ᤕᤷᤔᤡᤕᤠ 25 - LIFOTNT

ᤌᤠᤱᤃᤧᤳ ᤐᤡᤛᤠᤱᤗᤠᤶ ᤁᤧᤕᤢᤒᤠ ᤏᤡᤱᤔᤡᤜᤠ᤹

¹ ᤕᤥᤛᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤕᤜᤥᤕᤠᤁᤡᤔᤧᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧᤒᤠ ᤗᤡᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ॥

² ᤁᤸᤗᤧᤆᤥᤃᤢᤸᤗᤧ ᤕᤷᤔᤡᤕᤠ᤺ᤸᤗᤧ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤳᤋᤢᤛᤡ.

³ “ᤀᤠᤔᤥᤏᤖᤧ ᤁᤢᤛ᤻ᤛᤠ ᤕᤜᤢᤍᤠᤒᤠ ᤜᤠᤱ ᤕᤥᤛᤡᤕᤠᤜ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤠᤱᤎᤥ ᤀᤠᤀᤡᤴ ᤌᤠᤖᤡᤰ ᤁᤴ ᤏᤡᤒᤥᤱᤅᤠᤱ ᤛᤢᤶᤛᤡ ᤋᤱᤒᤣ ᤂᤠᤖᤠᤰ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤡᤱᤄᤱ ᤐᤡᤀᤠᤖ ᤘᤠ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤢᤏᤧ᤹ ᤂᤧᤴ ᤁᤢᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ ᤀᤧᤳᤗᤧᤱ ᤔᤧᤳᤏᤡᤱᤗ ᤘᤠ᤹ᤀᤠ॥ ᤁᤖ ᤂᤡᤏᤡ᤹ ᤌᤣᤀᤠᤱ ᤏᤡᤱᤘᤠ᤹ᤀᤣ ᤔᤧᤶᤒᤡᤀᤣ ᤁᤧᤘᤕᤡ॥”

⁴ “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤂᤡᤏᤡ᤹ᤀᤥ ᤐᤠᤱᤄᤢᤛᤡᤖᤀᤣ ᤘᤠ᤹. ᤜᤧᤰᤁᤣᤛᤠᤱ ᤂᤧᤴ ᤐᤠ᤺ᤴᤏᤥ ᤂᤡᤏᤡ᤹ ᤏᤧᤰᤂᤥ᤹ᤀᤡᤴ ᤀᤕᤠᤰ ᤁᤧᤶᤔᤧᤳᤋᤢᤶᤔᤡᤴ॥

⁵ ᤂᤧᤱᤜᤠ᤹ᤖᤧ ᤁᤧᤶᤔᤧᤳᤋᤡ᤹. ‘ᤂᤡᤏᤡ᤹ ᤀᤠᤒᤠᤅᤣ ᤜᤡᤱᤔᤴᤒᤠ ᤋᤠᤵᤑᤧ᤺ᤶᤒᤠ ᤛᤢᤳᤏᤠ ᤏᤢ ᤑᤧᤴᤕᤠ᤺ᤶᤒᤰᤜᤠ᤹ᤗᤠᤶ ᤏᤢ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤏᤢ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤁᤧᤒᤡᤖᤡᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤕᤢᤱᤔᤠ ᤁᤧᤄᤥᤛᤢᤶ᤹॥

⁶ ᤂᤡᤏᤡ᤹ ᤘᤣ᤹ ᤛᤠᤶᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤁᤧᤈᤥᤃᤢᤶᤛᤡᤶᤒᤠ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹ᤀᤠᤱ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥᤰᤂᤧᤶᤔᤡᤴᤏᤧ᤹॥ ᤂᤧᤒᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤌᤣᤀᤠᤱ ᤂᤢᤶᤍᤡᤱ ᤔᤧᤒᤡᤏᤡᤱᤅᤡᤴ᤹॥’”

⁷ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤁᤖ ᤂᤡᤏᤡ᤹ ᤀᤠᤒᤠ᤺ᤴᤏᤡᤴ ᤂᤧᤶᤔᤠ ᤁᤧᤴᤍᤧᤴᤍᤡᤴ. ᤂᤧᤸᤗᤧ ᤁᤢᤗᤧᤰᤘᤠ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤁᤧᤈᤥᤃᤢᤶᤒᤠ ᤏᤠᤘᤠᤀᤡᤳᤗᤠᤜᤠ᤹ᤗᤠᤶᤒᤠ ᤂᤡᤏᤡ᤹ ᤀᤠᤱᤃᤠ᤹ ᤀᤠᤛᤡᤰ ᤁᤧᤓᤥ᤺ᤰᤂᤢᤶ ᤜᤧᤰᤁᤩᤠᤱ ᤀᤠᤒᤠᤅᤣ ᤛᤶᤎᤠᤱ ᤂᤢᤶᤍᤡᤱ ᤁᤧᤍᤠᤖᤢᤶ॥

⁸ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹. ᤂᤡᤏᤡ᤹ ᤀᤠᤱᤃᤠ᤹ ᤀᤠᤒᤠ᤺ᤴᤈᤠ᤺ᤰᤁᤡᤴ ᤏᤢᤖᤡᤰ ᤁᤧᤱᤄᤧᤵᤛᤢᤶᤔᤡᤴᤒᤠᤸᤗᤧ ᤆᤥᤃᤢᤸᤗᤧ.

⁹ ᤌᤥ ᤐᤡᤛᤠᤱᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤒᤣᤒᤡᤗᤥᤏᤒᤠ ᤜᤠᤱ ᤀᤠᤛᤧᤘᤠᤖᤥᤒᤠ ᤏᤒᤢᤁᤍᤏᤣᤛᤖᤧᤸᤗᤧ ᤁᤢᤀᤢ᤺ᤳᤇᤧ ᤀᤠᤱᤃᤠ᤹ ᤐᤠᤱᤄᤢᤱᤛᤡᤱᤗ ᤐᤳᤋᤠ॥ ᤁᤴ ᤗᤠᤈᤣᤴ ᤏᤢ ᤁᤵᤔᤥᤒᤠ ᤕᤰᤕᤢᤱᤒᤠᤜᤠ᤹ ᤜᤧᤰᤁᤩᤠᤱ ᤜᤡᤶᤒᤣᤛᤠᤱᤒᤠ ᤘᤣ᤹ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤱᤜᤠ᤹ ᤋᤠᤖᤢᤛᤡᤱᤗ ᤐᤳᤋᤠ॥ ᤁᤴ ᤔᤧᤴᤇᤠᤶ ᤛᤢᤘᤠᤱᤅᤡᤴ ᤏᤢ ᤁᤸᤗᤧ ᤁᤢᤜᤡᤶᤒᤣᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤠᤱᤃᤠ᤹ ᤔᤧᤰᤂᤢᤱᤛᤡᤱ᤹ ᤜᤧᤰᤁᤩᤠᤱ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤛᤡᤱᤅᤠᤱ ᤗᤧᤖᤢᤱᤛᤡᤱ᤹. ᤂᤧᤴ ᤔᤧᤏᤡᤛᤢᤀᤠᤱ ᤂᤧᤵᤔᤥᤗᤠᤶᤒᤠ ᤗᤠᤱᤃᤧᤄᤣ᤺ᤰᤐᤠᤜᤠ᤹ ᤁᤧᤖᤧᤰ ᤆᤡᤈᤡᤱ ᤕᤱᤔᤠ ᤔᤧᤛᤡᤖᤥ. ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤆᤥᤃᤢᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹॥

¹⁰ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛ᤺ᤵᤔᤠ ᤏᤢ ᤕᤧᤕᤧᤗ᤹ᤔᤠ ᤀᤡᤰᤗᤠᤴ ᤜᤧᤰᤁᤩᤠᤱ ᤋᤧᤴᤎᤠᤶ ᤔᤣ᤺ᤰᤂᤡᤶᤒᤠ ᤛᤠᤓ᤺ᤱᤈᤠ᤺ᤸᤗᤧ ᤛᤡᤖᤠ᤹ᤌᤠᤱᤔᤠ ᤀᤡᤰᤗᤠᤴ ᤛᤠᤰᤋᤢᤱ ᤐᤡᤖᤢᤱᤛᤡᤱ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤣᤔᤡᤀᤥ ᤀᤥ᤺ᤳᤋᤡ ᤜᤥᤵ ᤜᤧᤰᤁᤩᤠᤱ ᤗᤢᤱᤛᤢᤶ ᤗᤠᤀᤡᤰᤐᤠᤴ ᤂᤧᤶᤔᤧᤍᤧᤳᤏᤧᤴ॥

¹¹ ᤁᤴ ᤁᤧᤖᤧᤰ ᤗᤠᤈᤣᤴ ᤆᤡᤈᤡ ᤂᤰᤂᤰ ᤏᤢ ᤔᤢᤖᤧᤰ ᤂᤠᤖᤧᤰ ᤐᤥᤱ᤹ ᤜᤧᤰᤁᤩᤠᤱ ᤁᤴ ᤛᤢᤘᤠᤱᤜᤠ᤹ᤖᤧ ᤏᤢᤒᤥᤱ ᤋᤱᤒᤣ ᤌᤠᤖᤡᤰ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤛᤧᤘᤠ ᤔᤧᤈᤥᤃᤢ॥

¹² “ᤂᤧᤴ ᤏᤢᤒᤥᤱ ᤋᤱᤒᤣ ᤀᤣᤃᤠᤱ ᤀᤠᤱᤃᤠ᤹ ᤒᤣᤒᤡᤗᤥᤏᤧᤴ ᤏᤢ ᤁᤢᤜᤠᤱᤅᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤗᤠᤃᤡ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ ᤀᤠᤱᤃᤠ᤹ ᤂᤧᤴ ᤗᤠᤈᤣᤴ ᤔᤧᤰᤂᤢᤱ ᤜᤧᤰᤁᤩᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤅᤠᤱ ᤗᤧᤖᤢᤱ ᤏᤧᤛ᤻ᤛᤢᤱ᤹॥

¹³ ᤀᤠᤱᤃᤠ᤹ ᤕᤷᤔᤡᤕᤠᤗᤠᤶᤒᤠ ᤐᤠ᤺ᤳᤋᤢᤱᤒᤠ ᤁᤧᤖᤧᤰ ᤕᤧᤳᤋᤢᤰᤂᤣᤜᤠ᤹. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤋᤠᤖᤢᤱ᤹ ᤑᤠ᤹ᤀᤠᤱ ᤁᤡᤒᤢ ᤗᤠᤶᤛᤢᤱᤛᤡᤱᤅᤠᤱ ᤘᤕᤠᤱ ᤀᤡᤃᤪ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤒᤠ ᤁᤧᤖᤧᤰ ᤕᤧᤳᤋᤢᤰᤂᤣᤜᤠ᤹ ᤒᤣᤒᤡᤗᤥᤏ ᤗᤠᤈᤣ᤹ ᤛᤶᤎᤠᤱ ᤋᤠᤖᤢᤱᤅᤠᤱ ᤀᤠᤱᤃᤠ᤹ ᤂᤧᤴ ᤂᤢᤶᤍᤡᤱ ᤐᤡᤖᤢᤱ᤹॥

¹⁴ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹ ᤜᤧᤰᤁᤩᤠᤱ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤕᤶᤒᤕᤶᤒᤠ ᤜᤠᤱᤜᤠ᤹ᤖᤧ ᤂᤧᤱᤜᤠ᤹ ᤕᤥᤰ ᤔᤧᤈᤥᤃᤢᤛᤡ᤹॥”

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤗᤧ ᤂᤥᤷᤕᤠ

¹⁵ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤸᤗᤧ ᤁᤧᤍᤡᤶᤒᤠ ᤗᤳᤇᤠ ᤂᤥᤷᤕᤠᤎᤡᤰ ᤁ᤹ᤕᤥ ᤘᤠ᤹॥ ᤀᤠᤱᤃᤠ᤹ ᤂᤧᤏᤧ᤹ ᤐᤠᤱᤏᤧᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤁᤴ ᤂᤥᤷᤕᤠᤴ ᤋᤣ᤹ᤖᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤎᤢᤅᤢᤖ ᤕᤠ᤺ᤴᤍᤧᤛᤧ᤹॥

¹⁶ ᤂᤧᤴ ᤂᤥᤷᤕᤠᤀᤥᤗᤠᤶᤒᤠ ᤔᤧᤎᤢᤅᤢᤸᤗᤧ ᤂᤧᤱᤜᤠ᤹ ᤆᤥᤏᤠ᤺ᤶ ᤆᤥᤏᤠ᤺ᤶ ᤔᤧᤗ᤹ᤀᤠᤱ ᤔᤧᤏᤠᤱ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤠᤱᤃᤠ᤹ ᤌᤱ ᤁᤧᤈᤥ᤺ᤰᤐᤠᤜᤠ᤹ ᤐᤠᤱᤄᤢᤱᤛᤡᤱᤗ ᤐᤳᤋᤠ॥”

¹⁷ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤥᤗᤠᤶᤒᤠ ᤂᤧᤴ ᤂᤥᤷᤕᤠᤴ ᤋᤠ᤺ᤰᤋᤢᤱ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤐᤠᤱᤄᤠᤱᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤂᤧᤴ ᤋᤣ᤹ᤖᤢᤱ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤂᤥᤷᤕᤠᤴ ᤔᤧᤎᤢᤅᤢᤖ ᤕᤠ᤺ᤴᤍᤢᤱᤛᤡᤱ॥

¹⁸ ᤂᤧᤴ ᤋᤧᤴᤜᤠ᤹ ᤆᤡᤈᤡ ᤂᤰᤂᤰ ᤏᤢ ᤀᤥᤔᤧᤵᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤜᤧᤰᤋᤱᤒᤠ ᤐᤥᤱᤗ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤅᤡᤴ ᤔᤧᤒᤠ᤺ᤳᤋᤢᤀᤠᤱ ᤔᤏᤠᤜᤠ᤹ᤖᤧ ᤛᤠᤰᤔᤢᤖᤠ ᤔᤠᤱᤍᤣ ᤔᤧᤔᤧᤳᤋᤢᤛᤡᤖ ᤑᤠ᤹ᤀᤠᤱ ᤕᤖᤢᤛᤗᤧᤔ ᤏᤢ ᤕᤜᤢᤍᤠᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹. ᤂᤧᤵᤔᤥᤒᤠ ᤜᤠᤱᤅᤡᤴ ᤏᤢ ᤗᤠᤶᤗᤥᤒᤠᤜᤠ᤹ ᤁᤧᤖᤧᤰ ᤂᤧᤴ ᤂᤥᤷᤕᤠᤀᤥᤗᤠᤶᤒᤠ ᤀᤠᤱᤃᤠ᤹ ᤌᤢᤱᤔᤠ ᤐᤠᤱᤄᤢᤱᤛᤡᤱ॥ ᤀᤠᤀᤡᤴ ᤌᤠᤖᤡᤰᤛᤠᤱ ᤔᤏᤠᤜᤠ᤹ᤖᤧ ᤜᤧᤰᤁᤣᤗ᤹ᤖᤡᤰᤁᤣ ᤛᤠᤰᤔᤢᤖᤠ ᤔᤧᤔᤧᤳᤋᤢᤛᤡ᤹॥

¹⁹ ᤂᤧᤴᤏᤢ᤺ᤸᤗᤧ ᤘᤣ᤹ ᤔᤡᤛᤪᤒᤠ ᤜᤠᤱ ᤑᤠᤖᤥ. ᤕᤢᤰᤛᤠᤒᤠᤜᤠ᤹ ᤏᤢ ᤗᤠᤶᤗᤥᤒᤠᤜᤠ᤹. ᤁᤧᤖᤧᤰ ᤔᤡᤛᤪᤡᤜᤠ᤹

²⁰ ᤜᤧᤰᤁᤩᤠᤱ ᤂᤧᤴ ᤗᤠᤈᤣ᤹ᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤘᤣ᤹ ᤗᤠᤈᤣ᤹ᤀᤥᤒᤠᤜᤠ᤹. ᤂᤧᤒᤩᤠᤱ ᤀᤢᤈ ᤗᤠᤈᤣ᤹ᤒᤠ ᤁᤧᤖᤧᤰ ᤜᤠᤱᤜᤠ᤹. ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹. (ᤀᤛ᤻ᤁᤗᤥᤏ. ᤃᤠᤈᤠ. ᤀᤣᤁᤪᤥᤏ ᤜᤧᤰᤁᤩᤠᤱ ᤁᤧᤖᤧᤰ ᤀᤛ᤻ᤍᤥᤍᤒᤠ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠᤜᤠ᤹)

²¹ ᤀᤧᤍᤥᤔ. ᤔᤥᤀᤠᤒ ᤏᤢ ᤀᤶᤔᤥᤏᤧᤴ.

²² ᤋᤢᤖᤥᤛ ᤏᤢ ᤛᤡᤍᤥᤏᤒᤠ ᤁᤧᤖᤧᤰ ᤜᤠᤱᤜᤠ᤹. ᤘᤖ᤺ᤱ ᤏᤠᤎᤠ᤺ᤶᤒᤡᤒᤠ ᤗᤠᤈᤣ᤹ᤜᤠ᤹ᤀᤥᤒᤠ ᤁᤧᤖᤧᤰ ᤜᤠᤱᤜᤠ᤹.

²³ ᤍᤍᤠᤏ. ᤋᤣᤔᤠ ᤏᤢ ᤒᤢᤈ. ᤜᤧᤰᤁᤩᤠᤱ ᤔᤠ᤺ᤱᤄᤠ ᤔᤠ᤺ᤱᤄᤠᤒᤠ ᤋᤧᤴᤜᤠ᤹ᤀᤥ ᤁᤧᤕᤢᤱᤒᤠ ᤁᤧᤖᤧᤰ.

²⁴ ᤀᤖᤒ ᤗᤠᤈᤣ᤹ᤒᤠ ᤁᤧᤖᤧᤰ ᤜᤠᤱᤜᤠ᤹ ᤏᤢ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤜᤠᤱᤜᤠ᤹.

²⁵ ᤈᤡᤔᤪᤡ. ᤀᤣᤗᤠᤔ ᤏᤢ ᤔᤠᤍᤡᤒᤠ ᤁᤧᤖᤧᤰ ᤜᤠᤱᤜᤠ᤹.

²⁶ ᤂᤧᤒᤩᤠᤱ ᤌᤠᤱᤃᤧᤳ ᤐᤡᤛᤠᤱᤒᤠ. ᤏᤡ᤺ᤳᤋᤠᤱ ᤏᤢ ᤔᤠ᤺ᤱᤄᤠ ᤁᤧᤕᤢᤱᤒᤠ ᤁᤧᤖᤧᤰ ᤜᤠᤱᤜᤠ᤹. ᤌᤡᤰᤌᤡᤰ ᤗ᤹ᤖᤡᤰ ᤀᤠᤒᤠᤅᤣ ᤏᤢ ᤁᤧᤖᤧᤰ ᤜᤠᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ ᤂᤧᤴ ᤂᤥᤷᤕᤠᤴ ᤔᤧᤎᤢᤅᤢᤖ ᤕᤠ᤺ᤴᤍᤢᤱᤛᤡᤱ॥ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧᤀᤠᤱ ᤀᤠᤛᤡᤰᤁᤡᤸᤗᤧ ᤁᤧᤍᤡᤶᤒᤠ ᤂᤧᤴ ᤂᤥᤷᤕᤠᤴ ᤌᤢᤅᤢ᤹॥

²⁷ ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤧᤛᤧ᤹ ᤔᤧᤳᤋᤠᤱ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤸᤗᤧ ᤁᤧᤍᤡᤶᤒᤠ ᤁᤴ ᤂᤥᤷᤕᤠᤴ ᤌᤢᤅᤧᤶᤔᤧ᤹. ᤔᤀᤠᤛᤡᤶᤔᤧ᤹ ᤜᤧᤰᤁᤩᤠᤱ ᤐᤧᤛᤧᤶᤔᤧ᤹॥ ᤜᤧᤰᤁᤩᤠᤱ ᤀᤠᤓᤧᤸᤗᤧᤀᤠᤱ ᤐᤥ᤺ᤰᤔᤠ ᤔᤧᤴᤇᤢᤰᤁᤣ ᤜᤠᤶᤒᤪᤡᤰ ᤆᤥ᤺ᤴᤍᤧᤶᤔᤧ᤹॥ ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤐᤠᤱᤄᤢᤱᤒᤠ ᤌᤱᤅᤡᤸᤗᤧ ᤆᤥᤃᤢᤸᤗᤧ ᤜᤧᤰᤁᤣ ᤐᤥᤱ᤹॥’

²⁸ ᤂᤧᤱᤜᤠ᤹ᤖᤧ ᤂᤧᤴ ᤂᤥᤷᤕᤠᤴ ᤁᤧᤜᤢᤰᤁᤥᤗᤠᤶᤒᤠ ᤋᤠ᤺ᤰᤔᤠᤀᤠᤱ ᤌᤢᤱᤔᤠ ᤔᤧᤴᤍᤧᤴᤏᤧᤴᤏᤧᤓᤃᤪ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹ ᤂᤡᤏᤡ᤹ ᤂᤧᤴ ᤁᤧᤎᤢᤅᤢᤶᤗᤀᤣ ᤐᤥᤱ॥

²⁹ ᤀᤠᤱᤃᤠ᤹ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤕᤧᤰᤕᤰᤁᤥ ᤜᤣ᤺ᤰᤋᤢᤱ᤹॥ ᤀᤠᤏᤡᤃᤣ ᤂᤢᤶᤍᤡᤱ ᤔᤧᤱᤄᤥᤀᤣ ᤔᤧᤗᤧᤖᤡᤃᤧ ᤑᤠ᤹ᤀᤠᤱ ᤌᤣ ᤂᤧᤱᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤡ᥅ ᤔᤣ᤺ᤴ. ᤂᤧᤱᤜᤠ᤹ᤖᤧ ᤂᤢᤶᤍᤡᤱ ᤔᤧᤄᤥᤛᤢᤖᤀᤣ ᤐᤥᤱ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤋᤧᤴᤎᤱ ᤐᤥᤱᤗ ᤆᤥᤃᤢᤱ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹॥’

³⁰ “ᤕᤷᤔᤡᤕᤠᤀᤣ. ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤖ ᤁᤧᤕᤠ᤺ᤴᤍᤢᤛᤡᤖ ᤐᤥᤱ᤹॥ ᤂᤧᤏᤧ᤹ ᤁᤴ ᤔᤏᤠᤜᤠ᤹ ᤀᤰᤂᤣ ᤔᤧᤵᤔᤠᤛᤡ ᤐᤥᤱᤗᤥ. “‘ᤕᤜᤘᤣ ᤍᤠᤱᤒᤠᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠ ᤜᤢ᤺ᤰᤗᤥ. ᤛᤠᤱᤃᤪᤠᤶᤐᤣᤍᤠᤱᤒᤠ ᤁᤧᤖᤧᤰᤏᤢ᤺ᤸᤗᤧ ᤌᤠ᤺ᤱᤎᤠᤰᤐᤠ ᤕᤢᤱᤏᤠᤍᤧᤴᤗᤠᤶᤒᤠ ᤂᤢᤏᤧ᤹ ᤁᤢᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤃᤡᤃᤡᤒᤠ ᤀᤡᤰᤗᤠ ᤗ᤺ᤳᤋᤢᤖᤥ. ᤂᤢᤏᤧ᤹ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤜᤢ᤺ᤰᤗᤥ. ᤆᤧᤸᤗᤧᤰᤛᤣ᤹ ᤁᤧᤍᤥ᤹ᤒᤠ ᤔᤏᤠ ᤁᤢᤀᤡᤛᤡᤰ ᤂᤢᤏᤧ᤹ ᤏᤧᤓᤠᤰᤘᤠ ᤑᤡᤱᤗ ᤀ᤺ᤰᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤀᤡᤰᤗᤠᤴ ᤔᤧᤄᤧᤵᤛᤢᤖᤥ॥

³¹ ᤂᤧᤴ ᤗᤥ᤺ᤰᤂᤢᤒᤠ ᤀᤡᤰᤗᤠᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤥ ᤌᤠᤖᤡᤰᤁᤣ ᤂᤧᤶᤍᤧᤳᤗᤥ॥ ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤴᤎᤡᤰᤋᤢᤛᤡᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤂᤠᤛᤧᤴ ᤗᤥ᤺ᤴᤍᤢᤖᤥ ᤂᤧᤒᤩᤠᤱ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ ᤂᤢᤏᤧ᤹ ᤋᤠᤓᤣ᤺ᤸᤗᤧ ᤛᤧᤖᤢᤛᤡᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥’”

³² ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤥᤔᤧᤳᤋᤧᤶᤔᤧ᤹. ᤕᤧᤳᤋᤢᤰᤂᤣᤴ ᤗᤳᤇᤠ ᤛᤢᤘᤠᤱᤗᤠᤶᤒᤠ ᤘᤣ᤹ᤛᤔᤠ ᤛᤢᤘᤠᤱ ᤌᤠᤖᤡᤰ ᤐᤥᤖ ᤐᤣ᤺ᤰᤗᤥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤘᤣ᤹ᤛᤔᤠ ᤁᤢᤕᤠᤀᤥ ᤁᤡᤵᤔᤠᤃᤧᤄᤢᤒᤠ ᤕᤶᤒᤠ ᤛᤢᤖᤡᤳ ᤁᤣᤈᤱᤎᤡᤰ ᤜᤢ᤺ᤰᤗ ᤐᤳᤗᤥ॥”

³³ ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤛᤩᤧᤖᤢᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤗᤳᤇᤠ ᤁᤢᤛᤢᤰᤐᤥᤗᤠᤶ ᤏᤠᤛᤔᤠ ᤁᤢᤕᤠᤀᤥ ᤌᤠᤖᤡᤰ ᤔᤧᤛᤧᤀᤠᤱ ᤔᤧᤏᤧᤖᤥ॥ ᤀᤠᤳᤋᤡᤴᤜᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤧᤖᤡᤱ ᤔᤧᤴᤎᤰᤏᤧᤴ. ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤔᤧᤶᤓᤢᤰᤂᤢᤛᤡᤴᤏᤠᤱ ᤔᤧᤴᤗᤢᤵᤋᤢᤛᤡᤴ॥ ᤂᤧᤴ ᤆᤣᤜᤠ᤹ ᤆᤡᤎᤢᤰ ᤗᤢᤶᤔᤏᤠᤒᤠ ᤜᤧᤰᤁᤣ ᤂᤠᤶᤔᤥ ᤀᤠᤶᤓᤠ ᤔᤧᤏᤧ ᤔᤧᤃᤴᤗᤥ॥

³⁴ ᤂᤡᤏᤡ᤹ ᤁᤢ᤹ᤀᤡᤃᤧᤓᤧᤶᤒᤠ ᤔᤧᤸᤗᤢᤰᤁᤶᤒᤠᤛᤣ. ᤂᤡᤏᤡ᤹ ᤕᤶᤒᤠ ᤀᤡᤰᤗᤠᤀᤥ ᤜᤠᤒᤧᤶᤔᤧ᤹ᤀᤥ॥ ᤔᤧᤖᤡᤱ ᤌᤰᤏᤢ ᤂᤠᤶᤜᤡ᤺ᤰᤁᤥ ᤜᤥ᤺ᤳᤋᤠᤛᤡᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤧᤵᤔᤠ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ᤖᤥ ᤏᤢᤒᤠ ᤂᤧ᤺ᤶᤒᤠᤴ ᤜᤏᤧ ᤕ᤺ᤵᤐᤠ ᤜᤧᤰᤁᤣ ᤑᤕ᤺ᤵᤑᤕ᤺ᤵ ᤁᤧᤕ᤺ᤵᤛᤡᤖᤥ॥

³⁵ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤀᤠᤳᤋᤡᤀᤠᤱ ᤂᤧᤳᤇᤡᤱᤔᤠ ᤗᤠᤶ ᤔᤧᤱᤄᤥᤛᤢᤴᤗᤥ. ᤔᤧᤸᤗᤢᤰ ᤗᤠᤶᤃᤧᤗᤥᤒᤠᤜᤠ᤹ᤖᤧ ᤀᤠᤳᤋᤡᤀᤠᤱ ᤆᤡᤱᤛᤡᤱᤔᤠᤍᤧᤴ ᤔᤧᤱᤄᤥᤛᤢᤴᤗᤥ॥

³⁶ ᤔᤧᤸᤗᤢᤰᤁᤶᤒᤠᤜᤠ᤹ ᤔᤧᤜᤠ᤺ᤵᤐᤠᤴ ᤂᤧᤵᤛᤧᤶᤔᤧ᤹ᤀᤥ. ᤔᤧᤸᤗᤢᤰ ᤗᤢᤵ ᤗᤠᤶᤃᤧᤗᤥᤒᤠᤜᤠ᤹ ᤔᤧᤖᤡᤱ ᤔᤧᤎᤰᤐᤧᤴ ᤂᤧᤵᤛᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤸᤗᤢᤰ ᤆᤠᤖᤠᤶᤔᤠᤍᤧᤴᤜᤠ᤹ ᤔᤧᤰᤂᤢᤖ ᤐᤳᤗᤥ॥

³⁷ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤸᤗᤧ ᤆᤥᤃᤢᤸᤗᤧ ᤂᤧᤏᤡ᤹ ᤐᤡᤳ ᤆᤠᤖᤠᤶᤔᤠ ᤆᤡᤈᤡ ᤕᤧᤶᤕᤧᤶᤒᤠᤍᤧᤴᤏᤡᤴ ᤂᤠᤵᤐᤢᤌᤩ᤺ᤱ ᤐᤥᤱᤗᤥ॥

³⁸ ᤌᤧᤖᤡᤱᤒᤧᤸᤗᤧ ᤁᤢᤕᤠᤰᤔᤠᤍᤧᤴ ᤗᤢᤱᤑᤢᤰᤁᤥᤴ ᤛᤠᤏᤠ᤺ᤵᤔᤠᤖᤧ ᤗᤠᤃᤡ ᤗᤧᤖᤢᤎᤖᤥ ᤜᤧᤰᤁᤣᤗ᤹ᤖᤡᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤗᤧᤖᤢᤛᤡᤀᤠᤱ ᤘᤠ᤹ᤖᤥ॥ ᤌᤱᤅᤥᤒᤠ ᤁᤡᤵᤔᤠᤃᤧᤄᤢᤒᤠ ᤋᤠᤓᤣ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤕᤱᤔᤠ ᤁᤧᤃᤧᤵᤐᤠ ᤁᤢᤛᤠᤰᤁᤧᤴᤏᤡᤸᤗᤧ ᤁᤴ ᤗᤠᤈᤣᤴ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤏᤧᤖᤥ॥