ᤜᤡᤒᤪᤢ 2 - LIFOTNT

ᤐᤕᤶ ᤛᤧᤴᤗᤵ

¹ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ ᤀᤠᤄᤧᤵᤛᤢᤶᤒᤠ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤧᤰᤂᤠᤴ ᤀᤠᤸᤗᤛᤠᤱ ᤕᤖᤡᤰ ᤏᤢᤖᤡᤰᤁᤠᤱ ᤏᤡᤱᤘᤠ᤹ ᤐᤡᤔᤠᤀᤣ ᤐᤥᤱᤗᤥ. ᤔᤣ᤺ᤴᤏᤣ ᤑᤠ᤹ᤃᤪ ᤀᤠᤏᤡ᤹ ᤂᤧᤵᤔᤥᤗᤠᤶ ᤀᤠᤗᤧ᤺ᤱ ᤀᤠᤒᤣ᤺ᤰᤗᤥ॥

² ᤌᤣᤀᤠᤱᤓᤧᤸᤗᤧ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤀᤡᤱᤔᤧᤓᤥᤛᤢᤒᤠ ᤀᤡᤱᤄᤱᤅᤡᤴ ᤛᤧᤰᤂᤠ ᤐᤥ᤺ᤰᤂᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤴ ᤁᤧᤓᤣ᤺ᤶᤒᤠᤜᤠ᤹ ᤏᤢ ᤀᤡᤱᤈᤠᤱ ᤂᤧᤶᤔᤠ ᤔᤧᤴᤍᤧᤶᤔᤏᤠᤒᤠᤜᤠ᤹ ᤁᤧᤖᤧᤰ ᤂᤥᤔᤠ ᤁᤧᤒᤥᤱᤒᤠ ᤂᤢᤶᤍᤡᤱ ᤐᤡᤖᤢᤛᤡ॥

³ ᤀᤠᤏᤡ᤹ᤀᤠᤱ ᤁᤴ ᤐᤕᤶ ᤕᤶᤒᤠ ᤛᤧᤴᤗᤵᤐᤡᤴ ᤀᤠᤏᤠ᤹ᤖᤢᤶᤏᤧ ᤑᤠ᤹ᤃᤪ ᤀᤠᤰᤂᤣᤗ᤹ᤖᤡᤰ ᤋᤠᤱᤔᤠ ᤀᤠᤛᤢᤰᤐᤠᤒᤣ᥅ ᤁᤴ ᤛᤧᤴᤗᤵᤐᤡᤴ ᤍᤠᤱᤒᤠᤸᤗᤧ ᤀᤠᤒᤠᤅᤣ ᤁᤠᤰᤏᤢ ᤋᤃᤡ ᤀᤡᤱᤓᤥᤛᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶ ᤁᤧᤄᤧᤶᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤀᤠᤏᤡ᤹ ᤏᤡ᤺ᤴᤎᤥ ᤀᤠᤶᤈᤥᤃᤧ ᤀᤠᤶᤒᤡᤖᤧᤀᤠᤱ ᤘᤠ᤹ᤖᤥ॥

⁴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤂᤢᤏᤧ᤹ ᤆᤥᤃᤢᤒᤠ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ᤗᤠᤶᤒᤠ ᤜᤧᤰᤁᤩᤠᤱ ᤀᤠᤒᤠᤅᤣ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤏᤛᤠᤏᤡᤒᤠᤜᤠ᤹ ᤜᤠ᤺ᤳᤋᤢᤛᤡᤒᤠ ᤛᤣᤛᤣᤔᤠᤱᤅᤡᤸᤗᤧᤴ ᤐᤷᤎᤠ᤺ᤶᤜᤠ᤹ᤗᤠᤶᤒᤠ ᤁᤴ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤢᤖᤥ॥

ᤛᤧᤴᤗᤵᤐᤥ ᤗᤠᤶᤃᤧᤗᤥᤒᤠ

⁵ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤣ ᤐᤠ᤺ᤳᤋᤢᤶᤒᤧᤒᤠ ᤁᤴ ᤁᤧᤍᤠᤒᤠᤖ ᤁᤧᤒᤵᤐᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤔᤧᤒᤡᤖᤢᤴᤇᤡᤴᤗᤥ॥

⁶ ᤁᤖ ᤛᤠᤶᤕᤥᤛᤠᤵᤗᤠᤀᤥ ᤌᤡᤰ ᤋᤧᤴᤏᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤔᤏᤠᤴ ᤌᤣᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤣ. ᤀᤡᤃᤪ ᤔᤧᤴᤇᤠᤶ ᤕᤠᤵᤔᤡᤴ ᤜᤠ᤺ᤳᤋᤠᤱ ᤁᤶᤒᤪᤠᤱ ᤁᤧᤔᤧᤳᤋᤢᤒᤣ᥅

⁷ ᤂᤧᤱᤜᤠ᤹ᤃ ᤔᤠᤱᤗᤠᤀᤡᤱᤒᤠᤜᤠ᤹ᤏᤢ᤺ᤸᤗᤧ ᤆᤩ᤹ᤖᤰ ᤕᤥᤕᤥᤰ ᤁᤧᤈᤥᤃᤢᤛᤡ. ᤂᤧᤱᤜᤠ᤹ ᤔᤡᤔᤡᤍᤡᤱ ᤏᤢ ᤔᤡᤱᤛᤥ ᤀᤡᤱᤎᤠᤱᤗᤧ ᤋᤡᤆ᤺ᤴ ᤁᤧᤄᤢ᤺ᤰᤋᤢᤛᤡᤖᤥ॥

⁸ ᤜᤧᤰᤁᤩᤠᤱ ᤁᤠᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤁᤧᤕᤢᤰᤂᤢᤖᤥ॥” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤕᤢᤰᤂᤢᤸᤗᤧ ᤂᤢᤏᤧ᤹ ᤁᤢᤕᤢᤰᤁᤥ ᤔᤧᤍᤠᤖᤢᤴᤒᤠ ᤌᤣᤀᤠᤱ ᤜᤥᤵᤗᤥ॥ ᤜᤧᤰᤁᤣᤛᤠᤱ ᤁᤴ ᤕᤧᤶᤔᤥ ᤁᤠᤰ ᤐᤠ᤺ᤴᤜᤠ᤹ ᤂᤢᤏᤡ᤹ ᤕᤢᤰᤁᤥ ᤘᤠ᤹ᤒᤠ ᤀᤠᤴᤏᤡᤛᤢᤶᤔᤡᤴᤗᤥ॥

⁹ ᤁᤖ ᤀᤠᤏᤡ᤹ ᤕᤧᤛᤢᤴ ᤀᤠᤏᤡᤛᤢᤶᤗᤥ॥ ᤂᤢᤏᤧ᤹ᤃ ᤔᤠᤱᤗᤠᤀᤡᤱᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤆᤩ᤹ᤖᤰ ᤕᤥᤕᤥᤰ ᤘᤕᤧ. ᤀᤠᤸᤗᤃ ᤂᤢᤏᤧ᤹ ᤛᤡᤔᤧᤴᤏᤥ ᤋᤢᤰᤂᤣ ᤆᤩᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤔᤡᤍᤡᤱ ᤏᤢ ᤔᤡᤱᤛᤥ ᤀᤡᤱᤎᤠᤱᤅᤡᤸᤗᤧᤴ ᤋᤡᤆ᤺ᤴ ᤂᤢ᤺ᤰᤋᤢᤀᤠᤱ ᤘᤠ᤹॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶ ᤂᤢᤏᤧ᤹ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤖᤧ ᤗᤠᤃᤡ ᤛᤡᤔᤧᤴ ᤛᤠ᤹ᤖᤢᤖᤥ॥

¹⁰ ᤁᤠᤰ ᤐᤠ᤺ᤴᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤗᤥ. ᤜᤧᤰᤁᤩᤠᤱ ᤁᤠᤰ ᤐᤠ᤺ᤴᤜᤠ᤹ᤃ ᤁᤢᤔᤢᤰᤛᤠᤶᤗᤠᤶᤒᤠ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴ ᤏᤧᤛ᤻ᤛᤧᤒᤠᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤛᤢᤴ ᤀᤡᤏᤥᤃᤧᤴ ᤋᤢᤰᤂᤣᤗᤠᤶᤒᤠ ᤁᤢᤗᤡᤱᤍᤥ ᤁᤧᤳᤋᤢᤸᤗᤧ ᤏᤢᤒᤠ ᤏᤢ ᤁᤢᤍᤱᤒᤠ ᤐᤠᤴ ᤆᤥᤃᤢᤖᤥ॥ ᤜᤧᤰᤁᤣᤗ᤹ᤖᤡᤰ ᤕᤧᤛᤢᤖᤧ ᤕᤖᤡᤰ ᤔᤢ᤹ᤀᤡᤍᤠᤱᤛᤠᤜᤠ᤹ ᤛᤧᤴᤗᤵᤐᤥ ᤗᤠᤶᤗᤥᤛᤢᤛᤡ᤹ᤀᤠᤱ ᤁᤢᤔᤡᤔᤡᤍᤡᤱᤅᤡᤸᤗᤧᤴ ᤗᤰᤁᤧᤄᤥᤒᤠ ᤔᤧᤒᤥ᤺ᤰᤂᤧᤖᤥ॥

¹¹ ᤔᤏᤠᤜᤠ᤹ ᤗᤠᤕᤥᤗᤠᤶ ᤛᤣᤛᤣ ᤁᤧᤈᤥ᤺ᤰᤐᤠ ᤕᤧᤛᤢᤴ ᤏᤢ ᤛᤣᤛᤣ ᤁᤧᤒᤥᤱᤒᤠᤜᤠ᤹ᤃ ᤗᤳᤌᤡᤰ ᤜᤡᤶᤛᤕᤱᤛᤡᤖᤥ. ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤀᤠᤴᤛᤠ᤹ᤛᤡ ᤔᤧᤵᤔᤠᤛᤡ ᤂᤢᤏᤧ᤹ ᤔᤧᤏᤢ᤺ᤴᤏᤧᤴᤗᤥ॥

¹² ᤂᤢᤏᤧ᤹ ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶᤔᤥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤳᤋᤢ᤹. “ᤀᤡᤱᤃᤠ᤹ ᤁᤧᤔᤡᤱᤅᤡᤴ ᤀᤠᤴᤛᤠ᤹ᤛᤡ ᤀᤡᤱᤓᤥᤛᤢᤱᤛᤡᤱᤗᤥ. ᤜᤧᤰᤁᤩᤠᤱ ᤁᤧᤔᤏᤠ ᤗᤢᤶᤔᤥ ᤀᤡᤱᤃᤠ᤹ ᤏᤧᤶᤓᤥᤃᤧᤴ ᤁᤧᤏᤠᤖᤠ ᤑᤥᤛᤢᤱᤗᤥ॥”

¹³ ᤜᤧᤰᤁᤩᤠᤱ ᤕᤠᤶᤔᤥ ᤐᤠ᤺ᤳᤋᤢ᤹. “ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤛᤠᤴ ᤕᤢᤰᤂᤢᤱᤗᤥ॥” ᤂᤢᤏᤧ᤹ ᤕᤠᤶᤔᤥᤀᤠᤱ ᤐᤠ᤺ᤳᤋᤢ᤹. “ᤀᤡᤱᤃᤠ᤹ ᤁᤵᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤠᤱᤒᤠ ᤔᤏᤠᤜᤠ᤹ᤏᤢ ᤘᤠ᤹ᤀᤠᤖᤥ॥”

¹⁴ ᤂᤧᤴ ᤔᤏᤠᤜᤠ᤹ᤖᤧᤃ ᤏᤠᤛᤡᤱᤃᤧᤴ ᤌᤰ ᤔᤧᤃᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢ᤺ᤴᤏᤠᤱ ᤂᤧᤱᤜᤠ᤹ ᤜᤧᤰᤁᤣᤀᤣ ᤐᤥ᤺ᤰᤂᤧᤖᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤒᤠᤅᤣ ᤁᤢᤛᤡᤔᤧᤴᤗᤠᤶᤒᤠ ᤛᤡᤔᤧᤸᤗᤧᤴ ᤔᤢᤰᤛᤠᤶ ᤁᤧᤃᤵᤐᤠ ᤔᤠᤑᤧᤴᤛᤠᤶᤔᤡᤴ ᤔᤧᤶᤓᤤ ᤆᤥᤃᤢ॥

¹⁵ ᤜᤧᤰᤁᤩᤠᤱ ᤛᤡᤔᤧᤴᤏᤢ ᤁᤧᤃᤡ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤁᤡᤔᤧᤸᤗᤧ ᤜᤡᤱᤜᤡᤱ ᤌᤠᤖᤡᤰ ᤕᤥᤰ ᤆᤥᤃᤢᤛᤡᤒᤠᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤜᤧᤰᤁᤣ ᤆᤥᤃᤢᤒᤠᤖᤥ॥

¹⁶ ᤛᤧᤰᤂᤠ᤺ᤸᤗᤧᤃ ᤂᤢᤏᤧ᤹ ᤔᤠᤱᤗᤠᤀᤡᤱᤒᤠᤜᤠ᤹ᤃ ᤔᤣ᤺ᤴ. ᤁᤖ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤏᤧ ᤁᤶᤒᤪᤠᤱ ᤔᤧᤳᤋᤢᤛᤡ᤹ᤖᤥ॥

¹⁷ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤁᤧᤈᤥ᤺ᤰᤐᤠ ᤗᤢᤱᤃᤢᤶᤛᤠᤒᤠ ᤏᤢ ᤏᤛᤠ᤺ᤴᤛᤠᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥᤱᤛᤧ ᤁᤠᤰ ᤐᤖᤡᤰᤗᤧ ᤀᤠᤏᤡ᤹ ᤜᤧᤰᤁᤣ ᤐᤥᤱᤔᤠ ᤐᤥ᤺ᤰᤂᤧᤖᤥ॥ ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤕᤥᤸᤗᤧᤴ ᤗᤧᤵᤔᤡ ᤐᤡᤔᤠ ᤁᤧᤛᤢᤰᤐᤠ ᤛᤡᤍᤢᤱᤈᤓᤠ ᤐᤥ᤺ᤰᤂᤧᤖᤥ॥

¹⁸ ᤂᤢᤏᤧ᤹ ᤜᤱᤛᤠ᤹ᤔᤥ ᤌᤩᤧᤀᤠᤱ ᤀᤠᤒᤠᤅᤣ ᤋᤢᤰᤂᤣ ᤆᤩᤧᤒᤠᤸᤗᤧ ᤆᤥᤃᤢᤸᤗᤧ ᤜᤱᤛᤠ᤹ᤔᤥ ᤁᤧᤎᤠᤒᤠᤜᤠ᤹ᤃ ᤂᤢᤏᤧ᤹ ᤁᤢᤓᤠ᤹ ᤐᤡᤔᤠ ᤛᤢᤰᤋᤢᤛᤡ᤹ᤖᤥ॥