ᤕᤷᤔᤡᤕᤠ 23 - LIFOTNT

ᤁᤧᤍᤠᤒᤠ ᤕᤧᤶᤗᤧ ᤗᤠᤃᤡ ᤏᤡᤱᤛᤠᤱ

¹ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖ ᤐᤠ᤺ᤳᤋᤢ᤹. “ᤀᤠᤔᤧᤸᤗᤢᤰ ᤆᤠᤖᤠᤶᤍᤧᤴᤏᤥ ᤔᤧᤸᤗᤢᤰᤜᤠ᤹ ᤁᤧᤔᤧᤱᤒᤠ ᤏᤢ ᤑᤢᤳᤇᤡᤱᤈᤩᤠᤱ ᤁᤧᤈᤥ᤺ᤰᤐᤠ ᤔᤧᤸᤗᤢᤰᤁᤶᤒᤠᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧ᥄”

² ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ᤹. “ᤂᤡᤏᤡ᤹ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤁᤶᤒᤪᤠᤱ ᤁᤧᤶᤔᤧᤳᤋᤢᤶᤛᤡᤶᤔᤡᤴ. ᤂᤡᤏᤡ᤹ ᤂᤧᤱᤜᤠ᤹ ᤑᤢᤳᤇᤡᤱᤈᤩᤠᤱ ᤁᤧᤈᤥᤃᤢᤶᤛᤡᤶᤔᤠᤱ ᤐᤢᤒᤣᤗᤠᤵᤛᤠ ᤁᤧᤏᤠ᤺ᤳᤋᤢᤶᤛᤡᤶ॥ ᤀᤠᤸᤗ ᤂᤡᤏᤡ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ᤖᤧ ᤗᤠᤃᤡ ᤂᤡᤏᤡ᤹ ᤂᤢᤶᤍᤡᤱ ᤐᤡᤏᤡᤱ᤹॥

³ ᤀᤠᤱᤃᤠ᤹ ᤀᤠᤔᤧᤸᤗᤢᤰ ᤗᤢᤵᤜᤠ᤹ᤗᤠᤶ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤀᤠᤱᤃᤠ᤹ ᤂᤧᤱᤜᤠ᤹ ᤏᤠ᤺ᤳᤋᤢᤱᤍᤣᤛᤢᤱᤛᤡᤱᤒᤠ ᤗᤠᤈᤣ᤹ᤜᤠ᤹ᤗᤠᤶ ᤂᤧᤱᤜᤠ᤹ ᤛᤢᤵᤛᤢᤱ ᤋᤠᤖᤢᤱᤛᤡᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤒᤥᤴ ᤔᤧᤎᤧ᤹ᤖ ᤂᤧᤒᤩᤠᤱ ᤂᤧᤱᤜᤠ᤹ ᤕᤖᤡᤰ ᤔᤧᤒᤥᤱᤗ॥

⁴ ᤀᤠᤱᤃᤠ᤹ ᤁᤢᤛᤱ ᤔᤧᤸᤗᤢᤰᤁᤶᤒᤠᤜᤠ᤹ ᤂᤧᤱᤜᤠ᤹ ᤁᤶᤒᤪᤠᤱ ᤔᤧᤵᤔᤠ ᤕᤠ᤺ᤴᤍᤢᤱᤛᤡᤱ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤠᤸᤗᤀᤠᤱᤎᤥ ᤁᤡᤔᤠ ᤔᤧᤒᤥᤱᤏᤧᤴ ᤀᤡᤃᤪ ᤁᤡᤔᤠ ᤕᤱᤔᤠᤀᤥᤀᤠᤱ ᤌᤠᤔᤠ ᤔᤧᤒᤥᤱᤏᤧᤴ॥ ᤂᤧᤱᤜᤠ᤹ ᤕᤠᤶᤔᤥ ᤗᤳᤌᤡᤰᤁᤠᤱ ᤔᤧᤶᤔᤠᤏᤧᤴ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

⁵ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤰᤋᤱᤒᤠ ᤕᤧᤴᤜᤠ᤹ ᤋᤠᤖ ᤐᤳᤗᤥ. ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤗᤠᤶ ᤛᤠᤶᤕᤥᤒᤠ ᤁᤢᤒᤥᤖᤠᤰ ᤌᤡᤰ ᤗ᤺ᤴᤗ ᤕᤠ᤺ᤴᤍᤢᤱᤗᤥ॥ ᤂᤧᤴ ᤜᤠᤱ ᤐᤥᤱᤅᤠᤱ ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤜᤠᤱ ᤆᤥᤃᤢᤖᤥ ᤂᤧᤶᤒᤩᤠᤱ ᤗᤠᤈᤣ᤹ᤀᤥ ᤁᤢᤍᤥ᤺ᤵᤔᤠ ᤂᤠᤛᤧᤴ ᤏᤢ ᤁᤧᤘᤠ᤹ᤒᤠ ᤕᤠ᤺ᤶᤒᤰ ᤆᤥᤃᤢᤖᤥ.

⁶ ᤂᤧᤴ ᤜᤠᤱ ᤘᤠ᤹ᤀᤡᤸᤗᤧ ᤕᤜᤢᤍᤠᤒᤠ ᤔᤏᤠᤜᤠ᤹ ᤋᤠᤱᤔᤧᤛᤧ᤺ᤵᤗᤥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤌᤣᤀᤠᤱ ᤔᤧᤸᤗ᤹ᤀᤣ ᤔᤧᤕᤢᤱᤗᤥ॥ ᤂᤧᤸᤗᤧ ᤁᤢᤔᤡᤱ ‘ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤛᤠᤶᤕᤥᤒᤠ’ ᤐᤥᤱᤗᤥ॥

⁷ “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹. ᤂᤧᤸᤗᤧᤆᤥᤃᤢᤸᤗᤧ ᤀᤰᤋᤱᤒᤠ ᤕᤧᤴᤜᤠ᤹ ᤋᤠᤖ ᤐᤳ. ᤔᤏᤠᤜᤠ᤹ ᤔᤠᤱᤔᤧᤜᤧᤰᤛᤡᤱᤅᤡᤸᤗᤧ ᤀᤠᤑᤠᤸᤗᤧᤀᤠᤱ ᤀᤰᤂᤣ ᤔᤧᤶᤒᤠ᤺ᤳᤋᤢᤴ. ‘ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶᤒᤠ ᤁᤧᤗ᤺ᤵᤐᤠ ᤁᤧᤓᤧᤵᤐᤠ. ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ॥’

⁸ ᤁᤖ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤜᤠ᤹ ᤌᤠᤱᤃᤧᤳ ᤐᤡᤛᤠᤱᤒᤠ ᤗᤠᤈᤣ᤹ ᤏᤢ ᤘᤣ᤹ ᤁᤧᤖᤧᤰ ᤗᤠᤈᤣ᤹ᤜᤠ᤹ᤗᤠᤶ ᤀᤠᤳᤋᤠᤴ ᤀᤠᤳᤋᤠᤴ ᤂᤢᤏᤧ᤹ ᤂᤧᤱᤜᤠ᤹ ᤗ᤺ᤳᤋᤢᤍᤣᤛᤢᤛᤡᤀᤠᤱ ᤘᤕᤧ. ᤂᤧᤴ ᤁᤧᤖᤧᤰ ᤗᤠᤈᤣ᤹ᤗᤠᤶᤒᤠ ᤁᤧᤗ᤺ᤵᤐᤠ ᤁᤧᤍᤠ᤺ᤵᤐᤠ ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ॥’ ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤧᤕᤢᤱᤗᤥ॥”

ᤀᤡᤱᤗᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤂᤢᤶᤍᤡᤱᤅᤥ ᤔᤧᤎᤠ᤹᤺

⁹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤴ ᤀᤡᤱᤄᤱᤅᤡᤴ ᤘᤠ᤹ᤖᤥ— ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹ᤖᤥ ᤀᤠᤱᤃᤠ᤹ ᤁᤧᤖᤧᤰ ᤀᤠᤕᤧᤵᤐᤠᤜᤠ᤹ ᤕᤱᤗᤥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤂᤢᤏᤧ᤹ ᤛᤣᤛᤣ ᤁᤢᤒᤠ᤺ᤴᤈᤠᤰ ᤜᤠ᤹ᤖᤧ ᤆᤥᤃᤢᤸᤗᤧ ᤕᤖᤡᤰ ᤛᤣᤈᤱᤘᤠ᤺ᤸᤗᤧ ᤔᤕᤢᤒᤠ ᤗᤳᤌᤡᤰ ᤆᤥᤏᤠ᤺ᤶ ᤆᤥᤏᤠ᤺ᤶ ᤁᤧᤗ᤹ᤒᤠ ᤔᤏᤠ ᤜᤧᤰᤋᤱᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥

¹⁰ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤈᤣᤴ ᤔᤧᤎᤡᤶᤛᤢᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ ᤑᤧᤳᤗᤠ᤹ᤔᤠ ᤋᤠᤵᤑᤧ᤺ᤶᤒᤠ ᤜᤡᤱᤔᤴᤏᤥ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤰᤛᤠᤶᤔᤡᤴ ᤐᤡᤷᤒᤣ᤺ᤶᤒᤠ ᤗᤠᤶᤔᤥ ᤀᤥᤃᤵ ᤔᤧᤈᤥᤃᤢᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤔᤢᤖᤠ ᤔᤠᤱᤍᤣ᤺ᤸᤗᤧ ᤆᤥᤃᤢᤸᤗᤧ ᤗᤠᤈᤣᤴ ᤔᤧᤖᤡᤱ ᤌᤰᤗᤥ ᤜᤧᤰᤁᤩᤠᤱ ᤆᤠᤖᤠᤶᤔᤠᤍᤧᤴᤜᤠ᤹ᤀᤠᤱ ᤜᤣᤖᤧᤒᤣᤀᤠᤱ ᤏᤧᤖᤥ॥

¹¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤏᤧᤵᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤴᤀᤡ᤺ᤵᤔᤏᤠ ᤔᤧᤴᤏᤠ᤺ᤵᤔᤏᤠᤒᤠ ᤐᤥ᤺ᤰᤂᤧᤛᤡᤀᤠᤱ ᤘᤠ᤹ᤛᤡᤖᤥ. ᤀᤠᤜᤡᤶᤔᤥ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰ ᤆᤥᤃᤢᤛᤡᤖ ᤕᤠᤃᤧᤛᤡᤒᤠ ᤀᤠᤱᤃᤠ᤹ ᤋᤢᤔᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥

¹² ᤂᤧᤱᤜᤠ᤹ ᤗᤠᤱᤔᤧᤄᤣ᤺ᤰᤐᤠ ᤗᤠᤶᤔᤡᤴ ᤂᤠᤃᤧᤔᤠᤰᤐᤠ ᤏᤢ ᤀᤠᤗᤧ᤺ᤱᤗᤧ᤺ᤱᤒᤠ ᤐᤥᤱᤗᤥ॥ ᤂᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤅᤡᤴ ᤂᤛᤢᤀᤠᤱ ᤔᤧᤈᤥ᤺ᤴᤗ ᤕᤠ᤺ᤴᤍᤢᤛᤡᤖᤥ॥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤧᤳᤋᤢᤰᤂᤣ ᤋᤠᤖᤢᤱᤗᤥ॥ ᤂᤧᤱᤜᤠ᤹ᤖᤧ ᤂᤢᤶᤍᤡᤱ ᤂᤥᤔᤠ ᤕᤧᤶᤔᤡᤴ ᤋᤠᤖ ᤐᤳᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥

¹³ “ᤛᤠᤔᤖᤡᤕᤠᤀᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤗᤠᤕᤥᤴ ᤏᤡᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤱᤜᤠ᤹ᤖᤧ ᤒᤠᤗ ᤛᤠᤶᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤂᤠᤗᤥ᤺ᤶᤔᤠ ᤐᤠᤴ ᤔᤧᤒᤠ᤺ᤳᤋᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤀᤠᤔᤏᤠᤜᤠ᤹ ᤋᤠᤵᤑᤧ᤺ᤶᤒᤠ ᤗᤠᤶᤔᤥ ᤔᤧᤍᤥᤴᤍᤢᤛᤡᤖᤥ॥

¹⁴ ᤁᤖ ᤕᤖᤢᤛᤗᤧ᤺ᤶᤔᤥ ᤁᤧᤘᤠ᤹ᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤀᤠᤖᤛᤠᤱ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤒᤠ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤏᤢ ᤏᤢᤒᤠ ᤗᤧᤱᤛᤡᤱᤔᤠ. ᤑᤧᤴᤕᤠ᤺ᤶᤒᤰ ᤔᤧᤈᤥᤃᤢᤖᤥ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤁᤢᤓᤠ᤹ ᤔᤧᤒᤡᤖᤢᤛᤡᤖᤥ ᤂᤧᤸᤗᤧᤆᤥᤃᤢᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤴᤗᤧᤖᤢᤴᤗᤥ॥ ᤀᤠᤗᤠᤃᤡ ᤂᤧᤱᤜᤠ᤹ ᤁᤧᤖᤧᤰ ᤛᤍᤥᤔ ᤜᤧᤰᤋᤱᤒᤠ ᤏᤢ ᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ ᤃᤔᤥᤖᤠᤒᤠ ᤜᤧᤰᤁᤣ ᤋᤠᤰᤁᤧᤓᤧ᤹ᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥”

¹⁵ ᤂᤧᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤕᤖᤢᤛᤗᤧ᤺ᤶᤔᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤂᤧᤱᤜᤠ᤹ ᤆᤠᤔᤠᤖᤧ ᤗᤠᤃᤡ ᤛᤠᤰᤂᤡ᤺ᤰ ᤁᤧᤄᤡ᤺ᤰᤐᤠ ᤛᤢᤱᤄᤡ᤺ᤱᤒᤠᤴ ᤜᤧᤰᤁᤩᤠᤱ ᤌᤢᤱᤔᤠᤖᤧᤗᤠᤃᤡ ᤏᤡᤱᤅᤡᤴ ᤐᤡᤖᤢᤱᤛᤡᤱᤗᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤁᤧᤖᤧᤰ ᤗᤠᤈᤣᤴ ᤗᤠᤕᤥᤸᤗᤧ ᤌᤡᤶᤛᤢᤒᤠ ᤔᤧᤈᤥᤃᤢᤀᤠᤱ ᤏᤧᤖᤥ॥”

¹⁶ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖᤥ. “ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤡᤏᤡ᤹ ᤔᤧᤄᤧᤵᤛᤧᤶᤔᤡᤴᤏᤧ᤹ᤀᤥ. ᤂᤧᤱᤜᤠ᤹ᤖᤧ ᤂᤡᤏᤡ᤹ ᤀᤡᤱᤗᤧᤰ ᤏᤡᤱᤛᤠᤱ ᤆᤥ᤺ᤰᤔᤠ ᤁᤧᤶᤒᤠᤱᤄᤡᤖᤥ॥ ᤂᤧᤴ ᤐᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤔᤣ᤺ᤴᤗᤥ ᤁᤖ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤔᤢᤖᤠ ᤏᤢ ᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤶᤈᤧᤰᤋᤡᤖᤥ॥

¹⁷ ᤀᤠᤒᤠᤴ ᤂᤧᤶᤔᤠ ᤔᤧᤴᤍᤧᤶᤔᤏᤠᤒᤠᤜᤠ᤹ ᤂᤧᤱᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤀᤰᤂᤣ ᤔᤧᤔᤧᤳᤋᤢᤛᤡᤖᤥ. ‘ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹—ᤂᤡᤏᤡ᤹ ᤗᤠᤃᤡ ᤏᤢ᤹ᤔᤠᤍᤠᤔᤠ ᤛᤏᤠᤖᤢᤱ ᤐᤥᤱᤗᤥ᥄’ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤀᤠᤎᤡᤱᤃᤠᤏᤡ ᤜᤠᤍᤡᤱ ᤁᤧᤎᤰᤐᤠᤜᤠ᤹ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢᤛᤡᤖᤥ. ‘ᤂᤡᤏᤡ᤹ ᤛᤶᤎᤠᤱ ᤌᤧᤔᤠ ᤋᤢᤰᤂᤣ ᤗᤠᤰᤂᤣᤀᤠᤱ ᤔᤧᤍᤠᤏᤧᤴᤗᤥ॥’

¹⁸ “ᤁᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤈᤢᤶᤗᤢᤱᤅᤥ ᤐᤠᤴ ᤂᤧᤶᤛᤧ ᤜᤠ᤺ᤳᤇᤡᤀᤠᤱ ᤀᤠᤓᤧᤸᤗᤧᤀᤠᤱ ᤀᤠᤱᤃᤠ᤹ᤀᤥ ᤔᤧᤴᤍᤠᤀᤣ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤳᤋᤡᤸᤗᤧᤀᤠᤱ ᤀᤠᤒᤠ᤺ᤴᤈᤠ᤺ᤰᤁᤡᤴ ᤔᤧᤱᤄᤧᤶᤔᤣ ᤘᤠ᤹ᤖᤥ ᤀᤡᤃᤪ ᤂᤧᤵᤔᤥ ᤏᤢᤖᤡᤰᤁᤠᤱ ᤏᤡᤱᤘᤠ᤹ ᤔᤧᤶᤒᤡᤀᤣ ᤘᤠ᤹ᤖᤥ॥

¹⁹ “ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤛᤠᤰᤁᤧᤴᤏᤡᤸᤗᤧ ᤛᤢᤖᤡᤳ ᤁᤣᤈᤱ ᤐᤥ᤺ᤰᤗᤥ. ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤁᤥ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤘᤜᤡᤳ ᤛᤠᤶᤔᤡ᤺ᤳ ᤆᤢᤰᤗᤥ॥

²⁰ ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤔᤧᤴᤃᤧᤳᤋᤣ ᤌᤠᤖᤡᤰ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤛᤠᤰᤁᤧᤴᤏᤡᤴ ᤔᤧᤈᤡ᤺ᤰᤋᤢᤴᤗᤥ॥ ᤁᤧᤍᤠᤒᤠ ᤕᤧᤴᤜᤠ᤹ᤀᤥ ᤂᤡᤏᤡ᤹ ᤀᤠᤔᤏᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥”

²¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤁᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤶᤒᤠᤱᤒᤠᤛᤡᤖᤥ ᤁᤖᤛᤠᤱ ᤂᤧᤱᤜᤠ᤹ ᤀᤠᤒᤠ᤺ᤴᤈᤠᤰ ᤐᤠ᤺ᤳᤇᤧ ᤔᤧᤗᤥ᤺ᤰᤋᤧᤀᤠᤱ ᤔᤧᤒᤣᤖᤥ॥ ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤌᤧᤔᤠ ᤐᤠ᤺ᤴᤏᤠᤱ ᤔᤧᤶᤒᤠ᤺ᤵᤐᤠᤖᤥ. ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤀᤠᤔᤡᤱᤅᤥ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖᤥ॥

²² ᤁᤖ ᤂᤧᤱᤜᤠ᤹ᤖᤧ ᤀᤠᤈᤢᤶᤗᤢᤱᤅᤥᤒᤠ ᤐᤠ᤺ᤴᤏᤡᤴ ᤔᤧᤗᤧᤛᤢᤀᤠᤱ ᤘᤕᤧᤸᤗᤧᤃ ᤀᤠᤒᤠ᤺ᤴᤈᤠ᤺ᤰᤁᤡᤴ ᤂᤧᤱᤜᤠ᤹ᤖᤧ ᤀᤠᤔᤏᤠᤜᤠ᤹ ᤂᤧᤶᤔᤠ ᤔᤧᤒᤠᤱᤄᤢᤛᤡᤒᤠ ᤘᤕᤧᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤠᤵᤑᤧ᤺ᤶᤒᤠ ᤕᤧᤵᤗᤧᤰ ᤏᤢ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤔᤧᤏᤢ᤺ᤰᤋᤢᤛᤡᤒᤠ ᤘᤕᤧᤖᤥ॥

²³ ᤀᤠᤱᤃᤠ᤹ᤃ ᤗᤳᤌᤡᤰ ᤋᤧᤴᤏᤥᤖᤰ ᤔᤣ᤺ᤴᤗᤥ ᤁᤖ ᤀᤠᤳᤋᤡᤛᤠᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥

²⁴ ᤀᤠᤳᤋᤡᤴ ᤔᤏᤠᤴ ᤏᤡᤔᤧᤴᤍᤧᤵᤔᤏᤠᤒᤠᤍᤧᤴᤏᤥ ᤆᤡᤱᤛᤡᤱᤔᤠ ᤛᤢᤰᤁᤠᤱ ᤀᤠᤱᤃᤠ᤹ ᤏᤡᤔᤠ ᤔᤧᤛᤢᤰᤁᤠᤴᤒᤧ᥅ ᤀᤠᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤛᤠᤱ ᤘᤠ᤹ᤀᤠ ᤑᤠ᤹ᤀᤠᤱ ᤌᤣ ᤂᤡᤏᤡ᤹ ᤁᤧᤴᤏᤡᤛᤢᤶᤔᤡᤴᤒᤡ᥅ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥

²⁵ “ᤁᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤒᤠᤴ ᤂᤧᤵᤛᤢᤱᤅᤠᤱ ᤘᤠ᤹ ‘ᤀᤠᤴᤍᤣᤴ ᤛᤧᤴᤍᤡᤰ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤛᤧᤵᤔᤠᤱᤎᤡᤰ ᤔᤠᤰᤋᤢᤶᤒᤧᤀᤠᤱ ᤘᤠ᤹᥄ ᤛᤧᤵᤔᤠᤱᤎᤡᤰ ᤔᤠᤰᤋᤢᤶᤒᤧᤀᤠᤱ ᤘᤠ᤹᥄’ ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤔᤡᤱᤅᤥ ᤀᤡᤱᤗᤧᤰ ᤐᤠ᤺ᤵᤔᤠᤖᤧ ᤗᤠᤃᤡ ᤔᤧᤒᤣ᤺ᤰᤗᤥ॥

²⁶ ᤀᤠᤸᤗ ᤀᤠᤵᤑᤠᤸᤗᤧ ᤌᤠᤖᤡᤰ ᤁᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤠᤒᤠᤅᤣ ᤔᤧᤒᤠ᤺ᤳᤋᤢᤒᤠ ᤀᤡᤔᤠᤱᤒᤠ ᤐᤠ᤺ᤴᤜᤠ᤹ᤖᤧ ᤀᤠᤔᤏᤠᤜᤠ᤹ ᤋᤠᤵᤑᤧ᤺ᤶᤒᤠ ᤗᤠᤶᤔᤥ ᤔᤧᤍᤣ᤹ᤖᤢᤛᤡᤒᤠᤒᤣ᥅

²⁷ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤒᤠᤗ ᤛᤠᤶᤔᤠᤱ ᤗᤧᤵᤔᤠᤱ ᤔᤧᤗᤠᤛᤧᤀᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤠᤱᤒᤠ ᤜᤧᤰᤁᤣ ᤁᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤈᤥᤃᤢᤒᤠ ᤀᤠᤒᤠᤅᤣ ᤛᤧᤵᤔᤠᤱᤒᤠ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤓᤣ᤺ᤴᤏᤠ ᤁᤧᤗ᤹ᤒᤠ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥

²⁸ “ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤛᤧᤵᤔᤠᤱ ᤔᤠᤰᤋᤢᤀᤠᤱ ᤘᤠ᤹ᤏᤧᤓᤃᤪ ᤂᤧᤸᤗᤧ ᤛᤧᤵᤔᤠᤱᤒᤠ ᤐᤠ᤺ᤴᤗᤰ ᤐᤠ᤺ᤳᤋᤢᤖᤖᤥ ᤁᤖ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧ ᤀᤠᤒᤠ᤺ᤴᤈᤠ᤺ᤰᤁᤡᤴ ᤂᤧᤵᤛᤢᤀᤠᤱ ᤘᤠ᤹ᤏᤧᤓᤃᤪ ᤂᤧᤸᤗᤧ ᤀᤠᤒᤠ᤺ᤴᤈᤠ᤺ᤰᤁᤡᤴ ᤏᤛᤠ᤺ᤴᤛᤠᤒᤠ ᤐᤥᤱᤅᤠᤱ ᤐᤠ᤺ᤳᤋᤢᤖᤖᤥ॥ ᤛᤡ᤺ᤴᤏᤢ ᤛᤡᤗᤠᤱᤅᤡᤴ ᤋᤱᤔᤠ ᤛᤢᤰᤋᤧᤳᤐᤡ᥅

²⁹ ᤀᤠᤒᤠ᤺ᤴᤈᤠ᤺ᤰᤁᤡᤴ ᤔᤡ ᤜᤧᤰᤁᤣ ᤗ᤹ᤖᤥ. ᤐᤕᤶ ᤕᤶᤒᤠ ᤗᤢᤱᤅᤡᤴ ᤑᤕ᤺ᤵᤑᤕ᤺ᤵ ᤁᤧᤕ᤺ᤶᤒᤠ ᤗᤳᤇᤠ ᤕᤶᤒᤠ ᤌᤘᤠ ᤜᤧᤰᤋᤱᤒᤠ ᤆᤥᤰᤗᤥ॥

³⁰ “ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤘᤠ᤹ᤀᤠ. ᤂᤧᤱᤜᤠ᤹ ᤀᤠᤒᤠᤅᤣ ᤂᤢᤏᤡ᤹ ᤗᤢᤶᤔᤥ ᤀᤡᤱᤗᤧᤰᤐᤠ ᤐᤠ᤺ᤴᤜᤠ᤹ ᤔᤧᤄᤢ᤺ᤳᤇᤡᤱ ᤔᤧᤒᤡᤛᤡᤱ ᤜᤧᤰᤁᤩᤠᤱ ᤀᤠᤒᤠ᤺ᤴᤈᤠ᤺ᤰᤁᤡᤴ ᤂᤧᤵᤛᤧ᤹ ᤑᤠ᤹ᤀᤠᤱ ᤂᤧᤴ ᤀᤡᤱᤓᤥ ᤔᤧᤈᤥᤃᤢ॥

³¹ ᤀᤠᤱᤃᤠ᤹ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥᤀᤠᤱ ᤘᤠ᤹ᤀᤠ. ᤀᤠᤳᤋᤡᤴᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤐᤠ᤺ᤴᤈᤠ᤺ᤰᤁᤡᤴᤏᤠᤱ ᤀᤠᤱᤃᤠ᤹ ᤀᤠᤒᤠ᤺ᤴᤈᤠᤰ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹

³² ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤌᤧᤔᤠ ᤐᤠ᤺ᤳᤋᤢᤱ᤹. ᤂᤧᤵᤛᤧᤶᤔᤧ᤹᥄ ᤀᤠᤱᤃᤠ᤹ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤘᤠ᤹ᤀᤠ. ᤀᤠᤳᤋᤡᤴᤜᤠ᤹ᤖᤧ ᤀᤡᤱᤗᤧᤰ ᤐᤠᤴ ᤀᤡᤛᤣ᤺ᤱᤒᤠ ᤂᤢᤴᤇᤡ᤹ ᤛᤧᤵᤔᤠᤱᤜᤠ᤹ ᤔᤧᤈᤧᤰᤂᤢ ᤔᤧᤒᤠ᤺ᤳᤋᤢ᤹॥ ᤂᤧᤱᤜᤠ᤹ᤖᤧ ᤂᤧᤴ ᤛᤧᤵᤔᤠᤱᤜᤠ᤹ ᤔᤧᤒᤠ᤺ᤳᤋᤢᤀᤠᤱ ᤀᤠᤔᤏᤠᤜᤠ᤹ ᤂᤢᤴᤇᤡ᤹ ᤀᤡᤱᤗᤧᤰ ᤏᤢ ᤀᤠᤱᤍᤡᤱ ᤗ᤹ᤔᤠ ᤐᤠ᤺ᤴᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤧᤏᤠᤰᤗ ᤔᤧᤕᤠ᤺ᤴᤍᤢᤛᤡ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤐᤠᤱᤄᤢᤱᤛᤡᤱᤒᤠ ᤔᤣ᤺ᤴ. ᤐᤣᤃᤧᤶᤔᤧ᤹ ᤔᤧᤳᤋᤢᤱᤛᤡᤱᤒᤠ ᤔᤣ᤺ᤴ ᤂᤧᤒᤩᤠᤱ ᤂᤧᤱᤜᤠ᤹ᤗᤠᤶᤒᤠ ᤀᤠᤔᤏᤠᤜᤠ᤹ᤖᤧ ᤌᤣᤀᤠᤱ ᤁᤢᤓᤠ᤹ ᤔᤧᤱᤄᤥᤛᤢᤴ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

ᤕᤜᤘᤣ ᤍᤠᤱᤒᤧᤸᤗᤧ ᤁᤧᤗᤡ᤺ᤵᤐᤠ ᤁᤢᤃᤰ

³³ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤕᤷᤔᤡᤕᤠᤀᤣ. ᤀᤠᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤁᤢᤓᤠᤖᤧ ᤀᤡᤃᤪ ᤁᤢᤓᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤏᤧ᤹ ‘ᤕᤜᤘᤣ ᤍᤠᤱᤒᤧᤸᤗᤧ ᤌᤧᤔᤠ ᤁᤧᤗᤡ᤺ᤵᤐᤠ ᤁᤰ ᤁᤧᤃᤢ᤺ᤳᤋᤧᤀᤠᤱ ᤘᤠ᤹᥅’ ᤗ᤹ᤖᤡᤰ ᤛᤧ᤺ᤴᤃᤧᤶᤗᤠᤵᤏᤧᤓᤃᤪ ᤂᤧᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤂᤡᤏᤡ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤗᤡ᤺ᤵᤐᤠ ᤁᤢᤃᤰᤏᤡᤱ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤏᤠ᤹ᤖᤡ॥’

³⁴ “‘ᤕᤜᤘᤣ ᤍᤠᤱᤒᤧᤸᤗᤧ ᤁᤧᤗᤡ᤺ᤵᤐᤠ ᤁᤢᤃᤰ’ ᤁᤧᤒᤠ᤺ᤵᤐᤠ ᤁᤢᤓᤠ ᤔᤏᤠ ᤀᤡᤃᤪ ᤁᤢᤓᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤁᤧᤖᤧᤰ ᤀᤠᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥

³⁵ ᤁᤖ ᤂᤧᤸᤗᤧ ᤁᤢᤗᤧᤰᤘᤠ ‘ᤕᤜᤘᤣ ᤍᤠᤱᤒᤧᤸᤗᤧ ᤌᤣ ᤏᤢᤃᤵ ᤐᤡᤖᤢᤛᤡᤒᤣ᥅ ᤕᤜᤘᤣ ᤍᤠᤱᤒᤧᤸᤗᤧ ᤌᤣ ᤐᤠ᤺ᤳᤋᤢ᥅’ ᤁᤧᤖᤧᤰᤗᤧ ᤀᤠᤒᤠᤅᤣ ᤋᤣ᤺ᤱᤈᤢᤶᤜᤠ᤹ ᤏᤢ ᤑᤢ᤹ᤏᤢᤛᤠ᤹ᤜᤠ᤹ ᤛᤣ᤺ᤴᤔᤧᤍᤥᤛᤢᤛᤡᤖ॥

³⁶ ᤁᤖ ᤂᤧᤱᤜᤠ᤹ᤖᤧ ‘ᤕᤜᤘᤣ ᤍᤠᤱᤒᤧᤸᤗᤧ ᤁᤧᤗᤡ᤺ᤵᤐᤠ ᤁᤢᤃᤰ’ ᤑᤠ᤹ᤀᤠᤱ ᤐᤣᤗᤡᤃᤧᤴ ᤐᤠ᤺ᤴᤈᤠ᤺ᤴ ᤀᤠᤵᤑᤠᤸᤗᤧᤀᤠᤱ ᤀᤥᤃᤠᤵ ᤔᤧᤴᤈᤥᤃᤢᤴᤗ ᤌᤣᤀᤠᤱᤓᤧᤸᤗᤧ ᤁᤢᤓᤠᤖᤧ ᤂᤧᤴ ᤜᤧᤰᤁᤣ ᤔᤧᤈᤥᤃᤢᤏᤧᤓᤃᤪ ᤀᤠᤱᤃᤠ᤹ ᤀᤠᤀᤡᤱᤄᤱᤅᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤧᤰᤂᤠᤀᤣ ᤁᤧᤗᤡ᤺ᤵᤐᤠ ᤁᤰ ᤐᤥᤱ᤹॥ ᤔᤏᤠᤜᤠ᤹ᤖᤧ ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤔᤧᤀᤡᤃᤢᤀᤠᤱ ᤘᤠ᤹॥

³⁷ “ᤕᤷᤔᤡᤕᤠᤀᤣ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤴ ᤐᤠ᤺ᤴᤏᤡᤴ ᤛᤧ᤺ᤴᤗᤠᤵᤋᤧᤛᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤌᤣ ᤏᤢᤃᤵ ᤁᤧᤒᤡᤖᤡ᥅ ᤕᤜᤘᤣ ᤍᤠᤱᤒᤧᤸᤗᤧ ᤌᤣ ᤐᤠ᤺ᤳᤋᤢ᥅’

³⁸ ᤁᤖ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. ‘ᤁᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤗᤡ᤺ᤵᤐᤠ ᤁᤢᤃᤰᤗᤥ᥄’ ᤂᤧᤒᤩᤠᤱ ᤂᤧᤏᤧ᤹ ᤀᤰᤂᤣ ᤁᤧᤔᤧᤳᤋᤢᤛᤡᤖ ᤐᤥᤱ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴ ᤔᤧᤒᤠ᤺ᤳᤋᤧᤶᤔᤡᤴᤏᤧ᤹ ᤔᤧᤳᤏᤡᤱᤛᤠᤱ “ᤕᤜᤘᤣ ᤍᤠᤱᤒᤧᤸᤗᤧ ᤁᤧᤗᤡ᤺ᤵᤐᤠ ᤁᤢᤃᤰ” ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤒᤠ᤺ᤳᤋᤢᤶ.

³⁹ ᤀᤠᤱᤃᤠ᤹ ᤛᤧᤰᤂᤠᤀᤣ ᤂᤧᤏᤡ᤹ ᤏᤡᤱᤘᤠ᤹ ᤑᤣ᤺ᤴᤏᤡᤱ᤹ ᤜᤧᤰᤁᤩᤠᤱ ᤂᤧᤏᤡ᤹ ᤏᤢ ᤂᤧᤏᤡ᤹ ᤐᤠᤎᤧᤒᤠᤜᤠ᤹ ᤐᤡᤏᤡᤱᤒᤠ ᤕᤧᤰᤕᤰᤁᤡᤴᤏᤢ ᤛᤥᤛᤥᤖᤡᤰ ᤂᤧᤏᤡ᤹ ᤂᤶᤏᤡᤱᤅᤠᤱ ᤀᤠᤱᤃᤠ᤹ᤀᤥᤗᤠᤶ ᤔᤠ᤺ᤱᤄᤠ ᤗᤠᤵᤑᤢᤏᤡᤱ᤹॥

⁴⁰ ᤀᤠᤱᤃᤠ᤹ ᤂᤧᤱᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤏᤢ᤺ᤶᤔᤠ ᤏᤢ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ᤑᤣ᤺ᤶᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤛᤡᤖᤡᤱᤔᤔᤥ ᤌᤠᤛᤢᤱᤛᤡᤱᤗᤥ॥’”