ᤕᤷᤔᤡᤕᤠ 29 - LIFOTNTᤕᤷᤔᤡᤕᤠ᤺ᤸᤗᤧ ᤒᤣᤒᤡᤗᤥᤏᤒᤠ ᤕᤜᤢᤍᤡᤜᤠ᤹ ᤛᤰᤀᤡᤱᤄᤱ ᤜᤠᤰᤋᤢᤛᤡ 1 ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤋᤢᤶᤓᤠᤰᤛᤠᤜᤠ᤹. ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹. ᤏᤡᤱᤘᤠ᤹ᤗᤢᤛᤠᤶᤒᤠᤜᤠ᤹ ᤏᤢ ᤁᤧᤖᤧᤰ ᤔᤏᤠᤜᤠ᤹ ᤏᤒᤢᤁᤍᤏᤣᤛᤖᤧᤸᤗᤧ ᤕᤖᤢᤛᤗᤧ᤺ᤶᤗᤠᤶᤒᤠ ᤐᤢᤱᤗᤠᤎᤠᤒᤠ ᤆᤥᤃᤢᤛᤡᤀᤠᤱ ᤒᤣᤒᤡᤗᤥᤏᤀᤥ ᤋᤣ᤹ᤖᤢᤛᤡᤀᤠᤱ ᤘᤕᤧ. ᤕᤷᤔᤡᤕᤠ᤺ᤸᤗᤧ ᤂᤧᤱᤜᤠ᤹ ᤜᤠᤰᤋᤢᤛᤡᤒᤠ ᤛᤰᤀᤡᤱᤄᤱᤅᤥᤒᤠ ᤐᤠ᤺ᤴᤜᤠ᤹ ᤀᤠᤶᤓᤠ ᤁᤴᤗᤥ॥ 2 ᤕᤜᤥᤕᤠᤁᤡᤏ ᤜᤠᤱᤅᤡᤴ. ᤔᤠᤏᤢᤍᤡᤱ ᤜᤠᤱᤔᤠ. ᤜᤠᤱᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹. ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤗᤠᤶᤗᤥᤒᤠᤜᤠ᤹. ᤛᤠᤶᤔᤩᤠᤱ ᤕᤢᤵᤐᤠ ᤁᤧᤎᤰᤐᤠ ᤆᤥᤒᤣᤃᤢᤜᤠ᤹ ᤜᤧᤰᤁᤩᤠᤱ ᤏᤢᤖᤡᤰ ᤛᤡᤱᤃᤠᤶᤔᤠ ᤗᤢᤱᤃᤠᤶᤔᤠ ᤁᤧᤗᤧᤒᤠᤜᤠ᤹ ᤕᤖᤢᤛᤗᤧ᤺ᤶᤗᤠᤶ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤀᤣᤃᤠᤱ ᤂᤢᤏᤧ᤹ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢ॥ 3 ᤂᤢᤏᤧ᤹ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤐᤠᤏᤧᤸᤗᤧ ᤁᤢᤛ᤻ᤛᤠ ᤀᤣᤗᤠᤛᤠᤴ ᤏᤢ ᤜᤡᤸᤁᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤃᤔᤷᤕᤠᤜᤴ ᤜᤢᤰᤛᤢᤵᤋᤢᤛᤡ. ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤸᤗᤧ ᤂᤧᤴ ᤏᤧᤵᤔᤠᤱ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤥ ᤐᤠᤱᤄᤢᤛᤡᤀᤠᤱ ᤘᤕᤧ॥ ᤁᤴ ᤛᤰᤀᤡᤱᤄᤱᤅᤡᤴ ᤀᤰᤋᤱᤒᤠ ᤘᤕᤧᤖᤥ— 4 ᤀᤡᤛᤪᤠᤀᤡᤗᤗᤠᤶᤒᤠ ᤋᤧᤶᤛᤢᤛᤡᤀᤠᤱ ᤒᤣᤒᤡᤗᤥᤏᤀᤥ ᤋᤣ᤹ᤖᤢᤛᤡᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤔᤧᤳᤋᤢᤛᤡ. 5 “ᤂᤧᤵᤔᤥ ᤂᤡᤏᤡ᤹ ᤜᤡᤶᤎᤠ᤺ᤱ ᤆᤥᤃᤧᤶᤔᤧ᤹ᤀᤠᤱ ᤕᤢᤅᤧᤶᤔᤧ᤹॥ ᤛᤡᤱᤛᤣ᤹ ᤀᤡᤰᤋᤠᤵᤜᤠ᤹ ᤁᤣ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤎᤥ᤺ᤰᤐᤠ ᤁᤢᤈᤠᤴ ᤆᤧᤶᤔᤧ᤹॥ 6 ᤋᤧᤴᤎᤠᤶ ᤔᤣ᤺ᤰᤂᤡᤶ ᤆᤥᤃᤧᤶᤔᤧ᤹ ᤜᤧᤰᤁᤩᤠᤱ ᤛᤠ-ᤀᤣ ᤁᤳᤋᤧᤶᤛᤡᤶᤔᤧ᤹॥ ᤂᤧᤏᤡ᤹ ᤛᤠᤀᤣᤜᤠ᤹ᤖᤧᤀᤠᤱ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤈᤥᤃᤢᤖ ᤂᤧᤒᤩᤠᤱ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤔᤧᤃᤳᤋᤢᤛᤡᤖ॥ ᤂᤡᤏᤡ᤹ ᤂᤠᤏᤡ᤺ᤳᤋᤡᤴ ᤑᤥᤔᤠ ᤐᤥᤱ᤹. ᤛᤢ᤺ᤶᤔᤠ ᤔᤧᤏᤢ᤹ᤏᤧᤴ॥ 7 ᤀᤠᤱᤃᤠ᤹ ᤀᤠᤳᤋᤡᤴ ᤕᤧᤰᤕᤰᤁᤥ ᤂᤡᤏᤡ᤹ ᤁᤧᤶᤍᤧᤶᤛᤡ ᤁᤧᤶᤍᤣ᤹ᤖᤡᤖ ᤆᤥ᤺ᤰᤏᤡᤱᤅᤠᤱ ᤐᤠᤱᤏᤡᤱ. ᤂᤧᤵᤔᤥ ᤛᤢᤰᤂᤣᤘᤠᤖᤧ ᤗᤠᤃᤡ ᤕᤠ᤺ᤶᤒᤰ ᤆᤥᤃᤧᤶᤔᤧ᤹॥ ᤂᤧᤸᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤧᤶᤔᤧ᤹ ᤌᤣᤀᤠᤱᤓᤧᤸᤗᤧ ᤂᤧᤵᤔᤥᤒᤠᤜᤠ᤹ ᤔᤧᤏᤢ᤹ ᤔᤧᤍᤠᤏᤧᤓᤃᤪ ᤂᤡᤏᤡ᤹ᤀᤠᤱ ᤁᤧᤏᤢᤖᤡ ᤁᤧᤍᤠᤛᤡ᤹॥” 8 ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤂᤡᤏᤡ᤹ ᤗᤢᤶᤔᤥ ᤁᤧᤘᤠ᤹ᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤀᤡᤃᤪ ᤋᤠ᤺ᤴᤍᤡ ᤁᤧᤍᤠᤒᤠ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤀᤠᤸᤗᤥᤛᤠ ᤐᤠ᤺ᤵᤔᤠ ᤛᤢᤰᤋᤢᤶᤒᤧ ᤗ᤹ᤖᤡᤰ ᤐᤠᤴ ᤁᤧᤎᤰᤐᤠ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤱᤗᤧᤰᤁᤥ ᤔᤧᤎᤩᤧᤶᤔᤧᤴᤏᤧ᤹॥ ᤂᤡᤏᤡ᤹ ᤀᤠᤒᤠᤅᤣ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤔᤠᤰᤋᤢᤶᤒᤠ ᤛᤧᤵᤔᤠᤱᤒᤠ ᤐᤠ᤺ᤴᤏᤥ ᤏᤡᤱᤘᤠ᤹ ᤔᤧᤒᤡᤖᤧᤶᤔᤡᤴᤏᤧ᤹॥ 9 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤔᤡᤱᤅᤥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤀᤡᤱᤗᤧᤰᤐᤠ ᤐᤠᤴ ᤁᤧᤶᤔᤧᤳᤋᤡᤖ ᤔᤧᤘᤠ᤹॥ ᤂᤧᤱᤜᤠ᤹ ᤀᤠᤱᤃᤠ᤹ ᤐᤠᤱᤄᤢᤱᤛᤡᤱᤒᤠ ᤔᤣ᤺ᤴ॥” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 10 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤒᤣᤒᤡᤗᤥᤏᤀᤥ ᤁᤧᤶᤍᤧᤶᤛᤡᤀᤠᤱ ᤁᤧᤶᤍᤣ᤹ᤖᤡᤒᤠ ᤏᤢᤒᤥᤱ ᤋᤱᤒᤣ ᤁᤧᤳᤋᤠᤱ ᤀᤠᤱᤃᤠ᤹ ᤂᤡᤏᤡ᤹ ᤀᤥᤔᤧᤳᤇᤧ ᤋᤠᤀᤠ. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤈᤣ᤹ᤀᤥ ᤏᤢ᤺ᤰᤏᤡᤱ ᤑᤧᤳᤏᤡᤱᤅᤠᤱ ᤀᤠᤱᤃᤠ᤹ ᤀᤠᤔᤠᤱᤜᤢᤵᤐᤡᤴ ᤁᤧᤳᤋᤢᤱ᤹॥ 11 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤗᤠᤃᤡ ᤆᤥ᤺ᤰᤔᤠ ᤁᤥ᤺ᤳᤋᤢᤱᤒᤠ ᤏᤡᤗᤠᤶᤜᤠ᤹ ᤀᤠᤱᤃᤠ᤹ ᤀᤠᤒᤠᤅᤣ ᤁᤢᤛᤡᤱ ᤏᤡ᤺ᤳᤋᤢᤱ᤹॥ ᤂᤧᤴ ᤏᤡᤗᤠᤶᤜᤠ᤹ᤗᤠᤶᤒᤠ ᤂᤡᤏᤡ᤹ ᤏᤢ᤹ᤔᤠᤍᤠᤔᤠ ᤐᤥᤱ᤹ ᤁᤖ ᤂᤡᤏᤡ᤹ ᤜᤠᤴᤋᤡ ᤁᤧᤶᤒᤥ᤺ᤰᤂᤡᤴ ᤜᤧᤰᤁᤩᤠᤱ ᤏᤢ᤹ᤔᤠᤍᤠᤔᤠᤖᤧ ᤗᤠᤃᤡ ᤂᤡᤏᤡ᤹ ᤏᤡᤱᤛᤠᤱ ᤁᤧᤈᤥᤃᤢᤶᤒᤠ ᤁᤧᤍᤠᤒᤠ ᤕᤧᤶᤔᤡᤴ ᤂᤡᤏᤡ᤹ ᤐᤡᤏᤡᤱ᤹॥ 12 ᤂᤧᤒᤩᤠᤱ ᤂᤡᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤏᤡᤱᤘᤠ᤹ ᤁᤧᤀᤡ᤺ᤳᤋᤡ᤹॥ ᤂᤡᤏᤡ᤹ ᤀᤠᤱᤃᤠ᤹ᤀᤥ ᤁᤧᤍᤩᤧ᤹ᤀᤡᤀᤠᤱ ᤋᤢᤘᤠ ᤁᤧᤈᤥᤃᤢᤶ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤏᤢᤃᤵ ᤐᤡᤏᤡᤱ᤹॥ 13 ᤂᤡᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤁᤧᤃᤥ᤺ᤳᤋᤡ᤹. ᤀᤠᤒᤠᤅᤣ ᤂᤡᤏᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠᤸᤗᤧ ᤀᤠᤱᤃᤠ᤹ ᤕᤠᤵᤔᤡ ᤁᤧᤜᤰᤛᤡ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤠᤵᤔᤡ ᤁᤧᤄᤥᤛᤡ᤹॥ 14 ᤛᤧᤰᤂᤠ. ᤀᤠᤱᤃᤠ᤹ ᤔᤧᤳᤏᤡᤱ. ᤂᤡᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤁᤧᤄᤥᤛᤡ᤹ ᤂᤧᤒᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤀᤠᤒᤠᤅᤣ ᤗᤠᤈᤣ᤹ᤀᤥ ᤏᤢ᤺ᤰᤏᤡᤱ ᤋᤠ᤺ᤳᤏᤡᤱ॥ ᤀᤠᤱᤃᤠ᤹ ᤂᤡᤏᤡ᤹ ᤏᤠ᤺ᤳᤏᤡᤱᤍᤣᤏᤡᤱᤒᤠ ᤁᤧᤖᤧᤰ ᤗᤠᤈᤣ᤹ ᤏᤢ ᤋᤧᤴᤏᤥᤗᤠᤶᤒᤠ ᤀᤠᤱᤃᤠ᤹ ᤂᤡᤏᤡ᤹ ᤛᤢᤶᤏᤡᤱ॥ ᤀᤠᤳᤋᤡᤴ ᤗᤠᤈᤣ᤹ᤗᤠᤶᤒᤠ ᤀᤠᤱᤃᤠ᤹ ᤁᤧᤶᤍᤧᤶᤛᤡ ᤁᤧᤶᤍᤣ᤹ᤖᤡᤖ ᤕᤠ᤺ᤴᤏᤡᤱᤅᤠᤱ ᤘᤕᤠᤱ. ᤜᤠᤒᤠ ᤂᤧᤴ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤂᤡᤏᤡ᤹ ᤏᤢ᤺ᤰᤏᤡᤱ ᤋᤠ᤺ᤳᤏᤡᤱ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹॥” 15 ᤕᤜᤘᤣ ᤍᤠᤱᤒᤧᤸᤗᤧ ᤒᤣᤒᤡᤗᤥᤏᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤂᤡᤏᤡ᤹ ᤁᤧᤒᤡᤖᤡᤀᤠᤱ ᤁᤧᤘᤕᤡ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤒᤠ᤺ᤳᤋᤢᤶ᤹॥ 16 ᤁᤖ ᤍᤠᤀᤢᤍᤧᤴ ᤕᤢᤅᤧᤒᤠ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢ ᤁᤴ ᤕᤧᤰᤕᤰᤁᤥᤒᤠ ᤕᤰᤕᤢᤱᤒᤠᤜᤠ᤹ ᤀᤡᤃᤪ ᤂᤡᤏᤡ᤹ ᤁᤠ᤹ᤀᤡᤜᤠ᤹. ᤂᤧᤴ ᤂᤡᤏᤡ᤹ᤏᤢ ᤔᤧᤍᤧᤶᤛᤢᤛᤡᤀᤠᤱ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤔᤧᤴᤍᤣ᤹ᤖᤢᤛᤡᤴ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤌᤧᤔᤠ ᤐᤠ᤺ᤳᤋᤢ᤹. ᤂᤧᤴ ᤂᤧᤵᤛᤧᤶᤔᤧ᤹॥ 17 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤂᤡᤏᤡ᤹ ᤛᤶᤎᤠᤱ ᤌᤱ. ᤛᤠᤰᤘᤠᤴ ᤏᤢ ᤔᤡᤱᤍᤣ᤹ ᤋᤠᤖᤢᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤆᤠᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤜᤷᤃᤡ᤹ ᤁᤧᤃᤡᤒᤠ ᤐᤳᤇᤣ᤹ ᤜᤧᤰᤋᤱᤒᤠ ᤆᤥᤃᤢᤱᤛᤡᤱ᤹॥ 18 ᤀᤠᤱᤃᤠ᤹ ᤂᤧᤱᤜᤠ᤹ ᤋᤧᤴᤎᤱ. ᤛᤠᤰᤘᤠᤴ ᤏᤢ ᤔᤡᤱᤍᤣᤸᤗᤧ ᤐᤢᤒᤣᤗᤠᤵᤛᤠ ᤏᤠ᤺ᤳᤋᤢᤱᤛᤡᤱ᤹ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤧᤴ ᤔᤧᤏᤡᤛᤢᤀᤠᤱ ᤕᤱᤔᤠ ᤁᤡᤔᤠᤀᤥ ᤔᤧᤎᤠᤖᤥ॥ ᤑᤢᤳᤇᤡᤱᤈᤩᤠᤱ ᤆᤥᤃᤢᤱᤛᤡᤱᤅᤠᤱ ᤀᤠᤱᤃᤠ᤹ ᤀᤠᤳᤋᤠᤋᤠᤴ ᤀᤡᤔᤧᤴᤏᤡ ᤂᤠᤔᤧᤴᤏᤡ ᤂᤧᤱᤜᤠ᤹ ᤐᤠᤱᤄᤢᤱᤛᤡᤱ᤹. ᤂᤧᤱᤜᤠ᤹ᤖᤧ ᤔᤧᤍᤢᤔᤢᤒᤠ ᤕᤠᤰᤏᤠᤶᤔᤡᤴ ᤔᤧᤏᤡᤛᤢᤀᤠᤱ ᤔᤏᤠᤜᤠ᤹ ᤜᤠᤒ᤻ ᤔᤧᤗᤧᤰᤁᤠᤱ ᤐᤃᤡ ᤔᤧᤃᤡᤖᤥ॥ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤡᤱ ᤔᤧᤗᤥ᤺ᤰᤋᤢᤛᤡᤀᤠᤱ ᤔᤠᤱᤍᤣ ᤛᤠᤰᤔᤢᤖᤠ ᤔᤧᤔᤧᤳᤋᤢᤛᤡ᤹॥ 19 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤥ ᤏᤡᤱᤘᤠ᤹ ᤔᤧᤶᤒᤡᤖᤢᤴ ᤗ᤹ᤖᤡᤰ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ ᤂᤧᤴ ᤀᤠᤒᤠ᤺ᤴᤏᤡᤴ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤕᤧᤳᤗᤧᤱ ᤕᤧᤳᤗᤧᤱ ᤂᤧᤱᤜᤠ᤹ ᤜᤠᤰᤋᤢᤱᤛᤡᤱᤅᤠᤱ ᤘᤕᤧ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤶᤍᤧᤶᤛᤡ ᤁᤧᤶᤍᤣ᤹ᤖᤡᤒᤠᤜᤠ᤹ᤖᤧᤀᤠᤱ ᤀᤠᤱᤃᤠ᤹ ᤀᤠᤀᤡᤱᤄᤱᤅᤡᤴ ᤁᤧᤱᤄᤧᤵᤛᤢᤶᤔᤡᤴ॥ 20 “ᤂᤧᤸᤗᤧᤆᤥᤃᤢᤸᤗᤧ ᤕᤖᤢᤛᤗᤧᤔᤗᤠᤶ ᤂᤡᤏᤡ᤹ ᤁᤧᤶᤍᤧᤶᤛᤡ ᤁᤧᤶᤍᤣ᤹ᤖᤡᤖ ᤕᤠ᤺ᤴᤏᤡᤱᤅᤠᤱ ᤒᤣᤒᤡᤗᤥᤏᤀᤥ ᤐᤠᤱᤏᤡᤱᤒᤠ ᤁᤧᤖᤧᤰᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤌᤣ ᤀᤡᤱᤄᤱ ᤐᤠ᤺ᤳᤋᤢᤱ᤹. ᤂᤧᤴ ᤂᤧᤵᤛᤧᤶᤔᤧ᤹॥” 21 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤂᤡᤏᤡ᤹ ᤀᤡᤱᤗᤧᤰ ᤐᤠᤴ ᤁᤧᤔᤧᤵᤐᤠ ᤁᤥᤗᤠᤕᤠᤜ᤺ᤸᤗᤧ ᤁᤢᤛ᤻ᤛᤠ ᤀᤠᤜᤠᤒᤧᤴ ᤏᤢ ᤔᤠᤛᤣᤕᤠᤜ᤺ᤸᤗᤧ ᤁᤢᤛ᤻ᤛᤠ ᤛᤡᤍᤁᤡᤕᤠᤜ᤺ᤸᤗᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. “ᤀᤠᤱᤃᤠ᤹ ᤂᤧᤱᤜᤠ᤹ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤁᤢᤜᤢᤰᤁᤥ ᤐᤡᤖᤢᤱᤛᤡᤱ᤹ ᤜᤧᤰᤁᤩᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤂᤡᤏᤡ᤹ ᤋᤃᤡ ᤔᤡᤰᤁᤡᤸᤗᤧ ᤁᤧᤏᤡᤛᤢᤶᤗ ᤂᤧᤱᤜᤠ᤹ ᤛᤧᤖᤢᤛᤡ᤹॥ 22 ᤕᤖᤢᤛᤗᤧ᤺ᤶᤗᤠᤶᤒᤠ ᤔᤧᤍᤧᤶᤛᤢᤛᤡᤀᤠᤱ ᤒᤣᤒᤡᤗᤥᤏᤀᤥ ᤔᤧᤍᤣ᤹ᤖᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤧᤵᤔᤥ ᤀᤠᤳᤋᤡᤴᤜᤠ᤹ᤛᤠᤱ ᤛᤠᤱᤃᤪᤠ ᤔᤠᤱᤍᤣ ᤔᤧᤵᤔᤠᤛᤡ ᤏᤡᤱᤘᤠ᤹ ᤔᤧᤈᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. ‘ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤜᤡᤱᤘᤧᤳ ᤔᤡᤎᤡᤰᤂᤢᤛᤡᤒᤠ ᤛᤡᤍᤁᤡᤕᤠᤜ᤺ᤴ ᤏᤢ ᤀᤠᤜᤠᤒᤒᤧᤴ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ᤀᤠᤱ ᤁᤧᤔᤧᤳᤗᤖᤥ॥’ 23 ᤂᤧᤱᤜᤠ᤹ᤖᤧ ᤔᤧᤍᤢᤔᤢᤒᤠ ᤕᤠᤰᤏᤠᤶᤔᤡᤴ ᤀᤰᤋᤱᤒᤠᤀᤣ ᤐᤥᤱ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤀᤥ ᤁᤡᤵᤔᤠᤃᤧᤄᤢᤒᤠ ᤗᤠᤕᤥᤜᤠ᤹ ᤔᤧᤈᤥᤃᤢᤀᤠᤱ ᤘᤠ᤹. ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤜᤡᤶᤒᤣᤛᤠᤱᤒᤠ ᤆᤢᤶᤔᤡᤸᤗᤧ ᤁᤢᤔᤣ᤺ᤳᤋᤡᤴᤏᤢ ᤆᤠᤖᤠᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤢ ᤜᤧᤰᤁᤩᤠᤱ ᤀᤠᤔᤡᤱᤅᤥ ᤀᤡᤱᤗᤧᤰᤐᤠ ᤐᤠᤴ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤠ᤹॥ ᤁᤴ ᤕᤠ᤺ᤶᤒᤰᤜᤠ᤹ ᤀᤠᤏᤡᤱᤘᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤘᤕᤧ॥ ᤂᤧᤱᤜᤠ᤹ᤖᤧ ᤜᤧᤴ ᤔᤧᤈᤥᤃᤢᤀᤠᤱ ᤔᤧᤘᤠ᤹. ᤂᤧᤴ ᤀᤠᤱᤃᤠ᤹ ᤏᤡᤛᤢᤱ᤹ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤠᤱᤃᤠ᤹ ᤛᤠᤂᤡ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥” ᤛᤔᤠᤕᤠᤜᤖᤧ ᤁᤢᤗᤠᤃᤡ ᤛᤰᤀᤡᤱᤄᤱ 24 ᤏᤣᤜᤣᤔᤗᤠᤔ ᤁᤧᤕᤢᤱᤒᤠ ᤛᤔᤠᤕᤠᤜ᤺ᤴ ᤕᤜᤘᤣ ᤍᤠᤱᤒᤧᤸᤗᤧ ᤒᤣᤒᤡᤗᤥᤏᤀᤥ ᤁᤴ ᤀᤡᤱᤄᤱᤅᤡᤴ ᤜᤠᤰᤋᤢ. 25 “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤧᤏᤧ᤹ ᤀᤠᤒᤠᤅᤣ ᤁᤧᤔᤡᤱᤅᤥ ᤕᤖᤢᤛᤗᤧ᤺ᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤠᤛᤣᤕᤠᤜ᤺ᤸᤗᤧ ᤁᤢᤛ᤻ᤛᤠ ᤛᤐᤏᤩᤠᤜ᤺ᤴ ᤏᤢ ᤘᤣ᤹ ᤁᤧᤖᤧᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤗᤳᤇᤠ ᤛᤰᤀᤡᤱᤄᤱ ᤁᤧᤜᤠᤰᤋᤢᤛᤡᤀᤠᤱ ᤘᤕᤧ॥ ᤂᤧᤴ ᤛᤰᤀᤡᤱᤄᤱᤅᤥ ᤂᤧᤏᤧ᤹ ᤛᤐᤏᤩᤠᤜ᤺ᤴ ᤀᤰᤂᤣ ᤁᤧᤛᤠᤵᤋᤢᤀᤠᤱ ᤐᤳᤇᤧ. 26 “ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤕᤜᤥᤕᤠᤍᤠ᤺ᤸᤗᤧ ᤁᤢᤗᤧᤰᤘᤠᤀᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤈᤥᤃᤧ ᤜᤧᤰᤁᤩᤠᤱ ᤀᤠᤸᤗ ᤂᤧᤏᤧ᤹ ᤔᤠᤱᤜᤡᤶ ᤀᤥᤃᤧᤔᤧᤵᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤁᤧᤗᤠᤶᤛᤡᤱᤒᤠᤖ ᤁᤧᤘᤠ᤹ᤒᤠ ᤁᤧᤖᤧᤰ ᤁᤧᤏᤠᤱᤒᤠᤜᤠ᤹ ᤋᤢᤖᤢᤱ ᤌᤧᤵᤔᤠᤛᤡᤀᤠᤱ ᤂᤢᤴᤇᤡ᤹ ᤛᤡᤰᤁᤪᤢᤱᤔᤥ ᤑᤧᤴᤈᤣ᤹ ᤋᤠᤱ ᤘᤠ᤺ᤵᤔᤠᤛᤡ ᤕᤠ᤺ᤶᤒᤰᤁᤡᤴ ᤂᤧᤏᤧ᤹ᤀᤡᤴᤗᤥ॥ 27 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤗᤢᤶᤔᤥ ᤔᤏᤠᤜᤠ᤹ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤏᤠᤋᤥᤋᤒᤠ ᤕᤷᤔᤡᤕᤠᤴ ᤂᤧᤏᤧ᤹ ᤌᤣᤀᤠᤱ ᤜᤧᤰᤁᤣ ᤔᤧᤶᤔᤧᤳᤋᤣ ᤁᤧᤃᤳᤋᤢᤒᤠᤒᤣ᥅ 28 ᤒᤣᤒᤡᤗᤥᤏᤀᤥ ᤂᤧᤸᤗᤧ ᤀᤠᤏᤡᤃᤣ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤡᤃᤧᤀᤠᤱ ᤘᤠ᤹. ‘ᤂᤡᤏᤡ᤹ ᤂᤧᤵᤔᤥ ᤕᤖᤡᤰ ᤕᤧᤴ ᤁᤧᤶᤍᤧᤶᤛᤡ ᤁᤧᤶᤍᤣ᤹ᤖᤡᤀᤠᤱ ᤁᤧᤘᤕᤡ᤹ ᤜᤧᤰᤁᤩᤠᤱ ᤜᤡᤶᤎᤠ᤺ᤱ ᤆᤥᤃᤧᤶᤔᤧ᤹ᤀᤠᤱ ᤕᤢᤅᤧᤶᤔᤧ᤹. ᤛᤡᤱᤛᤣ᤹ ᤑᤢᤱᤀᤡᤰ ᤁᤣ᤺ᤳᤋᤧᤶᤔᤧ᤹. ᤂᤧᤒᤩᤠᤱ ᤂᤧᤵᤔᤥ ᤁᤧᤎᤥ᤺ᤰᤐᤠ ᤁᤢᤈᤠᤴ ᤆᤧᤶᤔᤧ᤹॥’” 29 ᤏᤡᤱᤘᤠ᤹ᤑᤢᤛᤠᤶᤒᤠ ᤛᤐᤏᤩᤠᤜ᤺ᤸᤗᤧ ᤂᤧᤴ ᤛᤰᤀᤡᤱᤄᤱᤅᤡᤴ ᤕᤷᤔᤡᤕᤠᤴ ᤏᤡᤖᤢ ᤐᤡᤖᤢ॥ 30 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤋᤱᤒᤠ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ. 31 “ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰ ᤀᤡᤱᤄᤱ ᤜᤠᤰᤋᤧᤛᤧ᤹. ‘ᤏᤣᤜᤣᤔᤗᤠᤔ ᤁᤧᤕᤢᤱᤒᤠ ᤛᤔᤠᤕᤠᤜ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤐᤠᤱᤔᤠᤀᤣ ᤔᤧᤶᤒᤠᤱᤅᤣ ᤂᤧᤴ ᤛᤔᤠᤕᤠᤜ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤀᤠᤱ ᤀᤡᤱᤗᤧᤰᤐᤠ ᤁᤢᤒᤠ᤺ᤴᤏᤥ ᤏᤛᤠᤴ ᤆᤥ᤺ᤰᤔᤠ ᤁᤧᤒᤠᤱᤄᤡ॥ 32 ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤏᤣᤜᤣᤔᤗᤠᤔ ᤁᤧᤕᤢᤱᤒᤠ ᤛᤔᤠᤕᤠᤜ᤺ᤴ ᤏᤢ ᤁᤢᤔᤢᤀᤡ᤹ᤍᤠᤱᤛᤠᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ ᤂᤧᤸᤗᤧ ᤀᤠᤳᤋᤡᤴ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤀᤠᤱ ᤂᤡᤏᤡ᤹ᤗᤢᤶᤔᤥ ᤁᤢᤜᤡᤱᤘᤧᤳ ᤔᤧᤴᤕᤠ᤺ᤰᤏᤧᤴ. ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤗᤠᤃᤡ ᤆᤥᤃᤢᤱᤒᤠ ᤏᤢᤒᤠ ᤕᤠ᤺ᤶᤒᤰᤁᤡᤴ ᤂᤧᤸᤗᤧ ᤏᤡᤔᤠ ᤔᤧᤄᤥᤛᤢᤴ᤹ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤆᤥ᤺ᤰᤔᤠ ᤜᤢᤛᤢᤛᤡᤀᤠᤱ ᤘᤕᤧ॥ ᤀᤠᤱᤃᤠ᤹ ᤁᤴ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.