ᤕᤷᤔᤡᤕᤠ 11 - LIFOTNTᤀᤡᤛᤪᤠᤀᤡᤗᤖᤧ ᤔᤠᤱᤜᤢᤵᤐᤡᤴ ᤔᤧᤃᤧᤳᤋᤢᤴ 1 ᤕᤜᤘᤣ ᤍᤠᤱᤒᤠᤗᤠᤶ ᤕᤷᤔᤡᤕᤠᤀᤥ ᤀᤰᤋᤱᤒᤠ ᤀᤡᤱᤄᤱ ᤁᤧᤖᤧ. 2 “ᤁᤴ ᤔᤠᤱᤜᤢᤵᤐᤥ ᤜᤢᤵᤔᤏᤠᤒᤠ ᤐᤠ᤺ᤴᤜᤠ᤹ ᤏᤢᤖᤡᤰᤁᤠᤱ ᤂᤧᤵᤛᤧ᤹॥ ᤕᤜᤢᤍᤠ ᤏᤢ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤕᤰᤕᤢᤱᤒᤠᤜᤠ᤹ ᤔᤧᤳᤋᤧᤛᤧ᤹॥ 3 ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹ ᤑᤠ᤹ᤀᤠᤱ ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤁᤴ ᤔᤠᤱᤜᤢᤵᤐᤥ ᤜᤢᤵᤔᤏᤠᤒᤠ ᤐᤠ᤺ᤴᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠᤒᤠ ᤁᤧᤖᤧᤰ ᤔᤏᤠᤜᤠ᤹ ᤀᤠᤱᤃᤠ᤹ ᤔᤠᤱᤍᤣ ᤛᤠᤰᤔᤢᤖᤠ ᤔᤧᤳᤋᤢᤱᤛᤡᤱ᤹॥ 4 ᤂᤧᤱᤜᤠ᤹ᤖᤧ ᤕᤧᤳᤋᤢᤰᤂᤣ ᤔᤧᤍᤢᤔᤢᤒᤠ ᤑᤧᤴᤈᤣ᤹ ᤕᤥ᤺ᤶᤔᤠᤍᤧᤴ ᤜᤧᤰᤋᤱᤒᤠ ᤔᤡᤛᤪ ᤗᤠᤈᤣ᤹ᤗᤠᤶᤒᤠ ᤀᤠᤱᤃᤠ᤹ ᤂᤧᤱᤜᤠ᤹ ᤗ᤺ᤳᤋᤢᤱ ᤌᤠᤰᤋᤢᤱᤛᤡᤱᤅᤡᤸᤗᤧ ᤁᤴ ᤔᤠᤱᤜᤢᤵᤐᤡᤴ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤏᤢ ᤂᤧᤴ ᤕᤧᤶᤔᤥ ᤆᤥᤃᤢᤱᤅᤠᤱ ᤘᤕᤠᤱ॥ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤂᤧᤱᤜᤠ᤹ ᤀᤡ᤺ᤳᤋᤧᤶᤔᤧ ᤏᤠ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤜᤧᤰᤁᤣ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤆᤥᤃᤧᤶᤔᤧ᤹ ᤔᤧᤳᤋᤢᤱᤛᤡᤱᤅᤠᤱ ᤘᤕᤠᤱ॥’ ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ‘ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ ᤂᤡᤏᤡ᤹ ᤀᤠᤔᤏᤠ ᤁᤧᤒᤥ᤺ᤰᤂᤡ᤹ ᤂᤧᤒᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ॥ 5 ᤂᤧᤒᤩᤠᤱ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣ᤹ᤎᤡᤰ ᤐᤡᤏᤡᤱ ᤔᤧᤳᤋᤢᤱᤛᤡᤱᤒᤠ ᤔᤠᤱᤜᤢᤵᤐᤡᤴ ᤁᤧᤳᤋᤢᤱ॥ ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤗᤠᤈᤣ᤹ᤀᤥ ᤀᤠᤸᤗᤥ ᤂᤡᤏᤡ᤹ ᤁᤧᤕᤢᤅᤡᤖ ᤁᤧᤘᤕᤡ॥’” ᤀᤠᤱᤃᤠ᤹ ᤔᤧᤳᤋᤢᤱ. “ᤕᤜᤘᤣ ᤍᤠᤱᤒᤠᤀᤣ. ᤀᤰᤂᤣᤀᤣ ᤐᤥᤱᤗᤖᤥ॥” 6 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤗᤠᤶᤗᤠᤶᤔᤥ ᤐᤣᤃᤧ᤹॥ ᤂᤧᤵᤔᤥ ᤀᤠᤱᤃᤠ᤹ ᤀᤠᤀᤡᤱᤄᤱᤅᤡᤴ ᤔᤧᤳᤋᤧᤛᤧ᤹ ᤂᤧᤒᤩᤠᤱ ᤔᤏᤠᤜᤠ᤹ ᤀᤠᤔᤠᤱᤜᤢᤵᤐᤥ ᤜᤢᤵᤔᤏᤠᤒᤠ ᤐᤠ᤺ᤴᤜᤠ᤹ ᤂᤧᤶᤔᤠ ᤏᤢ ᤂᤧᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤠᤱᤄᤧᤛᤧ᤹॥ 7 ᤀᤠᤳᤋᤡᤴ ᤕᤧᤶᤔᤥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤔᤡᤛᤪᤗᤠᤶ ᤌᤧ᤹ᤖᤢᤱᤛᤡᤱᤅᤠᤱ ᤌᤠᤰᤋᤢᤱᤛᤡᤱ. ᤂᤧᤴ ᤕᤧᤶᤔᤥ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤕᤧᤳᤗᤧᤱ ᤛᤠᤶᤍᤡᤱ ᤐᤡᤖᤢᤱᤛᤡᤱᤅᤠᤱ ᤐᤳᤇᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤀᤡᤴ ᤌᤠᤖᤡᤰ ᤁᤴ ᤔᤏᤠᤜᤠ᤹ ᤛᤠᤶᤍᤡᤱ ᤐᤡᤖᤢᤱᤛᤡᤱᤗ ᤘᤠ᤹ᤀᤠ॥ 8 ᤁᤖ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ ᤜᤧᤰᤁᤩᤠᤱ ᤂᤧᤶᤄᤧᤶᤔᤠᤱ ᤔᤧᤸᤗᤠᤵᤋᤢᤴ॥ ᤐᤖᤢᤔᤠᤸᤗᤧ ᤂᤧᤱᤜᤠ᤹ ᤀᤠᤓᤧᤸᤗᤧᤛᤠᤱ ᤜᤠᤍᤡᤱ ᤁᤧᤎᤰᤐᤠ ᤏᤢ ᤋᤠᤰᤁᤧᤓᤧ᤹ᤒᤠᤖᤰ ᤔᤧᤒᤥ᤺ᤰᤂᤧ॥ ᤂᤧᤴ ᤔᤠᤱᤜᤢᤵᤐᤡᤴ ᤁᤧᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤱᤜᤠ᤹ ᤀᤡᤱᤈᤠᤱ ᤐᤡᤖᤢᤱᤛᤡᤱᤅᤠᤱ ᤘᤕᤠᤱ ᤁᤖ ᤂᤧᤱᤜᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤔᤧᤴᤍᤧᤴᤍᤧᤴ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤔᤠᤱᤜᤢᤵᤐᤥ ᤐᤥᤎᤰ ᤁᤧᤒᤥᤱᤒᤠ ᤁᤧᤖᤧᤰ ᤂᤢᤶᤍᤡᤱᤜᤠ᤹ ᤀᤠᤱᤃᤠ᤹ ᤂᤧᤴᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤌᤠᤛᤢᤱ॥” 9 ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤆᤧᤶᤓᤴ ᤔᤧᤈᤥᤃᤢᤖ ᤔᤧᤘᤠ᤹॥ 10 ᤀᤠᤱᤃᤠ᤹ ᤀᤠᤒᤠ᤺ᤴᤈᤠ᤺ᤰᤜᤠ᤹ ᤂᤧᤶᤔᤠ ᤔᤧᤴᤍᤧᤶᤔᤏᤠᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤒᤠᤅᤣ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥ ᤗᤠᤛᤥᤳ ᤗᤧᤵᤔᤠᤱ ᤂᤧᤱᤜᤠ᤹ ᤔᤧᤗᤠᤛᤧᤀᤠᤱ ᤔᤧᤘᤠ᤹॥ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤇᤡᤴᤒᤠ ᤀᤣᤕᤠᤱᤒᤠ ᤛᤠᤶᤔᤠᤱᤜᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡᤀᤠᤱ ᤔᤧᤘᤠ᤹॥ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠ ᤏᤧᤵᤔᤠᤱᤒᤠ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤔᤠᤱᤜᤢᤵᤐᤡᤴ ᤔᤧᤱᤃᤧᤳᤋᤣ ᤔᤧᤓᤣ᤺ᤴᤍᤢᤀᤠᤱ ᤘᤠ᤹॥ 11 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹. ᤀᤠᤱᤃᤠ᤹ ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤛᤠᤶᤍᤡᤱ ᤐᤡᤖᤢᤱᤛᤡᤱᤅᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤔᤧᤰᤔᤠᤛᤡᤔᤧᤴ ᤋᤠᤖᤢᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤳᤇᤡᤱᤔᤠ ᤔᤧᤴᤇᤢᤰᤏᤧᤴ॥ ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤁᤢᤓᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤐᤣᤗᤡ ᤁᤧᤓᤠᤰᤁᤠᤏᤧᤓᤃᤪ ᤀᤠᤱᤃᤠ᤹ ᤔᤧᤄᤧᤵᤛᤢᤱᤅᤡᤴ॥ 12 ᤂᤧᤒᤩᤠᤱ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠᤜᤠ᤹ᤖᤧ ᤛᤢᤰᤐᤠ ᤔᤧᤜᤠ᤺ᤴᤍᤢᤀᤠᤱ ᤔᤠᤱᤔᤧᤄᤕᤢᤛᤡᤒᤠ ᤛᤠᤶᤔᤠᤱᤜᤠ᤹ ᤔᤧᤜᤠ᤺ᤵᤗ ᤐᤣᤗᤡ ᤔᤧᤓᤠᤰᤋᤢᤛᤡ᤹॥ ᤁᤖ ᤂᤧᤴ ᤛᤠᤶᤔᤠᤱᤜᤠ᤹ᤖᤧ ᤔᤧᤰᤔᤠᤛᤡᤔᤠ ᤕᤧᤶᤔᤥ ᤂᤧᤱᤜᤠ᤹ ᤋᤠᤱᤛᤧ᤺ᤵᤔᤠ ᤔᤧᤴᤇᤢᤰᤋᤢᤴᤛᤡᤴ॥ 13 ᤕᤜᤢᤍᤠᤀᤥ ᤀᤠᤰᤂᤩᤠᤖᤡᤰ ᤕᤧᤰᤕᤰᤜᤠ᤹ ᤏᤧ᤹᤺. ᤂᤧᤵᤔᤥᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤂᤧᤶᤔᤩᤠᤰᤁᤣ ᤕᤖᤡᤰ ᤛᤠᤶᤔᤠᤱᤜᤠ᤹ ᤔᤧᤃᤳᤋᤢᤛᤡ᤹॥ ᤕᤖᤢᤛᤗᤧ᤺ᤶᤔᤥ ᤀᤠᤰᤂᤧᤶᤔᤩᤠᤰ ᤗᤠᤶᤜᤠ᤹ ᤏᤧ᤹᤺. ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤂᤧᤶᤔᤩᤠᤰᤁᤣ ᤕᤖᤡᤰ ᤂᤧᤴ ᤀᤠᤏᤢ᤺ᤴᤏᤢ᤺ᤶᤒᤠ ᤕᤠᤶᤃᤧᤛᤡᤱᤒᤠ ᤒᤠᤗ ᤛᤠᤶᤔᤠᤱᤅᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤛᤢᤰᤐᤠ ᤜᤠ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤈᤥᤃᤢᤀᤠᤱ ᤏᤧ᤹᤺॥ 14 “ᤕᤷᤔᤡᤕᤠᤀᤣ. ᤁᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤋᤢᤘᤠ ᤔᤧᤈᤥᤃᤧᤴᤏᤧ᤹ ᤀᤡᤃᤪ ᤐᤣᤗᤡ ᤔᤧᤓᤠᤰᤋᤠᤱᤅᤡᤴᤏᤧ᤹॥ ᤂᤧᤱᤜᤠ᤹ᤖᤧ ᤋᤢᤰᤂᤣ ᤔᤧᤍᤢᤔᤢᤒᤠ ᤕᤧᤶᤔᤥ ᤁᤢᤓᤠ᤹ᤖᤧ ᤗᤠᤃᤡ ᤐᤣᤗᤡ ᤁᤧᤓᤠᤰᤁᤠᤸᤗᤧ ᤀᤠᤱᤃᤠ᤹ ᤔᤧᤄᤧᤵᤛᤢᤱᤅᤡᤴ॥” 15 ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹. “ᤗᤢᤱᤔᤠ᤹ ᤋᤢᤰᤋᤢᤱᤛᤡᤱᤒᤠ ᤔᤏᤠᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥ ᤀᤠᤱᤃᤠ᤹ ᤀᤠᤜᤡᤶᤔᤥ ᤋᤠᤔᤠ ᤂᤧᤱᤜᤠ᤹ᤖᤧ ᤌᤣ ᤕᤢᤰ ᤔᤧᤃᤳᤋᤢᤒᤣ᥅ ᤌᤣ ᤂᤧᤱᤜᤠ᤹ᤖᤧ ᤔᤠᤱᤜᤧᤰ ᤏᤢ ᤌᤰᤛᤠᤴ ᤛᤡᤍᤢᤱᤈᤓᤠ ᤔᤧᤈᤥᤃᤢᤀᤠᤱ ᤕᤧᤳᤋᤢᤰᤂᤣᤴ ᤂᤧᤵᤔᤠ ᤛᤢᤰᤋᤢᤶᤒᤧ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤒᤡ᥅ ᤜᤧᤰᤁᤩᤠᤱ ᤌᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤒᤡ᥅ 16 ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤌᤡᤰ ᤕᤧᤶ ᤂᤧᤱᤜᤠ᤹ ᤏᤢᤒᤠ ᤛᤡᤱᤛᤣ᤹ ᤁᤧᤎᤥ᤺ᤰᤐᤠ ᤔᤧᤳᤋᤢᤱᤛᤡᤱᤗᤥ ᤗᤳᤇᤠ ᤏᤢᤒᤠ ᤛᤖᤣ᤺ᤰᤕᤠ᤺ᤵᤐᤠ ᤐᤧ᤺ᤱᤘᤠᤗᤡ᤺ᤳᤇᤣ᤹ ᤛᤡᤱᤒᤢᤱ ᤗ᤹ᤖᤡᤰ ᤔᤡᤱ ᤘᤠ᤺ᤳᤋᤢᤱᤛᤡᤱᤅᤠᤱ ᤘᤕᤧᤖᤥ॥ ᤁᤖ ᤀᤠᤸᤗ ᤛᤠ᤺ᤶᤓᤣ ᤗᤧᤰᤏᤠᤔᤧ᤺ᤴᤏᤣ ᤂᤧᤸᤗᤧ ᤁᤢᤓᤧᤰᤘᤠᤀᤥ ᤑᤠ᤺ᤳᤋᤪᤠ ᤁᤣ᤺ᤳᤋᤢᤱᤗᤥ ᤜᤧᤰᤁᤩᤠᤱ ᤁᤢᤒᤥᤖᤠᤰᤜᤠ᤹ ᤑᤸᤗᤰ ᤑᤸᤗᤰ ᤀᤧᤰᤂᤢᤱᤗᤥ॥ 17 “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤴ ᤗᤣ᤺ᤳᤋᤢᤱᤛᤡᤱᤅᤠᤱ ᤘᤕᤠᤱ. ᤁᤖ ᤀᤠᤸᤗ ᤀᤠᤱᤃᤠ᤹ ᤂᤧᤱᤜᤠ᤹ ᤛᤶᤎᤠᤱ ᤕᤧᤳᤋᤢᤰᤂᤣᤴ ᤋᤠ᤺ᤵᤔᤠ ᤂᤠᤖᤠ ᤆᤥᤃᤢᤱᤅᤠᤱ ᤘᤠ᤹॥ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤁᤴ ᤕᤧᤳᤋᤢᤰᤂᤣᤴ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤛᤶᤎᤠᤱ ᤔᤧᤍᤠᤖᤢ॥ ᤒᤠᤗ ᤛᤠᤶᤔᤠᤱᤅᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤀᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥᤰᤂᤢᤀᤠᤱ ᤘᤠ᤹ᤖᤥ॥” ᤕᤷᤔᤡᤕᤠᤴ ᤛᤧᤵᤔᤠ ᤆᤧᤶᤓᤴ 18 ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ᤖᤧ ᤀᤠᤍᤰᤗᤧᤱᤘᤠᤀᤥ ᤌᤣ ᤆᤧᤶᤓᤴ ᤔᤧᤈᤥᤃᤢᤖ ᤔᤧᤘᤕᤧ. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤧᤳᤋᤠᤱᤅᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱ॥ 19 ᤀᤠᤱᤃᤠ᤹ᤃ ᤛᤧᤳᤇᤧ ᤋᤣ᤹ᤔᤏᤠᤒᤠ ᤗᤳᤇᤠ ᤁᤢᤍᤥ᤺ᤵᤔᤠ ᤌᤢ᤺ᤶᤒᤠ ᤜᤧᤰᤁᤣ ᤘᤕᤠᤱ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤆᤧᤶᤓᤴ ᤔᤧᤈᤥᤃᤢᤒᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤔᤧᤱᤄᤥᤀᤣ ᤘᤕᤠᤱ॥ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤘᤕᤧ. “ᤂᤧᤴ ᤛᤡᤱᤒᤢᤱᤔᤠᤴ ᤁᤢᤈᤠ᤹ᤏᤢᤀᤣ ᤋᤠᤅᤢᤶᤔᤠᤱ ᤛᤥ᤺ᤴᤍᤢᤶ॥ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤗᤠᤶᤒᤠ ᤂᤧᤴ ᤔᤧᤰᤂᤢᤶ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤡᤱᤅᤡᤴ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤕᤠᤶᤔᤥ ᤏᤡᤱᤘᤠ᤹ᤛᤥᤀᤥ ᤔᤧᤴᤀᤡ᤺ᤳᤋᤢᤴᤗᤖᤥ॥” 20 ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤱᤗᤥ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤔᤏᤠᤜᤠ᤹ ᤂᤠᤛᤧᤴ ᤁᤧᤈᤥᤃᤢᤛᤡᤖᤥ॥ ᤂᤧᤏᤧ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤠᤴ ᤏᤢ ᤏᤡᤱᤘᤠᤴ ᤁᤧᤛᤠ᤹ᤖᤢᤖᤥ॥ ᤂᤧᤏᤧ᤹ ᤂᤧᤱᤜᤠ᤹ ᤂᤢᤶᤍᤡᤱ ᤁᤧᤒᤡᤖᤢᤛᤡᤒᤠᤴ ᤏᤡᤔᤠ ᤂᤥᤛᤢᤱᤗᤖᤥ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤏᤧ᤹ ᤁᤧᤜᤢᤰᤁᤥ ᤋᤥ᤺ᤴᤍᤢᤱᤅᤠᤱ ᤘᤠ᤹ᤖᤥ॥ 21 “ᤀᤏᤠᤋᤥᤋᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤏᤧ᤹ ᤁᤧᤛᤧᤛᤢᤖ ᤁᤧᤘᤠ᤹ᤏᤧᤓᤃᤪ ᤀᤠᤏᤡᤃᤣ ᤂᤧᤏᤧ᤹ ᤛᤧᤳᤋᤠᤛᤡᤃᤧ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤔᤧᤳᤋᤠᤱᤅᤠᤱ ᤘᤕᤧ॥ 22 ᤂᤧᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤔᤧᤳᤋᤠᤱ. ‘ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ᥄ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ ᤌᤱᤅᤥ ᤔᤧᤛᤧᤖᤢᤛᤡ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠᤱᤒᤧᤴ ᤛᤠᤜᤠ᤹ ᤛᤠᤰᤁᤡᤸᤗᤧ ᤜᤍ᤹ ᤔᤧᤛᤡ᤹᤺॥ 23 ᤀᤏᤠᤋᤥᤋᤒᤠ ᤔᤏᤠᤜᤠ᤹ ᤔᤧᤱᤔᤠᤛᤡ ᤕᤧᤶᤔᤡᤴ ᤋᤠ᤺ᤵᤔᤠ ᤀᤠᤱᤃᤠ᤹ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹. ᤂᤧᤴ ᤕᤧᤶᤔᤡᤴ ᤋᤠᤀᤠᤱᤃ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤜᤡᤱᤏᤧᤴᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.