ᤕᤷᤔᤡᤕᤠ 18 - LIFOTNT

ᤑᤢᤈᤡᤰ ᤁᤧᤈᤥ᤺ᤰᤐᤠ ᤏᤢ ᤛ᤹ᤔᤏᤠᤒᤠ ᤂᤠᤶ

¹ ᤕᤜᤘᤣ ᤍᤠᤱᤒᤠᤗᤠᤶ ᤕᤷᤔᤡᤕᤠᤀᤥ ᤀᤰᤋᤱᤒᤠ ᤀᤡᤱᤄᤱ ᤁᤧᤖᤧ.

² “ᤕᤥ ᤑᤢᤈᤡᤰ ᤁᤧᤈᤥ᤺ᤰᤐᤠ ᤁᤥ᤺ᤶᤓᤠᤗᤩᤠ᤺ᤸᤗᤧ ᤁᤢᤜᤡᤶᤔᤥ ᤐᤣᤃᤧ᤹. ᤂᤧᤵᤔᤥ ᤀᤠᤱᤃᤠ᤹ ᤂᤧᤏᤧ᤹ ᤀᤠᤀᤡᤱᤄᤱᤅᤡᤴ ᤔᤧᤳᤏᤧ॥”

³ ᤀᤠᤱᤃᤠ᤹ ᤁᤥ᤺ᤶᤓᤠᤗᤩᤠ᤺ᤸᤗᤧ ᤁᤢᤜᤡᤶᤔᤥ ᤐᤣᤃᤠᤱ ᤜᤧᤰᤁᤩᤠᤱ ᤂᤧᤸᤗᤧ ᤂᤠᤶ ᤛ᤹ᤔᤠ ᤆᤠᤰᤁᤠᤀᤥ ᤌᤧᤔᤠᤀᤡ ᤆᤥᤃᤢᤖ ᤐᤳᤇᤧᤒᤠ ᤏᤡᤛᤢᤱ॥

⁴ ᤂᤧᤸᤗᤧ ᤂᤠᤶᤔᤡᤸᤗᤧ ᤆᤥᤃᤢᤖ ᤐᤳᤇᤧᤒᤠ ᤑᤢᤈᤡᤰᤁᤧᤴ ᤏᤢᤒᤠ ᤔᤧᤒᤥ᤺ᤰᤂᤧᤴ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤛ᤹ᤔᤏᤠᤒᤠ ᤂᤠᤶᤗᤠᤶᤒᤠ ᤂᤢᤏᤧ᤹ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤘᤣ᤹ ᤑᤢᤈᤡᤰ ᤆᤥᤃᤢ॥

⁵ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ.

⁶ “ᤁᤥ᤺ᤶᤓᤠᤗᤩᤠ᤺ᤸᤗᤧ ᤂᤠᤶᤔᤡᤴ ᤑᤧᤳᤗᤠ᤹ᤖᤧᤀᤠᤱ ᤕᤠᤶᤔᤥ ᤆᤥᤃᤢᤒᤠ ᤜᤧᤰᤁᤣ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ ᤔᤧᤵᤔᤠᤛᤡ ᤀᤠᤱᤃᤠ᤹ ᤕᤢᤰ ᤔᤧᤃᤳᤋᤠᤶᤒᤡ᥅ ᤀᤠᤱᤃᤠ᤹ ᤀᤠᤜᤢᤰᤁᤥ ᤂᤡᤏᤡ᤹ᤃ ᤁᤥ᤺ᤶᤓᤠᤗᤩᤠ᤺ᤸᤗᤧ ᤁᤢᤜᤢᤰᤁᤥᤒᤠ ᤛ᤹ᤔᤏᤠᤒᤠ ᤂᤠᤶ ᤜᤧᤰᤁᤣ ᤁᤧᤗ᤹ᤖᤡ॥

⁷ ᤁᤢᤓᤠ ᤕᤧᤴᤏᤥ ᤁᤢᤓᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤡᤃᤪ ᤜᤠᤱᤈᤢᤶᤜᤠ᤹ ᤀᤠᤱᤃᤠ᤹ ᤜᤠ᤹ᤕᤠᤰ ᤀᤠ᤺ᤰᤂᤢᤱᤛᤡᤱ᤹. ᤔᤧᤰᤂᤢᤱᤛᤡᤱ᤹ ᤀᤡᤃᤪ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤛᤡᤱ ᤐᤠ᤺ᤳᤋᤢᤱ᤹.

⁸ ᤁᤖ ᤂᤧᤴ ᤛᤢᤘᤠᤱᤅᤡᤴ ᤗᤠᤕᤥᤗᤠᤶ ᤜᤡ᤺ᤴᤏᤧᤓᤃᤪ ᤀᤠᤱᤃᤠ᤹ ᤌᤧᤔᤠ ᤆᤥᤃᤢᤱ ᤑᤠ᤹ᤀᤠᤱ ᤐᤠ᤺ᤳᤋᤢᤱᤅᤠᤱ ᤘᤕᤠᤱ. ᤜᤧᤰᤁᤣ ᤔᤧᤈᤥᤰᤁᤠᤴ॥

⁹ ᤁᤢᤓᤠ ᤕᤧᤶᤔᤥ ᤁᤢᤓᤠ ᤔᤧᤴᤇᤠᤶ ᤛᤢᤘᤠᤱᤅᤡᤴ ᤀᤡᤃᤪ ᤜᤠᤱᤈᤢᤶᤔᤡᤴ ᤀᤠᤱᤃᤠ᤹ ᤑᤥ᤺ᤰᤂᤢᤱᤛᤡᤱ ᤀᤡᤃᤪ ᤕᤢᤰᤛᤡᤱ ᤆᤥᤃᤢᤱᤛᤡᤱ ᤑᤠ᤹ᤀᤠᤱ ᤐᤠ᤺ᤳᤋᤢᤱᤒᤡᤗᤠ.

¹⁰ ᤁᤖ ᤂᤧᤴ ᤛᤢᤘᤠᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤏᤧᤓᤃᤪ ᤀᤠᤱᤃᤠ᤹ ᤜᤧᤴ ᤆᤥᤃᤢᤱ ᤑᤠ᤹ᤀᤠᤱ ᤐᤠ᤺ᤳᤋᤢᤱᤅᤠᤱ ᤘᤕᤠᤱᤒᤠ ᤜᤧᤰᤁᤣ ᤔᤧᤈᤥᤃᤢᤱᤅᤡᤴ॥

¹¹ “ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤕᤰᤕᤢᤱᤒᤠᤜᤠ᤹ ᤔᤧᤳᤋᤧ᤹ᤛᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤜᤠᤒᤠ ᤁᤴ ᤐᤠ᤺ᤳᤋᤢ—ᤀᤥᤔᤧᤳᤋᤧᤶᤔᤧ᤹. ᤀᤠᤱᤃᤠ᤹ ᤂᤧᤏᤡ᤹ ᤂᤠᤵᤐᤢᤌᤩ᤺ᤱ ᤁᤧᤒᤥ᤺ᤰᤂᤡᤖ ᤆᤥ᤺ᤰᤔᤠ ᤏᤢ ᤂᤧᤏᤡ᤹ ᤔᤧᤱᤔᤠᤗᤠᤶ ᤆᤥᤃᤢᤱᤗ ᤘᤠ᤹ᤀᤠ॥ ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤗᤠᤕᤥᤒᤠ ᤜᤡᤱᤔᤴ ᤗᤧᤖᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤕᤧᤵᤗᤧᤰᤁᤡᤴ ᤋᤥ᤺ᤴᤍᤧᤶᤔᤧ᤹॥’

¹² “ᤁᤖ ᤂᤧᤱᤜᤠ᤹ᤖᤧ ᤀᤰᤋᤱᤒᤠ ᤏᤢᤃᤵ ᤁᤧᤶᤒᤡ. ‘ᤀᤠᤏᤡᤃᤣ ᤌᤣᤀᤠᤱ ᤜᤧᤰᤁᤣ ᤆᤥᤃᤢᤶᤒᤧ᥅ ᤀᤠᤜᤠ᤹. ᤀᤠᤏᤡᤃᤣ ᤜᤧᤰᤁᤣ ᤔᤧᤈᤥᤃᤢᤶᤒᤧᤴ॥ ᤀᤠᤏᤡᤃᤣ ᤀᤠᤒᤠᤅᤣ ᤏᤡᤱᤘᤠ᤹ ᤌᤠᤵᤌᤠᤵ ᤜᤠᤍᤡᤱ ᤁᤧᤎᤰᤐᤠ ᤏᤢ ᤋᤠᤰᤁᤧᤓᤧ᤹ᤒᤠᤀᤣ ᤐᤥ᤺ᤰᤂᤡᤃᤧᤖ ᤘᤕᤡᤃᤧᤖᤥ॥’”

¹³ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤛᤡᤛᤠᤃᤧᤴ ᤀᤠᤛ᤻ᤛᤠ ᤔᤧᤴᤇ᤻ᤕᤠ ᤀᤡᤛᤪᤠᤀᤡᤗᤖᤧ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ᤖᤥ. ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤛᤧ᤺ᤴᤗᤠᤵᤋᤧᤶᤛᤡᤶᤔᤧ᤹ᤀᤥ. ᤀᤰᤋᤱᤒᤠᤃ ᤋᤃᤡ ᤀᤠᤑᤠᤸᤗᤧᤀᤠᤱ ᤐᤥ᤺ᤰᤂᤧᤒᤠ ᤜᤥᤵᤗᤥ॥

¹⁴ ᤗᤧᤒᤏᤠᤏᤒᤠ ᤁᤣ᤺ᤶᤒ ᤁᤣ᤺ᤶᤒᤠ ᤕᤠᤰᤐᤣ᤹ᤜᤠ᤹ᤀᤥ ᤏᤠ᤺ᤱᤅᤡᤴ ᤀᤠᤓᤧᤸᤗᤧᤀᤠᤱ ᤔᤧᤕᤥ᤺ᤴᤏᤧᤴᤗᤥ ᤂᤧᤵᤔᤥᤒᤠ ᤁᤧᤛᤣ᤺ᤶᤒᤠ ᤁᤥ᤺ᤰᤔᤠ ᤑᤠᤱᤈᤱᤗᤠᤶ ᤁᤧᤕᤢᤒᤠ ᤕᤰᤛᤠᤱᤘᤠᤜᤠ᤹ᤀᤥᤒᤠ ᤆᤫᤠ᤺ᤳᤋᤡᤴ ᤀᤠᤑᤠᤸᤗᤧᤀᤠᤱ ᤔᤧᤈᤵᤋᤢᤴᤗᤥ॥

¹⁵ ᤁᤖ ᤀᤠᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤓᤣ᤺ᤳᤇᤠᤱᤅᤠᤱ ᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤜᤏᤧᤒᤠ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤀᤠᤱ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤀᤠᤵᤑᤣᤰ ᤗᤠᤱᤔᤧᤄᤣ᤺ᤰᤐᤠ ᤗᤠᤶᤔᤥ ᤔᤧᤄᤛᤡᤱᤅᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤋᤃᤡᤒᤠ ᤗᤠᤶᤔᤡᤴ ᤏᤡᤱᤘᤠ᤹ ᤔᤧᤔᤢ᤺ᤳᤇᤢᤀᤠᤱ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤆᤡᤜᤢ᤹ᤜᤢ᤹ᤒᤠ ᤗᤠᤶᤔᤥ ᤔᤧᤎᤠᤛᤡᤱᤅᤠᤱ ᤔᤧᤘᤠ᤹ᤖᤥ॥

¹⁶ ᤂᤧᤱᤜᤠ᤹ᤖᤧ ᤁᤴ ᤗᤠᤈᤣᤴ ᤕᤠᤶᤃᤧᤛᤡᤱᤒᤠ ᤔᤧᤈᤥᤃᤢᤀᤠᤱ ᤏᤧᤖᤥ. ᤂᤧᤒᤩᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤁᤴ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤐᤥᤱᤗᤥ. ᤂᤧᤴ ᤔᤧᤏᤡᤛᤢᤀᤠᤱ ᤂᤧᤵᤔᤥᤗᤠᤶᤒᤠ ᤗᤠᤱᤃᤧᤄᤣ᤺ᤰᤐᤠᤜᤠ᤹ ᤁᤧᤖᤧᤰ ᤆᤡᤈᤡᤱ ᤕᤱᤔᤠ ᤔᤧᤛᤡᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤔᤠᤀᤠᤱ ᤀᤠᤒᤠᤅᤣ ᤌᤧᤃᤣ᤺ᤰᤁᤡᤴ ᤜᤡᤸᤗᤡᤱ ᤜᤡᤸᤗᤡᤱ ᤔᤧᤜᤡᤰᤂᤢᤖᤥ॥

¹⁷ ᤏᤠᤶᤃᤧᤳ ᤐᤡᤛᤠᤱᤒᤠ ᤛᤢᤖᤡ᤺ᤳᤔᤠᤸᤗᤧ ᤂᤠᤶᤜᤡ᤺ᤰᤁᤡᤴ ᤑᤧᤛᤢᤖᤥ ᤜᤧᤰᤁᤣᤗ᤹ᤖᤡᤰᤁᤣ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤑᤢᤳᤗᤢᤶ ᤛᤧᤛᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤠᤛᤡᤔᤠ ᤕᤧᤴᤏᤥ ᤀᤠᤏᤠᤖᤠᤴ ᤔᤣ᤺ᤴᤍᤢᤰᤗᤥ ᤁᤖ ᤀᤠᤱᤃᤠ᤹ ᤀᤠᤀᤣ᤺ᤰᤌᤠ᤺ᤰᤔᤧᤴ ᤜᤡᤛᤢᤱ ᤐᤡᤖᤢᤱᤛᤡᤱᤗᤥ॥”

ᤕᤷᤔᤡᤕᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ

¹⁸ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤑᤧᤖᤧᤶᤔᤧ᤹. ᤕᤷᤔᤡᤕᤠᤴ ᤐᤠ᤺ᤳ ᤔᤧᤶᤒᤠᤱᤔᤠᤖᤧ ᤗᤠᤃᤡ ᤀᤠᤏᤡ᤹ ᤌᤣᤀᤡ ᤆᤥᤃᤢᤶ॥ ᤀᤠᤏᤡ᤹ ᤗᤠᤃᤡ ᤏᤡᤛᤠᤶ ᤁᤧᤜᤢ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ. ᤛᤢᤈᤠ ᤁᤧᤒᤡᤒᤠ ᤛᤡᤰᤁᤢᤶᤏᤡᤒᤠ ᤕᤧᤶᤒᤡᤳᤇᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤄᤱ ᤁᤧᤒᤠ᤺ᤵᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤢ᤺ᤴᤏᤧᤴ॥ ᤀᤠᤏᤡ᤹ ᤂᤢᤏᤧ᤹ ᤁᤢᤈᤠ᤺ᤳᤌᤡ ᤋᤣᤛᤢᤶ ᤐᤡᤖᤢᤶ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤒᤠ᤺ᤴᤏᤠᤱ ᤂᤧᤵᤛᤢᤶ ᤔᤣ᤺ᤴ॥”

¹⁹ ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤢᤱᤗᤥ. “ᤕᤜᤘᤣ ᤍᤠᤱᤒᤠᤀᤣ. ᤀᤠᤒᤣᤗᤡᤴ ᤂᤧᤵᤛᤧ᤹ᤀᤥ ᤜᤧᤰᤁᤩᤠᤱ ᤀᤠᤏᤡᤱᤔᤡᤜᤠ᤹ᤖᤧ ᤌᤧᤔᤠ ᤔᤧᤒᤠ᤺ᤳᤋᤢᤖ ᤔᤧᤒᤳ. ᤂᤧᤴᤏᤠᤱ ᤂᤧᤵᤛᤧ᤹ᤀᤥ॥

²⁰ ᤏᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤜᤠᤱᤛᤧᤶᤔᤡᤴ ᤌᤣ ᤋᤠᤵᤑᤧ᤺ᤶᤒᤠ ᤐᤥᤱᤒᤡ᥅ ᤁᤖ ᤂᤧᤱᤜᤠ᤹ᤖᤧᤃ ᤀᤠᤱᤃᤠ᤹ ᤐᤠ᤺ᤴᤏᤥ ᤌᤠᤔᤠ ᤑᤠ᤹ᤀᤠᤱ ᤗᤳᤇᤠ ᤗᤢᤶᤒᤠᤳ ᤔᤧᤍᤕᤢᤀᤠᤱ ᤏᤧᤖᤥ॥ ᤂᤧᤏᤧ᤹ ᤁᤧᤛᤠᤰᤁᤧᤴᤏᤡᤴ ᤂᤧᤱᤜᤠ᤹ᤀᤥ ᤔᤧᤎᤠᤏᤧᤴᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤧᤵᤔᤠᤱ ᤐᤣᤗᤡ ᤑᤠᤰᤁᤡ ᤐᤠᤖᤠᤱᤗᤥ. ᤂᤧᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ॥

²¹ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ ᤛᤠᤰᤔᤧᤴᤈᤠᤀᤣ ᤔᤧᤛᤡᤖᤖᤥ. ᤂᤧᤱᤜᤠ᤹ᤃ ᤜᤕᤱ ᤋᤧᤴᤎᤱᤅᤥ ᤔᤧᤛᤧᤖᤢᤛᤡᤖᤖᤥ. ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤠᤜᤠ᤹ ᤏᤢ ᤛᤠᤜᤠ᤹ ᤔᤧᤔᤠᤛᤢᤛᤡᤖᤖᤥ. ᤕᤧᤶᤒᤡᤳᤇᤠᤜᤠ᤹ ᤋᤢᤰᤔᤠ ᤗᤠ᤺ᤰᤔᤠ ᤔᤡᤱᤍᤣᤸᤗᤧ ᤔᤧᤛᤡᤖᤖᤥ ᤜᤧᤰᤁᤩᤠᤱ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ ᤌᤱᤅᤥ ᤔᤧᤛᤧᤖᤢᤛᤡᤖᤖᤥ॥

²² ᤜᤰᤆᤄᤳ ᤁᤢᤗᤢᤵ ᤌᤡᤰ ᤔᤏᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ ᤏᤠᤵᤔᤠᤛᤡᤖᤧ ᤗᤠᤃᤡ ᤐᤠᤱᤄᤧᤛᤧ᤹ᤀᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤡᤔᤠ ᤕᤱᤔᤠᤖᤧ ᤑᤡᤖᤡᤰ ᤑᤡᤖᤡᤰ ᤔᤧᤓᤡ᤺ᤰᤗᤖᤥ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤍᤧᤶᤛᤧ ᤗᤢᤶᤒᤠᤳ ᤔᤧᤍᤕᤢᤀᤠᤱ ᤏᤧᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤠ᤺ᤴᤏᤥ ᤌᤠᤔᤠ ᤑᤠ᤹ᤀᤠᤱ ᤀᤡᤈᤥ ᤔᤧᤍᤠ᤺ᤰᤋᤢᤀᤠᤱ ᤏᤧᤖᤥ॥

²³ ᤁᤖ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤛᤧᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤆᤧᤶᤓᤴ ᤔᤧᤈᤥᤃᤢᤖᤥ ᤂᤧᤴ ᤁᤧᤖᤧᤰ ᤂᤧᤏᤧ᤹ ᤁᤧᤍᤃᤡ ᤏᤢᤖᤡᤰᤁᤠᤱ ᤌᤠᤒᤧᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤢ᤹ᤀᤡᤓᤧᤶᤔᤠᤴ ᤗᤧᤵᤔᤡ ᤔᤧᤒᤡᤖᤧᤛᤧᤴᤏᤧ᤹ᤀᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤔᤧᤄᤧᤳᤋᤧᤴ ᤔᤧᤒᤡᤖᤧᤛᤧᤴᤏᤧ᤹ᤀᤥ॥ ᤂᤧᤱᤜᤠ᤹ ᤜᤠᤖᤡᤔᤧᤍᤠᤖ ᤕᤠ᤺ᤴᤍᤧᤛᤧ᤹ᤀᤠᤱ ᤛᤥ᤺ᤴᤍᤧᤛᤧ᤹ᤀᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤠᤰᤁᤧᤴ ᤐᤥ᤺ᤰᤐᤠ ᤜᤧᤰᤁᤣᤀᤣ ᤂᤧᤱᤜᤠ᤹ᤖᤧ ᤂᤥᤔᤠ ᤔᤧᤕᤠᤖᤢᤒᤠ ᤂᤢᤶᤍᤡᤱ ᤐᤡᤖᤧᤛᤧ᤹ᤀᤥ॥”