ᤕᤷᤔᤡᤕᤠ 15 - LIFOTNT

ᤕᤜᤢᤍᤠᤀᤥ ᤁᤧᤕᤢᤱᤒᤠᤜᤠ᤹ ᤔᤧᤔᤧᤰ

¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤔᤥᤛᤠᤴ ᤏᤢ ᤛᤠᤔᤢᤀᤧᤗᤧᤴ ᤀᤠᤱᤃᤠ᤹ ᤀᤠᤍᤃᤡ ᤕᤠᤵᤔᤡ ᤐᤣᤗᤡ ᤑᤠᤰᤋᤧᤛᤡᤀᤠᤱ ᤕᤧᤒᤧᤛᤡᤛᤠᤱ ᤀᤠᤱᤃᤠ᤹ ᤁᤴ ᤔᤏᤠᤜᤠ᤹ ᤌᤣᤀᤠᤱ ᤗᤢᤱᤃᤢᤶ ᤀᤥᤛᤣ᤺ᤴ ᤔᤧᤎᤠᤰᤋᤢᤱᤛᤡᤱᤅᤡᤶᤒᤠ ᤘᤕᤧ॥ ᤂᤧᤴ ᤔᤏᤠᤜᤠ᤹ ᤐᤠᤱᤄᤧᤍᤣᤛᤧᤛᤧ᤹॥ ᤂᤧᤱᤜᤠ᤹ ᤀᤠᤍᤃᤡᤗᤠᤶᤒᤠ ᤗ᤺ᤳᤋᤧᤍᤣᤛᤧᤛᤧ᤹॥

² ᤂᤧᤱᤜᤠ᤹ᤖᤧ ᤂᤧᤏᤧ᤹ ‘ᤀᤠᤏᤡᤃᤣ ᤀᤠᤳᤋᤠᤴ ᤐᤣᤃᤡᤃᤧᤒᤠ’ ᤑᤠ᤹ᤀᤠᤱ ᤛᤧ᤺ᤴᤁᤧᤶᤍᤥᤏᤧᤓᤃᤪ ᤀᤠᤱᤃᤠ᤹ ᤀᤰᤂᤣ ᤐᤠ᤺ᤳᤋᤢᤱᤅᤠᤱ ᤘᤠ᤹ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “‘ᤀᤠᤳᤋᤡᤴᤜᤠ᤹ ᤔᤡᤱᤍᤣ᤹ᤗᤠᤶᤒᤠ ᤔᤧᤛᤡ. ᤂᤧᤱᤜᤠ᤹ ᤔᤡᤱᤍᤣ᤹ᤀᤥ ᤔᤧᤒᤣ᤺ᤰᤗᤖᤥ᥄ ᤀᤠᤳᤋᤡᤴᤜᤠ᤹ ᤌᤱᤅᤥ ᤔᤧᤛᤡ. ᤂᤧᤱᤜᤠ᤹ ᤌᤱᤅᤥ ᤔᤧᤒᤣ᤺ᤰᤗᤖᤥ᥄ ᤀᤠᤳᤋᤡᤴᤜᤠ᤹ ᤛᤠᤰᤔᤧᤴᤈᤠᤀᤣ ᤔᤧᤛᤡ. ᤂᤧᤱᤜᤠ᤹ ᤛᤠᤰᤘᤠ᤺ᤴᤏᤥ ᤔᤧᤎᤠᤖᤖᤥ᥄ ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ. ᤂᤧᤱᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖᤖᤥ᥄’

³ “ᤂᤧᤴᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤗᤡᤛᤡ ᤐᤖᤡᤰᤗᤧᤴ ᤔᤧᤰᤔᤠᤛᤡᤔᤠ ᤋᤠᤖᤢᤱ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ ᤂᤧᤱᤜᤠ᤹ ᤌᤱᤅᤥ ᤔᤧᤛᤧᤖᤢᤛᤡ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤛᤡᤒᤠ ᤌᤰᤜᤠ᤹ ᤂᤩᤠᤒᤠᤜᤠ᤹ᤖᤧ ᤔᤧᤈᤛᤡ᤹ ᤜᤧᤰᤁᤩᤠᤱ ᤐᤢᤜᤠ᤹ᤖᤧ ᤔᤧᤀᤃᤢ ᤔᤧᤈᤛᤡ᤹ ᤂᤧᤒᤩᤠᤱ ᤁᤧᤏᤶᤒᤠ ᤁᤧᤕᤠ᤺ᤰᤐᤠᤜᤠ᤹ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤔᤧᤜᤠ᤹ᤖᤢ ᤔᤧᤈᤛᤡ᤹ ᤜᤧᤰᤁᤩᤠᤱ ᤔᤧᤔᤧᤰᤂᤢᤛᤡ᤹॥

⁴ ᤜᤡᤈᤁᤡᤕᤠ᤺ᤸᤗᤧ ᤁᤢᤛ᤻ᤛᤠ ᤔᤏᤛ᤻ᤛᤣᤴ ᤕᤜᤢᤍᤠᤒᤠ ᤜᤠᤱ ᤘᤕᤧᤸᤗᤧ ᤕᤖᤢᤛᤗᤧ᤺ᤶᤔᤥ ᤂᤢᤏᤧ᤹ ᤌᤧᤔᤠ ᤆᤥᤃᤢᤀᤠᤱ ᤘᤕᤧ. ᤜᤠᤒᤠ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤀᤰᤋᤱᤒᤠ ᤁᤧᤛᤠᤰᤐᤠ ᤕᤠᤰᤏᤠᤶᤔᤥ ᤌᤠᤛᤢᤱᤛᤡᤱ᤹ ᤂᤧᤒᤩᤠᤱ ᤂᤧᤴ ᤔᤧᤏᤡᤛᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤁᤡᤔᤠ ᤕᤱᤔᤠᤀᤥ ᤔᤧᤎᤠᤖᤥ॥

⁵ “ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠᤛᤣ. ᤀᤠᤳᤋᤡᤸᤗᤧ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡᤒᤣ᥅ ᤀᤠᤳᤋᤡᤸᤗᤧ ᤂᤡᤏᤡ᤹ ᤗᤠᤃᤡ ᤔᤧᤖᤡᤱᤎᤰᤔᤠ ᤏᤡᤱᤘᤠ᤹ ᤆᤥᤃᤢᤒᤣ᥅ ᤀᤠᤳᤋᤡᤴ ᤕᤧᤶᤛᤡᤱᤅᤠᤱ ᤂᤡᤏᤡ᤹ᤏᤢ ᤏᤢ᤹ᤔᤠᤍᤠᤔᤠ ᤐᤠᤴ ᤛᤣ᤺ᤴᤃᤧᤗᤠᤵᤋᤡᤒᤣ᥅

⁶ ᤂᤡᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤁᤧᤏᤠ᤹ᤖᤡᤀᤠᤱ ᤁᤧᤘᤕᤡᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤗᤧᤵᤔᤠᤱ ᤀᤠᤒᤠᤅᤣ ᤂᤡᤏᤡ᤹ ᤀᤣ᤺ᤰᤌᤠ᤺ᤰᤔᤧᤴ ᤁᤧᤜᤡᤛᤢᤶᤔᤠᤱ ᤁᤧᤘᤕᤡᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤜᤢᤰᤁᤡᤸᤗᤧᤀᤣ ᤔᤧᤱᤏᤡᤱᤅᤠᤱ ᤘᤠ᤹ᤀᤠᤖᤥ ᤌᤣᤀᤠᤱᤓᤧᤸᤗᤧ ᤀᤠᤛᤠᤰᤁᤧᤴ ᤌᤶᤔᤠᤖᤧ ᤀᤠᤏᤡᤱᤗᤧ᤹ᤗᤧ᤹ ᤗ᤹ᤖᤧᤀᤠᤱ ᤘᤠ᤹ᤖᤥ॥

⁷ ᤗᤠᤈᤣ᤹ᤒᤠ ᤁᤧᤖᤧᤰ ᤕᤧᤰᤕᤰᤁᤥ ᤂᤡᤏᤡ᤹ ᤆᤠᤛᤡᤵ ᤜᤧᤰᤁᤣ ᤛᤢᤖᤡ᤺ᤳᤋᤥ ᤑᤧᤏᤡᤱᤗᤥ॥ ᤀᤠᤱᤃᤠ᤹ ᤀᤠᤔᤏᤠᤛᤣ. ᤀᤠᤱᤃᤠ᤹ ᤂᤡᤏᤡ᤹ ᤔᤧᤶᤓᤤ ᤆᤥ᤺ᤰᤏᤡᤱᤗᤥ. ᤂᤡᤏᤡ᤹ ᤛᤠᤀᤣᤜᤠ᤹ ᤋᤣ᤹ᤖᤢᤱᤛᤡᤱᤗᤥ ᤌᤣᤀᤠᤱᤓᤧᤸᤗᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤁᤧᤴᤗᤧᤖᤢᤶᤔᤡᤴᤗᤥ॥

⁸ ᤘᤖ᤺ᤱᤅᤥᤒᤠ ᤕᤧ᤺ᤱᤄᤠᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤡᤏᤡ᤹ ᤔᤣᤔᤣᤍᤢᤔᤠᤜᤠ᤹ ᤔᤧᤒᤥᤱᤗᤥ॥ ᤂᤡᤏᤡ᤹ ᤌᤠᤱᤒᤧᤴᤜᤠ᤹ ᤀᤠᤱᤃᤠ᤹ ᤛᤧᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤡᤏᤡ᤹ ᤔᤠᤜᤠ᤹ ᤔᤧᤖᤡᤱᤅᤥ ᤌᤠᤛᤢᤱᤛᤡᤱᤗᤥ॥ ᤜᤰᤆᤄᤳ ᤋᤢᤰᤔᤠ ᤏᤢ ᤁᤡᤔᤠᤴ ᤂᤧᤱᤜᤠ᤹ᤀᤥ ᤋᤠᤖᤢᤱᤗᤥ॥

⁹ ᤏᤢᤛᤡ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤠ᤺ᤴ ᤁᤢᤎᤏᤠ ᤗᤧᤰᤂᤧᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤛᤰᤔᤠ ᤛᤥ᤺ᤶᤔᤠ ᤁᤧᤛᤠᤰᤐᤠ ᤋᤢᤔᤢᤀᤠᤱ ᤘᤠ᤹ᤖᤥ॥ ᤂᤧᤸᤗᤧ ᤗᤧᤴᤍᤡᤰᤐᤠ ᤁᤢᤄᤠᤀᤥ᤺ᤵᤔᤠᤴ ᤂᤠᤃᤧᤎᤠᤶᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤂᤧᤸᤗᤧ ᤁᤢᤏᤠᤔᤧᤴᤇᤠ᤹ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ ᤂᤧᤴ ᤛᤠ᤹ᤖᤡᤰ ᤏᤡᤱᤘᤠ᤹ ᤋᤢᤰᤔᤥ ᤌᤩᤧᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ ᤀᤠᤸᤗ ᤌᤠᤖᤡᤰ ᤔᤧᤜᤡᤅᤧᤀᤠᤱ ᤔᤧᤘᤠ᤹ᤖᤥ. ᤂᤧᤱᤜᤠ᤹ ᤏᤡᤱᤔᤡ ᤜᤢᤰᤁᤥ ᤐᤡᤖᤢᤱᤛᤡᤱᤅᤠᤱ ᤛᤧᤵᤔᤠ ᤐᤠᤱᤄᤢᤱᤛᤡᤱᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤷᤔᤡᤕᤠ᤺ᤸᤗᤧ ᤁᤢᤗᤢᤱᤜᤠᤴ

¹⁰ ᤂᤧᤒᤩᤠᤱ ᤀᤠᤱᤃᤠ᤹ ᤔᤧᤳᤋᤢᤱᤗᤥ. “ᤆᤡ᤺ᤳᤋᤠᤱ ᤛᤩᤠᤱᤗᤥ᥄ ᤆᤡ᤺ᤳᤋᤠᤱ ᤛᤩᤠᤱᤗᤥ᥄ ᤀᤠᤱᤃᤠ᤹ ᤀᤠᤶᤔᤠᤖᤧ ᤌᤣᤀᤠᤱ ᤁᤳᤋᤠᤱᤒᤠᤀᤡᤖᤥ᥅ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤏᤢ ᤀᤠᤱᤃᤠ᤹ ᤐᤠ᤺ᤴᤎᤱ ᤏᤢ ᤂᤧᤔᤠ᤹ ᤆᤥ᤺ᤰᤔᤠ ᤐᤥᤱᤗᤥ॥ ᤀᤠᤱᤃᤠ᤹ ᤜᤠ᤺ᤳᤋᤠᤱ ᤁᤢᤓᤠ ᤛᤡᤱᤏᤠᤳ ᤔᤧᤶᤒᤡᤀᤣ ᤘᤠ᤹ᤀᤠᤖᤥ. ᤘᤣ᤹ᤜᤠ᤹ᤗᤠᤶᤒᤠ ᤌᤧᤔᤠᤀᤠᤱ ᤛᤡᤱᤏᤠᤳ ᤔᤧᤴᤍᤠ᤺ᤳᤋᤣ ᤘᤠ᤹ᤀᤠᤖᤥ ᤜᤧᤰᤁᤣᤛᤠᤱ ᤁᤧᤖᤧᤰᤗᤧ ᤔᤠᤱᤍᤣ ᤛᤠᤱᤃᤪᤠ ᤔᤧᤔᤧᤳᤋᤠᤖᤥ॥”

¹¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤔᤧᤳᤋᤠᤱᤗᤥ. “ᤀᤠᤱᤃᤠ᤹ ᤛᤧᤰᤂᤠᤀᤣ ᤂᤧᤏᤧ᤹ ᤏᤢᤖᤡᤰ ᤔᤧᤳᤏᤧᤖᤥ ᤂᤧᤸᤗᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ ᤋᤠᤱᤛᤧ᤺ᤵᤏᤧᤖᤥ॥ ᤋᤢᤰᤂᤣ ᤗᤠᤰᤂᤣ ᤏᤢ ᤕᤧᤳᤋᤢᤰᤂᤣᤒᤠ ᤕᤧᤶᤔᤥ ᤛᤧᤰᤂᤠᤀᤣ ᤀᤠᤱᤃᤠ᤹ ᤁᤧᤏᤡᤱᤔᤡᤜᤠ᤹ ᤂᤧᤏᤧ᤹ᤀᤥ ᤐᤣᤗᤡᤃᤧᤴ ᤋᤢᤘᤠ ᤔᤧᤈᤥ᤺ᤰᤗ ᤕᤠ᤺ᤴᤍᤢᤱᤛᤡᤱᤗᤥ॥

¹² ᤌᤠᤱᤃᤧᤳ ᤐᤡᤛᤠᤱᤒᤠ ᤑᤧᤴᤈᤣᤴ ᤔᤏᤠ᤺ᤸᤗᤧ ᤀᤧᤱᤔᤠ ᤛᤢᤰᤋᤢᤒᤡ᥅ ᤀᤡᤃᤪ ᤁᤠᤛᤠ᤺ᤸᤗᤧ ᤁᤢᤗ᤺ᤵᤗᤠ᤺ᤴ ᤀᤧᤱᤔᤠ ᤛᤢᤰᤋᤢᤒᤡ᥅

¹³ ᤀᤠᤔᤏᤠᤜᤠ᤹ᤖᤧ ᤂᤧᤏᤡ᤹ ᤗᤢᤶᤔᤥ ᤏᤡᤱᤔᤡᤜᤠ᤹ ᤐᤠᤱᤄᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤠᤱᤛᤠᤁᤢᤴᤎᤣ ᤏᤢ ᤕᤠᤱᤓᤢᤜᤠ᤹ ᤔᤧᤏᤠᤵᤋᤢ ᤔᤧᤍᤣ᤹ᤖᤢᤛᤡᤖᤥ. ᤌᤣᤀᤠᤱᤓᤧᤸᤗᤧ ᤁᤱᤃ ᤗᤠᤈᤣ᤹ ᤁᤧᤖᤧᤰ ᤂᤧᤏᤡ᤹ ᤁᤧᤈᤥᤃᤢᤶᤒᤠ ᤗᤠᤕᤥᤸᤗᤧ ᤂᤢᤶᤍᤡᤱᤗᤥ॥

¹⁴ ᤀᤠᤱᤃᤠ᤹ ᤂᤧᤏᤡ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤛᤡᤶᤔᤧᤶᤒᤠ ᤗᤠᤈᤣ᤹ᤀᤥ ᤂᤧᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤠᤱᤏᤡᤱᤗᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤛᤡᤰᤁᤧᤴ ᤔᤡ ᤜᤧᤰᤁᤣ ᤋᤡᤖᤧᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤴ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤛᤍᤠᤍᤡᤱ ᤜᤢᤖᤢᤖᤢ ᤋᤡ᤺ᤳᤗ ᤏᤧᤖᤥ॥”

¹⁵ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤢᤱᤗᤥ. “ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤏᤡᤛᤢᤖᤥ॥ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤧ᤹ᤀᤠᤱ ᤁᤢᤓᤠ᤹ ᤐᤡᤖᤠᤱᤅᤧ᤹ᤀᤥ॥ ᤀᤠᤱᤃᤠ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ ᤂᤢᤶᤍᤡᤱ ᤐᤡᤖᤧᤛᤧ᤹ᤀᤥ॥ ᤂᤧᤱᤜᤠ᤹ ᤗᤧᤵᤔᤠᤱᤒᤠ ᤂᤧᤏᤧ᤹ ᤁᤧᤏᤠᤛᤡ ᤌ᤺ᤵᤔᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤔᤠᤔᤠ ᤔᤧᤒᤥᤱᤏᤧᤴᤗᤖᤥ॥ ᤁᤧᤗᤠᤃᤡ ᤀᤠᤱᤃᤠ᤹ ᤛᤡᤖᤡᤱᤔᤔᤠ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ॥

¹⁶ ᤂᤧᤏᤧ᤹ ᤀᤠᤱᤃᤠ᤹ᤏᤢ ᤁᤧᤒᤠᤖᤧᤖᤥ ᤜᤧᤰᤁᤩᤠᤱ ᤁᤧᤖᤧᤰ ᤁᤧᤒᤠ᤺ᤴᤈᤠ᤺ᤰᤁᤡᤴ ᤁᤢᤈᤠᤏᤢᤖᤧᤖ ᤂᤧᤵᤛᤢᤱᤗᤥ॥ ᤕᤜᤘᤣ ᤍᤠᤱᤒᤠ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤡᤱ ᤋᤰᤋᤢᤱᤗᤥ ᤜᤧᤰᤁᤩᤠᤱ ᤁᤧᤒᤠ᤺ᤴᤈᤠ᤺ᤰᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤛᤡᤰᤗᤢᤱᤔᤠᤴ ᤛ᤺ᤳᤋᤧᤖᤥ ᤂᤧᤒᤩᤠᤱ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤩᤧᤖᤥ॥

¹⁷ ᤀᤠᤱᤃᤠ᤹ ᤀᤠᤕᤧᤶᤔᤡᤴ ᤘᤣ᤹ ᤔᤏᤠᤜᤠ᤹ᤏᤢ ᤀᤣ᤺ᤵᤔᤠ ᤐᤠ᤺ᤵᤔᤠᤀᤥ ᤔᤧᤍᤣᤛᤢᤱᤅᤡᤸᤗᤥ ᤜᤧᤰᤁᤩᤠᤱ ᤛᤥᤛᤥᤳᤗᤖᤠᤱᤅᤥ ᤔᤧᤴᤍᤣᤒᤠᤴᤗᤥ॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤕᤢᤰᤁᤥ ᤁᤧᤃᤳᤋᤠᤱᤒᤠᤸᤗᤧ ᤀᤧᤰᤗᤣ᤺ᤰ ᤕᤢᤅᤠᤱᤗᤥ ᤜᤧᤰᤁᤩᤠᤱ ᤀᤠᤛᤡᤰᤁᤧᤸᤗᤧ ᤔᤡ ᤐᤥ᤺ᤰᤂᤠᤱᤗᤥ॥

¹⁸ ᤀᤠᤱᤃᤠ᤹ ᤀᤠᤕᤧᤳᤋᤢᤰᤂᤣᤴ ᤌᤣᤀᤠᤱ ᤆᤰ ᤔᤧᤗ᤹ᤏᤧᤶᤒᤠᤒᤣ᥅ ᤀᤠᤕᤠᤱᤄᤣ᤺ᤰᤁᤡᤴ ᤌᤣᤀᤠᤱ ᤔᤧᤘᤣ᤺ᤳᤏᤧᤶᤒᤠᤒᤣ᥅ ᤜᤧᤏᤠᤱ ᤆᤒᤧ᤺ᤳᤇᤡᤰᤁᤠᤱ ᤔᤧᤏᤢ᤹ᤏᤧᤶᤒᤠᤒᤣ᥅ ᤁᤧᤜᤣᤒᤠ ᤕᤠᤰᤛᤠᤱᤘᤠ ᤜᤧᤰᤁᤣ ᤀᤠᤱᤃᤠ᤹ ᤀᤡᤱᤃᤧᤗᤧᤰᤁᤠᤒᤠᤒᤡ᥅”

¹⁹ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤋᤱᤒᤠ ᤏᤢᤃᤵ ᤐᤡᤖᤠᤱᤗᤥ. “ᤂᤧᤏᤧ᤹ ᤗᤠᤕᤥᤗᤠᤶ ᤁᤧᤏᤢ᤺ᤱ ᤁᤧᤍᤠᤏᤧᤓᤃᤪ ᤀᤠᤱᤃᤠ᤹ ᤂᤧᤏᤧ᤹ ᤕᤠᤶᤔᤥ ᤋᤠ᤺ᤰᤔᤠ ᤋᤧᤴᤏᤠᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤕᤠᤶᤔᤥ ᤀᤠᤛᤧᤘᤠᤖᤥᤒᤠ ᤁᤧᤒᤥᤱᤗᤥ॥ ᤜᤏᤧᤒᤠ ᤐᤠᤴ ᤐᤠ᤺ᤵᤔᤠᤖᤧ ᤁᤢᤗᤧᤰᤘᤠᤀᤥ ᤁᤢᤛᤡ ᤁᤧᤕᤠᤰᤐᤠ ᤕᤠ᤺ᤶᤒᤰ ᤁᤧᤈᤥᤃᤢᤏᤧᤓᤃᤪ ᤂᤧᤏᤧ᤹ ᤕᤠᤶᤔᤥ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤁᤧᤒᤥᤱᤗᤥ॥ ᤔᤏᤠᤜᤠ᤹ ᤂᤧᤏᤧ᤹ ᤗᤧᤵᤔᤠᤱ ᤔᤧᤏᤢ᤺ᤱᤅᤠᤱ ᤔᤧᤍᤠᤖᤥ ᤁᤖ ᤂᤧᤏᤧ᤹ ᤂᤢᤴᤇᤡ᤹ ᤗᤧᤵᤔᤠᤱ ᤔᤧᤒᤣᤃᤧᤴᤏᤧ᤹ᤀᤥ॥

²⁰ ᤀᤠᤱᤃᤠ᤹ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤗᤳᤇᤠ ᤁᤠᤛᤠ ᤗᤢᤱᤎᤠᤰ ᤜᤧᤰᤁᤣ ᤁᤧᤎᤢᤶᤒᤠ ᤆᤥ᤺ᤰᤏᤧᤖᤥ॥ ᤂᤧᤱᤜᤠ᤹ ᤂᤧᤏᤧ᤹ᤏᤢ ᤜᤕᤱᤋᤧᤴᤎᤱ ᤔᤧᤈᤥᤰᤗᤥ ᤁᤖ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤌᤱᤅᤥ ᤁᤧᤔᤧᤴᤍᤥ᤺ᤰᤏᤧᤴᤗᤥ॥

²¹ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶᤒᤠ ᤛᤧ᤺ᤵᤏᤧᤖᤥ. ᤜᤧᤰᤁᤩᤠᤱ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤔᤠᤗᤠᤶ ᤋᤠᤱᤏᤧᤖᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”