ᤕᤷᤔᤡᤕᤠ 28 - LIFOTNT

ᤀᤡᤱᤗᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤏᤏᤩᤠᤜ᤺ᤴ

¹ ᤜᤠᤒᤠ ᤂᤧᤴ ᤋᤱᤒᤣ. ᤀᤈ᤻ᤈᤢᤖᤗᤧ ᤁᤢᤛ᤻ᤛᤠ ᤃᤡᤒᤥᤏ ᤁᤧᤕᤢᤱᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤏᤏᤩᤠᤜ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴ ᤔᤧᤳᤋᤠᤱᤅᤡᤸᤗᤧ ᤛᤡᤍᤁᤡᤕᤠᤜ᤺ᤸᤗᤧ ᤕᤜᤢᤍᤠᤀᤥ ᤜᤠᤱᤕᤢᤰ ᤆᤥᤃᤢᤒᤠ ᤋᤱᤒᤣ ᤗᤡᤛᤡᤀᤠᤱ ᤅᤠᤛᤡᤃᤣᤰᤐᤠ ᤗᤠ ᤁᤧᤖᤧᤀᤠᤱ ᤘᤕᤧ॥

² ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤘᤣ᤹ᤜᤠ᤹ ᤀᤣ᤺ᤵᤔᤠᤛᤡ ᤁᤢᤄᤧ᤺ᤵᤛᤡᤱᤅᤡᤴ ᤀᤧᤰᤂᤢᤱ ᤐᤡᤖᤢᤱ᤹॥

³ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤗᤠᤶ ᤁ᤹ᤕᤥᤏᤢ ᤒᤣᤒᤡᤗᤥᤏ ᤋᤣ᤹ᤖᤢᤀᤠᤱ ᤘᤕᤧᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹. ᤀᤠᤸᤗ ᤋᤱᤒᤣ ᤏᤧᤳᤇᤡᤖᤧᤛᤠ ᤀᤠᤱᤃᤠ᤹ ᤕᤠᤶᤔᤥ ᤁᤴ ᤋᤧᤴᤏᤥᤀᤣ ᤁᤠᤰ ᤏᤢ᤺ᤰᤋᤢᤱ ᤑᤧᤳᤋᤢᤱ᤹॥

⁴ ᤀᤠᤱᤃᤠ᤹ ᤕᤜᤥᤕᤠᤁᤡᤔᤧᤸᤗᤧ ᤁᤢᤛ᤻ᤛᤠ. ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤏᤧᤴ ᤏᤢ ᤒᤣᤒᤡᤗᤥᤏᤀᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤕᤜᤢᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ᤏᤢ ᤛᤥᤖᤡᤰ ᤏᤢ᤺ᤰᤋᤢᤱ ᤑᤧᤳᤋᤢᤱᤛᤡᤱ᤹॥ ᤜᤧᤰᤁᤩᤠᤱ ᤛᤧᤰᤂᤠᤛᤠᤱ ᤀᤠᤱᤃᤠ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤄᤧ᤺ᤵᤛᤡᤱᤅᤡᤴ ᤀᤧᤰᤂᤢᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹॥”

⁵ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤁᤧᤕᤧᤵᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤏᤏᤩᤠᤜ᤺ᤴ ᤔᤧᤳᤋᤢ.

⁶ “ᤀᤥᤖᤥ. ᤜᤧᤰᤁᤣᤀᤣ ᤐᤥᤱᤗ᥄ ᤕᤜᤘᤣ ᤍᤠᤱᤒᤧᤸᤗᤧ ᤜᤧᤰᤁᤣᤀᤣ ᤆᤥᤃᤢᤖ᥄ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤁᤴ ᤔᤠᤱᤏᤡᤱᤘᤠ᤹ᤐᤠᤴᤜᤠ᤹ ᤁᤧᤖᤧᤰ ᤂᤢᤏᤧ᤹ ᤁᤧᤳᤋᤢ ᤁᤧᤒᤡᤖ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤆᤡᤃᤰᤘᤠ ᤛᤠᤔᤠᤜᤠ᤹ ᤏᤢ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤢᤏᤧ᤹ ᤒᤣᤒᤡᤗᤥᤏᤗᤠᤶᤒᤠ ᤁᤴ ᤋᤧᤴᤏᤥ ᤏᤢ᤺ᤰᤋᤢ ᤑᤧᤳᤋᤢᤛᤡᤖ॥

⁷ ᤁᤖᤛᤠᤱ ᤀᤠᤱᤃᤠ᤹ ᤂᤧᤏᤧ᤹ ᤏᤢ ᤁᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤔᤧᤳᤋᤢᤱᤛᤡᤱᤒᤠ ᤐᤠ᤺ᤴᤈᤠ᤺ᤰᤁᤡᤴ ᤂᤧᤏᤧ᤹ ᤂᤧᤵᤛᤧ᤹॥

⁸ ᤀᤠᤱᤃᤠ᤹ ᤜᤧᤰᤁᤩᤠᤱ ᤂᤧᤏᤧ᤹ᤏᤢ᤺ᤸᤗᤧ ᤋᤃᤡ ᤁᤧᤍᤠᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤕᤖᤡᤰ ᤜᤠᤱᤈᤢᤶᤜᤠ᤹ᤀᤥ ᤌᤱ ᤐᤥᤱ᤹. ᤛᤠᤰᤘᤠᤴ ᤋᤠ᤹᤺ ᤂᤧᤒᤩᤠᤱ ᤋᤢᤰᤔᤠ ᤗᤠ᤺ᤰᤔᤠ ᤔᤡᤱᤍᤣ᤹ ᤐᤥᤰ ᤑᤠ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤀᤠᤱ ᤘᤕᤧ॥

⁹ ᤁᤖ ᤀᤠᤳᤋᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧ ᤏᤢ᤹ᤔᤠᤍᤠᤔᤠ ᤛᤏᤠᤖᤢᤱ ᤋᤠ᤹᤺ ᤑᤠ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢ᤹. ᤂᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤈᤧᤰ ᤁᤧᤳᤋᤠᤱᤗᤰ ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤐᤠᤱᤄᤢᤒᤠᤖᤧᤳᤇ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤳ॥”

¹⁰ ᤂᤧᤒᤩᤠᤱ ᤜᤏᤏᤩᤠᤜ᤺ᤸᤗᤧ ᤕᤷᤔᤡᤕᤠ᤺ᤸᤗᤧ ᤁᤢᤓᤰᤋᤠᤱᤅᤥᤗᤠᤶ ᤂᤧ᤺ᤵᤛᤡᤱᤅᤡᤴ ᤗ᤺ᤳᤋᤢᤀᤠᤱ ᤂᤧᤴ ᤑᤸᤗᤰ ᤀᤧᤰᤂᤢ.

¹¹ ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ. ‘ᤀᤰᤂᤣᤗ᤹ᤖᤡᤰᤁᤣ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤑᤰᤋᤠᤱᤅᤥ ᤑᤳᤇᤢᤒᤠ ᤂᤧ᤺ᤵᤛᤡᤱᤅᤡᤴ ᤋᤱᤒᤣ ᤏᤧᤳᤇᤡᤖᤧᤛᤠ ᤀᤠᤱᤃᤠ᤹ ᤀᤧᤰᤂᤢᤱ ᤐᤡᤖᤢᤱ॥’” ᤂᤧᤒᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤴ ᤂᤧᤵᤔᤥᤏᤢ ᤌᤠᤛᤡᤱᤅᤠᤱ ᤐᤣ॥

¹² ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤏᤏᤡᤕᤠ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠ᤺ᤸᤗᤧ ᤁᤢᤓᤰᤋᤠᤱᤅᤥᤗᤠᤶ ᤂᤧ᤺ᤵᤛᤡᤱᤅᤡᤴ ᤀᤧᤰᤂᤢ ᤐᤡᤖᤢᤒᤠ ᤁᤢᤓᤠ ᤕᤧᤶ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ.

¹³ “ᤐᤣᤃᤧ᤹ᤀᤠᤱ ᤜᤏᤏᤩᤠᤜ᤺ᤴ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ᤂᤧᤏᤧ᤹ ᤛᤡᤱᤅᤡᤸᤗᤧᤴ ᤂᤧ᤺ᤵᤛᤡᤱᤅᤡᤱᤃ ᤀᤧᤱᤔᤠ ᤁᤧᤛᤢᤰᤋᤢᤒᤡᤗᤠ. ᤁᤖ ᤀᤠᤱᤃᤠ᤹ ᤂᤧᤸᤗᤧ ᤁᤢᤗᤧᤰᤘᤠᤀᤥ ᤑᤧᤴᤈᤣ᤹ ᤂᤧ᤺ᤵᤛᤡᤱ ᤁᤢ᤺ᤳᤋᤢᤱ᤹॥

¹⁴ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤱ᤹. ᤁᤴ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤑᤧᤴᤈᤣ᤹ ᤂᤧ᤺ᤵᤛᤡᤱᤅᤡᤴ ᤁᤢ᤺ᤳᤋᤢᤱᤛᤡᤱ ᤜᤧᤰᤁᤩᤠᤱ ᤁᤱᤜᤠ᤹ᤖᤧ ᤒᤣᤒᤡᤗᤥᤏᤒᤠ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ ᤔᤧᤈᤥᤃᤢᤖ ᤕᤠ᤺ᤴᤍᤢᤱᤛᤡᤱ᤹. ᤀᤠᤱᤃᤠ᤹ ᤋᤠᤶᤓᤢᤱᤅᤥᤒᤠ ᤌᤰᤛᤠᤜᤠ᤹ᤀᤠᤱ ᤂᤢᤏᤧ᤹ ᤁᤢᤕᤢᤰᤁᤥ ᤘᤠ᤹ᤔᤠ ᤐᤠᤱᤄᤢᤱᤛᤡᤱ॥’”

¹⁵ ᤜᤧᤰᤁᤩᤠᤱ ᤕᤷᤔᤡᤕᤠ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤏᤏᤩᤠᤜ᤺ᤴ ᤀᤰᤂᤣ ᤔᤧᤳᤋᤢ. “ᤜᤏᤏᤩᤠᤜᤀᤣ. ᤂᤧᤵᤛᤧ᤹᥄ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤁᤧᤒᤠᤱᤄᤧᤒᤠ ᤔᤣ᤺ᤴ॥ ᤜᤧᤰᤁᤣᤛᤠᤱ ᤂᤧᤏᤧ᤹ ᤁᤴ ᤔᤏᤠᤜᤠ᤹ ᤗᤳᤇᤠ ᤀᤡᤱᤗᤧᤰᤐᤠ ᤐᤠ᤺ᤴᤏᤡᤴ ᤏᤛᤠᤴ ᤆᤥ᤺ᤰᤔᤠ ᤁᤧᤒᤠᤱᤄᤢᤛᤡᤖ ᤁᤧᤘᤠ᤹॥

¹⁶ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤀᤠᤶᤓᤠ ᤁᤴ ᤋᤱᤒᤣᤀᤥᤛᤠ ᤂᤧᤏᤧ᤹ ᤁᤧᤛᤡ᤹᤺ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤏᤠᤜᤠ᤹ ᤀᤡᤱᤓᤥ ᤁᤧᤈᤥᤃᤢᤛᤡᤀᤠᤱ ᤁᤧᤘᤠ᤹॥’”

¹⁷ ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤋᤱᤒᤣᤒᤠ ᤏᤢᤛᤡ ᤗᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤏᤏᤩᤠᤜ᤺ᤴ ᤛᤩᤧᤖᤥ॥