ᤕᤷᤔᤡᤕᤠ 33 - LIFOTNTᤏᤢ᤹ᤔᤠᤍᤠᤔᤠ ᤏᤢ ᤌᤥ ᤐᤥ᤺ᤰᤔᤠ ᤏᤡᤱᤛᤠᤱ 1 ᤀᤡᤰᤁᤧᤃᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤢᤶᤔᤥ ᤕᤷᤔᤡᤕᤠᤴ ᤐᤢᤱᤗᤠᤎᤠᤒᤠ ᤐᤥ᤺ᤰᤂᤧᤀᤠᤱ ᤕᤠᤃᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤢᤏᤧ᤹ᤀᤥ ᤏᤡᤖᤧᤱ ᤕᤠᤶᤔᤥ ᤁᤧᤖᤧ॥ 2 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤧᤈᤥ᤺ᤰᤐᤠ. ᤜᤧᤰᤁᤩᤠᤱ ᤂᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠ ᤕᤜᤘᤣ ᤍᤠᤱᤒᤠᤴ ᤕᤷᤔᤡᤕᤠ᤺ᤴᤏᤢ ᤐᤠᤖᤧ॥ ᤂᤢᤏᤧ᤹ ᤁᤢᤔᤡᤱ ᤕᤜᤘᤣ ᤍᤠᤱᤒᤠᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤕᤷᤔᤡᤕᤠᤴ ᤀᤰᤂᤣ ᤔᤧᤳᤋᤢ. 3 “ᤀᤠᤱᤃᤠ᤹ ᤀᤢ᤺ᤳᤋᤠᤱᤅᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤐᤠ᤺ᤴᤇᤠ᤺ᤳᤏᤧ॥ ᤂᤧᤏᤧ᤹ ᤁᤧᤸᤗᤧᤛᤢᤶᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤏᤢ ᤏᤧᤜᤡᤖᤧ ᤔᤧᤴᤎᤠᤵᤔᤏᤠᤒᤠ ᤁᤢᤒᤣ ᤁᤧᤕᤠᤰᤐᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧ᤹॥ 4 ᤏᤡᤱᤔᤡᤜᤠ᤹ᤖᤧ ᤁᤡᤷᤃᤵ ᤔᤧᤃᤒᤢᤀᤠᤱ ᤔᤧᤓᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤕᤖᤢᤛᤗᤧ᤺ᤶᤔᤥᤒᤠ ᤜᤡᤶᤜᤠ᤹ ᤏᤢ ᤕᤜᤢᤍᤠᤒᤠ ᤜᤠᤱᤜᤡᤶᤜᤠ᤹ ᤗᤢ᤺ᤴ ᤑᤠ᤹ᤀᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤱ᤹॥ 5 ᤕᤖᤡᤰᤋᤱᤒᤠ ᤒᤣᤒᤡᤗᤥᤴᤒᤠᤜᤠ᤹ᤏᤢ ᤌᤱ ᤔᤧᤎᤰᤋᤧᤸᤗᤧ ᤀᤠᤱᤃᤠ᤹ ᤀᤠᤛᤡᤰ ᤐᤥ᤺ᤰᤔᤠ ᤏᤢ ᤛᤠ᤹ᤖᤡᤰ ᤀᤠᤕᤠ᤺ᤰᤗᤧ᤹ᤔᤥ ᤀᤠᤱᤃᤠ᤹ ᤛᤧᤵᤔᤠ ᤁᤥ᤺ᤳᤋᤢᤱᤛᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ᤖᤧ ᤜᤡᤶᤜᤠ᤹ ᤛᤎᤧᤰ ᤋᤡᤶ॥ ᤁᤴ ᤕᤧᤰᤕᤰᤐᤠ ᤕᤰᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤗᤠᤵᤑᤢᤛᤢᤱᤅᤠᤱ ᤏᤧ᤹᤺॥ 6 “ᤁᤖ ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤏᤢ ᤁᤵᤔᤥᤒᤠ ᤕᤰᤕᤢᤱᤒᤠᤜᤠ᤹ ᤘᤣ᤺ᤴᤏᤡᤱ ᤜᤧᤰᤁᤩᤠᤱ ᤕᤠᤶᤔᤥ ᤁᤢᤕᤠᤶ ᤆᤠᤱᤈᤠᤱ ᤁᤧᤗ᤹ᤒᤠ ᤆᤥ᤺ᤰᤏᤡᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤛᤢᤰᤂᤣ ᤆᤠᤔᤠ ᤛᤏᤠᤖᤢᤱ ᤐᤡᤖᤢᤱᤛᤡᤱ ᤂᤧᤒᤩᤠᤱ ᤁᤶᤒᤪᤠᤱ ᤔᤧᤳᤋᤢᤱᤛᤡᤱ᤹॥ 7 ᤀᤠᤱᤃᤠ᤹ ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤋᤃᤡᤒᤠ ᤜᤧᤰᤁᤣᤀᤣ ᤆᤥᤃᤢᤱᤛᤡᤱ᤹॥ 8 ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤗᤠᤶ ᤂᤧᤱᤜᤠ᤹ ᤛᤢᤳᤌᤥ ᤆᤥᤃᤢᤱᤛᤡᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤴᤇᤡ᤹ ᤗᤠᤕᤥᤴ ᤏᤢ ᤐᤡᤑᤩᤢᤱᤅᤡᤴ ᤗᤧᤵᤔᤡ ᤐᤡᤖᤢᤱᤛᤡᤱ᤹॥ 9 ᤂᤧᤒᤩᤠᤱ ᤁᤴ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤀᤠᤱᤃᤠ᤹ ᤀᤠᤗᤠᤃᤡ ᤏᤡᤱᤘᤠ᤹ ᤋᤠᤔᤠ. ᤔᤡᤱᤛᤥᤎᤠ᤺ᤱᤛᤥ ᤐᤥᤱᤔᤠ ᤏᤢ ᤏᤧᤒᤥ ᤐᤵᤔᤠᤖᤧ ᤁᤢᤒᤢᤱ ᤐᤥᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤆᤥᤃᤢᤱᤒᤠ ᤏᤢᤒᤠ ᤕᤠ᤺ᤶᤒᤰᤜᤠ᤹ ᤏᤢ ᤂᤧᤴ ᤕᤧᤰᤕᤰᤁᤥ ᤆᤥᤃᤢᤱᤒᤠ ᤏᤢ᤹ᤔᤠᤍᤠᤔᤠ ᤐᤠ᤺ᤴᤜᤠ᤹ ᤔᤧᤄᤧᤵᤛᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤐᤃᤡ ᤔᤧᤃᤡᤀᤠᤱ ᤌᤧᤃᤰᤁᤰᤏᤠ ᤔᤧᤕᤱ॥” 10 “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤔᤠᤱ ᤘᤠ᤹. ‘ᤁᤴ ᤋᤧᤴᤏᤡᤴ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤐᤥ᤺ᤰᤂᤧᤀᤠᤱ ᤏᤧ᤹᤺. ᤁ᤹ᤕᤥ ᤗᤳᤇᤠ ᤔᤏᤠ ᤀᤡᤃᤪ ᤗᤳᤇᤠ ᤌᤰᤛᤠ ᤌᤡᤰᤁᤠᤱ ᤕᤠᤱᤔᤧᤎᤥ᤺ᤰᤏᤧᤴ॥’ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤗᤠᤶᤜᤠ᤹ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤏᤧ᤹᤺ ᤜᤧᤰᤁᤩᤠᤱ ᤁᤢᤓᤠ ᤔᤏᤠ ᤀᤡᤃᤪ ᤌᤰᤛᤠᤜᤠ᤹ ᤂᤧᤵᤔᤥ ᤕᤠᤱᤔᤧᤴᤎᤥ᤺ᤰᤏᤧᤴᤇᤠᤱ ᤁᤴ ᤋᤧᤴᤏᤥ ᤂᤡᤏᤡ᤹ ᤕᤠᤶᤔᤥ 11 ᤛ᤺ᤵᤔᤠ ᤀᤣ᤺ᤵᤔᤠ ᤏᤢ ᤏᤡᤱᤘᤠ᤹ ᤋᤠᤔᤠ ᤀᤡᤰᤗᤠ ᤜᤧᤰᤁᤩᤠᤱ ᤋᤧᤴᤎᤠᤶ ᤔᤣ᤺ᤰᤂᤡᤶᤔᤥᤒᤠ ᤆᤠᤔᤢᤰ ᤌᤡᤔᤢᤰᤗᤧ ᤜᤕᤱ ᤁᤡᤸᤗᤡᤱ ᤁᤧᤄᤧᤵᤛᤢᤶ᤹॥ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤜᤡᤶᤔᤥ ᤏᤢᤃᤧᤴ ᤋᤥ᤺ᤶᤔᤠ ᤛᤡᤍᤢᤱᤈᤓᤠᤜᤠ᤹ ᤔᤧᤍᤠᤖᤢᤀᤠᤱ ᤔᤧᤍᤠ᤺ᤸᤗᤧ ᤂᤧᤱᤜᤠ᤹ ᤛᤠᤶᤔᤧᤗᤥᤒᤠ ᤛᤠᤶᤗᤥᤴ ᤂᤡᤏᤡ᤹ ᤁᤧᤄᤧᤵᤛᤢᤶᤗᤥ. “‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤏᤢᤃᤧᤴ ᤐᤡᤖᤧᤶᤔᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤏᤢ᤹ᤒᤠ ᤆᤥᤰᤗᤥ ᤜᤧᤰᤁᤩᤠᤱ ᤂᤢᤏᤧ᤹ ᤛᤍᤠᤍᤡᤱ ᤗᤢᤱᤔᤠ᤹ ᤋᤢᤰᤋᤢᤛᤡᤖᤥ॥’” “ᤀᤠᤱᤃᤠ᤹ ᤁᤴ ᤗᤠᤈᤣ᤹ᤀᤥᤒᤠ ᤏᤢ᤹ᤔᤠᤍᤠᤔᤧᤴ ᤋᤃᤡᤒᤠ ᤜᤧᤰᤁᤣ ᤆᤥᤃᤢᤱ ᤐᤡᤖᤢᤱᤛᤡᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹॥” 12 “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤜᤠ᤺ᤳᤋᤠᤱ ᤔᤏᤠ ᤁᤧᤜᤥᤵᤐᤠ ᤀᤡᤃᤪ ᤌᤰᤛᤠ ᤕᤠᤱᤔᤧᤎᤥ᤺ᤰᤏᤧᤶᤒᤠ ᤁᤴ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤜᤧᤰᤋᤱᤒᤠ ᤁᤴ ᤗᤠᤈᤣ᤹ᤀᤥ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤗᤠᤃᤡ ᤕᤠᤶᤔᤥ ᤌᤡᤰᤗᤧᤱ ᤔᤧᤸᤗᤢᤰ ᤔᤧ᤺ᤴᤍᤠ ᤆᤠᤖᤠᤶᤔᤠᤶᤍᤧᤴᤜᤠ᤹ ᤐᤥᤱ᤹॥ 13 ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠ ᤗᤠᤈᤣ᤹ᤒᤠ ᤕᤧᤰᤕᤰᤜᤠ᤹ᤀᤥ. ᤀᤢ᤺ᤰᤆᤶᤈᤶᤒᤠᤍᤧᤴᤏᤥ. ᤕᤜᤢᤍᤠ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤗᤰᤁᤥ. ᤒᤣᤏᤩᤠᤔᤡᤏ ᤋᤧᤱᤃᤵᤐᤥ. ᤕᤖᤢᤛᤗᤧᤔ ᤁᤧᤖᤧᤰ ᤐᤡᤛᤠᤱᤒᤠ ᤐᤠᤱᤓᤣ᤹ᤀᤥ ᤜᤧᤰᤁᤩᤠᤱ ᤆᤢᤰᤛᤠ ᤐᤠᤱᤓᤣ᤹ᤜᤠ᤹ᤀᤥ ᤏᤢ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤐᤡᤰᤁᤶᤒᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤔᤧᤏᤡᤖᤢᤛᤡ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹॥” 14 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤂᤧᤴ ᤕᤧᤶᤔᤡᤴ ᤋᤠᤖ ᤐᤳ. ᤀᤠᤱᤃᤠ᤹ ᤀᤡᤛᤪᤠᤀᤡᤗ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤁᤧᤳᤋᤢᤱ᤹॥ 15 “ᤂᤧᤴ ᤕᤧᤶᤔᤥ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤗᤠᤶ ᤛᤠᤶᤕᤥᤒᤠ ᤁᤢᤒᤥᤖᤠᤰ ᤌᤡᤰ ᤗ᤺ᤴᤗ ᤕᤠ᤺ᤴᤍᤢᤱᤗᤥ॥ ᤂᤧᤴ ᤜᤠᤱᤅᤡᤸᤗᤧ ᤁᤧᤖᤧᤰ ᤗᤠᤈᤣ᤹ᤀᤥ ᤏᤢᤒᤠ ᤏᤢ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤶᤔᤠ ᤕᤠ᤺ᤶᤒᤰ ᤆᤥᤃᤢᤖᤥ॥ 16 ᤂᤧᤴ ᤕᤧᤴᤜᤠ᤹ᤀᤥ ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤋᤠᤱᤔᤧᤛᤧ᤺ᤵᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤠᤵᤌᤣᤰ ᤕᤠᤶᤎᤣᤰᤁᤥ ᤔᤧᤕᤢᤱᤗᤥ॥ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤁᤢᤔᤡᤱ ‘ᤕᤜᤘᤣ ᤍᤠᤱᤒᤠᤴ ᤀᤠᤏᤡᤃᤣ ᤛᤠᤶᤕᤥᤒᤠᤖᤥ॥’ 17 “ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤍᤠᤀᤢᤍ ᤜᤠᤱᤅᤡᤸᤗᤧ ᤗᤳᤇᤠ ᤁᤢᤔᤢ᤹ᤀᤡᤍᤠᤱᤛᤠᤎᤡᤰ ᤛᤍᤠᤍᤡᤱ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥᤱ᤹॥ 18 ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤧᤘᤠ ᤁᤧᤈᤥ᤺ᤰᤐᤠ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ. ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤜᤧᤰᤁᤩᤠᤱ ᤘᤣ᤹ ᤗᤧᤳᤋᤡᤜᤠ᤹ ᤋᤥ᤺ᤶᤔᤠᤖᤧ ᤗᤠᤃᤡ ᤗᤧᤒᤡᤖᤧ ᤁᤢᤎᤠ᤺ᤰᤗᤠᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤧᤒᤥᤱ᤹॥’” 19 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤥᤀᤥ ᤁᤧᤖᤧ. 20 “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤗᤧᤴᤍᤡᤰ ᤜᤧᤰᤁᤩᤠᤱ ᤛᤧᤴᤍᤡᤰᤁᤧᤴᤏᤢᤒᤠ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤑᤣ᤺ᤶᤔᤠ ᤁᤧᤛᤢᤰᤋᤢᤶᤏᤧᤓᤃᤪ. ᤂᤧᤒᤩᤠᤱ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤥ ᤂᤧᤴ ᤗᤧᤴᤍᤡᤰ ᤏᤢ ᤛᤧᤴᤍᤡᤰ ᤔᤧᤒᤥᤱᤏᤧᤴᤏᤧᤓᤃᤪ. 21 ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍ ᤜᤠᤱᤅᤡᤴᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤏᤢ ᤀᤠᤱᤃᤠ᤹ ᤀᤠᤍᤃᤡ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤗᤧᤒᤡ ᤛᤢᤘᤠᤱᤜᤠ᤹ᤗᤠᤶ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴᤏᤠᤱ ᤑᤣ᤺ᤶᤔᤠ ᤛᤢᤰᤋᤧᤳ. ᤂᤧᤒᤩᤠᤱ ᤍᤠᤀᤢᤍᤖᤧ ᤁᤢᤜᤠᤱᤕᤢᤰᤏᤠᤀᤥ ᤜᤠᤱᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤸᤗᤀᤠᤱᤎᤥ ᤂᤧᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ ᤔᤧᤶᤒᤥᤱᤏᤧᤴ॥ 22 ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤏᤢ ᤀᤠᤱᤃᤠ᤹ ᤀᤠᤍᤃᤡ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳᤋᤡᤴ ᤋᤠᤱᤛᤠᤰᤐᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ ᤀᤡᤃᤪ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤕᤧ᤺ᤱᤄᤠ᤺ᤸᤗᤧ ᤁᤢᤈᤣ᤺ᤰᤜᤠ᤹ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤜᤧᤰᤁᤣ ᤕᤖᤡᤰ ᤑᤥᤛᤢᤱᤛᤡᤱ᤹॥’” 23 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ. 24 “ᤀᤠᤱᤃᤠ᤹ ᤛᤣᤃᤢᤱᤛᤡᤱᤒᤠ ᤏᤧᤳᤇᤡ ᤜᤡᤶᤛᤕᤱ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤴ ᤀᤠᤱᤃᤠ᤹ᤀᤣ ᤗᤠᤵᤑᤢᤛᤢᤱᤛᤡᤱᤅᤠᤱ ᤘᤠ᤹ ᤑᤠ᤹ᤀᤠᤱ ᤀᤠᤰᤂᤣᤗ᤹ᤖᤡᤰ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤖ ᤔᤧᤒᤳ. ᤂᤧᤴ ᤌᤣ ᤂᤧᤏᤡ᤹ ᤁᤧᤄᤧᤵᤛᤢᤶᤒᤡ᥅ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤧᤈᤡ᤺ᤳᤋᤢᤛᤡᤖ ᤀᤥᤔᤧᤔᤧᤳᤋᤢᤛᤡ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤳᤌᤡᤰ ᤛᤢᤘᤠᤱᤛᤡ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤢᤛᤡᤴ॥ 25 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤗᤧᤴᤍᤡᤰ ᤜᤧᤰᤁᤩᤠᤱ ᤛᤧᤴᤍᤡᤰᤁᤧᤴᤏᤢᤒᤠ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤑᤣ᤺ᤶᤔᤠ ᤁᤧᤛᤢᤰᤋᤢᤶᤏᤧᤓᤃᤪ. ᤂᤧᤒᤩᤠᤱ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤥ ᤂᤧᤴ ᤗᤧᤴᤍᤡᤰ ᤏᤢ ᤛᤧᤴᤍᤡᤰ ᤔᤧᤒᤥᤱᤏᤧᤴᤏᤧᤓᤃᤪ. 26 ᤀᤠᤱᤃᤠ᤹ ᤕᤠᤁᤢᤒ ᤏᤢ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤏᤠ᤹ᤖᤢᤱᤛᤡᤱ᤹. ᤂᤧᤒᤩᤠᤱ ᤍᤠᤀᤢᤍᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤀᤥ ᤗᤳᤇᤠᤀᤠᤱ ᤀᤒᤪᤠᤜᤠᤔ. ᤀᤡᤛᤜᤠᤁ ᤜᤧᤰᤁᤩᤠᤱ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤛᤶᤎᤠᤱ ᤜᤠᤱᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤔᤧᤛᤣᤃᤢᤱᤅᤡᤴ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤕᤠᤶᤔᤥ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.