ᤕᤷᤔᤡᤕᤠ 30 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤔᤏᤠᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡ ᤔᤠᤱᤜᤢᤵ ᤆᤥᤃᤢ 1 ᤕᤜᤘᤣ ᤍᤠᤱᤒᤠᤗᤠᤶ ᤕᤷᤔᤡᤕᤠᤀᤥ ᤀᤰᤋᤱᤒᤠ ᤀᤡᤱᤄᤱ ᤁᤧᤖᤧ. 2 “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤂᤧᤏᤧ᤹ ᤔᤧᤳᤏᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤳᤇᤠ ᤛᤠᤵᤗᤠᤌ᤺ᤱᤔᤥ ᤛᤠᤵᤋᤧ᤹॥ 3 ᤌᤣᤀᤠᤱᤓᤧᤸᤗᤧ ᤀᤰᤋᤱᤒᤠ ᤕᤧᤶ ᤋᤠᤖ ᤐᤳ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤧᤴ ᤏᤢ ᤕᤜᤢᤍᤠᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤏᤢ᤺ᤰᤋᤢᤱ ᤑᤧᤳᤋᤢᤱᤛᤡᤱ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤐᤡᤖᤢᤱᤛᤡᤱᤒᤠ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤂᤧᤱᤜᤠ᤹ ᤏᤢ᤺ᤰᤋᤢᤱᤛᤡᤱᤅᤠᤱ ᤑᤧᤳᤋᤢᤱᤛᤡᤱ ᤂᤧᤒᤩᤠᤱ ᤕᤠᤶᤔᤥ ᤂᤧᤱᤜᤠ᤹ᤖᤧ ᤂᤧᤴ ᤗᤠᤈᤣᤴ ᤜᤢᤰᤁᤠᤵ ᤔᤧᤈᤥᤃᤢ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹॥” 4 ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤔᤧᤳᤋᤢᤛᤡᤖᤥ. 5 “ᤀᤠᤱᤃᤠ᤹ ᤁᤧᤃᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤰᤗᤠᤴ ᤏᤢ ᤁᤡᤔᤠ ᤕᤱᤔᤠᤀᤥ ᤁᤧᤎᤠᤒᤠᤜᤠ᤹ ᤔᤧᤜᤠ᤺ᤵᤐᤠ ᤂᤧᤵᤛᤢᤱᤗᤥ. ᤁᤖ ᤆᤡᤈᤡ ᤕᤧᤶᤕᤧᤶᤒᤠ ᤛᤏᤠᤖᤢᤱᤅᤡᤸᤗᤧᤴ ᤔᤣ᤺ᤴᤗᤥ॥ 6 ᤜᤠᤱᤄᤧᤶᤔᤧ᤹ ᤜᤧᤰᤁᤩᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ᥄ ᤀᤠᤳᤋᤡᤴ ᤕᤧᤶᤒᤡᤳᤇᤠᤛᤠ᤺ᤸᤗᤧ ᤛᤠᤃᤵᤔᤠ ᤛᤢᤰᤋᤢᤒᤣ᥅ ᤜᤧᤰᤁᤣ᤺ᤸᤗᤧ ᤛᤠᤍᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤁᤢᤀᤡᤛᤡᤰ ᤌᤣᤀᤠᤱ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤡᤸᤗᤧ ᤛᤠᤵᤐᤥ᤺ᤰᤁᤡᤴ ᤔᤧᤍᤧᤶᤛᤢᤒᤠ ᤀᤠᤱᤃᤠ᤹ ᤏᤡᤛᤢᤱᤒᤣ᥅ ᤌᤣᤀᤠᤱ ᤁᤧᤖᤧᤰᤗᤧ ᤂᤢᤴᤇᤡ᤹ ᤏᤠᤖᤠᤴ ᤀᤶ ᤁᤧᤗ᤹ᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤒᤠᤒᤣ᥅ 7 ᤀᤠᤕᤠᤰᤁᤥ᥄ ᤗᤳᤇᤠ ᤁᤡᤵᤔᤠᤃᤧᤄᤢᤒᤠ ᤕᤧᤴᤎᤡᤰ ᤋᤠᤖ ᤐᤳᤗᤥ. ᤜᤧᤰᤋᤱᤒᤠ ᤘᤣ᤹ ᤕᤧᤴ ᤀᤠᤓᤧᤸᤗᤧᤀᤠᤱ ᤔᤧᤒᤥᤱᤏᤧᤸᤗᤥ॥ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤃᤡ ᤂᤧᤴ ᤗᤳᤇᤠ ᤕᤧᤳᤋᤢᤰᤂᤣᤒᤠ ᤕᤧᤴ ᤐᤥᤱᤗᤥ ᤁᤖ ᤂᤧᤱᤜᤠ᤹ ᤂᤧᤴᤗᤠᤶᤒᤠ ᤔᤧᤍᤠᤱᤗᤥ॥” 8 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤜᤧᤰᤁᤩᤠᤱ ᤂᤧᤴ ᤕᤧᤴᤏᤡᤴ ᤋᤠ᤺ᤸᤗᤧ ᤂᤧᤴ ᤂᤧ᤺ᤵᤛᤡᤱᤅᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤳᤗᤠᤀᤥᤗᤠᤶ ᤀᤧᤰᤂᤢᤱ ᤐᤡᤖᤢᤱᤛᤡᤱᤗᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤡᤄᤣ᤺ᤱᤅᤡᤴ ᤑᤧᤴᤍᤢᤱ ᤐᤡᤖᤢᤱᤛᤡᤱᤗᤥ॥ ᤂᤧᤱᤜᤠ᤹ ᤀᤠᤑᤠᤸᤗᤧᤀᤠᤱ ᤕᤠᤶᤔᤥ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤥᤰ ᤔᤧᤶᤒᤥᤱᤏᤧᤴᤗᤥ॥ 9 ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤁᤩᤠᤱ ᤀᤠᤱᤃᤠ᤹ ᤜᤠᤱᤕᤢᤰᤏᤠᤀᤥ ᤕᤢᤰᤂᤢᤱᤒᤠ ᤂᤢᤴᤇᤡ᤹ ᤜᤠᤱ ᤍᤠᤀᤢᤍᤧᤸᤗᤧ ᤗᤳᤇᤠ ᤁᤢᤔᤢ᤹ᤀᤡᤍᤠᤱᤛᤠᤎᤡᤰ ᤀᤠᤱᤃᤠ᤹ ᤑᤥ᤺ᤰᤂᤢᤱᤗᤥ॥ 10 “ᤀᤠᤛᤧᤘᤠᤖᤥᤒᤠ ᤕᤠᤁᤢᤒᤣ. ᤔᤧᤃᤡᤛᤧᤴᤏᤧ᤹ᤀᤥ॥ ᤀᤡᤛᤪᤠᤀᤡᤗᤒᤠ ᤕᤰᤕᤢᤱᤒᤠᤛᤣ. ᤁᤡᤔᤠ ᤕᤱᤔᤠᤀᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤔᤠ᤺ᤱᤄᤠᤒᤠ ᤗᤠᤈᤣ᤹ᤀᤥ ᤁᤧᤶᤒᤠᤱᤄᤡᤀᤠᤱ ᤁᤧᤘᤕᤡᤖᤥ. ᤂᤧᤵᤔᤥᤗᤠᤶ ᤂᤡᤏᤡ᤹ ᤌᤧ᤹ᤏᤡᤱᤅᤠᤱ ᤋᤠ᤺ᤳᤏᤡᤱᤗᤥ॥ ᤕᤠᤁᤢᤒᤧᤴ ᤕᤠᤶᤔᤥ ᤏᤢ᤹ᤍᤠᤀᤠᤱ ᤋᤠᤵᤌᤣᤰ ᤕᤠᤶᤎᤣᤰ ᤐᤥᤱᤗᤥ॥ ᤜᤠ᤺ᤳᤗᤧᤀᤠᤱ ᤂᤢᤏᤧ᤹ ᤕᤱᤔᤠ ᤔᤧᤛᤧᤖᤢᤴᤗᤥ॥ 11 ᤀᤠᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤖᤥ ᤜᤧᤰᤁᤩᤠᤱ ᤂᤡᤏᤡ᤹ ᤋᤠᤱᤛᤧ᤺ᤵᤏᤡᤱᤗᤥ॥ ᤀᤠᤱᤃᤠ᤹ᤃ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤁᤧᤖᤧᤰ ᤐᤡᤛᤠᤱ ᤛᤧᤏᤡᤱᤅᤠᤱ ᤘᤕᤠᤱᤗᤥ. ᤂᤧᤱᤜᤠ᤹ ᤁᤧᤖᤧᤰ ᤀᤠᤱᤃᤠ᤹ ᤕᤢᤔᤪᤧᤰ ᤔᤧᤰᤂᤢᤱᤛᤡᤱᤗᤥ ᤁᤖ ᤂᤡᤏᤡ᤹ᤃ ᤀᤠᤱᤃᤠ᤹ ᤔᤧᤔᤧᤱᤏᤡᤱᤅᤡᤴᤗᤥ॥ ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤂᤡᤏᤡ᤹ ᤂᤢᤶᤍᤡᤱ ᤔᤧᤶᤒᤡᤀᤣᤃ ᤔᤧᤗᤧᤳᤏᤡᤱᤅᤡᤴᤗᤥ ᤁᤖ ᤂᤢᤶᤍᤡᤱ ᤐᤡᤏᤡᤱᤅᤡᤸᤗᤧ ᤁᤢᤍᤥ᤺ᤵᤔᤠ ᤂᤠᤛᤧ᤺ᤴᤏᤥ ᤂᤢᤶᤍᤡᤱ ᤐᤡᤏᤡᤱᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥” 12 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖᤥ. “ᤂᤡᤏᤡ᤹ ᤕᤠᤱᤄᤣ᤺ᤰᤁᤡᤴ ᤘᤣ᤺ᤶᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤆᤥᤰᤗᤥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤃᤠ᤺ᤴᤍᤡᤒᤠᤴ ᤔᤧᤴᤏᤢ᤹ᤔᤏᤠᤒᤠ ᤆᤥᤰᤗᤥ॥ 13 ᤂᤡᤏᤡ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤌᤡᤰᤁᤠᤱ ᤜᤥᤵᤗᤥ॥ ᤂᤡᤏᤡ᤹ ᤕᤠᤱᤄᤣ᤺ᤰᤁᤡᤸᤗᤧ ᤗᤠᤃᤡ ᤌᤣᤀᤠᤱ ᤛᤡᤍᤠ᤹ ᤜᤥᤵᤗᤥ॥ ᤂᤡᤏᤡ᤹ ᤘᤣ᤺ᤵᤔᤠ ᤏᤢ᤹ᤔᤠ ᤏᤡᤱᤛᤠᤱ ᤆᤥ᤺ᤰᤔᤠ ᤗᤠᤶ ᤜᤥᤵᤗᤥ॥ 14 ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤁᤧᤖᤧᤰᤗᤧ ᤂᤡᤏᤡ᤹ ᤏᤡᤱᤘᤠ᤹ ᤁᤧᤶᤓᤣ᤺ᤳᤇᤡᤖᤥ. ᤂᤧᤱᤜᤠ᤹ᤖᤧ ᤂᤡᤏᤡ᤹ ᤌᤣᤀᤠᤱ ᤁᤶᤒᤪᤠᤱ ᤁᤧᤔᤧᤶᤔᤧᤳᤋᤡᤴᤗᤥ॥ ᤀᤠᤱᤃᤠ᤹ ᤏᤡᤱᤔᤡᤜᤠ᤹ ᤁᤢᤀᤡᤛᤡᤰ ᤂᤡᤏᤡ᤹ ᤋᤢᤰᤂᤣ ᤆᤠ᤺ᤳᤏᤡᤱᤗᤥ॥ ᤂᤡᤏᤡ᤹ ᤛᤶᤎᤠᤱ ᤁᤧᤛᤠᤰᤐᤠ ᤂᤢᤶᤍᤡᤱᤅᤡᤴ ᤆᤢᤰᤋᤧᤀᤠᤱ ᤘᤠ᤹ᤖᤥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤗᤠᤕᤥᤜᤠ᤹ ᤕᤖᤡᤰ ᤘᤠ᤹ᤖᤥ ᤜᤧᤰᤁᤩᤠᤱ ᤂᤡᤏᤡ᤹ ᤁᤢ᤹ᤀᤡᤓᤧᤶᤔᤧᤴ ᤛᤠ᤹ᤖᤡᤰ ᤕᤶᤒᤠ ᤆᤥᤰᤗᤥ॥ 15 ᤂᤡᤏᤡ᤹ ᤕᤠᤱᤄᤣ᤺ᤰᤁᤡᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤗᤢᤱᤜᤠᤴ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤂᤧᤴᤗᤠᤶᤒᤠ ᤘᤣ᤺ᤵᤔᤠ ᤗᤠᤶ ᤜᤥᤵᤗᤥ॥ ᤀᤠᤱᤃᤠ᤹ ᤀᤰᤋᤱᤒᤠ ᤂᤢᤶᤍᤡᤱ ᤐᤡᤏᤡᤱᤅᤠᤱ ᤘᤠ᤹ᤖᤥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤗᤠᤕᤥᤴ ᤕᤖᤡᤰ ᤘᤠ᤹ᤖᤥ ᤜᤧᤰᤁᤩᤠᤱ ᤂᤡᤏᤡ᤹ ᤁᤢ᤹ᤀᤡᤓᤧᤶᤔᤠᤴ ᤛᤠ᤹ᤖᤡᤰ ᤕᤶᤒᤠ ᤆᤥᤰᤗᤥ॥ 16 “ᤁᤖ ᤀᤠᤸᤗ ᤂᤡᤏᤡ᤹ ᤁᤧᤗᤵᤐᤠᤜᤠ᤹ ᤁᤧᤖᤧᤰ ᤔᤧᤗᤖᤢᤛᤡᤖᤥ. ᤂᤡᤏᤡ᤹ ᤏᤡᤱᤔᤡᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖᤥ॥ ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ ᤁᤧᤖᤧᤰ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤖᤥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤏᤠᤵᤐᤠᤜᤠ᤹ ᤁᤧᤖᤧᤰ ᤔᤧᤏᤠᤵᤋᤢᤛᤡᤖᤥ॥ 17 ᤀᤠᤱᤃᤠ᤹ ᤂᤡᤏᤡ᤹ ᤕᤠᤶᤔᤥ ᤘᤣ᤺ᤴᤏᤡᤱᤗᤥ॥ ᤂᤡᤏᤡ᤹ ᤕᤠᤱᤄᤣ᤺ᤰᤜᤠ᤹ ᤏᤢᤛᤢᤱ ᤐᤡᤏᤡᤱᤗᤥ॥ ᤜᤧᤰᤁᤣᤛᤠᤱ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. ‘ᤛᤡᤕᤥᤏᤧᤴ ᤔᤏᤠᤜᤠ᤹ᤖᤧ ᤔᤧᤏᤠ᤹ᤖᤢᤀᤠᤱ ᤏᤧᤖᤥ. ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤴ ᤁᤶᤒᤪᤠᤱ ᤔᤧᤶᤔᤧᤳᤋᤢᤴᤗᤥ॥’ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥” 18 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤔᤏᤠᤜᤠ᤹ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤁᤧᤖᤧᤰ ᤜᤡᤶᤛᤕᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱᤗᤥ॥ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤁᤧᤗᤢ᤺ᤶᤒᤠᤍᤧᤴᤏᤥ ᤀᤠᤱᤃᤠ᤹ ᤕᤠᤶᤔᤥ ᤆᤥᤃᤢᤱᤗᤥ ᤂᤧᤶᤒᤩᤠᤱ ᤂᤧᤵᤔᤥ ᤕᤠᤶᤔᤥ ᤋᤃᤡ ᤜᤧᤰᤁᤣ ᤜᤠᤱᤜᤡᤶ ᤕᤢᤱᤛᤡᤱᤗᤥ॥ 19 ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ᤖᤧ ᤏᤢᤃᤧᤴ ᤋᤥ᤺ᤶᤔᤠ ᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤖᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤀᤠᤱ ᤐᤛ᤺ᤳ ᤔᤧᤛ᤺ᤳᤗᤥ॥ ᤀᤠᤱᤃᤠ᤹ ᤀᤠᤜᤠᤱᤘᤠ ᤔᤢ᤹ᤀᤡ᤺ᤸᤗᤧ ᤂᤧᤱᤜᤠ᤹ ᤕᤖᤡᤰ ᤆᤥᤃᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤢ᤺ᤸᤗᤡᤰ ᤔᤧᤶᤒᤥᤱᤏᤧᤸᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤱᤛᤡᤱᤗᤥ ᤂᤧᤒᤩᤠᤱ ᤂᤧᤱᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤶᤒᤥᤱᤏᤧᤴᤗᤥ॥ 20 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤅᤧ᤺ᤰᤘᤠ ᤛᤠᤜᤠ᤹ ᤋᤃᤡᤒᤠ ᤜᤧᤰᤁᤣ ᤔᤧᤒᤥᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤢᤶᤓᤥ᤺ᤴ ᤀᤠᤍᤃᤡ ᤕᤠᤶᤔᤥ ᤕᤢᤱᤛᤡᤱᤗᤥ॥ ᤂᤧᤱᤜᤠ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ ᤀᤠᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥ 21 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤱᤃ ᤂᤢᤴᤇᤡ᤹ ᤀᤠᤒᤠᤅᤣ ᤛᤢᤘᤠᤱᤗᤠᤶᤒᤠ ᤐᤥᤱᤗᤥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶᤒᤠ ᤕᤢᤰᤛᤠᤒᤠᤎᤡᤰ ᤗ᤺ᤴᤗᤥ॥ ᤀᤠᤱᤃᤠ᤹ ᤂᤧᤴ ᤀᤢ᤺ᤳᤋᤢᤱᤅᤡᤸᤗᤧ ᤂᤧᤴ ᤀᤠᤒᤣᤛᤠᤱ ᤋᤠᤖᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤧᤴᤀᤢ᤺ᤳᤋᤣ ᤌᤠᤖᤡᤰ ᤜᤠᤳ ᤀᤠᤒᤣᤛᤠᤱ ᤋᤠᤔᤠ ᤛᤢᤰᤐᤣ᥅ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥ 22 ᤁᤶᤓᤗ᤹ᤖᤡᤰ ᤂᤧᤱᤜᤠ᤹ ᤕᤠᤶᤔᤥ ᤀᤠᤱᤃᤠ᤹ ᤀᤠᤔᤏᤠ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤠᤶᤔᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠᤖᤥ॥” 23 ᤀᤥᤔᤧᤳᤋᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤱᤃ ᤛᤢᤖᤡᤳ ᤁᤣᤈᤱᤗᤥ. ᤁᤢᤛᤡᤰ ᤐᤥ᤺ᤰᤔᤥ ᤂᤧᤴ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤰᤗᤥ. ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤐᤥ ᤀᤡᤛᤫᤠᤖᤡ ᤛᤠᤶᤔᤡ᤺ᤳᤋᤧᤴ ᤛᤢ᤺ᤰᤌᤠᤖᤥ॥ 24 ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤥ ᤀᤡ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤴᤃᤧᤳᤋᤣ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤡᤵᤔᤠᤃᤧᤄᤢᤒᤠ ᤁᤢᤛᤡᤰ ᤐᤥ᤺ᤰᤔᤠᤴ ᤔᤧᤈᤡᤵᤋᤢᤴᤗᤥ॥ ᤁᤧᤍᤠᤒᤠ ᤕᤧᤴᤜᤠ᤹ᤀᤥ ᤂᤡᤏᤡ᤹ ᤁᤴ ᤐᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.