ᤕᤷᤔᤡᤕᤠ 26 - LIFOTNTᤕᤷᤔᤡᤕᤠᤴ ᤛᤧᤳᤋᤠᤛᤡᤃᤧ ᤔᤧᤔᤧᤳᤋᤢ 1 ᤕᤜᤢᤍᤠᤒᤠ ᤜᤠᤱ ᤕᤥᤛᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤕᤜᤥᤕᤠᤁᤡᤔᤧᤸᤗᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢᤒᤠ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ॥ 2 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤗᤰᤂᤢᤶᤔᤥ ᤕᤧᤒᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤏᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤜᤢᤍᤠᤀᤥᤒᤠ ᤕᤧᤰᤕᤰᤜᤠ᤹ᤗᤠᤶ ᤔᤠᤱᤜᤡᤶᤔᤥ ᤔᤠᤱᤛᤧᤘᤠ ᤆᤥ᤺ᤰᤛᤧ ᤁᤧᤍᤠᤒᤠ ᤔᤏᤠᤜᤠ᤹ ᤗᤳᤇᤠ ᤐᤠ᤺ᤴᤏᤠᤱ ᤔᤧᤴᤕᤠ᤺ᤰᤁᤣ ᤔᤧᤳᤋᤧᤛᤧ᤹॥ 3 ᤛᤧᤰᤂᤠ ᤔᤏᤠᤜᤠ᤹ᤖᤧ ᤂᤧᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤢᤴᤇᤡ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤔᤧᤗᤧᤖᤢᤒᤡ ᤜᤠᤃ॥ ᤜᤧᤰᤁᤣᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤠᤵᤑᤧ᤺ᤶᤒᤠ ᤛᤢᤳᤏᤠ᤺ᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤋᤠ᤺ᤵᤔᤠ ᤀᤡ᤺ᤳᤋᤢᤱᤅᤠᤱ ᤘᤕᤠᤱᤒᤠ ᤂᤧᤴ ᤔᤧᤰᤔᤠᤛᤡᤔᤧᤴ ᤂᤧᤳᤋᤢᤱ᤹॥ 4 “ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤔᤧᤳᤏᤡᤱᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤱᤄᤧᤵᤛᤢᤶᤔᤡᤴᤏᤠᤱ ᤁᤧᤴᤀᤡ᤺ᤳᤋᤢᤶ ᤁᤧᤴᤏᤠ᤺ᤳᤋᤢᤶᤔᤡᤴᤏᤧᤓᤃᤪ. 5 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ᤀᤥ ᤕᤧᤳᤗᤧᤱ ᤕᤧᤳᤗᤧᤱ ᤐᤠᤱᤄᤢᤱᤛᤡᤱᤒᤠ ᤀᤠᤛᤧᤘᤠᤖᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤔᤡᤴᤏᤧᤓᤃᤪ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤂᤡᤏᤡ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤴᤍᤧᤴᤍᤡᤴ॥ 6 ᤂᤧᤒᤩᤠᤱ ᤂᤡᤏᤡ᤹ ᤜᤧᤰᤋᤱᤒᤠ ᤁᤧᤈᤥᤃᤢᤶᤗ ᤁᤧᤘᤕᤡᤏᤧᤓᤃᤪ ᤀᤠᤱᤃᤠ᤹ ᤛᤡᤗᤥ᤺ᤴ ᤔᤧᤰᤂᤢᤱᤒᤠ ᤁᤢᤀᤡᤛᤡᤰ ᤁᤴ ᤔᤠᤱᤜᤡᤶᤔᤡᤴ ᤔᤧᤰᤂᤢᤱ ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤁᤴ ᤕᤧᤰᤕᤰᤁᤡᤴ ᤔᤠᤱᤍᤣ ᤛᤠᤱᤃᤪᤠ ᤌᤠᤔᤠᤗᤠᤶ ᤔᤧᤈᤥᤃᤢ᤹॥’” 7 ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤕᤷᤔᤡᤕᤠ᤺ᤸᤗᤧ ᤐᤠ᤺ᤳᤋᤢᤒᤠᤴ ᤔᤧᤄᤧᤵᤛᤢ॥ 8 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤷᤔᤡᤕᤠ᤺ᤸᤗᤧ ᤐᤠ᤺ᤳᤋᤢ ᤛᤢᤖᤢ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤧᤶᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤓᤡ᤺ᤰᤋᤧ. “ᤀᤠᤸᤗ ᤂᤧᤏᤧ᤹ ᤛᤧᤰᤂᤠᤀᤣ ᤁᤧᤛᤡ᤹᤺॥ 9 ᤁᤴ ᤔᤠᤱᤜᤡᤶᤔᤡᤴ ᤛᤡᤗᤥ᤺ᤴ ᤜᤧᤰᤁᤣ ᤐᤥᤱ᤹ ᤜᤧᤰᤁᤩᤠᤱ ᤁᤴ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤐᤥᤱ᤹ ᤂᤧᤶᤒᤩᤠᤱ ᤁᤵᤔᤥ ᤜᤠ᤺ᤳᤋᤠᤱ ᤔᤧᤕᤢᤱᤏᤧᤴ ᤑᤠ᤹ᤀᤠᤱ ᤂᤧᤏᤧ᤹ ᤌᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤳᤋᤢ᥅” ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤡᤷᤃᤵ ᤔᤧᤃᤒᤢ॥ 10 ᤜᤧᤰᤁᤣ᤺ᤸᤗᤧ ᤕᤜᤢᤍᤠᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢ. ᤂᤧᤒᤩᤠᤱ ᤂᤧᤱᤜᤠ᤹ ᤜᤠᤱᤜᤡᤶᤔᤥᤗᤠᤶᤒᤠ ᤔᤠᤱᤜᤡᤶᤔᤥ ᤔᤧᤍᤩᤧ ᤜᤧᤰᤁᤩᤠᤱ ᤁᤢᤛᤱ ᤔᤠ ᤋᤠ᤺ᤰᤜᤴ ᤔᤧᤵᤔᤏᤠᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤔᤧᤕᤢᤱᤛᤡᤱ॥ 11 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤧᤴ ᤗᤠᤶᤗᤥᤒᤠᤜᤠ᤹ ᤏᤢ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. “ᤁᤴ ᤔᤏᤠ᤺ᤸᤗᤧ ᤛᤡᤔᤧᤸᤗᤧ ᤂᤢᤶᤍᤡᤱ ᤂᤥᤔᤠ ᤐᤥᤱ᤹ ᤌᤣᤀᤠᤱᤓᤧᤸᤗᤧ ᤁᤸᤗᤧ ᤀᤠᤏᤡᤃᤣ ᤕᤧᤰᤕᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤢᤀᤠᤱ ᤘᤠ᤹॥ ᤂᤧᤸᤗᤧ ᤁᤢᤒᤠ᤺ᤴᤏᤡᤴ ᤂᤡᤏᤡ᤹ ᤀᤠᤒᤠᤅᤣ ᤏᤧᤰᤂᤥ᤹ᤒᤠᤸᤗᤧ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹॥” 12 ᤜᤧᤰᤁᤩᤠᤱ ᤕᤷᤔᤡᤕᤠ᤺ᤸᤗᤧ ᤁᤧᤖᤧᤰ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤁᤠᤰ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤠᤱᤜᤡᤶᤔᤡᤴ ᤏᤢ ᤁᤴ ᤕᤧᤰᤕᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤁᤧᤄᤧᤵᤛᤢᤶᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤐᤠᤱᤄᤠᤱᤒᤠ॥ 13 ᤀᤠᤸᤗ ᤂᤡᤏᤡ᤹ ᤀᤠᤒᤠᤅᤣ ᤜᤡᤱᤔᤴᤒᤠ ᤛᤢᤳᤏᤠ᤺ᤴ ᤏᤢ ᤕᤠ᤺ᤶᤒᤰᤜᤠ᤹ ᤋᤥ᤺ᤶᤔᤠᤀᤣ ᤐᤥᤱ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤣ ᤐᤥᤱ॥ ᤂᤧᤒᤩᤠᤱ ᤂᤡᤏᤡ᤹ ᤛᤶᤎᤠᤱ ᤋᤠ᤺ᤵᤔᤠ ᤀᤡ᤺ᤳᤋᤢᤒᤠ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠ ᤐᤠ᤺ᤴᤏᤥ ᤁᤢᤏᤡᤱᤘᤠ᤹ ᤏᤢ᤺ᤰᤋᤢ᤹ᤀᤡ॥ 14 ᤀᤠᤱᤃᤠ᤹ᤃ. ᤀᤠᤸᤗ ᤂᤡᤏᤡ᤹ ᤜᤢᤰᤁᤥᤀᤣ ᤘᤠ᤹ᤀᤠ॥ ᤂᤡᤏᤡ᤹ ᤌᤧᤔᤠ ᤆᤥ᤺ᤰᤔᤠ ᤏᤢᤒᤠ ᤏᤢ ᤁᤧᤗᤠ᤹ᤒᤠ ᤆᤥᤰ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶ. ᤜᤠᤒᤠ ᤂᤧᤴᤏᤣ ᤀᤠᤱᤃᤠ᤹ ᤀᤥᤔᤧᤳᤋᤧ᤹॥ 15 ᤁᤖ ᤂᤡᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤁᤧᤛᤧᤖᤡᤏᤧᤓᤃᤪ ᤂᤡᤏᤡ᤹ ᤏᤢ ᤁᤴ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤑᤥᤋᤩᤠ ᤔᤣ᤺ᤴᤏᤣᤒᤠ ᤗᤳᤇᤠ ᤔᤏᤠ ᤁᤧᤛᤧᤵᤐᤠ ᤁᤧᤒᤥ᤺ᤰᤂᤡ᤹ ᤁᤧᤗ᤹ᤒᤠ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤂᤧᤵᤛᤧᤶ ᤕᤢᤰᤂᤧᤶᤔᤧ᤹ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧᤀᤣ ᤂᤡᤏᤡ᤹ ᤁᤴ ᤛᤠᤶᤍᤡᤱᤅᤡᤴ ᤐᤡᤔᤠᤏᤡᤱ ᤑᤠ᤹ᤀᤠᤱ ᤀᤠᤱᤃᤠ᤹ ᤐᤠᤱᤄᤠᤱᤒᤠ॥” 16 ᤂᤧᤒᤩᤠᤱ ᤗᤠᤶᤗᤥᤒᤠᤜᤠ᤹ ᤏᤢ ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. “ᤁᤴ ᤔᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤒᤠᤖᤥ. ᤁᤴ ᤛᤡᤔᤧᤸᤗᤧ ᤂᤢᤶᤍᤡᤱ ᤐᤡᤔᤠ ᤔᤧᤏᤢ᤹ᤏᤧᤴ॥” 17 ᤂᤧᤴ ᤀᤣᤃᤠᤱ ᤁᤢᤓᤠ ᤋᤢᤶᤓᤠᤰᤛᤠᤜᤠ᤹ ᤔᤧᤒᤥᤃᤧᤀᤠᤱ ᤔᤧᤕᤧᤶᤛᤡᤱ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤈᤢᤶᤒᤠ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. 18 “ᤜᤡᤈᤁᤡᤕᤠᤴ ᤕᤜᤢᤍᤠᤒᤠ ᤜᤠᤱ ᤘᤕᤧᤸᤗᤧ ᤔᤥᤖᤣᤛᤣᤋᤗᤠᤶ ᤁᤧᤍᤠᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤡᤁᤠ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤁᤴ ᤁᤢᤒᤠ᤺ᤴᤈᤠᤰᤁᤡᤴ ᤀᤰᤂᤣ ᤔᤧᤳᤋᤢᤛᤡ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “‘ᤀᤡᤰᤋᤠᤵᤐᤡᤴ ᤁᤧᤰᤆᤢ ᤌᤥᤱᤔᤏᤠᤒᤠ ᤜᤧᤰᤁᤣ ᤛᤡᤕᤥᤏᤧᤴ ᤔᤧᤍᤥ᤺ᤰᤂᤢᤖᤥ. ᤕᤖᤢᤛᤗᤧ᤺ᤶᤔᤡᤴ ᤗᤢ᤺ᤴᤏᤠᤱ ᤗᤢᤱᤛᤡᤱᤜᤠ᤹ ᤗᤢᤶᤛᤡᤱᤗᤥ ᤜᤧᤰᤁᤩᤠᤱ ᤔᤠᤱᤜᤡᤶᤔᤥᤒᤠ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤋᤠᤶᤓᤢᤱ ᤐᤥ᤺ᤰᤗᤠ ᤁᤧᤒᤥᤒᤠ ᤁᤧᤎᤠᤱᤒᤠ ᤌᤢᤵᤌᤠ᤹ ᤁᤢᤀᤡᤛᤡᤰ ᤐᤥᤱᤗᤥ॥’ 19 “ᤜᤧᤰᤁᤣ᤺ᤸᤗᤧ ᤌᤣ ᤜᤡᤈᤁᤡᤕᤠ ᤜᤠᤱᤅᤡᤴ ᤏᤢ ᤕᤜᤢᤍᤠᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤔᤡᤁᤠᤴ ᤔᤧᤛᤧᤖᤢᤒᤡ᥅ ᤔᤧᤴᤇᤧᤖᤢᤴ. ᤂᤧᤸᤗᤧ ᤁᤢᤗᤧᤰᤘᤠᤃ ᤜᤡᤈᤁᤡᤕᤠᤴ ᤕᤜᤘᤣ ᤍᤠᤱᤒᤠᤴᤏᤢ ᤁᤡᤛᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤢᤱᤃᤢᤶ ᤂᤥᤔᤠ ᤋᤶᤛᤡᤱ ᤆᤥᤃᤢ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤋᤠᤖᤢᤱ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡᤒᤠ ᤔᤧᤰᤔᤠᤛᤡᤔᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤢᤏᤡᤱᤘᤠ᤹ ᤏᤢ᤺ᤰᤋᤢ॥ ᤁᤖ ᤀᤠᤸᤗᤥ ᤕᤶᤒᤠ ᤕᤧᤳᤋᤢᤰᤂᤣᤴ ᤀᤠᤒᤠᤅᤣ ᤀᤠᤏᤡ᤹ ᤛᤶᤎᤠᤱ ᤋᤠ᤺ᤵᤔᤠ ᤀᤠᤀᤡ᤺ᤳᤋᤢᤶᤔᤠᤱ ᤀᤠᤘᤠ᤹॥” 20 (ᤘᤣ᤹ ᤔᤏᤠ ᤌᤡᤰᤁᤠᤱ ᤂᤧᤵᤔᤥ ᤘᤕᤧ. ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤕᤷᤔᤡᤕᤠ᤺ᤸᤗᤧ ᤁᤢᤀᤡᤛᤡᤰ ᤁᤴ ᤕᤧᤰᤕᤰᤁᤡᤴ ᤏᤢ ᤔᤧᤴᤇᤠᤶ ᤛᤢᤘᤠᤱ ᤋᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤀᤠᤱ ᤘᤕᤧ॥ ᤂᤧᤴ ᤁᤡᤷᤕᤋ-ᤕᤠᤖᤡᤶᤔᤥ ᤁᤧᤕᤢᤱᤒᤠ ᤛᤔᤠᤕᤠᤜᤖᤧ ᤁᤢᤛ᤻ᤛᤠ ᤀᤢᤖᤡᤕᤠᤜ᤺ᤴ ᤘᤕᤧ॥ 21 ᤕᤜᤥᤕᤠᤁᤡᤔ ᤜᤠᤱᤅᤡᤴ ᤏᤢ ᤁᤢᤎᤰᤋᤢᤶᤒᤠᤜᤠ᤹ᤖᤧ ᤜᤧᤰᤁᤩᤠᤱ ᤘᤣ᤹ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤀᤢᤖᤡᤕᤠᤜᤖᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤂᤢᤏᤧ᤹ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢ॥ ᤂᤧᤴ ᤐᤠ᤺ᤴᤏᤡᤴ ᤀᤢᤖᤡᤕᤠᤜ᤺ᤸᤗᤧ ᤂᤧᤵᤛᤢᤀᤠᤱ ᤂᤢᤏᤧ᤹ ᤁᤡᤛᤧ ᤜᤧᤰᤁᤩᤠᤱ ᤂᤧᤳᤇᤡᤱᤅᤠᤱ ᤔᤡᤛᤪ ᤗᤠᤈᤣ᤹ ᤐᤣ॥ 22 ᤁᤖ ᤕᤜᤥᤕᤠᤁᤡᤔ ᤜᤠᤱᤅᤡᤸᤗᤧ ᤀᤢᤖᤡᤕᤠᤜ᤺ᤴ ᤏᤢ᤺ᤰᤔᤠ ᤑᤧᤵᤔᤠᤖᤧ ᤗᤠᤃᤡ ᤀᤰᤒᤥᤖᤧᤸᤗᤧ ᤁᤢᤛ᤻ᤛᤠ ᤀᤣᤸᤏᤠᤋᤠᤏᤧᤴ ᤏᤢ ᤘᤣ᤹ ᤁᤢᤓᤠ ᤔᤏᤠᤜᤠ᤹ ᤔᤡᤛᤪ ᤗᤠᤈᤣ᤹ ᤐᤠᤱᤄᤢᤛᤡ॥ 23 ᤂᤧᤱᤜᤠ᤹ᤖᤧ ᤀᤢᤖᤡᤕᤠᤜ᤺ᤴ ᤕᤜᤥᤕᤠᤁᤡᤔ ᤜᤠᤱᤅᤡᤸᤗᤥ ᤔᤧᤏᤢ᤺ᤰᤋᤢ ᤔᤧᤍᤠᤖᤢ॥ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤢᤏᤧ᤹ ᤋᤠᤓᤣ᤺ᤸᤗᤧ ᤛᤩᤧᤖᤢᤀᤠᤱ ᤂᤧᤸᤗᤧ ᤁᤢᤈᤧ᤺ᤴ ᤔᤧᤴᤈᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤅᤥ ᤗᤠᤵᤔᤧᤓᤢᤛᤢ॥) 24 ᤁᤖ ᤛᤠᤐᤠᤏᤧᤸᤗᤧ ᤁᤢᤛ᤻ᤛᤠ ᤀᤜᤡᤁᤠᤔᤧᤴᤏᤠᤱ ᤕᤷᤔᤡᤕᤠᤴ ᤗᤧᤰᤂᤠᤱ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤛᤧᤳᤇᤧ ᤜᤢᤰᤔᤧᤴᤇᤢ᤺ᤵᤋᤢᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.