ᤕᤷᤔᤡᤕᤠ 17 - LIFOTNTᤕᤜᤢᤍᤠ᤺ᤸᤗᤧ ᤁᤢᤗᤠᤕᤥ ᤏᤢ ᤁᤢᤄᤢᤶᤍᤡᤱ 1 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤕᤜᤢᤍᤠᤒᤠ ᤔᤏᤠᤛᤣ. ᤂᤡᤏᤡ᤹ ᤗᤠᤕᤥᤴ ᤑᤧᤴᤈᤣ᤹ ᤏᤠᤰᤆᤠ᤺ᤸᤗᤧ ᤛᤠᤵᤛᤡᤱᤅᤠᤱ ᤘᤠ᤹ᤖᤥ॥ ᤂᤧᤴ ᤂᤡᤏᤡ᤹ ᤛᤡᤰᤗᤢᤱᤔᤥ ᤗᤢᤱᤛᤧᤖᤢᤱᤒᤠᤸᤗᤧ ᤁᤢᤛᤶᤔᤡᤸᤗᤧ ᤗᤰᤔᤏᤠᤀᤠᤱ ᤐᤳᤗᤥ ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤜᤠᤛᤥ᤺ᤰᤛᤥ᤺ᤰᤐᤠᤜᤠ᤹ᤀᤥ ᤁᤢᤓᤢᤱ ᤔᤧᤗᤰᤋᤢᤀᤠᤱ ᤐᤳᤗᤥ॥ 2 ᤜᤢᤶᤒᤧᤳ ᤁᤧᤍᤠᤵᤐᤠ ᤛᤖᤣ᤺ᤰᤕᤠ᤺ᤵᤐᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹ᤖᤧ ᤁᤢᤒᤣᤛᤠᤱᤒᤠ ᤜᤧᤰᤁᤩᤠᤱ ᤁᤣ᤺ᤶᤒ ᤁᤣ᤺ᤶᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤜᤧᤰᤁᤩᤠᤱ ᤀᤛᤣᤖᤠ ᤛᤠᤶᤔᤠᤱᤅᤡᤸᤗᤧ ᤁᤢᤛᤡᤳᤗᤠᤱᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤀᤣᤜᤠ᤹ᤖᤧᤀᤠᤱ ᤛᤧᤘᤠ ᤔᤧᤔᤧᤳᤋᤢᤖᤥ॥ 3 ᤗᤠᤈᤣ᤹ ᤁᤧᤖᤧᤰ ᤗᤠᤕᤥ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤗᤠᤈᤣ᤹ᤀᤥᤒᤠ ᤀᤠᤃᤥ᤺ᤰᤔᤠ ᤏᤢ ᤂᤡᤏᤡ᤹ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤣ᤺ᤶᤒ ᤁᤣ᤺ᤶᤒᤠᤍᤧᤴᤜᤠ᤹ ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤔᤡᤜᤠ᤹ ᤏᤠᤵᤔᤠ ᤋᤣ᤹ᤔᤠ ᤐᤠᤱᤄᤢᤱᤛᤡᤱᤗᤥ॥ 4 ᤀᤠᤱᤃᤠ᤹ ᤂᤧᤏᤡ᤹ ᤂᤥᤔᤠ ᤗᤰ ᤜᤧᤰᤁᤣ ᤐᤡᤏᤡᤱᤒᤠ ᤗᤠᤈᤣᤴ ᤂᤧᤏᤡ᤹ ᤗᤧᤵᤔᤠ ᤐᤥᤱᤗᤥ ᤜᤧᤰᤁᤩᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤠ ᤗᤠᤈᤣ᤹ᤀᤥ ᤂᤧᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤠᤱᤏᤡᤱᤗᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤛᤡᤰᤁᤧᤴ ᤔᤡ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤴ ᤜᤢᤖᤢᤜᤢᤖᤢᤏᤠ ᤛᤍᤠᤍᤡᤱ ᤋᤡ᤺ᤳᤗᤥ॥” ᤕᤧᤔᤧᤴᤍᤱᤒᤠ ᤛᤡᤰᤁᤢᤶᤒᤠ ᤐᤠ᤺ᤴᤔᤢᤖᤠᤜᤠ᤹ 5 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤧᤴ ᤔᤏᤠᤴ ᤛᤠᤱᤃᤪᤠ ᤔᤠᤱᤍᤣᤖᤧ ᤋᤧᤳᤋᤢᤖᤖᤥ. ᤜᤧᤰᤁᤩᤠᤱ ᤏᤠᤛᤡᤃᤧᤴ ᤌᤰᤁᤥᤒᤠ ᤔᤢᤰᤛᤠᤶᤔᤥ ᤋᤠ᤺ᤰᤐᤥ ᤁᤧᤈᤥ᤺ᤰᤐᤧᤸᤗᤧ ᤀᤠᤱᤃᤠ᤹ᤗᤠᤶ ᤁᤢᤛᤡᤰᤗᤢᤱᤔᤠᤴ ᤗᤠ᤺ᤳᤗᤠ᤺ᤳ ᤆᤥᤃᤢᤖᤥ॥ 6 ᤂᤧᤱᤃ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥᤒᤠ ᤐᤥ᤺ᤰᤗᤠ ᤜᤧᤰᤁᤣ ᤗ᤹ᤖᤥ. ᤂᤧᤴ ᤁᤧᤜᤣᤒᤠ ᤏᤢ ᤔᤢᤖᤧᤰ ᤂᤠᤖᤧᤰᤐᤠ ᤀᤣ᤺ᤰᤛᤠᤍᤧᤴᤏᤥ ᤕᤢᤱᤗᤥ. ᤌᤣᤀᤠᤱ ᤔᤧᤸᤗᤡᤱᤔᤏᤠᤒᤠ ᤕᤢᤶ ᤁᤧᤗᤠ᤺ᤰᤐᤠ ᤂᤠᤶᤔᤥ ᤘᤠ᤹ᤖᤥ. ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤏᤢ᤹ᤏᤧᤴ ᤔᤧᤍᤠᤏᤧᤴᤗᤥ॥ 7 “ᤁᤖ ᤂᤧᤴ ᤔᤏᤠ᤺ᤱᤃ ᤔᤢ᤹ᤀᤡᤛᤠᤒᤠᤖᤥ. ᤂᤧᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤁᤢᤏᤡᤱᤘᤠ᤹ ᤕᤢᤰᤂᤢᤖᤥ ᤂᤧᤸᤗᤧᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶ ᤀᤥᤔᤧᤳᤋᤢᤖᤥ॥ 8 ᤂᤧᤱᤃ ᤕᤱᤄᤱᤅᤡᤸᤗᤧ ᤁᤢᤒᤣᤛᤠᤱ ᤗᤣ᤺ᤵᤔᤏᤠᤒᤠ ᤛᤡᤱᤒᤢᤱ ᤜᤧᤰᤁᤣ ᤗ᤹ᤖᤥ. ᤂᤧᤸᤗᤧ ᤁᤢᤛᤠ᤺ᤵᤐᤡᤴ ᤆᤫᤠ᤺ᤳ ᤛᤡᤃᤠᤱ ᤌᤠᤖᤡᤰ ᤁᤧᤳᤋᤠᤱ ᤏᤧᤖᤥ॥ ᤜᤠᤱᤘᤠᤔᤠ ᤕᤧᤴᤏᤥ ᤂᤧᤴ ᤌᤣᤀᤠᤱ ᤔᤧᤒᤥᤱᤏᤧᤴᤗᤥ ᤂᤧᤸᤗᤧ ᤁᤢᤓᤧᤰᤘᤠᤜᤠ᤹ ᤀᤠᤓᤧᤸᤗᤧᤛᤠᤱ ᤛᤖᤣ᤺ᤰᤕᤠᤖᤡᤰ ᤐᤳᤗᤥ॥ ᤛᤠᤱᤕᤠᤰᤁᤠᤱ ᤏᤠᤶᤗᤠ᤺ᤱᤅᤡᤸᤗᤧᤀᤠᤱ ᤂᤧᤴ ᤌᤣᤀᤠᤱ ᤔᤧᤗ᤹ᤏᤧᤴᤗᤥ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤵᤑᤠᤸᤗᤧᤛᤠᤱ ᤁᤢᤈᤠ᤹ ᤌᤥ᤺ᤰᤁᤠᤱ ᤐᤳᤗᤥ॥ 9 “ᤔᤏᤠ᤺ᤸᤗᤧ ᤁᤢᤏᤡᤱᤘᤠᤴ ᤀᤡᤱᤗᤧᤰᤁᤣ ᤆᤥᤰᤗᤥ ᤂᤧᤴ ᤜᤧᤰᤋᤱᤒᤠ ᤀᤡᤱᤗᤧᤰᤐᤠ ᤘᤣ᤹ ᤌᤣᤀᤠᤱ ᤜᤥᤵᤗᤥ. ᤂᤧᤴ ᤘᤣ᤺ᤳᤗ ᤆᤥ᤺ᤰᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ 10 ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤁᤥ᤺ᤳᤋᤢᤱᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤠᤴ ᤀᤠᤱᤃᤠ᤹ ᤛᤠ᤹ᤖᤢᤱᤗᤥ॥ ᤂᤧᤱᤜᤠ᤹ ᤁᤧᤖᤧᤰᤗᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰ ᤁᤢᤀᤡᤛᤡᤰ ᤂᤢᤴᤇᤡ᤹ ᤜᤡᤱᤔᤴᤏᤥ ᤂᤥᤔᤠ ᤔᤧᤕᤠᤖᤢᤒᤠ ᤋᤢᤶᤄᤥ᤺ᤴ ᤀᤠᤱᤃᤠ᤹ ᤂᤧᤱᤜᤠ᤹ ᤐᤡᤖᤢᤱᤛᤡᤱᤗᤥ॥” ᤕᤷᤔᤡᤕᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤁᤢᤏᤡᤱᤘᤠ᤹ ᤕᤢᤰᤂᤢ 11 ᤑᤧᤴᤕᤠ᤺ᤶᤒᤰᤗᤠᤶ ᤕᤠᤱᤛᤠᤁᤢᤴᤎᤣ ᤁᤧᤎᤰᤐᤠ ᤔᤏᤠ᤺ᤱᤃ ᤐᤢ ᤜᤧᤰᤋᤱᤒᤠᤖᤥ. ᤂᤧᤴ ᤐᤢ᤺ᤸᤗᤧ ᤘᤣ᤹ᤀᤡᤸᤗᤧ ᤁᤢᤎᤡ᤺ᤴᤏᤥᤗᤠᤶᤒᤠ ᤁᤢᤛ᤻ᤛᤠ ᤗ᤺ᤳᤋᤢᤛᤡᤖᤥ॥ ᤂᤢᤏᤧ᤹ ᤁᤢᤜᤡᤱᤔᤴ ᤁᤢᤓᤪᤧ᤺ᤱ ᤁᤧᤳᤋᤡᤸᤗᤧ ᤂᤧᤴ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤂᤢᤏᤧ᤹ ᤗᤧᤖᤢᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤡᤛᤡ ᤌᤠᤖᤡᤰ ᤂᤧᤴ ᤀᤍᤱ ᤐᤥᤱᤗᤥ॥ 12 ᤀᤠᤏᤡ᤹ ᤔᤠᤱᤜᤡᤶᤔᤡᤱᤃ ᤔᤡᤔᤡᤍᤡᤱᤃᤧᤴ ᤜᤠᤱᤕᤢᤰᤏᤠ ᤜᤧᤰᤋᤱᤒᤠ ᤆᤥᤰᤗᤥ ᤂᤧᤱᤃ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥᤀᤣ ᤁᤣ᤺ᤶᤒᤠ ᤁᤥ᤺ᤰᤔᤠᤀᤥ ᤕᤢᤱᤗᤥ॥ 13 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤀᤡᤛᤪᤠᤀᤡᤗᤖᤧ ᤁᤢᤏᤡᤱᤛᤠᤱᤏᤧᤖᤥ॥ ᤂᤧᤏᤧ᤹ ᤁᤧᤏᤠ᤹ᤒᤠᤜᤠ᤹ ᤁᤧᤖᤧᤰ ᤛᤡᤖᤡᤱᤔᤔᤥ ᤔᤧᤎᤠᤖᤥ. ᤂᤠᤶᤜᤡ᤺ᤰᤁᤥ ᤛᤠᤵᤔᤏᤠᤒᤠ ᤔᤡᤱᤜᤠ᤹ ᤜᤧᤰᤁᤣ ᤂᤧᤱᤜᤠ᤹ ᤔᤧᤔᤠ ᤔᤧᤒᤣ᤺ᤰᤗᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤕᤜᤘᤣ ᤍᤠᤱᤒᤠ ᤀᤠᤜᤡᤱᤜᤡᤱᤒᤠ ᤁᤧᤒᤢᤶᤒᤠ ᤆᤫᤠ᤺ᤳᤋᤡᤴ ᤁᤧᤶᤏᤠ᤹ᤖᤧᤀᤠᤱ ᤔᤧᤘᤠ᤹ᤖᤥ॥ 14 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤀᤠᤱᤃᤠ᤹ ᤘᤣ᤺ᤴᤍᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤘᤣ᤺ᤳ ᤘᤣ᤺ᤳᤋᤠᤖᤥ. ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ ᤜᤧᤰᤁᤩᤠᤱ ᤜᤡᤱᤅᤠᤖᤥ॥ ᤀᤠᤱᤃᤠ᤹ ᤂᤧᤏᤧ᤹ᤀᤣ ᤁᤧᤏᤠᤖᤠ ᤑᤥᤛᤢᤱᤗᤥ᥄ 15 ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤰᤂᤣ ᤔᤧᤔᤧᤳᤋᤠᤖᤥ. “ᤕᤜᤘᤣ ᤍᤠᤱᤒᤧᤸᤗᤧ ᤐᤡᤖᤡᤃᤧᤒᤠ ᤁᤢᤒᤠ᤺ᤴᤈᤠᤰᤁᤡᤴ ᤀᤠᤳᤋᤥ ᤘᤠ᤹ᤒᤣ᥅ ᤂᤢᤏᤧ᤹ ᤂᤧᤴ ᤐᤠ᤺ᤴᤜᤠ᤹ ᤁᤧᤖᤧᤰ ᤆᤥᤃᤢᤖᤖᤥ᥄” 16 ᤕᤜᤘᤣ ᤍᤠᤱᤒᤠᤀᤣ. ᤁᤧᤔᤏᤠᤜᤠ᤹ ᤀᤥᤔᤧᤵᤔᤠᤛᤡ ᤀᤠᤕᤠ᤺ᤶᤒᤰᤁᤡᤴ ᤔᤧᤸᤗᤧᤳᤋᤣ ᤁᤳᤋᤢᤱᤗᤥ॥ ᤀᤠᤱᤃᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤰᤔᤠᤛᤡᤔᤧᤴ ᤋᤠᤖᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤏᤧᤴᤗᤥ॥ ᤂᤧᤱᤜᤠ᤹ᤀᤥ ᤋᤢᤰᤂᤣ ᤆᤠᤔᤠ ᤕᤧᤴᤏᤡᤴ ᤋᤠᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤴᤈᤥ᤺ᤰᤐᤠᤴᤗᤥ॥ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤜᤧᤴ ᤐᤠ᤺ᤳᤋᤢᤱ. ᤂᤧᤴ ᤂᤧᤏᤧ᤹ ᤁᤧᤏᤡᤛᤢᤖᤥ॥ 17 ᤀᤠᤗᤠᤃᤡ ᤂᤧᤏᤧ᤹ ᤁᤡᤵᤔᤠ ᤁᤧᤒᤥᤱᤒᤠ ᤔᤧᤒᤥ᤺ᤰᤂᤧᤴᤏᤧ᤹ᤀᤥ. ᤕᤧᤳᤋᤢᤰᤂᤣ ᤋᤢᤶᤔᤠ ᤕᤧᤴᤏᤥ ᤂᤧᤏᤧ᤹ᤀᤣ ᤀᤠᤀᤡ᤺ᤶᤛᤡᤱᤔᤠᤍᤧᤴᤏᤧᤖᤥ॥ 18 ᤕᤠᤵᤔᤡ ᤁᤧᤄᤢᤶᤒᤠᤜᤠ᤹ᤀᤥ ᤋᤠᤵᤑᤧ᤺ᤶᤒᤠ ᤀᤡᤱ ᤋᤠᤖᤧ᤹ᤀᤥ ᤁᤖ ᤀᤠᤈᤠ᤺ᤳᤌᤡ ᤐᤣ᤺ᤰᤔᤠᤗᤠᤶ ᤛᤧ᤺ᤵᤋᤠᤱᤅᤧ᤹ᤀᤥ. ᤕᤜᤘᤣ ᤍᤠᤱᤒᤠᤀᤣ. ᤂᤧᤱᤜᤠ᤹ ᤁᤡᤔᤠ ᤕᤱᤔᤠᤀᤥ ᤌᤠᤛᤧᤛᤧ᤹ᤀᤥ ᤁᤖ ᤀᤠᤱᤃᤠ᤹ ᤁᤡᤔᤠ ᤕᤱᤔᤠᤗᤠᤶ ᤛᤧ᤺ᤵᤋᤠᤱᤅᤧ᤹ᤀᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤋᤢᤰᤂᤣ ᤆᤠᤔᤠ ᤕᤧᤴᤏᤡᤴ ᤋᤠᤖᤧ᤹ᤀᤥ ᤂᤧᤶᤒᤩᤠᤱ ᤂᤧᤱᤜᤠ᤹ ᤆᤡᤕᤢ᤺ᤳ ᤆᤡᤕᤢ᤺ᤳ ᤕᤢ᤺ᤳᤋᤧᤛᤧ᤹ᤀᤥ॥ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ 19 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤕᤷᤔᤡᤕᤠᤀᤣ. ᤂᤧᤏᤧ᤹ ᤐᤣᤃᤧ᤹ᤀᤠᤱ ᤕᤜᤢᤍᤠᤒᤠ ᤜᤠᤱᤜᤠ᤹ ᤛᤡᤃᤠᤱ ᤗᤠ᤺ᤵᤔᤠ ᤏᤢ ᤗᤠ᤺ᤰᤁᤠᤳ ᤗ᤺ᤶᤔᤠ ᤕᤖᤢᤛᤗᤧ᤺ᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤕᤧᤒᤧ᤹॥ ᤂᤧᤴ ᤀᤣᤃᤠᤱ ᤕᤖᤢᤛᤗᤧ᤺ᤶᤔᤥᤒᤠ ᤘᤣ᤹ ᤁᤧᤖᤧᤰ ᤕᤶᤒᤠ ᤋᤠ᤺ᤰᤜᤴᤜᤠ᤹ᤀᤥ ᤐᤣᤃᤧ᤹॥ 20 ᤕᤜᤢᤍᤠᤒᤠ ᤜᤠᤱᤜᤠ᤹. ᤁᤧᤖᤧᤰ ᤀᤠᤔᤏᤠᤜᤠ᤹ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥᤒᤠ ᤁᤧᤖᤧᤰ ᤕᤰᤕᤢᤱᤒᤠᤜᤠ᤹ ᤏᤢ ᤂᤧᤴ ᤔᤠ ᤗᤠᤶᤎᤣ᤺ᤵᤐᤠᤜᤠ᤹ᤀᤥᤗᤠᤶ ᤁᤧᤗᤠ᤺ᤵᤐᤠ ᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ ᤔᤧᤳᤋᤧᤛᤧ᤹॥ 21 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤂᤡᤏᤡ᤹ ᤌᤧᤔᤠ ᤁᤰᤁᤠᤱ ᤔᤧᤃᤢᤕᤧᤶᤔᤡᤴᤏᤧ᤹ ᤂᤧᤒᤩᤠᤱ ᤕᤖᤢᤛᤗᤧ᤺ᤶᤔᤥᤒᤠ ᤂᤧᤴ ᤔᤠ ᤗᤠᤶᤎᤣ᤺ᤵᤐᤠᤜᤠ᤹ᤀᤥᤗᤠᤶ ᤌᤧᤔᤠ ᤁᤰᤁᤠᤱ ᤔᤧᤃᤢᤕᤧᤶᤔᤡᤴᤏᤧ᤹ᤀᤠᤱ ᤛᤡᤃᤠᤱ ᤔᤧᤗᤠᤛᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤏᤡᤱ᤹॥ 22 ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤂᤧᤏᤡ᤹ ᤜᤡᤶᤔᤥᤗᤠᤶᤒᤠ ᤌᤣ ᤐᤠ᤺ᤴᤜᤠ᤹ᤀᤠᤱ ᤔᤧᤃᤢᤕᤧᤶᤔᤡᤴᤏᤧ᤹ᤀᤠᤱ ᤗᤠ᤺ᤰᤁᤠᤳ ᤔᤧᤗ᤺ᤳᤋᤧᤶᤔᤡᤴᤏᤧ᤹॥ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤂᤡᤏᤡ᤹ ᤌᤣᤀᤠᤱ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤀᤠᤱᤃᤠ᤹ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤀᤡᤱᤈᤠᤱ ᤐᤡᤖᤢᤱᤛᤡᤱᤒᤠ ᤜᤧᤰᤁᤣ ᤂᤧᤴ ᤛᤣᤛᤣ ᤕᤧᤴᤏᤡᤴ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ 23 ᤜᤧᤰᤁᤣᤛᤠᤱ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤔᤧᤱᤄᤧᤵᤛᤢᤴ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤒᤠ᤺ᤴᤏᤥ ᤏᤡᤱᤘᤠ᤹ ᤔᤧᤶᤒᤡᤖᤢᤴ ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ ᤜᤠᤍᤡᤱ ᤁᤧᤎᤰᤐᤠ ᤔᤧᤒᤥ᤺ᤰᤂᤧ॥ ᤂᤧᤱᤜᤠ᤹ᤖᤧ ᤀᤠᤀᤡᤱᤈᤠᤱᤅᤡᤴ ᤔᤧᤱᤄᤧᤵᤛᤢᤴ ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤏᤡᤛᤠᤶᤔᤡᤴ ᤔᤧᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ॥ 24 “ᤁᤖ ᤂᤡᤏᤡ᤹ ᤀᤠᤀᤡᤱᤈᤠᤱᤜᤠ᤹ ᤁᤧᤖᤧᤰ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶ᤹ ᤜᤧᤰᤁᤩᤠᤱ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤁᤴ ᤕᤧᤰᤕᤰᤐᤠ ᤔᤠ ᤗᤠᤶᤎᤣ᤺ᤵᤐᤠᤜᤠ᤹ᤀᤥᤗᤠᤶᤒᤠ ᤌᤧᤔᤠ ᤁᤰᤁᤠᤱ ᤁᤧᤃᤢᤕᤢᤶᤔᤠᤱ ᤛᤡᤃᤠᤱ ᤁᤧᤴᤍᤣ᤹ᤖᤢᤶᤔᤡᤴ ᤂᤧᤒᤩᤠᤱ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤁᤧᤏᤧᤳᤋᤢᤶᤔᤠᤱ ᤌᤧᤔᤠ ᤕᤠ᤺ᤶᤒᤰᤁᤠᤱ ᤁᤧᤴᤈᤥᤃᤡᤴᤏᤧᤓᤃᤪ. 25 ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤜᤠᤱᤜᤠ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠᤜᤠ᤹ ᤕᤖᤢᤛᤗᤧ᤺ᤶᤔᤥᤒᤠ ᤔᤠ ᤗᤠᤶᤎᤣ᤺ᤵᤐᤠᤜᤠ᤹ᤗᤠᤶᤒᤠ ᤛᤡᤃᤠᤱ ᤔᤧᤗᤠᤳ॥ ᤂᤧᤒᤩᤠᤱ ᤂᤧᤱᤜᤠ᤹ ᤕᤜᤢᤍᤠ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ᤏᤢ ᤛᤥᤖᤡᤰ ᤀᤴᤗᤠ ᤏᤢ ᤀᤴᤜᤠ᤹ᤀᤥ ᤔᤧᤗᤠ᤺ᤳᤋᤠᤱ ᤔᤧᤍᤠ᤹᤺ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤡᤴ ᤛᤍᤠᤍᤡᤱ ᤔᤏᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢ᤹॥ 26 ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤗᤠᤶ. ᤕᤖᤢᤛᤗᤧᤔ ᤁᤢᤄᤡᤖᤡᤒᤠ ᤁᤧᤖᤧᤰ ᤐᤠᤱᤓᤣ᤹ᤜᤠ᤹ᤗᤠᤶ ᤔᤏᤠᤜᤠ᤹ ᤔᤧᤍᤠ᤹᤺॥ ᤂᤧᤱᤜᤠ᤹ ᤒᤣᤏᤩᤠᤔᤡᤴᤗᤧ ᤁᤢᤍᤧ᤺ᤱᤃᤵᤗᤠᤶ. ᤀᤢ᤺ᤰᤆᤶᤆᤶᤒᤠᤍᤧᤴᤗᤠᤶ ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤗᤠᤶ ᤏᤢ ᤕᤥ ᤕᤜᤢᤍᤠᤗᤠᤶ ᤂᤧᤱᤜᤠ᤹ ᤔᤧᤍᤠ᤹᤺॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤜᤡᤶᤔᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤘᤣ᤹ ᤗᤧᤳᤋᤡᤜᤠ᤹. ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤜᤧᤰᤁᤩᤠᤱ ᤛᤛᤡᤱ ᤛᤢᤰᤐᤠ ᤏᤢ ᤏᤢᤃᤧᤴ ᤋᤥ᤺ᤶᤔᤠ ᤛᤡᤍᤢᤱᤈᤓᤠᤜᤠ᤹ ᤔᤧᤍᤠᤖᤢ᤹॥ 27 “ᤁᤖ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤏᤧᤴ ᤜᤧᤰᤁᤩᤠᤱ ᤂᤧᤴ ᤕᤧᤴᤏᤥ ᤂᤧᤱᤜᤠ᤹ ᤁᤢᤓᤠ ᤁᤧᤗᤡ᤺ᤵᤐᤠ ᤁᤰ ᤔᤧᤃᤢ᤺ᤳᤇᤡᤱᤅᤠᤱ ᤕᤖᤢᤛᤗᤧ᤺ᤶᤔᤥᤒᤠ ᤔᤠ ᤗᤠᤶᤎᤣ᤺ᤵᤐᤠᤜᤠ᤹ᤀᤥᤗᤠᤶ ᤛᤡᤃᤠᤱ ᤏᤢ ᤗᤠ᤺ᤰᤁᤠᤳ ᤔᤧᤗ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤛᤣᤛᤣ ᤕᤧᤴ ᤑᤠ᤹ᤀᤠᤱ ᤔᤧᤴᤏᤧᤳᤋᤢᤴᤏᤧᤓᤃᤪ ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤥᤒᤠ ᤔᤠᤗᤠᤶᤎᤣ᤺ᤳᤜᤠ᤹ᤀᤥ ᤔᤡ ᤁᤣ᤺ᤳᤋᤢᤱ᤹॥ ᤕᤖᤢᤛᤗᤧ᤺ᤶᤔᤥᤒᤠ ᤜᤠᤱᤕᤰᤜᤠ᤹ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤐᤥᤱ᤹ ᤜᤧᤰᤁᤩᤠᤱ ᤔᤡᤴ ᤀᤠᤳᤋᤡᤸᤗᤧᤀᤠᤱ ᤛᤧᤵᤔᤠ ᤔᤧᤛᤢᤰᤋᤢᤴᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.