ᤕᤷᤔᤡᤕᤠ 16 - LIFOTNT

ᤕᤷᤔᤡᤕᤠ᤺ᤸᤗᤧ ᤁᤢᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹

¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤕᤠᤶᤔᤥ ᤁᤧᤖᤧ.

² “ᤁᤴ ᤋᤧᤴᤏᤥ ᤂᤧᤏᤧ᤹ ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶ ᤔᤧᤈᤥᤃᤧᤴᤏᤧ᤹ ᤀᤡᤃᤪ ᤛᤠᤀᤣᤀᤠᤱ ᤔᤧᤃᤳᤋᤧᤛᤧᤴᤏᤧ᤹॥

³ ᤁᤴ ᤋᤧᤴᤏᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤛᤠᤀᤣᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤒᤠᤜᤠ᤹ ᤌᤣ ᤔᤧᤒᤥᤱ᤹. ᤂᤧᤴ ᤀᤠᤱᤃᤠ᤹ ᤐᤠ᤺ᤳᤋᤢᤱ᤹॥

⁴ ᤂᤧᤱᤜᤠ᤹ ᤁᤡᤵᤔᤠᤃᤧᤄᤢᤒᤠ ᤋᤢᤰᤔᤧᤸᤗᤧ ᤔᤧᤛᤡ᤹᤺. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤧᤖᤡᤱ ᤁᤧᤎᤰᤐᤠ ᤀᤡᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤁᤧᤗᤢᤵᤐᤠ ᤔᤏᤠᤎᤡᤰᤁᤠᤱ ᤔᤧᤘᤠ᤹ᤏᤧᤴ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤂᤠᤶᤔᤥ ᤆᤡᤎᤢᤰ ᤜᤧᤰᤁᤣ ᤏᤧᤃᤴ॥ ᤂᤧᤱᤜᤠ᤹ ᤌᤱᤅᤥ ᤀᤡᤃᤪ ᤛᤠᤰᤔᤧᤴᤈᤠᤀᤣ ᤔᤧᤛᤡ᤹᤺ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤐᤢᤜᤠ᤹ ᤏᤢ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤆᤠᤔᤠ ᤁᤢᤈᤠ ᤔᤧᤒᤥᤱᤗᤥ॥”

ᤕᤜᤢᤍᤠ᤺ᤸᤗᤧ ᤂᤥᤔᤠ ᤀᤡ᤺ᤳᤋᤢᤒᤠ ᤂᤢᤶᤍᤡᤱᤅᤡᤴ ᤋᤠᤖ ᤐᤳ

⁵ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤜᤠ᤺ᤶᤗᤠᤰᤘᤠ ᤁᤧᤒᤥ᤺ᤰᤐᤠ ᤜᤡᤶᤔᤥ ᤂᤧᤏᤧ᤹ ᤔᤧᤗᤠᤛᤧᤴᤏᤧ᤹॥ ᤀᤠᤳᤋᤡᤸᤗᤧ ᤁᤢᤗᤠᤃᤡᤀᤠᤱ ᤔᤧᤖᤡᤱ ᤔᤧᤎᤰᤋᤧᤴᤏᤧ᤹॥ ᤀᤠᤸᤗᤀᤠᤱᤎᤥ ᤀᤠᤵᤑᤠᤸᤗᤧᤀᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤛᤏᤠᤖᤢᤱᤗᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤎᤠᤛᤢᤱᤅᤡᤴ. ᤂᤧᤒᤩᤠᤱ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤔᤠᤛᤡ ᤏᤢ ᤗᤢᤱᤃᤢᤶ ᤔᤧᤵᤔᤠᤛᤡ ᤀᤥᤛᤣ᤺ᤴᤎᤠᤱ ᤔᤧᤈᤥᤰᤁᤠᤴ॥

⁶ ᤆᤢᤰᤐᤠ ᤕᤶᤒᤠ ᤁᤧᤖᤧᤰ ᤁᤴ ᤗᤠᤈᤣ᤹ᤀᤥ ᤔᤧᤛᤡ᤹᤺॥ ᤀᤠᤳᤋᤡᤸᤗᤧᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤔᤧᤈᤡᤰᤂᤢᤴ ᤀᤡᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤧᤖᤡᤱ ᤔᤧᤎᤰᤏᤧᤴ ᤀᤡᤃᤪ ᤁᤢᤏᤡᤱᤘᤠ᤹ ᤛᤪᤥ᤺ᤴ ᤔᤧᤗ᤹ᤏᤧᤴ ᤀᤠᤒᤠᤅᤣ ᤂᤢᤏᤧ᤹ ᤁᤢᤎᤰᤁᤡᤴ ᤔᤧᤄᤠ᤺ᤴᤍᤢᤴ ᤀᤡᤃᤪ ᤂᤢᤏᤧ᤹ ᤁᤢᤎᤧᤃᤣᤰᤐᤠᤴ ᤔᤧᤏ᤺ᤰᤂᤢᤴ॥

⁷ ᤀᤠᤳᤋᤡᤸᤗᤧᤀᤠᤱ ᤗᤢᤱᤔᤠ᤹ ᤋᤢᤰᤋᤢᤒᤠ ᤔᤏᤠᤴ ᤛᤡ᤺ᤸᤗᤧ ᤁᤧᤛᤡᤒᤠᤸᤗᤧ ᤁᤢᤗᤠᤃᤡ ᤔᤧᤖᤡᤱ ᤁᤧᤎᤰᤐᤠᤴ ᤜᤠᤱᤜᤠᤱ ᤔᤧᤵᤔᤠᤖᤧ ᤗᤠᤃᤡ ᤁᤢᤓᤠᤖᤧ ᤁᤢᤶᤒᤠ ᤁᤢᤶᤔᤠᤀᤣ ᤔᤧᤛᤡᤀᤠᤱ ᤔᤧᤏᤧᤛᤠᤱ ᤂᤢᤏᤧ᤹ᤏᤢ ᤁᤢᤓᤠ ᤁᤢᤈᤠ ᤆᤠᤛᤧ ᤀᤡᤃᤪ ᤌᤢᤱᤛᤧ ᤆᤫᤠ᤺ᤳᤏᤢ ᤔᤧᤕᤢᤱᤏᤧᤴ॥ ᤂᤢᤏᤧ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤜᤠᤱᤜᤠᤱ ᤔᤧᤶᤔᤧᤳᤋᤢᤴ॥

⁸ “ᤆᤠᤔᤢᤰ ᤌᤡᤔᤢᤰ ᤁᤧᤒᤥᤱᤒᤠ ᤜᤡᤶᤔᤥ ᤔᤧᤗᤠᤛᤧᤴᤏᤧ᤹. ᤁᤢᤈᤠ ᤆᤠᤔᤠ ᤌᤢᤱᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ᤏᤢ ᤂᤧᤏᤧ᤹ ᤔᤧᤕᤢᤅᤧᤴᤏᤧ᤹॥

⁹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤣ ᤐᤠ᤺ᤳᤋᤢᤱ᤹. ᤂᤧᤵᤛᤧ᤹॥ ᤛ᤺ᤵᤔᤠ ᤏᤢ ᤏᤡᤱᤘᤠ᤹ ᤋᤠᤔᤠ ᤜᤕᤱ ᤁᤡᤸᤗᤡᤱ ᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤛᤠᤓ᤺ᤱᤈᤠ᤺ᤸᤗᤧ ᤛᤛᤠᤱᤛᤪᤥᤳᤋᤧᤴ ᤀᤠᤱᤃᤠ᤹ ᤆᤡᤈᤡ ᤂᤰᤂᤰ ᤐᤥᤱᤗ ᤆᤥᤃᤢᤱ᤹॥ ᤁᤴ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤀᤠᤵᤑᤣᤰ ᤂᤢᤴᤇᤡ᤹ ᤛᤡᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤁᤧᤵᤐᤠ ᤔᤧᤏᤡᤛᤢ᤹॥

¹⁰ “ᤂᤧᤏᤧ᤹ ᤁᤴ ᤛᤢᤘᤠᤱᤒᤠ ᤔᤏᤠᤜᤠ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤔᤧᤳᤋᤢᤛᤡ᤹. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤀᤰᤂᤣᤗ᤹ᤖᤡᤰ ᤛᤣ᤺ᤴᤁᤧᤶᤗᤠᤵ. ‘ᤌᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤛᤶᤎᤠᤱ ᤀᤰᤋᤱᤒᤠ ᤁᤧᤛᤠᤰᤐᤠ ᤂᤢᤶᤍᤡᤱ ᤐᤡᤔᤠ ᤏᤡ᤺ᤴᤎᤥ ᤆᤥᤃᤢᤒᤠᤒᤣ᥅ ᤀᤠᤏᤡᤃᤣ ᤌᤣ ᤑᤧᤴᤕᤠ᤺ᤶᤒᤰ ᤆᤥᤃᤢᤶᤒᤧᤀᤠᤱ ᤘᤕᤧᤒᤣ᥅ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤏᤡᤃᤣ ᤌᤣ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤒᤣ᥅’

¹¹ “ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤀᤰᤂᤣ ᤁᤧᤔᤧᤳᤋᤡ᤹ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤀᤠᤱᤃᤠ᤹ ᤔᤧᤏᤠ᤹ᤖᤠᤱᤅᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣᤒᤠ ᤛᤠᤶᤔᤠᤱᤜᤠ᤹ ᤔᤠᤱᤔᤧᤄᤕᤢᤛᤡ ᤜᤧᤰᤁᤩᤠᤱ ᤛᤧᤘᤠ ᤔᤧᤔᤧᤳᤋᤢᤛᤡ ᤂᤶᤓᤩᤠᤱ ᤀᤠᤱᤃᤠ᤹ ᤀᤠᤏᤡᤛᤠᤶᤔᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ॥

¹² ᤁᤖ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤋᤠᤰᤁᤧᤓᤧ᤹ᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶ॥ ᤂᤡᤏᤡ᤹ ᤁᤧᤖᤧᤰ ᤀᤠᤎᤡᤱᤃᤠᤏᤡ ᤁᤧᤒᤥ᤺ᤰᤂᤡᤀᤠᤱ ᤂᤡᤏᤡ᤹ ᤀᤠᤒᤠᤅᤣ ᤑᤧᤴᤕᤠ᤺ᤶᤒᤰᤁᤡᤴ ᤁᤧᤏᤠ᤺ᤳᤋᤢᤶ ᤜᤧᤰᤁᤩᤠᤱ ᤀᤠᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤴᤍᤧᤴᤍᤡᤴ॥

¹³ ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤁᤴ ᤗᤠᤈᤣ᤹ᤗᤠᤶᤒᤠ ᤗ᤺ᤳᤏᤡᤱᤅᤠᤱ ᤘᤣ᤹ ᤀᤰᤋᤱᤒᤠ ᤗᤠᤈᤣ᤹ᤀᤥ ᤕᤢᤱᤏᤡᤱ. ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤏᤢ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹॥ ᤜᤧᤰᤁᤩᤠᤱ ᤂᤧᤵᤔᤥ ᤂᤡᤏᤡ᤹ ᤛᤧᤴᤍᤡᤰ ᤗᤧᤴᤍᤡᤰ ᤁᤢᤛᤡᤱ ᤔᤧᤴᤏᤡ᤺ᤳᤋᤣᤒᤠ ᤛᤠᤶᤔᤠᤱᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤀᤠᤗᤢᤱᤔᤠ᤹ ᤛᤩᤠ᤺ᤳ ᤁᤧᤴᤗ᤹ᤖᤡᤴᤗᤥ॥’”

ᤀᤡᤛᤪᤠᤀᤡᤗᤡᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤔᤧᤏᤢ᤺ᤰᤂᤧᤒᤠ

¹⁴ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤂᤧᤸᤗᤧᤆᤥᤃᤢᤸᤗᤧ ᤀᤰᤋᤱᤒᤠ ᤕᤧᤴᤜᤠ᤹ ᤋᤠᤖ ᤐᤳ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤔᤠᤱᤜᤧᤰ ᤔᤧᤈᤥᤃᤢᤸᤗᤧ ᤀᤠᤸᤗᤀᤠᤱᤎᤥ ᤀᤰᤂᤣ ᤔᤧᤶᤒᤠ᤺ᤳᤋᤢᤴ᤹. ‘ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤁᤧᤗ᤺ᤵᤐᤠᤀᤠᤱ ᤁᤧᤎᤠᤰᤐᤠ. ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ॥’

¹⁵ ᤁᤖ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤀᤡᤛᤪᤠᤀᤡᤗᤡᤜᤠ᤹ ᤌᤥ ᤐᤡᤛᤠᤱᤒᤠ ᤗᤠᤈᤣ᤹ ᤏᤢ ᤘᤣ᤹ ᤁᤧᤖᤧᤰ ᤗᤠᤈᤣ᤹ᤜᤠ᤹ᤗᤠᤶᤒᤠ ᤜᤧᤰᤁᤩᤠᤱ ᤀᤠᤳᤋᤠᤴ ᤀᤠᤳᤋᤠᤴᤗᤠᤶᤒᤠ ᤂᤢᤏᤧ᤹ ᤂᤧᤱᤜᤠ᤹ ᤗ᤺ᤳᤋᤢᤍᤣᤛᤢᤛᤡᤀᤠᤱ ᤘᤕᤧ. ᤂᤧᤴ ᤁᤧᤖᤧᤰ ᤗᤠᤈᤣ᤹ᤗᤠᤶᤒᤠ ᤁᤧᤗ᤺ᤵᤐᤠᤀᤠᤱ ᤁᤧᤍᤠ᤺ᤵᤐᤠ ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ॥’ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤐᤡᤖᤢᤱᤛᤡᤱᤒᤠ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ᤹॥”

¹⁶ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤁᤖ ᤀᤠᤱᤃᤠ᤹ ᤕᤖᤡᤰ ᤕᤥ᤺ᤱ ᤁᤧᤗᤧᤵᤐᤠᤜᤠ᤹ ᤐᤠᤱᤄᤢᤱᤛᤡᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤔᤏᤠᤜᤠ᤹ ᤔᤧᤍᤧᤶᤛᤢᤛᤡ᤹॥ ᤂᤧᤴ ᤀᤣᤃᤠᤱ. ᤀᤠᤱᤃᤠ᤹ ᤕᤖᤡᤰ ᤛᤠᤘᤠᤃᤧᤶᤒᤠᤜᤠ᤹ ᤐᤠᤱᤄᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴᤜᤠ᤹ ᤁᤧᤖᤧᤰ ᤏᤠᤱᤈᤱᤗᤢᤱ. ᤁᤥ᤺ᤰᤔᤠ ᤑᤠᤱᤈᤱ ᤏᤢ ᤕᤠᤰᤐᤣ᤹ᤀᤥᤒᤠ ᤗᤢᤱᤓᤢᤰᤁᤥᤜᤠ᤹ᤗᤠᤶ ᤔᤧᤃᤥ᤺ᤳᤋᤢ ᤔᤧᤗ᤺ᤳᤋᤢᤛᤡ᤹॥

¹⁷ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤴ ᤏᤢᤖᤡᤰᤁᤠᤱ ᤏᤡᤛᤢᤱ᤹॥ ᤀᤠᤱᤃᤠ᤹ᤗᤠᤶᤒᤠ ᤌᤧᤔᤠ᤺ᤴᤏᤠᤱ ᤔᤧᤈᤡᤱᤛᤡᤱᤅᤡᤴ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤀᤠᤱᤃᤠ᤹ ᤀᤠᤏᤡᤔᤥᤗᤠᤶᤒᤠ ᤔᤧᤈᤡᤱᤛᤡᤱᤅᤡᤴ॥

¹⁸ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤏᤢ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤂᤧᤱᤜᤠ᤹ ᤏᤡᤗᤧᤱ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤗᤠᤈᤣᤴ ᤁᤢᤛᤡᤘᤧᤳ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤔᤧᤈᤡ᤺ᤴᤍᤢᤀᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤀᤠᤄᤥᤔᤠ ᤗᤰᤁᤡᤴ ᤕᤠᤶᤃᤧᤛᤡᤱᤒᤠ ᤛᤠᤶᤔᤠᤱᤜᤠ᤹ᤖᤧ ᤔᤧᤎᤡᤶᤛᤢᤀᤠᤱ ᤘᤠ᤹ᤖᤥ॥”

ᤕᤷᤔᤡᤕᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤢᤒᤠ

¹⁹ ᤕᤜᤘᤣ ᤍᤠᤱᤒᤠᤀᤣ. ᤀᤠᤔᤢᤰᤛᤠᤶ ᤏᤢ ᤀᤠᤜᤠᤱᤕᤰᤁᤣ. ᤋᤢᤰᤂᤣᤘᤠ ᤕᤧᤴᤏᤥᤒᤠ ᤀᤠᤀᤡ᤺ᤶᤛᤡᤱᤔᤠᤍᤧᤴᤏᤧ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤕᤠ ᤏᤢ ᤁᤢᤛᤢᤰᤐᤥᤗᤠᤶᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤏᤧ᤹ᤀᤥ ᤔᤧᤍᤠᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ. “ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤏᤢᤃ ᤀᤡᤱᤗᤧᤰᤐᤠ ᤛᤠᤶᤔᤠᤱᤜᤠ᤹ ᤏᤢ ᤜᤏᤧᤒᤠ ᤏᤠᤘᤠᤀᤡᤳᤗᤠᤜᤠ᤹ᤖᤰ ᤔᤧᤘᤕᤧᤖᤥ ᤁᤖ ᤘᤣ᤹ ᤌᤣᤀᤠᤱ ᤜᤥ᤺ᤵᤋᤧᤖᤥ॥

²⁰ ᤌᤣ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤀᤠᤒᤠᤅᤣ ᤆᤥ᤺ᤰᤔᤠ ᤔᤧᤛᤢᤰᤋᤢᤛᤡᤒᤡ᥅ ᤀᤥ᤺ᤰ. ᤔᤧᤛᤢᤰᤋᤢᤛᤡᤏᤧᤓᤃᤪ ᤂᤧᤱᤜᤠ᤹ᤃ ᤔᤠᤱᤛᤡ ᤔᤣ᤺ᤴᤗᤥ॥”

²¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤌᤡᤰᤗᤧᤱᤔᤠᤸᤗᤧ ᤂᤧᤴ ᤔᤏᤠᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤔᤢᤰᤛᤠᤶᤔᤡᤴ ᤏᤢ ᤀᤠᤔᤢᤰᤁᤡᤴ ᤀᤥᤛᤣ᤺ᤴᤎᤠᤰᤋᤢᤱᤛᤡᤱᤗᤥ॥ ᤂᤧᤒᤩᤠᤱ ᤀᤠᤔᤡᤱᤅᤡᤴ ᤕᤜᤘᤣ ᤍᤠᤱᤒᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤖᤥ॥”