹.

³ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤂᤧᤴ ᤆᤥᤃᤢᤀᤠᤱ ᤘᤠ᤹॥ ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ॥ ᤂᤧᤸᤗᤧᤆᤥᤃᤢᤸᤗᤧ ᤁᤴ ᤐᤥ᤺ᤰᤂᤧᤒᤠᤖᤥ॥

⁴ ᤁᤖ ᤀᤠᤱᤃᤠ᤹ ᤂᤧᤏᤧ᤹ ᤁᤧᤶᤄᤣ᤺ᤰᤂᤧᤀᤠᤱ ᤁᤧᤒᤵᤐᤠ ᤌᤰᤁᤪᤱᤜᤠ᤹ ᤑᤧᤴᤍᤢᤱ ᤐᤡᤏᤧᤀᤠᤱ ᤂᤧᤏᤧ᤹ ᤐᤣ᤺ᤰᤔᤠ ᤑᤠ᤺ᤰᤏᤧ॥ ᤂᤧᤏᤧ᤹ ᤀᤠᤱᤃᤠ᤹ᤏᤢ ᤒᤣᤒᤡᤗᤥᤏ ᤐᤣ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤏᤧᤓᤃᤪ. ᤀᤠᤱᤃᤠ᤹ᤏᤢ ᤐᤣ᤺ᤰᤔᤠ ᤁᤧᤛᤢᤰ. ᤀᤠᤱᤃᤠ᤹ ᤂᤧᤏᤧ᤹ ᤏᤢᤖᤡᤰ ᤁᤶᤒᤪᤠᤱ ᤔᤧᤳᤏᤧ᤹॥ ᤁᤖ ᤀᤠᤱᤃᤠ᤹ᤏᤢ ᤐᤣ᤺ᤰᤔᤠ ᤏᤡᤱᤘᤠ᤹ ᤁᤧᤴᤈᤥᤃᤢᤴᤏᤧᤓᤃᤪ. ᤂᤧᤏᤧ᤹ ᤁᤵᤔᤥ ᤕᤢᤱᤔᤠ ᤘᤠ᤹ᤔᤠ ᤁᤧᤛᤢᤰ॥ ᤁᤠᤰ ᤗᤠᤈᤣᤴ ᤂᤧᤏᤧ᤹ ᤁᤧᤍᤃᤡ ᤏᤧᤖᤥ. ᤂᤧᤏᤧ᤹ ᤀᤠᤳᤋᤠᤴ ᤐᤣ᤺ᤰᤔᤠ ᤁᤧᤛᤡᤖᤠ᤹ᤎᤠᤱ. ᤂᤧᤵᤔᤥ ᤐᤣᤃᤧ᤹॥

⁵ ᤂᤧᤏᤧ᤹ ᤕᤢᤱᤔᤠ ᤕᤠ᤺ᤰᤔᤠ ᤏᤡ᤺ᤴᤎᤥ ᤁᤧᤈᤥᤃᤢᤏᤧᤓᤃᤪ. ᤀᤜᤡᤁᤠᤔᤧᤸᤗᤧ ᤁᤢᤛ᤻ᤛᤠ. ᤛᤠᤐᤠᤏᤧᤸᤗᤧ ᤁᤢᤶᤔᤧᤴᤇᤠ᤹ ᤃᤍᤗᤩᤠᤜᤀᤥ ᤏᤢ᤺ᤰᤂᤧ ᤐᤣᤃᤧ᤹॥ ᤂᤢᤏᤧ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤕᤜᤢᤍᤠᤒᤠ ᤜᤠᤱᤕᤢᤰᤐᤠ ᤕᤢᤰᤋᤡᤱ ᤆᤥᤃᤢᤀᤠᤱ ᤘᤠ᤹॥ ᤂᤢᤏᤧ᤹ ᤕᤢᤰ ᤆᤥᤃᤢᤛᤡᤒᤠ ᤔᤏᤠᤜᤠ᤹ᤏᤢ ᤂᤧᤏᤧ᤹ ᤂᤧᤵᤔᤥ ᤘᤕᤧ᤹॥ ᤁᤖ ᤂᤧᤏᤧ᤹ ᤌᤧᤔᤠ ᤏᤡᤱᤘᤠ᤹ ᤁᤧᤈᤥᤃᤢ᤹. ᤀᤠᤳᤋᤠᤴ ᤐᤣ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢ. ᤂᤧᤵᤔᤥ ᤐᤣ᤺ᤰᤔᤠ ᤁᤧᤛᤢᤰ॥” ᤂᤧᤒᤩᤠᤱ ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤸᤗᤧ ᤁᤢᤓᤠ ᤁᤢᤈᤠᤈᤡ ᤏᤢ ᤕᤠᤱ ᤐᤡᤖᤢᤀᤠᤱ ᤐᤣᤖ ᤕᤠ᤺ᤴᤍᤢ॥

⁶ ᤂᤧᤸᤗᤧᤆᤥᤃᤢᤸᤗᤧ ᤕᤷᤔᤡᤕᤠᤴ ᤔᤡᤛ᤻ᤐᤠᤒᤠ ᤀᤜᤡᤁᤠᤔᤖᤧ ᤁᤢᤛ᤻ᤛᤠ ᤃᤍᤗᤩᤠᤜᤖᤥ ᤏᤢ᤺ᤰᤂᤧ ᤐᤣ ᤜᤧᤰᤁᤩᤠᤱ ᤗᤠᤈᤣ᤹ᤀᤥ ᤐᤰᤔᤧᤎᤩᤧ ᤔᤧᤕᤠ᤺ᤰᤋᤧᤒᤠ ᤁᤢᤓᤠ ᤔᤏᤠᤜᤠ᤹ᤏᤢ ᤂᤢᤏᤧ᤹ ᤘᤕᤧᤖᤥ॥

ᤕᤜᤢᤍᤠᤒᤠ ᤋᤢᤶ ᤜᤠᤱᤕᤢᤰᤐᤠ ᤃᤍᤗᤩᤠᤜ

⁷ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤀᤜᤡᤁᤠᤔᤖᤧ ᤁᤢᤛ᤻ᤛᤠ ᤃᤍᤗᤩᤠᤜᤴ ᤒᤣᤒᤡᤗᤥᤏᤀᤥ ᤔᤧᤴᤍᤧᤶᤛᤢᤴ ᤔᤧᤴᤍᤣ᤹ᤖᤢᤛᤡᤴᤒᤠ ᤗᤠᤈᤣ᤹ᤒᤠ ᤁᤧᤖᤧᤰᤏᤢ᤺ᤸᤗᤧ ᤕᤠᤱᤃᤧᤛᤠ᤹ᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤕᤢᤰᤐᤠ ᤆᤥᤃᤢᤀᤠᤱ ᤘᤠ᤹ ᤑᤠ᤹ᤀᤠᤱ ᤕᤜᤢᤍᤠᤒᤠ ᤗᤠᤶᤗᤥᤒᤠ ᤌᤰᤛᤢᤒᤠᤜᤠ᤹ ᤏᤢ ᤐᤠᤱᤓᤣ᤹ᤜᤠ᤹ᤀᤥᤒᤠ ᤌᤰᤛᤢᤒᤠᤜᤠ᤹ᤖᤧ ᤔᤧᤄᤧᤵᤛᤢ॥

⁸ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤃᤍᤗᤩᤠᤜᤖᤧ ᤁᤢᤍᤢᤶᤛᤧ ᤔᤡᤛ᤻ᤐᤠ ᤔᤧᤒᤣ॥ ᤁᤴ ᤁᤧᤒᤣ᤺ᤰᤐᤠᤜᤠ᤹—ᤏᤋᤏᤩᤠᤜ᤺ᤸᤗᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤗᤧᤴ. ᤁᤠᤖᤣᤜᤖᤧ ᤏᤧᤵᤑᤢ ᤁᤢᤛ᤻ᤛᤠ ᤕᤥᤜᤠᤏᤠᤏᤧᤴ ᤏᤢ ᤈᤥᤏᤠᤌᤠᤏᤧᤴ. ᤋᤴᤜᤢᤔᤣᤋᤖᤧ ᤁᤢᤛ᤻ᤛᤠ ᤛᤖᤠᤕᤠᤜ᤺ᤴ. ᤏᤋᤥᤐᤠᤋᤡ ᤀᤣᤑᤤᤖᤧ ᤁᤢᤛ᤻ᤛᤠᤜᤠ᤹. ᤔᤠᤁᤠᤋᤡᤖᤧ ᤁᤢᤛ᤻ᤛᤠ ᤕᤠᤈᤏᤩᤠᤜ᤺ᤴ ᤏᤢ ᤁᤴᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤔᤏᤠᤜᤠ᤹ ᤔᤧᤘᤕᤧ॥

⁹ ᤒᤣᤒᤡᤗᤥᤏᤒᤠᤜᤠ᤹ᤖᤧ ᤂᤡᤏᤡ᤹ ᤜᤠᤴᤋᤡ ᤁᤧᤔᤧᤴᤈᤥᤃᤡᤴ ᤑᤠ᤹ᤀᤠᤱ ᤃᤍᤗᤩᤠᤜᤖᤧ ᤔᤠᤱᤜᤧᤰᤛᤡᤱᤅᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ॥ ᤂᤢᤏᤧ᤹ ᤔᤠᤱᤜᤢᤵ ᤆᤥᤃᤢᤀᤠᤱ ᤔᤧᤳᤋᤢᤛᤡ. “ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹॥ ᤁᤴ ᤗᤠᤈᤣ᤹ᤀᤥ ᤕᤢᤅᤧᤶᤔᤧ᤹ᤀᤠᤱ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤛᤧᤘᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ ᤜᤧᤰᤁᤩᤠᤱ ᤁᤧᤖᤧᤰ ᤐᤠ᤺ᤴᤏᤥ ᤂᤡᤏᤡ᤹ ᤏᤢ᤹ᤔᤠ ᤋᤠᤔᤠ ᤐᤥᤱ᤹॥

¹⁰ ᤀᤠᤱᤃᤠ᤹ ᤀᤠᤗᤠᤃᤡᤃ. ᤀᤠᤏᤡ᤹ ᤋᤢᤶᤛᤧ ᤁᤧᤓᤧᤶᤒᤠ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤡᤏᤡ᤹ ᤀᤡᤱᤛᤠᤒᤠ ᤐᤥᤱᤛᤧ ᤔᤡᤛ᤻ᤐᤠᤀᤣ ᤕᤢᤱᤅᤠ॥ ᤂᤡᤏᤡ᤹ ᤁᤧᤕᤢᤅᤡᤒᤠ ᤗᤠᤈᤣ᤹ᤀᤥᤒᤠ ᤂᤡᤏᤡ᤹ ᤀᤠᤵᤑᤣᤰ ᤁᤧᤛᤣᤃᤢᤶᤒᤠ ᤐᤠᤱᤈᤢᤶᤜᤠ᤹ᤀᤥ ᤕᤢᤅᤧᤶᤔᤧ᤹॥ ᤆᤧᤸᤗᤧᤰᤛᤣᤴ ᤋᤢᤒᤧᤶᤔᤧ᤹ᤀᤠᤱ ᤌᤡ ᤕᤢᤛᤧᤶᤔᤧ᤹ ᤜᤧᤰᤁᤩᤠᤱ ᤜᤠᤱᤘᤠᤔᤠ ᤕᤧᤶᤔᤥ ᤁᤧᤎᤥ᤺ᤰᤐᤠ ᤛᤡᤱᤛᤣ᤹ ᤗᤢᤱᤛᤣ᤹ᤜᤠ᤹ ᤋᤢᤒᤧᤶᤔᤧ᤹ ᤜᤧᤰᤁᤩᤠᤱ ᤆᤤᤋᤢᤏᤧᤸᤗᤧ ᤁᤢᤈᤠ᤹ᤀᤡᤴ ᤋᤢᤒᤧᤶᤔᤧ᤹ᤀᤠᤱ ᤏᤡ᤺ᤱᤃᤣ᤹ ᤀᤣ᤺ᤵᤛᤧᤶᤔᤧ᤹ᤀᤠᤱ ᤆᤡᤰᤂᤧᤶ ᤕᤢᤰᤂᤧᤶᤔᤧ᤹॥”

¹¹ ᤀᤠᤸᤗ ᤔᤥᤀᤠᤒᤒᤠ. ᤀᤶᤔᤥᤏ. ᤀᤧᤍᤥᤔ ᤏᤢ ᤘᤣ᤹ ᤏᤡ᤺ᤳᤋᤠᤱᤒᤠ ᤗᤠᤈᤣ᤹ᤜᤠ᤹ᤀᤥ ᤁᤧᤘᤠ᤹ᤒᤠ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤓᤠ ᤔᤏᤠᤜᤠ᤹ ᤕᤜᤢᤍᤠᤀᤥ ᤗᤧᤖᤢᤎᤛᤡᤀᤠᤱ ᤃᤍᤗᤩᤠᤜᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶ ᤜᤠᤱᤕᤢᤰᤐᤠ ᤆᤥᤃᤢᤀᤠᤱ ᤘᤠ᤹ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢ.

¹² ᤂᤧᤒᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣᤀᤠᤱ ᤔᤧᤕᤢᤱᤅᤧᤒᤠ ᤋᤧᤴᤜᤠ᤹ ᤔᤧᤗᤧᤖᤢᤀᤠᤱ ᤂᤧᤱᤜᤠ᤹ ᤕᤜᤢᤍᤠᤀᤥ ᤏᤢ᤺ᤱᤔᤠ ᤋᤠᤔᤠ ᤔᤧᤜᤣ᤺ᤰᤋᤧ॥ ᤂᤧᤱᤜᤠ᤹ ᤃᤍᤗᤩᤠᤜ᤺ᤴᤏᤢ ᤋᤢᤶᤔᤠᤖᤧ ᤗᤠᤃᤡ ᤔᤡᤛ᤻ᤐᤠᤀᤣ ᤔᤧᤘᤕᤧ ᤔᤧᤗᤠᤖᤧ ᤂᤧᤒᤩᤠᤱ ᤕᤜᤢᤍᤡᤕᤠᤒᤠ ᤗᤠᤈᤣ᤹ ᤗᤧᤵᤔᤠᤱ ᤕᤖᤡᤰ ᤁᤧᤍᤢᤶᤒᤠ ᤆᤧᤸᤗᤧᤰᤛᤣ᤹ ᤛᤡᤱᤛᤣ᤹ ᤏᤢ ᤘᤣ᤹ ᤛᤡᤱᤛᤣ᤹ᤜᤠ᤹ ᤛᤢᤶᤛᤧ ᤔᤧᤒᤣᤖᤥ॥

¹³ ᤁᤴ ᤀᤣᤃᤠᤱ ᤂᤡᤔᤥ. ᤁᤠᤖᤣᤜᤖᤧ ᤁᤢᤛ᤻ᤛᤠ ᤕᤥᤜᤠᤏᤠᤏᤧᤴ ᤏᤢ ᤐᤠᤱᤓᤣ᤹ ᤐᤠᤱᤓᤣ᤹ᤒᤠ ᤘᤣ᤹ ᤌᤰᤛᤢᤒᤠ ᤗᤠᤶᤗᤥᤒᤠᤜᤠ᤹ ᤔᤡᤛ᤻ᤐᤠᤒᤠ ᤃᤍᤗᤩᤠᤜᤖᤥ ᤔᤧᤍᤩᤧ॥

¹⁴ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤶᤔᤥᤏᤒᤠ ᤜᤠᤱ ᤒᤠᤗᤡᤛᤧᤸᤗᤧ ᤏᤋᤏᤩᤠᤜᤖᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤸᤗᤧᤴ ᤁᤧᤛᤧᤳᤇᤧ ᤐᤠᤱᤄᤢᤀᤠᤱ ᤘᤠ᤹ ᤑᤠ᤹ᤀᤠᤱ ᤌᤣ ᤂᤧᤏᤧ᤹ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤠ᤹ᤒᤡ᥅” ᤁᤖ ᤃᤍᤗᤩᤠᤜᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤁᤢᤏᤠᤔᤧᤛᤠ᤹ᤖᤢᤴ॥

¹⁵ ᤕᤠᤱᤛᤡ ᤕᤥᤜᤠᤏᤠᤏᤖᤧ ᤃᤍᤗᤩᤠᤜᤴ ᤛᤫᤠ᤺ᤳᤋᤠᤱ ᤋᤢᤔᤢᤀᤠᤱ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤵᤑᤣᤰ ᤐᤣ᤺ᤰᤁᤠᤀᤠᤱ ᤏᤋᤏᤩᤠᤜᤖᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤸᤗᤧᤴ ᤜᤠ᤺ᤳᤗᤧᤀᤠᤱ ᤔᤧᤴᤏᤡᤀᤣ ᤛᤧᤖᤢᤱ᤹॥ ᤌᤣᤀᤠᤱ ᤂᤢᤏᤧ᤹ ᤋᤠᤀᤠᤱ ᤂᤧᤏᤧ᤹ ᤁᤧᤛᤧᤳᤗ ᤕᤠ᤺ᤶᤔᤠᤒᤣ᥅ ᤜᤧᤰᤁᤣ ᤐᤥᤱᤅᤡᤸᤗᤧᤃ ᤂᤧᤏᤧ᤹ ᤁᤧᤃᤒᤪᤡᤱ ᤐᤡᤛᤠᤱ ᤁᤧᤍᤠᤒᤠᤀᤠᤱ ᤁᤧᤘᤠ᤹ᤒᤠ ᤕᤜᤢᤍᤠ ᤔᤏᤠᤜᤠ᤹ ᤕᤠᤶᤔᤥ ᤑᤢᤳᤇᤡᤱᤈᤩᤠᤱ ᤔᤧᤛᤧ ᤔᤧᤒᤣ᤺ᤰ ᤜᤧᤰᤁᤩᤠᤱ ᤕᤜᤢᤍᤠᤀᤥ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤔᤧᤰ॥”

¹⁶ ᤁᤖ ᤃᤍᤗᤩᤠᤜ᤺ᤸᤗᤧ ᤕᤥᤜᤠᤏᤠᤏᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤜᤧᤰᤁᤣ ᤆᤥ᤺ᤰᤔᤠ ᤌᤧᤔᤠᤀᤠᤱ ᤔᤧᤒᤠᤱᤏᤧᤴ. ᤌᤣᤀᤠᤱᤓᤧᤸᤗᤧ ᤀᤡᤛ᤻ᤔᤠᤀᤣᤗᤖᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤀᤡᤱᤗᤧᤰ ᤁᤧᤒᤠ᤺ᤳᤋᤢᤖᤥ॥”