ᤕᤷᤔᤡᤕᤠ 36 - LIFOTNTᤒᤠᤖᤢᤰᤁᤧᤸᤗᤧ ᤛᤠᤵᤗᤠᤌ᤺ᤱᤔᤧᤴ ᤔᤠᤱᤜᤡᤶᤔᤥ ᤏᤡᤖᤢ᤹ 1 ᤕᤥᤛᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤕᤜᤥᤕᤠᤁᤡᤔᤧᤴ ᤕᤜᤢᤍᤠᤀᤥ ᤜᤠᤱ ᤐᤥ᤺ᤰᤂᤧᤒᤠ ᤋᤱᤒᤣ ᤗᤡᤛᤡᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ. 2 “ᤛᤠᤵᤗᤠᤌᤱᤔᤠᤎᤡᤰ ᤋᤠᤖᤧ᤹ ᤜᤧᤰᤁᤩᤠᤱ ᤁᤧᤖᤧᤰ ᤀᤠᤀᤡᤱᤄᤱᤜᤠ᤹ ᤀᤡᤛᤪᤠᤀᤡᤗ. ᤕᤜᤢᤍᤠ ᤏᤢ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤛᤠᤵᤋᤧ᤹॥ ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤀᤡᤱᤄᤱᤅᤡᤴ ᤏᤢ ᤀᤠᤸᤗᤥ ᤌᤠᤖᤡᤰᤐᤠ ᤁᤧᤖᤧᤰ ᤀᤡᤱᤄᤱᤜᤠ᤹ ᤛᤠᤵᤋᤧ᤹॥ 3 ᤕᤜᤢᤍᤠᤒᤠ ᤔᤏᤠᤜᤠ᤹ᤀᤥ ᤀᤠᤱᤃᤠ᤹ ᤋᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠ ᤔᤧᤰᤔᤠᤛᤡᤔᤠ ᤐᤠ᤺ᤴᤜᤠ᤹ ᤔᤧᤄᤧᤵᤛᤢᤀᤠᤱ ᤕᤠᤶᤔᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴ ᤔᤧᤗᤧᤖᤢᤏᤧᤓᤃᤪ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰ ᤏᤢ ᤗᤠᤕᤥᤴ ᤗᤧᤵᤔᤡ ᤐᤡᤖᤢᤱᤛᤡᤱ᤹॥” 4 ᤂᤧᤸᤗᤧᤆᤥᤃᤢᤸᤗᤧ ᤕᤷᤔᤡᤕᤠ᤺ᤸᤗᤧ ᤏᤣᤖᤡᤕᤠᤜᤖᤧ ᤁᤢᤛ᤻ᤛᤠ ᤒᤠᤖᤢᤰᤁᤧᤴ ᤀᤢ᤺ᤳᤋᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤷᤔᤡᤕᤠᤴ ᤔᤧᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤒᤠᤖᤢᤰᤁᤧᤸᤗᤧ ᤗᤳᤇᤠ ᤛᤠᤵᤗᤠᤌ᤺ᤱᤔᤥ ᤛᤠᤵᤋᤢ॥ 5 ᤂᤧᤒᤩᤠᤱ ᤕᤷᤔᤡᤕᤠ᤺ᤸᤗᤧ ᤒᤠᤖᤢᤰᤁᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤠᤱᤅᤠᤱ ᤕᤠᤰᤁᤠ ᤔᤠᤱᤜᤡᤶᤔᤥ ᤐᤣ᤺ᤰᤔᤠ ᤔᤧᤛᤢᤰᤁᤠᤴ॥ 6 ᤁᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ ᤆᤠᤏᤧ᤺ᤳᤋᤥ ᤔᤧᤕᤢᤱᤒᤠ ᤕᤧᤴᤏᤥ ᤂᤧᤏᤧ᤹ ᤔᤠᤱᤜᤡᤶᤔᤥ ᤐᤣᤃᤧ᤹ ᤂᤶᤓᤩᤠᤱ ᤀᤠᤱᤃᤠ᤹ᤗᤠᤶ ᤂᤧᤏᤧ᤹ ᤁᤧᤄᤧᤵᤛᤢᤒᤠ ᤛᤠᤵᤗᤠᤌ᤺ᤱᤔᤥ ᤛᤠᤵᤋᤧᤀᤠᤱᤏᤧᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤏᤡᤖᤧ᤹ᤀᤠᤱ ᤔᤏᤠᤜᤠ᤹ ᤂᤧᤶᤒᤠᤱᤄᤧᤛᤧ᤹॥ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤗᤠᤶ ᤁᤧᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤏᤡᤖᤧ ᤐᤡᤖᤧᤛᤧ᤹॥ 7 ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤔᤧᤓᤠᤰᤋᤢᤀᤠᤱ ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤔᤧᤗᤧᤖᤢᤀᤡ ᤜᤠᤃ॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤡᤵᤔᤠ ᤁᤧᤄᤢᤒᤠ ᤁᤢᤛᤡᤰ ᤐᤥ᤺ᤰᤔᤧᤴ ᤏᤢ ᤛᤠ᤹ᤖᤡᤰ ᤀᤠᤃᤡᤃᤡᤒᤠ ᤁᤢᤛᤠᤰᤁᤧᤴᤏᤡᤸᤗᤧ ᤁᤴ ᤔᤏᤠᤜᤠ᤹ ᤕᤱᤔᤠ ᤛᤧᤖᤢᤛᤡᤀᤠᤱ ᤘᤠ᤹॥” 8 ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠ᤺ᤸᤗᤧ ᤔᤧᤳᤋᤢᤒᤠ ᤜᤧᤰᤁᤣᤀᤣ ᤏᤣᤖᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤒᤠᤖᤢᤰᤁᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤜᤠ᤹ ᤔᤠᤱᤜᤡᤶᤔᤥ ᤔᤏᤠᤜᤠ᤹ ᤏᤡᤖᤢ ᤐᤡᤖᤢᤛᤡ॥ 9 ᤕᤜᤥᤕᤠᤁᤡᤔᤧᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧᤒᤠ ᤅᤠᤛᤡᤃᤣᤰᤐᤠ ᤋᤱᤒᤣ ᤑᤠᤱᤛᤡᤃᤣᤰᤐᤠ ᤗᤠᤀᤥ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤔᤏᤠᤜᤠ᤹ ᤏᤢ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤗᤠᤶᤒᤠ ᤂᤧᤵᤔᤥ ᤁᤧᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤋ᤺ᤰᤏᤧᤳ ᤕᤢᤱᤔᤠ ᤀᤢᤘᤠ ᤐᤥ᤺ᤰᤂᤧ॥ 10 ᤒᤠᤖᤢᤰᤁᤧᤸᤗᤧ ᤕᤷᤔᤡᤕᤠ᤺ᤸᤗᤧ ᤁᤢᤒᤠ᤺ᤴᤈᤠᤰᤜᤠ᤹ ᤛᤠᤵᤗᤠᤌ᤺ᤱᤔᤥᤗᤠᤶ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤏᤡᤖᤢ ᤐᤡᤖᤢᤛᤡ॥ ᤂᤢᤏᤧ᤹ ᤛᤢᤜᤠᤱᤔᤡᤒᤠ ᤛᤠᤐᤠᤏᤖᤧ ᤁᤢᤛ᤻ᤛᤠ ᤃᤔᤷᤕᤠᤜ᤺ᤸᤗᤧ ᤔᤠᤱᤜᤡᤶᤔᤥᤒᤠ ᤁᤢᤕᤠᤰᤑᤠᤱ ᤋᤃᤡ ᤕᤧᤶᤛᤡᤱ॥ ᤂᤧᤴ ᤕᤠᤰᤑᤠᤱᤅᤡᤴ ᤔᤠᤱᤜᤡᤶᤔᤥᤒᤠ ᤌᤥᤛᤔᤠ ᤗᤰᤂᤢᤶᤔᤥ ᤁᤢᤛᤱ ᤔᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤏᤧᤛ᤻ᤛᤧ॥ 11 ᤛᤠᤐᤠᤏᤖᤧ ᤁᤢᤶᤔᤧᤴᤇᤠ᤹ ᤃᤔᤷᤕᤠᤜ᤺ᤸᤗᤧ ᤁᤢᤛ᤻ᤛᤠ. ᤔᤡᤁᤠᤕᤠ᤺ᤸᤗᤧ ᤛᤠᤵᤗᤠᤌ᤺ᤱᤔᤥᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤜᤠ᤹ ᤂᤧᤵᤛᤢᤀᤠᤱ. 12 ᤂᤢᤏᤧ᤹ ᤕᤥ ᤌᤠᤛᤡᤱ ᤕᤧ ᤜᤧᤰᤁᤩᤠᤱ ᤜᤠᤱᤜᤡᤶᤔᤥᤒᤠ ᤛᤢᤜᤠᤱᤔᤡᤒᤠᤸᤗᤧ ᤁᤢᤕᤠᤰᤑᤠᤱᤅᤥ ᤐᤣ॥ ᤂᤧᤵᤔᤥ ᤜᤠᤱᤜᤡᤶᤔᤥᤒᤠ ᤛᤢᤜᤠᤱᤔᤡᤒᤠ ᤀᤣᤗᤡᤛᤠᤔᤠ. ᤛᤔᤠᤕᤠᤜᤖᤧ ᤁᤢᤛ᤻ᤛᤠ ᤍᤗᤠᤕᤠᤜ. ᤀᤰᤒᤥᤖᤖᤧ ᤁᤢᤛ᤻ᤛᤠ ᤀᤣᤸᤏᤠᤋᤠᤏ. ᤛᤠᤐᤠᤏᤖᤧ ᤁᤢᤛ᤻ᤛᤠ ᤃᤔᤷᤕᤠᤜ. ᤜᤏᤏᤩᤠᤜᤖᤧ ᤁᤢᤛ᤻ᤛᤠ ᤛᤡᤍᤁᤡᤕᤠᤜ ᤏᤢ ᤘᤣ᤹ ᤁᤧᤖᤧᤰ ᤛᤢᤜᤠᤱᤕᤢᤰᤐᤠᤜᤠ᤹ ᤔᤧᤘᤕᤧ॥ 13 ᤂᤧᤒᤩᤠᤱ ᤒᤠᤖᤢᤰᤁᤧᤸᤗᤧ ᤔᤏᤠᤜᤠ᤹ ᤏᤡᤖᤢ ᤐᤡᤖᤢᤛᤡᤒᤠ ᤁᤧᤖᤧᤰ ᤀᤡᤱᤄᤱᤜᤠ᤹ ᤔᤡᤁᤠᤕᤠ᤺ᤸᤗᤧ ᤔᤏᤠᤜᤠ᤹ ᤔᤧᤳᤋᤢᤛᤡ. 14 ᤂᤧᤒᤩᤠᤱ ᤛᤢᤜᤠᤱᤕᤢᤰᤐᤠᤜᤠ᤹ ᤁᤧᤖᤧᤰ ᤔᤧᤍᤱᤛᤡᤱᤅᤠᤱ ᤛᤐᤏᤩᤠᤜ᤺ᤸᤗᤧ ᤁᤢᤛ᤻ᤛᤠ. ᤛᤣᤗᤣᤔᤩᤠᤜ᤺ᤸᤗᤧ ᤁᤢᤶᤔᤧᤴᤇᤠ᤹. ᤁᤢᤛᤡ᤺ᤸᤗᤧ ᤁᤢᤈᤰᤔᤧᤴᤇᤠ᤹. ᤕᤜᤢᤍᤡ᤺ᤴ ᤁᤴ ᤀᤡᤱᤄᤱᤅᤡᤴ ᤔᤧᤔᤧᤳᤋᤢᤀᤠᤱ ᤒᤠᤖᤢᤰᤁᤧᤴ ᤀᤡᤱᤄᤱ ᤔᤧᤳᤇᤧ ᤔᤧᤒᤠᤱᤄᤢᤔᤧᤍᤣᤛᤢ. “ᤁᤧᤏᤡᤖᤢᤀᤠᤱ ᤔᤏᤠᤜᤠ᤹ ᤂᤧᤶᤔᤠ ᤁᤧᤒᤠᤱᤄᤢᤛᤡᤒᤠ ᤛᤠᤵᤗᤠᤌ᤺ᤱᤔᤧᤴ ᤑᤧᤳᤋᤧᤀᤠᤱ ᤑᤧᤖᤧ᤹॥” ᤂᤧᤸᤗᤧᤆᤥᤃᤢᤸᤗᤧ ᤒᤠᤖᤢᤰᤁᤧᤴ ᤂᤧᤴ ᤛᤠᤵᤗᤠᤌ᤺ᤱᤔᤧᤴ ᤕᤠᤱᤛᤡᤱᤅᤠᤱ ᤂᤧᤱᤜᤠ᤹ᤖᤥ ᤑᤧᤖᤧ॥ 15 ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤕᤢᤅᤧ᤹. ᤜᤧᤰᤁᤩᤠᤱ ᤛᤠᤵᤗᤠᤌ᤺ᤱᤔᤧᤴ ᤀᤠᤏᤡᤃᤣ ᤏᤡᤖᤧ ᤀᤠᤒᤡᤖᤧ᤹॥” ᤜᤧᤰᤁᤩᤠᤱ ᤔᤧᤔᤧᤳᤋᤢᤒᤠ ᤜᤧᤰᤁᤣ ᤒᤠᤖᤢᤰᤁᤧᤸᤗᤧ ᤂᤧᤱᤜᤠ᤹ ᤏᤡᤖᤢ ᤐᤡᤖᤢᤛᤡ॥ 16 ᤂᤢᤏᤧ᤹ ᤂᤧᤴ ᤏᤡ᤺ᤵᤔᤠ ᤛᤢᤖᤢ ᤐᤡᤖᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤔᤧᤃᤡᤛᤧ ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤥᤔᤧᤳᤇᤡᤱᤔᤠ ᤔᤧᤜᤣ᤺ᤰᤛᤡᤱᤅᤠᤱ ᤒᤠᤖᤢᤰᤁᤧᤴ ᤔᤧᤔᤧᤳᤋᤢ. “ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤜᤠᤱᤅᤡᤴ ᤔᤧᤵᤔᤠᤀᤣ ᤐᤥᤱ᤹॥” 17 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤁᤴ ᤁᤧᤖᤧᤰ ᤀᤡᤱᤄᤱᤜᤠ᤹ ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤁᤧᤄᤥᤛᤢ᥅ ᤌᤣ ᤁᤴ ᤐᤠ᤺ᤴᤜᤠ᤹ ᤕᤷᤔᤡᤕᤠ᤺ᤸᤗᤧᤀᤣ ᤐᤠ᤺ᤳᤋᤢᤒᤠᤒᤡ᥅” 18 ᤂᤧᤸᤗᤧᤆᤥᤃᤢᤸᤗᤧ ᤒᤠᤖᤢᤰᤁᤧᤸᤗᤧ ᤔᤧᤳᤋᤢᤛᤡ. “ᤁᤴ ᤐᤠ᤺ᤴᤜᤠ᤹ ᤕᤷᤔᤡᤕᤠ᤺ᤸᤗᤧ ᤐᤠ᤺ᤳᤋᤢᤒᤠᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴ ᤛᤠᤵᤗᤠᤌ᤺ᤱᤔᤥ ᤁᤧᤖᤧᤰ ᤐᤠ᤺ᤴᤇᤣ᤺ᤰᤘᤠᤜᤠ᤹ ᤛᤠᤵᤋᤢᤱᤒᤠᤖᤥ॥” 19 ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤒᤠᤖᤢᤰᤁᤧᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤏᤢ ᤕᤷᤔᤡᤕᤠᤴ ᤏᤧᤵᤔᤠᤱ ᤁᤧᤈᤡᤱᤏᤧᤛᤡᤖ ᤐᤥᤱ᤹॥ ᤂᤧᤴᤇᤡ᤹ ᤁᤧᤘᤠ᤹ᤛᤡᤒᤠᤍᤧᤴᤏᤡᤴ ᤀᤠᤳᤋᤡᤴᤏᤠᤱ ᤔᤧᤔᤧᤳᤋᤧᤛᤧᤴᤏᤧ᤹॥” 20 ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤛᤠᤵᤗᤠᤌᤱᤔᤠᤴ ᤛᤧ᤺ᤵᤔᤠ ᤁᤵᤔᤠᤖᤧ ᤗᤠᤃᤡ ᤜᤠᤱᤜᤡᤶᤔᤥᤒᤠ ᤛᤢᤜᤠᤱᤔᤡᤒᤠ ᤀᤣᤗᤡᤛᤠᤔᤠᤖᤧ ᤁᤢᤕᤠᤰᤑᤠᤱᤅᤥ ᤔᤧᤏᤧᤛ᤻ᤛᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤀᤠᤱ ᤐᤥ᤺ᤰᤂᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤜᤠᤱᤅᤡᤴ ᤔᤧᤈᤧᤰᤋᤢᤖᤥ॥ ᤜᤠᤱᤅᤡᤸᤗᤧ ᤛᤠᤵᤗᤠᤌ᤺ᤱᤔᤧᤴ ᤜᤠ᤺ᤴᤍᤢᤍᤣᤛᤢ 21 ᤜᤠᤱᤅᤡᤸᤗᤧ ᤂᤧᤴ ᤛᤠᤵᤗᤠᤌ᤺ᤱᤔᤧᤴ ᤋᤠ᤺ᤵᤔᤠᤖᤧ ᤗᤠᤃᤡ ᤕᤜᤢᤍᤡ᤺ᤴ ᤐᤠᤱᤄᤢᤍᤣᤛᤢ॥ ᤜᤧᤰᤁᤩᤠᤱ ᤕᤜᤢᤍᤡ᤺ᤴ ᤐᤣᤀᤠᤱ ᤀᤣᤗᤡᤛᤠᤔᤠᤖᤧ ᤁᤢᤕᤠᤰᤑᤠᤱᤅᤥᤗᤠᤶ ᤂᤧᤴ ᤑᤧᤳᤋᤢ ᤜᤧᤰᤁᤩᤠᤱ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤃᤧᤖᤧᤰ ᤐᤡᤛᤠᤱ ᤁᤧᤕᤧᤵᤐᤠ ᤛᤢᤜᤠᤱᤕᤢᤰᤐᤠᤜᤠ᤹ ᤏᤡᤖᤢ ᤐᤡᤖᤢᤛᤡ॥ 22 ᤂᤧᤴ ᤑᤠᤱᤛᤡᤃᤣᤰᤐᤠ ᤆᤢᤱᤘᤠ᤺ᤶᤔᤠ ᤗᤠ ᤘᤕᤧ. ᤁᤸᤗᤧᤆᤥᤃᤢᤸᤗᤧ ᤜᤠᤱᤅᤡᤴ ᤆᤢᤱᤛᤡ᤺ᤰᤔᤠ ᤕᤧᤶᤔᤥ ᤁᤢᤕᤢᤱᤔᤠ ᤜᤠᤱᤜᤡᤶᤔᤥ ᤔᤡᤄᤪᤠ᤺ᤱᤃᤪᤥ᤺ᤰ ᤋᤃᤡ ᤔᤡᤈᤠ᤹ᤏᤢ ᤕᤢᤅᤧ॥ 23 ᤕᤜᤢᤍᤡ᤺ᤸᤗᤧ ᤛᤢᤶᤛᤡ ᤗᤡᤛᤡ ᤁᤢᤍᤡ᤺ᤰᤗᤰ ᤏᤡᤖᤢ ᤛᤢᤖᤢᤖ ᤐᤳᤇᤧ. ᤜᤧᤰᤁᤣ᤺ᤸᤗᤧ ᤜᤠᤱᤅᤡᤸᤗᤧ ᤆᤢᤰᤛᤠ ᤑᤧᤈᤠᤎᤡᤰ ᤕᤠᤱᤛᤡᤱ ᤜᤧᤰᤁᤩᤠᤱ ᤂᤧᤴ ᤏᤡᤖᤢᤛᤢᤖᤢᤒᤠ ᤛᤠᤵᤗᤠᤌᤱᤔᤠ ᤗᤰᤁᤡᤴ ᤜᤧᤃᤢᤀᤠᤱ ᤔᤡᤀᤥ ᤗᤠᤵᤑᤢᤛᤢ ᤁᤣ᤺ᤳᤋᤢ॥ ᤁᤧᤖᤧᤰ ᤛᤠᤵᤗᤠᤌᤱᤔᤠᤴ ᤔᤡᤀᤥ ᤂᤠᤵᤐᤢᤌᤩ᤺ᤱ ᤔᤧᤶᤒᤥᤱᤅᤣ ᤌᤠᤖᤡᤰ ᤂᤧᤸᤗᤧ ᤜᤧᤰᤁᤣᤀᤣ ᤆᤥᤃᤢᤀᤠᤱ ᤐᤳᤇᤧ॥ 24 ᤁᤖ ᤂᤧᤵᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤜᤠᤱᤅᤡᤴ ᤏᤢ ᤂᤧᤴ ᤛᤢᤜᤠᤱᤕᤢᤰᤐᤠᤜᤠ᤹ ᤁᤡᤔᤠᤀᤠᤱ ᤔᤧᤱᤃᤡᤛᤧᤴ ᤂᤢᤴᤇᤡ᤹ ᤏᤡᤱᤘᤠ᤹ᤀᤠᤱ ᤔᤧᤴᤗᤥᤖᤧᤴ॥ 25 ᤀᤣᤸᤏᤠᤋᤠᤏ. ᤍᤗᤠᤕᤠᤜ ᤏᤢ ᤃᤔᤷᤕᤠᤜ᤺ᤸᤗᤧ ᤛᤠᤵᤁᤡᤳᤋᤡᤴ ᤔᤧᤜᤠ᤺ᤴᤍᤧᤴᤏᤧ᤹ ᤑᤠ᤹ᤀᤠᤱ ᤜᤠᤱᤅᤡᤴ ᤐᤣᤗᤡ ᤔᤧᤓᤠᤰᤋᤢᤀᤠᤱ ᤔᤧᤒᤳᤇᤧᤛᤠᤱ ᤂᤢᤏᤧ᤹ ᤂᤧᤱᤜᤠ᤹ ᤂᤧᤶᤄᤧᤶᤔᤠᤱ ᤔᤧᤗᤠᤵᤋᤢᤛᤡᤴ॥ 26 ᤂᤧᤴ ᤀᤣᤃᤠᤱ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤕᤖᤜᤔᤣᤗ ᤜᤠᤱᤛᤠ᤺ᤴ. ᤀᤈᤪᤡᤀᤣᤗᤖᤧ ᤁᤢᤛ᤻ᤛᤠ ᤛᤖᤠᤕᤠᤜᤴ ᤏᤢ ᤀᤒᤍᤡᤀᤣᤗᤖᤧ ᤁᤢᤛ᤻ᤛᤠ ᤛᤣᤗᤣᤔᤩᤠᤜ᤺ᤴ ᤛᤢᤜᤠᤱᤔᤡᤒᤠ ᤒᤠᤖᤢᤰᤁᤧᤴ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤴ ᤋᤧᤶᤔᤠ ᤀᤡᤱᤈᤠᤱ ᤐᤡᤖᤢᤛᤡ॥ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤴᤇᤡ᤹ ᤆᤡᤰᤂᤢᤛᤡᤀᤠᤱ ᤘᤕᤧᤛᤡᤖᤥ॥ ᤕᤷᤔᤡᤕᤠ᤺ᤸᤗᤧ ᤒᤠᤖᤢᤰᤁᤧᤴ ᤘᤣ᤹ ᤛᤠᤵᤁᤡᤳ ᤛᤠᤵᤔᤠ ᤐᤠᤱᤄᤢ 27 ᤕᤷᤔᤡᤕᤠ᤺ᤸᤗᤧ ᤒᤠᤖᤢᤰᤁᤧᤴ ᤔᤧᤳᤋᤢᤀᤠᤱ ᤛᤠᤵᤔᤠ ᤐᤠᤱᤄᤢᤒᤠ ᤛᤠᤵᤗᤠᤌ᤺ᤱᤔᤧᤴ ᤕᤜᤥᤕᤠᤁᤡᤔ ᤜᤠᤱᤅᤡᤸᤗᤧ ᤑᤢᤳᤗᤢᤶ ᤜᤠ᤺ᤴᤍᤢᤍᤣᤛᤢᤀᤠᤱ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤄᤱᤅᤡᤴ ᤕᤷᤔᤡᤕᤠᤀᤥ ᤕᤠᤶᤔᤥ ᤁᤧᤖᤧ॥ ᤂᤢᤏᤧ᤹ ᤐᤠ᤺ᤳᤋᤢ. 28 “ᤘᤣ᤹ ᤛᤠᤵᤗᤠᤌᤱᤔᤠᤎᤡᤰ ᤕᤠᤱᤛᤡᤱᤅᤧ᤹ ᤜᤧᤰᤁᤩᤠᤱ ᤕᤜᤥᤕᤠᤁᤡᤔ ᤜᤠᤱᤅᤡᤸᤗᤧ ᤜᤠ᤺ᤴᤍᤢᤍᤣᤛᤢᤒᤠ ᤋᤃᤡ ᤛᤠᤵᤋᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤠᤶᤔᤥ ᤛᤠᤵᤋᤧ᤹॥ 29 ᤂᤧᤒᤩᤠᤱ ᤂᤧᤏᤧ᤹ ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤔᤧᤴ ᤀᤰᤂᤣ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤂᤧᤏᤧ᤹ ᤂᤧᤴ ᤛᤠᤵᤗᤠᤌ᤺ᤱᤔᤧᤴ ᤁᤧᤜᤠ᤺ᤴᤍᤢ ᤁᤧᤍᤣᤛᤢ. ᤜᤧᤰᤁᤩᤠᤱ ᤁᤧᤒᤠ᤺ᤳᤋᤢ. “ᤒᤣᤒᤡᤗᤥᤏᤒᤠ ᤜᤠᤱᤅᤡᤴ ᤑᤧᤴᤏᤠᤱ ᤁᤴ ᤗᤠᤈᤣᤴ ᤂᤠᤵᤐᤢᤌᤩ᤺ᤱ ᤆᤥᤃᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤌᤰᤛᤠᤜᤠ᤹ ᤏᤢ ᤔᤏᤠᤜᤠ᤹ ᤛᤧᤖᤢᤛᤡ᤹ ᤑᤠ᤹ᤀᤠᤱ ᤂᤧᤏᤧ᤹ ᤌᤣᤀᤠᤱ ᤂᤧᤵᤔᤥ ᤁᤧᤛᤠᤵᤋᤢ᥅” 30 ᤀᤠᤸᤗ ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠᤀᤥ ᤂᤧᤸᤗᤧ ᤕᤢᤱᤔᤠ ᤗᤰ ᤔᤧᤄᤥᤛᤢᤴ॥ ᤂᤧᤸᤗᤧ ᤁᤢᤈᤣ ᤌᤰᤁᤡᤴ ᤗᤠ᤺ᤰᤁᤠᤳ ᤗᤠᤵᤐᤢᤱ ᤐᤣ᤺ᤰᤁᤠᤱ ᤔᤧᤸᤗᤢᤵᤐᤣ ᤁᤠᤱᤒᤧᤳ—ᤗᤧᤴᤍᤡᤰ ᤏᤠᤶᤃᤧᤛᤣ᤺ᤰᤐᤥ ᤏᤡᤎᤠ᤺ᤵᤐᤠᤱ ᤏᤧᤖᤥ ᤜᤧᤰᤁᤩᤠᤱ ᤛᤧᤴᤍᤡᤰ ᤛᤣ᤺ᤰᤘᤠᤀᤥ ᤛᤢᤰᤐᤠ ᤌᤰᤁᤠᤱ ᤏᤧᤃᤴ॥ 31 ᤀᤠᤱᤃᤠ᤹ ᤂᤧᤴ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤜᤧᤰᤁᤩᤠᤱ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ᤀᤥ ᤌᤠᤛᤢᤱ᤹ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥᤃᤢᤱᤒᤠ ᤁᤧᤖᤧᤰ ᤔᤧᤰᤔᤠᤛᤡᤔᤧᤴ ᤂᤧᤱᤜᤠ᤹ᤀᤥ ᤌᤠᤛᤢᤱ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤐᤡᤖᤢᤱᤛᤡᤱᤒᤠ ᤛᤠᤶᤍᤡᤱᤜᤠ᤹ ᤂᤧᤱᤜᤠ᤹ᤖᤧ ᤔᤧᤱᤄᤧᤵᤛᤢᤴᤗᤥ॥’” 32 ᤂᤧᤸᤗᤧᤆᤥᤃᤢᤸᤗᤧ ᤕᤷᤔᤡᤕᤠ᤺ᤸᤗᤧ ᤘᤣ᤹ ᤛᤠᤵᤗᤠᤌᤱᤔᤠ ᤌᤡᤰ ᤋᤠᤖᤢ ᤜᤧᤰᤁᤩᤠᤱ ᤏᤣᤖᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤁᤢᤛᤢᤜᤠᤱᤔᤡᤒᤠ ᤒᤠᤖᤢᤰᤁᤧᤴ ᤔᤧᤳᤋᤢᤖ ᤛᤠᤵᤔᤠ ᤐᤠᤱᤄᤢ॥ ᤂᤧᤒᤩᤠᤱ ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤔᤧᤸᤗᤧ ᤜᤠ᤺ᤴᤍᤢᤍᤣᤛᤢᤒᤠ ᤛᤠᤵᤗᤠᤌ᤺ᤱᤔᤥ ᤐᤳᤇᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤒᤠᤖᤢᤰᤁᤧᤸᤗᤧ ᤛᤠᤵᤋᤢ॥ ᤘᤣ᤹ ᤕᤖᤡᤰ ᤐᤠ᤺ᤴᤜᤠ᤹ᤃ ᤁᤴ ᤕᤧᤶᤔᤥᤖᤰ ᤂᤢᤏᤧ᤹ ᤕᤥ᤹ᤖᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.