ᤕᤷᤔᤡᤕᤠ 34 - LIFOTNT

ᤛᤡᤍᤁᤡᤕᤠᤜᤖᤧ ᤁᤢᤗᤠᤃᤡ ᤀᤡᤱᤄᤱ

¹ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤁᤢᤕᤢᤰᤁᤥ ᤁᤧᤘᤠ᤹ᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤕᤠᤱᤛᤡᤱᤅᤠᤱ ᤕᤖᤢᤛᤗᤧᤔ ᤏᤢ ᤂᤧᤸᤗᤧ ᤁᤢᤄᤡᤖᤡᤒᤠ ᤕᤧᤰᤕᤰᤜᤠ᤹ ᤌᤱᤅᤥ ᤑᤳᤋᤢᤛᤡᤖ ᤐᤳᤇᤧ ᤜᤧᤰᤁᤣ᤺ᤸᤗᤧ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ॥

² ᤁᤖ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤕᤧᤰᤕᤰᤁᤡᤴ ᤒᤣᤒᤡᤗᤥᤏᤒᤠ ᤜᤠᤱᤅᤡᤴ ᤁᤢᤜᤢᤰᤁᤥ ᤐᤡᤖᤢᤱᤗ ᤐᤳᤋᤠ ᤜᤧᤰᤁᤩᤠᤱ ᤂᤧᤸᤗᤧ ᤁᤴ ᤕᤧᤰᤕᤰᤁᤡᤴ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢ᤹॥

³ ᤂᤧᤸᤗᤧ ᤁᤢᤜᤢᤰᤁᤥᤗᤠᤶᤒᤠ ᤂᤧᤏᤧ᤹ ᤂᤧᤳᤇᤡᤱᤔᤠ ᤁᤧᤱᤄᤥᤛᤢᤴ. ᤂᤧᤸᤗᤧ ᤁᤧᤍᤧᤶᤔᤠᤱ ᤂᤢᤏᤧ᤹ ᤁᤢᤜᤢᤰᤁᤥ ᤁᤧᤎᤠ᤹᤺॥ ᤂᤧᤏᤧ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤴ ᤁᤧᤔᤡᤰᤁᤡᤸᤗᤧ ᤁᤧᤏᤡᤛᤢ᤹ ᤂᤧᤒᤩᤠᤱ ᤂᤧᤴᤏᤢ ᤏᤠᤍᤢᤶᤍᤢᤶᤒᤠ ᤋᤠ᤹ᤈᤧᤱᤔᤠ ᤐᤥᤱ᤹॥ ᤂᤧᤴ ᤀᤣᤃᤠᤱ ᤂᤧᤏᤧ᤹ ᤒᤣᤒᤡᤗᤥᤏ ᤁᤧᤒᤣ᤺ᤰ॥

⁴ “ᤜᤧᤰᤁᤣᤛᤠᤱ ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜᤀᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤔᤠᤱᤜᤢᤵᤐᤡᤴ ᤂᤧᤏᤧ᤹ ᤂᤧᤵᤛᤧ ᤕᤢᤰᤂᤧ᤹॥ ᤂᤧᤏᤧ᤹ ᤌᤱᤅᤥ ᤁᤧᤴᤇᤡᤏᤧᤴ॥

⁵ ᤂᤧᤏᤧ᤹ ᤕᤠᤶᤏᤠ᤺ᤶᤔᤥ ᤁᤧᤏᤡᤱᤘᤠ᤹ ᤋᤢᤰᤂᤣ ᤔᤧᤴᤈᤠᤀᤣ ᤁᤧᤛᤡ᤹᤺. ᤜᤧᤰᤁᤩᤠᤱ ᤁᤧᤏᤡᤱᤘᤠ᤹ᤛᤥᤰᤁᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤀᤠᤱ ᤋᤃᤡᤒᤠ ᤂᤧᤏᤧ᤹ ᤁᤧᤎᤠ᤺ᤰ ᤜᤠᤱᤜᤠ᤹ ᤔᤏᤠᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰ ᤆᤣᤗᤢᤵ ᤂ᤺ᤱᤗᤢᤵ ᤔᤧᤔᤧᤳᤋᤢᤛᤡ. ᤜᤧᤰᤁᤣᤗ᤹ᤖᤡᤰᤁᤣ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤆᤣᤗᤢᤵ ᤂ᤺ᤱᤗᤢᤵ ᤁᤧᤶᤔᤧᤳ॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤗᤠᤃᤡ ᤔᤧᤖᤡᤱ ᤔᤧᤎᤰᤗ ᤀᤰᤂᤣ ᤔᤧᤒᤠ᤺ᤳᤋᤢ᤹. ‘ᤆᤡ᤺ᤳᤋᤠᤱᤛᤩᤧ. ᤀᤠᤏᤡᤃᤣ ᤍᤠᤱᤒᤧᤴ ᤔᤠᤛᤡᤱᤗᤥ᥄’ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹॥”

⁶ ᤂᤧᤒᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠ᤺ᤸᤗᤧ ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤴ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤳᤋᤢ.

⁷ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤕᤖᤢᤛᤗᤧᤔ ᤏᤢ ᤕᤜᤢᤍᤠᤒᤠ ᤘᤣ᤹ ᤕᤧᤰᤕᤰᤜᤠ᤹ᤀᤥ ᤋᤧᤴᤎᤱ ᤔᤧᤈᤥᤃᤢᤖ ᤔᤧᤒᤳᤇᤧ॥ ᤜᤠᤒᤠ ᤂᤧᤴ ᤕᤧᤶᤔᤥ ᤗᤠᤁᤡᤛ ᤏᤢ ᤀᤠᤈᤣᤁᤠᤒᤠ ᤕᤧᤰᤕᤰᤜᤠ᤹ᤀᤠᤱ ᤌᤱᤅᤥ ᤔᤧᤓᤳᤋᤢᤖ ᤔᤧᤒᤳᤇᤧ. ᤕᤜᤢᤍᤠᤀᤥ ᤗᤢᤱᤎᤠᤰᤁᤡᤸᤗᤧ ᤑᤠᤰᤔᤏᤠᤒᤠ ᤂᤧᤴ ᤏᤧᤳᤇᤡ ᤕᤧᤰᤕᤰᤜᤠ᤹ᤖᤰ ᤕᤠ᤺ᤰᤋᤧᤇᤡᤀᤠᤱ ᤏᤧᤛ᤻ᤛᤧᤖᤥ॥

ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡ

⁸ ᤛᤡᤍᤁᤡᤕᤠᤜ ᤜᤠᤱᤅᤡᤸᤗᤧ ᤕᤖᤢᤛᤗᤧ᤺ᤶᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤜᤢᤍᤡ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤛᤧᤴᤗᤵ ᤐᤡᤔᤠᤛᤡ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤕᤧ ᤜᤠᤒᤠ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤠᤗᤠᤶ ᤕᤷᤔᤡᤕᤠᤀᤥ ᤀᤰᤋᤱᤒᤠ ᤀᤡᤱᤄᤱ ᤁᤧᤖᤧ॥

⁹ ᤁᤧᤖᤧᤰᤗᤧ ᤀᤠᤒᤠᤅᤣ ᤀᤠᤒᤠᤅᤣ ᤂᤢᤴᤇᤡ᤹ ᤕᤜᤢᤍᤡ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤛᤧᤴᤗᤵ ᤐᤡᤔᤠᤛᤡ ᤁᤧᤒᤥᤱᤒᤠ ᤘᤕᤧ॥ ᤜᤠ᤺ᤳᤗᤧᤀᤠᤱ ᤀᤠᤒᤠᤅᤣ ᤕᤜᤢᤍᤠᤒᤠ ᤑᤢ᤹ᤏᤢᤛᤠ᤹ ᤏᤧ᤹ᤏᤢᤛᤠ᤹ᤜᤠ᤹ ᤕᤥᤰ ᤆᤥ᤺ᤰᤔᤠᤛᤡ ᤔᤧᤴᤏᤢ᤹ᤔᤏᤠᤒᤠ ᤘᤕᤧ॥

¹⁰ ᤁᤸᤗᤧᤆᤥᤃᤢᤸᤗᤧ ᤁᤴ ᤔᤠᤱᤜᤢᤵᤐᤥ ᤁᤧᤖᤧᤰ ᤔᤏᤠᤜᤠ᤹ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤀᤠᤒᤠᤅᤣ ᤀᤠᤒᤠᤅᤣ ᤂᤢᤴᤇᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤛᤧᤴᤗᤵ ᤐᤡᤔᤠᤛᤡ ᤏᤢ ᤂᤧᤱᤜᤠ᤹ ᤕᤠᤶᤔᤥ ᤕᤥᤰ ᤆᤥ᤺ᤰᤔᤠᤛᤡ ᤔᤣ᤺ᤴ ᤁᤧᤗ᤹ᤒᤠ ᤐᤠ᤺ᤴᤏᤥ ᤔᤧᤍᤧᤴᤍᤧ ᤂᤧᤒᤩᤠᤱ ᤂᤧᤱᤜᤠ᤹ ᤆᤥ᤺ᤰᤕᤢᤶᤓᤥ ᤔᤧᤒᤡᤖᤢᤛᤡ॥

¹¹ ᤁᤖ ᤋᤠ᤺ᤴᤍᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤔᤧᤗᤧᤰᤂᤢ॥ ᤜᤧᤰᤁᤩᤠᤱ ᤆᤥ᤺ᤰᤕᤢᤶᤓᤥ ᤔᤧᤒᤡᤖᤢᤛᤡᤒᤠ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤔᤧᤏᤢ᤺ᤰᤋᤢ ᤔᤧᤍᤠᤖᤢᤛᤡ ᤂᤧᤒᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤛᤠᤰᤁᤧᤸᤗᤧᤰ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧᤖ ᤔᤧᤕᤠ᤺ᤴᤍᤢᤛᤡ॥

¹² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤋᤱᤒᤠ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ.

¹³ “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤂᤡᤏᤡ᤹ ᤌᤠ᤺ᤰᤜᤠ᤹ ᤕᤥᤰ ᤐᤥᤱᤔᤠᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤖᤢᤱᤛᤡᤱᤅᤠᤱ ᤔᤡᤛᤪᤗᤠᤶ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱᤅᤡᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤁᤴ ᤔᤠᤱᤜᤢᤵᤐᤡᤴ ᤆᤥᤃᤢᤱᤅᤠᤱ ᤘᤕᤠᤱ॥ ᤀᤠᤱᤃᤠ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱ.

¹⁴ ‘ᤂᤧᤱᤜᤠ᤹ᤖᤧ ᤂᤧᤏᤡ᤹ ᤜᤢᤰᤁᤥ ᤔᤧᤛᤱᤄᤢᤛᤡᤒᤠ ᤂᤧᤏᤡ᤹ ᤜᤡᤒᤪᤢ ᤑᤢ᤹ᤏᤢᤛᤠ᤹ᤜᤠ᤹ ᤋᤱᤒᤣ ᤏᤢᤛᤡ ᤁᤧᤵᤐᤠ ᤕᤧᤶᤔᤥ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡ ᤐᤥᤱ᤹॥ ᤋᤱᤒᤣ ᤋᤢᤰᤛᤡ ᤌᤠᤖᤡᤰ ᤂᤡᤏᤡ᤹ ᤕᤠ᤺ᤶᤒᤰ ᤔᤧᤈᤥᤃᤢ ᤔᤧᤛᤢᤖᤢ ᤁᤧᤶᤒᤡᤖᤡᤀᤠᤱ ᤂᤧᤱᤜᤠ᤹ ᤗᤧᤵᤔᤠᤛᤡᤀᤣ ᤐᤥᤱ᤹॥’ ᤁᤖ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤶᤒᤡᤖᤢᤴ ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤜᤧᤰᤁᤣ ᤔᤧᤴᤈᤥᤃᤢᤴ॥

¹⁵ ᤁᤢᤓᤠ ᤕᤧᤴ ᤋᤃᤡᤖᤰ ᤂᤡᤏᤡ᤹ ᤏᤡᤱᤘᤠ᤹ᤗᤥᤖᤧᤀᤠᤱ ᤁᤧᤜᤡᤴᤍᤡ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤁᤧᤍᤠᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶ॥ ᤂᤡᤏᤡ᤹ ᤁᤧᤖᤧᤰ ᤀᤠᤒᤠᤅᤣ ᤀᤡᤛᤪᤠᤀᤡᤗᤒᤠ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡ ᤁᤧᤍᤧᤶᤒᤠ ᤁᤧᤒᤥ᤺ᤰᤂᤡ ᤂᤧᤒᤩᤠᤱ ᤀᤠᤍᤃᤡ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤒᤠ ᤔᤠᤱᤜᤡᤶᤔᤥ ᤂᤡᤏᤡ᤹ ᤗᤳᤇᤠ ᤔᤠᤱᤜᤢᤵ ᤁᤧᤈᤥᤃᤢᤶ॥

¹⁶ ᤁᤖ ᤂᤡᤏᤡ᤹ ᤕᤠᤶᤔᤥ ᤂᤡᤏᤡ᤹ ᤏᤡᤱᤘᤠ᤹ ᤁᤧᤗᤧᤰᤂᤢᤶ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤡᤱ ᤁᤧᤍᤣᤛᤢᤶ॥ ᤂᤡᤏᤡ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤏᤡᤱᤘᤠ᤹ ᤁᤢᤀᤡᤛᤡᤰ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤢᤶᤛᤡᤶᤔᤠᤱ ᤔᤧᤘᤕᤧᤒᤠ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤁᤧᤏᤢ᤺ᤰᤋᤢᤶ ᤁᤧᤍᤠᤖᤢᤶᤛᤡᤶ ᤂᤧᤒᤩᤠᤱ ᤕᤠᤶᤔᤥ ᤛᤠᤰᤁᤧᤸᤗᤧᤰ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤁᤧᤈᤥᤃᤢᤶᤛᤡᤶ॥

¹⁷ “ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹. ᤂᤡᤏᤡ᤹ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴ. ᤜᤧᤰᤁᤩᤠᤱ ᤂᤡᤏᤡ᤹ ᤀᤡᤛᤪᤠᤀᤡᤗᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤆᤥ᤺ᤰᤕᤢᤶᤓᤥ ᤁᤧᤶᤒᤡᤖᤢᤶᤛᤡᤶᤔᤧᤴ॥ ᤏᤢ᤹. ᤀᤠᤸᤗ ᤀᤠᤱᤃᤠ᤹ ᤂᤡᤏᤡ᤹ ᤌᤱ. ᤛᤠᤰᤘᤠᤴ ᤏᤢ ᤔᤡᤱᤍᤣ᤹ᤗᤠᤶᤒᤠ ᤔᤧᤰᤔᤠᤛᤡᤔᤠ ᤁᤧᤒᤥᤱᤒᤠ ᤆᤥ᤺ᤰᤕᤢᤶᤓᤥ ᤐᤡᤏᤡᤱ᤹॥ ᤀᤠᤱᤃᤠ᤹ ᤂᤡᤏᤡ᤹ᤏᤢ ᤌᤧᤔᤠ ᤆᤥᤃᤢᤱ᤹. ᤂᤧᤴ ᤔᤧᤏᤡᤛᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤱᤔᤠ ᤔᤧᤛᤡ॥

^18-19 ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤜᤧᤰᤁᤩᤠᤱ ᤜᤠᤱᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤧᤒᤩᤠᤱ ᤗᤠᤶᤗᤥᤒᤠᤜᤠ᤹ᤖᤧ ᤗᤳᤇᤠ ᤛᤧᤃᤶᤒᤠ ᤁᤢᤶᤒᤠᤒᤠ ᤌᤰᤛᤠᤎᤡᤰ ᤏᤧᤳᤇᤡ ᤁᤢᤄᤧᤸᤗᤧᤰ ᤔᤧᤈᤥᤃᤢ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤢᤶᤔᤥᤗᤠᤶ ᤗᤠᤱᤔᤧᤄᤣᤃᤧᤀᤠᤱ ᤀᤠᤱᤃᤠ᤹ᤏᤢ ᤗᤳᤇᤠ ᤔᤠᤱᤜᤢᤵ ᤔᤧᤈᤥᤃᤢ. ᤁᤖ ᤂᤧᤱᤜᤠ᤹ᤖᤧ ᤂᤧᤴ ᤔᤠᤱᤜᤢᤵᤐᤡᤴ ᤔᤧᤓᤣ᤺ᤴᤍᤢ ᤜᤧᤰᤁᤩᤠᤱ ᤂᤧᤴ ᤋᤱᤔᤏᤠᤒᤠ ᤐᤠ᤺ᤴᤜᤠ᤹ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤛᤧᤃᤶᤒᤠ ᤁᤢᤶᤒᤠᤒᤠ ᤌᤰᤛᤠᤴ ᤌᤧᤔᤠ ᤔᤧᤈᤥᤃᤢᤀᤠᤱ ᤔᤧᤘᤕᤧ. ᤀᤠᤱᤃᤠ᤹ ᤂᤧᤱᤜᤠ᤹ ᤜᤧᤰᤋᤱᤒᤠᤀᤣ ᤆᤥᤃᤢᤱᤛᤡᤱ᤹॥

²⁰ ᤂᤧᤱᤜᤠ᤹ ᤛᤧᤵᤔᤠᤛᤡ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤀᤠᤱᤃᤠ᤹ ᤂᤧᤱᤜᤠ᤹ ᤜᤢᤰᤛᤢᤵᤋᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤢᤛᤡᤘᤧᤳ ᤌᤰᤜᤠ᤹ ᤐᤢᤜᤠ᤹ ᤏᤢ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤗᤠᤃᤡ ᤆᤠᤔᤠ ᤁᤢᤈᤠ ᤐᤥᤱ᤹॥

²¹ “ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤴ ᤏᤢ ᤂᤧᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤀᤠᤱ ᤀᤠᤱᤃᤠ᤹ ᤂᤧᤴ ᤂᤢᤴᤇᤡ᤹ ᤛᤧᤵᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤱᤛᤡᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤱᤛᤡᤱ᤹. ᤂᤧᤴ ᤌᤰᤛᤢᤒᤠᤜᤠ᤹ᤖᤧ ᤂᤡᤏᤡ᤹ ᤀᤠᤸᤗᤥ ᤑᤵᤔᤠ ᤁᤧᤶᤗᤧᤖᤡᤀᤠᤱ ᤔᤧᤘᤠ᤹॥

²² ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤴ ᤕᤧᤰᤕᤰᤁᤥ ᤔᤧᤏᤢ᤺ᤱ ᤔᤧᤍᤠ᤹᤺॥ ᤂᤧᤱᤜᤠ᤹ᤖᤧ ᤁᤴ ᤕᤧᤰᤕᤰᤁᤡᤴ ᤌᤱᤅᤥ ᤔᤧᤓᤳᤋᤢ᤹. ᤂᤧᤒᤩᤠᤱ ᤁᤴ ᤕᤧᤰᤕᤰᤁᤡᤴ ᤔᤧᤍᤥᤃᤢᤀᤠᤱ ᤔᤧᤕᤢᤰᤋᤢ ᤜᤧᤰᤁᤩᤠᤱ ᤑᤢᤸᤗᤢᤶ ᤌᤩ᤺ᤱ ᤔᤡ ᤔᤧᤕᤠᤰᤋᤢ᤹॥ ᤀᤠᤱᤃᤠ᤹ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤜᤧᤰᤁᤣ ᤀᤠᤳᤋᤡᤴᤜᤠ᤹ᤀᤠᤱ ᤕᤢᤱᤔᤠ ᤔᤧᤱᤄᤥᤏᤧᤴᤗ ᤔᤏᤠ ᤔᤣ᤺ᤴᤏᤣᤒᤠ ᤆᤥᤃᤢᤱ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”