ᤕᤷᤔᤡᤕᤠ 22 - LIFOTNTᤕᤷᤔᤡᤕᤠ᤺ᤸᤗᤧ ᤕᤜᤢᤍᤠᤒᤠ ᤜᤠᤱᤜᤠ᤹ ᤀᤡᤱᤄᤱ ᤜᤠᤰᤋᤢᤛᤡ 1 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤕᤜᤢᤍᤠᤒᤠ ᤜᤠᤱᤜᤡᤶᤔᤥ ᤐᤣᤃᤧ᤹ᤀᤠᤱ ᤀᤰᤂᤣ ᤐᤠ᤺ᤳᤋᤧ᤹. 2 ‘ᤍᤠᤀᤢᤍᤖᤧ ᤁᤢᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤕᤜᤢᤍᤠᤒᤠ ᤜᤠᤱᤅᤣ. ᤂᤧᤏᤧ᤹ ᤁᤧᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤁᤴ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤛᤡᤃᤠᤱ ᤁᤧᤗᤠ᤺ᤵᤐᤠ ᤔᤏᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹॥ 3 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤶᤔᤠ ᤏᤢ ᤁᤧᤗᤠ᤹ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤡᤱᤈᤠᤱ ᤐᤡᤏᤡᤱᤗ ᤐᤳᤋᤠ॥ ᤔᤧᤏᤠᤵᤋᤢᤛᤡᤒᤠᤜᤠ᤹ ᤁᤧᤄᤢᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶᤒᤠ ᤛᤧ᤺ᤵᤋᤧᤶᤛᤡᤶᤔᤧ᤹॥ ᤘᤣ᤹ ᤗᤠᤈᤣ᤹ᤒᤠ ᤔᤧᤴᤇᤠᤶ ᤛᤢᤘᤠᤱ. ᤕᤧᤳᤇᤠᤒᤠᤛᤠᤜᤠ᤹ ᤜᤧᤰᤁᤩᤠᤱ ᤔᤣᤔᤣᤍᤢᤔᤠᤜᤠ᤹ ᤋᤠᤵᤑᤧ᤺ᤸᤗᤡᤰ ᤏᤢ ᤔᤧᤴᤘᤠ᤹ᤔᤏᤠ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹॥ ᤁᤴ ᤛᤣᤛᤣᤒᤠᤍᤧᤴᤏᤥ ᤑᤥᤋᤩᤠ ᤔᤧ᤺ᤴᤏᤣᤒᤠᤜᤠ᤹ ᤔᤧᤛᤧᤖᤧᤶᤛᤡᤶᤔᤡᤴᤏᤧ᤹॥ 4 ᤂᤡᤏᤡ᤹ ᤛᤧᤰᤂᤠᤀᤣ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤜᤧᤰᤁᤣ ᤁᤧᤈᤥᤃᤢᤶᤏᤧᤓᤃᤪ ᤍᤠᤀᤢᤍᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤜᤠᤱ ᤔᤧᤒᤥᤱᤅᤠᤱ ᤔᤧᤘᤠ᤹॥ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤏᤢ ᤀᤴᤗᤠ ᤂᤧᤒᤩᤠᤱ ᤀᤴᤜᤠ᤹ ᤔᤧᤕᤢᤰᤋᤢᤛᤡᤀᤠᤱ ᤁᤴ ᤜᤠᤱᤜᤡᤶᤔᤥᤒᤠ ᤔᤠ ᤗᤠᤶᤎᤣ᤺ᤵᤐᤥᤗᤠᤶ ᤕᤠᤱᤏᤠ ᤁᤳᤏᤠ ᤔᤧᤗ᤹ᤀᤠᤱ ᤔᤧᤘᤠ᤹॥ 5 ᤁᤖ ᤂᤡᤏᤡ᤹ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤂᤧᤶᤔᤠ ᤁᤧᤴᤍᤧᤴᤍᤡᤴᤏᤧᤓᤃᤪ ᤁᤴ ᤜᤠᤱᤜᤡᤶᤔᤡᤴ ᤂᤠᤵᤐᤢᤌᤩ᤺ᤱ ᤐᤥᤱ ᤑᤠ᤹ᤀᤠᤱ ᤀᤠᤔᤡᤱᤅᤥ ᤔᤠᤱᤜᤧᤰᤛᤡᤅᤠᤀᤠᤱ ᤐᤠ᤺ᤳᤋᤢᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥’” ᤜᤠᤱᤜᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤄᤱ 6 ᤌᤣᤀᤠᤱᤓᤧᤸᤗᤧ ᤕᤜᤢᤍᤠᤒᤠ ᤜᤠᤱᤜᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤃᤡᤗᤠᤍ ᤗᤠᤈᤣ᤹ ᤏᤢ ᤗᤧᤒᤏᤠᤏᤒᤠ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤜᤧᤰᤁᤣ ᤕᤜᤢᤍᤠᤒᤠ ᤜᤠᤱᤜᤡᤶᤔᤡᤴ ᤐᤏᤢᤏᤢᤒᤠ ᤁᤧᤈᤥ᤺ᤰᤗᤥ॥ ᤁᤖ ᤁᤧᤗᤢᤱᤎᤠᤰ ᤛᤡᤃᤠᤱ ᤂᤧᤏᤧ᤹ ᤆᤡᤈᤡ ᤂᤰᤂᤰ ᤏᤢ ᤔᤏᤠ ᤁᤧᤜᤥ᤺ᤵᤐᤠᤍᤧᤴ ᤆᤥ᤺ᤰᤏᤧᤖᤥ॥ 7 ᤀᤠᤱᤃᤠ᤹ ᤂᤧᤴ ᤂᤠᤵᤐᤢᤌᤩ᤺ᤱ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤐᤠᤱᤄᤢᤱᤛᤡᤱᤗ ᤐᤳᤋᤠᤖᤥ॥ ᤂᤧᤱᤜᤠ᤹ ᤁᤧᤖᤧᤰ ᤋ᤺ᤴᤍᤡ᤹ᤏᤢ ᤔᤧᤍᤠᤖᤥ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤏᤢᤒᤠ ᤛᤠᤶᤔᤠᤱᤛᤡᤱ ᤛᤡᤳᤗᤠᤱᤜᤠ᤹ ᤔᤧᤀᤠ᤺ᤳᤋᤢ ᤔᤧᤛᤥ᤺ᤴᤍᤢᤀᤠᤱ ᤔᤡᤀᤥ ᤗᤠᤵᤔᤧᤓᤢᤛᤢ ᤔᤧᤃᤣ᤺ᤳᤋᤢᤖᤥ॥ 8 “ᤋᤠ᤺ᤴᤍᤡ ᤘᤣ᤹ ᤗᤠᤈᤣ᤹ᤒᤠ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤴ ᤕᤧᤰᤕᤰᤗᤠᤶᤒᤠ ᤔᤧᤒᤥᤱᤅᤠᤱ ᤔᤧᤒᤣ᤺ᤰ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤣ᤺ᤴᤔᤧᤍᤥᤛᤡᤱ᤹. ‘ᤌᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤕᤶᤒᤠ ᤕᤧᤰᤕᤰᤁᤡᤴ ᤀᤰᤂᤣᤗ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤳᤋᤢᤒᤠᤒᤣ᥅’ 9 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤢᤛᤡ᤹. ‘ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤧᤈᤥᤃᤢᤒᤠ ᤔᤠᤱᤜᤢᤵᤐᤡᤴ ᤔᤧᤏᤠ᤹ᤖᤢᤀᤠᤱ ᤘᤣ᤹ ᤛᤠᤶᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥’” ᤕᤜᤥᤀᤠᤜᤠᤈᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤄᤱ 10 ᤕᤜᤢᤍᤠᤒᤠ ᤕᤰᤕᤢᤱᤒᤠᤛᤣ. ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤔᤧᤜᤠᤒᤧᤶᤔᤡᤴᤏᤧ᤹ᤀᤥ ᤜᤧᤰᤁᤩᤠᤱ ᤂᤧᤴ ᤛᤡ᤺ᤸᤗᤧ ᤔᤧᤖᤡᤱ ᤔᤧᤎᤰᤋᤧᤶᤔᤡᤴᤏᤧ᤹ᤀᤥ॥ ᤁᤖ ᤂᤧᤸᤗᤧ ᤁᤢᤛ᤻ᤛᤠ ᤕᤜᤥᤀᤠᤜᤠᤈᤖᤧ ᤁᤢᤗᤠᤃᤡ ᤀᤢ᤺ᤰᤁᤠᤱ ᤀᤢ᤺ᤰ ᤜᤠᤒᤧᤶᤔᤧ᤹ᤀᤥ॥ ᤂᤧᤴ ᤔᤧᤍᤧᤶᤛᤢᤀᤠᤱ ᤔᤧᤍᤣ᤹ᤖᤢᤖᤥ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤏᤢ᤺ᤱᤏᤧᤴ ᤔᤧᤍᤠᤏᤧᤴᤗᤥ॥ ᤂᤧᤸᤗᤧ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤂᤢᤏᤧ᤹ ᤛᤠᤘᤠ᤺ᤴᤇᤡᤱᤒᤠ ᤗᤠᤈᤣᤴ ᤏᤡᤔᤠ ᤔᤧᤄᤥᤛᤢᤴᤗᤥ॥ 11 ᤌᤣᤀᤠᤱᤓᤧᤸᤗᤧ ᤁᤢᤶᤒᤠᤖᤧ ᤁᤢᤀᤣᤃᤠᤱ ᤕᤜᤢᤍᤠᤀᤥ ᤜᤠᤱ ᤁᤧᤒᤥᤱᤒᤠ ᤕᤥᤛᤡᤕᤠᤜᤖᤧ ᤁᤢᤛ᤻ᤛᤠ ᤕᤜᤥᤀᤠᤜᤠᤈᤖᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤂᤧᤴ ᤁᤴ ᤋᤧᤴᤏᤥᤗᤠᤶᤒᤠ ᤐᤣᤀᤠᤱ ᤘᤠ᤹. “ᤀᤠᤵᤑᤠᤸᤗᤧᤀᤠᤱ ᤁ᤹ᤕᤥ ᤔᤧᤏᤢ᤺ᤱᤏᤧᤴ ᤔᤧᤍᤠᤏᤧᤴ॥ 12 ᤁᤖ ᤂᤧᤱᤜᤠ᤹ᤖᤧ ᤀᤠᤳᤋᤡᤴ ᤗᤠᤈᤣ᤹ᤀᤥ ᤂᤧᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤀᤠᤱ ᤘᤠ᤹. ᤂᤧᤵᤔᤥ ᤂᤧᤴ ᤛᤡ᤹᤺ ᤂᤧᤒᤩᤠᤱ ᤂᤧᤸᤗᤧ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤴ ᤗᤠᤈᤣᤴ ᤏᤡᤔᤠ ᤔᤧᤄᤥᤛᤢᤴᤗᤥ॥” ᤕᤜᤥᤕᤠᤁᤡᤔᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤄᤱ 13 “ᤆᤡ᤺ᤳᤋᤧ ᤛᤩᤧ ᤕᤜᤥᤕᤠᤁᤡᤔᤧᤴ ᤂᤠᤵᤐᤢᤌᤩ᤺ᤱ ᤐᤥᤱᤗᤥ. ᤂᤧᤸᤗᤧ ᤔᤧᤴᤘᤠ᤹ᤔᤏᤠᤒᤠ ᤆᤥᤃᤢᤀᤠᤱ ᤁᤢᤜᤡᤶᤔᤡᤴ ᤆᤥᤃᤢᤖᤥ ᤜᤧᤰᤁᤩᤠᤱ ᤑᤧᤴ ᤕᤠ᤺ᤶᤒᤰ ᤆᤥᤃᤢᤀᤠᤱ ᤁᤢᤜᤡᤶᤔᤡᤴ ᤌᤠ᤺ᤱ ᤆᤰᤋᤢᤖ ᤋᤣ᤹ᤖᤢᤖᤥ. ᤏᤠᤶᤕᤠᤰ ᤔᤧᤶᤒᤡᤛᤣ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ ᤁᤢᤕᤠ᤺ᤶᤒᤰᤁᤥ ᤑᤳᤇᤢᤛᤡᤖᤥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤶᤕᤠᤰᤁᤡᤴ ᤔᤧᤒᤡᤖᤢᤴᤛᤡᤴᤗᤥ॥” 14 ᤂᤧᤴ ᤔᤏᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤗᤠᤃᤡ ᤗᤳᤇᤠ ᤕᤶᤒᤠ ᤜᤡᤶ ᤆᤥᤃᤢᤱᤗᤥ ᤁᤢᤍᤠ᤺ᤳᤗᤠᤀᤥ ᤕᤶᤒᤕᤶᤒᤠ ᤕᤠᤰᤑᤠᤱ ᤁᤧᤏᤧᤒᤠ ᤜᤡᤶ ᤆᤥᤃᤢᤱᤗᤥ॥ ᤂᤧᤸᤗᤧ ᤁᤢᤜᤡᤶᤔᤥ ᤕᤶᤒᤠ ᤐᤣᤎᤠ᤺ᤵᤜᤠ᤹ ᤑᤳᤇᤢᤀᤠᤱ ᤜᤧᤰᤔᤏᤠᤒᤠ ᤛᤠᤶᤔᤠᤱᤛᤡᤱᤜᤠ᤹ ᤌᤧᤰᤋᤢᤖᤥ. ᤜᤧᤰᤁᤩᤠᤱ ᤂᤧᤴ ᤐᤣᤎᤠ᤺ᤵᤜᤠ᤹ ᤜᤧ᤺ᤳᤋᤠᤱᤒᤠ ᤆᤠ᤺ᤴᤍᤢᤖᤥ॥ 15 ᤘᤣ᤹ᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ᤏᤢ᤺ᤸᤗᤧ ᤏᤢᤒᤠ ᤛᤠᤶᤔᤠᤱᤛᤡᤱᤅᤡᤸᤗᤧ ᤜᤡᤶ ᤁᤧᤈᤥᤛᤠᤱ ᤁᤖ ᤂᤧᤸᤗᤧ ᤂᤧᤏᤧ᤹ ᤏᤢᤒᤠ ᤜᤠᤱ ᤁᤧᤶᤒᤥᤱᤏᤧᤴᤗᤥ ᤂᤧᤏᤧ᤹ ᤁᤧᤶᤒᤠ ᤁᤢᤜᤡᤱᤜᤡᤱ ᤁᤢᤏᤡᤱᤘᤠ᤹ ᤋᤩᤧᤀᤠᤱ ᤘᤕᤧᤖᤥ. ᤂᤢᤏᤧ᤹ ᤀᤠᤓᤧᤸᤗᤧᤛᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤏᤢ ᤁᤧᤘᤠ᤹ᤒᤠ ᤕᤠ᤺ᤶᤒᤰ ᤆᤥᤃᤢᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤜᤢᤰ ᤁᤣ᤺ᤳᤋᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤌᤠ᤺ᤳᤋᤢᤖᤥ॥ 16 ᤂᤧᤸᤗᤧ ᤕᤠᤱᤃᤧᤛᤠ᤹ᤒᤠ ᤏᤢ ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤢ ᤐᤡᤖᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰᤗᤧ ᤗᤠᤃᤡ ᤏᤢᤒᤠ ᤐᤥ᤺ᤰᤂᤧᤖᤥ ᤀᤠᤱᤃᤠ᤹ ᤁᤢᤛᤡᤱ ᤀᤠᤏᤡ᤺ᤳᤋᤧ᤹ ᤗ᤹ᤀᤠᤒᤧᤴ ᤜᤠᤒᤠ ᤁᤴᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥ 17 ᤁᤖ ᤂᤧᤏᤧ᤹ᤃ ᤂᤧᤏᤧ᤹ ᤁᤧᤗᤠᤃᤡᤖᤧ ᤐᤠ᤺ᤴᤏᤡᤴᤗᤰ ᤁᤧᤏᤡᤛᤢᤖᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤁᤧᤛᤧᤖᤢᤛᤡᤖᤥ ᤀᤠᤒᤠᤅᤣ ᤁᤧᤔᤏᤠᤜᤠ᤹ ᤛᤠᤰᤁᤧᤸᤗᤧᤰ ᤏᤢ ᤔᤧᤴᤘᤠ᤹ᤔᤏᤠ ᤋᤢᤰᤂᤣ ᤁᤧᤈᤠ᤺ᤳᤋᤢᤛᤡᤖᤥ॥” 18 ᤂᤧᤸᤗᤧᤆᤥᤃᤢᤸᤗᤧ ᤕᤥᤛᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤀᤣ. ᤂᤧᤴ ᤛᤡ᤺ᤸᤗᤧ ᤀᤠᤳᤋᤡᤴᤏᤠᤱ ᤔᤧᤖᤡᤱ ᤔᤧᤎᤰᤏᤧᤴᤗᤥ॥ ᤜᤠ᤺ᤳᤗᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤴᤗᤥ ‘ᤀᤠᤶᤓᤢ᤹ᤀᤣ. ᤀᤠᤰᤂᤧᤴ ᤛᤠ᤹ᤖᤡᤰ ᤕᤧᤳᤋᤢᤰᤂᤣ ᤋᤩᤧᤒᤣ’ ᤜᤧᤰᤁᤩᤠᤱ ᤀᤣ᤺ᤴᤏᤠᤱ ᤀᤰᤂᤣᤗ᤹ᤖᤡᤰ ᤔᤧᤖᤡᤱ ᤌᤰᤏᤢ ᤔᤧᤜᤠ᤺ᤵᤏᤧᤴᤗᤥ᥄ ‘ᤀᤣ. ᤀᤠᤜᤠᤱᤅᤣ. ᤂᤧᤏᤧ᤹ ᤁᤧᤜᤠᤱᤘᤠᤴ ᤐᤣᤖᤥ᥄’ 19 ᤁᤢᤛᤡᤘᤧᤳ ᤀᤍᤱᤅᤡᤴ ᤗᤢᤵᤔᤏᤠᤒᤠ ᤜᤧᤰᤁᤣ ᤂᤧᤴ ᤔᤧᤗᤢᤵᤋᤢᤖᤥ ᤂᤧᤴ ᤔᤧᤀᤢ᤺ᤰᤂᤢ ᤔᤧᤎᤧᤔᤢ ᤔᤧᤍᤣ᤹ᤖᤢᤖᤥ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥᤒᤠ ᤔᤠ ᤗᤠᤶᤎᤣᤳ ᤗᤠ᤺ᤰᤁᤠᤳ ᤗᤠᤵᤔᤧᤓᤢᤛᤢᤖᤥ॥ 20 ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠᤛᤣ. ᤗᤧᤒᤏᤠᤏᤏᤥ ᤐᤣᤃᤧᤶᤔᤧ᤹ᤀᤠᤱ ᤀ᤺ᤰᤋᤧᤶᤔᤧ᤹ᤀᤥ. ᤒᤠᤛᤠ᤺ᤴᤏᤥ ᤐᤣᤃᤧᤶᤔᤧ᤹ᤀᤠᤱ ᤜᤠᤒᤧᤶᤔᤧ᤹ᤀᤥ॥ ᤔᤥᤀᤠᤒᤡ ᤁᤥ᤺ᤰᤔᤠᤜᤠ᤹ᤗᤠᤶ ᤀᤡᤏᤥᤃᤧᤴ ᤋᤢᤰᤂᤣᤘᤠ ᤀᤡᤰᤗᤠ᤺ᤴᤏᤠᤱ ᤗ᤺ᤳᤋᤧᤶᤔᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤒᤣᤛᤠᤱᤒᤠ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤜᤠᤖᤡᤔᤧᤍᤩᤧᤀᤠᤱ ᤔᤧᤘᤠ᤹ᤖᤥ॥ 21 ᤂᤧᤏᤧ᤹ ᤁᤧᤏᤢᤖᤧᤀᤠᤱ ᤁᤧᤘᤕᤧᤒᤠ ᤕᤧᤴᤏᤥ ᤂᤧᤏᤧ᤹ ᤑᤧ᤺ᤰᤏᤧᤖᤥ ᤁᤖ ᤂᤧᤏᤧ᤹ ᤀᤠᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤴᤗᤥ॥ ᤂᤧᤏᤧ᤹ ᤁᤧᤒᤠ᤺ᤳᤋᤢ. ‘ᤁᤧᤒᤠ᤺ᤴᤏᤡᤴ ᤔᤧᤄᤧᤶᤔᤠᤴᤗᤥ॥’ ᤂᤧᤏᤧ᤹ ᤁᤧᤈᤢᤰᤋᤧᤀᤠᤱᤎᤥᤀᤣ ᤀᤠᤒᤠ᤺ᤴᤏᤡᤴ ᤔᤧᤱᤄᤧᤶᤔᤣ ᤁᤧᤘᤠ᤹ᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤂᤡᤏᤡ᤹ ᤀᤠᤵᤑᤠᤸᤗᤧᤀᤠᤱ ᤂᤧᤶᤔᤠ ᤁᤧᤴᤍᤧᤴᤍᤡᤴᤗᤥ॥ 22 ᤂᤡᤏᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤛᤠᤶᤔᤡ᤺ᤳᤋᤧᤸᤗᤧ ᤑᤧᤛᤢ ᤋᤣ᤹ᤖᤢᤛᤡᤖᤥ. ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤋᤣ᤺ᤱᤈᤢᤶ ᤁᤧᤔᤧᤵᤐᤠᤜᤠ᤹ ᤔᤧᤍᤣ᤹ᤖᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤠ᤺ᤱᤄᤠ ᤗᤠᤈᤣ᤹ ᤔᤧᤍᤣ᤹ᤖᤢᤛᤡᤖᤥ ᤂᤧᤒᤩᤠᤱ ᤂᤧᤏᤡ᤹ ᤁᤢᤏᤠᤔᤧᤴᤇᤠ᤹ ᤏᤢ ᤛᤡᤖᤡᤱᤔᤔᤥ ᤁᤧᤎᤩᤧ᤹ᤀᤡᤖᤥ॥ 23 ᤗᤧᤒᤏᤠᤏᤒᤠ ᤛᤠᤶᤔᤠᤱᤛᤡᤱᤅᤡᤸᤗᤧ ᤆᤥ᤺ᤰᤔᤏᤠᤒᤠ ᤜᤡᤶᤔᤥ ᤂᤡᤏᤡ᤹ ᤏᤢᤖᤡᤰᤁᤠᤱ ᤁᤧᤕᤢᤅᤡᤖᤥ ᤁᤖ ᤛᤠᤘᤠ᤺ᤴᤍᤢᤱ ᤜᤧᤰᤋᤱᤒᤠ ᤕᤧᤳᤋᤢᤰᤂᤣᤴ ᤂᤡᤏᤡ᤹ ᤛᤶᤎᤠᤱ ᤀᤡᤍᤠᤖᤥ. ᤂᤧᤒᤩᤠᤱ ᤂᤡᤏᤡ᤹ ᤋᤢᤰᤔᤠ ᤛᤠᤰᤔᤠᤸᤗᤧ ᤁᤧᤕᤠᤖᤡᤖᤥ॥” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤜᤥᤕᤠᤁᤡᤏᤧᤴ ᤂᤢᤶᤍᤡᤱ ᤐᤡᤖᤢ 24 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤛᤍᤠᤍᤡᤱ ᤘᤠ᤹ᤀᤠᤒᤠ ᤜᤧᤰᤁᤣ ᤕᤜᤥᤕᤠᤁᤡᤔᤧᤸᤗᤧ ᤁᤢᤛ᤻ᤛᤠ ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤏᤧᤴ ᤀᤠᤱᤃᤠ᤹ ᤂᤧᤏᤧ᤹ ᤗᤧᤳᤏᤧ॥ ᤀᤠᤱᤃᤠ᤹ ᤀᤠᤈᤢᤵᤛᤠᤱ ᤜᤢᤰᤁᤥᤒᤠ ᤀᤣ᤺ᤵᤛᤠᤵ ᤛᤫᤠᤃᤣ᤺ᤵᤏᤧᤛᤠᤱ ᤗᤡᤃᤰ ᤗ᤺ᤳᤏᤧᤀᤠᤱ ᤗᤠᤵᤑᤢᤏᤧ॥ 25 ᤀᤠᤳᤋᤡᤴᤜᤠ᤹ ᤁᤧᤃᤡᤖᤢᤛᤡ᤹ ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ᤖᤧ ᤂᤧᤏᤧ᤹ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢ᤹ ᤂᤧᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤀᤠᤱᤃᤠ᤹ ᤌᤠᤏᤧ॥ ᤀᤠᤱᤃᤠ᤹ ᤂᤧᤏᤧ᤹ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤴ ᤏᤢ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤜᤢᤰᤛᤢᤵᤏᤧ॥ 26 ᤂᤧᤏᤧ᤹ ᤏᤢ ᤁᤧᤶᤔᤠ ᤀᤠᤱᤃᤠ᤹ ᤛᤠ᤹ᤖᤡᤰ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤗᤠᤵᤑᤢᤏᤧᤳᤇᤡᤱ. ᤂᤡᤴᤇᤡ᤹ ᤏᤧᤵᤔᤠᤱ ᤛᤠᤃᤧᤴᤘᤠ᤺ᤴᤏᤧᤛᤡᤴᤒᤠ ᤘᤣ᤹ ᤗᤠᤈᤣ᤹ᤀᤥ ᤁᤧᤒᤡᤳᤇᤡ ᤂᤧᤒᤩᤠᤱ ᤂᤧᤵᤔᤥᤀᤣ ᤁᤧᤛᤡᤛᤡ᤹॥ 27 ᤂᤡᤏᤡ᤹ ᤁᤴ ᤗᤠᤈᤣᤴ ᤀᤥᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶ ᤁᤖ ᤀᤠᤑᤠᤸᤗᤧᤀᤠᤱ ᤁᤧᤏᤢ᤺ᤰᤂᤡᤀᤠᤱ ᤁ᤹ᤕᤥ ᤁᤧᤴᤍᤩᤧ᤹ᤀᤡᤴ॥” 28 “ᤌᤣᤀᤠᤱ ᤕᤜᤥᤕᤠᤁᤡᤏ ᤜᤠᤱᤅᤡᤴ ᤁᤧᤜᤧ᤺ᤵᤐᤠ ᤏᤢ ᤗᤠᤵᤑᤢᤔᤏᤠᤒᤠ ᤁᤢ᤺ᤴᤍᤠ᤺ᤴ ᤜᤧᤰᤁᤣ ᤐᤥ᤺ᤰᤂᤧᤒᤠᤒᤣ. ᤌᤣ ᤂᤧᤴ ᤀᤠᤳᤋᤡᤴᤜᤠ᤹ᤀᤠᤱ ᤆᤠᤜᤠᤒ᤻ ᤔᤧᤴᤈᤥ᤺ᤰᤏᤧᤶᤒᤡ᥅ ᤂᤧᤴ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤂᤢᤴᤇᤡ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤠ ᤗᤠᤈᤣ᤹ᤀᤥ ᤌᤣᤀᤠᤱ ᤐᤢᤱᤗᤠᤎᤠᤒᤠ ᤔᤧᤈᤥᤃᤢᤛᤡᤀᤠᤱ ᤔᤧᤍᤣ᤹ᤖᤢᤛᤡᤒᤠᤒᤣ᥅” 29 ᤕᤜᤢᤍᤠ ᤗᤠᤈᤣ᤹ᤀᤣ. ᤕᤜᤢᤍᤠ ᤗᤠᤈᤣ᤹ᤀᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧ᤹ᤀᤥ. 30 “ᤁᤢᤛ᤻ᤛᤠᤁᤢᤀᤣ ᤔᤣ᤺ᤴᤏᤣ ᤗᤢᤃᤧᤒᤠ ᤜᤧᤰᤁᤣ ᤁᤴ ᤔᤏᤠ᤺ᤸᤗᤧ ᤁᤢᤔᤡᤱᤅᤡᤴ ᤛᤠᤵᤋᤧ᤹ᤀᤥ ᤁᤢᤜᤡᤱᤔᤴᤏᤥ ᤂᤧᤴ ᤁᤢᤗᤡᤱᤍᤥ ᤔᤧᤱᤃᤧᤵᤔᤏᤠᤒᤠ ᤐᤥᤱᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤳᤋᤡᤴ ᤁᤢᤛ᤻ᤛᤠᤜᤠ᤹ᤀᤠᤱ ᤁᤢᤛ᤻ᤛᤠᤱ ᤁᤧᤗᤒᤠ ᤔᤧᤶᤒᤥᤱᤏᤧᤴᤗᤥ ᤂᤧᤸᤗᤧ ᤀᤠᤳᤋᤡᤴ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤀᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠᤀᤥ ᤕᤢᤱᤔᤠ ᤔᤧᤱᤄᤥᤏᤧᤴᤗᤥ ᤀᤡᤃᤪ ᤕᤜᤢᤍᤠᤀᤥ ᤜᤠᤱᤆᤥ᤺ᤰᤔᤠ ᤔᤧᤱᤄᤥᤏᤧᤴᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.