ᤕᤷᤔᤡᤕᤠ 24 - LIFOTNT

ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤐ᤺ᤳᤇᤣ᤹ᤜᤠ᤹

¹ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤔᤡᤸᤗᤧ ᤁᤢᤛ᤻ᤛᤠ ᤕᤜᤥᤕᤠᤁᤡᤏᤧᤴ ᤏᤢ ᤕᤜᤢᤍᤠᤒᤠ ᤗᤠᤶᤗᤥᤒᤠ. ᤆᤥᤒᤣᤃᤢᤜᤠ᤹ ᤜᤧᤰᤁᤩᤠᤱ ᤘᤣ᤹ ᤗᤢᤱᤃᤠᤶᤔᤠ ᤛᤡᤱᤃᤠᤶᤔᤠ ᤁᤧᤗᤧᤒᤠᤜᤠ᤹ ᤋᤧᤶᤛᤢᤛᤡᤀᤠᤱ ᤕᤖᤢᤛᤗᤧ᤺ᤶᤗᤠᤶᤒᤠ ᤒᤣᤒᤡᤗᤥᤏᤀᤥ ᤋᤣ᤹ᤖᤢᤛᤡ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤠᤱᤜᤡᤶᤔᤡᤸᤗᤧ ᤁᤢᤍᤃᤡ ᤁᤧᤕᤢᤱᤒᤠ ᤏ᤹ᤀᤡᤔᤠ ᤏᤧᤳᤇᤡ ᤐ᤺ᤳᤇᤣ᤹ᤜᤠ᤹ ᤛᤢᤑᤥᤀᤥ ᤀᤥᤛᤣ᤺ᤴᤎᤠᤰᤋᤠᤱ॥

² ᤌᤡᤰᤛᤡᤃᤣᤰᤐᤠ ᤏ᤹ᤀᤡᤔᤠᤀᤥ ᤜᤠᤖᤠᤀᤣ ᤁᤧᤍᤢᤶᤒᤠ ᤏᤢᤒᤠ ᤐ᤺ᤳᤇᤣ᤹ᤜᤠ᤹ ᤕᤠᤃᤧ ᤜᤧᤰᤁᤩᤠᤱ ᤏᤡᤛᤡᤃᤣ᤺ᤰᤐᤥ ᤋᤠᤵᤑᤧ᤺ᤶᤒᤠ. ᤆᤠᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤐ᤺ᤳᤇᤣ᤹ᤜᤠ᤹ ᤕᤠᤃᤧ॥

³ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤛᤣ᤺ᤴᤗᤠᤵᤋᤠᤱ. “ᤕᤷᤔᤡᤕᤠᤀᤣ. ᤂᤧᤏᤧ᤹ ᤌᤣ᤺ᤴ ᤁᤧᤏᤡᤛᤢᤖ ᤁᤧᤒᤳ᥅” ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱ. “ᤀᤠᤱᤃᤠ᤹ ᤐ᤺ᤳᤇᤣ᤹ᤜᤠ᤹ ᤏᤡᤛᤢᤱ. ᤏᤢᤒᤠᤜᤠ᤹ᤃ ᤛᤠ᤹ᤖᤡᤰᤁᤣ ᤏᤢᤒᤠ ᤆᤥᤰ ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠᤜᤠ᤹ᤃ ᤁᤧᤖᤧᤰ ᤋᤠᤵᤑᤧ᤺ᤶᤒᤠ ᤆᤥᤰ. ᤆᤠᤔᤠ ᤁᤧᤏᤢ᤹ᤒᤠ ᤔᤧᤈᤥᤰᤏᤧᤴ॥”

⁴ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ.

⁵ “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤱ᤹. ᤒᤣᤒᤡᤗᤥᤏᤀᤥ ᤔᤧᤍᤣ᤹ᤖᤢᤛᤡᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤁᤴ ᤏᤢᤒᤠ ᤐ᤺ᤳᤇᤣ᤹ᤜᤠ᤹ ᤜᤧᤰᤁᤣ ᤀᤥᤔᤧᤳᤋᤢᤱᤛᤡᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤏᤢᤖᤡᤰ ᤔᤧᤳᤋᤢᤱᤛᤡᤱ᤹॥

⁶ ᤀᤠᤱᤃᤠ᤹ ᤂᤧᤱᤜᤠ᤹ ᤁᤶᤒᤪᤠᤱ ᤔᤧᤳᤋᤢᤱᤛᤡᤱ ᤜᤧᤰᤁᤩᤠᤱ ᤁᤴ ᤗᤠᤈᤣ᤹ᤀᤥ ᤕᤠᤶᤔᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤆᤥᤃᤢᤱᤛᤡᤱ ᤁᤖ ᤔᤧᤕᤴᤇᤢᤱᤛᤡᤱᤅᤡᤴ॥ ᤀᤠᤱᤃᤠ᤹ ᤂᤧᤱᤜᤠ᤹ ᤗᤣ᤺ᤳᤋᤢᤱᤛᤡᤱ ᤁᤖ ᤔᤧᤀᤠ᤺ᤰᤂᤢᤱᤛᤡᤱᤅᤡᤴ॥

⁷ ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤐᤡᤖᤢᤱᤛᤡᤱ᤹॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤀᤠᤔᤏᤠ ᤔᤧᤒᤥᤱ ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠᤸᤗᤧ ᤀᤠᤱᤃᤠ᤹ ᤗᤧᤵᤔᤠᤱ ᤔᤧᤏᤢ᤺ᤱ᤹॥

⁸ “ᤁᤖ ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤴ. ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤜᤧᤰᤁᤩᤠᤱ ᤁᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤁᤧᤕᤠ᤺ᤰᤐᤠ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ ᤏᤢ ᤔᤡᤛᤪᤀᤥ ᤁᤧᤒᤣ᤺ᤰᤐᤠᤜᤠ᤹. ᤀᤠᤱᤃᤠ᤹ ᤂᤧᤴ ᤋᤠᤵᤑᤧ᤺ᤶᤒᤠ ᤆᤠᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤐ᤺ᤳᤇᤣ᤹ᤜᤠ᤹ ᤁᤢᤛᤡᤱ ᤀᤡ᤺ᤳᤋᤢᤱᤛᤡᤱᤅᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤋᤠᤵᤑᤧ᤺ᤸᤗᤡᤰ ᤔᤧᤳᤋᤢᤱᤛᤡᤱ᤹॥

⁹ ᤀᤠᤱᤃᤠ᤹ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤈᤢᤶᤜᤠ᤹ᤀᤥ ᤏᤠ᤺ᤳᤋᤢᤱᤍᤣᤛᤢᤱᤛᤡᤱ᤹. ᤂᤧᤵᤔᤥ ᤀᤠᤱᤃᤠ᤹ ᤂᤧᤱᤜᤠ᤹ ᤆᤡ᤺ᤵᤔᤠ ᤏᤢ ᤛᤠ᤺ᤵᤔᤠ ᤜᤧᤰᤁᤩᤠᤱ ᤀᤣ᤺ᤵᤔᤠ ᤏᤢ ᤔᤠᤱᤍᤣ ᤛᤠᤱᤃᤪᤠ ᤔᤧᤵᤔᤠ ᤆᤠᤜᤠᤰ ᤆᤥᤃᤢᤱᤛᤡᤱ᤹॥

¹⁰ ᤀᤠᤱᤃᤠ᤹ ᤂᤧᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤐᤡᤖᤢᤱᤛᤡᤱᤒᤠ ᤁᤴ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤂᤰᤐᤧᤳ ᤔᤧᤶᤔᤧᤰᤏᤧᤸᤗ ᤌᤠᤖᤡᤰ ᤀᤠᤱᤃᤠ᤹ ᤂᤧᤱᤜᤠ᤹ᤀᤥ ᤌᤱ. ᤛᤠᤰᤘᤠᤴ ᤏᤢ ᤔᤡᤴᤍᤣᤜᤠ᤹ ᤋᤠᤖᤢᤱᤗᤥ॥”