ᤕᤷᤔᤡᤕᤠ 2 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤪᤠᤀᤡᤗᤧᤴ ᤁᤶᤒᤪᤠᤱ ᤔᤧᤳᤋᤢ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ. 2 “ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤕᤖᤢᤛᤗᤧ᤺ᤶᤔᤥ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰ ᤔᤧᤳᤋᤧᤛᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤁᤧᤎᤠᤱᤒᤧᤴ ᤘᤧᤶᤔᤥ ᤀᤠᤰᤂᤧᤴ ᤏᤛᤠ᤺ᤴᤛᤠᤒᤠ ᤁᤧᤘᤕᤧ ᤁᤧᤗ᤹ᤒᤠᤴ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤛᤢᤶᤔᤥ ᤘᤠ᤹ᤖᤥ. ᤛᤡᤛᤠᤔᤣ᤺ᤳᤋᤡᤸᤗᤧ ᤜᤧᤰᤁᤣ ᤂᤧᤏᤧ᤹ ᤔᤡ᤺ᤶ ᤁᤧᤔᤧᤳᤋᤠᤱᤗᤥ॥ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ. ᤌᤣᤀᤠᤱ ᤔᤧᤴᤗᤡᤱᤔᤏᤠᤒᤠ ᤆᤡᤈᤡ ᤂᤰᤂᤰᤐᤠ ᤀᤣ᤺ᤰᤛᤠᤍᤧᤴᤏᤥ ᤂᤧᤏᤧ᤹ ᤀᤠᤱᤃᤠ᤹ ᤀᤠᤀᤣᤃᤠᤱ ᤀᤠᤀᤣᤃᤠᤱ ᤁᤧᤏᤠ᤺ᤳᤋᤠᤱᤗᤥ॥ 3 ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤀᤠᤗᤠᤃᤡ ᤛᤣᤛᤣᤒᤠ ᤁᤧᤘᤕᤧᤖᤥ ᤜᤧᤰᤁᤩᤠᤱ ᤆᤠᤛᤢᤶᤔᤠ ᤕᤧᤶᤔᤥ ᤀᤠᤱᤃᤠ᤹ᤀᤥ ᤔᤧᤍᤥᤴᤍᤢᤒᤠ ᤁᤢᤈᤠ᤺ᤸᤗᤧᤴ ᤆᤠᤛᤥᤰ ᤜᤧᤰᤋᤱᤒᤠ ᤁᤧᤘᤕᤧᤖᤥ॥ ᤂᤧᤏᤧ᤹ ᤜᤠᤴᤋᤡ ᤁᤧᤈᤥ᤺ᤰᤐᤠ ᤁᤧᤖᤧᤰ ᤀᤠᤵᤋᤡᤰᤛᤠᤒᤠ ᤗᤣ᤺ᤳᤋᤢᤱᤛᤡᤱᤗᤥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤧᤳᤋᤢᤰᤂᤣᤴ ᤐᤠᤱᤄᤢᤱᤗᤥ॥” ᤀᤡᤛᤪᤠᤀᤡᤗᤒᤠ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥ 4 ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤛᤣ. ᤀᤡᤛᤪᤠᤀᤡᤗᤖᤧ ᤁᤧᤖᤧᤰ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹ᤀᤥ॥ 5 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤁᤧᤎᤠ᤺ᤰᤌᤧᤒᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤐᤠᤴ ᤌᤣ ᤔᤧᤄᤥᤛᤢᤒᤣ᥅ ᤌᤧᤔᤠ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤀᤠᤱᤃᤠ᤹ᤗᤠᤶᤒᤠ ᤔᤠ᤺ᤱᤄᤠ ᤔᤧᤒᤥ᤺ᤰᤂᤧᤒᤣ᥅ ᤂᤧᤱᤜᤠ᤹ᤖᤧ ᤌᤣᤏᤠᤎᤣᤒᤠ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤖᤥ ᤜᤧᤰᤁᤩᤠᤱ ᤀᤠᤒᤠᤅᤣᤀᤠᤱ ᤜᤏᤧᤒᤠ ᤔᤧᤒᤥ᤺ᤰᤂᤧᤖᤥ॥ 6 ᤀᤠᤱᤃᤠ᤹ ᤂᤧᤱᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶᤒᤠ ᤗ᤺ᤳᤋᤢᤱ ᤌᤠᤰᤋᤢᤱᤛᤡᤱᤗᤥ॥ ᤔᤢᤖᤧᤰ ᤂᤠᤖᤧᤰᤐᤠ ᤀᤣ᤺ᤰᤛᤠᤍᤧᤴᤏᤥ. ᤏᤢ ᤔᤢᤖᤧᤰ ᤂᤠᤖᤧᤰᤐᤠ ᤁᤧᤜᤣᤒᤠ ᤁᤧᤈᤵᤐᤠ ᤜᤧᤰᤁᤩᤠᤱ ᤕᤧ᤺ᤱᤄᤠ ᤀᤡᤛᤣ᤺ᤱᤒᤠ ᤌᤢᤵᤌᤠ᤹ ᤁᤧᤏᤧᤒᤠᤍᤧᤴᤏᤥ. ᤜᤠ᤺ᤳᤋᤠᤱ ᤁᤧᤜᤥᤵᤐᤠ ᤗᤠᤱᤅᤡᤸᤗᤧᤀᤠᤱ ᤔᤧᤍᤥ᤹ᤖᤢᤶᤒᤠ ᤁᤧᤜᤣᤒᤠᤍᤧᤴᤏᤥ ᤁᤡᤵᤔᤠ ᤁᤧᤄᤢᤒᤠ ᤗᤠᤈᤣ᤹ ᤗᤢᤶᤔᤥᤗᤠᤶᤒᤠ ᤀᤠᤱᤃᤠ᤹ ᤂᤧᤱᤜᤠ᤹ ᤗᤠᤶᤗᤥᤛᤢᤱᤛᤡᤱᤅᤠᤱ ᤋᤠᤖᤢᤱᤛᤡᤱᤗᤥ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤌᤣᤀᤠᤱ ᤏᤡᤏᤡ ᤂᤧᤶᤄᤧᤶ ᤔᤧᤴᤗᤠᤵᤋᤠᤱᤅᤡᤴᤗᤥ॥ 7 “ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤗᤳᤇᤠ ᤏᤢᤒᤠ ᤗᤠᤈᤣ᤹ᤀᤥ ᤁᤧᤍᤠᤖᤡᤖᤥ. ᤜᤧᤰᤁᤣᤗ᤹ᤖᤡᤰ ᤂᤧᤵᤔᤥᤒᤠ ᤏᤢ᤺ᤒ᤻ᤏᤢᤒᤠ ᤐᤠ᤺ᤴᤜᤠ᤹ ᤏᤢ ᤐᤥᤃᤢᤃᤧᤴ ᤁᤢᤈᤠᤴ ᤁᤧᤈᤠᤶᤗᤥ॥ ᤁᤖ ᤂᤧᤸᤗᤧ ᤁᤢᤗᤧᤰᤘᤠᤀᤥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤗᤠᤈᤣᤴ ᤔᤧᤈᤡ᤺ᤴᤍᤢᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤡᤖᤢᤱᤛᤡᤱᤒᤠ ᤗᤠᤈᤣᤴ ᤂᤧᤱᤜᤠ᤹ᤖᤧ ᤀᤠᤛᤢᤳᤌᤥ ᤔᤧᤈᤥᤃᤢᤖᤥ॥ 8 ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤀᤰᤂᤣᤗ᤹ᤖᤡᤰᤁᤠᤱ ᤐᤠᤴ ᤛᤣ᤺ᤴᤔᤧᤴᤍᤥᤛᤢᤴᤗᤥ ‘ᤕᤜᤘᤣ ᤍᤠᤱᤒᤠᤴ ᤀᤠᤳᤋᤠ ᤘᤠ᤹ᤒᤣ᥅’ ᤛᤠᤶᤕᤥᤀᤡᤱᤈᤠᤱ ᤁᤧᤜᤢ᤹ᤒᤠᤜᤠ᤹ᤖᤧ ᤀᤠᤒᤠᤅᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤠᤱᤅᤡᤸᤗᤥ ᤕᤢᤰᤛᤠᤒᤠᤜᤠ᤹ᤖᤧᤀᤠᤱ ᤀᤠᤱᤃᤠ᤹ᤏᤢ ᤐᤡᤑᤩᤢᤱ ᤔᤧᤈᤥᤃᤢᤖᤥ॥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧᤃ ᤒᤠᤗ ᤛᤠᤶᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤜᤏᤧᤒᤠ ᤏᤠᤘᤠᤀᤡᤳᤗᤠᤜᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥ 9 ᤁᤴ ᤐᤠ᤺ᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ ‘ᤂᤧᤸᤗᤧᤆᤥᤃᤢᤸᤗᤧ. ᤀᤠᤱᤃᤠ᤹ ᤀᤠᤍᤢ᤺ᤴᤍᤧᤴ ᤕᤠᤶᤔᤥ ᤂᤡᤏᤡ᤹ ᤀᤠᤔᤏᤠᤜᤠ᤹ ᤆᤧᤰᤏᤡᤱᤗᤥ॥ ᤜᤧᤰᤁᤩᤠᤱ ᤁᤧᤍᤠᤒᤠ ᤋᤱᤒᤣᤜᤠ᤹ᤀᤥ ᤂᤡᤏᤡ᤹ ᤛᤠᤔᤧᤴᤇᤠ᤹ᤜᤠ᤹ ᤀᤠᤵᤋᤡᤰ ᤁᤢ᤺ᤳᤋᤢᤱᤛᤡᤱᤗᤥ॥ 10 ᤏᤠᤶᤎᤠ ᤐᤡᤛᤠᤱ ᤛᤠᤀᤡᤐᤪᤛ ᤘᤠᤃᤵᤂᤠᤶᤔᤥ ᤂᤧᤱᤜᤠ᤹ ᤀᤥᤔᤢᤛᤧ ᤔᤧᤒᤣ᤺ᤰᤗᤖᤥ. ᤏᤠᤶᤃᤧᤴ ᤗᤧᤵᤔᤠᤱ ᤁᤣᤍᤠᤖ ᤗᤠᤈᤣ᤹ᤀᤥ ᤀᤠᤳᤋᤡᤸᤗᤧᤀᤡ ᤁᤢᤃᤥ᤺ᤳᤇᤧ ᤔᤧᤒᤠᤱᤄᤢᤛᤡᤖᤖᤥ. ᤀᤰᤋᤱᤒᤠ ᤐᤠᤴ ᤋᤃᤡ ᤀᤠᤵᤑᤠᤸᤗᤧᤀᤠᤱ ᤐᤥ᤺ᤰᤂᤧᤒᤠ ᤁᤧᤴᤏᤡᤛᤢᤶᤔᤡᤴᤗᤥ॥ 11 ᤘᤣ᤹ ᤀᤠᤳᤋᤡᤴ ᤛᤢᤘᤠᤱᤅᤡᤸᤗᤧᤀᤠᤱ ᤀᤠᤒᤠᤅᤣ ᤛᤠᤶᤔᤠᤱᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤗᤧᤰᤁᤣ ᤁᤳᤋᤢᤛᤡᤖᤥ. ᤜᤧᤰᤁᤣᤛᤠᤱ ᤂᤧᤴ ᤛᤠᤶᤔᤠᤱᤜᤠ᤹ ᤛᤧᤰᤂᤠᤒᤠ ᤔᤠᤱ ᤔᤣ᤺ᤴᤇᤡᤖᤥ॥ ᤁᤖ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤜᤧᤰᤋᤱᤒᤠ ᤛᤠᤶᤔᤠᤱᤜᤠ᤹ᤏᤢ ᤀᤠᤱᤃᤠ᤹ ᤔᤧᤗᤧᤰᤋᤠᤱᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤔᤡᤍᤡᤱᤅᤡᤴ ᤂᤧᤴ ᤜᤏᤧᤒᤠ ᤛᤠᤶᤔᤠᤱᤜᤠ᤹ᤏᤢ ᤔᤧᤗᤧᤰᤋᤢᤖᤥ॥ 12 ᤂᤧᤸᤗᤧᤆᤥᤃᤢᤸᤗᤧ ᤋᤠᤱᤛᤠᤰᤐᤠᤛᤣ. ᤂᤡᤏᤡ᤹ ᤌᤧᤃᤰᤁᤰᤏᤠ ᤕᤰᤂᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤁᤡᤔᤠ ᤕᤱᤔᤠᤀᤥ ᤌᤩᤧᤶᤔᤧ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤔᤕᤧᤶᤔᤧ᤹ᤀᤥ 13 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤏᤧᤳᤇᤡ ᤗᤠᤕᤥ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ— ᤂᤧᤱᤜᤠ᤹ᤖᤧ ᤀᤠᤜᤡᤱᤜᤡᤱᤒᤠ ᤁᤧᤒᤢᤶᤒᤠ ᤆᤫᤠ᤺ᤳᤋᤡᤴ ᤔᤧᤏᤠ᤹ᤖᤢᤀᤠᤱ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤘᤠᤃᤧᤕᤢᤒᤠ ᤁᤧᤒᤣ᤺ᤰᤐᤠ ᤆᤫᤠ᤺ᤳᤋᤡᤴ ᤌᤧᤱᤔᤠᤖᤧ ᤗᤠᤃᤡ ᤘᤠᤒᤠᤰᤜᤠ᤹ ᤔᤧᤍᤕᤢᤀᤠᤱ ᤏᤧᤖᤥ॥’” ᤗᤠᤕᤥᤸᤗᤧ ᤁᤢᤗᤧᤰᤘᤠ ᤀᤡᤛᤪᤠᤀᤡᤗᤖᤧ ᤂᤥᤛᤢᤒᤠ ᤌᤢᤶᤄᤥ 14 “ᤀᤡᤛᤪᤠᤀᤡᤗᤧᤴ ᤕᤥᤃ᤻ᤒᤠ ᤔᤣ᤺ᤴᤗᤥ. ᤂᤧᤴ ᤕᤥᤃ᤻ᤒᤠ ᤐᤥ᤺ᤰᤂᤧᤀᤠᤱ ᤛᤠᤘᤠ᤺ᤴᤇᤡᤱᤒᤠ ᤔᤣ᤺ᤴᤗᤥ॥ ᤜᤧᤰᤁᤣ᤺ᤸᤗᤧ ᤌᤣᤀᤠᤱ ᤏᤠᤵᤔᤏᤠᤒᤠ ᤆᤡᤃᤰᤘᤠ ᤜᤧᤰᤁᤣ ᤔᤧᤒᤥ᤺ᤰᤂᤧᤒᤠᤒᤣ᥅ 15 ᤂᤧᤱᤜᤠ᤹ ᤂᤢᤏᤧ᤹ ᤁᤢᤛᤶᤎᤠᤱ ᤂᤡᤖᤡᤱᤒᤠᤴ ᤜᤧᤰᤁᤣ ᤔᤧᤜᤢ᤺ᤰᤁᤠᤱ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤸᤗᤧ ᤗᤠᤈᤣᤴ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤂᤧᤸᤗᤧ ᤁᤢᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤖᤥ ᤜᤧᤰᤁᤩᤠᤱ ᤔᤧᤏᤠ᤹ᤖᤢᤀᤠᤱ ᤏᤧᤖᤥ॥ 16 ᤀᤠᤲ. ᤏᤥᤐ ᤏᤢ ᤋᤜᤐᤏᤣᤛᤒᤠ ᤔᤏᤠᤜᤠ᤹ ᤔᤧᤍᤠᤖᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤧᤎᤣᤃᤣ᤺ᤰᤁᤡᤴ ᤗᤡᤃᤥ᤹ ᤔᤧᤏ᤺ᤰᤂᤢᤀᤠᤱ ᤘᤠ᤹ᤖᤥ॥ 17 ᤀᤡᤛᤪᤠᤀᤡᤗᤀᤣ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤗᤠᤶᤔᤥ ᤗᤠᤶᤗᤥᤏᤧᤖ ᤘᤕᤠᤱᤗᤥ ᤁᤖ ᤂᤧᤏᤧ᤹ᤃ ᤀᤠᤱᤃᤠ᤹ ᤁᤧᤏᤠ᤹ᤖᤠᤱᤗᤥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤒᤠᤅᤣ ᤁᤴ ᤐᤠ᤺ᤴᤏᤡᤴ ᤁᤧᤛᤶᤎᤠᤱ ᤁᤧᤍᤠᤖᤢᤖᤥ॥ 18 ᤏᤡᤗ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤌᤢᤱᤔᤠᤖᤧᤗᤠᤃᤡ ᤔᤡᤛᤪᤀᤥ ᤁᤧᤒᤣ᤺ᤰᤗᤥ ᤀᤡᤃᤪ ᤕᤢᤑᤪᤣᤋᤡᤛ ᤘᤜ᤺ᤱᤅᤥᤒᤠ ᤆᤫᤠ᤺ᤳᤋᤡᤴ ᤌᤢᤱᤛᤧ ᤀᤛ᤻ᤛᤢᤖ ᤗᤠᤈᤣ᤹ᤀᤥ ᤁᤧᤎᤠᤛᤡᤱᤗᤥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤗᤠᤃᤡ ᤌᤣ ᤀᤡᤴᤎᤠ ᤐᤥᤱᤅᤠᤱᤒᤣ᥅ 19 ᤂᤧᤏᤧ᤹ ᤀᤠᤒᤠᤅᤣ ᤁᤢ᤹ᤀᤡᤓᤧᤶᤔᤠᤸᤗᤧ ᤁᤧᤛᤶᤎᤠᤱ ᤂᤢᤶᤍᤡᤱ ᤋᤠᤖᤢᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤠ᤹ᤖᤠᤱᤒᤠ ᤐᤠ᤺ᤴᤏᤡᤸᤗᤧᤀᤣ ᤁᤢᤏᤠᤔᤧᤴᤇᤠ᤹ ᤁᤧᤈᤥ᤺ᤰᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠ᤹ᤔᤠ ᤏᤢ ᤀᤠᤱᤃᤠ᤹ᤀᤥ ᤛᤧᤘᤠ ᤔᤧᤴᤈᤥ᤺ᤰᤔᤠ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤏᤢ ᤏᤡᤱᤘᤠ᤹ ᤔᤧᤴᤍᤠᤔᤠ ᤐᤥᤱᤗᤥ. ᤂᤧᤴ ᤂᤧᤏᤧ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤖᤥ॥ ᤀᤠᤱᤃᤠ᤹ ᤐᤕᤶ ᤕᤶᤒᤠ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥” ᤀᤡᤛᤪᤠᤀᤡᤗᤖᤧ ᤕᤜᤘᤣ ᤍᤠᤱᤒᤠᤴ ᤔᤠᤱᤛᤧᤘᤠ ᤔᤧᤵᤔᤠ ᤗᤧᤖᤢᤒᤠ 20 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤡᤛᤪᤠᤀᤡᤗᤀᤣ. ᤕᤖᤡᤰ ᤕᤧᤶᤔᤠᤱᤎᤥ ᤂᤧᤏᤧ᤹ ᤀᤠᤱᤃᤠ᤹ ᤀᤠᤕᤢᤰᤁᤡᤴ ᤁᤧᤏᤠ᤹ᤖᤢᤖᤥ. ᤂᤧᤏᤧ᤹ ᤀᤠᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤢ ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤵᤔᤠ ᤁᤧᤗᤧᤖᤠᤱᤗᤥ॥ ᤁᤧᤖᤧᤰ ᤁᤣ᤺ᤶᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤜᤧᤰᤁᤩᤠᤱ ᤁᤧᤖᤧᤰ ᤛᤖᤣ᤺ᤰᤁᤩᤠ᤺ᤵᤐᤠ ᤛᤡᤱᤒᤢᤱ ᤛᤡᤃᤠᤱ ᤂᤧᤏᤧ᤹ ᤘᤣ᤹ ᤔᤠᤱ ᤛᤠᤶᤔᤠᤱᤜᤠ᤹ᤏᤢ ᤁᤧᤳᤏᤡᤔᤠ ᤜᤧᤰᤁᤣ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤖᤥ॥ 21 ᤆᤧᤸᤗᤧᤰᤛᤣ᤹ᤒᤢᤱ ᤜᤧᤰᤁᤣ ᤏᤢᤒᤠ ᤁᤢᤗᤡ᤺ᤶᤒᤠ ᤋᤣ᤹ᤏᤧᤀᤠᤱ ᤘᤕᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤗᤣ᤺ᤳᤏᤧᤀᤠᤱ ᤁᤧᤕᤢᤅᤧᤖᤥ॥ ᤁᤖ ᤀᤥᤔᤧᤳᤋᤧ᤹. ᤀᤠᤸᤗ ᤂᤧᤏᤧ᤹ ᤌᤣ ᤁᤧᤒᤥ᤺ᤰᤂᤧᤀᤡᤖᤥ॥ ᤂᤧᤏᤧ᤹ᤃ ᤗᤳᤇᤠ ᤁᤧᤃᤡᤒᤠ ᤜᤏᤧᤒᤠ ᤆᤧᤸᤗᤧᤰᤛᤣ᤹ ᤁᤧᤒᤥᤰᤂᤧᤀᤠᤱ ᤁᤧᤕᤢᤱᤗᤥ॥ 22 ᤏᤢᤖᤡᤰ ᤔ᤹ᤘᤠ ᤁᤧᤍᤣ᤹ᤒᤠ ᤑᤡ᤺ᤶᤓᤪᤡᤰᤐᤠᤸᤗᤧ ᤛᤠ᤹ᤖᤡᤰ ᤘᤠᤃᤧᤜᤵᤛᤡᤱᤗᤥ ᤜᤧᤰᤁᤩᤠᤱ ᤔᤠᤰᤛᤧᤴᤏᤡᤴ ᤕᤖᤡᤰ ᤀᤥᤃᤵ ᤁᤧᤈᤥᤃᤢᤖᤥ ᤜᤧᤰᤁᤣᤛᤠᤱ ᤔᤠᤰᤁᤧᤎᤰᤐᤠ ᤂᤧᤏᤧ᤹ ᤁᤧᤗᤠᤕᤥᤴ ᤀᤠᤱᤃᤠ᤹ ᤀᤠᤔᤡᤰ ᤋᤃᤡᤀᤣ ᤘᤠ᤹ᤖᤥ॥ 23 ᤁᤖ ᤂᤧᤏᤧ᤹ ᤁᤧᤒᤠ᤺ᤳᤋᤢ. ‘ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤛᤢᤳᤌᤥ ᤜᤥ᤺ᤵᤐᤠᤀᤠᤖᤥ. ᤒᤠᤗ ᤛᤠᤶᤔᤠᤱᤅᤡᤴ ᤛᤧᤘᤠ ᤔᤧᤔᤧᤳᤋᤢᤱᤅᤡᤴᤗᤥ’ ᤗ᤹ᤖᤡᤰ ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤐᤠ᤺ᤵᤔᤠ ᤁᤧᤛᤢᤰᤋᤢᤒᤣ᥅ ᤂᤧᤏᤧ᤹ ᤛᤣ᤺ᤱᤄᤠ ᤏᤧᤏᤧᤒᤠᤍᤧᤴᤏᤥ ᤗᤠᤕᤥ ᤁᤧᤈᤥᤃᤢᤀᤠᤱ ᤁᤧᤘᤕᤧᤖᤥ ᤜᤧᤰᤁᤩᤠᤱ ᤜᤧᤴᤜᤠ᤹ ᤜᤧᤴᤜᤠ᤹ ᤁᤧᤈᤥᤃᤢᤀᤠᤱ ᤁᤧᤘᤕᤧ. ᤂᤧᤴ ᤀᤥᤔᤧᤳᤋᤧ᤹ᤀᤥ॥ ᤁᤢᤶᤒᤠᤒᤠ ᤁᤧᤃᤥ᤺ᤵᤔᤠ ᤀᤢᤔᤣ ᤜᤧᤰᤋᤱᤔᤠ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤁᤧᤒᤥᤰᤂᤧᤀᤠᤱ ᤁᤧᤘᤕᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤕᤠᤱᤏᤠ ᤁᤳᤏᤠ ᤁᤧᤗᤥ᤺ᤰᤗ ᤁᤧᤘᤠ᤹ᤖᤥ॥ 24 ᤔᤢᤖᤧᤰ ᤂᤠᤖᤧᤰᤐᤠ ᤀᤣ᤺ᤰᤛᤠᤍᤧᤴᤏᤥ ᤘᤠ᤹ᤔᤠ ᤁᤧᤃᤠᤶᤔᤠ ᤁᤢᤶᤔᤠᤔᤠ ᤋᤠᤶᤓᤢᤱ ᤀᤍᤱᤅᤡᤴ ᤜᤧᤰᤁᤣ ᤜᤧᤰᤁᤩᤠᤱ ᤁᤢᤶᤒᤠᤒᤠ ᤀᤍᤱ ᤁᤧᤃᤥ᤺ᤵᤔᤠᤀᤠᤱ ᤛᤢᤖᤡ᤺ᤳᤋᤡᤴ ᤛᤢ᤺ᤰᤛᤢ᤺ᤰ ᤁᤧᤏᤠᤶᤔᤠᤖ ᤁᤧᤘᤠ᤹ᤔᤠ ᤜᤧᤰᤁᤣ ᤂᤧᤏᤧ᤹ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹ ᤂᤧᤴ ᤜᤠ᤺ᤳᤗᤧ ᤕᤢᤰᤁᤥ ᤁᤵᤔᤠ ᤛᤢᤰᤋᤢᤒᤣ᥅ ᤂᤧᤴ ᤁᤥ᤺ᤵᤔᤠᤖᤧ ᤗᤠᤃᤡ ᤁᤢᤶᤒᤠᤒᤠ ᤀᤍᤱᤅᤡᤸᤗᤧ ᤌᤣᤀᤠᤱ ᤋᤢᤰᤂᤣ ᤆᤥ᤺ᤰᤔᤠ ᤔᤧᤒᤥᤱᤅᤡᤴᤗᤥ. ᤂᤧᤸᤗᤧ ᤁᤢᤕᤧᤶᤔᤥ ᤂᤧᤴ ᤁᤢᤶᤔᤠᤔᤠ ᤀᤍᤱᤅᤡᤴ ᤀᤢᤛᤢᤖᤢ ᤋᤢᤔᤢᤖᤥ॥ 25 ᤀᤡᤛᤪᤠᤀᤡᤗᤀᤣ. ᤘᤣ᤹ ᤛᤠᤶᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤀᤣᤃᤠᤱ ᤗᤠᤱᤄᤣᤃᤧ᤹ᤀᤠᤱ ᤁᤧᤗᤠᤱᤅᤡᤴ ᤋᤢᤰᤗ ᤔᤧᤕᤠ᤺ᤴᤍᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤁᤢᤈᤠᤒᤥ᤺ᤵᤔᤧᤴ ᤛᤷᤃᤧᤱ ᤜᤣᤖ ᤔᤧᤈᤥᤃᤧᤴᤏᤧ᤹ᤀᤥ॥ ᤁᤖ ᤂᤧᤏᤧ᤹ ᤁᤧᤒᤠ᤺ᤳᤋᤢ᤹. ‘ᤔᤣ᤺ᤴ᥄ ᤀᤠᤱᤃᤠ᤹ ᤂᤧᤴ ᤗᤧᤵᤔᤠ ᤔᤧᤛᤢᤰᤁᤠᤴᤗᤥ॥ ᤀᤠᤱᤃᤠ᤹ ᤘᤣ᤹ ᤛᤢᤘᤠᤱᤛᤔᤠ ᤔᤠᤱᤛᤠᤶᤔᤠᤱᤜᤠ᤹ ᤀᤠᤛᤡᤖᤠ᤹ ᤔᤧᤎᤠᤅᤧᤀᤠᤱ ᤔᤧᤘᤠ᤹ᤖᤥ॥ ᤀᤠᤱᤃᤠ᤹ᤃ ᤂᤧᤱᤜᤠ᤹ ᤏᤠ᤺ᤵᤔᤠ ᤋᤡᤶᤔᤠᤛᤡᤀᤣ ᤐᤥᤱᤗᤥ॥’” ᤀᤡᤛᤪᤠᤀᤡᤗᤖᤧ ᤂᤥᤔᤠ ᤗᤠ᤹ᤖᤢᤒᤠ ᤂᤢᤶᤍᤡᤱ 26 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤗᤳᤌᤡᤰ ᤂᤢ᤺ᤴᤍᤪᤡᤰᤐᤠᤴ ᤛᤠᤰᤐᤥ ᤌᤠ᤺ᤸᤗᤧ ᤂᤧᤸᤗᤧ ᤁᤢᤈᤠ᤺ᤳᤌᤡ ᤐᤣ᤺ᤰᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ ᤀᤡᤛᤪᤠᤀᤡᤗᤡᤜᤠ᤹. ᤜᤠᤱᤜᤠ᤹ ᤏᤢ ᤕᤢᤰᤛᤠᤒᤠᤜᤠ᤹. ᤂᤡᤏᤡ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤆᤠ᤺ᤳᤌᤡ ᤐᤣ᤺ᤰᤗᤥ॥ 27 ᤛᤡᤱᤅᤡᤴ ‘ᤀᤠᤶᤒᤦ’ ᤏᤢ ᤗᤢᤱᤅᤡᤴ ‘ᤀᤠᤶᤔᤦ’ ᤁᤧᤔᤧᤳᤋᤢᤶᤗᤥ ᤀᤠᤒᤠᤅᤣ ᤂᤡᤏᤡ᤹ ᤏᤠᤖᤠᤴ ᤀᤠᤱᤃᤠ᤹ ᤗᤧᤵᤔᤠᤱ ᤁᤧᤴᤜᤡᤛᤢᤶᤔᤡᤴᤗᤥ. ᤁᤖ ᤂᤡᤏᤡ᤹ ᤀᤣ᤺ᤰᤌᤠ᤺ᤰᤔᤠᤴ ᤁᤧᤜᤡᤛᤢᤶᤔᤠᤱ ᤁᤧᤘᤕᤡᤖᤥ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤕᤧᤳᤋᤢᤰᤂᤣᤀᤥ ᤁᤧᤎᤩᤧ᤹ᤀᤡᤖᤥ. ᤂᤧᤒᤩᤠᤱ ᤀᤰᤂᤣᤗ᤹ᤖᤡᤰ ᤕᤠᤵᤔᤡ ᤐᤣᤗᤡ ᤁᤧᤓᤠᤰᤋᤡᤖᤥ. ‘ᤕᤧ᤹ᤀᤠᤱ ᤀᤠᤏᤡᤃᤣ ᤕᤠᤵᤔᤡ ᤋᤠᤱᤀᤠᤛᤧ᤺ᤵᤋᤧ᤹ᤀᤥ॥’ 28 “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤏᤡᤱ ᤂᤡᤏᤡ᤹ ᤀᤠᤒᤠᤅᤣ ᤗᤠᤃᤡ ᤁᤧᤈᤥᤃᤢᤶᤛᤡᤶᤒᤠ ᤛᤠᤶᤔᤠᤱᤜᤠ᤹ ᤀᤠᤳᤋᤠᤴ ᤔᤧᤘᤠ᤹ᤒᤣ᥅ ᤕᤧᤳᤋᤢᤰᤂᤣᤀᤥ ᤂᤡᤏᤡ᤹ ᤁᤧᤎᤩᤧ᤹ᤀᤡᤸᤗᤧ ᤂᤧᤱᤜᤠ᤹ᤖᤧ ᤔᤧᤛᤢᤰᤋᤢᤏᤧᤓᤃᤪ ᤂᤡᤏᤡ᤹ ᤋᤠᤱᤁᤧᤶᤛᤧ᤺ᤵᤋᤡᤖᤖᤥ॥ ᤕᤜᤢᤍᤠᤀᤣ. ᤂᤧᤏᤧ᤹ ᤁᤧᤕᤧᤰᤕᤰᤜᤠ᤹ ᤕᤖᤡᤰ ᤔᤧᤏᤧᤖᤥ. ᤂᤧᤶᤔᤩᤠᤰᤁᤣ ᤕᤖᤡᤰ ᤂᤧᤏᤧ᤹ ᤁᤧᤔᤠᤱ ᤛᤠᤶᤔᤠᤱᤜᤠ᤹ᤀᤠᤱ ᤔᤧᤘᤠ᤹ᤖᤥ॥ 29 ᤂᤡᤏᤡ᤹ ᤗᤢᤱᤜᤠ᤺ᤵᤔᤠ ᤐᤠᤴ ᤌᤧᤔᤠ ᤘᤠ᤹ᤒᤣ᥅ ᤂᤡᤏᤡ᤹ ᤌᤣᤀᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤁᤧᤈᤥᤃᤢᤶᤒᤠᤒᤣ᥅ 30 ᤀᤠᤱᤃᤠ᤹ ᤂᤡᤏᤡ᤹ ᤂᤢᤶᤍᤡᤱ ᤐᤡᤏᤡᤱ ᤁᤖ ᤂᤧᤸᤗᤧ ᤂᤡᤏᤡ᤹ ᤌᤣᤀᤠᤱ ᤁᤧᤶᤔᤧᤳᤋᤡᤴᤗᤥ. ᤀᤠᤱᤃᤠ᤹ ᤀᤠᤄᤢᤶᤍᤡᤱᤗᤠᤶᤒᤠ ᤂᤡᤏᤡ᤹ ᤁᤧᤴᤜᤡᤴᤍᤡᤴᤗᤥ॥ ᤁᤢᤛᤠᤰᤁᤧᤴᤏᤡᤸᤗᤧ ᤔᤡ ᤁᤧᤒᤥᤱᤒᤠ ᤂᤡᤖᤡᤱᤒᤠᤴ ᤜᤧᤰᤁᤣ ᤂᤡᤏᤡ᤹ ᤛᤡᤰ ᤐᤥᤃᤧᤖᤥ ᤂᤧᤒᤩᤠᤱ ᤂᤡᤏᤡ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤛᤧᤖᤢᤶᤛᤡᤶᤗᤥ॥ 31 ᤁᤴ ᤌᤠ᤺ᤰᤁᤥᤒᤠ ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤏᤡᤱᤘᤠ᤹ ᤀᤡ᤺ᤳᤋᤠᤶᤔᤧ᤹ᤀᤥ॥ ᤌᤣ ᤀᤠᤱᤃᤠ᤹ ᤂᤡᤏᤡ᤹ ᤗᤠᤃᤡ ᤗᤳᤇᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤐᤥ᤺ᤰᤂᤠᤱᤒᤡ᥅ ᤀᤡᤃᤪ ᤌᤣ ᤂᤠᤃᤧᤔᤠᤰᤐᤠ ᤗᤠᤈᤣ᤹ ᤁᤢᤛᤡᤱᤒᤠ ᤐᤥ᤺ᤰᤂᤠᤱᤒᤡ᥅ ᤜᤧᤰᤁᤣ᤺ᤸᤗᤧ ᤌᤣᤀᤠᤱ ᤂᤡᤏᤡ᤹ ᤀᤠᤏᤡᤃᤣ ᤀᤠᤵᤑᤣᤰ ᤏᤡᤱᤘᤠ᤹ ᤋᤠᤍᤠ ᤆᤥᤃᤢᤶᤒᤧ ᤂᤧᤒᤩᤠᤱ ᤕᤠᤶᤔᤥ ᤂᤧᤏᤧ᤹ᤀᤥ ᤔᤧᤍᤩᤧᤀᤡᤃᤧᤴ ᤁᤧᤒᤠ᤺ᤳᤋᤢᤶᤒᤠᤒᤣ᥅ 32 ᤌᤣ ᤔᤧᤴᤇ᤻ᤕᤠ᤺ᤸᤗᤧ ᤀᤠᤒᤠᤅᤣ ᤁᤢᤛᤠᤔᤠ ᤁᤢᤓᤢᤔᤠ ᤘᤠ᤺ᤳᤋᤡᤜᤠ᤹ ᤏᤡᤱᤘᤠ᤹ ᤑᤣ᤺ᤳᤇᤢᤒᤡ᥅ ᤀᤡᤃᤪ ᤛᤡᤛᤠᤔᤣ᤺ᤳᤋᤡᤸᤗᤧ ᤋᤧᤴᤎᤠᤶᤃᤧᤴ ᤁᤢᤔᤣ᤺ᤰᤂᤡᤶ ᤁᤢᤈᤠᤱᤜᤠ᤹ ᤏᤡᤱᤘᤠ᤹ ᤔᤢ᤺ᤳᤇᤢᤒᤡ᥅ ᤁᤖ ᤀᤠᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤕᤖᤡᤰ ᤕᤧᤶᤔᤠᤱᤎᤥ ᤏᤡᤱᤘᤠ᤹ ᤔᤧᤓᤣ᤺ᤳᤇᤠᤱᤗᤥ. ᤂᤧᤴ ᤕᤧᤶᤜᤠ᤹ᤃ ᤏᤡ᤺ᤵᤔᤠᤀᤣ ᤛᤢᤰᤔᤧᤍᤧᤳᤏᤧᤴᤗᤥ॥ 33 ᤂᤧᤏᤧ᤹ᤃ ᤔᤡ᤺ᤶᤈᤡ ᤁᤥ᤺ᤵᤔᤠ ᤛᤠ᤹ᤖᤡᤰ ᤁᤧᤗᤧᤒᤠ ᤁᤧᤈᤥ᤺ᤰᤗᤥ. ᤁᤢ᤹ᤀᤡᤃᤧᤓᤧᤶᤔᤠᤏᤢ᤺ᤸᤗᤧᤀᤠᤱ ᤁᤢ᤹ᤀᤡᤃᤧᤓᤧᤶᤔᤠ ᤔᤧᤴᤇᤢᤔᤠ᤺ᤸᤗᤧ ᤂᤧᤏᤧ᤹ᤗᤠᤶᤒᤠ ᤜᤢ᤹ᤛᤡᤱᤔᤠ ᤛᤢᤰᤋᤢᤖᤥ॥ 34 ᤂᤧᤏᤧ᤹ ᤁᤧᤈᤠᤱ ᤏᤢ ᤁᤧᤍᤣᤳ ᤁᤧᤓᤢᤱᤅᤥ ᤕᤠᤱᤃᤧᤛᤠ᤹ᤒᤠ ᤑᤥᤋᤩᤠ ᤔᤧ᤺ᤴᤏᤣᤒᤠᤜᤠ᤹ᤖᤧ ᤂᤢᤏᤡ᤹ ᤔᤠᤰᤂᤡ᤹ᤀᤡᤸᤗᤧ ᤐᤡᤳᤋᤢᤀᤠᤱ ᤐᤳᤗᤥ. ᤑᤠ᤺ᤴᤍᤠ᤺ᤸᤗᤧ ᤁᤢᤔᤠᤰᤂᤡᤱᤃ ᤔᤣ᤺ᤴᤗᤥ॥ ᤁᤖ ᤁᤴ ᤁᤧᤖᤧᤰ ᤐᤥ᤺ᤰᤂᤧᤛᤠᤱ ᤂᤧᤱᤜᤠ᤹ ᤁᤧᤴᤍᤧᤶᤛᤢᤴᤇᤡᤴᤗᤥ᥄ 35 ᤜᤧᤰᤁᤩᤠᤱ ᤂᤧᤏᤧ᤹ ᤀᤰᤂᤣ ᤁᤧᤒᤠ᤺ᤳᤋᤢ᤹. ‘ᤀᤠᤱᤃᤠ᤹ᤃ ᤑᤥᤋᤩᤠ ᤔᤣ᤺ᤴᤏᤣᤒᤠ ᤆᤥ᤺ᤰᤁᤠᤖᤥ. ᤛᤧᤰᤂᤠᤛᤠᤱ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ᤏᤢ ᤁᤢᤕᤠ᤺ᤰᤗᤧ᤹ᤖᤧᤒᤠ ᤜᤥᤵᤗᤥ॥’ ᤁᤖ ᤂᤧᤏᤧ᤹ ᤗᤠᤕᤥ ᤔᤧᤴᤈᤥ᤺ᤰᤁᤣ ᤘᤠ᤹ᤀᤠ ᤁᤧᤒᤠ᤺ᤳᤋᤢᤖᤥ ᤂᤧᤸᤗᤧᤆᤥᤃᤢᤸᤗᤧᤀᤣ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤂᤢᤶᤍᤡᤱ ᤐᤡᤏᤧᤖᤥ॥ 36 ᤂᤧᤏᤧ᤹ᤃ ᤁᤧᤕᤧᤵᤗᤧᤰᤁᤡᤴ ᤁᤧᤗᤧᤰᤂᤢᤖᤥ ᤜᤧᤰᤁᤩᤠᤱ ᤁᤧᤒᤠ᤺ᤵᤐᤠ᤺ᤳ ᤏᤠ ᤏᤢ ᤁᤳᤏᤠ ᤁᤧᤘᤠ᤹ᤖᤥ ᤂᤧᤏᤧ᤹ ᤔᤡᤛᤪᤖᤧᤀᤠᤱ ᤀᤡᤱᤗᤧᤰᤁᤥ ᤁᤧᤎᤠᤛᤧᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤀᤛ᤻ᤛᤢᤖᤧᤸᤗᤧ ᤂᤧᤏᤧ᤹ ᤏᤡᤱᤛᤠᤱ ᤐᤢᤰᤔᤥ ᤁᤧᤎᤠᤖᤥ॥ 37 ᤛᤡᤖᤡᤱᤔᤔᤠᤸᤗᤧ ᤁᤢᤎᤧᤃᤣᤰᤐᤠᤴ ᤗᤧᤒ᤻ᤈᤢ ᤁᤧᤔᤧᤳᤋᤢᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤔᤡᤛᤪᤗᤠᤶ ᤁᤧᤏᤢ᤺ᤱ ᤁᤧᤎᤠᤱᤗᤥ॥ ᤂᤧᤏᤧ᤹ ᤏᤠᤃᤧᤛᤠ᤹ᤖᤢᤛᤡᤒᤠᤜᤠ᤹ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤏᤠ᤹ᤖᤢᤱᤛᤡᤅᤠᤱ ᤘᤠ᤹ᤖᤥ. ᤂᤧᤱᤜᤠ᤹ᤗᤠᤶᤒᤠ ᤂᤧᤏᤧ᤹ ᤌᤣᤀᤠᤱ ᤁᤢᤓᤠ᤹ ᤁᤧᤱᤄᤥᤛᤢᤴᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.