ᤕᤷᤔᤡᤕᤠ 37 - LIFOTNT

ᤛᤡᤍᤁᤡᤕᤠᤜ᤺ᤸᤗᤧ ᤕᤷᤔᤡᤕᤠᤴ ᤐᤣᤗᤡ ᤑᤠᤰᤋᤢ

¹ ᤕᤜᤥᤕᤠᤁᤡᤔᤧᤸᤗᤧ ᤁᤢᤛ᤻ᤛᤠ ᤕᤜᤥᤕᤠᤁᤡᤏᤧᤸᤗᤧ ᤁᤢᤗᤧᤰᤘᤠᤀᤥ ᤕᤥᤛᤡᤕᤠᤜᤖᤧ ᤁᤢᤛ᤻ᤛᤠ ᤛᤡᤍᤁᤡᤕᤠᤜ᤺ᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧ॥ ᤂᤢᤏᤧ᤹ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤜᤠᤱ ᤆᤥᤃᤢ॥

² ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤕᤷᤔᤡᤕᤠᤴ ᤗᤠᤶᤒᤠ ᤐᤡᤖᤢᤛᤡᤒᤠ ᤀᤡᤱᤄᤱᤅᤡᤴ ᤛᤡᤍᤁᤡᤕᤠᤜ ᤜᤠᤱᤅᤡᤸᤗᤧ. ᤂᤧᤸᤗᤧ ᤁᤢᤜᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤜᤧᤰᤁᤩᤠᤱ ᤗᤠᤈᤣ᤹ᤀᤥ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ᤖᤧ ᤂᤧᤶᤄᤧᤶᤔᤣ ᤔᤧᤸᤗᤠᤵᤋᤢᤴ॥

³ ᤜᤧᤰᤁᤣᤛᤠᤱ ᤛᤡᤍᤁᤡᤕᤠᤜ ᤜᤠᤱᤅᤡᤸᤗᤧ ᤛᤣᤗᤣᤔᤩᤠᤜ᤺ᤸᤗᤧ ᤁᤢᤛ᤻ᤛᤠ ᤕᤜᤢᤁᤗᤧᤴ ᤏᤢ ᤔᤠᤛᤣᤕᤠᤜ᤺ᤸᤗᤧ ᤁᤢᤛ᤻ᤛᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤐᤏᤩᤠᤜ᤺ᤴ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤕᤷᤔᤡᤕᤠᤀᤥ ᤐᤠᤱᤄᤢᤍᤣᤛᤢᤛᤡ. “ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤣ ᤗᤠᤃᤡ ᤐᤣᤗᤡ ᤑᤠᤰᤋᤧ ᤀᤠᤒᤡᤖᤧ᤹॥”

⁴ ᤂᤧᤴ ᤕᤧᤶᤔᤥ ᤌᤠᤖᤡᤰ ᤕᤷᤔᤡᤕᤠᤴ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤔᤧᤴᤎᤠᤀᤣ ᤘᤕᤧ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤐᤣ᤺ᤰᤔᤠ ᤋᤠᤔᤠ ᤛᤢᤰᤋᤧᤖ ᤘᤕᤧ॥

⁵ ᤁᤴ ᤕᤧᤶᤔᤥ ᤔᤡᤛᤪᤒᤠ ᤜᤠᤱ ᤑᤠᤖᤥ ᤜᤥᤐᤪᤠ᤺ᤸᤗᤧ ᤁᤢᤎᤰᤛᤢᤒᤠᤜᤠ᤹ ᤔᤡᤛᤪᤗᤠᤶ ᤔᤧᤎᤠᤅᤧ ᤔᤧᤃᤧᤖᤧ॥ ᤒᤣᤒᤡᤗᤥᤏᤒᤠ ᤌᤰᤛᤢᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤖᤢᤛᤗᤧ᤺ᤶᤔᤡᤴ ᤔᤧᤃᤒᤢᤀᤠᤱ ᤔᤧᤏᤧᤛ᤻ᤛᤧᤒᤠᤍᤧᤴ ᤗᤠᤶᤒᤠ ᤂᤧᤱᤜᤠ᤹ ᤀᤣᤃᤠᤱ ᤔᤧᤏᤢ᤺ᤰᤂᤧ ᤔᤧᤒᤣ॥

⁶ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤀᤥ ᤁᤧᤖᤧ.

⁷ “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤌᤧᤔᤠ ᤐᤥᤱᤔᤠ ᤆᤥᤰ ᤂᤧᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤛᤣ᤺ᤴᤍᤥᤔᤠᤖᤧ ᤗᤠᤃᤡ ᤕᤜᤢᤍᤠᤒᤠ ᤜᤠᤱᤅᤡᤸᤗᤧ ᤂᤧᤏᤧ᤹ ᤁᤧᤒᤠᤱᤄᤧ॥ ᤂᤢᤏᤧ᤹ ᤀᤰᤂᤣ ᤔᤧᤳᤋᤧ᤹. ‘ᤑᤠᤖᤥᤸᤗᤧ ᤁᤢᤎᤰᤛᤢᤒᤠᤜᤠ᤹ ᤂᤧᤏᤧ᤹ ᤁᤧᤓᤠ᤹ᤛᤧ ᤔᤧᤎᤠᤅᤧᤖ ᤔᤧᤒᤳᤇᤧᤛᤠᤱ ᤂᤧᤱᤜᤠ᤹ ᤔᤡᤛᤪ ᤏᤢ᤺ᤱᤔᤠ ᤐᤣ᤺ᤰᤔᤠ ᤔᤧᤈᤥᤰ॥

⁸ ᤂᤧᤒᤩᤠᤱ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ ᤔᤧᤏᤢ᤺ᤱ ᤔᤧᤓᤧᤴᤏᤠᤱ ᤁᤴ ᤕᤧᤰᤕᤰᤁᤡᤴ ᤔᤧᤓᤳᤋᤢ᤹ ᤜᤧᤰᤁᤩᤠᤱ ᤜᤢᤰᤁᤠᤵ ᤔᤧᤈᤥᤃᤢᤀᤠᤱ ᤂᤠᤵᤐᤢᤌᤩ᤺ᤱ ᤑᤠ᤺ᤳᤋᤪᤠ ᤔᤧᤃᤣ᤺ᤳᤋᤢ᤹॥’

⁹ “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤒᤣᤒᤡᤗᤥᤏᤡᤜᤠ᤹ ᤏᤢᤒᤠ ᤐᤠ᤺ᤴᤏᤡᤸᤗᤧ ᤗᤠᤃᤡ ᤔᤧᤏᤢ᤺ᤰᤂᤧ ᤔᤧᤒᤣᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤠᤱ ᤀᤍᤱ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹॥ ᤂᤧᤱᤜᤠ᤹ ᤏᤢᤒᤠ ᤐᤠ᤺ᤴᤏᤡᤴᤗᤧ ᤗᤠᤃᤡ ᤔᤧᤏᤢ᤺ᤰᤂᤧ ᤔᤧᤒᤣᤒᤠ ᤔᤣ᤺ᤴᤗᤥ᥄

¹⁰ ᤂᤧᤏᤡ᤹ ᤒᤣᤒᤡᤗᤥᤏᤒᤠ ᤌᤰᤛᤢᤒᤠᤜᤠ᤹ ᤁᤧᤖᤧᤰ ᤕᤢᤔᤪᤧᤰ ᤁᤧᤔᤧᤰᤂᤢᤶᤛᤡᤶ ᤜᤧᤰᤁᤩᤠᤱ ᤌᤱᤅᤥ ᤁᤧᤃᤠ᤺ᤶᤒᤠᤜᤠ᤹ ᤛᤠ᤺ᤱᤃᤠᤜᤡᤶᤔᤥ ᤐᤰᤁᤧᤎᤠᤶᤛᤡᤶᤛᤠᤱ ᤂᤧᤴ ᤁᤧᤃᤠ᤺ᤶᤒᤠ ᤔᤏᤠᤜᤠ᤹ ᤕᤠᤶᤔᤥ ᤜᤥ᤹ᤍᤥᤴ ᤜᤥ᤹ᤍᤥᤴ ᤔᤧᤗ᤹ᤖ ᤔᤧᤒᤥ᤺ᤰᤁᤠᤱ ᤁᤴ ᤕᤧᤰᤕᤰᤁᤡᤴ ᤔᤡᤔᤧᤎᤡᤰᤂᤢᤀᤠᤱ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢᤖᤥ॥”

ᤕᤷᤔᤡᤕᤠᤴ ᤛᤠᤰᤐᤠ ᤌᤩᤧᤒᤠ

¹¹ ᤑᤠᤖᤥᤸᤗᤧ ᤁᤢᤎᤰᤛᤢᤒᤠᤜᤠ᤹ ᤋᤃᤡ ᤔᤧᤒᤥᤖᤧᤖ ᤔᤧᤎᤠᤱᤅᤧᤒᤠᤸᤗᤧ ᤆᤥᤃᤢᤸᤗᤧ ᤒᤣᤒᤡᤗᤥᤏᤒᤠ ᤌᤰᤛᤢᤒᤠᤜᤠ᤹ ᤕᤖᤢᤛᤗᤧ᤺ᤶᤗᤠᤶ ᤀᤣᤃᤠᤱ ᤔᤧᤄᤧᤳᤇᤡᤱ ᤔᤧᤒᤣ᤺ᤸᤗᤧ.

¹² ᤕᤷᤔᤡᤕᤠᤴ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤢᤄᤥᤔᤠ ᤗᤰ ᤗᤠᤛᤧ ᤕᤖᤢᤛᤗᤧ᤺ᤶᤔᤡᤴ ᤗᤧᤖᤢᤀᤠᤱ ᤒᤣᤏᤩᤠᤔᤡᤏ ᤋᤧᤱᤃᤵ ᤗᤧᤵᤔᤠᤱ ᤐᤣᤖ ᤐᤳᤇᤧ॥

¹³ ᤁᤖ ᤒᤣᤏᤩᤠᤔᤡᤏ ᤔᤠ ᤗᤠᤶᤎᤣ᤺ᤵᤐᤥ ᤁᤧᤖᤧᤸᤗᤧ ᤂᤧᤵᤔᤥ ᤁᤧᤕᤧᤵᤐᤠ ᤗᤠᤶᤎᤣᤳ ᤁᤧᤃᤥᤒᤠᤸᤗᤧ ᤂᤢᤏᤧ᤹ ᤋᤧᤶᤛᤢᤀᤠᤱ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤁᤧᤄᤧᤳᤇᤡᤱᤅᤠᤱ ᤒᤣᤒᤡᤗᤥᤏᤡᤜᤠ᤹ ᤗᤧᤵᤔᤠᤱ ᤁᤧᤒᤣ᤺ᤰᤗ ᤁᤧᤒᤳ॥” ᤂᤧᤴ ᤗᤠᤶᤎᤣᤳ ᤁᤧᤃᤥᤒᤠ ᤕᤷᤔᤡᤕᤠ ᤁᤧᤍᤧᤶᤒᤧᤴ ᤜᤏᤏᤩᤠᤜᤖᤧ ᤁᤢᤶᤔᤧᤴᤇᤠ᤹ ᤏᤢ ᤛᤣᤗᤣᤔᤩᤠᤜᤖᤧ ᤁᤢᤛ᤻ᤛᤠ ᤕᤡᤖᤡᤕᤠᤜ᤺ᤴ ᤘᤕᤧ॥

¹⁴ ᤕᤷᤔᤡᤕᤠ᤺ᤸᤗᤧ ᤀᤳᤋᤢᤖ ᤔᤧᤳᤋᤢ. “ᤂᤧᤴ ᤐᤠ᤺ᤴᤏᤡᤴ ᤛᤧᤰᤂᤠ ᤔᤣ᤺ᤴ᥄ ᤀᤠᤱᤃᤠ᤹ ᤀᤰᤋᤱᤒᤠ ᤐᤠᤴ ᤆᤥ᤺ᤰᤔᤠ ᤌᤧᤔᤠᤀᤠᤱ ᤀᤠᤏᤡᤱᤘᤠ᤹ ᤜᤥᤵ॥” ᤁᤖ ᤕᤡᤖᤡᤕᤠᤜ᤺ᤸᤗᤧ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤴ ᤜᤧᤰᤁᤩᤠᤱ ᤂᤧᤸᤗᤧ ᤕᤷᤔᤡᤕᤠᤴ ᤋᤧᤶᤛᤢᤀᤠᤱ ᤛᤢᤜᤠᤱᤕᤢᤰᤐᤠᤜᤠ᤹ᤖᤥ ᤋᤣ᤹ᤖᤢ॥

¹⁵ ᤂᤧᤱᤜᤠ᤹ ᤕᤷᤔᤡᤕᤠ᤺ᤴᤏᤢ ᤂᤢᤴᤇᤡ᤹ ᤛᤠ᤹ᤖᤡᤰ ᤕᤠ᤺ᤰᤗᤧ᤹ᤖᤧ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤜᤡᤵᤋᤢᤀᤠᤱ ᤛᤢᤜᤠᤱᤔᤡᤒᤠ ᤈᤥᤏᤠᤌᤏᤖᤧ ᤁᤢᤜᤡᤶᤔᤥ ᤔᤧᤛᤠᤰᤋᤢ ᤔᤧᤕᤢᤰᤂᤢ॥ ᤈᤥᤏᤠᤌᤏᤖᤧ ᤁᤢᤜᤡᤶᤔᤡᤴ ᤔᤏᤠ ᤛᤠᤰᤔᤠ ᤐᤢᤱᤗᤠᤜᤡᤶ ᤔᤧᤈᤥᤃᤢᤀᤠᤱ ᤏᤧᤛ᤻ᤛᤧ॥

¹⁶ ᤕᤷᤔᤡᤕᤠᤴ ᤗᤳᤇᤠ ᤂᤠᤶᤒᤠᤱ ᤛᤡᤃᤠᤱᤒᤠ ᤔᤏᤠ ᤛᤠᤰᤔᤠ ᤕᤠᤰᤑᤠᤱᤅᤥ ᤕᤖᤡᤰ ᤕᤧᤴ ᤌᤠᤖᤡᤰ ᤔᤧᤛᤠᤰᤋᤢ ᤔᤧᤕᤢᤰᤂᤢ॥

¹⁷ ᤋᤠ᤺ᤴᤍᤡ ᤛᤡᤍᤁᤡᤕᤠᤜ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤀᤢ᤺ᤳᤇᤧ ᤔᤏᤠ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤜᤠᤱᤜᤡᤶᤔᤥ ᤋᤣ᤹ᤖᤢᤀᤠᤱ ᤜᤠᤱᤜᤡᤶᤔᤥᤒᤠ ᤜᤠ᤺ᤳᤋᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤢᤏᤧ᤹ ᤐᤠᤴ ᤛᤣ᤺ᤴᤍᤥᤛᤢ. “ᤌᤣ ᤕᤜᤘᤣ ᤍᤠᤱᤒᤠᤗᤠᤶ ᤁᤢᤓᤠ ᤀᤡᤱᤄᤱᤜᤠ᤹ ᤂᤧᤏᤧ᤹ ᤐᤠ᤺ᤵᤔᤠ ᤁᤧᤃᤳᤋᤢᤒᤡ᥅” ᤕᤷᤔᤡᤕᤠ᤺ᤸᤗᤧ ᤔᤧᤳᤋᤢ. “ᤀᤥᤖᤥ. ᤀᤠᤱᤃᤠ᤹ ᤐᤠ᤺ᤵᤔᤠ ᤁᤳᤋᤢᤱ᤹᥄ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤂᤧᤏᤧ᤹ ᤁᤧᤍᤧᤶ᤹॥”

¹⁸ ᤂᤧᤒᤩᤠᤱ ᤕᤷᤔᤡᤕᤠ᤺ᤸᤗᤧ ᤜᤠᤱᤅᤡᤴ ᤛᤣ᤺ᤴᤗᤠᤵᤋᤢ. “ᤀᤠᤱᤃᤠ᤹ ᤌᤧᤔᤠ ᤕᤠ᤺ᤶᤒᤰ ᤑᤣ᤺ᤴᤍᤢᤱᤅᤠᤱ ᤘᤠ᤹᥅ ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤐᤢᤱᤗᤠᤜᤡᤶᤔᤥ ᤛᤠᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ. ᤂᤧᤏᤧ᤹ ᤁᤧᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤡᤃᤪ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤧᤔᤠ ᤆᤥᤃᤢᤱᤅᤠᤱ ᤘᤠ᤹᥅

¹⁹ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤗᤠᤈᤣᤴ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤌᤱᤅᤥ ᤔᤧᤓᤳᤋᤢᤴ ᤁᤧᤒᤠ᤺ᤵᤐᤠ ᤂᤧᤏᤧ᤹ ᤁᤧᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤀᤠᤸᤗᤥ ᤀᤠᤳᤋᤡ ᤔᤧᤘᤠ᤹᥅

²⁰ ᤀᤠᤍᤠᤱᤒᤠ ᤜᤠᤱᤅᤣ. ᤂᤧᤵᤛᤧ᤹. ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧ॥ ᤀᤠᤱᤃᤠ᤹ ᤈᤥᤏᤠᤌᤏᤖᤧ ᤁᤢᤜᤡᤶᤔᤥᤒᤠ ᤔᤏᤠ ᤛᤠᤰᤔᤠ ᤗᤢᤶᤒᤠᤳ ᤕᤠᤰᤑᤠᤱᤅᤥ ᤔᤧᤏᤢ᤺ᤰᤋᤠᤱᤅᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤵᤔᤥ ᤛᤡᤀᤠᤖᤥ॥”

²¹ ᤂᤧᤸᤗᤧᤆᤥᤃᤢᤸᤗᤧ ᤛᤡᤍᤁᤡᤕᤠᤜ ᤜᤠᤱᤅᤡᤸᤗᤧ ᤕᤷᤔᤡᤕᤠᤴ ᤗᤢᤶᤒᤠᤳ ᤕᤠᤰᤑᤠᤱᤅᤥ ᤏᤢ᤺ᤰᤔᤠᤍᤧᤔᤠ ᤔᤧᤒᤠᤱᤄᤢᤛᤡᤴ॥ ᤐᤖᤢᤔᤠᤸᤗᤧ ᤂᤢᤏᤧ᤹ ᤔᤠᤱᤜᤡᤶᤔᤥᤒᤠ ᤀᤡᤰᤁᤧᤃᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤢᤶᤔᤥ ᤛᤠᤰᤔᤠ ᤕᤢᤱᤔᤠ ᤀᤡᤱᤈᤠᤱ ᤐᤡᤖᤢᤛᤡ॥ ᤕᤷᤔᤡᤕᤠᤴ ᤂᤧᤵᤔᤥᤀᤣ ᤕᤢᤱᤔᤠᤀᤠᤱ ᤕᤧᤰᤕᤰᤁᤥ ᤁᤧᤖᤧᤰ ᤂᤖᤧ᤺ᤱᤜᤠ᤹ ᤔᤧᤶᤔᤠ᤺ᤳᤋᤣ ᤌᤠᤖᤡᤰ ᤂᤢᤏᤧ᤹ ᤌᤡᤰᤕᤠ᤺ᤴᤎᤰ ᤂᤠᤖᤰ ᤗᤧ᤺ᤱᤔᤏᤠᤒᤠ ᤂᤖᤧ᤺ᤱ ᤔᤧᤒᤡᤖᤢᤖ ᤑᤠ᤹ᤀᤠᤱᤅᤠᤱ ᤜᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤢᤛᤡ॥ ᤁᤶᤓᤗ᤹ᤖᤡᤰ ᤜᤠᤱᤜᤡᤶ ᤗᤰᤂᤢᤶᤔᤥᤒᤠ ᤐᤢᤱᤗᤠᤜᤡᤶᤔᤥ ᤕᤷᤔᤡᤕᤠᤴ ᤔᤧᤛᤠᤰᤋᤢ ᤔᤧᤕᤢᤰᤂᤢᤖᤥ॥