ᤕᤷᤔᤡᤕᤠ 32 - LIFOTNT

ᤕᤷᤔᤡᤕᤠ᤺ᤸᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤴ ᤀᤡᤅᤢ

¹ ᤛᤡᤍᤁᤡᤕᤠᤜ᤺ᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧᤒᤠ ᤌᤡᤒᤥᤱ ᤋᤱᤒᤣᤀᤥ ᤀᤡᤃᤪ ᤒᤣᤒᤡᤗᤥᤏᤒᤠ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤕᤧᤳᤇᤡ ᤋᤱᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ॥

² ᤂᤧᤴ ᤕᤧᤶᤔᤥ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤕᤖᤢᤛᤗᤧ᤺ᤶᤔᤡᤴ ᤁᤒᤪᤡᤱ ᤔᤧᤃᤒᤢᤖ ᤔᤧᤒᤳᤇᤧ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤜᤠᤱᤜᤡᤶᤔᤥ ᤁᤧᤘᤠ᤹ᤒᤠ ᤀᤡᤰᤁᤧᤃᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤢᤶᤔᤥ ᤕᤷᤔᤡᤕᤠᤴ ᤛᤠᤰᤐᤠ ᤌᤩᤧᤀᤠᤱ ᤕᤠᤃᤧ॥

³ ᤛᤡᤍᤁᤡᤕᤠᤜ ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤀᤠᤱᤃᤠ᤹ ᤛᤠᤰᤋᤠᤱᤅᤠᤱ ᤕᤠᤃᤠᤱ. “ᤂᤧᤏᤧ᤹ ᤌᤣᤀᤠᤱ ᤀᤰᤋᤱᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ᥅ ‘ᤁᤴ ᤕᤧᤰᤕᤰᤁᤡᤴ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤐᤡᤖᤢᤱ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤴ ᤕᤧᤰᤕᤰᤁᤡᤴ ᤋᤥᤃᤢᤀᤠᤱ ᤕᤢᤰᤋᤢ᤹ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁴ ᤜᤧᤰᤁᤩᤠᤱ ᤛᤡᤍᤁᤡᤕᤠᤜ ᤜᤠᤱᤅᤡᤴ ᤒᤣᤒᤡᤗᤥᤏᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤑᤡ᤺ᤴᤇᤡᤱᤔᤠ ᤔᤧᤛᤢᤰᤏᤧᤴ ᤁᤖ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤌᤠ᤹᤺ ᤂᤧᤒᤩᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤐᤥᤱᤅᤠᤱ ᤏᤠᤍᤢᤶᤍᤢᤶᤒᤠ ᤋᤠ᤹ᤈᤧᤱ॥

⁵ ᤛᤡᤍᤁᤡᤕᤠᤜ᤺ᤴ ᤒᤣᤒᤡᤗᤥᤏᤀᤥ ᤔᤧᤍᤣ᤹ᤖᤢ᤹ ᤜᤧᤰᤁᤩᤠᤱ ᤀᤠᤑᤠᤸᤗᤧ ᤌᤠᤖᤡᤰ ᤀᤠᤱᤃᤠ᤹ ᤂᤧᤴ ᤁᤶᤒᤪᤠᤱ ᤔᤧᤔᤧᤳᤋᤢᤱᤅᤡᤴ. ᤂᤧᤶᤔᤩᤠᤰ ᤌᤠᤖᤡᤰ ᤂᤧᤴ ᤂᤧᤵᤔᤥ ᤘᤠ᤹॥ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ᤏᤢ ᤂᤧᤴ ᤌᤱ ᤆᤥ᤺ᤰᤛᤠᤱ ᤂᤧᤸᤗᤧ ᤌᤱ ᤔᤧᤏᤠ᤺ᤴᤍᤢᤴ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱᤅᤠᤱ ᤘᤠ᤹॥’”

⁶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ॥ ᤂᤢᤏᤧ᤹ ᤔᤧᤳᤋᤠᤱ.

⁷ “ᤂᤧᤏᤧ᤹ ᤁᤧᤶᤓᤅᤠ ᤛᤸᤗᤢᤔᤖᤧ ᤁᤢᤛ᤻ᤛᤠ ᤜᤏᤔᤣᤗᤧᤴ ᤋᤠᤀᤠᤱ ᤐᤣᤗᤡ ᤁᤧᤶᤓᤠᤰ. ‘ᤂᤧᤏᤧ᤹ ᤏᤡ᤺ᤳᤋᤠᤱᤒᤠ ᤁᤧᤃᤠ᤹ᤀᤡ ᤁᤧᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤀᤡᤰᤋᤠᤵᤐᤡᤴ ᤂᤧᤏᤧ᤹ ᤀᤡᤱᤔᤠ ᤁᤧᤄᤥᤛᤢ ᤜᤧᤰᤁᤩᤠᤱ ᤒᤣᤏᤩᤠᤔᤡᤴᤗᤧ ᤁᤢᤗᤠᤈᤣ᤹ᤀᤥᤒᤠ ᤀᤏᤠᤋᤥᤋᤀᤥ ᤁᤧᤏᤧᤒᤠ ᤀᤠᤀᤡᤰᤋᤠᤵᤐᤡᤴ ᤀᤡᤅᤠᤱ ᤐᤡᤖᤠᤱᤅᤧ᤹॥’”

⁸ ᤂᤧᤒᤩᤠᤱ ᤁᤢᤍᤥ᤺ᤵᤔᤠ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤀᤠᤶᤓᤅᤠᤖᤧ ᤁᤢᤛ᤻ᤛᤠ ᤜᤏᤔᤣᤗᤧᤴ ᤜᤠᤱᤜᤡᤶᤔᤥ ᤁᤧᤘᤠ᤹ᤒᤠ ᤀᤡᤰᤁᤧᤃᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤢᤶᤔᤥ ᤋᤩᤧᤀᤠᤱ ᤔᤧᤳᤋᤠᤱ. “ᤒᤣᤏᤩᤠᤔᤡᤴᤗᤧ ᤁᤢᤗᤠᤈᤣ᤹ᤀᤥᤒᤠ ᤀᤏᤠᤋᤥᤋᤀᤥ ᤁᤧᤏᤧᤒᤠ ᤀᤠᤀᤡᤰᤋᤠᤵᤐᤡᤴ ᤀᤡᤅᤧ᤹॥ ᤂᤧᤴ ᤀᤡᤰᤋᤠᤵᤐᤡᤴ ᤌᤧ᤹ᤔᤠ ᤏᤢ ᤁᤵᤔᤠ ᤂᤧᤏᤧ᤹ᤀᤣ ᤁᤧᤜᤢᤰᤁᤥ ᤘᤠ᤹॥” ᤀᤰᤂᤣᤗ᤹ᤖᤡᤰ ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ᤏᤢ ᤐᤠᤖᤧᤒᤠᤖᤧᤳᤇ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥᤛᤢᤱ॥

⁹ ᤂᤧᤸᤗᤧᤆᤥᤃᤢᤸᤗᤧ ᤜᤏᤔᤣᤗᤧᤴ ᤗᤠᤶᤒᤠ ᤂᤧᤴ ᤁᤢᤀᤡᤰᤋᤠᤵᤐᤡᤴ ᤀᤠᤱᤃᤠ᤹ ᤀᤡᤅᤢᤱ ᤜᤧᤰᤁᤩᤠᤱ ᤕᤢᤵᤐᤠᤴ ᤌᤠᤱᤄᤢᤱᤅᤠᤱ ᤂᤧᤸᤗᤧ ᤁᤢᤔᤧᤸᤗᤢᤱ ᤜᤢᤅᤢᤱ॥ ᤂᤧᤸᤗᤧ ᤁᤧᤖᤧᤰ ᤁᤢᤔᤧᤸᤗᤢᤱ ᤌᤡᤒᤥᤱᤅᤠᤱ ᤏᤢᤛᤡ ᤛᤣᤁᤣᤗ ᤕᤥᤖᤧ॥

¹⁰ ᤀᤠᤱᤃᤠ᤹ ᤋᤧᤶᤛᤰ ᤛᤠᤵᤗᤠᤀᤥ ᤕᤢᤰᤇᤠᤵ ᤀᤣ᤺ᤵᤋᤢᤱ. ᤀᤣ᤺ᤵᤛᤠᤵ ᤕᤢᤰᤋᤢᤱ. ᤛᤠᤂᤡᤜᤠ᤹ ᤀᤣ᤺ᤵᤛᤠᤵ ᤕᤢᤰᤔᤠ ᤐᤠᤱᤄᤢᤱᤛᤡᤱ ᤜᤧᤰᤁᤩᤠᤱ ᤋᤧᤶᤍᤢᤖᤡᤀᤥ ᤕᤢᤵᤐᤠᤴ ᤌᤠᤱᤄᤢᤱᤅᤠᤱ ᤁᤢᤔᤧᤸᤗᤢᤱ ᤐᤡᤖᤢᤱ॥

¹¹ ᤂᤧᤒᤩᤠᤱ ᤀᤡᤰᤋᤠᤵ ᤀᤡᤱᤔᤏᤠᤒᤠ ᤋᤧᤶᤛᤰ ᤛᤠᤵᤗᤠᤴ ᤀᤠᤱᤃᤠ᤹ ᤔᤧᤳᤇᤡᤱᤅᤠᤱ ᤜᤧᤰᤁᤩᤠᤱ ᤀᤡᤱᤔᤠ ᤛᤱᤔᤠᤖᤧ ᤗᤠᤃᤡ ᤆᤥ᤺ᤰᤔᤏᤠᤒᤠ ᤛᤠᤵᤗᤠᤜᤠ᤹ᤀᤥ ᤀᤣ᤺ᤵᤛᤠᤵ ᤕᤢᤰᤔᤏᤠᤒᤠ ᤏᤢ ᤀᤣ᤺ᤵᤛᤠᤵ ᤔᤧᤴᤕᤢᤰᤁᤣᤒᤠ ᤗᤡᤱᤔᤏᤠᤒᤠ ᤏᤧᤵᤔᤠᤱ ᤛᤠᤵᤗᤠᤜᤠ᤹ ᤀᤠᤱᤃᤠ᤹ ᤋᤠ᤺ᤰᤋᤢᤱ.

¹² ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤜᤠ᤹ ᤔᤜᤛᤣᤕᤠᤜ᤺ᤸᤗᤧ ᤁᤢᤶᤔᤧᤴᤇᤠ᤹ ᤏᤣᤖᤡᤕᤠᤜᤖᤧ ᤁᤢᤛ᤻ᤛᤠ ᤒᤠᤖᤢᤁᤧᤴ ᤗᤰᤐᤧᤴ ᤐᤡᤖᤢᤱ॥ ᤀᤠᤶᤓᤅᤠᤖᤧ ᤁᤢᤛ᤻ᤛᤠ ᤜᤏᤔᤣᤗᤧᤴ ᤏᤢ ᤛᤠᤵᤗᤠᤀᤥ ᤕᤢᤰᤇᤠᤵ ᤁᤧᤕᤢᤰᤐᤠ ᤛᤠᤂᤡᤜᤠ᤹ ᤜᤧᤰᤁᤩᤠᤱ ᤀᤡᤰᤁᤧᤃᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤢᤶᤔᤥ ᤁᤧᤕᤢᤱᤒᤠ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤠᤱᤃᤠ᤹ ᤂᤧᤴ ᤛᤠᤵᤗᤠᤴ ᤗᤰᤐᤧᤴ ᤐᤡᤔᤠ ᤕᤠ᤺ᤶᤒᤰᤁᤡᤴ ᤆᤥᤃᤢᤱ॥

¹³ ᤀᤠᤱᤃᤠ᤹ ᤒᤠᤖᤢᤁᤧᤴ ᤂᤧᤴ ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤃᤡ ᤀᤰᤂᤣ ᤔᤧᤳᤋᤢᤱ.

¹⁴ “ᤁᤖ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤣ᤺ᤵᤛᤠᤵ ᤕᤢᤰᤔᤏᤠᤒᤠ ᤋᤧᤶᤛᤰ ᤛᤠᤵᤗᤠᤴ ᤏᤢ ᤗᤡᤱᤔᤏᤠᤒᤠ ᤏᤧᤵᤔᤠᤱ ᤛᤠᤵᤗᤠᤜᤠ᤹ ᤋᤣ᤹ᤖᤧ᤹ᤀᤠᤱ ᤗᤳᤇᤠ ᤂᤠᤶ ᤂᤵᤐᤩᤠᤀᤥ ᤁᤣ᤺ᤳᤋᤧ ᤕᤢᤰᤂᤧ᤹ ᤜᤧᤰᤁᤣᤗ᤹ᤖᤡᤰ ᤂᤧᤴ ᤕᤖᤡᤰ ᤋᤱᤒᤣ ᤌᤠᤖᤡᤰ ᤌᤖᤢᤖ॥’

¹⁵ ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ᤹. ‘ᤌᤡᤰᤕᤠᤴ ᤏᤡᤕᤠᤴ ᤀᤣᤃᤠᤱ ᤁᤴ ᤗᤠᤈᤣ᤹ᤀᤥ ᤜᤡᤶᤜᤠ᤹. ᤀᤡᤰᤋᤠᤵᤜᤠ᤹ ᤏᤢ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤛᤱᤔᤠ ᤀᤡᤱᤔᤠ ᤕᤠ᤺ᤶᤒᤰ ᤕᤠᤶᤔᤥ ᤐᤥᤱ᤹॥’”

ᤕᤷᤔᤡᤕᤠ᤺ᤸᤗᤧ ᤆᤥᤃᤢᤒᤠ ᤐᤣᤗᤡᤃᤧᤴ ᤋᤢᤘᤠ

¹⁶ “ᤂᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤴ ᤀᤡᤱᤔᤏᤠᤒᤠ ᤋᤧᤶᤛᤰ ᤛᤠᤵᤗᤠᤴ ᤏᤣᤖᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤒᤠᤖᤢᤁᤧᤴ ᤐᤡᤖᤢᤱᤅᤠᤱ ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤱ.

¹⁷ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤐᤕᤶ ᤕᤶᤒᤠ ᤁᤧᤔᤢᤰᤛᤠᤶᤔᤡᤴ ᤏᤢ ᤁᤧᤎᤢᤶᤔᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤛ᤻ᤛᤢ॥ ᤂᤧᤏᤧ᤹ ᤁᤧᤗᤠᤃᤡ ᤌᤧᤔᤠ ᤐᤠ᤺ᤴᤏᤠᤱ ᤁᤧᤛᤠᤰᤐᤠ ᤜᤥᤵ॥

¹⁸ ᤂᤧᤏᤧ᤹ ᤜᤧᤴᤇᤡᤱ ᤜᤧᤴᤇᤡᤱᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤏᤠᤜᤠ᤹ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡ ᤁᤖ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤁᤢᤗᤧᤰᤘᤠ ᤔᤏᤠᤜᤠ᤹ ᤂᤢᤶᤍᤡᤱᤅᤠᤱ ᤁᤧᤒᤡᤖᤢᤛᤡ॥ ᤂᤧᤏᤧ᤹ ᤐᤕᤶ ᤕᤶᤒᤠ ᤏᤢ ᤔᤢᤰᤛᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤏᤧ. ᤂᤧᤏᤧ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤏᤧ॥

¹⁹ ᤂᤧᤏᤧ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤏᤡᤗᤠᤶᤜᤠ᤹ ᤀᤡᤳᤇᤠᤵ ᤁᤧᤈᤥᤃᤢ ᤜᤧᤰᤁᤩᤠᤱ ᤔᤢᤰᤛᤠᤶᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢ᤹॥ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤏᤧ᤹ ᤁᤧᤏᤡᤛᤢ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰ ᤁᤢᤀᤡᤛᤡᤰ ᤂᤧᤱᤜᤠ᤹ ᤌᤢᤶᤄᤥ ᤁᤧᤒᤡᤖᤢᤛᤡ᤹॥

²⁰ ᤕᤖᤡᤰ ᤋᤱᤒᤣ ᤋᤃᤡ ᤂᤧᤏᤧ᤹ ᤔᤡᤛᤪᤀᤥ ᤏᤡᤱᤘᤠ᤹ ᤁᤧᤔᤠᤒᤠ ᤏᤢ ᤏᤧᤜᤡᤏᤡᤱᤘᤠ᤹ᤖᤧ ᤔᤧᤴᤎᤠᤵᤔᤏᤠᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢ॥ ᤀᤠᤀᤡᤴ ᤌᤠᤖᤡᤰ ᤂᤧᤏᤧ᤹ ᤀᤡᤛᤪᤠᤀᤡᤗ ᤏᤢ ᤘᤣ᤹ ᤁᤧᤖᤧᤰ ᤜᤠᤱᤈᤢᤶᤗᤢᤶᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖ ᤁᤧᤘᤠ᤹ ᤜᤧᤰᤁᤩᤠᤱ ᤀᤠᤸᤗ ᤂᤧᤏᤧ᤹ ᤁᤧᤖᤧᤰ ᤋᤧᤴᤏᤥ ᤁᤢᤛᤡᤱ ᤁᤧᤶᤏᤡ᤺ᤳ॥

²¹ “ᤏᤡᤱᤘᤠ᤹ ᤁᤧᤔᤠᤒᤠ ᤏᤢ ᤏᤧᤜᤡᤏᤡᤱᤘᤠ᤹ᤖᤧ ᤔᤧᤴᤎᤠᤵᤔᤏᤠᤒᤠ ᤕᤠ᤺ᤶᤒᤰᤗᤠᤶ ᤀᤠᤏᤡᤃᤣ ᤏᤡᤱᤔᤡᤜᤠ᤹ ᤁᤡᤔᤠ ᤕᤱᤔᤠᤀᤥ ᤁᤧᤎᤠᤛᤢᤛᤡᤖ ᤂᤧᤏᤧ᤹ ᤁᤧᤔᤏᤠ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤀᤠᤒᤠᤅᤣ ᤁᤧᤔᤢᤰᤛᤠᤶ ᤏᤢ ᤁᤧᤎᤢᤶᤔᤡᤸᤗᤧ ᤔᤡᤛᤪᤗᤠᤶ ᤁᤧᤗ᤺ᤳᤋᤢᤛᤡᤀᤠᤱ ᤁᤧᤎᤠᤰᤋᤢᤛᤡ॥

²² ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤐᤡᤏᤧᤏᤡᤱ ᤑᤠ᤹ᤀᤠᤱ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤁᤴ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣᤴ ᤂᤧᤱᤜᤠ᤹ ᤁᤧᤒᤡᤖᤢᤛᤡ॥

²³ ᤂᤧᤱᤜᤠ᤹ ᤁᤴ ᤗᤠᤈᤣ᤹ᤀᤥ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤁᤴ ᤗᤠᤈᤣᤴ ᤂᤢᤴᤇᤡ᤹ ᤕᤢᤰᤁᤥ ᤔᤧᤈᤥᤃᤢ. ᤁᤖ ᤂᤧᤏᤧ᤹ ᤁᤧᤀᤡᤱᤈᤠᤱᤅᤡᤴ ᤂᤧᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤍᤧᤴ ᤂᤧᤒᤩᤠᤱ ᤕᤠᤶᤔᤥ ᤂᤧᤏᤧ᤹ ᤁᤧᤏᤡᤛᤠᤶᤔᤡᤴ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰ ᤔᤧᤴᤎᤠᤛᤢᤴ॥ ᤂᤧᤏᤧ᤹ ᤀᤡᤱᤈᤠᤱ ᤁᤧᤒᤡᤖᤢᤛᤡᤒᤠ ᤗᤳᤇᤠ ᤐᤠ᤺ᤴᤎᤡᤰᤁᤠᤱ ᤂᤧᤱᤜᤠ᤹ᤖᤧ ᤔᤧᤴᤈᤥᤃᤢᤴ॥ ᤂᤧᤸᤗᤧᤆᤥᤃᤢᤸᤗᤧ ᤁᤴ ᤁᤧᤖᤧᤰ ᤔᤧᤰᤔᤠᤛᤡᤔᤧᤴ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤁᤧᤍᤠᤖᤢ॥

²⁴ “ᤀᤥᤔᤧᤳᤋᤧ᤹. ᤕᤧᤰᤕᤰᤁᤡᤴ ᤕᤢᤰᤔᤠᤖᤧ ᤗᤠᤃᤡ ᤒᤣᤒᤡᤗᤥᤏᤡᤜᤠ᤹ᤖᤧ ᤂᤧᤴ ᤁᤧᤖᤧᤰ ᤐᤡᤛᤠᤱ ᤁᤵᤔᤠᤖᤧ ᤗᤠᤃᤡ ᤆᤴᤇᤡᤱᤔᤠᤍᤧᤴᤜᤠ᤹ ᤔᤧᤈᤥᤃᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤂᤧ᤹ᤕᤥ ᤌᤱ ᤔᤧᤈᤥ᤺ᤰᤗ ᤔᤧᤘᤠ᤹॥ ᤋᤧᤴᤎᤱ. ᤛᤠᤰᤘᤠᤴ ᤏᤢ ᤔᤡᤱᤍᤣᤸᤗᤧ ᤆᤥᤃᤢᤸᤗᤧ ᤕᤧᤰᤕᤰᤁᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠ᤹᤺॥ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤳᤗ ᤐᤵᤐᤠ ᤂᤧᤏᤧ᤹ ᤁᤧᤏᤡᤛᤢᤖ ᤁᤧᤘᤠ᤹॥

²⁵ ᤜᤧᤰᤁᤣᤛᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤁᤴ ᤕᤧᤰᤕᤰᤁᤡᤴ ᤒᤣᤒᤡᤗᤥᤏᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤔᤠ ᤕᤧᤶᤔᤥᤀᤣ ᤂᤧᤏᤧ᤹ ᤀᤠᤱᤃᤠ᤹ ᤁᤧᤏᤡᤒᤠ ᤛᤠᤂᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤴ ᤀᤡᤰᤋᤠᤵᤐᤡᤴ ᤕᤢᤵᤐᤠ᤺ᤸᤗᤧ ᤀᤡᤱᤔᤠ ᤀᤡᤱᤈᤠᤱ ᤁᤧᤒᤡᤖᤠᤱᤗᤥ॥”

ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤁᤢᤔᤧᤰᤔᤠ ᤔᤠᤱᤏᤡᤱᤘᤠ᤹ᤐᤠᤴ

²⁶ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤀᤥ ᤁᤧᤖᤧ.

²⁷ “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ ᤌᤣ ᤀᤠᤱᤃᤠ᤹ ᤀᤠᤗᤠᤃᤡ ᤁᤢᤓᤠ ᤐᤠᤴ ᤁᤧᤛᤠᤰᤐᤠ ᤘᤠ᤹ᤒᤡ᥅

²⁸ ᤂᤧᤸᤗᤧᤆᤥᤃᤢᤸᤗᤧ. ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖ ᤏᤢ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤱ᤹॥ ᤁᤴ ᤗᤠᤈᤣᤴ ᤂᤧᤱᤜᤠ᤹ᤖᤧ ᤔᤧᤍᤥᤃᤢᤀᤠᤱ ᤔᤧᤕᤢᤰᤋᤢ᤹॥

²⁹ ᤜᤧᤰᤁᤩᤠᤱ ᤒᤣᤒᤡᤗᤥᤴᤒᤠᤜᤠ᤹ ᤗᤢᤱᤎᤠᤰ ᤗᤠ᤺ᤰᤁᤠᤳ ᤁᤒᤪᤡᤱ ᤔᤧᤕᤧᤵ. ᤂᤧᤱᤜᤠ᤹ ᤔᤧᤗᤠ᤺ᤳᤋᤠᤱ ᤁᤴ ᤕᤧᤰᤕᤰᤁᤡᤴ ᤂᤠ ᤔᤡ ᤑᤢᤸᤗᤢᤶ ᤔᤧᤕᤠᤰᤋᤢ᤹॥ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤥᤒᤠ ᤀᤠ᤺ᤶᤓᤥ᤹ᤀᤥ ᤒᤠᤗ ᤛᤠᤶᤔᤠᤱᤜᤠ᤹ᤀᤥ ᤛᤛᤡᤱ ᤛᤢᤰᤐᤠ ᤔᤧᤜᤠ᤺ᤴᤍᤢ ᤜᤧᤰᤁᤩᤠᤱ ᤘᤣ᤹ ᤛᤠᤶᤔᤠᤱᤜᤠ᤹ᤀᤥ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤀᤠᤱ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥᤰᤂᤢᤀᤠᤱ ᤘᤕᤧ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤜᤡᤶᤜᤠ᤹ᤀᤠᤱ ᤁᤴ ᤕᤧᤰᤕᤰᤁᤡᤴᤏᤢ ᤛᤥᤖᤡᤰ ᤒᤣᤒᤡᤗᤥᤏᤒᤠ ᤌᤰᤛᤢᤒᤠᤜᤠ᤹ᤖᤧ ᤔᤡᤔᤧᤎᤡᤰᤂᤢᤀᤠᤱ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ॥

³⁰ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶᤔᤡᤴ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥᤀᤣ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤔᤧᤴᤍᤠᤔᤏᤠᤒᤠ ᤔᤧᤈᤥᤃᤠᤱᤅᤠᤱ ᤘᤠ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤂᤢᤴᤇᤡ᤹ ᤕᤠ᤺ᤶᤒᤰᤗᤠᤶᤒᤠ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥᤰᤂᤢᤀᤠᤱ ᤘᤠ᤹॥

³¹ ᤁᤴ ᤕᤧᤰᤕᤰᤁᤡᤴ ᤆᤢᤰᤔᤠ ᤜᤣ᤺ᤰᤋᤧᤒᤠ ᤕᤧᤴᤏᤠᤱᤎᤥᤀᤣ ᤀᤠᤸᤗᤥ ᤌᤠᤖᤡᤰ ᤁᤵᤔᤥ ᤁᤧᤕᤢᤱᤒᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥᤰᤂᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤠᤰᤁᤧᤴ ᤔᤧᤓᤥᤰᤂᤢᤀᤠᤱ ᤘᤠ᤹॥ ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤔᤧᤱᤔᤠ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹॥

³² “ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤔᤏᤠᤜᤠ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹. ᤗᤠᤶᤗᤥᤒᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤁᤧᤖᤧᤰᤗᤧ ᤁᤠᤰ ᤑᤧᤴᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢᤀᤠᤱ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥᤰᤂᤢᤀᤠᤱ ᤘᤠ᤹॥

³³ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤗᤧᤵᤔᤠᤱ ᤂᤢᤴᤇᤡ᤹ ᤀᤣ᤺ᤰᤌᤠ᤺ᤰᤔᤧᤴ ᤔᤧᤜᤡᤛᤢᤀᤠᤱ ᤀᤠᤱᤃᤠ᤹ᤀᤥ ᤏᤢ᤺ᤱᤔᤠᤍᤠᤔᤠ ᤔᤧᤴᤍᤧᤴᤏᤧᤴ॥ ᤂᤧᤱᤜᤠ᤹ ᤀᤧᤳᤗᤧᤱ ᤏᤡᤛᤠᤶ ᤜᤢ᤹ᤖᤢᤱᤛᤡᤱᤛᤠᤱ ᤂᤧᤱᤜᤠ᤹ᤖᤧ ᤂᤧᤴ ᤔᤧᤱᤄᤧᤵᤛᤢᤴ ᤜᤧᤰᤁᤩᤠᤱ ᤂᤧᤶᤔᤠ ᤔᤧᤴᤍᤧᤴᤍᤧᤴ॥

³⁴ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠᤖᤧ ᤗᤠᤃᤡ ᤆᤥ᤺ᤰᤔᤏᤠᤒᤠ ᤔᤠᤱᤜᤡᤶᤔᤥᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤔᤧᤕᤢᤰᤂᤢᤛᤡ ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤔᤠᤱᤜᤡᤶᤔᤡᤴ ᤀᤠᤛᤢᤳᤌᤥ ᤔᤧᤈᤥᤃᤢ॥

³⁵ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤛᤠᤜᤠ᤹ ᤔᤥᤗᤥᤂ ᤛᤠᤶᤔᤠᤱᤅᤡᤸᤗᤧ ᤁᤢᤍᤃᤡ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤛᤡ ᤑᤠ᤹ᤀᤠᤱ ᤒᤣᤏ-ᤜᤡᤴᤏᤥᤔᤒᤠ ᤏᤧᤏᤧᤒᤠᤍᤧᤴᤏᤥ ᤒᤠᤗ ᤛᤠᤶᤔᤠᤱᤅᤡᤸᤗᤧ ᤁᤢᤗᤠᤃᤡ ᤛᤧᤘᤠ ᤆᤥ᤺ᤰᤔᤠᤍᤧᤴᤜᤠ᤹ ᤔᤧᤈᤥᤃᤢᤀᤠᤱ ᤕᤢᤱ॥ ᤂᤧᤱᤜᤠ᤹ ᤂᤧᤴ ᤆᤥ᤺ᤰᤔᤠ ᤀᤡᤱᤈᤠᤱ ᤔᤧᤒᤡᤖᤢᤱᤛᤡᤱᤅᤡᤴ॥ ᤂᤧᤱᤜᤠ᤹ᤖᤧ ᤜᤧᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ ᤗᤠᤕᤥ ᤆᤥ᤺ᤰᤔᤠ ᤔᤧᤒᤠᤱᤄᤢᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤀᤠᤓᤧᤸᤗᤧᤀᤠᤱ ᤋᤩᤧᤒᤠ ᤜᤥ᤺ᤵᤋᤧᤖᤥ॥”

ᤏᤡᤱᤛᤠᤱ ᤆᤥ᤺ᤰᤔᤏᤠᤒᤠ ᤔᤠᤱᤜᤢᤵ

³⁶ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤷᤔᤡᤕᤠᤴ ᤀᤰᤂᤣ ᤔᤧᤳᤋᤢ᤹. “ᤕᤷᤔᤡᤕᤠᤀᤣ. ᤋᤧᤴᤎᤱ. ᤛᤠᤰᤘᤠᤴ ᤏᤢ ᤔᤡᤱᤍᤣᤸᤗᤧ ᤆᤥᤃᤢᤸᤗᤧ ᤁᤴ ᤕᤧᤰᤕᤰᤁᤡᤴ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤌᤠ᤹᤺ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤖ ᤔᤧᤘᤠ᤹॥ ᤀᤠᤸᤗ ᤀᤠᤱᤃᤠ᤹ ᤁᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤐᤠ᤺ᤵᤔᤠ ᤁᤧᤒᤥᤱᤒᤠ ᤐᤠᤴ ᤘᤠ᤹. ᤂᤧᤴ ᤂᤧᤵᤛᤧ᤹॥

³⁷ ᤀᤠᤱᤃᤠ᤹ ᤀᤠᤛᤡᤰ ᤐᤥ᤺ᤰᤔᤥ ᤏᤢ ᤛᤠ᤹ᤖᤡᤰ ᤀᤠᤛᤠᤰᤁᤧᤴ ᤐᤥ᤺ᤰᤔᤥ ᤁᤧᤖᤧᤰ ᤐᤡᤛᤠᤱ ᤔᤏᤠᤜᤠ᤹ ᤛᤧᤛᤢᤱᤍᤣᤛᤢᤱᤛᤡᤱ. ᤁᤖ ᤀᤠᤸᤗ ᤂᤧᤴ ᤗᤠᤈᤣ᤹ᤜᤠ᤹ᤗᤠᤶᤒᤠ ᤕᤠᤶᤔᤥ ᤁᤴ ᤋᤧᤴᤏᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ᤹ ᤜᤧᤰᤁᤩᤠᤱ ᤁ᤹ᤕᤥ ᤏᤢᤖᤡᤰ ᤋᤠᤖᤡᤰᤁᤠᤱ ᤘᤠ᤹ᤔᤠ ᤐᤠᤱᤄᤢᤱᤛᤡᤱ᤹॥

³⁸ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤀᤠᤱᤃᤠ᤹ ᤀᤠᤔᤏᤠ ᤔᤧᤒᤥᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤠᤶᤔᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ॥

³⁹ ᤁᤧᤖᤧᤰ ᤕᤧᤶᤔᤥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤱᤜᤠ᤹ ᤗᤳᤇᤠ ᤏᤡᤱᤛᤣᤰ ᤏᤢ ᤗᤳᤇᤠ ᤏᤡᤱᤘᤠ᤹ ᤐᤡᤖᤢᤱᤛᤡᤱ. ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤀᤠᤒᤠᤅᤣ ᤏᤢ ᤋᤠ᤺ᤴᤍᤡ ᤁᤧᤍᤠᤒᤠ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ ᤏᤢᤒᤠ ᤐᤥᤱ᤹॥

⁴⁰ ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤀᤠᤓᤧᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤗᤳᤇᤠ ᤔᤠᤱᤜᤢᤵ ᤆᤥᤃᤢᤱ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤏᤢ᤹ᤔᤠᤍᤠᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤱᤃᤠ᤹ ᤀᤠᤑᤠᤸᤗᤧᤀᤠᤱ ᤔᤧᤗᤧᤖᤢᤱᤅᤡᤴ ᤜᤧᤰᤁᤩᤠᤱ ᤀᤠᤒᤠᤅᤣ ᤂᤢᤴᤇᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠᤸᤗᤧ ᤀᤠᤱᤃᤠ᤹ ᤕᤠᤵᤔᤡ ᤀᤡᤱᤎᤠᤱ ᤁᤧᤒᤡᤒᤠ ᤂᤧᤱᤜᤠ᤹ ᤆᤥᤃᤢᤱᤛᤡᤱ᤹ ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤑᤠᤸᤗᤧᤀᤠᤱ ᤀᤠᤱᤃᤠ᤹ᤗᤠᤶᤒᤠ ᤔᤧᤴᤀᤡ᤺ᤶᤛᤡᤱ ᤔᤧᤶᤒᤣ᤺ᤰᤏᤧᤴ॥

⁴¹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤏᤢ᤹ᤔᤠᤍᤠᤔᤠ ᤆᤥᤃᤢᤱᤒᤠ ᤕᤠ᤺ᤶᤒᤰᤁᤥ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤋᤠ᤹᤺ ᤜᤧᤰᤁᤩᤠᤱ ᤁᤧᤖᤧᤰ ᤀᤠᤏᤡᤱᤘᤠ᤺ᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤁᤴ ᤗᤠᤈᤣ᤹ᤀᤥ ᤛᤍᤠᤍᤡᤱᤗᤧ ᤗᤠᤃᤡ ᤕᤢᤰᤂᤢᤱᤛᤡᤱ᤹॥

⁴² “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤁᤶᤓᤍᤠᤱᤒᤠ ᤕᤧᤳᤋᤢᤰᤂᤣᤴ ᤁᤴ ᤔᤏᤠᤜᤠ᤹ ᤛᤶᤎᤠᤱ ᤋᤠᤖᤢᤱ. ᤜᤧᤰᤁᤣᤗ᤹ᤖᤡᤰᤁᤣ ᤀᤠᤱᤃᤠ᤹ ᤀᤠᤒᤠᤅᤣ ᤔᤠᤱᤜᤢᤵ ᤆᤥᤃᤢᤱᤒᤠ ᤁᤧᤖᤧᤰ ᤏᤢᤒᤠ ᤐᤠ᤺ᤴᤜᤠ᤹ ᤁᤴ ᤔᤏᤠᤜᤠ᤹ ᤐᤡᤖᤢᤱᤛᤡᤱ᤹॥

⁴³ ᤁᤴ ᤗᤠᤈᤣ᤹ᤀᤥ ᤕᤠᤶᤔᤥ ᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤀᤡᤱᤔᤠ ᤐᤥᤱ᤹. ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤸᤗᤥ ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶ᤹. ‘ᤁᤱᤃ ᤔᤏᤠ ᤏᤢ ᤌᤰᤛᤠ ᤌᤣᤀᤠᤱ ᤔᤧᤴᤘᤠ᤹ᤔᤏᤠᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤆᤥᤰ. ᤌᤣᤀᤠᤱᤓᤧᤸᤗᤧ ᤁᤴ ᤒᤣᤒᤡᤗᤥᤏᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤆᤢᤰᤋᤧᤀᤠᤱ ᤏᤧ᤹᤺॥’

⁴⁴ ᤔᤏᤠᤜᤠ᤹ᤖᤧ ᤂᤧᤴ ᤂᤧᤵᤔᤥ ᤗᤠᤈᤣ᤹ᤛᤡᤱᤒᤢᤱ ᤔᤧᤀᤡᤅᤢ. ᤛᤱᤔᤠ ᤏᤢ ᤀᤡᤱᤔᤠ ᤋᤧᤶᤛᤰ ᤛᤠᤵᤗᤠᤀᤥ ᤕᤢᤰᤇᤠᤵ ᤔᤧᤕᤢᤰᤋᤢ᤹. ᤀᤣ᤺ᤵᤛᤠᤵ ᤔᤧᤀᤣ᤺ᤵᤋᤢ᤹ ᤜᤧᤰᤁᤩᤠᤱ ᤁᤧᤏᤡᤒᤠ ᤛᤠᤂᤡᤜᤠ᤹ᤖᤧ ᤕᤢᤰᤇᤠᤵ ᤔᤧᤕᤢᤰᤋᤢ᤹॥ ᤒᤣᤏᤩᤠᤔᤡᤴᤗᤧ ᤁᤢᤍᤧ᤺ᤱᤃᤵᤐᤥ. ᤕᤖᤢᤛᤗᤧ᤺ᤶᤒᤠ ᤁᤧᤖᤧᤰ ᤐᤡᤛᤠᤱᤒᤠ ᤆᤢᤰᤛᤠ ᤐᤠᤱᤓᤣ᤹ᤜᤠ᤹ᤀᤥ. ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ. ᤁᤥ᤺ᤰᤔᤠ ᤗᤠᤈᤣ᤹ᤒᤠ ᤕᤧᤰᤕᤰᤜᤠ᤹ᤀᤥ. ᤀᤢ᤺ᤰᤆᤶᤈᤶᤒᤠᤍᤧᤴᤜᤠ᤹ᤀᤥ ᤏᤢ ᤕᤥ ᤗᤠᤱᤃᤧᤳ ᤕᤜᤢᤍᤠᤀᤥ ᤁᤴ ᤕᤠ᤺ᤶᤒᤰᤁᤡᤴ ᤐᤥᤱ᤹॥ ᤔᤏᤠᤜᤠ᤹ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”