ᤕᤷᤔᤡᤕᤠ 12 - LIFOTNT

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤷᤔᤡᤕᤠᤖᤧ ᤁᤢᤛᤣ᤺ᤴᤍᤥ ᤐᤠ᤺ᤴᤜᤠ᤹

¹ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤂᤧᤏᤧ᤹ᤏᤢ ᤐᤠ᤺ᤴᤎᤱ ᤆᤥᤃᤢᤱᤗᤥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ᤀᤣ ᤁᤢᤍᤥ᤺ᤵᤔᤠ ᤁᤧᤗᤠ᤹ᤖᤥ. ᤜᤧᤰᤁᤣᤛᤠᤱ ᤂᤠᤛᤧᤴᤗᤧ ᤐᤠ᤺ᤴᤏᤥ ᤀᤠᤱᤃᤠ᤹ ᤂᤧᤏᤧ᤹ᤀᤣ ᤛᤣ᤺ᤴᤗᤠᤵᤔᤠ ᤐᤥᤱᤗᤥ॥ ᤌᤣᤀᤠᤱ ᤋᤠᤰᤁᤧᤓᤧ᤹ᤒᤠᤜᤠ᤹ ᤔᤧᤏᤢ᤹ᤔᤧᤍᤠᤖ ᤔᤧᤘᤠ᤹ᤒᤠᤒᤣ᥅ ᤌᤣᤀᤠᤱ ᤀᤡᤱᤀᤠᤗᤧᤰᤗᤧᤰᤐᤠᤜᤠ᤹ ᤌᤥᤒᤥ ᤔᤧᤒᤥᤱᤗ ᤔᤧᤘᤠ᤹ᤒᤠᤒᤣ᥅

² ᤂᤧᤱᤜᤠ᤹ ᤁᤧᤗᤣ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤵᤐᤡᤴ ᤔᤧᤗᤣ᤺ᤳᤋᤢᤖᤥ. ᤂᤧᤱᤜᤠ᤹ ᤔᤧᤒᤥ᤹᤺ ᤜᤧᤰᤁᤩᤠᤱ ᤛᤡᤱᤛᤣ᤹ ᤌᤥ᤺ᤰᤗᤥ॥ ᤂᤧᤱᤜᤠ᤹ᤖᤧ ᤁᤧᤕᤠ᤺ᤶᤒᤣᤀᤥ ᤐᤠ᤺ᤴᤃ ᤏᤢᤒᤠᤀᤣ ᤔᤧᤒᤠ᤺ᤳᤋᤢᤖ ᤔᤧᤘᤠ᤹ᤖᤥ ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤂᤧᤏᤧ᤹ᤗᤠᤶᤒᤠ ᤔᤠ᤺ᤱᤄᤠ ᤘᤠ᤹ᤖᤥ॥

³ ᤁᤖ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤀᤠᤱᤃᤠ᤹ ᤁᤧᤏᤡᤀᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤜᤠ᤹ ᤁᤥ᤺ᤳᤋᤧ᤹ᤀᤥ ᤁᤴ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ ᤛᤧᤳᤇᤧ ᤋᤣ᤹ᤔᤏᤠᤛᤡᤒᤠ ᤔᤧᤸᤗᤢᤰᤜᤠ᤹ ᤜᤧᤰᤁᤣ ᤋᤣ᤹ᤖᤧᤛᤧ᤹ᤀᤥ ᤂᤧᤒᤩᤠᤱ ᤛᤧᤵᤔᤠᤛᤡ ᤕᤧᤴ ᤌᤠᤖᤡᤰ ᤂᤧᤱᤜᤠ᤹ ᤛᤧᤴᤍᤧ ᤕᤢᤰᤂᤧᤛᤧ᤹ᤀᤥ॥

⁴ ᤀᤠᤵᤑᤠᤸᤗᤧ ᤌᤠᤖᤡᤰ ᤀᤠᤏᤡᤃᤣ ᤗᤠᤈᤣᤴ ᤜᤣᤀᤠᤱ ᤏᤧᤒᤠᤒᤣ᥅ ᤜᤧᤰᤁᤩᤠᤱ ᤀᤡᤰᤋᤠᤵᤜᤠ᤹ᤀᤥ ᤆᤠᤓᤧᤳᤗᤠ᤺ᤴ ᤀᤠᤓᤧᤸᤗᤧ ᤌᤧᤶᤒᤠ ᤀᤡᤖᤧᤶᤔᤠᤱ ᤕᤢᤱᤒᤠᤒᤣ᥅ ᤁᤴ ᤗᤠᤈᤣ᤹ᤀᤥᤒᤠ ᤕᤰᤕᤢᤱᤒᤠᤜᤠ᤹ ᤁᤢ᤹ᤀᤡᤔᤧᤓᤧᤶᤒᤠᤸᤗᤧ ᤆᤥᤃᤢᤸᤗᤧ ᤌᤰᤛᤠᤐᤢᤛᤠᤜᤠ᤹ ᤔᤧᤛᤡᤖ ᤔᤧᤒᤳᤗᤥ. ᤜᤧᤰᤁᤣᤛᤠᤱ ᤁᤴ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤣ ᤕᤠ᤺ᤶᤒᤰᤁᤡᤴ ᤔᤧᤏᤡᤛᤢᤴᤗᤥ॥”

ᤕᤜᤘᤣ ᤍᤠᤱᤒᤧᤸᤗᤧ ᤕᤷᤔᤡᤕᤠᤴ ᤏᤢᤃᤵ ᤐᤡᤖᤢ

⁵ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤕᤷᤔᤡᤕᤠᤀᤣ. ᤂᤧᤏᤧ᤹ ᤔᤏᤠᤜᤠ᤹ᤏᤢ ᤁᤧᤗᤥ᤺ᤰᤁᤡᤸᤗᤧᤀᤣ ᤁᤧᤏᤠᤏᤧᤓᤃᤪ ᤀᤠᤰᤂᤣᤗ᤹ᤖᤡᤰ ᤀᤴᤜᤠ᤹ᤏᤢ ᤛᤥᤛᤥᤖᤡᤰ ᤗᤥ᤺ᤰᤔᤠ ᤁᤧᤛᤢᤰᤐᤣ᥅ ᤕᤶᤒᤠ ᤏᤧᤏᤧᤒᤠᤍᤧᤴᤏᤥ ᤂᤧᤏᤧ᤹ ᤁᤧᤈᤥ᤺ᤴᤏᤧᤓᤃᤪ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤑᤠᤳᤋᤠᤵᤜᤠ᤹ᤀᤥ ᤜᤧᤴ ᤆᤥ᤺ᤰᤔᤠ ᤁᤧᤛᤢᤰᤋᤢᤒᤣ᥅

⁶ ᤂᤧᤱᤜᤠ᤹ᤃ ᤂᤧᤏᤧ᤹ᤀᤣ ᤁᤧᤶᤓᤢ᤹ ᤁᤧᤴᤛᤠ᤹ ᤏᤢ ᤀᤠᤒᤠᤅᤣ ᤁᤧᤜᤡᤶᤛᤕᤱᤒᤠ ᤔᤏᤠᤛᤡᤖᤥ ᤂᤧᤱᤜᤠ᤹ᤖᤧᤀᤣ ᤂᤧᤏᤧ᤹ ᤗᤠᤛᤠᤰ ᤁᤧᤶᤔᤧᤳᤋᤧᤀᤠᤱ ᤘᤠ᤹ᤖᤥ॥ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤁᤧᤓᤳᤇᤧ ᤂᤧᤱᤜᤠ᤹ ᤔᤧᤍᤩᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤂᤧᤏᤧ᤹ᤏᤢ ᤁᤢᤈᤠᤃᤧᤏᤢ᤹ᤒᤠ ᤐᤠᤴ ᤔᤧᤒᤠ᤺ᤳᤋᤢᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤏᤠᤔᤧᤛᤠ᤹ᤖᤧᤴᤏᤧ᤹ᤀᤥ॥

⁷ “ᤀᤠᤱᤃᤠ᤹ ᤀᤡᤛᤪᤠᤀᤡᤗᤧᤴ ᤗᤠᤵᤑᤢᤛᤢᤱᤅᤠᤱ ᤘᤠ᤹ᤀᤠᤖᤥ. ᤀᤠᤵᤑᤣᤰ ᤛᤣᤃᤢᤱᤛᤡᤱᤒᤠ ᤛᤢᤘᤠᤱᤜᤠ᤹ ᤗᤧᤖᤢᤱᤛᤡᤱᤅᤠᤱ ᤔᤧᤘᤠ᤹ᤖᤥ॥ ᤀᤠᤱᤃᤠ᤹ ᤀᤠᤛᤡᤖᤠ᤹ ᤁᤧᤎᤠᤱᤒᤠᤜᤠ᤹ᤃ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤐᤡᤖᤢᤱᤛᤡᤱᤅᤠᤱ ᤔᤧᤘᤠ᤹ᤖᤥ॥

⁸ “ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤔᤏᤠᤜᤠ᤹ ᤀᤠᤍᤰᤗᤧᤱᤘᤠᤀᤥ ᤔᤧᤒᤥᤃᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ ᤋᤠᤶᤓᤢᤱᤅᤥᤒᤠ ᤂᤡᤖᤡᤱᤒᤠᤴ ᤜᤧᤰᤁᤣ ᤔᤧᤗ᤹ᤖᤥ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤛᤶᤎᤠᤱ ᤔᤧᤜᤢ᤺ᤰᤁᤠᤱ ᤔᤧᤘᤠ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤐᤈᤡ᤺ᤳ ᤆᤡ᤺ᤳᤋᤢᤱᤛᤡᤱᤗᤥ॥

⁹ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤔᤏᤠᤜᤠ᤹ ᤋᤧᤰᤁᤪᤠᤒᤠ ᤑᤡ᤺ᤳᤆᤥ ᤜᤧᤰᤁᤣ ᤔᤧᤗ᤹ᤖᤥ ᤁᤖ ᤂᤢᤴᤇᤡ᤹ ᤀᤠᤒᤠᤅᤣᤏᤡ ᤑᤡ᤺ᤳᤆᤥᤜᤠ᤹ᤖᤧ ᤔᤧᤓᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤋᤠᤶᤓᤢᤱ ᤌᤰᤛᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤡ᤺ᤰᤜᤠ᤹ ᤆᤠᤛᤧ ᤑᤢᤰᤂᤧᤛᤧ᤹ᤀᤥ॥

¹⁰ “ᤘᤣ᤹ ᤗᤠᤈᤣ᤹ᤒᤠ ᤕᤖᤡᤰ ᤜᤠᤱᤕᤢᤰᤐᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤔᤧᤔᤧᤰᤂᤢᤀᤠᤱ ᤏᤧᤖᤥ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤕᤖᤡᤰ ᤀᤠᤒᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤴ ᤔᤧᤛ᤹ᤖᤢ ᤔᤧᤗᤠ᤺ᤰᤋᤢᤀᤠᤱ ᤏᤧᤖᤥ॥ ᤛᤠ᤹ᤖᤡᤰ ᤏᤢᤒᤠ ᤀᤠᤗᤠᤈᤣᤴ ᤂᤧᤱᤜᤠ᤹ᤖᤧ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤔᤧᤈᤥᤃᤢᤀᤠᤱ ᤏᤧᤖᤥ॥

¹¹ ᤂᤧᤱᤜᤠ᤹ᤖᤧ ᤂᤧᤴ ᤌᤣᤀᤠᤱ ᤁᤧᤜᤥᤵᤐᤠ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢᤀᤠᤱ ᤏᤧᤖᤥ. ᤂᤧᤴ ᤀᤠᤱᤃᤠ᤹ ᤀᤠᤍᤃᤡ ᤆᤠ ᤔᤧᤴᤏᤢ᤹ᤔᤏᤠᤒᤠᤍᤧᤴ ᤐᤥ᤺ᤰᤂᤧᤀᤠᤱ ᤏᤧᤖᤥ॥ ᤁᤠᤰ ᤗᤠᤈᤣᤴ ᤗᤳᤇᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤐᤥ᤺ᤰᤂᤧᤀᤠᤱ ᤏᤧᤖᤥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤂᤧᤴ ᤏᤡᤏᤡ ᤔᤧᤗᤠᤵᤋᤢᤴᤗᤥ॥

¹² ᤀᤣ᤺ᤰᤛᤠᤍᤧᤴᤏᤥᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤁᤥ᤺ᤰᤔᤠᤜᤠ᤹ ᤕᤖᤡᤰ ᤀᤠᤔᤧᤱᤔᤧᤱᤒᤠᤜᤠ᤹ᤖᤧ ᤔᤧᤒᤴᤇᤢᤖᤥ. ᤜᤧᤰᤁᤩᤠᤱ ᤂᤧᤴ ᤗᤠᤈᤣ᤹ᤀᤥᤒᤠᤜᤠ᤹ ᤏᤠᤵᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤍᤩᤧᤀᤠᤱ ᤔᤧᤘᤠ᤹ᤖᤥ॥ ᤀᤠᤍᤠᤓᤣ᤺ᤸᤗᤧ ᤗᤠᤈᤣᤴ ᤌᤡᤰ ᤛᤢᤰᤐᤥᤗᤠᤶ ᤘᤣ᤹ ᤁᤢᤛᤢᤰᤐᤥ ᤌᤠᤖᤡᤰ ᤔᤧᤰᤂᤢᤖᤥ ᤀᤠᤳᤋᤡᤸᤗᤧᤀᤠᤱ ᤛᤏᤠᤖᤢᤱᤅᤥ ᤘᤠ᤹ᤔᤠ ᤔᤧᤄᤥᤛᤢᤴᤗᤥ॥

¹³ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤛᤡ ᤔᤧᤜᤣ᤹ᤖᤢᤖᤥ. ᤁᤖ ᤂᤧᤱᤜᤠ᤹ᤖᤧ ᤁᤢᤍᤡᤱ ᤁᤧᤒᤵᤐᤠ ᤕᤠ᤺ᤴᤜᤠ᤹ ᤔᤧᤛᤢᤵᤛᤢᤖᤥ॥ ᤂᤧᤱᤜᤠ᤹ᤖᤧ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤔᤧᤈᤥᤃᤢᤖᤥ ᤁᤖ ᤂᤢᤴᤇᤡ᤹ ᤜᤢᤰᤁᤥ ᤌᤣᤀᤠᤱ ᤔᤧᤎᤩᤧᤏᤧᤴᤗᤥ॥ ᤀᤠᤱᤃᤠ᤹ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤀᤠᤛᤡᤰᤁᤡᤸᤗᤧ ᤜᤧᤰᤁᤣ ᤐᤥ᤺ᤰᤂᤧᤒᤠᤖᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤥᤃᤢᤃᤧᤴ ᤁᤢᤈᤠ ᤔᤧᤎᤥ᤺ᤰᤋᤧᤶᤒᤠᤸᤗᤧ ᤂᤧᤱᤜᤠ᤹ ᤛᤡᤖᤡᤱᤔᤔᤥ ᤔᤧᤎᤩᤧᤖᤥ॥”

ᤀᤡᤛᤪᤠᤀᤡᤗ ᤏᤡ᤺ᤳᤋᤠᤱᤒᤠ ᤗᤠᤈᤣ᤹ᤜᤠ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ

¹⁴ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤐᤡᤖᤢᤱᤛᤡᤱᤒᤠ ᤀᤡᤛᤪᤠᤀᤡᤗ ᤗᤠᤈᤣᤴ ᤐᤣᤛᤠᤱᤒᤠᤜᤠ᤹ᤖᤧ ᤔᤧᤱᤔᤠ ᤔᤧᤃᤥ᤺ᤳᤋᤢ᤹ ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤁᤢᤓᤠ ᤐᤠᤴ ᤐᤠ᤺ᤵᤔᤠ ᤁᤳᤋᤢᤱ᤹॥ ᤀᤠᤱᤃᤠ᤹ ᤂᤧᤴ ᤁᤢ᤹ᤀᤡᤃᤧᤓᤧᤶᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤁᤢᤒᤢᤱ ᤀᤠ᤺ᤱᤔᤏᤠᤒᤠ ᤜᤧᤰᤁᤣ ᤀᤠ᤺ᤰᤂᤢᤱᤛᤡᤱᤅᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤗᤠᤶᤒᤠ ᤏᤠ᤺ᤳᤋᤢᤱᤛᤡᤱ᤹॥ ᤕᤜᤢᤍᤠ᤺ᤴᤏᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤜᤠ᤹ᤕᤠᤰ ᤀᤠ᤺ᤰᤂᤢᤱ᤹॥

¹⁵ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤜᤠ᤹ ᤀᤠ᤺ᤰᤂᤢᤱᤍᤣᤛᤢᤱ ᤜᤧᤰᤁᤣᤛᤠᤱ ᤀᤣᤃᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱ॥ ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤈᤣ᤹ᤀᤥᤒᤠ ᤀᤡᤰᤋᤠᤵᤐᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ॥

¹⁶ ᤌᤡᤰᤗᤧᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤂᤧᤱᤜᤠ᤹ᤖᤧ ᤒᤠᤗ ᤛᤠᤶᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤵᤔᤠ ᤔᤧᤜᤢ᤹ᤖᤢᤛᤡ ᤁᤖ ᤀᤠᤸᤗ ᤂᤧᤱᤜᤠ᤹ᤖᤧ ‘ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ’ ᤔᤠᤱᤔᤧᤜᤧᤰᤛᤡᤱ ᤜᤧᤰᤁᤩᤠᤱ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤢᤳᤏᤠ᤺ᤴ ᤏᤢᤖᤡᤰᤁᤠᤱ ᤔᤧᤜᤢ᤹ᤛᤡᤱᤏᤧᤓᤃᤪ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤧᤕᤢᤰᤂᤢᤛᤡ॥

¹⁷ ᤁᤖ ᤁᤢᤓᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤒᤠ᤺ᤴᤈᤠ᤺ᤰᤁᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤏᤧᤓᤃᤪ ᤀᤠᤱᤃᤠ᤹ ᤂᤧᤱᤜᤠ᤹ ᤜᤠ᤹ᤕᤠᤰ ᤀᤠ᤺ᤰᤂᤢᤱᤛᤡᤱᤅᤠᤱ ᤔᤧᤰᤂᤢᤱᤛᤡᤱ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”