ᤕᤷᤔᤡᤕᤠ 39 - LIFOTNT

ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤐᤥᤱ᤹

¹ ᤛᤡᤍᤁᤡᤕᤠᤜ᤺ᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧᤒᤠ ᤑᤠᤱᤛᤡᤃᤣᤰᤐᤠ ᤋᤱᤒᤣ ᤁᤧᤖᤧᤒᤠ ᤌᤡᤒᤥᤱ ᤗᤠᤀᤥ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤴ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤑᤧᤳᤋᤢᤛᤡᤀᤠᤱ ᤑᤧᤖᤧ ᤜᤧᤰᤁᤩᤠᤱ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤑᤳᤋᤢᤀᤠᤱ ᤁᤡᤷᤃᤵ ᤁᤒᤢ॥

² ᤛᤡᤍᤁᤡᤕᤠᤜ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶ ᤌᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤁᤧᤖᤧᤒᤠ ᤗᤡᤛᤡᤃᤣᤰᤐᤠ ᤗᤠ᤺ᤸᤗᤧ ᤑᤠᤱᤛᤡᤃᤣᤰᤐᤠ ᤕᤧᤴᤏᤥ ᤒᤣᤒᤡᤗᤥᤏᤡᤜᤠ᤹ᤖᤧ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤜᤠ᤹ ᤔᤧᤗᤢ᤺ᤴᤍᤢ॥

³ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤧᤖᤧᤰ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤔᤧᤓᤧᤖᤧ ᤜᤧᤰᤁᤩᤠᤱ ᤕᤶᤒᤠ ᤋᤠ᤺ᤰᤜᤴᤏᤡᤸᤗᤧ ᤁᤢᤗᤢᤶᤔᤥ ᤜᤠᤱᤜᤠᤱᤅᤠᤱ ᤔᤧᤕᤢᤱᤛᤡᤱ॥ ᤂᤧᤱᤜᤠ᤹ᤀᤥ ᤏᤣᤷᤃᤗ-ᤛᤖᤣᤛᤖ ᤜᤧᤰᤁᤩᤠᤱ ᤛᤶᤃᤖ ᤏᤣᤒᤥ. ᤛᤷᤛᤣᤁᤡᤔ ᤏᤢ ᤗᤳᤇᤠ ᤘᤣ᤹ ᤏᤣᤷᤃᤗ-ᤛᤖᤣᤛᤖᤧᤴ ᤘᤕᤧ॥

⁴ ᤀᤠᤸᤗ ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤴ ᤏᤢ ᤁᤧᤖᤧᤰ ᤌᤰᤛᤢᤒᤠᤜᤠ᤹ᤖᤧ ᤒᤣᤒᤡᤗᤥᤏᤡᤜᤠ᤹ᤖᤧ ᤕᤧᤰᤕᤰᤁᤡᤴ ᤔᤧᤗᤢ᤺ᤴᤍᤢᤒᤠ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤔᤧᤄᤧᤳᤇᤡᤱ॥ ᤂᤧᤱᤜᤠ᤹ᤖᤧ ᤛᤧᤴᤍᤡᤰᤐᤠ ᤂᤠᤔᤠᤰᤔᤧᤴ ᤔᤧᤜᤠᤱᤄᤢ ᤂᤧᤒᤩᤠᤱ ᤏᤠ᤺ᤴᤎᤠᤱ ᤁᤳᤏᤠ᤺ᤴᤎᤠᤱ ᤗᤢᤱᤎᤠᤰ ᤁᤧᤕᤧᤵᤐᤠᤸᤗᤧ ᤁᤢᤓᤡ᤺ᤵᤔᤥᤒᤠ ᤗᤠᤶᤎᤣ᤺ᤵᤐᤠᤗᤠᤶ ᤔᤧᤓᤡ᤺ᤴᤇᤡᤱᤅᤠᤱ ᤜᤠᤱᤅᤡᤸᤗᤧ ᤁᤢᤓᤢᤱᤀᤡᤰᤗᤠᤶ ᤔᤧᤒᤥ᤺ᤰᤂᤧᤖ ᤛᤧᤴᤍᤡᤰᤛᤠ ᤕᤷᤍᤏ ᤏᤧᤏᤧᤒᤠᤍᤧᤴ ᤗᤧᤵᤔᤠᤱ ᤔᤧᤎᤠᤛᤡᤱ॥

⁵ ᤁᤖ ᤒᤣᤒᤡᤗᤥᤏᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠ᤺ᤳᤋᤢ ᤔᤧᤍᤣ᤹ᤖᤢᤛᤡ ᤜᤧᤰᤁᤩᤠᤱ ᤕᤖᤡᤜᤥᤒᤠ ᤏᤧᤏᤧᤒᤠᤍᤧᤴᤏᤥ ᤛᤡᤍᤁᤡᤕᤠᤜ᤺ᤴ ᤔᤧᤛᤡ᤹ᤖᤢᤀᤠᤱ ᤔᤧᤍᤧᤶᤛᤢ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤧᤶᤛᤢᤀᤠᤱ ᤜᤔᤠᤋ ᤗᤠᤈᤣ᤹ᤒᤠ ᤖᤡᤒ᤻ᤗᤠ ᤔᤧᤵᤔᤏᤠᤒᤠ ᤕᤧᤰᤕᤰᤁᤥ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧᤀᤥ ᤔᤧᤍᤣ᤹ᤖᤢ॥ ᤜᤧᤰᤁᤩᤠᤱ ᤂᤧᤵᤔᤥ ᤂᤧᤸᤗᤧ ᤛᤡᤍᤁᤡᤕᤠᤜ᤺ᤴ ᤂᤢᤶᤍᤡᤱ ᤐᤡᤔᤠ ᤂᤠᤛᤧᤴ ᤆᤥᤃᤢ॥

⁶ ᤛᤡᤍᤁᤡᤕᤠᤜ᤺ᤸᤗᤧ ᤀᤥᤔᤧᤳᤋᤢᤛᤡᤀᤠᤱ ᤐᤳᤇᤧᤖᤀᤣ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤛᤧᤖᤢᤛᤡ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤀᤠᤱ ᤛᤧᤖᤢᤛᤡ॥

⁷ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤛᤡᤍᤁᤡᤕᤠᤜ᤺ᤸᤗᤧ ᤁᤢᤔᤡᤰᤜᤠ᤹ ᤗᤡᤃᤰ ᤔᤧᤗ᤺ᤳᤋᤢ ᤔᤧᤍᤣᤛᤢ. ᤂᤧᤒᤩᤠᤱ ᤒᤣᤒᤡᤗᤥᤏᤀᤥ ᤋᤣ᤹ᤔᤠᤖᤧ ᤗᤠᤃᤡ ᤁᤠᤛᤠ ᤌᤰᤁᤪᤱᤜᤠ᤹ᤖᤧ ᤀᤡᤔᤧᤄᤣ᤺ᤰᤂᤢ॥

⁸ ᤜᤠᤒᤠ ᤂᤧᤴ ᤕᤧᤶᤔᤥ. ᤒᤣᤒᤡᤗᤥᤏᤒᤠᤜᤠ᤹ᤖᤧ ᤕᤖᤢᤛᤗᤧᤔᤒᤠ ᤜᤠᤱᤜᤡᤶᤔᤡᤴ ᤏᤢ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ ᤔᤡᤔᤧᤎᤡᤰᤂᤢ ᤔᤧᤍᤣᤛᤢ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤜᤠ᤹ ᤔᤧᤗᤢ᤺ᤴᤍᤢ ᤔᤧᤍᤣᤛᤢ॥

⁹ ᤂᤧᤒᤩᤠᤱ ᤁᤧᤄᤧᤳᤇᤡᤱᤒᤠ ᤁᤧᤒᤣ᤺ᤰᤐᤠᤀᤠᤱ ᤒᤣᤒᤡᤗᤥᤏᤡᤜᤠ᤹ᤖᤧᤀᤥ ᤁᤧᤏᤢ᤺ᤱᤒᤠ ᤁᤧᤍᤠᤒᤠᤜᤠ᤹ ᤏᤢ ᤕᤧᤰᤕᤰᤁᤥ ᤐᤰᤔᤧᤎᤩᤧ ᤔᤧᤕᤠ᤺ᤰᤋᤧᤒᤠ ᤔᤏᤠᤜᤠ᤹ ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤸᤗᤧ ᤋᤧᤶᤛᤢᤛᤡᤀᤠᤱ ᤒᤣᤒᤡᤗᤥᤏᤀᤥ ᤋᤣ᤹ᤖᤢᤛᤡ॥

¹⁰ ᤁᤖ ᤁᤢᤎᤣᤀᤠᤱ ᤁᤧᤜᤥᤵᤐᤠ ᤕᤠᤱᤃᤧᤛᤠ᤹ᤒᤠ ᤔᤏᤠᤜᤠ᤹ ᤏᤒᤢᤈᤖᤍᤠᤏᤧᤸᤗᤧ ᤕᤜᤢᤍᤠ ᤗᤠᤈᤣ᤹ᤀᤥ ᤗᤧᤖᤢᤎᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤧ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤏᤢ ᤀᤡᤰᤋᤠᤵᤜᤠ᤹ ᤐᤡᤖᤢᤎᤛᤡᤖᤥ॥

ᤕᤷᤔᤡᤕᤠᤴ ᤕᤜᤢᤍᤠ ᤗᤠᤈᤣ᤹ᤀᤥ ᤕᤠ᤺ᤰ

¹¹ ᤁᤖ ᤒᤣᤒᤡᤗᤥᤏᤒᤠ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤁᤢᤎᤰ ᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤴ ᤕᤷᤔᤡᤕᤠᤴ ᤁᤥ᤺ᤵᤔᤠ ᤐᤠᤱᤄᤢ॥

¹² ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤥᤔᤧᤳᤋᤧᤶᤔᤧ᤹. ᤂᤢᤏᤧ᤹ ᤏᤢᤖᤡᤰᤁᤠᤱ ᤔᤧᤱᤃᤠ᤺ᤴᤏᤣ ᤁᤶᤒᤪᤠᤱ ᤔᤧᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤋᤱᤃᤠᤶ ᤆᤥᤃᤧᤶ ᤐᤡᤖᤧᤶᤔᤧ᤹॥”

¹³ ᤂᤧᤸᤗᤧᤆᤥᤃᤢᤸᤗᤧ ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤴ. ᤔᤠ ᤛᤢᤜᤠᤱᤕᤢᤰᤐᤠ ᤏᤒᤢᤛᤈᤒᤠᤏ. ᤜᤠᤱᤅᤡᤸᤗᤧ ᤁᤢᤛᤢᤈᤠᤛᤠᤒᤠ ᤋᤢᤶ ᤛᤢᤜᤠᤱᤕᤢᤰᤐᤠ ᤏᤣᤷᤃᤗ-ᤛᤖᤣᤛᤖᤧᤴ ᤏᤢ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤘᤣ᤹ ᤁᤧᤖᤧᤰ ᤁᤢᤛᤢᤜᤠᤱᤕᤢᤰᤐᤠᤜᤠ᤹

¹⁴ ᤕᤷᤔᤡᤕᤠᤴ ᤀᤡᤰᤁᤧᤃᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤢᤶᤔᤥᤗᤠᤶ ᤗᤠ᤺ᤰᤁᤠᤳ ᤗ᤺ᤵᤔᤠᤖᤧ ᤗᤠᤃᤡ ᤐᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤢᤏᤧ᤹ ᤜᤡᤶᤔᤥ ᤋᤠ᤺ᤵᤔᤠᤖᤧ ᤗᤠᤃᤡ ᤀᤜᤡᤁᤠᤔᤧᤸᤗᤧ ᤁᤢᤛ᤻ᤛᤠ. ᤛᤠᤐᤠᤏᤧᤸᤗᤧ ᤁᤢᤶᤔᤧᤴᤇᤠ᤹ ᤃᤍᤗᤩᤠᤜᤴ ᤀᤥᤔᤧᤵᤔᤠ ᤕᤠ᤺ᤶᤒᤰ ᤔᤧᤒᤡᤖᤢ॥ ᤀᤰᤂᤣᤗ᤹ᤖᤡᤰ ᤕᤷᤔᤡᤕᤠᤴ ᤀᤠᤒᤠᤅᤣ ᤁᤢᤔᤏᤠᤜᤠ᤹ᤏᤢ ᤛᤥᤖᤡᤰ ᤘᤕᤧ॥

¹⁵ ᤕᤷᤔᤡᤕᤠᤴ ᤀᤡᤰᤁᤧᤃᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤢᤶᤔᤥ ᤕᤠᤃᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤢᤏᤧ᤹ᤀᤥ ᤁᤧᤖᤧᤀᤠᤱ ᤘᤕᤧ.

¹⁶ “ᤂᤧᤏᤧ᤹ ᤐᤣᤃᤧ᤹ᤀᤠᤱ ᤀᤡᤌᤥᤐᤡᤕᤠᤒᤠ ᤀᤣᤒᤣᤍ-ᤔᤣᤗᤣᤁᤧᤴ ᤔᤧᤳᤋᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤕᤱᤔᤠ ᤛᤧᤖᤢᤱᤅᤠᤱ ᤘᤠ᤹ᤀᤠᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤆᤥᤃᤢᤱ᤹॥ ᤀᤠᤱᤃᤠ᤹ ᤏᤢ᤹ᤔᤠᤍᤠᤔᤠ ᤔᤣ᤺ᤴ. ᤔᤧᤰᤔᤠᤛᤡᤔᤧᤴ ᤐᤠᤱᤄᤢᤱ᤹॥ ᤁᤸᤗᤧ ᤁᤢᤔᤧᤰᤔᤠ ᤛᤡᤔᤧᤴ ᤂᤧᤏᤧ᤹ ᤁᤧᤏᤡᤛᤢ᤹.

¹⁷ ᤁᤖ ᤂᤧᤏᤧ᤹ ᤛᤠ᤹ᤖᤡᤰ ᤁᤧᤃᤡᤖᤢᤛᤡᤒᤠ ᤂᤧᤴ ᤔᤏᤠᤜᤠ᤹ᤗᤠᤶ ᤀᤠᤱᤃᤠ᤹ ᤛᤧ᤺ᤵᤏᤧ॥

¹⁸ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤏᤡᤱᤘᤠᤴ ᤀᤠᤱᤃᤠ᤹ᤀᤥ ᤁᤧᤕᤢᤰᤂᤢ. ᤀᤠᤱᤃᤠ᤹ ᤜᤠᤱᤛᤧᤶ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤜᤡᤱᤗ ᤕᤠ᤺ᤴᤏᤧ॥ ᤀᤠᤱᤃᤠ᤹ ᤂᤧᤏᤧ᤹ ᤋᤠᤱᤛᤧ᤺ᤵᤏᤧ ᤜᤧᤰᤁᤩᤠᤱ ᤋᤠᤵᤌᤣᤰ ᤕᤠᤶᤎᤣᤰ ᤁᤳᤏᤧ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥’”