ᤕᤷᤔᤡᤕᤠ 4 - LIFOTNTᤗᤠᤕᤥᤗᤠᤶ ᤜᤡᤶᤔᤠ ᤀᤡᤱᤄᤱ 1 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤂᤡᤏᤡ᤹ ᤏᤢ᤺ᤱᤔᤠ ᤋᤠᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤏᤧᤑᤃᤪ ᤀᤠᤱᤃᤠ᤹ᤀᤥ ᤏᤢ᤺ᤰᤂᤧᤶ ᤋᤩᤧᤶᤔᤧ᤹ᤀᤥ॥ ᤂᤡᤏᤡ᤹ ᤂᤧᤴ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤀᤠᤍᤃᤡᤗᤠᤶᤒᤠ ᤁᤧᤄᤧᤳᤋᤢᤶ ᤜᤧᤰᤁᤩᤠᤱ ᤀᤠᤱᤃᤠ᤹ᤏᤢ ᤋᤠ᤺ᤰᤐᤥᤛᤠᤒᤠ ᤁᤧᤒᤥᤰᤂᤡᤏᤧᤓᤃᤪ. 2 ᤂᤡᤏᤡ᤹ ᤛᤧᤰᤂᤠᤀᤥ. ᤂᤠᤛᤧᤴᤏᤥ ᤜᤧᤰᤁᤩᤠᤱ ᤛᤠᤶᤕᤥᤒᤠ ᤁᤢᤍᤥ᤺ᤵᤔᤠ ᤗᤠᤶᤔᤥ ‘ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ’ ᤔᤠᤱᤃᤧᤜᤧᤰᤁᤠᤛᤡᤏᤧᤓᤃᤪ ᤘᤣ᤹ ᤔᤏᤠ ᤛᤢᤘᤠᤱᤜᤠ᤹ᤖᤧ ᤂᤢᤏᤧ᤹ᤗᤠᤶᤒᤠ ᤜᤠᤱᤘᤠᤔᤢ᤹ᤀᤡ ᤔᤧᤄᤥᤛᤢᤖᤥ ᤜᤧᤰᤁᤩᤠᤱ ᤂᤢᤏᤧ᤹ᤀᤥᤀᤣ ᤂᤧᤱᤜᤠ᤹ ᤔᤡᤔᤡᤍᤡᤱ ᤔᤧᤈᤥᤰᤗᤥ॥” 3 ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤔᤧᤳᤋᤢᤛᤡᤖᤥ. “ᤂᤡᤏᤡ᤹ ᤁᤧᤗᤧᤖᤢᤶᤒᤠ ᤂᤠᤶᤔᤡᤴ ᤌᤥ᤺ᤰᤂᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤋᤡᤱᤃᤪᤣᤰᤗᤠ ᤗᤢᤶᤔᤥ ᤕᤠ᤹ᤖᤡ᤺ᤶᤒᤠ ᤔᤧᤜᤣ᤹ᤖᤠᤶᤔᤡᤴᤏᤧ᤹ᤀᤥ॥ 4 ᤕᤜᤢᤍᤠᤀᤣ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤛᤣ. ᤕᤜᤘᤣ ᤍᤠᤱᤒᤧᤴᤏᤢ ᤁᤧᤈᤥᤃᤢᤶᤒᤠ ᤔᤠᤱᤜᤢᤵᤗᤧ ᤀᤡᤒᤢ ᤜᤷᤍᤥ ᤜᤧᤰᤔᤠᤴ ᤕᤠᤶᤔᤥ ᤆᤥᤃᤧᤶᤔᤧ᤹ᤀᤥ ᤁᤖ ᤁᤴ ᤀᤡᤒᤢᤴ ᤁᤧᤈᤥᤃᤢᤶᤔᤡᤸᤗᤧ ᤛᤡᤰᤗᤢᤱᤔᤥᤗᤠᤶᤒᤠᤀᤣ ᤆᤥᤃᤧᤶᤔᤧ᤹ᤀᤥ॥ ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤑᤧᤴᤕᤠ᤺ᤶᤒᤰᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤛᤡᤰ ᤐᤥ᤺ᤰᤔᤧᤴ ᤔᤡ ᤜᤧᤰᤁᤣ ᤜᤢᤖᤢᤖᤢᤏᤠ ᤋᤡ᤺ᤳᤗᤥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤂᤧᤴ ᤛᤧᤵᤔᤠ ᤔᤧᤛᤢᤰᤋᤢᤴᤗᤥ॥” ᤕᤜᤢᤍᤠᤴ ᤏᤡᤱᤔᤡᤜᤠ᤹ᤖᤧ ᤔᤧᤓᤳᤋᤢ 5 ᤕᤜᤢᤍᤠᤒᤠ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤠᤶᤛᤡᤶᤔᤧ᤹ᤀᤥ. “ᤁᤧᤖᤧᤰ ᤗᤠᤈᤣ᤹ᤀᤥ ᤔᤧᤸᤗᤢᤰ ᤛᤠᤍᤠᤱᤅᤡᤴ ᤔᤢ᤺ᤳᤋᤧᤶᤔᤧ᤹ᤀᤥ᥄ ᤜᤧᤰᤁᤩᤠᤱ ᤂᤧᤶᤍᤧᤳᤗ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤶᤔᤧ᤹ᤀᤥ᥄ ‘ᤁᤧᤖᤧᤰ ᤆᤢᤵᤛᤡᤀᤠᤱ ᤗᤢᤱᤎᤠᤰ ᤔᤧᤛᤧᤳᤋᤢᤒᤠ ᤕᤧᤰᤕᤰᤁᤥ ᤂᤧᤳᤋᤠᤛᤡᤀᤠᤱ ᤐᤣᤃᤡᤖᤥ॥’ 6 ᤛᤡᤕᤥᤏ ᤗᤧᤵᤔᤠᤱ ᤐᤣ᤺ᤰᤔᤠ ᤔᤡᤰᤛᤣᤴ ᤐᤡᤀᤠᤛᤡᤶᤔᤧ᤹ᤀᤥ᥄ ᤔᤧᤴᤇᤢᤀᤣ ᤋᤠᤱᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤂᤧᤳᤇᤡᤱᤅᤠᤶᤔᤧ᤹ᤀᤠᤱ ᤐᤣᤃᤧᤶᤔᤧ᤹ᤀᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤰᤔᤠᤛᤡᤔᤠᤴ ᤋᤠᤖᤢᤱᤗ ᤐᤳᤋᤠᤖᤥ. ᤌᤠᤱᤃᤧᤳ ᤐᤡᤛᤠᤱᤗᤠᤶ ᤂᤠᤵᤐᤢᤌᤩ᤺ᤱ ᤀᤠᤈᤥ᤺ᤰᤆᤥ᤺ᤰᤐᤠᤴ ᤕᤢᤖ ᤐᤳᤗᤥ॥” 7 ᤁᤢᤄᤠᤀᤥᤗᤠᤶᤒᤠ ᤗᤳᤇᤠ ᤂᤡᤖᤡᤱᤒᤠᤎᤡᤰ ᤗ᤺ᤴᤍᤧᤀᤠᤱ ᤘᤠ᤹ᤖᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤁᤧᤔᤧᤱᤒᤠᤴ ᤗ᤺ᤴᤍᤧᤀᤠᤱ ᤘᤠ᤹ᤖᤥ॥ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤆᤥ᤺ᤰᤛᤧ ᤂᤧᤴ ᤋᤠᤖ ᤐᤳᤗᤥ॥ ᤂᤡᤏᤡ᤹ ᤕᤧᤰᤕᤰᤜᤠ᤹ ᤌᤢᤵᤐᤠᤱ ᤗᤢ᤺ᤶᤒᤣ᤺ᤰᤗᤥ ᤜᤧᤰᤁᤩᤠᤱ ᤂᤧᤵᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤘᤠ᤹ᤔᤠ ᤔᤧᤴᤇᤢᤰᤏᤧᤴᤗᤥ॥ 8 ᤂᤧᤸᤗᤧᤆᤥᤃᤢᤸᤗᤧ ᤛᤃᤡᤋᤣᤳ ᤆᤠᤰᤂᤧᤶᤔᤧ᤹ᤀᤥ. ᤜᤠᤒᤧᤶᤔᤧ᤹ ᤜᤧᤰᤁᤩᤠᤱ ᤔᤧᤖᤡᤱ ᤌᤰᤋᤧᤶᤔᤧ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤡᤵᤔᤠᤃᤧᤄᤢᤒᤠ ᤁᤢᤕᤠ᤺ᤰᤗᤧ᤹ᤔᤠᤴ ᤀᤠᤏᤡ᤹ᤗᤠᤶᤒᤠ ᤔᤧᤶᤒᤣ᤺ᤰᤁᤣ ᤘᤠ᤹ᤖᤥ॥ 9 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤂᤧᤴ ᤕᤧᤴᤏᤥ ᤜᤠᤱᤜᤠ᤹ ᤜᤧᤰᤁᤩᤠᤱ ᤜᤠᤱᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤠ᤺ᤴᤇᤡᤱᤔᤠ ᤔᤧᤴᤇᤢᤰᤏᤧᤴᤗᤥ. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤢᤴᤇᤡ᤹ ᤛᤠᤶᤔᤡᤰᤗᤧ ᤗᤧᤖᤢᤛᤡᤖᤥ ᤂᤧᤒᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤔᤠᤀᤠᤱ ᤕᤱᤔᤠ ᤔᤧᤛᤡᤖᤥ॥” 10 ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤧᤳᤋᤢᤱ. “ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ ᤁᤧᤖᤧᤰ ᤀᤡᤱᤃᤧᤗᤧᤰᤋᤢᤛᤡᤖᤧᤳᤇ᥄ ᤂᤧᤱᤜᤠ᤹ ᤛᤏᤠᤖᤢᤱ ᤁᤧᤄᤥᤛᤢᤶ ᤁᤧᤔᤧᤳᤋᤢᤛᤡᤀᤠᤱ ᤁᤧᤘᤕᤧᤖᤥ ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤃᤡ᤺ᤱᤔᤥ ᤋᤠᤓᤣᤴ ᤆᤢᤰᤋᤧᤀᤠᤱ ᤐᤳᤗᤥ॥” 11 ᤂᤧᤴ ᤕᤧᤶᤔᤥ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠᤜᤠ᤹ᤖᤧ ᤀᤰᤋᤱᤒᤠ ᤔᤧᤄᤧᤵᤛᤢᤖᤥ. “ᤀᤠᤀᤥ᤹ᤀᤥ᤹ᤒᤠ ᤛᤢᤖᤡᤳ ᤌᤡᤰ ᤀᤠᤔᤏᤠᤜᤠ᤹ᤀᤥ ᤋᤠᤖᤥ ᤂᤧᤱᤃ ᤀᤣ᤺ᤰᤛᤠᤍᤧᤴᤏᤥᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤁᤥ᤺ᤰᤔᤠᤀᤥᤗᤠᤶ ᤜᤢ᤺ᤰᤋᤠᤖᤥ॥ ᤂᤧᤴ ᤕᤠ᤹ᤛᤡᤵᤗᤰ ᤁᤧᤓᤧᤒᤠ ᤁᤧᤍᤣ᤹ᤒᤠ ᤆᤢᤰᤛᤠ ᤛᤢᤖᤡᤳ ᤔᤣ᤺ᤴᤗᤥ. 12 ᤁᤖ ᤀᤠᤀᤡᤱᤈᤠᤱᤗᤠᤶ ᤁᤧᤜᤢ᤺ᤰᤐᤠ ᤁᤧᤍᤠᤒᤠ ᤂᤧᤴ ᤛᤢᤖᤡ᤺ᤳᤋᤡᤴ ᤁᤡᤵᤔᤠ ᤁᤧᤄᤢᤒᤠ ᤆᤥᤰᤗᤥ॥ ᤀᤠᤔᤏᤠᤜᤠ᤹ ᤂᤧᤴ ᤂᤢᤶᤍᤡᤱᤅᤡᤸᤗᤧ ᤀᤡᤱᤈᤠᤱᤅᤡᤴ ᤀᤠᤱᤃᤠ᤹ ᤀᤠᤒᤠᤅᤣ ᤐᤡᤖᤢᤱᤛᤡᤱᤗ ᤐᤳᤋᤠᤖᤥ॥” ᤕᤜᤢᤍᤠᤴ ᤏᤡᤱᤔᤡᤜᤠ᤹ᤖᤧ ᤔᤧᤃᤒᤢ 13 ᤀᤥᤔᤧᤳᤋᤧᤶᤔᤧ᤹. ᤂᤡᤏᤡ᤹ ᤏᤡᤱᤔᤡᤴ ᤂᤠ᤹ᤔᤡ᤺ᤵᤐᤠᤴ ᤜᤧᤰᤁᤣ ᤋᤠᤖ ᤐᤳᤗᤥ॥ ᤂᤧᤸᤗᤧ ᤁᤢᤎᤱᤅᤥᤒᤠ ᤀᤴᤗᤠᤜᤠ᤹ ᤁᤡᤵᤔᤠ ᤁᤧᤄᤢᤒᤠ ᤛᤢᤖᤡᤳ ᤁᤣᤈᤱ ᤁᤢᤀᤡᤛᤡᤰ ᤔᤧᤍᤠᤖᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤀᤴᤜᤠ᤹ ᤔᤢᤕᤠᤜᤠ᤹ᤏᤢ᤺ᤸᤗᤧᤀᤠᤱ ᤔᤧᤈᤠᤳᤗᤥ॥ ᤆᤡ᤺ᤳᤋᤧᤛᤩᤧᤖᤥ. ᤀᤠᤏᤡᤃᤧᤃ ᤛᤢᤎᤠᤶ ᤐᤥ᤺ᤰᤂᤡᤃᤧ᥄ ᤀᤠᤏᤡᤃᤣ ᤜᤍ᤹ ᤔᤧᤃᤡᤃᤧᤖᤥ᥄ 14 ᤕᤖᤢᤛᤗᤧ᤺ᤶᤔᤣ. ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤂᤧᤏᤧ᤹ ᤛᤡᤰᤗᤢᤱᤔᤥᤗᤠᤶᤒᤠᤀᤣ ᤘᤠᤜᤵᤋᤧ᤹ᤀᤠᤱ ᤗᤠᤵᤑᤢᤛᤧ᤹ᤀᤥ ᤜᤧᤰᤁᤩᤠᤱ ᤂᤧᤏᤧ᤹ ᤋᤠᤱᤃᤧᤛᤧ᤺ᤵᤛᤡᤱᤗᤥ॥ ᤀᤠᤓᤧᤸᤗᤧ ᤌᤠᤖᤡᤰ ᤂᤧᤏᤧ᤹ ᤁᤧᤛᤡᤰᤗᤢᤱᤔᤥ ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ ᤁᤧᤃᤳᤋᤢᤒᤠᤒᤣ᥅ 15 ᤍᤠᤏ ᤕᤧᤰᤕᤰᤗᤠᤶ ᤗᤳᤇᤠ ᤀᤡᤰᤗᤠᤎᤡᤰᤗᤧ ᤀᤢᤘᤠ ᤆᤥᤃᤢᤖ ᤐᤳᤗᤥ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤑᤠᤱᤈᤱᤗᤠᤶᤒᤠ ᤔᤏᤠᤜᤠ᤹ᤖᤧ ᤔᤧᤰᤔᤠᤛᤡᤔᤠ ᤀᤡᤱᤄᤱ ᤔᤧᤛᤧᤛᤢᤖ ᤔᤧᤘᤠ᤹ᤖᤥ॥ 16 “ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤳᤋᤧᤶᤛᤡᤶᤔᤧ᤹ᤀᤥ. ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹ ᤁᤴ ᤀᤡᤱᤄᤱᤅᤡᤴ ᤐᤡᤖᤧᤶᤛᤡᤶᤔᤧ᤹ᤀᤥ ᤕᤧᤰᤕᤰ ᤁᤧᤓᤵᤐᤠ ᤌᤰᤛᤢᤒᤠᤜᤠ᤹ ᤔᤠ᤺ᤱᤄᤠ ᤗᤠᤈᤣ᤹ᤗᤠᤶ ᤔᤧᤍᤠᤖ ᤔᤧᤒᤳᤗᤥ॥ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤌᤱᤗᤧ ᤀᤡᤰᤗᤠ ᤔᤧᤀ᤺ᤰᤗᤥ॥ 17 ᤀᤡᤰᤋᤠᤵ ᤁᤧᤃᤥᤒᤠ ᤔᤏᤠᤜᤠ᤹ ᤜᤧᤰᤁᤣ ᤂᤧᤱᤜᤠ᤹ᤖᤧ ᤕᤧᤰᤕᤰᤁᤡᤴ ᤔᤧᤃᤒᤢᤖᤥ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤔᤧᤈᤥᤃᤢᤀᤠᤱ ᤘᤠ᤹ᤖᤥ” ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 18 “ᤕᤜᤢᤍᤠᤀᤣ. ᤂᤧᤏᤧ᤹ ᤁᤧᤛᤢᤳᤏᤠ᤺ᤴ ᤏᤢ ᤂᤧᤏᤧ᤹ ᤁᤧᤕᤠ᤺ᤶᤒᤰᤁᤡᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤏᤧ᤹ ᤀᤠᤒᤠᤅᤣ ᤁᤧᤛᤶᤎᤠᤱ ᤁᤧᤍᤠᤖᤢᤖᤥ॥ ᤂᤧᤏᤧ᤹ ᤁᤧᤗᤠᤕᤥᤸᤗᤧ ᤁᤴ ᤁᤢᤈᤠᤃᤧᤓᤧᤶᤒᤠ ᤐᤠ᤺ᤴᤏᤡᤴ ᤋᤠᤖᤢᤒᤠᤖᤥ. ᤂᤧᤸᤗᤧ ᤂᤧᤏᤧ᤹ ᤁᤧᤏᤧᤖᤧᤳᤋᤡᤴ ᤌᤢᤒᤢ᤹ᤖᤥ॥” ᤀᤠᤒᤠᤅᤣ ᤁᤢᤔᤏᤠᤜᤠ᤹ᤖᤧ ᤗᤠᤃᤡ ᤕᤷᤔᤡᤕᤠᤴ ᤔᤧᤖᤡᤱ ᤌᤰ 19 ᤕᤧᤳᤋᤢᤰᤂᤣ. ᤀᤠᤱᤃᤠ᤹ ᤁᤴ ᤕᤧᤳᤋᤢᤰᤂᤣᤴ ᤏᤠᤛᤡᤌ᤺ᤵᤔᤠ ᤔᤧᤛᤢᤰᤁᤠᤴᤗᤥ᥄ ᤀᤠᤏᤧᤖᤧᤳᤋᤡᤴ᥄ ᤀᤠᤱᤃᤠ᤹ ᤀᤠᤏᤧᤖᤧᤳᤋᤡᤴ ᤛᤠ᤹ᤖᤡᤰ ᤗᤢᤵᤗᤢᤵ ᤗ᤹ᤖ ᤐᤳᤗᤥ᥄ ᤀᤠᤱᤃᤠ᤹ ᤛᤫᤠ᤺ᤳᤋᤠᤱ ᤕᤢᤱᤔᤠ ᤔᤧᤛᤢᤰᤁᤠᤴᤗᤥ. ᤀᤠᤱᤃᤠ᤹ ᤌᤢᤳᤋᤢᤖᤡ᤺ᤵᤐᤠᤸᤗᤧ ᤁᤢᤀᤡᤰᤗᤠᤴ ᤏᤢ ᤌᤱᤅᤡᤸᤗᤧ ᤜᤕᤱ ᤁᤡᤸᤗᤡᤱᤅᤡᤴ ᤂᤧᤵᤛᤢᤱᤗᤥ॥ 20 ᤗᤳᤌᤡᤰ ᤔᤧᤰᤔᤠᤛᤡᤔᤠ ᤀᤣᤃᤠᤱ ᤘᤣ᤹ ᤔᤧᤰᤔᤠᤛᤡᤔᤠᤴ ᤋᤠᤖᤥ. ᤁᤧᤖᤧᤰ ᤗᤠᤈᤣ᤺ᤴᤏᤣ ᤆᤡᤈᤡ ᤂᤰᤂᤰ ᤐᤥᤱᤗᤥ॥ ᤜᤰᤆᤄᤳ ᤀᤠᤏᤡᤃᤣ ᤛᤠ᤺ᤱᤃᤠᤜᤡᤶᤜᤠ᤹ ᤂᤠᤵᤐᤢᤌᤩ᤺ᤱ ᤐᤥᤱᤗᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤥ᤺ᤴᤍᤠᤜᤠ᤹ ᤋᤧ᤺ᤱᤅᤠᤱ ᤁᤢᤈᤩᤥ᤺ᤱ ᤐᤥᤱᤗᤥ॥ 21 ᤀᤠᤵᤑᤠᤸᤗᤧ ᤌᤠᤖᤡᤰ ᤋᤧᤴᤎᤱ ᤏᤡᤛᤠᤏ ᤀᤥᤔᤧᤵᤔᤠ ᤐᤥᤱᤒᤠᤒᤣ᥅ ᤜᤧᤰᤁᤩᤠᤱ ᤔᤧᤸᤗᤢᤰ ᤛᤠᤍᤠᤱᤜᤠ᤹ ᤗᤠᤀᤡᤰᤐᤠ ᤂᤧᤶᤔᤠ ᤐᤥᤱᤒᤠᤒᤣ᥅ 22 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤍᤱ ᤔᤧᤈᤥᤰᤗᤥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤠᤴᤗᤥ॥ ᤂᤧᤱᤜᤠ᤹ ᤏᤧᤜᤡᤏᤡᤱᤘᤠ᤹ ᤔᤣ᤺ᤴᤏᤣᤒᤠ ᤀᤅᤧ᤺ᤰᤘᤠᤜᤠ᤹ ᤜᤧᤰᤁᤣ ᤔᤧᤗ᤹ᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤠᤛᤡᤱᤏᤡ᤺ᤵᤔᤠ ᤛᤠᤶᤔᤡᤴᤏᤣ ᤜᤥᤵᤗᤥ॥ ᤂᤧᤱᤜᤠ᤹ ᤋᤠᤰᤁᤧᤓᤧ᤹ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤗᤧᤒᤠ ᤔᤧᤈᤥᤰᤗᤥ. ᤁᤖ ᤂᤧᤱᤜᤠ᤹ᤖᤧ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤸᤗᤧᤛᤢᤴᤗᤥ॥” ᤕᤷᤔᤡᤕᤠ᤺ᤸᤗᤧ ᤔᤧᤰᤔᤠᤛᤡᤔᤠ ᤛᤢᤵᤑᤥᤴ ᤏᤡᤛᤢ 23 ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤥᤔᤧᤳᤋᤢᤱᤗᤥ. ᤂᤧᤴ ᤔᤢᤜ᤺ᤱᤗᤡᤱ ᤂᤧᤜ᤺ᤱᤗᤡᤱ ᤏᤢ ᤔᤢᤛᤢᤴᤏᤣ ᤂᤧᤛ᤻ᤛᤢᤴᤏᤣ ᤏᤧᤛ᤻ᤛᤧᤖᤥ. ᤀᤠᤱᤃᤠ᤹ ᤋᤖ᤺ᤱᤍᤡᤱ ᤋᤠᤱᤛᤠᤱᤒᤧᤴ ᤀᤥᤔᤧᤳᤋᤢᤱᤗᤥ. ᤂᤧᤵᤔᤥ ᤆᤒᤧ᤺ᤳᤇᤡᤰᤁᤠᤱ ᤂᤠᤀᤥ᤺ᤵᤔᤠᤴ ᤜᤥ᤺ᤵᤋᤧᤖᤥ॥ 24 ᤀᤠᤱᤃᤠ᤹ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤀᤥᤔᤧᤳᤋᤢᤱ. ᤂᤧᤱᤜᤠ᤹ ᤔᤧᤕᤰᤂᤧᤖ ᤔᤧᤕᤢᤅᤧᤖᤥ ᤜᤧᤰᤁᤩᤠᤱ ᤌᤧᤃᤢ ᤔᤠᤱᤘᤠᤜᤠ᤹ ᤕᤠᤱᤏᤠ ᤁᤳᤏᤠ ᤔᤧᤄᤱᤛᤡᤱᤗ ᤔᤧᤕᤢᤅᤧᤖᤥ॥ 25 ᤀᤠᤱᤃᤠ᤹ ᤀᤥᤔᤧᤳᤋᤢᤱ ᤜᤧᤰᤁᤩᤠᤱ ᤂᤧᤵᤔᤥ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤔᤧᤜᤥ᤺ᤵᤋᤧᤖᤥ. ᤋᤠᤱᤛᤠᤰᤐᤥᤒᤠ ᤐᤢᤜᤠ᤹ᤀᤠᤱ ᤔᤧᤒᤧᤖᤧ ᤔᤧᤈᤢᤖᤧᤀᤠᤱ ᤔᤧᤘᤕᤧᤖᤥ॥ 26 ᤀᤠᤱᤃᤠ᤹ ᤀᤥᤔᤧᤳᤋᤢᤱ ᤜᤧᤰᤁᤩᤠᤱ ᤆᤠᤃᤧᤏᤢ᤹ᤒᤠ ᤏᤢᤒᤠ ᤂᤠᤶᤔᤡᤴ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤐᤥ᤺ᤰᤂᤧᤖᤥ. ᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤒᤥ᤺ᤰᤂᤧᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤢᤕᤠᤰ ᤗᤧ᤹ᤖᤧᤒᤠᤸᤗᤧ ᤆᤥᤃᤢᤸᤗᤧ ᤔᤧᤔᤧᤃᤧᤖᤥ॥ 27 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤀᤠᤱᤃᤠ᤹ ᤁᤴ ᤗᤠᤈᤣᤴ ᤁᤧᤖᤧᤰ ᤆᤡᤈᤡ ᤂᤰᤂᤰ ᤆᤥᤃᤢᤱᤗᤥ ᤁᤖ ᤂᤧᤴ ᤂᤰᤐᤧᤰᤁ ᤔᤧᤔᤧᤱᤅᤠᤴᤗᤥ॥ 28 ᤁᤸᤗᤧᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤧᤖᤡᤱ ᤌᤰᤗᤥ ᤜᤧᤰᤁᤩᤠᤱ ᤌᤥ ᤋᤠᤱᤛᤠᤰᤐᤠᤴ ᤂᤠᤔᤠᤰᤋᤢᤖᤥ॥ ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠᤴ ᤔᤧᤗᤧᤱᤅᤠᤴᤗᤥ॥” 29 ᤀᤴ ᤁᤧᤕᤢᤰᤐᤠ ᤏᤢ ᤋᤥᤱ ᤁᤧᤀᤠᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤰᤗᤠᤴ ᤔᤧᤄᤧᤵᤛᤢᤖᤥ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠᤜᤠ᤹ ᤀᤰᤗᤧᤰ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ॥ ᤁᤢᤓᤠ ᤋᤠᤶᤓᤢᤱ ᤕᤠᤰᤗᤠ ᤗᤧᤵᤔᤠᤱ ᤔᤧᤒᤡᤴ ᤔᤧᤄᤧᤳᤗᤥ. ᤘᤣ᤹ᤜᤠ᤹ᤖᤧ ᤛᤡᤕᤠᤰᤐᤣ᤹ ᤌᤧᤕᤠᤰᤐᤣ᤹ ᤗᤢᤱ ᤛᤶᤎᤠᤱ ᤔᤧᤗᤡᤅᤢᤖᤥ. ᤕᤧᤰᤕᤰᤜᤠ᤹ ᤁᤧᤖᤧᤰ ᤆᤡᤈᤡ ᤂᤰᤂᤰ ᤐᤥᤱᤗᤥ. ᤕᤠᤶᤔᤥ ᤂᤧᤵᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤘᤠ᤹ᤏᤧᤴᤗᤥ॥ 30 ᤕᤖᤢᤛᤗᤧ᤺ᤶᤔᤣ ᤂᤧᤏᤧ᤹ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤗᤥ᥄ ᤌᤣᤀᤠᤱᤏᤧ ᤂᤧᤏᤧ᤹ ᤜᤧ᤺ᤳᤋᤠᤱᤒᤠ ᤆᤠᤱ ᤁᤧᤈᤠᤰᤂᤢᤒᤣ᥅ ᤌᤣᤀᤠᤱ ᤂᤧᤏᤧ᤹ ᤛᤠᤶᤔᤩᤠᤱ ᤘᤠ᤺ᤳᤋᤡᤜᤠ᤹ ᤁᤧᤘᤠᤖᤢᤒᤣ᥅ ᤔᤡᤰᤁᤥ ᤌᤣᤀᤠᤱ ᤔᤠᤰᤛᤢ᤺ᤴᤍᤠᤴ ᤁᤧᤈᤠ᤺ᤴᤍᤢᤒᤠᤒᤣ᥅ ᤂᤧᤏᤧ᤹ ᤀᤠᤒᤠᤅᤣ ᤜᤏᤧᤖᤰ ᤁᤧᤈᤥ᤺ᤰᤛᤡᤱᤗᤥ॥ ᤂᤧᤏᤧ᤹ ᤏᤠᤃᤧᤏᤢ᤹ᤒᤠᤜᤠ᤹ᤖᤧ ᤂᤧᤏᤧ᤹ ᤁᤧᤶᤏᤠ᤹ᤖᤧᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥ 31 ᤛᤠᤃᤵᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤛᤠᤘᤠᤔᤠᤴ ᤕᤠ᤺ᤵᤐᤠ ᤜᤧᤰᤋᤱᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱᤗᤥ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤀᤅᤧ᤺ᤰᤘᤠ ᤛᤠᤃᤧᤃᤵᤔᤠ ᤔᤧᤴᤇᤢᤔᤠᤴ ᤑᤡ᤺ᤰᤐᤠ ᤜᤧᤰᤁᤣ ᤂᤧᤵᤛᤢᤱᤗᤥ॥ ᤜᤧᤱᤃᤧ᤺ᤰᤁᤠᤱ ᤜᤧᤱᤃᤧᤰ ᤗ᤹ᤖ ᤛᤰᤔᤠ ᤛᤥ᤺ᤴᤇᤡᤱᤗᤥ ᤜᤧᤰᤁᤩᤠᤱ ᤁᤢᤜᤢᤰᤁᤡᤴ ᤛᤴᤇᤢᤖᤥ ᤂᤧᤒᤩᤠᤱ ᤏᤢᤔᤠᤛᤢᤰᤔᤠ ᤕᤖᤢᤛᤗᤧ᤺ᤶᤔᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤑᤡ᤺ᤰᤗᤥ “ᤆᤡ᤺ᤳᤋᤧᤛᤩᤧᤖᤥ. ᤀᤠᤱᤃᤠ᤹ ᤀᤠᤛᤰᤔᤠ ᤐᤢ᤹ᤖᤧᤀᤠᤱ ᤘᤠ᤹ᤖᤥ᥄ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤛᤧᤳᤇᤧ ᤔᤧᤍᤠᤖ ᤔᤧᤒᤳᤗᤥ᥄” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.