ᤕᤷᤔᤡᤕᤠ 20 - LIFOTNT

ᤕᤷᤔᤡᤕᤠᤴ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤏᤢ ᤐᤠ᤺ᤴᤎᤱ ᤆᤥᤰ

¹ ᤂᤧᤵᤔᤥ ᤀᤡᤶᤔᤣᤖᤧᤸᤗᤧ ᤁᤢᤛ᤻ᤛᤠ ᤔᤠᤱᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠ ᤐᤛᤜᤢᤖ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤕᤷᤔᤡᤕᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤴ ᤔᤠᤱᤏᤡᤱᤘᤠ᤹ᤐᤠᤴᤜᤠ᤹ ᤂᤧᤵᤛᤢ.

² ᤂᤧᤒᤩᤠᤱ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤴ ᤔᤧᤜᤡᤵᤋᤠᤱᤗ ᤕᤠ᤺ᤴᤍᤢᤛᤡ ᤜᤧᤰᤁᤩᤠᤱ ᤔᤠᤱᤜᤡᤶᤔᤥᤒᤠ ᤌᤥᤛᤔᤠ ᤒᤣᤏᤩᤠᤔᤡᤏ ᤔᤠ ᤗᤠᤶᤎᤣ᤺ᤵᤐᤠᤸᤗᤧ ᤁᤢᤒᤣᤛᤠᤱ ᤋᤢᤖᤢᤱ ᤔᤧᤎᤧᤵᤋᤠᤱ॥

³ ᤁᤢᤍᤠ᤺ᤴᤍᤡᤰ ᤋᤠᤏᤠᤶ ᤐᤛᤜᤢᤖᤧᤸᤗᤧ ᤂᤢᤏᤧ᤹ ᤋᤢᤖᤥᤱᤅᤥᤗᤠᤶ ᤗᤧᤖᤢᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤐᤛᤜᤢᤖ ᤔᤡᤱ ᤁᤧᤘᤠ᤺ᤳᤋᤧᤒᤠ ᤔᤣ᤺ᤴ ᤁᤖ ᤂᤢᤏᤧ᤹ᤃ ‘ᤁᤧᤖᤧᤰ ᤐᤡᤛᤠᤱ ᤁᤡᤔᤠ ᤕᤱᤔᤠ’ ᤔᤡᤱ ᤁᤧᤘᤠ᤺ᤳᤋᤧ॥

⁴ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤃᤡ ᤏᤢ ᤁᤧᤴᤈᤢᤶᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤡᤵᤔᤠᤃᤧᤄᤢᤒᤠ ᤔᤏᤠ ᤆᤥ᤺ᤰᤏᤧ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤡᤰᤁᤡᤸᤗᤧ ᤁᤢᤍᤃᤡ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢ ᤔᤧᤛᤩᤧᤖᤢᤛᤡ᤹॥ ᤕᤜᤢᤍᤠᤒᤠ ᤁᤧᤖᤧᤰ ᤕᤰᤕᤢᤱᤒᤠᤜᤠ᤹ ᤀᤠᤱᤃᤠ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤜᤢᤰᤛᤢᤵᤋᤢᤱᤛᤡᤱ᤹. ᤂᤧᤸᤗᤧ ᤕᤖᤡᤰᤋᤱᤒᤠ ᤋᤧᤶᤛᤢᤛᤡᤀᤠᤱ ᤒᤣᤒᤡᤗᤥᤏᤀᤥ ᤋᤣ᤹ᤖᤢᤛᤡ ᤂᤧᤒᤩᤠᤱ ᤘᤣ᤹ᤜᤠ᤹ ᤋᤠᤓᤣ᤺ᤸᤗᤧ ᤛᤧᤖᤢᤛᤡ᤹॥

⁵ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ ᤁᤴ ᤕᤧᤰᤕᤰᤐᤠ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤏᤠᤵᤔᤠᤛᤡ ᤏᤢ ᤂᤧᤵᤔᤥᤒᤠ ᤆᤡᤃᤰᤘᤠᤜᤠ᤹. ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤏᤠᤵᤔᤠᤛᤡᤀᤠᤱ ᤛᤠᤔᤠᤐᤢᤔᤠᤜᤠ᤹ ᤂᤰᤐᤧᤳ ᤒᤣᤒᤡᤗᤥᤏᤀᤥ ᤋᤣ᤹ᤔᤠ ᤐᤠᤱᤄᤢᤱᤛᤡᤱ᤹॥

⁶ ᤜᤧᤰᤁᤩᤠᤱ ᤐᤛᤜᤢᤖᤖᤧ. ᤂᤧᤏᤧ᤹ ᤏᤢ ᤁᤧᤜᤡᤶᤛᤕᤱᤅᤠᤱ ᤛᤠᤰᤐᤠ ᤁᤧᤎᤩᤧ᤹ᤀᤡ ᤂᤧᤒᤩᤠᤱ ᤒᤣᤒᤡᤗᤥᤏᤀᤥ ᤐᤢᤱᤗᤠᤎᤠᤒᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤒᤣᤃᤡ᤹॥ ᤂᤧᤏᤧ᤹ ᤁᤧᤖᤧᤰ ᤁᤧᤴᤍᤣ᤺ᤱ ᤁᤧᤴᤈᤢᤶᤜᤠ᤹ ᤂᤧᤏᤧ᤹ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤔᤧᤳᤋᤢᤛᤡᤀᤠᤱ ᤁᤧᤘᤕᤧ. ᤂᤧᤱᤜᤠ᤹ᤏᤢ ᤂᤧᤏᤧ᤹ ᤁᤧᤛᤡᤀᤠᤱ ᤂᤧᤵᤔᤥᤀᤣ ᤁᤧᤶᤜᤢᤶᤗᤥ॥’”

ᤕᤜᤘᤣ ᤍᤠᤱᤒᤠᤀᤥ ᤕᤷᤔᤡᤕᤠ᤺ᤸᤗᤧ ᤁᤢᤗᤢᤱᤜᤠᤴ

⁷ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤀᤠᤱᤃᤠ᤹ ᤀᤡᤱᤃᤧᤗᤧᤰᤋᤠᤱᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤱᤗᤧᤰᤁᤥ ᤛᤖᤶ ᤌᤩᤠᤱᤗᤥ॥ ᤂᤧᤏᤧ᤹ ᤀᤠᤱᤃᤠ᤹ᤏᤢ᤺ᤸᤗᤧᤀᤠᤱ ᤁᤧᤎᤢᤶᤒᤠ ᤁᤧᤈᤥ᤺ᤰᤗᤥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤱᤃᤠ᤹ ᤁᤧᤏᤠ᤺ᤴᤍᤠᤱᤗᤥ॥ ᤁᤧᤖᤧᤰᤗᤧ ᤀᤠᤱᤃᤠ᤹ ᤕᤣ᤺ᤵᤔᤠᤗᤠᤶ ᤔᤧᤈᤥ᤺ᤰᤁᤠᤖᤥ ᤂᤧᤒᤩᤠᤱ ᤗᤧᤴᤍᤡᤰ ᤏᤠᤶᤎᤠᤎᤠ ᤁᤡᤏᤠ᤺ᤴᤍᤡ ᤔᤧᤒᤡᤀᤠᤖᤥ॥

⁸ ᤂᤧᤵᤔᤥ ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤑᤡ᤺ᤰᤔᤠᤖ ᤐᤠ᤺ᤵᤔᤠ ᤐᤥᤱᤗᤥ. “ᤂᤠᤷᤔᤧᤴᤍᤰ᥄ ᤔᤧᤰᤔᤠᤛᤡᤔᤠ ᤐᤥ᤺ᤰᤂᤧᤖᤥ᥄” ᤂᤧᤴ ᤀᤠᤱᤃᤠ᤹ ᤐᤠ᤺ᤵᤔᤠᤀᤣ ᤐᤥᤱᤗᤥ॥ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤀᤡᤱᤄᤱᤅᤡᤴ ᤂᤧᤶᤔᤠ ᤐᤠᤱᤄᤢᤱᤛᤡᤱᤗᤥ ᤂᤧᤸᤗᤧᤆᤥᤃᤢᤸᤗᤧ ᤀᤠᤓᤧᤸᤗᤧᤛᤠᤱ ᤔᤧᤕᤣ᤺ᤳᤋᤠ ᤜᤧᤰᤁᤩᤠᤱ ᤔᤧᤈᤡ᤺ᤳᤋᤠᤖᤥ॥

⁹ ᤁᤖ “ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱ ᤔᤧᤗᤥ᤺ᤱᤅᤠᤸᤗᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤅᤥ ᤀᤠᤱᤃᤠ᤹ ᤔᤧᤒᤠ᤺ᤳᤋᤠᤴᤗᤥ” ᤜᤧᤰᤁᤣ ᤗ᤹ᤀᤠᤏᤧᤓᤃᤪ ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤴ ᤔᤡ ᤜᤧᤰᤁᤣ ᤜᤢᤖᤢᤖᤢ ᤋᤡ᤺ᤳᤗᤥ ᤂᤧᤒᤩᤠᤱ ᤂᤧᤸᤗᤧ ᤀᤠᤛᤡᤰᤗᤢᤱᤔᤧᤴ ᤜᤠᤶᤜᤠᤶ ᤔᤧᤳᤋᤢᤖᤥ॥ ᤀᤠᤱᤃᤠ᤹ ᤛᤍᤠᤍᤡᤱ ᤂᤧᤴ ᤛᤠᤰᤔᤠ ᤋᤶᤛᤡᤱ ᤆᤥᤃᤢᤱᤗᤥ ᤁᤖ ᤂᤧᤴ ᤀᤠᤱᤃᤠ᤹ ᤌᤶᤔᤠ ᤔᤧᤛᤢᤰᤁᤠᤴᤗᤥ॥

¹⁰ ᤁᤧᤖᤧᤰᤗᤧ ᤔᤢᤖᤠ ᤔᤢᤛᤡᤰ ᤔᤢᤛᤡᤰ ᤗ᤹ᤖᤡᤰ ᤔᤧᤒᤠ᤺ᤳᤋᤢᤒᤠᤴ ᤂᤧᤵᤛᤢᤱᤗᤥ. “ᤁᤧᤖᤧᤰ ᤐᤡᤛᤠᤱ ᤁᤡᤔᤠ ᤕᤱᤔᤠᤖᤰ ᤘᤠ᤹ᤖᤥ. ᤁᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤏᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ᤀᤥ ᤗᤢᤱᤜᤠ᤺ᤴᤐᤠᤴ ᤕᤢᤰᤂᤢᤶᤗᤥ᥄” ᤀᤠᤱᤃᤠ᤹ ᤁᤢᤛ᤻ᤛᤠᤱ ᤔᤧᤸᤗ᤺ᤶᤔᤏᤠᤒᤠ ᤐᤥᤱᤅᤠᤒᤠᤴ ᤀᤠᤏᤡ᤺ᤳᤋᤠᤱᤒᤠ ᤀᤠᤴᤈᤢᤶᤜᤠ᤹ᤖᤧᤀᤠᤱ ᤔᤧᤜᤠᤱᤄᤢᤖ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. “ᤛᤧᤰᤂᤠ᤺ᤸᤗᤧ ᤂᤧᤴ ᤑᤧᤴᤐᤠ᤺ᤴᤏᤥ ᤌᤠᤒᤡᤗᤠᤖᤥ. ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤋᤠᤵᤑᤧ᤺ᤶᤒᤠ ᤁᤢᤒᤠ᤺ᤴᤏᤡᤴ ᤀᤠᤄᤥᤛᤢᤶᤔᤠᤱ ᤂᤧᤴ ᤁᤢᤗᤧᤰᤘᤠ ᤏᤢ᤺ᤰᤔᤠ ᤀᤠᤛᤢᤰᤋᤢᤶᤒᤡᤗᤠᤖᤥ॥”

¹¹ ᤁᤖ ᤁᤧᤎᤢᤶᤒᤠ ᤏᤢ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤀᤠᤱᤃᤠ᤹ ᤗᤧᤵᤔᤠᤱ ᤁᤧᤘᤠ᤹ᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤄᤢᤶᤒᤠᤜᤠ᤹ ᤔᤧᤍᤥ᤺ᤰᤁᤠᤱ ᤔᤧᤃᤧᤱᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤍᤠᤍᤡᤱ ᤛᤡᤖᤡᤱᤔᤔᤥ ᤔᤧᤎᤠᤖᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤐᤥᤱᤔᤠ ᤔᤧᤴᤇᤢᤰᤏᤧᤴᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤎᤠᤔᤠᤴ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤶᤓᤣ᤺ᤳᤇᤢᤴᤗᤥ॥

¹² ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤛᤠᤶᤕᤥᤒᤠᤜᤠ᤹ ᤁᤧᤛᤠ᤹ᤖᤢᤛᤡᤖᤥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤁᤧᤃᤥ᤺ᤳᤋᤢᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤠᤴ ᤏᤢ ᤏᤡᤱᤘᤠ᤹ᤀᤥ ᤌᤣ ᤘᤠ᤹. ᤂᤧᤴ ᤁᤧᤏᤡᤛᤢᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤱᤔᤡᤜᤠ᤹ ᤂᤢᤶᤍᤡᤱ ᤁᤧᤒᤡᤖᤢᤛᤡᤒᤠᤴ ᤀᤥᤔᤧᤵᤔᤠ ᤂᤥᤛᤢᤱᤗᤖᤥ ᤌᤣᤀᤠᤱᤓᤧᤸᤗᤧ ᤀᤠᤒᤠ᤺ᤴᤏᤡᤴ ᤂᤧᤏᤧ᤹ ᤁᤧᤜᤢᤰᤁᤥ ᤜᤢᤰᤛᤢᤵᤏᤧᤀᤠᤱ ᤘᤠ᤹ᤖᤥ॥

¹³ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤧᤘᤠᤛᤠᤶᤗᤥ ᤛᤠᤶᤔᤧᤳᤋᤧᤶᤔᤧ᤹ᤀᤥ᥄ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄ ᤂᤢᤏᤧ᤹ ᤕᤠᤱᤃᤧᤛᤠ᤹ᤒᤠᤜᤠ᤹ ᤏᤢ ᤁᤢᤜᤥ᤺ᤵᤔᤠ ᤁᤢᤛᤠᤰᤔᤥ ᤁᤧᤎᤠᤒᤠᤜᤠ᤹ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤋᤠᤱᤛᤧ᤺ᤵᤋᤢᤛᤡᤖᤥ॥

¹⁴ ᤛᤠᤘᤠ᤺ᤴᤇᤡᤱᤅᤠᤒᤠ ᤕᤧᤴᤏᤡᤴ ᤔᤠᤱᤍᤣ ᤛᤠᤱᤃᤪᤠᤖᤧ ᤋᤧᤳᤋᤢᤖᤖᤥ᥄ ᤀᤠᤶᤔᤠᤖᤧ ᤁᤳᤋᤠᤱᤒᤠ ᤕᤧᤴᤏᤡᤴ ᤏᤡᤱᤘᤠ᤹ᤛᤥ ᤔᤧᤒᤥᤱᤏᤧᤴᤗᤖᤥ᥄

¹⁵ ᤂᤧᤴ ᤔᤏᤠᤴ ᤛᤠᤱᤃᤪᤠᤖᤧ ᤋᤧᤳᤋᤢᤖᤖᤥ. ᤂᤧᤸᤗᤧ ᤀᤠᤱᤃᤠ᤹ ᤀᤠᤶᤒᤠ ᤀᤰᤂᤣ ᤔᤧᤳᤋᤢᤖᤥ “ᤂᤧᤏᤧ᤹ ᤀᤅᤧ᤺ᤰᤘᤠ ᤛᤠ ᤁᤧᤃᤳᤋᤢᤖᤥ᥄ ᤂᤧᤏᤧ᤹ ᤕᤧᤶᤒᤡᤳᤇᤠ ᤁᤧᤛ᤻ᤛᤠ ᤐᤥ᤺ᤰᤂᤧᤖᤇ᥄” ᤀᤰᤋᤱᤒᤠ ᤀᤡᤱᤄᤱ ᤐᤡᤖᤢᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤩᤧᤖ ᤆᤥᤃᤢᤀᤠᤱ ᤘᤕᤧᤖᤥ॥

¹⁶ ᤂᤧᤴ ᤔᤏᤠᤴ ᤂᤧᤴ ᤕᤧᤰᤕᤰᤜᤠ᤹ ᤜᤧᤰᤋᤱᤒᤠ ᤐᤥᤱᤗᤖᤥ. ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤗᤢᤱᤔᤠ᤹ ᤔᤧᤴᤍᤢᤰᤁᤣ ᤔᤧᤰᤂᤢᤀᤠᤱ ᤘᤕᤧᤖᤥ॥ ᤂᤧᤸᤗᤧ ᤋᤠᤏᤠᤶ ᤁᤧᤜᤠ᤺ᤵᤐᤠ ᤁᤧᤈᤡᤱᤒᤠ ᤜᤠ᤺ᤶᤗᤠᤰᤘᤠ ᤂᤧᤵᤛᤢᤖᤖᤥ ᤂᤧᤒᤩᤠᤱ ᤗᤧᤴᤍᤡᤰ ᤔᤛᤣᤖᤠ ᤋᤧᤴᤎᤱᤃᤧᤴ ᤀᤡᤰᤗᤠᤴ ᤂᤧᤵᤛᤢᤖᤖᤥ॥

¹⁷ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤛᤠᤵᤐᤥ᤺ᤰᤐᤥ ᤕᤠᤃᤠᤱᤅᤡᤸᤗᤧ ᤂᤧᤸᤗᤧ ᤔᤧᤛᤧᤖᤠᤱᤅᤡᤴᤗᤥ॥ ᤜᤧᤰᤁᤣ ᤐᤥ᤺ᤰᤂᤧᤸᤗᤧᤃ ᤀᤠᤶᤔᤠᤖᤧ ᤁᤢᤓᤰᤋᤢᤱᤅᤡᤴᤏᤣ ᤀᤠᤀᤡᤐᤢᤱ ᤐᤥ᤺ᤰᤂᤧᤒᤠᤖᤥ॥

¹⁸ ᤀᤠᤱᤃᤠ᤹ ᤌᤣᤀᤠᤱ ᤛᤠᤘᤠ᤺ᤴᤇᤡᤱᤅᤠᤒᤠᤀᤡᤏᤢ᥅ ᤌᤣ ᤀᤠᤜᤡᤱᤜᤡᤱ ᤕᤧᤳᤋᤢᤰᤂᤣ ᤋᤢᤶᤔᤠ. ᤋᤢᤰᤂᤣ ᤗᤠᤰᤂᤣ ᤆᤠᤔᤠ ᤜᤧᤰᤁᤩᤠᤱ ᤆᤠ᤺ᤳᤌᤡ ᤐᤣ᤺ᤰᤔᤠᤖᤧ ᤗᤠᤃᤡ ᤁᤴ ᤛᤠᤘᤠ᤺ᤴᤇᤡᤱᤔᤠᤴ ᤀᤠᤱᤃᤠ᤹ ᤂᤥᤛᤢᤱᤒᤠᤒᤡ᥅