ᤕᤷᤔᤡᤕᤠ 10 - LIFOTNT

ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤔᤠ ᤏᤢ ᤛᤧᤰᤂᤠᤒᤠ ᤔᤠᤱᤛᤧᤘᤠ ᤆᤥ᤺ᤰᤔᤠ

¹ ᤀᤡᤛᤪᤠᤀᤡᤗᤡᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤌᤣ ᤁᤧᤔᤧᤳᤋᤡᤖ ᤁᤧᤒᤳᤇᤡ. ᤂᤧᤵᤛᤧᤶᤔᤧ᤹॥

² ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ᤹. “ᤘᤣ᤹ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤢᤳᤏᤠ᤺ᤴ ᤂᤡᤏᤡ᤹ ᤔᤧᤜᤢ᤹ᤀᤠᤛᤡᤶᤔᤧᤴᤏᤧ᤹ᤀᤥ॥ ᤋᤠᤱᤛᤠᤰᤐᤥ ᤁᤧᤎᤠ᤺ᤵᤐᤠ ᤐᤖᤡᤰ ᤐᤖᤡᤰᤐᤠ ᤔᤡᤰᤛᤣ᤺ᤴᤜᤠ᤹ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤔᤠᤖᤥ ᤁᤖ ᤂᤡᤏᤡ᤹ᤃ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ॥

³ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤕᤥ ᤛᤠᤰᤌᤡᤶᤜᤠ᤹ᤃ ᤌᤣᤏᤠᤎᤣᤒᤠ ᤆᤥᤰᤗᤥ॥ ᤔᤏᤠᤜᤠ᤹ ᤋᤠᤶᤓᤢᤱᤅᤥ ᤔᤧᤒᤣ᤺ᤰᤁᤠᤱ ᤛᤡᤱᤒᤢᤱᤎᤡᤰ ᤔᤧᤍᤠᤅᤢᤖᤥ ᤜᤧᤰᤁᤩᤠᤱ ᤛᤡᤱᤃᤧᤃᤠᤶᤒᤧᤸᤗᤧ ᤂᤧᤴ ᤁᤠ᤺ᤱᤓᤣ᤺ᤸᤗᤧ ᤂᤥ᤺ᤴᤍᤢᤖᤥ॥

⁴ ᤔᤏᤠᤜᤠ᤹ᤖᤧ ᤂᤧᤴ ᤛᤠᤶᤔᤩᤠᤱ ᤏᤢ ᤕᤢᤵᤐᤠ᤺ᤸᤗᤧ ᤔᤧᤈᤥ᤺ᤰᤋᤢᤖᤥ॥ ᤂᤧᤴ ᤔᤧᤈᤥ᤺ᤴᤏᤧᤴ ᤔᤧᤃᤧᤱᤏᤧᤸᤗ ᤑᤠ᤹ᤀᤠᤱ ᤀᤡᤔᤧᤄᤣ᤺ᤰᤂᤢᤖᤥ ᤜᤧᤰᤁᤩᤠᤱ ᤔᤧᤕᤧᤵᤛᤢᤀᤠᤱ ᤌᤘᤠ᤺ᤸᤗᤧ ᤔᤧᤎᤧᤵᤋᤢᤖᤥ॥

⁵ ᤂᤧᤴ ᤏᤠᤘᤠᤀᤡᤳᤗᤠᤜᤠ᤹ᤃ ᤐᤀᤡᤳ ᤋᤠᤵᤐᤥ ᤔᤧᤕᤧᤵᤛᤢᤒᤠ ᤂᤠᤷᤈᤥ᤺ᤶᤒᤠ ᤜᤧᤰᤋᤱᤒᤠ ᤔᤧᤈᤥᤰᤗᤥ॥ ᤂᤧᤱᤜᤠ᤹ ᤐᤠ᤺ᤵᤔᤠ ᤔᤧᤴᤇᤢᤰᤏᤧᤴᤗᤥ॥ ᤂᤧᤱᤜᤠ᤹ ᤐᤱᤔᤠᤀᤠᤱ ᤁᤢᤔᤠ ᤁᤵᤔᤠᤛᤡ ᤐᤥᤱᤗᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤗᤠᤱᤄᤣ᤺ᤰᤔᤠ ᤔᤧᤴᤇᤢᤰᤏᤧᤴᤗᤥ॥ ᤂᤧᤱᤜᤠ᤹ᤏᤢ ᤔᤧᤃᤡᤛᤧᤶᤔᤡᤴᤏᤧ᤹. ᤂᤧᤱᤜᤠ᤹ᤖᤧ ᤂᤡᤏᤡ᤹ ᤌᤣᤀᤠᤱ ᤜᤠᤴᤋᤡ ᤆᤥ᤺ᤰᤔᤠ ᤁᤧᤔᤧᤴᤇᤢᤰᤋᤡᤴᤗᤥ. ᤂᤧᤱᤜᤠ᤹ᤖᤧ ᤌᤣᤀᤠᤱ ᤏᤢᤒᤠ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ॥”

⁶ ᤀᤠᤱᤃᤠ᤹ ᤐᤠ᤺ᤳᤋᤢᤱ. “ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤜᤧᤰᤋᤱᤒᤠ ᤘᤣ᤹ ᤀᤠᤳᤋᤡᤴᤏᤠᤱ ᤜᤥᤵᤗᤥ. ᤂᤧᤏᤧ᤹ ᤔᤢᤰᤛᤠᤶᤛᤠᤒᤠ ᤁᤧᤈᤥ᤺ᤰᤗᤥ॥ ᤂᤧᤏᤧ᤹ ᤁᤧᤔᤡᤱᤅᤡᤴ ᤁᤧᤀᤡᤱᤒᤠ ᤏᤢ ᤔᤢᤰᤛᤠᤶᤛᤠᤒᤠ ᤆᤥᤰᤗᤥ॥

⁷ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤅᤣ. ᤜᤠ᤺ᤳᤗᤧ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤶᤒᤡᤏᤧᤶᤒᤣ᥅ ᤂᤧᤏᤧ᤹ᤃ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤁᤧᤗᤠ᤹ᤒᤠ ᤁᤧᤈᤥ᤺ᤰᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤛᤡᤰᤁᤢᤶᤏᤡᤒᤠ ᤔᤏᤠ ᤀᤡᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹ᤀᤥ ᤂᤧᤏᤧ᤹ ᤁᤢᤛᤡᤱᤒᤠ ᤀᤠᤳᤋᤡᤴᤏᤠᤱ ᤜᤥᤵᤗᤥ॥

⁸ ᤂᤧᤱᤜᤠ᤹ ᤁᤧᤖᤧᤰ ᤁᤢᤎᤏᤠ ᤁᤧᤜᤥᤵᤐᤠ ᤏᤢ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤔᤧᤈᤥᤰᤗᤥ॥ ᤛᤡᤱᤗᤠᤶᤒᤠ ᤔᤧᤈᤥᤃᤢᤛᤡᤒᤠ ᤏᤠᤘᤠᤀᤡᤳᤗᤠᤜᤠ᤹ᤗᤠᤶ ᤂᤧᤱᤜᤠ᤹ ᤌᤣᤀᤠᤱ ᤜᤢ᤹ᤛᤡᤱᤔᤠ ᤔᤧᤴᤇᤢᤰᤏᤧᤸᤗᤥ॥

⁹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ᤃ ᤁᤠᤷᤒᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤒᤠ ᤕᤠ᤺ᤶᤒᤰᤗᤥ॥ ᤛᤠᤶᤔᤩᤠᤱ ᤁᤧᤎᤰᤐᤧᤸᤗᤧ ᤋᤷᤛᤡᤛ ᤗᤠᤈᤣ᤹ᤒᤠ ᤕᤢᤵᤐᤠ ᤜᤧᤰᤁᤩᤠᤱ ᤀᤢᤐᤈ ᤗᤠᤈᤣ᤹ᤒᤠ ᤛᤠᤶᤔᤩᤠᤱᤅᤡᤸᤗᤧ ᤂᤧᤴ ᤏᤠᤘᤠᤀᤡᤳᤗᤠᤜᤠ᤹ ᤛᤢ᤺ᤵᤋᤢᤛᤡᤖᤥ॥ ᤌᤠᤰᤌᤠᤰᤔᤠ ᤁᤧᤗᤧᤒᤠ ᤔᤏᤠᤜᤠ᤹ᤖᤧ ᤔᤧᤎᤠᤃᤢᤒᤠ ᤁᤢᤓᤡᤱᤗᤠ ᤜᤧᤰᤁᤩᤠᤱ ᤐᤖᤠᤴᤗᤠ ᤆᤡᤖᤡᤰᤁᤡᤴ ᤂᤧᤱᤜᤠ᤹ ᤋᤣᤳ ᤔᤧᤈᤠᤰᤋᤢᤛᤡᤖᤥ॥

¹⁰ ᤁᤖ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤂᤧᤏᤧ᤹ᤃ ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ ᤜᤧᤰᤁᤩᤠᤱ ᤏᤢᤵᤔᤧᤴᤍᤡᤱᤒᤠ ᤐᤕᤶ ᤕᤶᤒᤠ ᤜᤠᤱᤏᤧᤖᤥ॥ ᤂᤧᤏᤧ᤹ ᤁᤧᤕᤠ᤺ᤰᤗᤧ᤹ᤀᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤥ᤺ᤰᤂᤢᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤠᤳᤋᤡᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤠᤱ ᤁᤧᤛᤡᤰ ᤐᤥ᤺ᤰᤁᤡᤸᤗᤧ ᤁᤧᤍᤃᤡ ᤕᤧᤵᤔᤠ ᤔᤧᤴᤇᤢᤰᤏᤧᤴᤗᤥ॥”

¹¹ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤁᤧᤔᤧᤵᤐᤠᤜᤠ᤹ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. “ᤋᤠᤱᤛᤠᤰᤐᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠ ᤔᤧᤴᤈᤥ᤺ᤰᤔᤏᤠᤒᤠ ᤂᤧᤴ ᤔᤠᤱᤜᤠ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤢ ᤛᤠᤱᤃᤪᤠᤶᤐᤣᤍᤠᤱ ᤛᤡᤃᤠᤱᤗᤠᤶ ᤔᤧᤔᤠ ᤔᤧᤒᤣ᤺ᤰᤗᤥ॥”

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤔᤠ ᤛᤧᤘᤠᤛᤠᤶᤗᤥ

¹² “ᤕᤜᤘᤣ ᤍᤠᤱᤒᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤢᤔᤢᤰᤛᤠᤶᤔᤡᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤖᤥ. ᤂᤢᤏᤧ᤹ ᤀᤠᤒᤠᤅᤣ ᤁᤢᤛᤡᤰᤁᤢᤶᤏᤡᤱᤘᤠ᤹ᤗᤠᤶᤒᤠ ᤕᤥ᤹ᤒᤠ ᤗᤠᤈᤣᤴ ᤆᤥᤃᤢᤖᤥ. ᤀᤠᤒᤠᤅᤣ ᤁᤢᤄᤠᤛᤡᤱ ᤏᤡ᤺ᤵᤔᤠ ᤛᤠᤶᤔᤡᤸᤗᤧ ᤋᤠᤱᤛᤠᤰᤐᤠᤴ ᤑᤥᤛᤢᤖᤥ॥

¹³ ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤸᤗᤧ ᤋᤠᤱᤛᤠᤰᤐᤥ ᤆᤫᤠ᤺ᤳᤋᤡᤴ ᤜᤢ᤺ᤰᤗᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤕᤠᤀᤥᤗᤠᤶᤒᤠ ᤂᤢᤏᤧ᤹ ᤂᤠ᤹ᤔᤡ᤺ᤵᤐᤠᤴ ᤑᤥ᤺ᤰᤂᤢᤖᤥ. ᤂᤢᤏᤧ᤹ᤀᤣ ᤐᤠᤱᤃᤧᤴᤍᤡᤱ ᤘᤜᤡᤳᤋᤥ ᤛᤠ᤺ᤶᤓᤣ ᤗᤧᤰᤗ ᤕᤠ᤺ᤴᤍᤢᤖᤥ॥ ᤂᤢᤏᤧ᤹ᤀᤣ ᤁᤢᤛᤢᤖᤡᤳ ᤕᤠᤱᤔᤥᤗᤠᤶ ᤛᤢᤖᤡᤳ ᤁᤣᤈᤱ ᤜᤢᤛᤢᤖᤥ॥

¹⁴ ᤂᤧᤴ ᤁᤧᤖᤧᤰ ᤔᤏᤠᤜᤠ᤹ ᤀᤍᤱ ᤏᤢ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤔᤧᤈᤥᤰᤗᤥ. ᤏᤠᤘᤠᤀᤡᤳᤗᤠ ᤁᤧᤈᤥ᤺ᤰᤐᤠᤜᤠ᤹ ᤛᤡᤖᤡᤱᤔᤔᤥ ᤔᤧᤎᤠᤖᤥ॥ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤛᤡᤒᤠ ᤏᤠᤘᤠᤀᤡᤳᤗᤠᤜᤠ᤹ ᤀᤡᤱᤗᤧᤰᤁᤣᤛᤡᤖᤥ ᤜᤧᤰᤁᤩᤠᤱ ᤁᤢᤛᤰᤔᤠ ᤔᤧᤴᤕᤠᤰᤔᤏᤠᤒᤠ ᤔᤧᤈᤥᤰᤗᤥ॥

¹⁵ ᤂᤧᤱᤜᤠ᤹ᤃ ᤜᤏᤧᤒᤠ ᤏᤢ ᤁᤢᤏᤠᤔᤧᤴᤇᤠ᤹ᤒᤠ ᤆᤡᤃᤰᤘᤠᤛᤡᤖᤰᤗᤥ॥ ᤂᤠᤛᤧᤴ ᤐᤥᤱᤅᤡᤸᤗᤧ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤒᤥᤱᤗᤥ॥

¹⁶ ᤕᤠᤁᤢᤒᤧᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤂᤧᤱᤜᤠ᤹ ᤜᤧᤰᤋᤱᤒᤠ ᤔᤧᤈᤥᤰᤏᤧᤴᤗᤥ. ᤂᤢᤏᤧ᤹ᤀᤣ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤅᤡᤴ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤖᤥ॥ ᤂᤢᤏᤧ᤹ᤀᤣ ᤀᤡᤛᤪᤠᤀᤡᤗᤧᤴ ᤗᤰᤁᤧᤄᤥᤒᤠ ᤐᤥᤱᤛᤧ ᤀᤠᤒᤠᤅᤣ ᤛᤣᤃᤢᤀᤠᤱ ᤘᤠ᤹ᤖᤥ॥”

ᤕᤜᤢᤍᤠᤴ ᤗᤠᤈᤣ᤹ᤗᤠᤶ ᤐᤣ᤺ᤰᤔᤠ ᤐᤥᤱ

¹⁷ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠᤛᤣ. ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤁᤧᤶᤃᤒᤡᤀᤠᤱ ᤁᤧᤘᤕᤡᤖᤥ᥄ ᤂᤡᤏᤡ᤹ ᤗᤠᤈᤣᤴ ᤗᤧᤵᤔᤠᤖᤧ ᤗᤠᤃᤡ ᤆᤡᤃᤰᤘᤠ ᤛᤠᤔᤠᤜᤠ᤹ ᤛᤢᤵᤛᤧᤶᤛᤡᤶᤔᤧ᤹ᤀᤥ॥

¹⁸ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤁᤴ ᤕᤧᤶᤔᤥ ᤁᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤗᤠᤵᤑᤢᤛᤢᤱᤛᤡᤱᤗᤥ. ᤂᤧᤱᤜᤠ᤹ ᤛᤠ᤹ᤖᤡᤰ ᤋᤢᤰᤂᤣ ᤔᤧᤴᤈᤠᤀᤣ ᤌᤠᤖᤡᤰ ᤕᤶᤒᤠ ᤋᤢᤰᤂᤣ ᤔᤧᤍᤢᤔᤢᤖ ᤕᤠ᤺ᤴᤍᤢᤱᤛᤡᤱᤗᤥ॥

¹⁹ “ᤕᤖᤢᤛᤗᤧᤔ ᤕᤧᤰᤕᤰᤁᤥ ᤕᤰᤕᤢᤱᤒᤠᤜᤠ᤹ ᤑᤡ᤺ᤰᤋᤧᤶᤔᤧ᤹ᤀᤥ. ‘ᤆᤡ᤺ᤳᤋᤧ ᤛᤩᤧ. ᤀᤠᤏᤡᤃᤣ ᤛᤠ᤹ᤖᤡᤰ ᤕᤶᤒᤠ ᤁᤠ᤺ᤴᤎᤡᤃᤧᤀᤠᤱ ᤘᤕᤡᤃᤧᤖᤥ᥄ ᤀᤠᤏᤡᤃᤣ ᤁᤠ᤺ᤴᤍᤡᤃᤧᤒᤠ ᤕᤠᤱᤄᤣ᤺ᤰᤁᤡᤴ ᤔᤧᤘᤣ᤺ᤳᤏᤧᤸᤗᤥ ᤀᤠᤏᤡᤃᤧᤃ ᤁᤴ ᤏᤠᤛᤡᤌ᤺ᤵᤔᤠ ᤛᤢᤰᤋᤢᤶᤒᤧ ᤑᤠ᤹ᤀᤠᤱ ᤀᤡ᤺ᤳᤋᤢᤶᤒᤧᤀᤠᤱ ᤘᤕᤡᤃᤧᤖᤥ॥

²⁰ ᤀᤠᤏᤡᤃᤣ ᤛᤠ᤺ᤱᤃᤠᤜᤡᤶᤜᤠ᤹ ᤜᤷᤈᤢ᤹ᤘᤷᤈᤢ᤹ ᤆᤥ᤺ᤴᤍᤧᤀᤠᤱ ᤏᤧᤖᤥ. ᤁᤧᤖᤧᤰ ᤀᤡᤍᤠ᤺ᤰᤜᤠ᤹ ᤛᤩᤠᤰ ᤘᤕᤠᤰ ᤐᤢ᤹ᤖᤧᤀᤠᤱ ᤏᤧᤖᤥ॥ ᤀᤠᤏᤡᤃᤣ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤁᤧᤖᤧᤰ ᤔᤧᤒᤣᤔᤧᤈᤢᤖᤧᤀᤠᤱ ᤔᤧᤜᤥᤵᤗᤥ. ᤀᤠᤏᤡᤃᤣ ᤛᤠ᤺ᤱᤃᤠᤜᤡᤶᤜᤠ᤹ ᤕᤠᤶᤔᤥ ᤁᤧᤈᤥ᤺ᤰᤐᤠ ᤁᤧᤒᤡᤒᤠ ᤜᤠ᤺ᤳᤋᤠᤱ ᤜᤥᤵᤗᤥ. ᤂᤧᤒᤩᤠᤱ ᤀᤠᤏᤡᤃᤣ ᤛᤠ᤺ᤱᤃᤠᤜᤡᤶ ᤂᤠᤵᤔᤠᤴ ᤁᤧᤄᤡᤱᤒᤠ ᤁᤧᤒᤡᤒᤠ ᤀᤣ᤺ᤴᤏᤠᤱ ᤜᤥᤵᤗᤥ॥

²¹ ᤀᤠᤏᤡᤃᤣ ᤗᤠᤶᤗᤥᤒᤠᤜᤠ᤹ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤔᤧᤸᤗᤢᤰᤁᤶᤒᤠ ᤜᤧᤰᤁᤣ ᤔᤧᤗ᤹ᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤗᤠᤶ ᤀᤥᤛᤣ᤺ᤴᤀᤠᤎᤠᤰᤗ ᤑᤠ᤹ᤀᤠᤱ ᤂᤧᤱᤜᤠ᤹ ᤐᤣᤗᤡ ᤔᤧᤶᤓᤠᤰᤏᤧᤴᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤁᤢᤗᤡᤱᤍᤥ ᤔᤧᤱᤃᤧᤖᤧᤴᤗᤥ ᤜᤧᤰᤁᤩᤠᤱ ᤀᤠᤏᤡᤃᤣ ᤔᤏᤠᤜᤠ᤹ ᤁᤧᤖᤧᤰ ᤐᤡᤛᤠᤱ ᤔᤧᤸᤗᤢᤰ ᤜᤧᤰᤁᤣ ᤔᤧᤛᤧᤖᤧᤀᤠᤱ ᤔᤧᤘᤠ᤹ᤖᤥ᥄

²² ᤂᤧᤵᤛᤧᤶᤔᤧ᤹. ᤗᤳᤇᤠ ᤀᤡᤱᤄᤱ ᤁᤧᤖᤧᤀᤠᤱ ᤘᤠ᤹ᤖᤥ. ᤌᤠᤱᤃᤧᤳ ᤐᤡᤛᤠᤱᤒᤠ ᤗᤳᤇᤠ ᤗᤠᤈᤣ᤹ᤀᤥ ᤕᤶᤒᤠ ᤜᤕᤱ ᤁᤡᤸᤗᤡᤱ ᤐᤥᤱᤗ ᤐᤳᤗᤥ॥ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤔᤧᤕᤢᤀᤠᤱ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢᤖᤥ ᤜᤧᤰᤁᤩᤠᤱ ᤂᤧᤴ ᤕᤜᤢᤍᤠᤴ ᤁᤡᤎᤡ᤺ᤵᤐᤠ ᤕᤠᤱᤍ᤺ᤰ ᤘᤠ᤹ᤔᤠᤍᤧᤴ ᤔᤧᤈᤥᤃᤢᤖᤥ॥’”

ᤕᤷᤔᤡᤕᤠ᤺ᤸᤗᤧ ᤁᤢᤒᤣᤗᤡ

²³ ᤕᤜᤘᤣ ᤍᤠᤱᤒᤠᤀᤣ. ᤔᤏᤠ᤺ᤸᤗᤧ ᤁᤢᤜᤡᤱᤔᤴ ᤀᤠᤒᤠᤅᤣ ᤁᤢᤜᤢᤰᤁᤥ ᤜᤥᤵᤗᤥ ᤂᤧᤸᤗᤧ ᤁᤢᤗᤠᤶᤔᤡᤴ ᤀᤠᤒᤠᤅᤣ ᤁᤢᤕᤢᤰᤁᤥ ᤜᤥᤵ ᤑᤠ᤹ᤀᤠᤱ ᤏᤡᤛᤢᤱᤗᤥ॥

²⁴ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤔᤏᤠᤜᤠ᤹ ᤁᤧᤄᤠᤛᤧᤴ ᤁᤢᤀᤡᤛᤡᤰ ᤋᤥ᤺ᤴᤍᤧᤛᤧ᤹ᤀᤥ॥ ᤂᤧᤏᤧ᤹ ᤁᤧᤛᤡᤰ ᤐᤥ᤺ᤰᤔᤥ ᤀᤠᤏᤡᤃᤣ ᤂᤢᤶᤍᤡᤱ ᤀᤠᤶᤒᤡᤖᤧᤴᤏᤧ᤹ᤀᤥ. ᤔᤣ᤺ᤴᤏᤧᤓᤃᤪ ᤀᤠᤏᤡᤃᤣ ᤜᤍ᤹ ᤔᤧᤃᤡᤃᤧᤖᤥ॥

²⁵ ᤂᤧᤏᤧ᤹ ᤁᤧᤔᤡᤱᤅᤥ ᤏᤡᤱᤘᤠ᤹ ᤔᤧᤶᤒᤡᤔᤏᤠᤒᤠ ᤏᤢ ᤂᤧᤏᤧ᤹ ᤁᤧᤏᤠ᤹ᤒᤠ ᤛᤢᤘᤠᤱᤜᤠ᤹ᤀᤥ. ᤂᤧᤏᤧ᤹ ᤁᤧᤛᤡᤰ ᤐᤥ᤺ᤰᤔᤠᤴ ᤌᤠᤛᤧ᤹ᤀᤥ॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤔᤏᤠᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤗᤖᤢ ᤔᤧᤍᤣᤛᤢᤛᤡᤀᤠᤱ ᤔᤧᤘᤠ᤹ᤖᤥ ᤂᤧᤱᤜᤠ᤹ᤖᤧ ᤔᤧᤗᤖᤢᤛᤡᤀᤠᤱ ᤔᤧᤔᤧᤰᤂᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤀᤠᤱ ᤏᤧᤖᤥ॥