ᤕᤷᤔᤡᤕᤠ 27 - LIFOTNT

ᤕᤷᤔᤡᤕᤠ᤺ᤸᤗᤧ ᤁᤢᤓᤰᤋᤠᤱᤅᤥ ᤂᤧ᤺ᤵᤛᤡᤱ

¹ ᤕᤜᤢᤍᤠᤒᤠ ᤜᤠᤱ ᤕᤥᤛᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤛᤡᤍᤁᤡᤕᤠᤜ᤺ᤸᤗᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢᤒᤠ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ॥

² ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤛᤡᤱ ᤏᤢ ᤛᤡᤜᤥᤒ᤻ ᤀᤡᤍᤠ᤺ᤰᤜᤠ᤹ᤗᤠᤶᤒᤠ ᤗᤳᤇᤠ ᤂᤧ᤺ᤵᤛᤡᤱ ᤆᤥᤃᤧ᤹. ᤜᤧᤰᤁᤩᤠᤱ ᤁᤧᤛᤡᤳᤗᤠᤀᤥ ᤑᤳᤇᤧ᤹॥

³ ᤂᤧᤴ ᤀᤣᤃᤠᤱ ᤕᤖᤢᤛᤗᤧ᤺ᤶᤔᤥ ᤛᤡᤍᤁᤡᤕᤠᤜ ᤜᤠᤱᤅᤡᤸᤗᤧ ᤁᤢᤍᤢᤶᤛᤧ ᤁᤧᤍᤠᤒᤠ ᤀᤧᤍᤥᤔ. ᤔᤥᤀᤠᤒ. ᤀᤶᤔᤥᤏ. ᤋᤢᤖᤥᤛ ᤏᤢ ᤛᤡᤍᤥᤏᤒᤠ ᤜᤠᤱᤗᤠᤀᤡᤱᤒᤠᤜᤠ᤹ᤗᤠᤶ ᤂᤧᤴ ᤗᤠᤈᤣ᤹ᤜᤠ᤹ᤀᤥᤒᤠ ᤜᤠᤱᤜᤠ᤹ ᤗᤳᤇᤠ ᤀᤡᤱᤄᤱᤎᤡᤰ ᤔᤧᤳᤋᤧᤛᤧ᤹॥

⁴ ᤂᤧᤴ ᤜᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤍᤠᤱᤒᤠᤜᤠ᤹ᤖᤧ ᤗᤠᤃᤡ ᤁᤴ ᤀᤡᤱᤄᤱᤅᤡᤴ ᤐᤡᤖᤧᤛᤧ᤹ᤀᤠᤱ ᤀᤰᤂᤣ ᤔᤧᤳᤋᤧᤛᤧ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤂᤡᤏᤡ᤹ ᤍᤠᤱᤒᤠᤜᤠ᤹ ᤀᤰᤂᤣ ᤔᤧᤳᤋᤠᤶᤛᤡᤶᤔᤧ᤹—

⁵ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤧᤴ. ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤜᤧᤰᤁᤩᤠᤱ ᤌᤰᤛᤠᤐᤢᤛᤠᤜᤠ᤹ ᤀᤠᤱᤃᤠ᤹ᤀᤣ ᤐᤕᤶ ᤕᤶᤒᤠ ᤀᤠᤔᤢᤰᤛᤠᤶ ᤏᤢ ᤀᤠᤎᤢᤶᤔᤡᤸᤗᤧ ᤆᤥᤃᤢᤱᤛᤡᤱᤅᤠᤱ ᤘᤠ᤹. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤳᤋᤡᤴ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤱ ᤀᤠᤱᤃᤠ᤹ ᤂᤧᤴ ᤐᤡᤖᤢᤱ᤹॥

⁶ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤁᤢᤕᤢᤰᤁᤥ ᤁᤴ ᤁᤧᤖᤧᤰ ᤁᤧᤛᤢᤘᤠᤱᤜᤠ᤹ ᤀᤠᤱᤃᤠ᤹ᤀᤣ ᤌᤠᤛᤢᤱᤛᤡᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤋᤠᤶᤓᤢᤱᤅᤥᤒᤠ ᤌᤰᤛᤠᤜᤠ᤹ᤀᤠᤱ ᤂᤢᤏᤧ᤹ ᤁᤢᤕᤢᤰᤁᤥ ᤘᤠ᤹ ᤐᤠᤱᤛᤢᤱᤛᤡᤱᤅᤠᤱ ᤘᤠ᤹॥

⁷ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤧ᤹ ᤁᤢᤕᤠ᤺ᤶᤒᤰ ᤔᤧᤈᤥᤃᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤠ ᤕᤧᤶᤔᤡᤴ ᤔᤧᤴᤍᤠᤀᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤛ᤻ᤛᤠᤴ ᤏᤢ ᤁᤢᤶᤔᤧᤴᤇᤠ᤹ᤀᤡᤴ ᤕᤠ᤺ᤶᤒᤰ ᤔᤧᤈᤥᤃᤢ ᤔᤧᤒᤡᤖᤢᤛᤡ᤹॥ ᤂᤧᤴ ᤀᤣᤃᤠᤱ ᤕᤖᤡᤰ ᤛᤢᤘᤠᤱᤜᤠ᤹ ᤏᤢ ᤕᤶᤒᤕᤶᤒᤠ ᤜᤠᤱᤜᤠ᤹ᤖᤧ ᤒᤣᤒᤡᤗᤥᤏᤧᤴ ᤔᤧᤏᤠ᤺ᤴᤍᤢᤀᤠᤱ ᤂᤧᤵᤔᤥ ᤜᤠᤱᤕᤢᤰ ᤔᤧᤈᤥᤃᤢ᤹॥

⁸ ᤁᤖ ᤁᤢᤓᤠ ᤔᤧᤴᤇᤠᤶ ᤛᤢᤘᤠᤱ ᤀᤡᤃᤪ ᤜᤠᤱᤈᤢᤶᤔᤡᤸᤗᤧ ᤁᤢᤄᤧ᤺ᤵᤛᤡᤱᤅᤡᤴ ᤐᤱᤔᤠ ᤀᤡᤃᤪ ᤁᤢᤕᤢᤰᤁᤥ ᤘᤠ᤹ᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴᤏᤧᤓᤃᤪ ᤂᤧᤴ ᤏᤒᤢᤁᤍᤏᤣᤛᤖᤧᤸᤗᤧ ᤜᤍ᤹ ᤔᤧᤔᤧᤰᤂᤢᤴᤗ ᤌᤠᤖᤡᤰ ᤀᤠᤱᤃᤠ᤹ ᤂᤧᤴ ᤔᤧᤴᤇᤠᤶ ᤛᤢᤘᤠᤱᤅᤥ ᤌᤱ. ᤛᤠᤰᤘᤠᤴ ᤜᤧᤰᤁᤩᤠᤱ ᤔᤡᤱᤍᤣ᤹ ᤋᤠᤖᤢᤱᤅᤠᤱ ᤂᤢᤶᤍᤡᤱ ᤐᤡᤖᤢᤱ᤹. ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁹ “‘ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹. ᤂᤠᤃᤧᤀᤡᤰᤐᤠᤜᤠ᤹. ᤛᤧᤵᤔᤠᤱᤅᤡᤸᤗᤧ ᤁᤢᤒᤣ ᤁᤧᤜᤶᤒᤠᤜᤠ᤹. ᤁᤧᤛᤡᤒᤠ ᤔᤏᤠ᤺ᤸᤗᤧ ᤁᤢᤛᤠᤶ ᤔᤢᤖᤠ ᤁᤧᤔᤧᤵᤐᤠᤜᤠ᤹ ᤏᤢ ᤔᤡᤰᤗᤧ᤺ᤱᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠᤴ ᤔᤧᤄᤧᤵᤛᤧᤶᤔᤡᤴᤏᤧ᤹. ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. “ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤕᤢᤰᤁᤥ ᤂᤡᤏᤡ᤹ ᤘᤠ᤹ᤔᤠ ᤔᤧᤒᤥᤱᤏᤧᤴ॥”

¹⁰ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴᤜᤠ᤹ ᤁᤧᤶᤔᤧᤳᤋᤡᤖ ᤁᤧᤶᤒᤳᤇᤡ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤧᤰᤘᤠ ᤂᤡᤏᤡ᤹ ᤀᤠᤒᤠᤅᤣ ᤗᤠᤈᤣ᤹ᤗᤠᤶᤒᤠ ᤛᤠ᤹ᤖᤡᤰ ᤔᤠ᤺ᤱᤄᤠ ᤘᤣ᤹ ᤋᤧᤴᤏᤥ ᤁᤧᤶᤍᤣ᤹ᤖᤡ॥ ᤀᤠᤱᤃᤠ᤹ ᤂᤡᤏᤡ᤹ ᤏᤠ᤺ᤳᤏᤡᤱ ᤗ᤺ᤳᤏᤡᤱ ᤜᤧᤰᤁᤩᤠᤱ ᤂᤡᤏᤡ᤹ ᤂᤠᤵᤐᤢᤌᤩ᤺ᤱ ᤁᤧᤔᤧᤃᤡ᤹॥

¹¹ ᤁᤖ ᤀᤠᤳᤋᤡᤴ ᤛᤢᤘᤠᤱᤜᤠ᤹ᤖᤧ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤄᤧ᤺ᤵᤛᤡᤱᤅᤡᤴ ᤐᤱᤔᤠ ᤜᤧᤰᤁᤩᤠᤱ ᤁᤢᤕᤢᤰᤁᤥ ᤘᤠ᤹ᤔᤠ ᤏᤡᤱᤘᤠ᤹ ᤔᤧᤈᤥᤃᤢ᤹. ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤘᤠ᤹ᤔᤠ ᤏᤢ ᤀᤠᤒᤠᤅᤣ ᤗᤠᤈᤣᤴ ᤌᤥ᤺ᤱᤔᤠ ᤕᤠ᤺ᤴᤔᤔᤠᤀᤠᤱ ᤆᤠᤔᤠ ᤐᤡᤖᤢᤱᤛᤡᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹॥’”

¹² ᤀᤠᤱᤃᤠ᤹ ᤜᤠᤒᤠ ᤂᤧᤴ ᤐᤠ᤺ᤴᤏᤡᤴ ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤴ ᤔᤧᤳᤋᤢᤱ. “ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤄᤧ᤺ᤵᤛᤡᤱᤅᤡᤴ ᤐᤱᤔᤠ ᤀᤡᤃᤪ ᤂᤢᤏᤧ᤹ ᤁᤢᤕᤢᤰᤁᤥ ᤘᤠ᤹ᤔᤠ ᤋᤧᤴᤍᤧ᤹॥ ᤂᤢᤏᤧ᤹ ᤏᤢ ᤂᤧᤸᤗᤧ ᤁᤢᤔᤏᤠᤜᤠ᤹ᤖᤧ ᤗᤠᤃᤡ ᤕᤠ᤺ᤶᤒᤰ ᤆᤥᤃᤧ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤜᤡᤱ॥

¹³ ᤌᤣᤀᤠᤱ ᤂᤧᤏᤧ᤹ ᤏᤢ ᤁᤧᤔᤏᤠᤜᤠ᤹ ᤌᤱ. ᤛᤠᤰᤘᤠᤴ ᤀᤡᤃᤪ ᤔᤡᤱᤍᤣ᤹ᤗᤠᤶᤒᤠ ᤁᤧᤛᤩᤧ᤹ᤀᤡᤒᤠᤒᤣ᥅ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤕᤢᤰᤁᤥ ᤔᤧᤴᤘᤠ᤹ᤔᤏᤠ ᤛᤢᤘᤠᤱᤜᤠ᤹ ᤜᤧᤰᤋᤱᤒᤠ ᤔᤧᤒᤥᤱ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹॥

¹⁴ ᤂᤧᤸᤗᤧ ᤁᤢᤕᤢᤰᤁᤥ ᤘᤠ᤹ᤔᤠ ᤔᤧᤏᤢ᤹ᤏᤧᤴ ᤁᤧᤒᤠ᤺ᤵᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤀᤡᤱᤗᤧᤰᤐᤠ ᤛᤢᤈᤠᤜᤠ᤹ ᤁᤧᤶᤒᤡᤖᤡᤖ ᤁᤧᤶᤒᤳᤇᤡ॥

¹⁵ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤐᤠᤱᤄᤢᤛᤡᤒᤠ ᤔᤣ᤺ᤴ᥄ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤡᤱᤅᤥ ᤂᤡᤏᤡ᤹ᤏᤢ ᤀᤡᤱᤗᤧᤰᤐᤠ ᤐᤠᤴ ᤔᤧᤒᤠ᤺ᤳᤋᤢᤖ ᤔᤧᤒᤳ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤁᤴ ᤗᤠᤈᤣ᤺ᤴᤗᤠᤶ ᤏᤠ᤺ᤳᤏᤡᤱᤍᤧᤏᤡᤱ॥ ᤂᤡᤏᤡ᤹ ᤁᤧᤖᤧᤰ ᤁᤧᤛᤩᤧ᤹ᤀᤡ॥ ᤂᤡᤏᤡ᤹ ᤜᤧᤰᤁᤩᤠᤱ ᤁᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤖᤧᤰ ᤁᤧᤔᤧᤃᤡ᤹॥’”

¹⁶ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤏᤠᤜᤠ᤹ ᤔᤧᤳᤋᤢᤱᤛᤡᤱ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤔᤠᤱᤜᤡᤶᤔᤥᤒᤠ ᤕᤠᤱᤛᤠᤁᤢᤴᤎᤣᤴ ᤒᤣᤒᤡᤗᤥᤏᤗᤠᤶᤒᤠ ᤔᤧᤏᤢ᤺ᤰᤋᤢ ᤔᤧᤍᤠᤖᤢ᤹ ᤑᤠ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤀᤡᤱᤁᤧᤶᤗᤧᤰᤋᤡᤖ ᤔᤧᤒᤳ॥

¹⁷ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹॥ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤕᤢᤰᤁᤥ ᤘᤕᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤜᤡᤅᤡ᤹॥ ᤌᤣᤀᤠᤱ ᤁᤴ ᤕᤧᤰᤕᤰᤁᤡᤴ ᤔᤧᤰᤗ ᤕᤠ᤺ᤶᤔᤠᤒᤣ᥅

¹⁸ ᤂᤧᤱᤜᤠ᤹ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤀᤡᤱᤄᤱᤅᤡᤴ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤠ᤹ᤏᤧᤓᤃᤪ ᤔᤠᤱᤜᤡᤶ ᤏᤢ ᤜᤠᤱᤜᤡᤶᤔᤥ ᤁᤧᤏᤶᤒᤠ ᤕᤠᤱᤛᤠᤁᤢᤴᤎᤣᤴ ᤒᤣᤒᤡᤗᤥᤏ ᤕᤧᤰᤕᤰᤁᤥ ᤋᤣ᤹ᤔᤠ ᤔᤧᤒᤠᤱᤄᤧᤛᤧᤴᤏᤧ᤹ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤔᤧᤓᤠᤰᤋᤢᤖ॥

^19-20 “ᤌᤣᤀᤠᤱᤓᤧᤸᤗᤧ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤔᤧᤸᤗᤧ ᤁᤢᤛ᤻ᤛᤠ ᤕᤜᤥᤕᤠᤁᤡᤏᤧᤴ ᤜᤧᤰᤁᤩᤠᤱ ᤕᤜᤢᤍᤠ ᤏᤢ ᤕᤖᤢᤛᤗᤧᤔᤒᤠ ᤔᤡᤱᤛᤥᤍᤠᤱᤒᤠ ᤔᤏᤠᤜᤠ᤹ ᤒᤣᤒᤡᤗᤥᤏᤀᤥ ᤋᤧᤶᤛᤢᤛᤡᤀᤠᤱ ᤋᤣ᤹ᤖᤢᤛᤡᤸᤗᤧ ᤂᤢᤏᤧ᤹ ᤂᤧᤵᤔᤥᤒᤠ ᤛᤡᤳᤗᤠᤱᤜᤠ᤹. ᤐᤕᤶ ᤕᤶᤒᤠ ᤁᤠᤛᤠ ᤑᤛᤡᤜᤠ᤹. ᤐᤡᤳᤗᤠᤎᤠᤜᤠ᤹ ᤜᤧᤰᤁᤩᤠᤱ ᤔᤠᤱᤜᤡᤶᤔᤥᤒᤠ ᤘᤣ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤔᤧᤍᤣ᤹ᤖᤢᤴ॥

²¹ ᤕᤖᤢᤛᤗᤧᤔᤒᤠ ᤔᤠᤱᤜᤡᤶᤔᤥ ᤏᤢ ᤜᤠᤱᤜᤡᤶᤔᤥ ᤁᤧᤕᤢᤱᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤂᤧᤴ ᤂᤧᤵᤛᤧᤶᤔᤧ᤹॥

²² ‘ᤂᤧᤱᤜᤠ᤹ ᤁᤧᤖᤧᤰ ᤒᤣᤒᤡᤗᤥᤏᤀᤥ ᤔᤧᤍᤣ᤹ᤖᤢ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤠᤶᤔᤥ ᤂᤧᤴ ᤁᤢᤗᤠᤛᤧ ᤔᤏᤠ ᤔᤧᤶᤒᤠᤱᤛᤡᤱᤅᤣ ᤌᤠᤖᤡᤰ ᤀᤠᤶᤓᤠ ᤂᤧᤵᤔᤥᤀᤣ ᤕᤠ᤺ᤰ॥ ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤂᤧᤴ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤏᤢ᤺ᤰᤋᤢᤱ ᤑᤧᤳᤋᤢᤱ᤹ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥ ᤕᤠᤶᤔᤥ ᤕᤢᤰᤂᤢᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥’”