ᤕᤷᤔᤡᤕᤠ 31 - LIFOTNT

ᤀᤡᤛᤪᤠᤀᤡᤗᤡᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤧᤏᤢ᤺ᤱ

¹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤂᤧᤴ ᤕᤧᤶᤔᤡᤴ ᤋᤠᤖ ᤐᤳ. ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤠᤶᤔᤥ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤀᤠᤱᤃᤠ᤹ ᤀᤠᤔᤏᤠ ᤔᤧᤒᤥᤱ᤹॥”

² ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤀᤠᤱ ᤌᤱᤅᤥᤗᤠᤶ ᤁᤧᤍᤠᤱᤒᤠᤜᤠ᤹ᤖᤧ ᤔᤢ᤹ᤀᤡᤛᤠᤶ ᤔᤧᤄᤥᤛᤢᤖᤥ॥ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤏᤠ᤺ᤶᤛᤡᤱᤔᤠ ᤔᤧᤄᤥᤛᤢᤖ ᤑᤠ᤹ᤀᤠᤱ ᤋᤠᤀᤠᤖᤥ॥

³ “ᤀᤠᤱᤃᤠ᤹ ᤔᤠ᤺ᤱᤄᤠᤗᤠᤶᤒᤠ ᤋᤩᤠᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤌᤠ᤺ᤴᤇᤡᤱᤅᤠᤱᤗᤥ॥ ᤀᤡᤛᤪᤠᤀᤡᤗᤡᤛᤣ. ᤂᤡᤏᤡ᤹ ᤛᤍᤠᤍᤡᤱ ᤔᤡ᤺ᤶᤈᤡ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ ᤜᤧᤰᤁᤩᤠᤱ ᤏᤢᤵᤔᤧᤴᤍᤡᤱ ᤗᤢᤱᤔᤠ᤹ ᤋᤢᤰᤏᤡᤱᤗᤥ ᤂᤧᤒᤩᤠᤱ ᤀᤠᤱᤃᤠ᤹ ᤗᤧᤵᤔᤠᤱ ᤋᤠ᤺ᤳᤏᤡᤱᤗᤥ॥

⁴ ᤜᤧᤰᤁᤩᤠᤱ ᤛᤡᤛᤠᤃᤧᤴ ᤔᤧᤴᤇᤡᤴ ᤀᤡᤛᤪᤠᤀᤡᤗᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤏᤠᤜᤠ᤹ ᤕᤠᤶᤔᤥ ᤆᤥᤃᤢᤱᤛᤡᤱᤗᤥ॥ ᤂᤧᤱᤜᤠ᤹ ᤕᤠᤶᤔᤥ ᤌᤡᤰᤗᤧᤱ ᤂᤡᤳᤇᤡᤱᤇᤡᤱᤒᤠ ᤋᤠᤜᤡᤵᤐᤡᤴ ᤔᤧᤕᤠᤱᤛᤡᤱᤗᤥ ᤂᤧᤒᤩᤠᤱ ᤂᤧᤴ ᤔᤧᤜᤡᤶᤋᤢᤖ ᤔᤧᤛ᤺ᤳᤋᤠᤱ ᤔᤧᤗᤠ᤺ᤱᤗᤥ॥

⁵ ᤕᤠᤶᤔᤥ ᤌᤡᤰᤗᤧᤱ ᤂᤡᤏᤡ᤹ ᤛᤠᤔᤖᤡᤕᤠᤀᤥᤒᤠ ᤁᤥ᤺ᤰᤔᤠᤜᤠ᤹ᤀᤥ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤁᤧᤃᤣ᤺ᤳᤋᤢᤶᤗᤥ ᤜᤧᤰᤁᤩᤠᤱ ᤀᤠᤒᤠᤅᤣ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤁᤧᤎᤥ᤺ᤰᤐᤠ ᤁᤢᤈᤠᤴ ᤂᤡᤏᤡ᤹ ᤁᤧᤈᤠᤶᤗᤥ॥

⁶ ᤀᤥᤖᤥ. ᤀᤰᤋᤱᤒᤠ ᤕᤧᤶᤔᤡᤴ ᤋᤠᤖ ᤐᤳᤗᤥ. ᤜᤧᤰᤁᤩᤠᤱ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤀᤥ ᤀᤡᤰᤁᤧᤃᤥᤒᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤒᤠ ᤀᤡᤰᤗᤠᤴ ᤂᤧᤶᤍᤧᤳᤗᤥ. ‘ᤛᤡᤕᤥ᤺ᤴᤏᤥ ᤌᤥ ᤀᤠᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤐᤣᤃᤡᤖᤥ॥’”

⁷ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤀᤡᤛᤪᤠᤀᤡᤗ ᤛᤢᤘᤠᤱᤗᤧ ᤗᤠᤃᤡ ᤛ᤺ᤵᤔᤠ ᤛᤧᤘᤠᤛᤠᤶᤗᤥᤴ ᤛᤠᤶᤔᤧᤳᤋᤧᤶᤔᤧ᤹ᤀᤥ॥ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤀᤠᤒᤠᤅᤣ ᤏᤠᤖᤠᤑᤥᤔᤠ ᤛᤧᤘᤠᤛᤠᤶᤗᤥᤴ ᤛᤠᤶᤔᤧᤳᤋᤧᤶᤔᤧ᤹ᤀᤥ. ‘ᤕᤜᤘᤣ ᤍᤠᤱᤒᤠᤀᤣ. ᤀᤡᤛᤪᤠᤀᤡᤗᤒᤠ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤂᤧᤏᤧ᤹ ᤁᤧᤔᤏᤠᤜᤠ᤹ ᤋᤠᤱᤛᤧ᤺ᤵᤋᤧᤛᤧ᤹ᤀᤥ॥’

⁸ ᤀᤠᤱᤃᤠ᤹ ᤂᤧᤱᤜᤠ᤹ ᤌᤠᤱᤃᤧᤳᤗᤠᤶ ᤕᤢᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤘᤣ᤹ᤛᤔᤠ ᤁᤢᤕᤠᤀᤥᤗᤠᤶᤒᤠ ᤛᤢᤵᤛᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤡᤰᤑ᤺ᤶᤒᤠ ᤏᤢ ᤗᤠᤱᤛᤰᤐᤠ. ᤜᤧᤰᤁᤩᤠᤱ ᤔᤧᤴᤇᤢᤰᤔᤠ ᤁᤧᤘᤠ᤹ᤔᤠ ᤏᤢ ᤛᤠᤃᤵᤔᤠ ᤕᤠᤖᤡᤵ ᤁᤧᤒᤥᤱᤔᤠᤜᤠ᤹ᤀᤠᤱ ᤔᤧᤘᤠ᤹ᤖᤥ॥ ᤗᤳᤇᤠ ᤕᤶᤒᤠ ᤆᤢᤶᤓᤥ ᤔᤧᤒᤥᤱᤅᤠᤱ ᤂᤧᤱᤜᤠ᤹ ᤔᤧᤏᤢ᤺ᤱ ᤔᤧᤍᤠᤖᤥ॥

⁹ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱᤅᤡᤸᤗᤧ ᤔᤧᤜᤠ᤺ᤵᤗᤥ ᤜᤧᤰᤁᤩᤠᤱ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤏᤢ ᤔᤧᤏᤢ᤺ᤱ ᤔᤧᤍᤠᤖᤥ॥ ᤀᤠᤱᤃᤠ᤹ ᤔᤏᤠᤜᤠ᤹ ᤘᤜ᤺ᤱ ᤕᤱᤄᤱᤗᤠᤶᤒᤠ ᤗᤠᤶ ᤋᤥ᤺ᤴᤍᤢᤱᤛᤡᤱᤗᤥ. ᤀᤠᤄᤄᤒᤠ ᤁᤧᤜᤥᤵᤐᤠ ᤁᤧᤍᤱᤒᤠ ᤗᤠᤶᤔᤥ ᤗᤠᤱᤄᤣ᤺ᤰᤂᤢᤱᤛᤡᤱᤗᤥ॥ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤃᤡ ᤂᤢᤴᤇᤡ᤹ ᤐᤠᤏᤢᤍᤡᤱ ᤐᤠᤀᤠᤖᤥ ᤂᤧᤒᤩᤠᤱ ᤀᤣᤑᤪᤠᤀᤡᤶᤔᤡᤴ ᤀᤠᤱᤃᤠ᤹ ᤀᤠᤛ᤻ᤛᤠ ᤋᤢᤶᤒᤠᤖᤥ॥

¹⁰ “ᤔᤧᤴᤇᤠᤶ ᤛᤢᤘᤠᤱᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤔᤠ᤺ᤱᤄᤠ ᤔᤠ᤺ᤱᤄᤠ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤌᤠᤖᤡᤰᤐᤠ ᤀᤠᤱᤃᤠ᤹ ᤀᤠᤒᤠ᤺ᤴᤈᤠᤰᤁᤡᤴ ᤛᤠ᤹ᤖᤡᤰ ᤀᤡᤱᤓᤴ ᤆᤥᤃᤧᤶᤔᤧ᤹ᤀᤥ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤑᤢᤳᤇᤡᤱᤈᤩᤠ᤺ᤱ ᤛᤧᤛᤢᤱᤛᤡᤱᤗᤥ ᤁᤖ ᤀᤠᤱᤃᤠ᤹ ᤂᤧᤱᤜᤠ᤹ ᤛᤢᤵᤛᤢᤱᤛᤡᤱᤗᤥ ᤜᤧᤰᤁᤩᤠᤱ ᤐᤡᤳᤁᤶᤒᤠᤜᤠ᤹ᤖᤧ ᤐᤡᤳᤜᤠ᤹ ᤁᤶᤒᤪᤠᤱ ᤔᤧᤔᤧᤳᤋᤢᤛᤡᤒᤠ ᤜᤧᤰᤁᤣ ᤂᤧᤱᤜᤠ᤹ ᤁᤶᤒᤪᤠᤱ ᤔᤧᤳᤋᤢᤱᤛᤡᤱᤗᤥ॥

¹¹ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤛᤧᤴᤗᤵ ᤐᤡᤖᤢᤱᤛᤡᤱᤅᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤗᤳᤇᤠ ᤔᤢᤰᤛᤠᤶᤛᤠᤒᤠ ᤛᤢᤘᤠᤱᤅᤡᤸᤗᤧ ᤁᤢᤜᤢᤰᤁᤥᤗᤠᤶ ᤀᤠᤱᤃᤠ᤹ ᤂᤧᤱᤜᤠ᤹ ᤋᤠᤱᤄᤢᤱᤛᤡᤱᤅᤠᤱ ᤘᤠ᤹ᤖᤥ॥

¹² ᤂᤧᤱᤜᤠ᤹ ᤔᤧᤍᤠᤀᤠᤱ ᤔᤧᤛ᤺ᤳᤗ ᤛᤡᤕᤥᤏ ᤁᤥ᤺ᤰᤔᤠᤀᤥ ᤛᤧᤘᤠᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤖᤥ ᤕᤜᤘᤣ ᤍᤠᤱᤒᤧᤸᤗᤧ ᤐᤡᤖᤢᤛᤡᤒᤠ ᤕᤖᤡᤰ ᤐᤷᤎᤠ᤺ᤶᤔᤡᤸᤗᤧ ᤂᤧᤱᤜᤠ᤹ ᤔᤧᤛ᤺ᤳᤗᤥ— ᤁᤢᤈᤠ. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ. ᤆᤤᤋᤢᤏ ᤏᤡ᤺ᤱᤃᤣ᤹. ᤔᤧᤸᤗᤢᤰ ᤏᤢ ᤐᤡᤳᤜᤠ᤹ ᤔᤧᤄᤥᤛᤢᤛᤡᤖᤥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤐᤍᤠᤍᤠᤖᤥ॥ ᤂᤧᤱᤜᤠ᤹ ᤏᤢᤖᤡᤰᤁᤠᤱ ᤕᤥᤖᤢᤖ ᤆᤫᤠ᤺ᤳᤋᤡᤸᤗᤧ ᤘᤠᤃᤧᤖᤰᤐᤠ ᤀᤡᤰᤋᤠᤵ ᤜᤧᤰᤋᤱᤒᤠ ᤔᤧᤒᤥᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤵᤑᤠᤸᤗᤧᤀᤠᤱ ᤁᤢᤜᤥ᤺ᤵᤔᤠ ᤁᤢᤛᤠᤰᤔᤥ ᤔᤧᤴᤎᤠᤏᤧᤴᤗᤥ॥

¹³ ᤜᤧᤰᤁᤩᤠᤱ ᤔᤧᤴᤇ᤻ᤕᤠᤜᤠ᤹ ᤔᤧᤛ᤺ᤳᤋᤠᤱ ᤔᤧᤗᤠ᤺ᤱᤗᤥ. ᤌᤠᤱᤒᤧᤴ ᤏᤢ ᤋᤢᤶᤓᤠᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤖᤡᤱᤅᤡᤴ ᤜᤠᤱᤜᤠᤱ ᤗ᤹ᤔᤥ ᤗᤧᤰᤂᤢᤱ ᤐᤡᤖᤢᤱᤛᤡᤱᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤀᤠ᤺ᤴᤇᤡᤱᤔᤠ ᤐᤡᤖᤢᤱᤛᤡᤱᤗᤥ ᤂᤧᤒᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠᤖᤧ ᤁᤢᤗᤧᤰᤘᤠᤀᤥ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤛ᤺ᤳᤗ ᤕᤠ᤺ᤴᤍᤢᤱᤛᤡᤱᤗᤥ॥

¹⁴ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤠ᤹ᤖᤡᤰ ᤁᤢᤈᤠᤃᤧᤏᤢ᤹ᤒᤠ ᤁᤢᤈᤠᤴ ᤂᤢᤴᤇᤡ᤹ ᤂᤠᤄᤠ ᤆᤠ᤺ᤳᤋᤢᤱᤛᤡᤱᤗᤥ ᤜᤧᤰᤁᤩᤠᤱ ᤀᤠᤔᤏᤠᤜᤠ᤹ ᤁᤧᤖᤧᤰ ᤏᤢᤒᤠ ᤐᤠ᤺ᤴᤜᤠ᤹ ᤐᤡᤖᤢᤱᤛᤡᤱᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

ᤀᤡᤛᤪᤠᤀᤡᤗᤡᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤗᤢᤱᤔᤠ᤹ ᤋᤢᤰᤋᤢᤛᤡ

¹⁵ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤖᤠᤔᤠᤀᤥ ᤗᤳᤇᤠ ᤀᤡᤰᤗᤠᤎᤡᤰ ᤂᤧᤶᤍᤧᤳᤋᤧᤖᤥ. ᤀᤢ᤺ᤰᤁᤠᤱ ᤀᤢ᤺ᤰ ᤔᤧᤖᤡᤱ ᤁᤧᤎᤰᤐᤠ ᤀᤡᤰᤗᤠᤴ ᤂᤧᤶᤍᤧᤳᤋᤧᤖᤥ॥ ᤖᤠᤜᤣᤸᤗᤧᤴ ᤁᤢᤛ᤻ᤛᤠᤜᤠ᤹ᤖᤧ ᤗᤠᤃᤡ ᤜᤠ᤺ᤵᤗᤥ. ᤂᤧᤴ ᤆᤡᤈᤡ ᤕᤧᤶᤕᤧᤶ ᤐᤥᤱᤔᤠ ᤔᤧᤍᤧᤴᤏᤧᤸᤗᤥ ᤌᤣᤀᤠᤱᤓᤧᤸᤗᤧ ᤂᤧᤴ ᤜᤡᤴᤈᤠ᤹ᤜᤠ᤹ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤜᤡᤅᤧᤴᤗᤥ॥

¹⁶ “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. ‘ᤔᤧᤜᤠᤒᤧᤶᤔᤡᤴᤏᤧ᤹. ᤔᤡᤰᤘᤠᤴ ᤋᤢᤃᤧᤶᤔᤧ᤹ᤀᤥ॥ ᤂᤡᤏᤡ᤹ ᤀᤠᤒᤠᤅᤣ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ ᤕᤖᤡᤰ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤘᤠ᤹ᤖᤥ ᤂᤧᤸᤗᤧ ᤗᤠᤃᤡ ᤌᤢᤶᤄᤥ ᤁᤧᤄᤥᤛᤢᤶᤗᤥ. ᤂᤧᤱᤜᤠ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤗᤠᤶᤒᤠ ᤔᤧᤏᤢ᤺ᤱ ᤔᤧᤍᤠᤖᤥ॥

¹⁷ ᤁᤧᤍᤠᤒᤠ ᤕᤧᤴᤗᤧ ᤗᤠᤃᤡ ᤂᤡᤏᤡ᤹ ᤏᤡᤱᤛᤠᤱ ᤆᤥ᤺ᤰᤔᤠ ᤗᤠᤶ ᤘᤠ᤹ᤖᤥ॥ ᤂᤡᤏᤡ᤹ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤜᤡᤶᤔᤥ ᤔᤧᤏᤢ᤺ᤱ ᤔᤧᤍᤠᤖᤥ॥’ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥

¹⁸ “ᤀᤣᤑᤪᤠᤀᤡᤔᤧᤸᤗᤧ ᤁᤢᤍᤢᤰᤂᤣᤀᤥ ᤀᤰᤂᤣ ᤐᤠ᤺ᤳᤋᤢᤒᤠ ᤂᤧᤵᤛᤢᤱᤗᤥ. ‘ᤕᤜᤘᤣ ᤍᤠᤱᤒᤠᤀᤣ ᤔᤧᤱᤄᤢᤶᤔᤣ ᤁᤧᤘᤠ᤹ᤒᤠ ᤐᤡᤳᤛᤠᤳ ᤜᤧᤰᤋᤱᤒᤠ ᤘᤕᤠᤱᤗᤥ ᤁᤖ ᤀᤠᤸᤗᤥ ᤂᤧᤏᤧ᤹ ᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤜᤢ᤹ᤖᤠᤱᤗᤥ॥ ᤀᤠᤱᤃᤠ᤹ ᤏᤢ᤺ᤰᤋᤠᤱ ᤋᤠᤖᤠᤱᤅᤧ᤹ᤀᤥ. ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ ᤀᤠᤱᤃᤠ᤹ ᤏᤢ᤺ᤱᤔᤠ ᤋᤠᤔᤠ ᤕᤠᤖᤡᤵ ᤘᤠ᤹ᤀᤠᤖᤥ॥

¹⁹ ᤂᤧᤏᤧ᤹ᤗᤠᤶᤒᤠ ᤔᤠ᤺ᤱᤄᤠ ᤀᤡ᤺ᤶᤛᤡᤱ ᤐᤣᤃᤠᤱᤅᤠᤱ ᤘᤕᤠᤱᤗᤥ ᤁᤖ ᤜᤠᤖᤠᤀᤣ ᤂᤧᤏᤧ᤹ᤀᤥᤀᤣ ᤏᤢ᤺ᤱᤔᤠ ᤋᤠᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤂᤧᤏᤧ᤹ ᤀᤠᤱᤃᤠ᤹ ᤂᤢᤶᤍᤡᤱ ᤁᤧᤒᤡᤖᤠᤱᤗᤥ ᤜᤧᤰᤁᤩᤠᤱ ᤀᤠᤕᤧᤳᤋᤢᤰᤂᤣᤀᤥ ᤀᤠᤎᤣᤃᤣ᤺ᤰᤁᤡᤴ ᤌᤢ᤺ᤰᤂᤢᤱᤗᤥ॥ ᤀᤠᤱᤃᤠ᤹ᤃ ᤛᤡᤖᤡᤱᤔᤔᤥ ᤏᤢ ᤆᤠ᤺ᤳᤌᤡ ᤐᤣ᤺ᤰᤔᤥ ᤌᤩᤠᤱᤗᤥ ᤌᤣᤀᤠᤱᤓᤧᤸᤗᤧ ᤌᤠᤱᤒᤧᤴ ᤘᤕᤠᤱᤅᤡᤸᤗᤧ ᤗᤠᤕᤥ ᤆᤥᤃᤢᤱᤅᤠᤱ ᤘᤕᤠᤱᤗᤥ॥’

²⁰ “ᤀᤣᤑᤪᤠᤀᤡᤔᤧᤴ. ᤁᤧᤖᤧᤰᤏᤢ᤺ᤸᤗᤧ ᤗᤢᤱᤔᤠ᤹ ᤋᤢᤰᤋᤢᤱᤒᤠ ᤀᤠᤛ᤻ᤛᤠᤖᤥ. ᤁᤧᤖᤧᤰᤏᤢ᤺ᤸᤗᤧ ᤕᤖᤡᤰ ᤀᤠᤗᤢᤱᤔᤠ᤹ ᤛᤩᤠ᤺ᤳ ᤁᤧᤗ᤹ᤒᤠ ᤀᤠᤛ᤻ᤛᤠᤖᤥ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤠᤛᤠᤱ ᤔᤡ᤺ᤶᤈᤡᤏᤢ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤂᤢᤏᤧ᤹ ᤁᤢᤗᤠᤃᤡ ᤀᤠᤗᤢᤱᤔᤠ᤹ ᤑᤩᤠ᤺ᤱᤓᤩᤠ᤺ᤱ ᤗ᤹ᤖᤥ. ᤁᤢᤳᤆᤠ᤹ᤀᤣ ᤀᤠᤱᤃᤠ᤹ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢᤱᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤗᤥ॥

²¹ ᤗᤠᤶᤔᤥ ᤔᤡᤰᤛᤣ᤺ᤴᤜᤠ᤹ ᤑᤳᤇᤧ᤹ᤀᤥ ᤜᤧᤰᤁᤩᤠᤱ ᤗᤠᤶ ᤀᤥ᤺ᤴᤃᤧᤎᤠᤰᤐᤠ ᤔᤡᤰᤐᤣ᤹ ᤕᤢᤰᤂᤧ᤹ᤀᤥ. ᤏᤡᤱᤘᤠ᤹ ᤕᤠᤰᤔᤠᤖᤧ ᤗᤠᤃᤡ ᤔᤠᤖᤠᤶᤜᤠ᤹ ᤔᤡᤰᤛᤣᤴ ᤔᤧᤳᤋᤧ᤹ᤀᤥ ᤂᤧᤏᤧ᤹ ᤁᤧᤒᤣᤒᤠ ᤗᤠᤶᤔᤥ ᤏᤢ᤺ᤰᤂᤧ ᤋᤩᤧ᤹ᤀᤥ॥ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤏᤢ᤺ᤰᤂᤧ ᤋᤩᤧ᤹ᤀᤥ ᤂᤧᤏᤧ᤹ ᤁᤧᤗᤧᤖᤢᤒᤠ ᤀᤠᤒᤠᤅᤣ ᤕᤧᤰᤕᤰᤁᤥ ᤏᤢ᤺ᤰᤂᤧ ᤋᤩᤧ᤹ᤀᤥ॥

²² “ᤁᤢᤏᤛᤠᤴ ᤁᤧᤜᤥ᤺ᤵᤔᤠ ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤀᤠᤵᤑᤠᤸᤗᤧ ᤌᤠᤖᤡᤰ ᤁᤧᤏᤡᤱᤘᤠ᤹ ᤐᤱᤒᤠᤒᤣ᥅ ᤔᤧᤴᤇᤢᤔᤠ᤺ᤸᤗᤧ ᤕᤧᤶᤒᤡᤳᤇᤠᤴ ᤋᤠᤱᤛᤧ᤺ᤵᤋᤢᤒᤠᤴ ᤘᤣ᤹ ᤐᤖᤡᤰᤐᤠ ᤆᤥ᤺ᤰᤐᤠ ᤜᤧᤰᤁᤣ ᤁᤢᤛᤱ ᤏᤢ ᤘᤣ᤹ ᤐᤖᤡᤰᤐᤠ ᤐᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤱᤅᤠᤱ ᤘᤠ᤹ᤖᤥ॥”

ᤁᤧᤍᤠᤒᤠ ᤕᤧᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤔᤧᤏᤢ᤹ ᤔᤧᤍᤠ᤹᤺

²³ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤒᤠᤅᤣ ᤗᤠᤈᤣ᤹ᤀᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ. ᤜᤧᤰᤁᤣ᤺ᤸᤗᤧ ᤕᤜᤢᤍᤠ ᤗᤠᤈᤣ᤹ ᤏᤢ ᤂᤧ᤹ᤕᤥᤒᤠ ᤕᤧᤰᤕᤰᤜᤠ᤹ᤀᤥ ᤕᤠᤶᤔᤥ ᤌᤡᤰᤗᤧᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. ‘ᤕᤖᤢᤛᤗᤧ᤺ᤶᤒᤠ ᤛᤣᤛᤣ ᤁᤥ᤺ᤰᤔᤠᤀᤣ. ᤛᤠᤶᤕᤥᤒᤠ ᤁᤧᤘᤠ᤹ᤒᤠᤍᤧᤴᤏᤣ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤖᤥ॥’

²⁴ ᤕᤜᤢᤍᤠ ᤏᤢ ᤂᤧ᤹ᤕᤥᤒᤠ ᤕᤧᤰᤕᤰᤜᤠ᤹ᤀᤥ ᤔᤏᤠᤜᤠ᤹ ᤛᤥᤖᤡᤰ ᤔᤧᤕᤢᤱ ᤂᤧᤒᤩᤠᤱ ᤂᤧᤵᤔᤥ ᤕᤠ᤺ᤴᤃᤧᤔᤒᤠᤜᤠ᤹ ᤜᤧᤰᤁᤩᤠᤱ ᤂᤢᤴᤇᤡ᤹ ᤌᤰᤛᤠᤗᤢᤵᤜᤠ᤹ᤏᤢ ᤛᤥᤖᤡᤰ ᤋᤠᤰᤁᤧᤃᤶᤒᤠ ᤔᤧᤸᤗᤢᤰᤁᤶᤒᤠᤜᤠ᤹ ᤔᤧᤘᤠ᤹॥

²⁵ ᤀᤠᤱᤃᤠ᤹ ᤁᤧᤏᤠᤒᤠᤜᤠ᤹ ᤕᤠᤶᤔᤥ ᤂᤢᤴᤇᤡ᤹ ᤛᤰᤔᤠ ᤁᤧᤳᤋᤢᤱ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤛᤠᤰᤁᤡᤸᤗᤧ ᤔᤧᤴᤎᤢᤶᤔᤏᤠ ᤁᤧᤒᤥᤱᤒᤠᤜᤠ᤹ ᤁᤢᤈᤠ᤺ᤸᤗᤧ ᤂᤠ᤺ᤳᤋᤢᤱᤛᤡᤱ॥”

²⁶ ᤂᤧᤴ ᤀᤣᤃᤠᤱ. ᤀᤠᤱᤃᤠ᤹ ᤛᤥᤖᤠᤱᤅᤠᤱ ᤀᤥᤔᤕᤠᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤡᤰᤕᤢᤔᤧᤴ ᤁᤢᤈᤠ ᤁᤧᤏᤢ᤹ᤒᤠ ᤆᤥᤃᤧ॥

²⁷ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤥᤔᤧᤳᤋᤧᤶᤔᤧ᤹. ᤂᤧᤴ ᤕᤧᤴᤏᤡᤴ ᤋᤠᤖ ᤐᤳ. ᤀᤠᤱᤃᤠ᤹ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠ ᤗᤠᤈᤣᤴ ᤔᤏᤠᤜᤠ᤹ ᤏᤢ ᤌᤰᤛᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢᤖ ᤆᤥᤃᤢᤱ॥

²⁸ ᤜᤧᤰᤁᤩᤠᤱ ᤀᤠᤀᤡᤴ ᤂᤧᤏᤧ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤜᤠᤱᤈᤢᤶᤜᤠ᤹ᤀᤥ ᤁᤧᤕᤢᤱᤒᤠᤜᤠ᤹ ᤀᤠ᤺ᤱᤔᤠᤛᤡ. ᤛᤥ᤺ᤶᤔᤠᤛᤡ. ᤔᤧᤱᤔᤠᤛᤡ ᤀᤡᤃᤪ ᤗᤠᤵᤑᤣᤔᤠᤛᤡ. ᤑᤥᤱᤔᤠᤛᤡ ᤏᤢ ᤕᤢᤰᤛᤡᤱ ᤆᤥ᤺ᤰᤔᤠᤛᤡ ᤔᤢᤖᤠ ᤔᤧᤳᤏᤧ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

²⁹ ᤜᤧᤰᤁᤩᤠᤱ ᤂᤧᤴ ᤕᤧᤴᤏᤡᤴ ᤋᤠ᤺ᤸᤗᤧ ᤔᤏᤠᤜᤠ᤹ᤖᤧ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤀᤰᤂᤣ ᤔᤧᤶᤒᤠ᤺ᤳᤋᤢᤴ. “‘ᤐᤠᤔᤠᤖᤧ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤺ᤴ ᤔᤧᤈᤖᤥ. ᤁᤖ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤜᤠᤒᤥ᤹ᤜᤠ᤹ ᤐᤕᤠ ᤕᤠᤛᤡᤖᤥ॥’

³⁰ “ᤂᤧᤸᤗᤧ ᤁᤢᤗᤧᤰᤘᤠᤀᤥ. ᤀᤠᤳᤋᤡᤸᤗᤧ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤺ᤴ ᤆ᤹᤺. ᤂᤧᤸᤗᤧᤀᤣ ᤁᤢᤜᤠᤒᤥ᤹ᤒᤠᤴ ᤕᤠ᤹᤺ ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤀᤠᤒᤠᤅᤣ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤀᤠᤒᤠᤅᤣ ᤔᤧᤛᤡ᤹᤺॥”

³¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤧᤴ ᤕᤧᤴᤏᤡᤴ ᤋᤠᤖ ᤐᤳᤗᤥ. ᤀᤡᤛᤪᤠᤀᤡᤗ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ᤏᤢ ᤀᤠᤱᤃᤠ᤹ ᤗᤳᤇᤠ ᤁᤢᤛᤱ ᤔᤠᤱᤜᤢᤵ ᤆᤥᤃᤢᤱᤗᤥ.

³² ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤏᤢ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵ ᤜᤧᤰᤋᤱᤒᤠ ᤂᤧᤴ ᤔᤧᤒᤥᤱᤏᤧᤴᤗᤥ ᤔᤡᤛᤪᤗᤠᤶ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱᤅᤡᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤜᤢᤰᤁᤥ ᤋᤧᤶᤛᤢᤱ ᤑᤧᤳᤋᤢᤱᤛᤡᤱᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤍᤠᤱᤒᤠ ᤁᤢᤀᤡᤛᤡᤰ ᤘᤕᤠᤱᤗᤥ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤂᤧᤴ ᤔᤠᤱᤜᤢᤵᤐᤡᤴ ᤔᤧᤓᤣ᤺ᤴᤍᤢᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥

³³ “ᤀᤡᤛᤪᤠᤀᤡᤗᤒᤠ ᤀᤠᤔᤏᤠᤜᤠ᤹ᤏᤢ ᤆᤥ᤺ᤰᤔᤠ ᤀᤡ᤺ᤳᤋᤢᤱᤒᤠ ᤁᤢᤛᤱ ᤔᤠᤱᤜᤢᤵᤐᤡᤴ ᤀᤰᤋᤱᤒᤠ ᤐᤥᤱᤗᤥ” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ “ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤀᤥ ᤀᤠᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤕᤢᤰᤂᤢᤱ ᤐᤡᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤛᤡᤰᤗᤢᤱᤔᤥ ᤛᤠᤵᤋᤢᤱ ᤐᤡᤖᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠᤖᤥ ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤔᤏᤠ ᤔᤧᤒᤥᤱᤗᤥ॥

³⁴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤒᤣᤛᤠᤱᤒᤠᤜᤠ᤹ ᤀᤡᤃᤪ ᤑᤢ᤹ᤏᤢᤛᤠ᤹ᤜᤠ᤹ ᤕᤜᤘᤣ ᤍᤠᤱᤒᤠᤴ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤀᤠᤳᤋᤡᤴᤜᤠ᤹ᤀᤠᤱ ᤜᤢ᤹ᤔᤠᤛᤡ ᤔᤧᤒᤥᤱᤏᤧᤴᤗᤥ ᤌᤣᤀᤠᤱᤓᤧᤸᤗᤧ ᤕᤶᤒᤠ ᤆᤢᤰᤐᤠ ᤁᤧᤖᤧᤰᤗᤧ ᤁᤢᤛᤡᤱ ᤔᤧᤏᤡ᤺ᤳᤋᤠᤖᤥ॥ ᤂᤧᤱᤜᤠ᤹ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤗᤠᤶ ᤗᤧᤵᤔᤡ ᤐᤡᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤕᤥᤜᤠ᤹ ᤀᤠᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤠᤴᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

³⁵ ᤕᤜᤘᤣ ᤍᤠᤱᤒᤧᤸᤗᤧ ᤏᤠᤶᤔᤡᤴ ᤗᤧᤴᤍᤡᤰ ᤛᤧᤍᤡᤱᤍᤡᤱ ᤀᤥ᤺ᤵᤔᤠ ᤐᤠᤱᤄᤢᤖᤥ ᤜᤧᤰᤁᤩᤠᤱ ᤛᤧᤴᤍᤡᤰ ᤗᤠᤒᤠᤴ ᤏᤢ ᤂᤣ᤺ᤶᤛᤡᤰᤐᤠᤜᤠ᤹ ᤔᤧᤀᤥ᤺ᤳᤗ ᤕᤠ᤺ᤴᤍᤢᤛᤡᤖᤥ॥ ᤂᤢᤏᤧ᤹ ᤋᤢᤱᤃᤥᤍᤡᤱ ᤘᤖ᤺ᤱᤅᤡᤴ ᤇᤡᤶᤗᤡᤱ ᤇᤡᤶᤗᤡᤱ ᤔᤢᤴᤍᤢᤖᤥ ᤜᤧᤰᤁᤩᤠᤱ ᤂᤧ᤹ᤕᤥᤒᤠ ᤘᤠᤓᤧᤸᤗᤧᤱᤜᤠ᤹ ᤜᤢ᤺ᤰᤔᤠ ᤐᤠᤱᤄᤢᤖᤥ॥ ᤂᤢᤏᤧ᤹ ᤁᤢᤔᤡᤱᤅᤡᤴ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ.

³⁶ “ᤁᤴ ᤀᤡᤱᤈᤠᤱᤜᤠ᤹ ᤐᤡᤔᤠᤛᤡ ᤀᤠᤓᤧᤸᤗᤧᤀᤠᤱ ᤏᤡᤱᤘᤠ᤹ ᤔᤧᤓᤣ᤺ᤏᤠᤴᤗᤥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤛᤢᤘᤠᤱ ᤔᤧᤒᤥᤱᤏᤧᤸᤗ ᤆᤥ᤺ᤰᤔᤠ ᤔᤧᤓᤠ᤺ᤰᤁᤠᤴᤗᤥ ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥

³⁷ ᤂᤧᤏᤧ᤹ ᤋᤖ᤺ᤱᤃᤧᤴ ᤋᤠᤱᤛᤠᤱᤒᤧᤴ ᤛᤡ᤺ᤰᤔᤠ ᤁᤧᤛᤢᤰᤋᤢᤏᤧᤓᤃᤪ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤕᤢᤰᤏᤠᤴ ᤁᤥ᤺ᤶᤓᤥ ᤆᤥ᤺ᤰᤔᤠ ᤁᤧᤛᤢᤰᤋᤢᤏᤧᤓᤃᤪᤖᤰ ᤗᤠᤕᤥ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤗᤠᤵᤑᤢᤛᤢᤱᤛᤡᤱᤗᤥ. ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

³⁸ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. “ᤂᤧᤴ ᤕᤧᤶᤔᤡᤴ ᤋᤠᤖ ᤐᤳ. ᤜᤏᤏᤣᤗᤖᤧ ᤁᤢᤈᤱᤜᤡᤶᤔᤥᤗᤠᤶ ᤁᤢᤛᤢᤰᤐᤥᤒᤠ ᤋᤠ᤺ᤰᤜᤴ ᤌᤠᤖᤡᤰ ᤁᤧᤖᤧᤰ ᤕᤖᤢᤛᤗᤧ᤺ᤶᤔᤡᤴ ᤀᤠᤱᤃᤠ᤹ ᤀᤠᤗᤠᤃᤡ ᤕᤧᤰᤕᤰ ᤕᤠᤶᤔᤥ ᤔᤧᤈᤥᤃᤢ᤹॥

³⁹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤀᤡ᤺ᤴᤍᤥᤜᤠ᤹ ᤂᤧᤵᤔᤥᤗᤠᤶ ᤘᤣ᤹ ᤏᤠᤶᤎᤠ ᤐᤡᤛᤠᤱ ᤃᤠᤖᤣᤒ ᤁᤥ᤺ᤰᤔᤠᤀᤥ ᤌᤠᤖᤡᤰ ᤁᤧᤳ ᤂᤧᤒᤩᤠᤱ ᤂᤧᤵᤔᤥᤗᤠᤶ ᤕᤠᤶᤔᤥ ᤜᤡᤀᤠᤱ ᤃᤥᤀᤠ ᤌᤧᤶᤒᤠ ᤐᤣᤰ॥

⁴⁰ ᤆᤣᤜᤠ᤹ ᤗᤢᤵᤔᤠ ᤏᤢ ᤋᤠᤶᤈᤡ ᤗᤠᤵᤑᤢᤔᤠ ᤁᤠᤰ ᤏᤧᤏᤧᤒᤠᤍᤧᤴ ᤜᤧᤰᤁᤩᤠᤱ ᤏᤠᤱᤃᤧᤴ ᤐᤡᤛᤠᤱᤒᤠ ᤁᤡᤍᤪᤥᤏ ᤐᤠᤰᤗᤢᤶᤗᤢᤶᤒᤠᤍᤧᤴ ᤌᤠᤖᤡᤰᤐᤠ ᤁᤧᤖᤧᤰ ᤀᤡᤰᤋᤠᤵᤜᤠ᤹ ᤏᤢ ᤀᤴ ᤗᤠᤶᤎᤣ᤺ᤵᤐᤠᤸᤗᤧ ᤁᤢᤛᤢᤰᤐᤥ ᤌᤠᤖᤡᤰ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤗᤠᤃᤡ ᤛᤣᤛᤣᤒᤠ ᤐᤥᤱ᤹. ᤂᤧᤒᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤜᤠ᤹ᤕᤠᤰ ᤔᤧᤴᤀᤠ᤺ᤰᤂᤢᤴ ᤀᤡᤃᤪ ᤔᤧᤴᤕᤴᤇᤢᤴᤗᤥ॥”