ᤕᤷᤔᤡᤕᤠ 35 - LIFOTNT

ᤕᤷᤔᤡᤕᤠᤴ ᤏᤢ ᤖᤣᤁᤠᤒᤡᤜᤠ᤹

¹ ᤕᤥᤛᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤔᤧᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥ ᤕᤜᤘᤣ ᤍᤠᤱᤒᤠᤗᤠᤶ ᤕᤷᤔᤡᤕᤠᤀᤥ ᤀᤰᤋᤱᤒᤠ ᤀᤡᤱᤄᤱ ᤁᤧᤖᤧ.

² “ᤂᤧᤏᤧ᤹ ᤖᤣᤁᤠᤒᤡᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ᤀᤥ ᤐᤣᤃᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤀᤢ᤺ᤳᤋᤧᤛᤧ᤹॥ ᤕᤠᤰᤑᤠᤱᤜᤠ᤹ᤀᤥᤒᤠ ᤁᤢᤓᤠ ᤗᤳᤇᤠ ᤕᤠᤰᤑᤠᤱᤅᤥ ᤋᤣ᤹ᤖᤧᤛᤧ᤹ ᤂᤧᤒᤩᤠᤱ ᤂᤧᤱᤜᤠ᤹ ᤁᤢᤓᤠ ᤆᤧᤸᤗᤧᤰᤛᤣ᤹ ᤌᤡ ᤌᤢᤱᤔᤠ ᤐᤡᤖᤧᤛᤧ᤹॥”

³ ᤂᤧᤸᤗᤧᤆᤥᤃᤢᤸᤗᤧ ᤕᤷᤔᤡᤕᤠ᤺ᤸᤗᤧ ᤁᤢᤛ᤻ᤛᤠ ᤕᤠᤈᤏᤩᤠᤜ ᤏᤢ ᤜᤒᤛᤡᤏᤩᤠᤜᤖᤧ ᤁᤢᤶᤔᤧᤴᤇᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤁᤢᤴᤛᤠ᤹ᤜᤠ᤹ ᤏᤢ ᤁᤢᤛ᤻ᤛᤠ—ᤁᤧᤖᤧᤰ ᤖᤣᤁᤠᤒᤡ ᤜᤡᤶᤛᤕᤱᤜᤠ᤹ᤀᤥ ᤀᤠᤱᤃᤠ᤹ ᤐᤣᤃᤠᤱ॥

⁴ ᤀᤠᤱᤃᤠ᤹ ᤂᤧᤱᤜᤠ᤹ ᤔᤠᤱᤜᤡᤶᤔᤥ ᤕᤡᤃ᤻ᤍᤗᤩᤠᤜ᤺ᤸᤗᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤠᤏᤠᤏᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤰᤑᤠᤱᤅᤥ ᤋᤠᤖᤢᤱᤛᤡᤱ॥ ᤂᤧᤴ ᤕᤠᤰᤑᤠᤱᤅᤡᤴ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤰᤑᤠᤱᤅᤡᤸᤗᤧ ᤁᤢᤒᤣᤛᤠᤱ ᤛᤸᤗᤢᤔᤗᤧ ᤁᤢᤛ᤻ᤛᤠ ᤗᤠᤶᤎᤣᤳ ᤁᤧᤃᤥᤒᤠ ᤔᤠᤛᤣᤕᤠᤜ᤺ᤸᤗᤧ ᤁᤢᤕᤠᤰᤑᤠᤱᤅᤡᤸᤗᤧ ᤁᤢᤎᤢᤱᤎᤠᤱ ᤏᤧᤛ᤻ᤛᤧ॥

⁵ ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤆᤧᤸᤗᤧᤰᤛᤣ᤹ ᤌᤡ ᤁᤢᤗᤧ᤺ᤶ ᤁᤧᤕᤠᤰᤐᤠ ᤁᤢᤓᤠ ᤂᤥᤷᤕᤠᤜᤠ᤹ ᤏᤢ ᤗᤢ᤺ᤶᤒᤠᤜᤠ᤹ ᤖᤣᤁᤠᤒᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤢᤰᤂᤢᤱ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱ. “ᤔᤡᤛᤠᤰ ᤆᤧᤸᤗᤧᤰᤛᤣ᤹ ᤌᤡᤈᤡ ᤌᤢᤅᤧᤶᤔᤧ᤹ᤀᤥ॥”

⁶ ᤁᤖ ᤂᤧᤱᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤠᤱ. “ᤀᤠᤏᤡᤃᤣ ᤆᤧᤸᤗᤧᤰᤛᤣ᤹ ᤌᤡ ᤔᤧᤎᤢᤱᤃᤢᤶᤒᤧᤴ. ᤌᤣᤀᤠᤱᤓᤧᤸᤗᤧ ᤖᤣᤁᤠᤒᤧᤸᤗᤧ ᤁᤢᤛ᤻ᤛᤠ ᤀᤠᤏᤡᤃᤣ ᤌᤠ᤺ᤰᤌᤧᤒᤠ ᤕᤥᤏᤠᤍᤠᤒᤖᤧ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤡᤃᤧᤀᤠᤱ ᤘᤠ᤹. ‘ᤂᤡᤏᤡ᤹ ᤏᤢ ᤂᤡᤏᤡ᤹ ᤛᤠᤔᤧᤔᤧᤴᤇᤠ᤹ᤜᤠ᤹ᤖᤧ ᤀᤠᤓᤧᤸᤗᤧᤀᤠᤱ ᤆᤧᤸᤗᤧᤰᤛᤣ᤹ ᤌᤡ ᤌᤢᤱᤔᤠ ᤔᤧᤏᤢ᤹ᤏᤧᤴ॥

⁷ ᤂᤧᤴᤏᤢ᤺ᤸᤗᤧ ᤘᤣ᤹ ᤂᤡᤏᤡ᤹ ᤜᤡᤶ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤕᤠ᤺ᤴᤔᤔᤠ ᤏᤢ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤁᤣ᤺ᤵᤔᤠ ᤔᤧᤏᤢ᤹ᤏᤧᤴ॥ ᤂᤡᤏᤡ᤹ ᤀᤰᤋᤱᤒᤠ ᤕᤠ᤺ᤶᤒᤰ ᤀᤠᤓᤧᤸᤗᤧᤀᤠᤱ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤂᤡᤏᤡ᤹ ᤁᤧᤕᤢᤅᤡᤒᤠ ᤗᤠᤈᤣ᤹ᤀᤥ ᤕᤖᤡᤰ ᤕᤧᤴ ᤌᤠᤖᤡᤰ ᤘᤠ᤹ᤔᤠ ᤁᤧᤄᤥᤛᤡᤖ ᤑᤠ᤹ᤀᤠᤱ ᤛᤍᤠᤍᤡᤱ ᤘᤧᤵᤔᤡᤒᤠ ᤁᤢᤀᤡᤛᤡᤰ ᤛᤠ᤺ᤱᤃᤠᤜᤡᤶᤔᤥ ᤕᤢᤅᤧᤶᤔᤧ᤹॥’

⁸ ᤖᤣᤁᤠᤒᤖᤧ ᤁᤢᤛ᤻ᤛᤠ ᤕᤥᤏᤠᤍᤠᤒᤖᤧ ᤀᤠᤏᤡᤃᤣ ᤐᤡᤖᤡᤃᤧᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤀᤠᤏᤡᤃᤣ ᤀᤡ᤺ᤵᤔᤠ ᤏᤠ᤺ᤵᤔᤠ ᤋᤧᤴᤍᤡᤃᤧᤀᤠᤱ ᤘᤕᤡᤃᤧ॥ ᤀᤠᤏᤡᤃᤣ ᤀᤠᤒᤠᤅᤣ ᤀᤠᤵᤑᤠᤸᤗᤧᤀᤠᤱ ᤆᤧᤸᤗᤧᤰᤛᤣ᤹ ᤌᤡ ᤔᤧᤎᤢᤅᤢᤶᤒᤧᤴ. ᤀᤠᤏᤡᤃᤣ ᤔᤣ᤺ᤳᤜᤠ᤹ ᤏᤢ ᤛᤠᤀᤣᤜᤠ᤹ᤖᤧᤀᤠᤱ ᤔᤧᤴᤎᤢᤅᤢᤴ॥

⁹ ᤀᤠᤏᤡᤃᤣ ᤜᤡᤶ ᤆᤥᤃᤢᤶᤒᤧᤀᤠᤱ ᤂᤧᤵᤔᤥ ᤔᤧᤕᤢᤅᤡᤃᤧᤴ. ᤜᤧᤰᤁᤩᤠᤱ ᤀᤠᤏᤡᤃᤣ ᤀᤠᤒᤠᤅᤣ ᤀᤡᤰᤋᤠᤵ. ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤀᤡᤃᤪ ᤐᤥᤃᤢᤃᤧᤴ ᤁᤢᤈᤠ ᤌᤣᤀᤠᤱ ᤔᤧᤃᤳᤋᤢᤶᤒᤧᤴ॥

¹⁰ ᤁᤖ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤀᤠᤏᤡᤃᤣ ᤕᤢᤅᤡᤃᤧᤖ ᤘᤕᤡᤃᤧ. ᤜᤧᤰᤁᤩᤠᤱ ᤀᤠᤏᤡᤃᤣ ᤐᤠᤎᤧᤒᤠ ᤕᤥᤏᤠᤍᤠᤒᤖᤧ ᤐᤡᤖᤡᤃᤧᤒᤠ ᤀᤡᤱᤈᤠᤱᤅᤡᤴ ᤂᤰᤐᤧᤳ ᤀᤡ᤺ᤳᤋᤢᤶᤒᤧ ᤏᤠ᤺ᤳᤋᤢᤶᤒᤧᤀᤠᤱ ᤘᤕᤡᤃᤧ॥

¹¹ ᤁᤖ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤁᤴ ᤗᤠᤈᤣᤴ ᤌᤱᤅᤥ ᤑᤳᤋᤢᤸᤗᤧ ᤒᤣᤒᤡᤗᤥᤏ ᤏᤢ ᤀᤖᤠᤔ ᤗᤠᤈᤣ᤹ᤒᤠ ᤌᤰᤛᤢᤒᤠᤜᤠ᤹ᤏᤢ ᤁᤡᤛᤡᤃᤧ॥ ᤂᤧᤒᤩᤠᤱ ᤀᤠᤏᤡᤃᤣ ᤕᤖᤢᤛᤗᤧ᤺ᤶᤔᤥ ᤆᤳᤇᤡᤱᤔᤠ ᤋᤠᤔᤠ ᤏᤡ᤺ᤴᤎᤥ ᤆᤥᤃᤢᤶᤒᤧ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤁ᤹ᤕᤥ ᤕᤢᤅᤡᤃᤧᤖ ᤘᤕᤡᤃᤧ॥”

¹² ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ.

¹³ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ᤖᤥ ᤐᤣᤃᤧ᤹ᤀᤠᤱ ᤀᤰᤂᤣ ᤔᤧᤳᤋᤧᤛᤧ᤹. ‘ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤀᤠᤰᤂᤣᤗ᤹ᤖᤡᤰ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱ ᤁᤧᤗ᤹ᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤋᤩᤧᤶᤔᤧ᤹ᤀᤠᤱ ᤜᤢ᤹ᤀᤠᤛᤡᤶᤔᤧ᤹॥’

¹⁴ ᤖᤣᤁᤠᤒᤡᤜᤠ᤹ᤖᤧ ᤀᤠᤀᤡᤴ ᤌᤠᤖᤡᤰᤛᤠᤱ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤔᤧᤴᤎᤢᤅᤢᤴ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤧᤒᤠ ᤕᤥᤏᤠᤍᤠᤒᤖᤧ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤔᤧᤎᤢᤅᤧᤶᤔᤡᤴᤏᤧ᤹ ᤔᤧᤳᤋᤢᤛᤡᤀᤠᤱ ᤘᤠ᤹॥ ᤁᤖ ᤀᤠᤱᤃᤠ᤹ᤃ ᤂᤡᤏᤡ᤹ᤏᤢᤀᤣ ᤕᤧᤳᤗᤧᤱ ᤕᤧᤳᤗᤧᤱ ᤐᤠ᤺ᤳᤋᤠᤖ ᤘᤠ᤹ᤀᤠ ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤏᤣ ᤁᤧᤘᤕᤡ॥

¹⁵ ᤕᤧᤳᤗᤧᤱ ᤕᤧᤳᤗᤧᤱ ᤀᤠᤱᤃᤠ᤹ ᤂᤡᤏᤡ᤹ᤀᤥ ᤐᤠᤱᤄᤢᤱᤛᤡᤱᤒᤠ ᤀᤠᤛᤧᤘᤠᤖᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤰᤂᤣ ᤁᤧᤶᤔᤧᤳᤋᤡ. ‘ᤂᤡᤏᤡ᤹ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤏᤢ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤣ᤺ᤰᤋᤧᤶᤔᤧ᤹॥ ᤘᤣ᤹ ᤛᤠᤶᤔᤠᤱᤜᤠ᤹ ᤔᤠᤱᤄᤔᤠᤛᤡ ᤗᤧᤖᤧᤶᤔᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤏᤢ ᤂᤧᤏᤡ᤹ ᤐᤠᤎᤧᤒᤠᤜᤠ᤹ ᤐᤡᤖᤢᤱᤛᤡᤱᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤜᤠᤱᤜᤠᤱᤅᤠᤱ ᤘᤠ᤹ᤔᤠ ᤁᤧᤄᤥᤛᤢᤶ॥’ ᤁᤖ ᤀᤠᤱᤃᤠ᤹ ᤔᤧᤳᤏᤡᤱᤒᤠᤴ ᤏᤢ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤔᤡᤴ॥

¹⁶ ᤖᤣᤁᤠᤒᤖᤧ ᤁᤢᤛ᤻ᤛᤠ ᤕᤥᤏᤠᤍᤠᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧᤃ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤒᤡᤖᤢᤛᤡᤒᤠ ᤀᤡᤱᤈᤠᤱᤅᤡᤴ ᤂᤰᤐᤧᤳ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤔᤧᤘᤠ᤹॥ ᤁᤖ ᤂᤡᤏᤡ᤹ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤴᤍᤧᤴᤍᤡᤴ॥

¹⁷ “ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹. ‘ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤐᤠ᤺ᤴᤇᤠ᤺ᤳᤏᤡᤱᤅᤡᤸᤗᤧ ᤂᤡᤏᤡ᤹ ᤂᤧᤶᤔᤠ ᤁᤧᤴᤍᤧᤴᤍᤡᤴ ᤜᤧᤰᤁᤩᤠᤱ ᤂᤡᤏᤡ᤹ ᤀᤢ᤺ᤳᤏᤡᤱᤅᤡᤸᤗᤧ ᤏᤢᤃᤵ ᤐᤡᤔᤠ ᤁᤧᤴᤍᤧᤴᤍᤡᤴ. ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤔᤧᤰᤔᤠᤛᤡᤔᤠ ᤁᤧᤖᤧᤰ ᤛᤠᤶᤍᤡᤱᤜᤠ᤹ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ ᤛᤶᤎᤠᤱ ᤋᤠᤖᤢᤱ᤹॥’”

¹⁸ ᤂᤧᤒᤩᤠᤱ ᤕᤷᤔᤡᤕᤠᤴ ᤜᤡᤛᤡᤱᤅᤠᤱ ᤖᤣᤁᤠᤒᤡᤜᤠ᤹ ᤔᤧᤳᤋᤢᤛᤡ. “ᤁᤖ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ. ‘ᤂᤡᤏᤡ᤹ ᤀᤠᤵᤑᤣᤰ ᤐᤠᤎᤧᤒᤠ ᤕᤥᤏᤠᤍᤠᤒᤖᤧ ᤁᤧᤒᤡᤖᤡᤒᤠ ᤁᤢᤀᤡᤱᤈᤠᤱᤅᤡᤴ ᤏᤢ ᤁᤧᤔᤧᤳᤋᤡᤒᤠ ᤁᤧᤖᤧᤰ ᤏᤡᤛᤠᤶᤜᤠ᤹ ᤁᤧᤍᤡᤶᤍᤢᤶ ᤁᤧᤏᤠ᤺ᤳᤋᤢᤶᤔᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤍᤧᤴᤍᤡᤀᤠᤱ ᤁᤧᤘᤕᤡ॥’

¹⁹ ᤁᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤖᤣᤁᤠᤒᤖᤧ ᤁᤢᤛ᤻ᤛᤠ ᤕᤥᤏᤠᤍᤠᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤗᤠᤶᤒᤠ ᤗᤳᤇᤠ ᤕᤧᤶᤒᤡᤳᤇᤠᤎᤡᤰᤗᤧ ᤛᤍᤠᤍᤡᤱ ᤀᤠᤱᤃᤠ᤹ ᤀᤠᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤂᤥᤛᤢᤖᤥ॥’”