ᤕᤷᤔᤡᤕᤠ 21 - LIFOTNT

ᤕᤖᤢᤛᤗᤧ᤺ᤶᤔᤡᤴ ᤜᤠᤖᤡ ᤋᤠ᤹᤺

¹ ᤔᤸᤁᤡᤕᤠᤜᤖᤧ ᤁᤢᤛ᤻ᤛᤠ ᤐᤛᤜᤢᤖᤧᤴ ᤏᤢ ᤔᤠᤛᤣᤕᤠᤜᤖᤧ ᤁᤢᤛ᤻ᤛᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤐᤏᤩᤠᤜ᤺ᤴ ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤸᤗᤧ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤕᤷᤔᤡᤕᤠᤀᤥ ᤐᤠᤱᤄᤢᤛᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ. ᤂᤢᤴᤇᤡ᤹ ᤐᤠ᤺ᤳᤋᤧᤇᤢ.

² “ᤀᤠᤏᤡᤃᤣ ᤗᤠᤃᤡ ᤕᤜᤘᤣ ᤍᤠᤱᤒᤠᤴ ᤛᤧ᤺ᤴᤗᤠᤵᤋᤧ ᤀᤠᤒᤡᤖᤧ᤹ ᤌᤣᤀᤠᤱᤓᤧᤸᤗᤧ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤴ ᤏᤢ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤀᤠᤏᤡᤃᤣ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤆᤥ᤺ᤰᤔᤠ ᤑᤠ᤹ᤀᤠᤱ ᤔᤧᤍᤠᤖ ᤔᤧᤒᤳ॥ ᤛᤧᤰᤂᤠ᤺ᤸᤗᤧ ᤁᤧᤒᤣ᤺ᤰᤐᤠ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡ᤹ ᤗᤠᤃᤡ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤒᤠ ᤜᤧᤰᤁᤣ ᤀᤠᤸᤗᤀᤠᤱ ᤆᤥᤃᤢᤀᤠᤱ ᤏᤒᤢᤁᤍᤏᤣᤛᤖᤧᤴ ᤏᤢ᤺ᤰᤋᤢᤍᤣᤛᤢᤒᤡ॥”

³ ᤕᤷᤔᤡᤕᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. ᤛᤡᤍᤁᤡᤕᤠᤴ ᤔᤧᤳᤋᤧᤶᤔᤧ᤹.

⁴ “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤗᤢᤱᤎᤠᤰ ᤗᤠ᤺ᤰᤁᤠᤳ ᤂᤧᤏᤧ᤹ ᤁᤡᤷᤃᤵ ᤁᤧᤃᤵᤐᤠᤀᤠᤱ ᤁᤧᤕᤧᤵᤐᤠ ᤒᤣᤒᤡᤗᤥᤏᤒᤠ ᤜᤠᤱᤅᤡᤴ ᤏᤢ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤜᤢᤰᤁᤥ ᤁᤧᤃᤳᤋᤢᤒᤠ ᤑᤧᤈᤠᤑᤧᤕᤢᤶᤜᤠ᤹ ᤜᤠᤒᤠ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤏᤢ᤺ᤰᤋᤢᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤑᤢᤰᤂᤢᤱᤛᤡᤱᤅᤠᤱ ᤕᤧᤰᤕᤰ ᤛᤡᤃᤠᤱ ᤋᤠᤖᤢᤱᤛᤡᤱ᤹॥

⁵ ᤀᤠᤱᤃᤠ᤹ ᤁᤧᤖᤧᤰ ᤀᤠᤔᤢᤰᤛᤠᤶᤔᤡᤴ. ᤀᤠᤛᤡᤰ ᤐᤥ᤺ᤰᤔᤠᤴ ᤜᤧᤰᤁᤩᤠᤱ ᤀᤠᤕᤠ᤺ᤰᤗᤧ᤹ᤔᤥ ᤀᤠᤱᤃᤠ᤹ᤀᤣ ᤁᤧᤍᤰᤗᤧᤱᤘᤠᤀᤥ ᤌᤰᤁᤠ॥

⁶ ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤜᤠ᤹. ᤌᤰᤛᤠᤜᤠ᤹ ᤁᤧᤖᤧᤰ ᤜᤍ᤹ ᤛᤧᤖᤢᤱᤛᤡᤱ᤹॥ ᤂᤧᤱᤜᤠ᤹ ᤁᤡᤵᤔᤠᤃᤧᤄᤢᤒᤠ ᤕᤶᤒᤠ ᤔᤠᤱᤍᤢᤰᤔᤧᤸᤗᤧ ᤔᤧᤛᤡ᤹᤺॥

⁷ ᤁᤖ ᤂᤧᤏᤧ᤹ ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤴ. ᤂᤧᤏᤧ᤹ ᤁᤧᤕᤢᤰᤛᤠᤒᤠᤜᤠ᤹. ᤜᤧᤰᤁᤩᤠᤱ ᤋᤧᤴᤎᤱ. ᤛᤠᤰᤘᤠᤴ ᤏᤢ ᤔᤡᤱᤍᤣ᤹ᤗᤠᤶ ᤁᤧᤜᤡᤱᤒᤠ ᤔᤏᤠᤜᤠ᤹ ᤂᤰᤐᤧᤳ ᤀᤠᤱᤃᤠ᤹ ᤏᤒᤢᤁᤍᤏᤣᤛᤖ ᤜᤠᤱᤅᤡᤴ ᤏᤢ ᤁᤧᤏᤡᤱᤔᤡᤜᤠ᤹. ᤂᤧᤒᤩᤠᤱ ᤂᤡᤏᤡ᤹ ᤔᤧᤱᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤜᤠ᤹ᤖᤧ ᤁᤧᤶᤍᤧᤶᤛᤡ ᤁᤧᤶᤍᤣ᤹ᤖᤡᤖ ᤆᤥᤃᤢᤱ᤹॥ ᤂᤧᤸᤗᤧ ᤂᤡᤏᤡ᤹ ᤀᤠᤳᤋᤡᤴᤏᤠᤱ ᤁᤢᤜᤡᤱᤘᤧᤳ ᤁᤧᤴᤗᤧᤖᤡᤴ᤹ ᤀᤡᤃᤪ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤁᤧᤸᤗ᤹ᤖᤡᤴ. ᤁᤢᤗᤢᤱᤔᤠ᤹ ᤑᤩᤠ᤺ᤱ ᤁᤧᤸᤗ᤹ᤖᤡᤴ ᤜᤧᤰᤁᤩᤠᤱ ᤗᤢᤱᤔᤠ᤹ᤀᤠᤱ ᤁᤧᤴᤍᤢᤰᤋᤡᤴ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹॥’

⁸ “ᤀᤠᤸᤗᤛᤠᤱ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ—ᤂᤧᤵᤛᤧᤶᤔᤧ᤹. ᤀᤠᤱᤃᤠ᤹ ᤂᤡᤏᤡ᤹ ᤜᤡᤱᤔᤠ ᤗᤠᤶᤔᤡᤴ ᤏᤢ ᤛᤡᤔᤠ ᤗᤠᤶᤔᤡᤴ ᤛᤣ᤺ᤰᤔᤠ ᤛᤢᤕᤧᤶ ᤐᤡᤏᤡᤗᤱᤗ ᤐᤳᤋᤠ॥

⁹ ᤁᤴ ᤕᤧᤰᤕᤰᤁᤥ ᤀᤠᤳᤋᤡᤴ ᤕᤢᤱ. ᤂᤧᤴ ᤋᤧᤴᤎᤱ. ᤛᤠᤰᤘᤠᤴ ᤀᤡᤃᤪ ᤔᤠᤱᤍᤢᤰᤔᤠᤸᤗᤧ ᤛᤡ᤹᤺ ᤁᤖ ᤀᤠᤳᤋᤡᤴ ᤗ᤺ᤴᤏᤠᤱ ᤐᤣᤰ ᤜᤧᤰᤁᤩᤠᤱ ᤀᤠᤸᤗᤥ ᤕᤧᤰᤕᤰᤁᤡᤴ ᤁᤧᤓᤵᤐᤠ ᤁᤧᤍᤠ᤺ᤵᤐᤠ ᤒᤣᤒᤡᤗᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤀᤠᤒᤠᤅᤣ ᤜᤢᤰᤛᤢᤵᤛᤡᤱ᤹. ᤂᤧᤴ ᤔᤧᤛᤡᤏᤧᤴ॥ ᤂᤧᤸᤗᤧ ᤌᤣ ᤔᤣ᤺ᤴᤇᤠᤱ ᤂᤢᤏᤧ᤹ ᤁᤢᤜᤡᤱᤔᤧᤴ ᤋᤠᤱᤄᤢ᤹॥

¹⁰ ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤋᤠᤱᤛᤧ᤺ᤵᤔᤠᤃ ᤔᤣ᤺ᤴ ᤁᤖ ᤔᤧᤱᤔᤠ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹॥ ᤂᤧᤴ ᤕᤧᤰᤕᤰᤁᤡᤴ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤆᤢᤰ ᤜᤧᤰᤁᤩᤠᤱ ᤂᤧᤸᤗᤧ ᤁᤴ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥’”

ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤶᤍᤡᤱ ᤔᤧᤄᤥᤛᤢ

¹¹ “ᤜᤧᤰᤁᤩᤠᤱ ᤕᤜᤢᤍᤠᤒᤠ ᤜᤠᤱᤌᤠ᤺ᤰᤁᤥᤒᤠ ᤜᤡᤶᤛᤕᤱᤜᤠ᤹ ᤀᤠᤸᤗᤛᤠᤱ ᤀᤰᤂᤣ ᤔᤧᤳᤋᤧᤛᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹.

¹² ᤍᤠᤀᤢᤍᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤕᤜᤢᤍᤠᤒᤠ ᤜᤠᤱ ᤜᤡᤶᤛᤕᤱᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “‘ᤌᤡᤰᤕᤠ᤺ᤴᤎᤰ ᤁᤢᤍᤥ᤺ᤵᤔᤠ ᤂᤠᤛᤧᤴᤏᤡᤴ ᤋᤰᤋᤧᤶ ᤁᤳᤋᤧᤶᤔᤧ᤹ᤀᤥ॥ ᤔᤏᤠ ᤁᤧᤄᤢᤶᤒᤠᤸᤗᤧ ᤁᤢᤜᤢᤰᤁᤥᤗᤠᤶᤒᤠ ᤔᤧᤏᤠᤵᤋᤢᤛᤡᤒᤠᤜᤠ᤹ ᤋᤠᤱᤛᤧ᤺ᤵᤋᤧᤶᤛᤡᤶᤔᤧ᤹ᤀᤥ॥ ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤀᤠᤛᤡᤰ ᤐᤥ᤺ᤰᤁᤠᤱ ᤔᤡ ᤐᤥᤱᤅᤠᤖᤥ ᤂᤧᤒᤩᤠᤱ ᤂᤧᤴ ᤜᤠ᤺ᤳᤗᤧᤀᤠᤱ ᤛᤧᤵᤔᤠ ᤔᤧᤛᤢᤰᤋᤢᤶᤒᤠ ᤔᤡ ᤜᤧᤰᤁᤣ ᤜᤢᤖᤢᤖᤢᤏᤠ ᤋᤡ᤺ᤳᤗᤥ॥

¹³ ᤕᤖᤢᤛᤗᤧ᤺ᤶᤔᤣ. ᤂᤧᤏᤧ᤹ ᤏᤧᤏᤧᤒᤠᤍᤧᤴᤏᤥᤗᤠᤶ ᤌᤠ᤺ᤱ ᤁᤧᤕᤢᤱᤗᤥ. ᤋᤧᤶᤒᤣ᤹ᤀᤥ ᤁᤧᤕᤧᤵᤐᤠ ᤐᤕᤶ ᤕᤶᤒᤠ ᤕᤠᤰᤐᤣ᤹ ᤁᤢᤀᤡᤛᤡᤰ ᤁᤧᤈᤥ᤺ᤰᤗᤥ॥ ᤁᤖ ᤁᤧᤍᤰᤗᤧᤱᤘᤠᤀᤥ ᤋᤧᤴᤎᤱ ᤆᤥᤃᤢᤱᤗᤥ॥ ᤁᤧᤒᤠ᤺ᤳᤋᤢᤶᤒᤡᤗᤠ ᤀᤠᤏᤡᤃᤧᤀᤥ ᤜᤠ᤺ᤳᤋᤠᤱ ᤋᤠᤔᤠ ᤔᤧᤛᤢᤰᤏᤧᤴᤗᤥ. ᤀᤠᤏᤡᤃᤣ ᤕᤰᤁᤡᤴ ᤀᤠᤳᤋᤡᤸᤗᤧᤀᤠᤱ ᤗᤢ᤺ᤶᤔᤠ ᤔᤧᤛᤢᤰᤋᤢᤴᤗᤥ॥

¹⁴ ᤁᤖ ᤂᤡᤏᤡ᤹ ᤕᤠ᤺ᤶᤒᤰᤜᤠ᤹ᤖᤧ ᤗᤠᤃᤡ ᤂᤢᤶᤍᤡᤱ ᤐᤡᤏᤡᤱᤗᤥ॥ ᤀᤠᤱᤃᤠ᤹ ᤂᤡᤏᤡ᤹ ᤋᤠᤶᤓᤢᤱᤜᤠ᤹ᤀᤥ ᤔᤡ ᤁᤣ᤺ᤳᤋᤢᤱᤗᤥ ᤜᤧᤰᤁᤩᤠᤱ ᤔᤡ᤺ᤸᤗᤧ ᤂᤡᤏᤡ᤹ ᤐᤡᤛᤠᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥’”