ᤕᤷᤔᤡᤕᤠ 38 - LIFOTNTᤆᤫᤠ᤺ᤳ ᤕᤠᤱᤄᤥ᤺ᤵᤔᤠ ᤘᤠᤃᤧᤱᤅᤥ ᤕᤷᤔᤡᤕᤠᤴ ᤔᤧᤕᤠᤰᤋᤢᤒᤠ 1 ᤀᤠᤸᤗ ᤔᤳᤋᤠᤏᤖᤧ ᤁᤢᤛ᤻ᤛᤠ ᤛᤐᤋᤩᤠᤜ. ᤐᤛᤜᤢᤖᤖᤧ ᤁᤢᤛ᤻ᤛᤠ ᤃᤍᤗᤩᤠᤜ. ᤛᤣᤗᤣᤔᤩᤠᤜᤖᤧ ᤁᤢᤛ᤻ᤛᤠ ᤕᤜᤢᤁᤗ ᤏᤢ ᤔᤸᤁᤡᤕᤠᤜᤖᤧ ᤁᤢᤛ᤻ᤛᤠ ᤐᤛᤜᤢᤖᤖᤧ ᤕᤷᤔᤡᤕᤠ᤺ᤸᤗᤧ ᤔᤏᤠᤜᤠ᤹ ᤔᤧᤳᤋᤢᤛᤡᤖ ᤘᤕᤧᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢ॥ ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤛᤡᤖ ᤘᤕᤧ. 2 “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤳᤋᤡᤴᤜᤠ᤹ ᤕᤖᤢᤛᤗᤧ᤺ᤶᤔᤥ ᤔᤧᤕᤢᤱ᤹ ᤂᤧᤱᤜᤠ᤹ ᤋᤧᤴᤎᤱ. ᤛᤠᤰᤘᤠ᤺ᤴ. ᤀᤡᤃᤪ ᤔᤡᤱᤍᤣᤸᤗᤧ ᤔᤧᤛᤡ᤹᤺. ᤁᤖ ᤀᤠᤳᤋᤡᤴᤜᤠ᤹ ᤔᤧᤒᤣ᤺ᤰᤁᤠᤱ ᤒᤣᤒᤡᤗᤥᤏᤒᤠᤜᤠ᤹ᤀᤥ ᤔᤧᤄᤧ᤺ᤶᤛᤡᤱ᤹ ᤂᤧᤱᤜᤠ᤹ ᤔᤧᤴᤇᤡᤏᤧᤴ॥ ᤂᤧᤱᤜᤠ᤹ᤖᤧ ᤜᤡᤱᤔᤴ ᤔᤧᤄᤥᤛᤢ᤹॥ ᤂᤧᤱᤜᤠ᤹ ᤔᤧᤜᤡᤱ᤹॥’ 3 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤀᤠᤱ ᤐᤠ᤺ᤳᤋᤢ᤹. ‘ᤛᤧᤰᤂᤠᤀᤣ ᤁᤴ ᤕᤧᤰᤕᤰᤁᤡᤴ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤔᤧᤒᤡᤖᤢᤛᤡ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤕᤧᤰᤕᤰᤁᤡᤴ ᤂᤢᤴᤇᤡ᤹ ᤜᤢᤰᤁᤥ ᤔᤧᤎᤠᤛᤢ᤹॥’” 4 ᤂᤧᤸᤗᤧᤆᤥᤃᤢᤸᤗᤧ ᤛᤢᤜᤠᤱᤕᤢᤰᤐᤠᤜᤠ᤹ ᤔᤧᤒᤣᤀᤠᤱ ᤜᤠᤱᤅᤡᤴ ᤔᤧᤔᤧᤳᤋᤢ. “ᤍᤠᤱᤒᤣ. ᤁᤴ ᤔᤏᤠᤴ ᤛᤧᤵᤔᤠᤀᤣ ᤐᤥᤱ᤹᥄ ᤁᤴ ᤐᤖᤡᤰᤐᤠ ᤐᤠ᤺ᤴᤏᤡᤸᤗᤧ ᤀᤠᤏᤡ᤹ ᤀᤠᤗᤧᤖᤢᤶ ᤀᤠᤎᤠᤶᤛᤡᤶᤒᤠ ᤌᤰᤛᤢᤒᤠᤜᤠ᤹ ᤏᤢ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤘᤣ᤺ᤳ ᤕᤰᤂᤢ ᤐᤡᤖᤢᤛᤡ᤹॥ ᤁᤴ ᤔᤏᤠ᤺ᤸᤗᤧ ᤂᤢᤴᤇᤡ᤹ ᤏᤢ᤹ᤔᤠᤍᤠᤔᤠ ᤔᤣ᤺ᤴ ᤁᤖ ᤂᤧᤱᤜᤠ᤹ ᤜᤠᤴᤋᤡ ᤆᤥ᤺ᤰᤔᤠᤛᤡ ᤁᤢᤏᤡᤱᤘᤠ᤹ ᤘᤠ᤹᥄” 5 ᤛᤡᤍᤁᤡᤕᤠᤜ ᤜᤠᤱᤅᤡᤴ ᤋᤧᤴᤍᤧᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤗ. ᤐᤥᤱ. ᤂᤧᤏᤡ᤹ ᤛᤡᤖᤠ᤹ᤃᤧᤎᤠᤱᤒᤠ ᤜᤧᤰᤁᤣᤀᤣ ᤆᤥᤃᤧᤶᤔᤧ᤹॥ ᤀᤠᤱᤃᤠ᤹ ᤛᤠᤰᤔᤠ ᤔᤧᤛᤢᤰᤏᤡᤱᤅᤡᤴ॥” 6 ᤂᤧᤸᤗᤧᤆᤥᤃᤢᤸᤗᤧ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤕᤷᤔᤡᤕᤠᤴ ᤂᤢᤏᤧ᤹ ᤕᤢᤅᤧᤒᤠ ᤕᤠᤰᤑᤠᤱᤅᤥᤗᤠᤶ ᤔᤧᤍᤣ᤹ᤖᤢ ᤜᤧᤰᤁᤩᤠᤱ ᤀᤡᤰᤁᤧᤃᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤢᤶᤔᤥᤒᤠ ᤗᤳᤇᤠ ᤆᤫᤠ᤺ᤳ ᤕᤠᤱᤄᤥ᤺ᤵᤔᤠ ᤗᤢᤶᤒᤠᤳ ᤘᤠᤒᤠᤰᤁᤥ ᤌᤠᤰᤐᤠ᤺ᤸᤗᤧ ᤔᤧᤄᤣ᤺ᤰᤂᤢᤀᤠᤱ ᤔᤢ ᤔᤧᤎᤠᤛᤢ॥ ᤂᤧᤴ ᤜᤠᤱᤜᤡᤶᤛᤕᤱᤒᤠ ᤗᤳᤇᤠ ᤐᤠᤛᤡᤱᤐᤠᤍᤠᤱ ᤔᤸᤁᤡᤕᤠᤜᤖᤧ ᤁᤢᤈᤫᤠ᤺ᤳ ᤕᤠᤱᤄᤥ᤺ᤵᤔᤠ ᤗᤢᤶᤒᤠᤳ ᤏᤧᤛ᤻ᤛᤧ॥ ᤂᤧᤴ ᤆᤫᤠ᤺ᤳ ᤕᤠᤱᤄᤥ᤺ᤵᤔᤠ ᤗᤢ᤺ᤶᤒᤠ᤺ᤳ ᤘᤠᤒᤠᤰᤁᤥ ᤆᤩᤠ᤺ᤳ ᤔᤧᤕᤠᤃᤧᤴ. ᤁᤖ ᤔᤢ ᤆᤡᤶᤗᤡᤶ ᤆᤡᤶᤗᤡᤱ ᤁᤧᤗ᤹ᤒᤠ ᤗᤧᤰᤘᤠ ᤂᤠᤶ ᤕᤠᤃᤧ ᤜᤧᤰᤁᤩᤠᤱ ᤕᤷᤔᤡᤕᤠᤴ ᤂᤧᤴ ᤆᤡᤶᤗᤡᤶ ᤆᤡᤶᤗᤡᤱ ᤁᤧᤗ᤹ᤒᤠ ᤗᤧᤰᤘᤠ ᤂᤠᤶᤔᤥ ᤜᤢᤔᤧ॥ 7 ᤁᤖ ᤜᤠᤱᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤗᤳᤇᤠ ᤁᤢᤛᤡ ᤛᤢᤜᤠᤱᤕᤢᤰᤐᤠ ᤀᤣᤒᤣᤍ-ᤔᤣᤗᤣᤁᤧᤸᤗᤧ ᤕᤷᤔᤡᤕᤠᤴ ᤆᤫᤠ᤺ᤳ ᤕᤠᤱᤄᤥ᤺ᤵᤔᤠ ᤗᤢᤶᤒᤠ᤺ᤳᤋᤥ ᤗᤠᤵᤔᤧᤓᤢᤛᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤢ॥ ᤂᤧᤴ ᤕᤧᤶᤔᤥ ᤜᤠᤱᤅᤡᤴ ᤒᤣᤏᤩᤠᤔᤡᤏ ᤗᤠᤶᤎᤣ᤺ᤵᤐᤥ ᤂᤠᤛᤧᤴ ᤗᤥ᤺ᤴᤏᤢ ᤕᤢᤅᤧ॥ 8 ᤂᤧᤸᤗᤧᤆᤥᤃᤢᤸᤗᤧ ᤀᤣᤒᤣᤍ-ᤔᤣᤗᤣᤁᤧᤴ ᤜᤠᤱᤜᤡᤶᤔᤥ ᤗᤥ᤺ᤰᤋᤧ ᤐᤣᤀᤠᤱ ᤜᤠᤱᤅᤡᤴ ᤐᤠ᤺ᤴᤇᤠ᤺ᤳᤋᤢ॥ 9 ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤠ ᤜᤠᤱᤅᤣ. ᤁᤴ ᤔᤏᤠᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤴ ᤆᤫᤠ᤺ᤳ ᤕᤠᤱᤄᤥ᤺ᤵᤔᤠ ᤘᤠᤒᤠᤰᤁᤥ ᤔᤧᤕᤠᤰᤋᤢᤀᤠᤱ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤘᤠ᤹॥ ᤂᤧᤴ ᤛᤠᤰᤔᤧᤴᤈᤠ ᤜᤠᤖᤠ ᤛᤡᤖᤥ. ᤌᤣᤀᤠᤱᤓᤧᤸᤗᤧ ᤕᤧᤰᤕᤰᤁᤥ ᤂᤖᤧ᤺ᤱᤜᤠ᤹ ᤁᤧᤖᤧᤰ ᤔᤠᤖᤧᤀᤠᤱ ᤜᤥᤵ॥” 10 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤁᤢᤛᤡ ᤀᤣᤒᤣᤍ-ᤔᤣᤗᤣᤰᤁᤡᤴ ᤀᤧᤶᤓ ᤔᤧᤳᤋᤢ. “ᤁᤵᤔᤥᤏᤢ ᤛᤢᤶᤒᤥᤱ ᤀᤠᤔᤏᤠᤜᤠ᤹ ᤋᤣ᤹ᤖᤧᤛᤧ᤹ᤀᤠᤱ ᤛᤡᤔᤠᤏᤢ᤺ᤸᤗᤧ ᤋᤃᤡ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤴ ᤆᤫᤠ᤺ᤳ ᤕᤠᤱᤄᤥ᤺ᤵᤔᤠ ᤗᤢᤶᤒᤠᤳ ᤘᤠᤒᤠᤰᤁᤥᤗᤠᤶ ᤗᤠ᤺ᤰᤁᤠᤳ ᤀᤢ᤺ᤰᤂᤧᤶ ᤗ᤺ᤳᤋᤧᤶᤔᤧ᤹॥” 11 ᤂᤧᤸᤗᤧᤆᤥᤃᤢᤸᤗᤧ ᤀᤣᤒᤣᤍ-ᤔᤣᤗᤣᤁᤧᤸᤗᤧ ᤂᤧᤴ ᤔᤏᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤂᤢᤏᤧ᤹ ᤜᤠᤱᤜᤡᤶᤔᤥᤒᤠ ᤆᤠᤎᤠ᤺ᤱ ᤛᤡᤃᤠᤱᤒᤠ ᤗᤳᤇᤠ ᤕᤠᤰᤑᤠᤱᤅᤥ ᤗᤠᤛᤧ. ᤜᤧᤰᤁᤩᤠᤱ ᤁᤢᤓᤠ ᤁᤢᤍᤪᤧᤰ ᤏᤢ ᤁᤧᤍᤧ᤺ᤱᤒᤠ ᤆᤠᤱᤜᤠ᤹ ᤂᤧᤵᤔᤥ ᤂᤥᤛᤢᤀᤠᤱ ᤂᤧᤴ ᤆᤠᤱᤜᤠ᤹ ᤀᤡᤍᤠ᤺ᤰᤁᤡᤸᤗᤧ ᤀᤡᤓᤢᤳᤋᤢ ᤂᤧᤒᤩᤠᤱ ᤂᤧᤴ ᤆᤫᤠ᤺ᤳ ᤕᤠᤱᤄᤥ᤺ᤵᤔᤠ ᤗᤢᤶᤒᤠᤳ ᤘᤠᤒᤠᤰᤁᤥ ᤕᤷᤔᤡᤕᤠ᤺ᤸᤗᤧ ᤁᤢᤗᤠᤃᤡ ᤔᤢ ᤌᤠᤛᤢᤐᤡᤖᤢ॥ 12 ᤀᤣᤒᤣᤍ-ᤔᤣᤗᤣᤰᤁᤡᤸᤗᤧ ᤔᤢ ᤕᤷᤔᤡᤕᤠᤴ ᤀᤡᤶᤓᤥ᤺ᤴᤍᤢ. “ᤀᤡᤍᤠ᤺ᤰᤁᤡᤸᤗᤧ ᤁᤧᤴᤕᤠ᤹ᤏᤧᤴᤗ ᤑᤠ᤹ᤀᤠᤱ ᤁᤴ ᤁᤢᤍᤪᤧᤰ ᤆᤠᤱᤜᤠ᤹ ᤁᤧᤗᤠᤵᤑᤡ᤺ᤵᤔᤠ ᤛᤡᤃᤠᤱ ᤌᤧᤰᤋᤧ᤹॥” ᤂᤧᤒᤩᤠᤱ ᤕᤷᤔᤡᤕᤠᤴ ᤕᤠᤖᤡᤵ ᤐᤥ᤺ᤰᤂᤧᤸᤗᤧ. 13 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢ ᤔᤧᤗ᤺ᤳᤋᤢ॥ ᤂᤧᤸᤗᤧᤆᤥᤃᤢᤸᤗᤧ ᤕᤷᤔᤡᤕᤠᤴ ᤋᤃᤡ ᤕᤠᤃᤧᤒᤠ ᤜᤠᤱᤜᤡᤶᤔᤥᤒᤠ ᤀᤡᤰᤁᤧᤃᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤢᤶᤔᤥᤒᤠ ᤐᤢᤱᤗᤠᤜᤡᤶᤔᤥ ᤏᤢ᤺ᤰᤂᤧᤖᤥ॥ ᤛᤡᤍᤁᤡᤕᤠᤜ᤺ᤸᤗᤧ ᤕᤷᤔᤡᤕᤠᤴ ᤛᤢᤈᤠ ᤏᤠ᤺ᤰᤋᤢ 14 ᤌᤡᤰᤕᤧᤴ ᤛᤡᤍᤁᤡᤕᤠᤜ ᤜᤠᤱᤅᤡᤸᤗᤧ ᤕᤷᤔᤡᤕᤠ᤺ᤸᤗᤧ ᤁᤢᤀᤢ᤺ᤳᤇᤧ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤛᤢᤶᤛᤡᤃᤣᤰᤐᤠ ᤕᤶᤒᤠ ᤗᤠᤶᤎᤣ᤺ᤵᤐᤥ ᤋᤠ᤺ᤵᤔᤠ ᤐᤠᤱᤄᤢᤛᤡ॥ ᤜᤠᤱᤅᤡᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤁᤢᤓᤠ ᤐᤠᤴ ᤛᤣ᤺ᤴᤍᤥᤔᤠ ᤀᤠᤏᤡᤱᤘᤠ᤹ ᤘᤠ᤹. ᤜᤧᤰᤁᤩᤠᤱ ᤛᤧᤰᤂᤠᤒᤠ ᤐᤠ᤺ᤴᤏᤡᤴ ᤔᤠ᤹ᤔᤠ ᤏᤡᤱᤘᤠ᤹ ᤔᤧᤈᤥᤃᤧᤴᤏᤧ᤹॥” 15 ᤕᤷᤔᤡᤕᤠ᤺ᤸᤗᤧ ᤛᤡᤍᤁᤡᤕᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤛᤧᤰᤂᤠ ᤐᤠᤴ ᤔᤧᤳᤏᤧᤸᤗᤧ ᤂᤧᤏᤧ᤹ ᤁᤧᤛᤧᤳᤋᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤓᤠ ᤛᤢᤈᤠᤐᤠᤴ ᤔᤧᤳᤏᤧᤛᤠᤱ ᤂᤧᤏᤧ᤹ ᤂᤧᤶᤔᤠᤀᤠᤱ ᤁᤧᤱᤄᤧᤵᤛᤢᤴ᤹॥” 16 ᤛᤡᤍᤁᤡᤕᤠᤜ ᤜᤠᤱᤅᤡᤸᤗᤧ ᤛᤫᤠ᤺ᤳᤋᤠᤱ ᤀᤰᤂᤣ ᤐᤠ᤺ᤳᤋᤢᤖ ᤕᤷᤔᤡᤕᤠ᤺ᤴᤏᤢ ᤔᤠᤱᤜᤧᤰ ᤆᤥᤃᤢ. “ᤀᤠᤏᤡ᤹ ᤛᤠ᤺ᤱᤃᤥ ᤛᤰᤔᤠ ᤀᤠᤒᤡᤒᤡᤒᤠ. ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤕᤜᤘᤣ ᤍᤠᤱᤒᤧᤴ ᤁᤢᤀᤡᤛᤡᤰ. ᤀᤠᤱᤃᤠ᤹ ᤂᤧᤏᤧ᤹ ᤔᤧᤛᤧᤳᤏᤧᤴ ᤜᤧᤰᤁᤩᤠᤱ ᤂᤧᤏᤧ᤹ ᤛᤧᤵᤔᤠ ᤁᤧᤃᤥ᤺ᤵᤐᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤀᤠᤱ ᤂᤧᤏᤧ᤹ ᤔᤧᤎᤠᤏᤧᤴ॥” 17 ᤂᤧᤒᤩᤠᤱ ᤕᤷᤔᤡᤕᤠ᤺ᤸᤗᤧ ᤛᤡᤍᤁᤡᤕᤠᤜ᤺ᤴ ᤔᤧᤳᤋᤢ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤁᤣ ᤐᤠ᤺ᤳᤋᤢ᤹. ‘ᤂᤧᤏᤧ᤹ ᤒᤣᤒᤡᤗᤥᤏᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤁᤧᤄᤧ᤺ᤶᤛᤡᤱᤏᤧᤓᤃᤪ ᤂᤧᤏᤧ᤹ ᤏᤢ ᤁᤧᤜᤡᤶᤛᤕᤱᤜᤠ᤹ ᤁᤧᤜᤡᤅᤡ᤹. ᤁᤴ ᤕᤧᤰᤕᤰᤁᤡᤴ ᤔᤡᤍᤡᤰᤁᤠᤱ ᤂᤠᤵᤐᤢᤌᤩ᤺ᤱ ᤔᤧᤒᤥᤱᤏᤧᤴ॥ 18 ᤁᤖ ᤂᤧᤏᤧ᤹ ᤜᤢᤰᤛᤢᤵᤛᤡᤱᤔᤠ ᤁᤧᤴᤍᤧᤴᤏᤧᤴᤏᤧᤓᤃᤪ. ᤂᤧᤏᤧ᤹ ᤂᤧᤳᤇᤡᤱᤔᤠ ᤁᤧᤱᤄᤥᤏᤧᤴ᥄ ᤁᤴ ᤕᤧᤰᤕᤰᤁᤡᤴ ᤒᤣᤒᤡᤗᤥᤏᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤆᤢᤰ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤕᤧᤰᤕᤰᤁᤡᤴ ᤔᤡ᤺ᤸᤗᤧ ᤔᤡᤔᤧᤎᤡᤰᤂᤢᤀᤠᤱ ᤔᤢᤖᤧᤰ ᤂᤠᤖᤧᤰ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ᤹॥’” 19 ᤜᤠᤱᤅᤡᤸᤗᤧ ᤐᤠ᤺ᤳᤋᤢ. “ᤁᤖ ᤀᤠᤱᤃᤠ᤹ ᤜᤢᤰᤛᤢᤵᤛᤡᤱᤔᤠ ᤁᤡᤀᤠ ᤛᤡᤀᤠ. ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤗᤧᤵᤔᤠᤱ ᤁᤧᤗᤠ᤺ᤵᤐᤠ ᤕᤜᤢᤍᤠᤒᤠ ᤔᤏᤠᤜᤠ᤹ ᤒᤣᤒᤡᤗᤥᤏᤡᤜᤠ᤹ᤖᤧ ᤜᤢᤰᤔᤧᤛᤢᤵᤐᤠᤒᤡᤗᤠ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤌᤧᤔᤠ ᤔᤧᤔᤧᤳᤋᤠ ᤂᤧᤴ ᤜᤠ᤺ᤳᤗᤧ ᤏᤡᤛᤢᤒᤣ᥄” 20 ᤕᤷᤔᤡᤕᤠ᤺ᤸᤗᤧ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤂᤧᤏᤧ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤛᤣᤃᤢᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤜᤢᤰᤁᤧᤶᤔᤧᤴᤇᤢᤵᤏᤧᤴ॥ ᤂᤧᤏᤧ᤹ ᤌᤣᤀᤠᤱ ᤁᤧᤸᤗ᤹ᤏᤧᤴ. ᤜᤧᤰᤁᤩᤠᤱ ᤐᤠ᤺ᤴᤜᤠ᤹ ᤏᤢᤒᤠ ᤐᤥᤱᤗ ᤐᤣᤰ॥ 21 ᤁᤖ ᤂᤧᤏᤧ᤹ ᤜᤢᤰᤛᤢᤵᤛᤡᤱᤔᤠ ᤁᤧᤴᤍᤧᤴᤏᤧᤴᤏᤧᤓᤃᤪ. ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤴᤜᤠ᤹ ᤀᤰᤂᤣᤗ᤹ᤖᤡᤰ ᤀᤠᤱᤃᤠ᤹ ᤀᤥᤛᤣ᤺ᤴᤎᤠᤰᤋᤠᤱᤅᤠᤱ ᤘᤠ᤹. 22 ᤂᤧᤏᤧ᤹ ᤁᤧᤜᤠᤱᤜᤡᤶᤔᤥ ᤐᤰᤔᤧᤎᤩᤧᤒᤠ ᤁᤧᤖᤧᤰ ᤔᤧᤴᤇᤢᤔᤠᤜᤠ᤹ ᤒᤣᤒᤡᤗᤥᤏᤒᤠ ᤌᤰᤛᤢᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤥ ᤔᤧᤍᤣ᤹ᤖᤢᤛᤡ॥ ᤂᤧᤒᤩᤠᤱ ᤂᤧᤴ ᤔᤧᤴᤇᤢᤔᤠᤜᤠ᤹ᤖᤧ ᤁᤧᤶᤃᤣ᤹ᤖ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “‘ᤂᤧᤏᤧ᤹ᤃ ᤏᤢᤒᤠ ᤆᤢᤶᤍᤣᤱᤜᤠ᤹ ᤁᤧᤃᤳᤋᤢᤛᤡᤖᤥ᥄ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤀᤡᤱ ᤁᤧᤶᤗᤧᤰᤋᤧᤀᤠᤱ ᤗᤠᤶᤃᤧᤶᤓᤥ᤺ᤳᤋᤧᤖᤥ॥ ᤀᤠᤸᤗ ᤂᤧᤏᤧ᤹ ᤁᤧᤗᤠᤱᤜᤠ᤹ ᤂᤠᤶᤗᤧᤰᤘᤠᤀᤥ ᤜᤢᤔᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤍ᤹ᤕᤠᤴ ᤑᤧᤶᤔᤥ ᤗᤠᤵᤁᤧᤶᤓᤢᤛᤧᤖᤥ᥄’ 23 “ᤂᤧᤏᤧ᤹ ᤁᤧᤖᤧᤰ ᤁᤧᤔᤣ᤺ᤳᤜᤠ᤹ ᤏᤢ ᤁᤧᤛ᤻ᤛᤠᤜᤠ᤹ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ᤖᤥ ᤔᤧᤍᤣ᤹ᤖᤢᤛᤡ᤹. ᤜᤧᤰᤁᤩᤠᤱ ᤂᤧᤏᤧ᤹ ᤂᤧᤳᤇᤡᤱᤔᤠ ᤁᤧᤴᤇᤢᤰᤏᤧᤴ॥ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤂᤧᤏᤧ᤹ ᤁᤧᤍᤧᤶ᤹. ᤂᤧᤒᤩᤠᤱ ᤁᤴ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤔᤢᤖᤧᤰ ᤂᤠᤖᤧᤰ ᤆᤥᤃᤢ᤹॥” 24 ᤂᤧᤒᤩᤠᤱ ᤛᤡᤍᤁᤡᤕᤠᤜ᤺ᤸᤗᤧ ᤕᤷᤔᤡᤕᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤴ ᤐᤠ᤺ᤴᤏᤡᤴ ᤁᤧᤈᤧᤰᤋᤠᤱ ᤑᤠ᤹ᤀᤠᤱ ᤜᤠ᤺ᤳᤋᤠᤱ ᤔᤧᤔᤧᤳᤋᤧᤛᤧᤴᤏᤧ᤹. ᤔᤣ᤺ᤴᤏᤧᤓᤃᤪ ᤂᤧᤏᤧ᤹ ᤁᤧᤛᤡᤖᤥ᥄ 25 ᤀᤠᤱᤃᤠ᤹ ᤂᤧᤏᤧ᤹ᤏᤢ ᤋᤠ᤹ᤈᤧᤰᤂᤠᤱᤒᤠᤴ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤔᤧᤄᤧᤵᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤐᤠ᤺ᤵᤔᤠ ᤔᤧᤛᤢᤰᤋᤢ᤹. ‘ᤜᤠᤱᤅᤡᤴ ᤏᤢ ᤂᤧᤏᤧ᤹ ᤌᤧᤔᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤠ᤹ᤁᤧᤈᤧᤰᤂᤧᤰᤇᤡ ᤀᤠᤏᤡᤃᤣ ᤀᤥᤔᤧᤳᤋᤧ᤹॥ ᤕᤠᤵᤔᤡ ᤁᤧᤶᤔᤧᤳᤏᤧᤴᤏᤧᤓᤃᤪ. ᤂᤧᤏᤧ᤹ ᤛᤧᤳᤋᤠᤛᤡᤃᤧ॥’ 26 ᤀᤰᤂᤣ ᤐᤥᤱᤏᤧᤓᤃᤪ. ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤈᤥᤏᤠᤌᤠᤏᤖᤧ ᤁᤢᤗᤢᤶᤒᤠ᤺ᤳᤋᤥ ᤀᤠᤱᤃᤠ᤹ ᤕᤠᤶᤔᤥ ᤔᤧᤒᤠᤱᤄᤠᤱᤅᤡᤴᤏᤧ᤹ ᤌᤣᤀᤠᤱᤓᤧᤸᤗᤧ ᤂᤧᤵᤔᤥᤃ ᤀᤠᤱᤃᤠ᤹ ᤛᤡᤀᤠ ᤑᤠ᤹ᤀᤠᤱ ᤜᤠᤱᤅᤡᤴ ᤀᤡᤃᤣ᤺ᤰᤁᤠᤱ ᤀᤡᤃᤣ᤺ᤰ ᤐᤣᤗᤡ ᤑᤠᤰᤋᤢᤱ॥’” 27 ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤔᤧᤍᤩᤧᤀᤠᤱ ᤕᤷᤔᤡᤕᤠᤴ ᤐᤠᤴ ᤛᤣ᤺ᤴᤔᤧᤍᤥᤛᤢᤒᤠ ᤏᤢ ᤜᤠᤱᤅᤡᤸᤗᤧ ᤂᤢᤏᤧ᤹ ᤌᤣᤀᤠᤱ ᤀᤢ᤺ᤳᤋᤢ ᤁᤧᤗ᤹ᤒᤠ ᤕᤧᤶᤔᤡᤴ ᤕᤖᤡᤰ ᤋᤃᤡ ᤜᤥ᤺ᤵᤋᤧ ᤁᤧᤗ᤹ᤒᤠ ᤐᤠᤴ ᤏᤡ᤺ᤴᤎᤥ ᤘᤠ᤹॥ ᤁᤖ ᤕᤷᤔᤡᤕᤠ᤺ᤸᤗᤧ ᤜᤠᤱᤅᤡᤸᤗᤧ ᤁᤢᤛᤢᤈᤠ ᤐᤠ᤺ᤴᤜᤠ᤹ ᤂᤧᤵᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤧᤰᤂᤠᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤱᤄᤥᤀᤣ ᤔᤧᤒᤣ॥ ᤜᤠᤱᤅᤡᤴ ᤏᤢ ᤕᤷᤔᤡᤕᤠᤴ ᤋᤠ᤹ᤈᤧᤰᤂᤧᤛᤡᤒᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤱᤄᤧᤵᤛᤢᤴ॥ 28 ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤡᤴ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤩᤧᤒᤠ ᤕᤧᤴ ᤌᤠᤖᤡᤰ ᤕᤷᤔᤡᤕᤠᤴ ᤀᤡᤰᤁᤧᤃᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤢᤶᤔᤥ ᤐᤢᤱᤗᤠᤎᤠᤒᤠ ᤐᤥ᤺ᤰᤂᤧᤀᤠᤱ ᤕᤠᤃᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.