ᤕᤷᤔᤡᤕᤠ 19 - LIFOTNT

ᤁᤧᤜᤧ᤺ᤵᤐᤠ ᤁᤢ᤺ᤴᤍᤠ

¹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤂᤧᤏᤧ᤹ ᤁᤥ᤺ᤶᤓᤠᤗᤩᤠᤀᤥ ᤐᤣᤃᤧ᤹ᤀᤠᤱ ᤗᤳᤇᤠ ᤂᤠᤶ ᤁᤢ᤺ᤴᤍᤠᤎᤡᤰ ᤀᤡᤅᤧ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤁᤢᤓᤠ ᤋᤢᤶᤓᤠᤰᤛᤠᤜᤠ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤥᤖᤡᤰ ᤋᤣ᤹ᤖᤧᤛᤧ᤹

² ᤂᤧᤒᤩᤠᤱ ᤜᤡᤴᤏᤥᤔ ᤏᤧᤏᤧᤒᤠᤍᤧᤴᤏᤥᤒᤠ ᤂᤠᤶᤗᤧᤰ ᤁᤧᤜᤧ᤺ᤵᤐᤠ ᤔᤧᤵᤔᤏᤠᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤐᤣᤃᤧ᤹ ᤜᤧᤰᤁᤩᤠᤱ ᤂᤧᤵᤔᤥ ᤀᤠᤱᤃᤠ᤹ ᤔᤧᤳᤏᤧᤒᤠ ᤀᤡᤱᤄᤱᤅᤡᤴ ᤔᤏᤠᤜᤠ᤹ ᤔᤧᤳᤋᤧᤛᤧ᤹॥

³ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹. ‘ᤕᤜᤢᤍᤠᤒᤠ ᤜᤠᤱᤜᤠ᤹ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤕᤰᤕᤢᤱᤒᤠᤛᤣ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤀᤰᤂᤣ ᤁᤧᤔᤧᤳᤋᤡ. ᤀᤠᤱᤃᤠ᤹ ᤁᤴ ᤋᤧᤴᤏᤥ ᤁᤧᤛᤠᤰᤐᤠ ᤕᤧᤳᤋᤢᤰᤂᤣ ᤋᤠᤖᤢᤱ᤹ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤧᤄᤧᤶᤒᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤏᤧᤓᤠᤰᤘᤠ ᤑᤡᤱ᤹॥

⁴ “‘ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤗᤠᤵᤔᤧᤓᤢᤛᤠᤱᤅᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤀᤠᤵᤑᤣᤰ ᤏᤢ ᤀᤠᤒᤠᤅᤣ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤀᤡᤃᤪ ᤕᤠᤶᤔᤥ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤇᤡᤴᤒᤠ ᤛᤠᤶᤔᤠᤱᤜᤠ᤹ᤀᤥ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤀᤠᤱ ᤁᤴ ᤋᤧᤴᤏᤡᤴ ᤀᤣᤕᤠᤱᤒᤠ ᤛᤠᤶᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤎᤠ᤺ᤴ ᤔᤧᤈᤥᤃᤢᤀᤠᤱ ᤏᤧ॥ ᤂᤧᤱᤜᤠ᤹ᤖᤧ ᤁᤴ ᤋᤧᤴᤏᤡᤴ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤔᤠᤰᤂᤡ᤹ᤀᤡᤸᤗᤧ ᤜᤧ᤺ᤳᤋᤠᤱᤒᤠ ᤔᤧᤈᤥᤃᤢᤀᤠᤱ ᤏᤧ॥

⁵ ᤜᤧᤰᤁᤩᤠᤱ ᤔᤡᤀᤥ ᤂᤢᤴᤇᤡ᤹ ᤛᤠᤜᤠ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧᤛᤡᤖᤧ ᤗᤠᤃᤡ ᤒᤠᤗ ᤛᤠᤶᤔᤠᤱᤅᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤈᤥᤃᤢᤀᤠᤱ ᤏᤧ᤹᤺॥ ᤀᤠᤱᤃᤠ᤹ ᤀᤠᤵᤑᤠᤸᤗᤧᤀᤠᤱ ᤂᤧᤱᤜᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤀᤡᤱᤈᤠᤱ ᤔᤧᤒᤡᤖᤢᤱᤛᤡᤱᤅᤡᤴ. ᤀᤰᤋᤱᤒᤠ ᤐᤠᤴ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤀᤠᤵᤑᤠᤸᤗᤧᤀᤠᤱ ᤔᤧᤍᤩᤧᤏᤧᤴ॥

⁶ ᤂᤧᤸᤗᤧᤆᤥᤃᤢᤸᤗᤧ ᤀᤰᤋᤱᤒᤠ ᤕᤧᤶ ᤋᤠ᤹᤺. ᤜᤧᤰᤁᤩᤠᤱ ᤂᤧᤴ ᤋᤧᤴᤏᤡᤴ ᤋᤥᤐᤣᤋ ᤀᤡᤃᤪ ᤜᤡᤴᤏᤥᤔᤒᤠ ᤏᤧᤏᤧᤒᤠᤍᤧᤴ ᤔᤧᤶᤔᤧᤳᤋᤢᤴ॥ ᤁᤖ ᤔᤏᤠᤛᤧᤵᤔᤠ ᤏᤧᤏᤧᤒᤠᤍᤧᤴ ᤑᤠ᤹ᤀᤠᤱ ᤁᤢᤔᤡᤱ ᤐᤥᤱ᤹॥ ᤂᤧᤵᤔᤥ ᤔᤏᤠᤜᤠ᤹ᤖᤧ ᤆᤣᤜᤠ᤹ ᤗᤢᤵᤔᤠᤍᤧᤴ ᤂᤥᤔᤧᤴᤍᤧᤳᤋᤣ ᤌᤠᤖᤡᤰ ᤆᤣᤜᤠ᤹ ᤔᤧᤗᤢᤵᤋᤢᤛᤡ᤹॥

⁷ “‘ᤀᤠᤶᤓᤠ ᤁᤴ ᤋᤧᤴᤏᤥ ᤀᤠᤱᤃᤠ᤹ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤒᤠᤴ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥᤃᤢᤱ᤹. ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤔᤧᤏᤠ᤺ᤴᤍᤢᤛᤡᤖ ᤕᤠ᤺ᤴᤍᤢᤱᤛᤡᤱ ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤱᤃᤠ᤹ ᤋᤧᤴᤎᤱᤅᤥ ᤔᤧᤰᤂᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤐᤢᤜᤠ᤹ ᤏᤢ ᤋᤠᤶᤓᤢᤱ ᤌᤰᤛᤠᤜᤠ᤹ ᤁᤢᤈᤠ ᤆᤠᤔᤠᤖᤧ ᤗᤠᤃᤡ ᤐᤡᤖᤢᤱᤛᤡᤱ᤹॥

⁸ ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤥ ᤀᤰᤋᤱᤒᤠ ᤔᤧᤰᤔᤠᤛᤡᤔᤧᤴ ᤋᤠᤖᤢᤱ᤹ ᤁᤴ ᤗᤠᤶᤒᤠ ᤁᤧᤒᤥᤱᤒᤠᤀᤠᤱ ᤁᤧᤒᤣ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ ᤆᤡᤈᤡᤱ ᤕᤱᤔᤠ ᤔᤧᤛᤡᤖᤥ ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢ᤹॥

⁹ ᤏᤡᤱᤔᤡᤜᤠ᤹ᤖᤧ ᤕᤧᤰᤕᤰᤁᤡᤴ ᤁᤡᤷᤃᤵ ᤔᤧᤃᤒᤢ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤕᤰᤕᤢᤱᤒᤠᤜᤠ᤹ ᤛᤧᤵᤔᤠ ᤔᤧᤃᤥ᤺ᤳᤋᤢᤛᤡ᤹॥ ᤂᤧᤱᤜᤠ᤹ ᤀᤰᤋᤱᤒᤠ ᤁᤡᤵᤔᤠᤃᤧᤄᤢᤒᤠ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤀᤡᤈᤥᤀᤥ ᤔᤧᤎᤠᤀᤠᤱ ᤔᤏᤠᤜᤠ᤹ ᤀᤠᤒᤠᤅᤣ ᤔᤧᤈᤠᤛᤡᤱ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤂᤢᤴᤇᤡ᤹ ᤛᤠᤜᤠ᤹ᤖᤧ ᤏᤧᤰᤛᤠ᤺ᤴᤏᤠᤱ ᤔᤧᤈ᤹᤺॥

¹⁰ “‘ᤂᤧᤴ ᤀᤣᤃᤠᤱ ᤕᤷᤔᤡᤕᤠᤀᤣ. ᤂᤧᤴ ᤂᤠᤶ ᤁᤢ᤺ᤴᤍᤠ᤺ᤴ ᤂᤧᤏᤧ᤹ᤏᤢ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤑᤕ᤺ᤵ ᤕ᤺ᤵᤛᤧ᤹.’

¹¹ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ—ᤀᤠᤱᤃᤠ᤹ ᤁᤴ ᤛᤢᤘᤠᤱᤜᤠ᤹ ᤏᤢ ᤁᤴ ᤕᤧᤰᤕᤰᤁᤡᤴ ᤌᤧᤕᤢ᤺ᤳ ᤌᤧᤕᤢ᤺ᤳ ᤕᤢ᤺ᤳᤋᤢᤱᤛᤡᤱ᤹ ᤜᤧᤰᤁᤩᤠᤱ ᤁᤥ᤺ᤶᤓᤠᤗᤩᤠ᤺ᤸᤗᤧ ᤁᤧᤜᤧ᤺ᤵᤐᤠ ᤁᤢᤃᤢ᤺ᤴᤍᤠᤴ ᤜᤧᤰᤁᤣ ᤂᤧᤱᤜᤠ᤹ ᤕᤠᤶᤔᤥ ᤁᤠᤶᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤔᤧᤒᤥᤱ᤹॥ ᤂᤧᤵᤔᤥ ᤔᤏᤠᤜᤠ᤹ᤖᤧ ᤆᤣᤜᤠ᤹ ᤗᤢᤵᤔᤠᤍᤧᤴ ᤂᤥᤔᤧᤴᤍᤧᤳᤋᤣ ᤌᤠᤖᤡᤰ ᤆᤣᤜᤠ᤹ ᤔᤧᤗᤢᤵᤋᤢᤛᤡ᤹॥

¹² ᤁᤴ ᤕᤧᤰᤕᤰᤁᤡᤴ ᤏᤢ ᤁᤵᤔᤥᤒᤠ ᤕᤰᤕᤢᤱᤒᤠᤜᤠ᤹ᤀᤠᤱ ᤜᤧᤰᤁᤣᤀᤣ ᤆᤥᤃᤢᤱᤛᤡᤱ ᤜᤧᤰᤁᤩᤠᤱ ᤋᤥᤐᤣᤋᤀᤥ ᤜᤧᤰᤁᤣ ᤆᤥᤃᤢᤱᤛᤡᤱ ᤑᤠ᤹ᤀᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥

¹³ ᤕᤖᤢᤛᤗᤧ᤺ᤶᤔᤥᤒᤠ ᤜᤡᤶᤜᤠ᤹. ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤡᤶᤜᤠ᤹ ᤏᤢ ᤂᤧᤴ ᤁᤧᤖᤧᤰ ᤜᤡᤶᤜᤠ᤹ᤀᤥᤒᤠ ᤀᤠ᤺ᤶᤓᤥ᤹ᤜᤠ᤹ᤀᤥ ᤋᤠᤱᤛᤠᤱᤒᤥᤒᤠ ᤔᤧᤴᤇ᤻ᤕᤠᤒᤪᤢᤰᤔᤠ ᤂᤣ᤺ᤶᤛᤡᤰᤐᤠᤜᤠ᤹ᤀᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤀᤠᤱ ᤘᤠ᤹ ᤂᤧᤒᤩᤠᤱ ᤁᤢᤛᤡᤱ ᤏᤡ᤺ᤳᤔᤧᤴᤍᤧᤵᤔᤏᤠᤒᤠ ᤛᤠᤶᤔᤠᤱᤜᤠ᤹ᤀᤥ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤀᤠᤱ ᤘᤠ᤹. ᤂᤧᤱᤜᤠ᤹ ᤁᤧᤖᤧᤰ ᤋᤥᤐᤣᤋ ᤜᤧᤰᤁᤣ ᤀᤠᤛᤢᤳᤌᤥ ᤔᤧᤒᤥᤱ᤹॥’”

¹⁴ ᤂᤧᤴ ᤀᤣᤃᤠᤱ ᤕᤷᤔᤡᤕᤠᤴ ᤋᤥᤐᤣᤋᤗᤠᤶ ᤏᤢ᤺ᤰᤂᤧ. ᤂᤧᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤔᤏᤠᤜᤠ᤹ ᤔᤧᤵᤔᤠᤛᤡ ᤐᤠᤱᤄᤢᤀᤠᤱ ᤘᤕᤧ॥ ᤂᤢᤏᤧ᤹ ᤐᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤗᤰᤂᤢᤶᤔᤥ ᤕᤧᤶᤛᤡᤱᤅᤠᤱ ᤔᤧᤳᤋᤢᤛᤡ.

¹⁵ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤏᤢ ᤁᤢᤒᤣᤛᤠᤱᤒᤠ ᤁᤧᤖᤧᤰ ᤆᤢᤈᤢᤰᤛᤠ ᤕᤧᤰᤕᤰᤜᤠ᤹ᤀᤥ ᤀᤠᤒᤠᤅᤣ ᤐᤠ᤺ᤳᤋᤢᤱᤒᤠ ᤁᤧᤖᤧᤰ ᤂᤢᤶᤍᤡᤱᤜᤠ᤹ ᤋᤠᤖᤢᤱ᤹ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤜᤠᤍᤡᤱ ᤁᤧᤎᤰᤐᤠ ᤁᤧᤈᤥᤃᤡ ᤜᤧᤰᤁᤩᤠᤱ ᤀᤠᤒᤠ᤺ᤴᤈᤠ᤺ᤰᤁᤡᤴ ᤁᤧᤱᤄᤧᤵᤛᤢᤶᤔᤡᤴᤗᤥ॥’”