ᤕᤷᤔᤡᤕᤠ 14 - LIFOTNTᤋᤢᤰᤂᤣ ᤗᤠᤰᤂᤣ ᤏᤢ ᤛᤠᤱᤕᤠᤰᤔᤠ 1 ᤛᤠᤱᤕᤠᤰᤔᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧᤖᤥ— 2 “ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤜᤠ᤺ᤵ ᤔᤧᤈᤡ᤺ᤱᤗ ᤔᤧᤘᤠ᤹ᤖᤥ. ᤂᤧᤴ ᤕᤧᤰᤕᤰᤜᤠ᤹ᤀᤥᤒᤠ ᤔᤏᤠᤜᤠ᤹ ᤔᤧᤔᤧᤰᤗ ᤔᤧᤒᤳᤗᤥ. ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤂᤠᤶᤔᤥ ᤔᤧᤛ᤹ᤛᤡᤱᤗ ᤔᤧᤖᤡᤱ ᤔᤧᤎᤰᤗ ᤔᤧᤕᤢᤱᤗᤥ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ ᤁᤢᤓᤠ᤹ᤖᤧ ᤗᤠᤃᤡ ᤔᤧᤀ᤺ᤰ ᤔᤧᤓᤡ᤺ᤰᤗ ᤔᤧᤕᤠᤰᤗᤥ॥ 3 ᤋᤢᤶᤔᤩᤠᤱᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤧᤘᤠᤖᤥᤒᤠᤜᤠ᤹ ᤆᤫᤠ᤺ᤳ ᤑᤠ᤺ᤳᤇᤧ ᤔᤧᤒᤠᤱᤄᤢᤛᤡᤖᤥ॥ ᤂᤧᤱᤜᤠ᤹ ᤆᤫᤠ᤺ᤳ ᤕᤠᤱᤄᤥ᤺ᤵᤔᤠ ᤘᤠᤒᤠᤰᤁᤥ ᤔᤧᤒᤣ᤺ᤰᤗᤥ ᤁᤖ ᤂᤧᤱᤜᤠ᤹ᤖᤧ ᤆᤫᤠ᤺ᤳ ᤔᤧᤱᤄᤥᤛᤢᤴᤗᤥ. ᤂᤧᤱᤜᤠ᤹ ᤁᤢᤄᤠᤗᤧᤶ ᤂᤵᤐᤩᤠ ᤔᤧᤏᤢ᤺ᤱ ᤔᤧᤍᤠᤖᤥ॥ ᤂᤧᤱᤜᤠ᤹ ᤂᤢᤴᤇᤡ᤹ ᤛᤰᤔᤠᤒᤢ᤹ᤀᤠᤱ ᤜᤠᤒ᤻ ᤔᤧᤗᤧᤰᤗᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤠᤖᤠᤴ ᤔᤧᤈᤡᤰᤂᤢᤖᤥ॥ 4 ᤘᤜᤡᤳ ᤔᤧᤎᤠᤛᤢᤶᤒᤠᤸᤗᤧ ᤂᤠᤶᤒᤣ᤺ᤰᤔᤠᤴ ᤜᤣᤖᤧᤖᤥ ᤜᤧᤰᤁᤩᤠᤱ ᤜᤷᤃᤠ᤹ ᤜᤷᤃᤠ᤹ ᤁᤠ᤹ᤖᤧᤀᤠᤱ ᤏᤧᤖᤥ॥ ᤕᤠ᤺ᤴᤃᤧᤔᤒᤠᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ᤀᤥ ᤛᤠ᤹ᤀᤡᤕᤃᤧᤀᤠᤱ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤏᤠᤖᤠᤴ ᤔᤧᤈᤡᤰᤂᤢᤖᤥ॥ 5 ᤋᤠᤶᤓᤢᤱᤅᤥ ᤁᤢᤍᤠᤱ ᤁᤧᤜᤥ᤺ᤵᤔᤠ ᤐᤧ᤺ᤱᤘᤠ᤺ᤸᤗᤧᤀᤠᤱ ᤂᤠᤖᤰ ᤌᤠᤵᤋᤢᤒᤠ ᤁᤢᤛ᤻ᤛᤠᤴ ᤗᤧᤖᤢᤎᤖᤥ ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤕᤠᤴ ᤔᤧᤕᤢᤱᤏᤧᤸᤗᤥ॥ 6 ᤋᤠᤶᤓᤢᤱᤅᤥᤒᤠ ᤁᤢᤶᤔᤠᤔᤠ ᤀᤍᤱᤜᤠ᤹ ᤌᤣᤀᤠᤱ ᤁᤧᤜᤥᤵᤐᤠ ᤁᤥ᤺ᤰᤔᤠ ᤑᤠᤱᤈᤱ ᤛᤶᤎᤠᤱ ᤔᤧᤕᤧᤵᤗᤥ ᤜᤧᤰᤁᤩᤠᤱ ᤁᤡᤎᤡ᤺ᤵᤐᤠᤴ ᤜᤧᤰᤁᤣ ᤜᤧᤱᤃᤧ᤺ᤰ ᤜᤧᤱᤃᤧ᤺ᤰ ᤔᤧᤗ᤹ᤖᤥ ᤂᤧᤱᤜᤠ᤹ ᤕᤠᤴ ᤆᤠᤔᤠ ᤔᤧᤱᤄᤥᤀᤣ ᤔᤧᤘᤠ᤹ᤖᤥ ᤜᤧᤰᤁᤣ᤺ᤸᤗᤧ ᤂᤢᤴᤇᤡ᤹ ᤔᤡᤰᤜᤠ᤹ ᤛᤠᤰᤁᤡᤸᤗᤧ ᤋᤢᤶᤒᤠᤖᤡ ᤆᤩᤧ᤺ᤱᤈᤩᤧ᤺ᤱ ᤗ᤹ᤖᤥ॥” 7 ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖ ᤐᤣᤗᤡᤃᤧᤴ ᤋᤢᤘᤠ ᤔᤧᤈᤥ᤺ᤰᤁᤠᤖᤥ. “ᤀᤠᤏᤡᤃᤣ ᤗᤠᤕᤥᤸᤗᤧ ᤀᤠᤏᤡᤃᤣ ᤕᤠᤵᤔᤡ ᤑᤥᤋᤩᤠᤒᤠᤀᤣ ᤗᤣ᤺ᤳᤋᤡᤃᤧᤖᤥ. ᤜᤧᤰᤁᤣᤛᤠᤱ ᤕᤜᤘᤣ ᤍᤠᤱᤒᤠᤀᤣ. ᤀᤠᤒᤠᤅᤣ ᤁᤧᤔᤡᤱᤅᤡᤸᤗᤧ ᤆᤥᤃᤢᤸᤗᤧ ᤀᤠᤓᤠ᤹ᤖᤧ᤹ᤀᤥ॥ ᤕᤖᤡᤰᤗᤧᤱ ᤀᤠᤏᤡᤃᤣ ᤂᤧᤏᤧ᤹ᤏᤢ ᤗᤠ᤺ᤳᤗᤠ᤺ᤳ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ. ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥ 8 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤏᤡᤱᤛᤠᤱ ᤂᤧᤏᤧ᤹ᤖᤰ ᤁᤧᤘᤠ᤹ᤖᤥ. ᤂᤧᤏᤧ᤹ ᤀᤠᤏᤡᤃᤣ ᤕᤧᤳᤋᤢᤰᤂᤣᤗᤠᤶᤒᤠ ᤁᤧᤛᤧ᤺ᤵᤐᤠ ᤛᤧᤴᤗᤵᤍᤠᤱᤒᤠᤏᤧᤖᤥ॥ ᤂᤧᤏᤧ᤹ ᤀᤠᤏᤡᤃᤣ ᤗᤠᤈᤣ᤹ᤀᤥ ᤌᤣᤀᤠᤱ ᤗᤳᤇᤠ ᤘᤧᤵᤔᤡᤒᤠ ᤔᤏᤠ ᤁᤢᤀᤡᤛᤡᤰ ᤁᤧᤒᤥ᤺ᤰᤂᤧᤒᤠᤒᤣ᥅ ᤌᤣᤀᤠᤱ ᤌᤡᤰ ᤛᤧᤴᤎᤡᤰ ᤕᤠᤱᤃᤧᤎᤥ᤺ᤰᤐᤠ ᤗᤠᤶᤍᤡ᤺ᤰᤐᤠ ᤜᤧᤰᤁᤣ ᤁᤧᤒᤥ᤺ᤰᤂᤧᤒᤠᤒᤣ᥅ 9 ᤌᤣᤀᤠᤱ ᤂᤧᤏᤧ᤹ ᤁᤧᤏᤠᤰᤐᤠ ᤁᤧᤒᤣ᤺ᤰᤐᤠ ᤔᤏᤠ ᤁᤢᤀᤡᤛᤡᤰ ᤁᤧᤒᤥ᤺ᤰᤂᤧᤒᤠᤒᤣ᥅ ᤀᤡᤃᤪ ᤕᤠᤵᤔᤡ ᤑᤠ᤹ᤔᤠ ᤔᤧᤴᤇᤢᤰᤔᤏᤠᤒᤠ ᤔᤢᤰᤁᤧᤃᤢᤒᤠ ᤌᤰᤛᤢᤒᤠ ᤁᤢᤛᤡᤱ ᤌᤣᤀᤠᤱ ᤁᤧᤒᤥ᤺ᤰᤂᤧᤒᤠᤒᤣ᥅ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤛᤧᤰᤂᤠᤛᤠᤱ ᤀᤠᤏᤡᤃᤣ ᤗᤢᤶᤔᤥ ᤁᤧᤘᤠ᤹ᤖᤥ॥ ᤀᤠᤏᤡᤃᤧᤃ ᤂᤧᤏᤧ᤹ ᤁᤧᤔᤡᤱ ᤁᤧᤍᤰᤐᤠᤛᤡᤃᤧ ᤑᤠ᤹ᤀᤠᤱ ᤔᤧᤏᤡᤛᤡᤃᤧᤖᤥ. ᤀᤠᤏᤡᤃᤣ ᤕᤠᤵᤔᤡ ᤀᤠᤴᤏᤠ᤹ᤖᤧᤴᤏᤧ᤹ᤀᤥ॥” 10 ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤧᤱᤜᤠ᤹ ᤀᤠᤱᤃᤠ᤹ᤗᤠᤶᤒᤠ ᤔᤠ᤺ᤱᤄᤠᤀᤣ ᤐᤥᤱᤔᤠ ᤛᤡᤖᤠ᤹ᤎᤠᤱᤗᤥ ᤜᤧᤰᤁᤩᤠᤱ ᤀᤠᤒᤠᤅᤣ ᤂᤧᤱᤜᤠ᤹ ᤕᤢᤰᤁᤥ ᤔᤧᤴᤘᤠ᤹ᤏᤧᤴᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤏᤢ ᤀᤠᤏᤡᤱᤘᤠ᤹ ᤔᤧᤍᤠᤏᤧᤴᤗᤥ॥ ᤀᤠᤱᤃᤠ᤹ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ ᤂᤧᤒᤩᤠᤱ ᤂᤢᤴᤇᤡ᤹ ᤗᤠᤕᤥᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥” ᤕᤜᤘᤣ ᤍᤠᤱᤒᤧᤸᤗᤧ ᤕᤷᤔᤡᤕᤠᤴ ᤐᤣᤗᤡ ᤑᤠᤰᤔᤠ ᤔᤧᤒᤠᤱᤄᤢᤴ 11 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤁᤴ ᤔᤏᤠᤜᤠ᤹ ᤔᤧᤏᤢ᤹ᤔᤧᤍᤠᤖ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤧᤴᤏᤧ᤹॥ 12 ᤂᤧᤱᤜᤠ᤹ ᤆᤠᤏᤧ᤺ᤳᤋᤥ ᤔᤧᤕᤢᤱᤛᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤈᤥᤃᤢᤒᤠ ᤋᤢᤘᤠᤴ ᤔᤧᤄᤧᤶᤔᤠᤴ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤛᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤀᤠᤏᤡᤱᤘᤠ᤹ ᤔᤧᤍᤠᤏᤧᤴ॥ ᤐᤖᤢᤔᤠᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤋᤧᤴᤎᤱ. ᤛᤠᤰᤘᤠᤴ ᤏᤢ ᤔᤡᤱᤍᤣᤸᤗᤧ ᤛᤧᤖᤢᤱᤛᤡᤱ᤹॥” 13 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤢᤏᤧ᤹ ᤔᤧᤳᤋᤢᤱ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧᤃ ᤂᤧᤴ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤖ ᤔᤧᤘᤠ᤹ ‘ᤂᤡᤏᤡ᤹ ᤜᤕᤱᤋᤧᤴᤎᤱ ᤁᤧᤴᤏᤡᤛᤢᤶᤔᤡᤴ. ᤀᤡᤃᤪ ᤂᤡᤏᤡ᤹ᤀᤥ ᤛᤠᤰᤘᤠᤴ ᤔᤧᤍᤠᤏᤧᤴ ᤁᤖ ᤂᤡᤏᤡ᤹ ᤁᤴ ᤗᤠᤈᤣ᤹ᤀᤥ ᤕᤖᤡᤰ ᤕᤧᤶ ᤌᤠᤖᤡᤰ ᤛᤢᤰᤂᤣᤘᤠ ᤛᤏᤠᤖᤢᤱ ᤐᤥᤱ॥’” 14 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤏᤢᤃᤵ ᤐᤡᤖᤠᤱ. “ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤠᤔᤡᤱᤅᤥ ᤀᤡᤱᤗᤧᤰ ᤐᤠᤴ ᤔᤧᤒᤠ᤺ᤳᤋᤢᤖ ᤔᤧᤒᤳ॥ ᤂᤧᤱᤜᤠ᤹ ᤀᤠᤱᤃᤠ᤹ ᤐᤠᤱᤄᤢᤱᤛᤡᤱᤒᤠ ᤔᤣ᤺ᤴ॥ ᤂᤧᤱᤜᤠ᤹ᤏᤢ ᤀᤠᤱᤃᤠ᤹ ᤗᤳᤇᤠ ᤐᤠ᤺ᤴᤏᤠᤱ ᤔᤧᤶᤒᤠ᤺ᤳᤋᤣ ᤘᤠ᤹ᤀᤠ. ᤜᤧᤰᤁᤩᤠᤱ ᤌᤣᤀᤠᤱ ᤀᤡᤱᤈᤠᤱ ᤐᤡᤖᤢᤱᤛᤡᤱᤒᤠ ᤜᤥᤵ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤒᤡᤖᤢᤱᤛᤡᤱᤅᤡᤶᤒᤠ ᤀᤡᤱᤗᤧᤰ ᤛᤢᤑᤥ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤒᤠ᤺ᤳᤋᤢ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤀᤥᤒᤠ ᤜᤏᤧᤒᤠ ᤛᤢᤵᤑᤥ. ᤏᤢ ᤂᤠᤀᤡᤰᤔᤠᤜᤠ᤹ᤖᤰ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢ᤹॥ 15 ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹. ᤀᤠᤳᤋᤡᤴᤜᤠ᤹ᤀᤠᤱ ᤀᤠᤱᤃᤠ᤹ ᤐᤠᤱᤄᤢᤱᤛᤡᤱᤒᤠ ᤔᤣ᤺ᤴ. ᤜᤧᤰᤁᤣᤛᤠᤱ ᤗᤠᤈᤣ᤹ᤀᤥ ᤋᤧᤴᤎᤱ ᤏᤢ ᤛᤠᤰᤘᤠᤴ ᤔᤧᤍᤠᤏᤧᤴ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤠᤔᤡᤱᤅᤥ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢ᤹. ᤀᤠᤱᤃᤠ᤹ ᤂᤧᤱᤜᤠ᤹ ᤋᤧᤴᤎᤱ ᤏᤢ ᤛᤠᤰᤁᤡᤸᤗᤧᤀᤣ ᤔᤧᤰᤂᤢᤱᤛᤡᤱ ᤑᤠ᤹ᤀᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤔᤧᤳᤏᤧᤖᤥ॥ 16 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤔᤧᤳᤋᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤛᤠᤰ ᤏᤢ ᤋᤠᤓᤣ᤺ᤸᤗᤧ ᤆᤥᤃᤢᤸᤗᤧ ᤕᤖᤢᤛᤗᤧ᤺ᤶᤒᤠ ᤗᤠᤶᤜᤠ᤹ᤀᤥ ᤏᤧᤃᤴ ᤜᤧᤰᤁᤩᤠᤱ ᤂᤧᤴ ᤁᤧᤗᤢᤵᤐᤠ ᤔᤏᤠ ᤌᤡᤰᤁᤠᤱ ᤔᤧᤘᤠ᤹ᤏᤧᤴ॥ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ ᤏᤢ ᤛᤠᤜᤠ᤹ᤖᤧᤀᤠᤱ ᤜᤠᤒᤠ ᤜᤧᤰᤋᤱᤒᤠᤀᤣ ᤔᤧᤍᤢᤔᤢ᤹॥ ᤀᤠᤒᤠᤅᤣ ᤂᤢᤴᤇᤡ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤋᤢᤶᤄᤥ᤺ᤴ ᤂᤧᤱᤜᤠ᤹ ᤀᤠᤒᤠᤅᤣ ᤂᤥᤔᤠ ᤐᤠᤱᤄᤢᤱᤛᤡᤱ᤹॥” 17 ᤂᤧᤱᤜᤠ᤹ ᤀᤰᤂᤣ ᤔᤧᤵᤔᤠᤛᤡ ᤀᤡᤱᤈᤠᤱ ᤐᤡᤖᤠᤱᤗᤥ. “ᤀᤠᤱᤃᤠ᤹ ᤀᤠᤔᤡᤰᤁᤥᤗᤠᤶ ᤛᤧᤴᤍᤡᤰ ᤗᤧᤴᤍᤡᤰ ᤀᤠᤔᤡᤰᤘᤠ ᤋᤧᤖᤧᤖᤧ ᤌᤠᤵᤗᤥ॥ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤆᤰᤔᤧᤗ᤹ᤏᤧᤸᤗᤖᤥ ᤌᤣᤀᤠᤱᤓᤧᤸᤗᤧ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤀᤠᤛ᤻ᤛᤠ ᤀᤡᤛᤪᤠᤀᤡᤗᤖᤧ ᤛᤠ᤹ᤖᤡᤰ ᤋᤢᤰᤂᤣ ᤋᤢᤔᤢᤀᤠᤱ ᤘᤠ᤹ᤖᤥ ᤂᤧᤒᤩᤠᤱ ᤀᤠᤔᤏᤠᤜᤠ᤹ ᤕᤶᤒᤠ ᤋᤢᤰᤂᤣᤀᤥ ᤔᤧᤎᤩᤧᤀᤠᤱ ᤔᤧᤘᤠ᤹ᤖᤥ॥ 18 ᤀᤠᤱᤃᤠ᤹ ᤀᤡᤰᤋᤠᤵᤐᤥ ᤐᤣ᤺ᤰᤁᤠᤏᤧᤓᤃᤪ. ᤂᤧᤵᤔᤥ ᤌᤱᤅᤥ ᤁᤧᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤏᤡᤛᤢᤱᤗᤥ॥ ᤀᤠᤱᤃᤠ᤹ ᤕᤧᤰᤕᤰᤁᤥ ᤗᤠ᤺ᤳᤋᤠᤏᤧᤓᤃᤪ. ᤂᤧ᤹ᤕᤥ ᤔᤏᤠᤜᤠ᤹ ᤛᤠᤰᤔᤧᤴᤈᤠᤀᤣ ᤔᤧᤛᤡᤖ ᤔᤧᤒᤵᤐᤠ ᤏᤡᤛᤢᤱᤛᤡᤱᤗᤥ॥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤖᤧᤰᤗᤧ ᤀᤠᤒᤠᤅᤣ ᤕᤠ᤺ᤶᤒᤰᤁᤡᤴ ᤔᤧᤈᤥᤃᤢᤖ ᤔᤧᤒᤳᤗᤥ॥ ᤁᤖ ᤂᤧᤱᤜᤠ᤹ᤖᤧ ᤌᤧᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤔᤧᤒᤳ. ᤂᤧᤴ ᤂᤧᤱᤜᤠ᤹ᤖᤧ ᤌᤣᤀᤠᤱ ᤔᤧᤴᤏᤡᤛᤢᤴᤗᤥ॥” ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢ 19 ᤕᤜᤘᤣ ᤍᤠᤱᤒᤠᤀᤣ. ᤌᤣ ᤂᤧᤏᤧ᤹ ᤕᤜᤢᤍᤠᤴ ᤛᤧᤰᤂᤠᤀᤣ ᤁᤧᤏᤠ᤹ᤖᤢᤒᤡ᥅ ᤌᤣ ᤂᤧᤏᤧ᤹ ᤛᤡᤕᤥᤏᤒᤠ ᤕᤰᤕᤢᤱᤒᤠᤜᤠ᤹ ᤜᤡᤗᤠᤵᤑᤢ ᤁᤧᤀᤡ᤺ᤳᤋᤢᤛᤡᤒᤡ᥅ ᤌᤣᤀᤠᤱ ᤘᤣ᤺ᤵᤔᤠ ᤔᤧᤴᤇᤢᤰᤁᤣ ᤌᤠᤖᤡᤰ ᤂᤧᤏᤧ᤹ ᤀᤠᤏᤡᤃᤣ ᤕᤠᤵᤔᤡ ᤁᤧᤄᤠ᤺ᤴᤍᤧᤒᤠᤒᤣ᥅ ᤀᤠᤏᤡᤃᤣ ᤛᤏᤠᤖᤢᤱ ᤁᤥ᤺ᤳᤋᤢᤶᤒᤧᤀᤠᤱ ᤘᤕᤡᤃᤧᤖᤥ ᤁᤖ ᤏᤢᤒᤠ ᤐᤠᤴ ᤌᤣᤀᤠᤱ ᤔᤧᤄᤥᤛᤢᤶᤒᤧᤴᤗᤥ॥ ᤘᤣ᤺ᤵᤔᤠ ᤕᤧᤶᤔᤡᤴ ᤏᤡᤱᤛᤠᤱ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ ᤁᤖ ᤁᤡᤔᤠ ᤕᤱᤔᤠᤖᤰ ᤀᤠᤏᤡᤃᤣ ᤋᤰᤁᤪᤢᤶᤒᤥ ᤀᤡᤖᤧᤍᤩᤧᤖᤥ॥ 20 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ. ᤀᤠᤏᤡᤃᤣ ᤀᤠᤒᤠᤅᤣ ᤗᤠᤕᤥᤴ ᤏᤢ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤶᤒᤧᤖᤥ॥ 21 ᤂᤧᤏᤧ᤹ ᤁᤧᤔᤡᤱᤅᤡᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤣ ᤜᤡᤗᤠᤵᤑᤢ ᤀᤠᤴᤈᤥᤃᤧᤴᤏᤧ᤹ᤀᤥ॥ ᤂᤧᤏᤧ᤹ ᤔᤡᤔᤡᤍᤡᤱᤃᤧᤴ ᤁᤧᤜᤠᤱᤕᤢᤰᤏᤠᤀᤥ ᤋᤠᤵᤑᤧ᤺ᤶᤒᤠ ᤔᤡᤱ ᤔᤧᤍᤠᤖᤧᤴᤏᤧ᤹ᤀᤥ॥ ᤀᤠᤏᤡᤃᤣ ᤏᤡᤱᤘᤠ᤹ ᤀᤠᤀᤡ᤺ᤳᤋᤧ᤹ᤀᤥ ᤜᤧᤰᤁᤩᤠᤱ ᤁᤧᤈᤥᤃᤢᤒᤠ ᤁᤧᤔᤠᤱᤜᤢᤵᤐᤡᤴ ᤔᤧᤗᤧᤖᤧᤴᤏᤧ᤹ᤀᤥ॥ 22 ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤏᤧᤒᤠ ᤔᤠᤱᤛᤠᤶᤔᤠᤱᤜᤠ᤹ᤖᤧ ᤘᤜᤡᤳ ᤌᤠᤔᤠ ᤔᤧᤴᤇᤢᤰᤋᤢᤴᤗᤥ॥ ᤋᤠᤱᤛᤠᤱᤒᤠᤸᤗᤧ ᤀᤠᤒᤠᤅᤣ ᤘᤃᤣ᤺ᤱᤔᤠ ᤔᤧᤛᤢᤰᤋᤢᤴᤗᤥ॥ ᤔᤣ᤺ᤴᤗᤥ. ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤣ ᤂᤧᤏᤧ᤹ᤀᤣ ᤁᤧᤗᤠᤶ ᤀᤥᤔᤧᤳᤋᤢᤶᤒᤧᤀᤠᤱ ᤘᤕᤡᤃᤧᤖᤥ ᤌᤣᤀᤠᤱᤓᤧᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤈᤥ᤺ᤰᤐᤠ ᤂᤧᤏᤧ᤹ᤀᤣ ᤁᤧᤘᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.