ᤕᤷᤔᤡᤕᤠ 13 - LIFOTNTᤕᤷᤔᤡᤕᤠ᤺ᤸᤗᤧ ᤁᤢᤓ᤹ᤀᤡ 1 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤐᤣᤃᤧ᤹ᤀᤠᤱ ᤗᤳᤇᤠ ᤏᤢᤒᤠ ᤑ᤹ᤀᤡᤎᤡᤰ ᤀᤡᤅᤧ᤹ ᤜᤧᤰᤁᤩᤠᤱ ᤂᤧᤴ ᤁᤢᤃᤣᤱᤅᤥ ᤕᤢᤵᤛᤧ᤹ ᤁᤖ ᤂᤧᤴ ᤆᤫᤠ᤺ᤳᤋᤡᤸᤗᤧ ᤘᤖᤰᤔᤠ ᤔᤧᤒᤠᤱᤄᤧᤴᤏᤧ᤹॥” 2 ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤠᤱᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤏᤢᤒᤠ ᤑ᤹ᤀᤡᤎᤡᤰ ᤀᤡᤅᤢᤱᤅᤠᤱ ᤕᤢᤵᤛᤢᤱ॥ 3 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤕᤠᤶᤔᤥ ᤁᤧᤖᤧ. 4 “ᤐᤖᤠᤋᤀᤥ ᤐᤣᤃᤧ᤹ᤀᤠᤱ ᤂᤧᤏᤧ᤹ ᤁᤢᤃᤣᤱᤅᤥ ᤁᤧᤕᤢᤵᤛᤢᤒᤠ ᤌᤠᤰᤔᤏᤠᤒᤠ ᤑ᤹ᤀᤡ᤺ᤴ ᤕᤠᤰᤐᤣ᤹ ᤗᤢᤱᤓᤡ᤺ᤵᤔᤠᤜᤠ᤹ᤀᤥ ᤆᤡᤰᤂᤧ ᤏᤧᤛ᤻ᤛᤧ᤹॥” 5 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤠᤱᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤐᤣᤃᤠᤱᤅᤠᤱ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤸᤗᤧ ᤁᤢᤒᤣᤛᤠᤱ ᤂᤧᤴ ᤑ᤹ᤀᤡ᤺ᤴ ᤆᤡᤰᤂᤢᤱᤎᤠᤱ॥ 6 ᤕᤖᤡᤰ ᤕᤧᤶ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤐᤥᤃᤧ᤹. ᤕᤠᤶᤔᤥ ᤕᤢᤑᤪᤣᤋᤡᤛ ᤘᤜ᤺ᤱᤅᤥ ᤐᤣᤃᤧ᤹ᤀᤠᤱ ᤂᤧᤴ ᤌᤠᤰᤔᤏᤠᤒᤠ ᤑ᤹ᤀᤡ᤺ᤴ ᤕᤠᤱᤏᤠ ᤑᤧᤳᤋᤧ᤹॥” 7 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤵᤔᤥ ᤏᤢ᤺ᤰᤂᤠᤱᤅᤠᤱ ᤐᤣᤃᤠᤱ ᤜᤧᤰᤁᤩᤠᤱ ᤑ᤹ᤀᤡ᤺ᤴ ᤆᤡᤰᤂᤢᤱᤅᤠᤱ ᤏᤧᤛ᤻ᤛᤧᤒᤠᤍᤧᤴᤏᤥ ᤀᤥᤔᤧᤳᤋᤢᤱ ᤜᤧᤰᤁᤣ᤺ᤸᤗᤧ ᤂᤧᤴ ᤕᤖᤧᤀᤠᤱ ᤕᤢᤶᤔᤠ ᤔᤧᤴᤏᤢ᤹ᤔᤏᤠᤒᤠ ᤁᤢᤍᤪᤧᤰ ᤐᤥ᤺ᤰᤂᤧᤒᤠ ᤂᤥᤛᤢᤱ॥ 8 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤕᤠᤶᤔᤥ ᤁᤧᤖᤧ. 9 “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰᤁᤣ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤱᤍᤡᤱ ᤗ᤹ᤔᤠᤴ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤶᤒᤠ ᤜᤧᤴᤇᤡᤱᤔᤠᤴ ᤕᤥ ᤌᤠᤛᤢᤱ ᤐᤡᤖᤢᤱᤛᤡᤱ᤹॥ 10 ᤁᤴ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤏᤠ᤹ᤖᤢᤀᤠᤱ ᤔᤧᤘᤠ᤹॥ ᤂᤧᤱᤜᤠ᤹ ᤀᤠᤓᤧᤸᤗᤧᤛᤠᤱ ᤁᤢ᤹ᤀᤡᤃᤧᤓᤧᤶᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤁᤢᤛᤡᤱᤔᤧᤴᤏᤡ᤺ᤳᤋᤧᤒᤠ ᤛᤠᤶᤔᤠᤱᤜᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡ ᤂᤧᤒᤩᤠᤱ ᤔᤠᤱᤔᤧᤄᤕᤢᤛᤡ᤹॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤧᤱᤜᤠ᤹ ᤁᤴ ᤑ᤹ᤀᤡ᤺ᤴ ᤜᤧᤰᤁᤣ ᤁᤢᤛᤢᤶᤔᤧᤴᤍᤶᤔᤏᤠ ᤜᤏᤧᤒᤠ ᤔᤧᤒᤥᤱ॥ 11 ᤀᤠᤰᤂᤣᤗ᤹ᤖᤡᤰ ᤁᤴ ᤑ᤹ᤀᤡ᤺ᤴ ᤛᤠᤵᤐᤥ᤺ᤰᤁᤥ ᤗᤢᤶᤒᤧᤳ ᤕᤢᤶᤔᤏᤠᤀᤠᤱ ᤐᤳ. ᤜᤧᤰᤁᤣᤗ᤹ᤖᤡᤰᤁᤣ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤠᤱᤃᤠ᤹ᤏᤢ ᤔᤧᤍᤱᤛᤡᤱᤅᤠᤱ ᤔᤧᤄᤡᤶᤛᤡᤱᤗ ᤑᤠ᤹ᤀᤠᤱ ᤀᤠᤱᤃᤠ᤹ ᤆᤥᤃᤢᤱᤛᤡᤱ॥ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤔᤏᤠ ᤔᤧᤒᤥᤱᤗ. ᤂᤧᤱᤜᤠ᤹ᤗᤠᤶᤒᤠ ᤀᤠᤱᤃᤠ᤹ ᤀᤠᤔᤡᤱ ᤐᤥᤱᤗ. ᤀᤠᤏᤠᤖᤠ ᤑᤥᤔᤠ ᤐᤥᤱᤗ ᤜᤧᤰᤁᤩᤠᤱ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤀᤠᤖ ᤁᤧᤗ᤹ᤒᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤘᤕᤧ ᤁᤖ ᤂᤧᤱᤜᤠ᤹ᤖᤧ ᤀᤠᤀᤡᤱᤈᤠᤱᤅᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤗᤥ॥’” 12 “ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤆᤧᤸᤗᤧᤰᤛᤣ᤹ ᤌᤡ ᤕᤠᤱᤔᤠ ᤁᤧᤖᤧᤰ ᤁᤫᤠᤱᤜᤠ᤹ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤌᤡᤶᤔᤠ ᤐᤥᤱ᤹॥’ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤀᤰᤂᤣᤗ᤹ᤖᤡᤰ ᤏᤢᤃᤵ ᤁᤧᤶᤒᤡ. ‘ᤁᤧᤖᤧᤰ ᤆᤧᤸᤗᤧᤰᤛᤣ᤹ ᤌᤡ ᤕᤠᤱᤔᤠ ᤁᤫᤠᤱᤜᤠ᤹ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤌᤡᤶᤔᤠᤛᤡ ᤐᤥᤱ ᤑᤠ᤹ᤀᤠᤱ ᤀᤠᤏᤡᤃᤣ ᤏᤡᤛᤢᤶᤒᤧ᥄’ 13 ᤂᤧᤴ ᤀᤣᤃᤠᤱ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤁᤴ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹. ᤍᤠᤀᤢᤍᤖᤧ ᤁᤢᤔᤢᤀᤡᤍᤠᤱᤛᤠᤗᤠᤶᤒᤠ ᤜᤠᤱ ᤁᤧᤈᤥ᤺ᤰᤐᤠ ᤜᤠᤱᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠ ᤕᤰᤕᤠᤒᤠᤜᤠ᤹. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥᤒᤠ ᤁᤧᤖᤧᤰ ᤕᤰᤕᤢᤱᤒᤠᤜᤠ᤹ᤀᤠᤱ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤸᤗᤧ ᤁᤧᤍᤡᤶᤒᤠ ᤂᤥᤷᤕᤠᤴ ᤌᤢᤱᤄᤢᤱᤛᤡᤱᤅᤠᤱ ᤔᤛᤢᤱᤛᤡᤱ᤹॥ 14 ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤁᤠᤵᤐᤥᤒᤠ ᤋᤢᤶᤓᤠᤰᤛᤠᤜᤠ᤹ ᤂᤧᤒᤩᤠᤱ ᤌᤠᤱᤒᤧᤴᤜᤠ᤹ ᤁᤧᤖᤧᤰ ᤗᤳᤌᤡᤰ ᤐᤖᤡᤰᤗᤧ ᤀᤠᤒᤠᤅᤣ ᤂᤢᤴᤇᤡ᤹ ᤗᤢᤶᤔᤥ ᤌᤰᤂᤢᤱᤛᤡᤱᤅᤠᤱ ᤑᤧᤰᤂᤢᤱᤛᤡᤱ॥ ᤆᤒᤧ᤺ᤳᤇᤡᤰ ᤗᤢᤱᤃᤢᤶᤗᤧ. ᤗᤢᤱᤔᤠ᤹ ᤛᤩᤠ᤺ᤳ ᤗ᤹ᤔᤠᤖᤧ ᤀᤡᤃᤪ ᤗᤢᤱᤔᤠ᤹ ᤋᤢᤰᤔᤠᤛᤡᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤫᤠ᤺ᤳ ᤔᤧᤘᤠ᤹ᤀᤠᤴᤗᤥ॥’” ᤀᤠᤱᤍᤡᤱ ᤗ᤹ᤔᤠ ᤔᤣ᤺ᤴ 15 ᤀᤡᤛᤪᤠᤀᤡᤗᤡᤛᤣ. ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤐᤠᤖᤧᤀᤠᤱ ᤘᤠ᤹ᤖᤥ॥ 16 ᤂᤢᤏᤧ᤹ ᤂᤠᤔᤠᤰᤔᤠᤴ ᤋᤠ᤺ᤵᤔᤠᤏᤢ᤺ᤸᤗᤧ ᤋᤃᤡᤀᤣ. ᤕᤢ᤺ᤴᤇᤡᤰᤐᤠ ᤂᤠᤎᤠᤶᤔᤥ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤂᤡᤏᤡ᤹ ᤗᤠᤱᤜᤠ᤹ ᤋᤥ᤺ᤰᤔᤠᤏᤢ᤺ᤸᤗᤧ ᤋᤃᤡᤀᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤀᤥ॥ ᤂᤡᤏᤡ᤹ᤃ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤀᤥᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤗᤥ ᤁᤖ ᤂᤢᤏᤧ᤹ ᤂᤧᤴ ᤂᤠᤔᤠᤰᤔᤥ ᤗᤧᤰᤂᤢᤀᤠᤱ ᤔᤠᤰᤛᤡ᤺ᤱᤃᤩᤠ᤺ᤵᤐᤠ ᤆᤥᤃᤢᤖᤥ॥ 17 ᤁᤖ ᤂᤡᤏᤡ᤹ ᤁᤴ ᤀᤠᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤔᤡᤴᤏᤧᤓᤃᤪ ᤂᤡᤏᤡ᤹ ᤀᤠᤱᤍᤡᤱ ᤗ᤹ᤔᤠᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤛᤫᤠ᤺ᤳᤋᤠᤱ ᤜᤠ᤺ᤵᤐᤠᤖᤥ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤋᤢᤖᤢ᤺ᤱ ᤋᤢᤖᤢ᤺ᤱᤅᤠᤱ ᤜᤠ᤺ᤵᤐᤠᤖᤥ ᤀᤠᤱᤃᤠ᤹ ᤀᤠᤔᤡᤰᤁᤥᤗᤠᤶ ᤀᤠᤔᤡᤰᤘᤠ ᤋᤧᤖᤧᤖᤧ ᤌᤠᤵᤗᤥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖᤥ॥ 18 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤜᤠᤱᤅᤡᤴ ᤏᤢ ᤜᤠᤱᤔᤠᤴ ᤔᤧᤳᤋᤧᤛᤧ᤹ᤀᤥ ᤜᤠᤱᤕᤢᤰᤏᤠᤀᤥᤗᤠᤶᤒᤠ ᤂᤧᤴᤇᤡ᤹ ᤗ᤺ᤴᤍᤧ ᤕᤧᤛᤣ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤏᤢᤘᤧᤴᤍᤡᤱᤒᤠ ᤋᤡᤆᤜᤠ᤹ ᤌᤧᤃᤣ᤺ᤰᤁᤥᤗᤠᤶᤒᤠ ᤔᤰᤌᤠᤖᤥ॥ 19 ᤕᤜᤢᤍᤠᤒᤠ ᤗᤠᤱᤃᤧᤳ ᤐᤡᤛᤠᤱᤒᤠ ᤕᤧᤰᤕᤰᤜᤠ᤹ ᤏᤡᤱᤔᤡᤜᤠ᤹ᤖᤧ ᤁᤡᤷᤃᤵ ᤔᤧᤃᤒᤢᤖᤥ. ᤂᤧᤴ ᤛᤡᤃᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤐᤣ᤺ᤰᤔᤠ ᤔᤧᤴᤇᤢᤰᤏᤧᤴᤗᤥ॥ ᤕᤜᤢᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖᤥ ᤂᤧᤒᤩᤠᤱ ᤗᤠᤈᤣ᤹ᤗᤠᤶ ᤗᤠ᤺ᤰᤁᤠᤳ ᤔᤧᤍᤣ᤹ᤖᤢᤛᤡᤖᤥ॥” 20 ᤕᤖᤢᤛᤗᤧ᤺ᤶᤔᤣ. ᤁᤧᤔᤡᤰᤁᤡᤸᤗᤧ ᤀᤍᤰᤋᤰᤏᤠ ᤀᤥᤔᤧᤳᤋᤧ᤹ᤀᤥ. ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ ᤌᤠᤱᤃᤧᤳ ᤗᤠᤶᤒᤠ ᤔᤧᤕᤢᤖ ᤔᤧᤒᤳᤗᤥ॥ ᤂᤧᤏᤧ᤹ ᤁᤧᤗᤰᤐᤧᤴᤏᤥ ᤁᤧᤘᤠ᤹ᤒᤠ ᤏᤢᤒᤠ ᤌᤰᤛᤠᤗᤢᤵ ᤜᤧᤰᤋᤱᤒᤠ ᤔᤏᤠᤜᤠ᤹ ᤀᤠᤳᤋᤡ ᤔᤧᤘᤠ᤹ᤒᤣ᥅ ᤂᤧᤱᤜᤠ᤹ᤀᤥ ᤂᤧᤏᤧ᤹ ᤁᤧᤴᤒᤥ ᤁᤧᤓᤥᤛᤢᤒᤠᤴ ᤌᤧᤔᤠ ᤐᤥ᤺ᤰᤂᤧᤒᤣ᥅ 21 ᤂᤧᤏᤧ᤹ ᤀᤠᤒᤠᤅᤣ ᤋᤣ᤺ᤱᤈᤢᤶ ᤁᤧᤀᤡ᤺ᤳᤋᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤌᤱ ᤌᤰᤔᤠ ᤁᤧᤶᤏᤠ᤺ᤴᤍᤧᤖᤥ ᤜᤧᤰᤁᤩᤠᤱ ᤜᤠᤱᤕᤢᤰ ᤆᤥ᤺ᤰᤔᤠ ᤔᤧᤀᤡ᤺ᤳᤋᤢᤸᤗᤧ ᤂᤧᤏᤧ᤹ ᤌᤧᤔᤠ ᤁᤧᤒᤠ᤺ᤳᤋᤢᤀᤡᤖᤥ᥅ ᤛᤠᤃᤵᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤋᤢᤰᤔᤠᤸᤗᤧ ᤕᤠ᤺ᤵᤐᤠ ᤜᤧᤰᤁᤣ ᤂᤧᤏᤧ᤹ ᤁᤧᤒᤥᤱᤗᤥ॥ 22 ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥ ᤀᤰᤂᤣ ᤁᤧᤒᤠ᤺ᤳᤋᤢᤖᤥ. “ᤀᤰᤋᤱᤒᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤛᤶᤎᤠᤱ ᤌᤣᤀᤠᤱ ᤆᤢᤰᤋᤧᤒᤠᤒᤣ᥅” ᤁᤱᤃ ᤂᤧᤏᤧ᤹ ᤁᤧᤗᤠᤕᤥᤸᤗᤧ ᤆᤥᤃᤢᤸᤗᤧ ᤀᤰᤂᤣ ᤐᤥ᤺ᤰᤂᤧᤒᤠᤖᤥ ᤁᤧᤛᤡᤶᤔᤡᤴ ᤋᤧ᤺ᤰᤂᤧᤀᤠᤱ ᤛᤠᤰᤁᤧᤸᤗᤧᤰ ᤔᤣ᤺ᤳ ᤁᤧᤶᤍᤣ᤹ᤖᤧᤒᤠᤖᤥ॥ 23 ᤌᤣ ᤁᤢᤛᤒᤠ ᤔᤏᤠ᤺ᤸᤗᤧ ᤀᤠᤵᤑᤣᤰ ᤁᤢᤏᤧᤰᤛᤠᤴ ᤑ ᤗ᤹ᤖᤡᤰ ᤗᤧᤱᤔᤠ ᤛᤢᤰᤋᤢᤒᤡ᥅ ᤀᤡᤃᤪ ᤌᤣ ᤌᤧᤖᤡᤱᤒᤠᤸᤗᤧ ᤀᤠᤒᤠᤅᤣ ᤋᤧᤰᤁᤪᤠᤒᤠ ᤁᤢᤜᤥᤖᤡᤰᤐᤠᤴ ᤗᤧᤰᤔᤠ ᤛᤢᤰᤋᤢᤒᤡ᥅ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤏᤢᤒᤠ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤴᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤋᤠᤵᤑᤧ᤺ᤶᤒᤠᤴ ᤆᤥ᤺ᤰᤔᤠ ᤁᤧᤜᤢ᤹ᤀᤠᤛᤡᤀᤠᤱ ᤁᤧᤘᤕᤡᤖᤥ॥ 24 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥᤒᤠ ᤛᤢᤖᤡ᤺ᤳᤋᤡᤸᤗᤧ ᤕᤠ᤹ᤛᤡᤵᤐᤧᤴ ᤑᤧᤛᤢᤖᤥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤱᤃᤠ᤹ ᤂᤡᤏᤡ᤹ ᤑᤢᤳᤇᤡᤱᤈᤩᤠᤱ ᤆᤥ᤺ᤰᤏᤡᤱᤗᤥ॥ 25 ᤀᤰᤋᤱᤒᤠᤀᤣ ᤐᤥᤱᤗ ᤑᤠ᤹ᤀᤠᤱ ᤁᤧᤍᤫᤠᤒᤥ ᤛᤠᤵᤋᤢᤱᤅᤠᤱ ᤐᤳᤗᤥ॥ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤀᤰᤂᤣᤀᤣ ᤆᤥ᤺ᤰᤔᤠ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ᤖᤥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤏᤡᤱᤘᤠ᤹ ᤁᤧᤓᤣ᤺ᤳᤇᤠᤱᤅᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤀᤡᤱᤗᤧᤰᤐᤠ ᤛᤠᤶᤔᤠᤱᤜᤠ᤹ᤀᤥ ᤁᤧᤏᤡᤱᤘᤠ᤹ ᤁᤧᤕᤢᤰᤂᤢᤀᤠᤱ ᤁᤧᤘᤠ᤹ᤖᤥ॥ 26 ᤀᤠᤱᤃᤠ᤹ ᤀᤠᤒᤠᤅᤣ ᤂᤧᤏᤧ᤹ ᤁᤧᤛᤡᤶᤔᤧᤴ ᤁᤧᤏᤠᤖᤠᤀᤥ ᤌᤠᤖᤡᤰ ᤛᤡᤴᤍᤢᤱ ᤐᤡᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤢ᤺ᤶᤔᤠᤴ ᤏᤡᤎᤠ᤺ᤵᤗᤥ॥ 27 ᤀᤠᤱᤃᤠ᤹ ᤆᤡ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤁᤧᤈᤥᤃᤢᤖ ᤁᤧᤘᤠ᤹ᤖᤥ ᤂᤧᤴ ᤀᤠᤱᤃᤠ᤹ᤀᤣ ᤏᤡᤛᤢᤱᤅᤠᤱ ᤘᤠ᤹ᤖᤥ॥ ᤂᤧᤏᤧ᤹ ᤁᤥ᤺ᤰᤔᤠ ᤑᤠᤱᤈᤱ ᤏᤢ ᤏᤧᤏᤧᤒᤠᤍᤧᤴᤏᤥ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖᤥ. ᤂᤧᤏᤧ᤹ ᤆᤠᤖᤠᤶᤔᤠ. ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤜᤧᤰᤁᤩᤠᤱ ᤁᤧᤳᤏᤡᤔᤠᤴᤏᤢ ᤁᤧᤃᤠᤶᤛᤡᤱᤒᤠᤴ ᤏᤡᤛᤢᤱᤅᤠᤱ ᤘᤠᤖᤥ॥ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ. ᤂᤡᤏᤡ᤹ ᤛᤧᤰᤂᤠᤀᤣ ᤁᤧᤔᤧᤃᤡᤖᤥ. ᤂᤡᤏᤡ᤹ ᤀᤠᤵᤑᤠᤸᤗᤧ ᤌᤠᤖᤡᤰ ᤀᤠᤛᤢᤳᤌᤥ ᤁᤧᤒᤥ᤺ᤰᤂᤡᤒᤠᤒᤣ᥅” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.