ᤋᤥᤗᤡᤱᤛᤥᤔᤢ 2 - LIFOTNT

¹ ᤀᤰᤂᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤜᤧᤰᤁᤩᤠᤱ ᤂᤧ᤹ᤕᤥ ᤁᤧᤘᤠ᤹ᤒᤠ ᤁᤧᤖᤧᤰ ᤆᤥ᤺ᤰᤔᤠ ᤆᤢᤖᤧ॥

² ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤆᤥᤃᤢᤛᤢᤖᤢ. ᤂᤧᤸᤗᤧᤆᤥᤃᤢᤸᤗᤧ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤁᤢᤕᤠ᤺ᤶᤒᤰᤜᤠ᤹ᤗᤠᤶ ᤏᤠ᤺ᤶᤛᤡᤱ॥

³ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤛᤡᤃᤣᤰᤐᤠ ᤕᤧᤴᤏᤡᤴ ᤜᤠᤱᤘᤠ ᤔᤢ᤹ᤀᤡᤛᤠᤶ ᤐᤡᤖᤢ ᤜᤧᤰᤁᤩᤠᤱ ᤂᤧᤴ ᤛᤣᤛᤣᤒᤠ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤜᤠᤒᤠ ᤂᤧᤴ ᤕᤧᤴᤏᤥ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤀᤥᤏᤢ ᤂᤢᤏᤧ᤹ ᤏᤠ᤺ᤶᤛᤡᤱᤗᤥ॥

ᤀᤍᤏ ᤛᤡᤱᤛᤣ᤹ᤀᤡᤰ

⁴ ᤋᤠᤱᤛᤠᤱ ᤏᤢ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤧᤒᤠ ᤐᤥᤎᤰᤜᤠ᤹ ᤜᤠᤒᤠ ᤁᤴᤗᤥ॥ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠᤱᤛᤠᤱᤒᤠᤴ ᤏᤢ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤒᤠ ᤕᤧᤴᤏᤥ

⁵ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤡᤱᤒᤢᤱ ᤗᤢᤱᤒᤢᤱ ᤜᤥ᤺ᤵᤋᤧ॥ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥ ᤗᤳᤌᤡᤰᤁᤠᤱ ᤕᤠ᤺ᤴᤛᤢᤱ ᤔᤧᤸᤗᤡᤱᤅᤣ ᤘᤕᤧ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤸᤗ ᤌᤠᤖᤡᤰ ᤘᤜᤡᤳ ᤔᤧᤴᤎᤠᤀᤣ ᤘᤕᤧ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤠᤴ ᤁᤧᤎᤥ᤺ᤱᤒᤠ ᤁᤧᤀ᤺ᤰᤐᤠ ᤔᤏᤠ ᤜᤠ᤺ᤳᤋᤠᤱ ᤜᤥ᤺ᤵᤋᤧᤖᤥ॥

⁶ ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤘᤜ᤺ᤱᤜᤠ᤹ ᤐᤢᤴᤍᤧ ᤗ᤺ᤴᤍᤧᤀᤠᤱ ᤂᤠᤶᤒᤣ᤺ᤰᤔᤠᤴ ᤁᤧᤖᤧᤰ ᤘᤖᤰᤂᤢ॥

⁷ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠᤶᤒᤣ᤺ᤰᤔᤥᤒᤠ ᤂᤠᤶᤔᤥᤗᤠᤶ ᤔᤧᤴᤇᤠᤶ ᤕᤠᤵᤔᤡ ᤆᤥᤃᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤴᤒᤥᤀᤥ ᤜᤡᤱᤔᤴᤗᤧᤴ ᤛᤠ᤺ᤱᤃᤢᤃᤧᤴ ᤛᤰᤔᤠ ᤔᤢ᤺ᤳᤋᤢ ᤐᤡᤖᤢ॥ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤴ ᤁᤢᤜᤡᤱᤘᤧᤳ ᤔᤏᤠ ᤐᤥ᤺ᤰᤂᤧᤖᤥ॥

⁸ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤶᤃᤧᤳ ᤐᤡᤛᤠᤱ ᤀᤍᤏᤀᤥ ᤗᤳᤇᤠ ᤛᤡᤱᤛᤣ᤹ᤀᤡᤰ ᤌᤡᤰ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤔᤧᤴᤇᤠᤶ ᤕᤠᤵᤔᤡᤴ ᤂᤧ᤹ᤕᤥ ᤕᤢᤰᤂᤢ॥

⁹ ᤜᤧᤰᤁᤩᤠᤱ ᤀᤥᤔᤧᤵᤔᤧᤸᤗᤧ ᤏᤢᤒᤠ ᤁᤧᤎᤠ᤺ᤵᤐᤠ ᤏᤢ ᤆᤠᤔᤠᤸᤗᤧ ᤁᤢᤈᤠᤃᤧᤏᤢ᤹ᤒᤠ ᤁᤢᤈᤠ᤹ ᤁᤧᤎᤥ᤺ᤰᤐᤠ ᤁᤧᤖᤧᤰ ᤐᤖᤡᤰᤐᤠ ᤛᤡᤱᤒᤢᤱᤜᤠ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠᤶᤒᤣ᤺ᤰᤔᤥᤗᤠᤶ ᤗᤡᤅᤧᤖ ᤕᤠ᤺ᤴᤍᤢ॥ ᤂᤢᤏᤧ᤹ ᤛᤡᤱᤛᤣ᤹ᤀᤡᤰᤁᤧᤸᤗᤧ ᤁᤢᤗᤢᤶᤔᤥ ᤏᤧᤳᤋᤡᤃᤧᤴ ᤜᤡᤱᤔᤴᤗᤧ ᤛᤡᤱᤒᤢᤱ ᤜᤧᤰᤁᤩᤠᤱ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤏᤧᤜᤡᤏᤡᤱᤘᤠ᤹ ᤀᤠᤒᤡᤒᤡᤒᤠ ᤛᤡᤱᤒᤢᤱᤅᤠᤱ ᤗᤣ᤺ᤳᤋᤢ॥

¹⁰ ᤛᤡᤱᤛᤣ᤹ᤀᤡᤰᤁᤧᤴ ᤘᤖᤱᤔᤠᤖᤧ ᤗᤠᤃᤡ ᤀᤍᤏᤗᤠᤶ ᤘᤜ᤺ᤱᤎᤡᤰ ᤁᤢᤰᤛᤧ ᤗ᤺ᤴᤍᤧᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶᤒᤠ ᤗᤡᤛᤡ ᤁᤢᤗᤰᤁᤥ ᤛᤧᤖᤧᤀᤠᤱ ᤏᤧᤛ᤻ᤛᤧ॥

¹¹ ᤌᤡᤰᤛᤡᤃᤣᤰᤐᤠ ᤘᤜ᤺ᤱᤅᤡᤸᤗᤧ ᤁᤢᤔᤡᤱ ᤐᤡᤛᤥᤏ. ᤁᤴ ᤘᤜ᤺ᤱᤅᤡᤴ ᤜᤠᤒᤡᤗᤠ ᤗᤠᤈᤣᤴ ᤁᤧᤖᤧᤰ ᤁᤒᤢᤖ ᤘᤃᤢ. ᤂᤧᤵᤔᤥ ᤛᤠᤶᤔᤩᤠᤱ ᤂᤥᤍᤧᤳᤗᤥ॥

¹² ᤂᤧᤴ ᤗᤠᤈᤣ᤹ᤀᤥᤒᤠ ᤛᤠᤶᤔᤩᤠᤱᤅᤡᤴ ᤏᤢᤒᤠ ᤆᤥᤰ॥ ᤂᤧᤵᤔᤥ ᤁᤢᤏᤠᤶᤃᤧᤏᤢ᤹ᤒᤠ ᤀᤠᤱᤄᤡᤰᤘᤠ ᤏᤢ ᤀᤥᤏᤡᤰᤛ᤻ ᤔᤧᤵᤔᤏᤠᤒᤠ ᤔᤠᤱᤗᤢᤱ ᤂᤥᤍᤧᤳ॥

¹³ ᤏᤡᤛᤡᤃᤣᤰᤐᤠ ᤘᤜ᤺ᤱᤅᤡᤸᤗᤧ ᤁᤢᤔᤡᤱ ᤃᤡᤜᤥᤏ. ᤁᤢᤛ ᤗᤠᤈᤣ᤹ ᤁᤧᤒᤥᤱᤒᤠᤖ ᤁᤧᤃᤢᤱᤒᤠ ᤘᤜ᤺ᤱᤅᤡᤴ ᤜᤠᤒᤠ ᤁᤴᤗᤥ॥

¹⁴ ᤛᤢᤶᤛᤡᤃᤣᤰᤐᤠ ᤘᤜ᤺ᤱᤅᤡᤸᤗᤧ ᤁᤢᤔᤡᤱ ᤋᤠᤀᤡᤃᤪᤡᤛ. ᤜᤠᤒᤠ ᤁᤴ ᤘᤜ᤺ᤱᤅᤡᤴ ᤀᤛ᤻ᤛᤢᤖᤖᤧ ᤏᤠᤱᤃᤧᤴ ᤐᤡᤛᤠᤱ ᤘᤃᤢᤖᤥ॥ ᤜᤧᤰᤁᤩᤠᤱ ᤗᤡᤛᤡᤃᤣᤰᤐᤠ ᤘᤜ᤺ᤱᤅᤡᤸᤗᤧ ᤁᤢᤔᤡᤱ ᤕᤢᤑᤪᤣᤋᤡᤛᤖᤥ॥

¹⁵ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤴ ᤀᤍᤏ ᤛᤡᤱᤛᤣ᤹ᤀᤡᤰᤁᤥ ᤋᤣ᤹ᤖᤢᤀᤠᤱ ᤂᤧᤴ ᤀ᤺ᤰᤔᤠ ᤛᤠ᤺ᤰᤔᤠ ᤏᤢ ᤁᤥᤔᤠᤖᤧ ᤗᤠᤃᤡ ᤂᤧ᤹ᤕᤥ ᤕᤢᤰᤂᤢ॥

¹⁶ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤔᤧᤳᤋᤢ. “ᤆᤵᤆᤡ ᤔᤧᤴᤈᤥ᤺ᤰᤁᤣ ᤛᤡᤱᤛᤣ᤹ᤀᤡᤰᤁᤥ ᤁᤧᤕᤢᤱᤒᤠ ᤁᤧᤖᤧᤰ ᤛᤡᤱᤒᤢᤱᤅᤡᤸᤗᤧ ᤁᤢᤈᤠ᤹ᤜᤠ᤹ ᤆᤠᤔᤠ ᤁᤧᤛᤢᤰᤋᤢ᤹.

¹⁷ ᤁᤖ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤏᤧᤜᤡᤏᤡᤱᤘᤠ᤹ ᤀᤠᤒᤡᤒᤡᤒᤠ ᤛᤡᤱᤒᤢᤱᤅᤡᤸᤗᤧ ᤁᤢᤈᤠ᤹ᤀᤡᤴ ᤔᤧᤴᤈᤠᤀᤧ᤹. ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤕᤧᤴᤏᤥ ᤂᤧᤴ ᤁᤧᤈ᤹᤺ ᤂᤧᤏᤧ᤹ ᤛᤧᤰᤂᤠᤀᤣ ᤁᤧᤛᤡᤖᤥ॥”

¹⁸ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤔᤧᤴᤇᤠᤶ ᤕᤠᤵᤔᤡᤴ ᤀᤣ᤺ᤰ ᤘᤠ᤹ᤔᤠ ᤏᤢᤒᤠ ᤔᤣ᤺ᤴ॥ ᤀᤠᤱᤃᤠ᤹ ᤂᤧᤸᤗᤧ ᤁᤢᤗᤠᤃᤡ ᤗᤠ᤹ᤖᤢᤔᤠ ᤁᤢᤓᤠ᤹ᤒᤠᤱᤎᤡᤰ ᤆᤥᤃᤢᤱ ᤐᤡᤖᤢᤱ᤹॥”

¹⁹ ᤕᤜᤘᤣ ᤍᤠᤱᤒᤠᤸᤗᤧ ᤁᤧᤖᤧᤰ ᤋᤠᤶᤓᤢᤱ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤋᤠᤱᤛᤠᤱᤒᤥ ᤁᤧᤒᤧᤒᤠ ᤁᤧᤖᤧᤰ ᤐᤢᤛᤠᤜᤠ᤹ ᤂᤠᤶᤔᤥᤗᤠᤶ ᤆᤥᤃᤢᤛᤡᤀᤠᤱ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤌᤣᤎᤣ ᤔᤡᤱ ᤂᤧᤱᤜᤠ᤹ ᤘᤠ᤺ᤳᤋᤢᤛᤡᤀᤡ ᤑᤠ᤹ᤀᤠᤱ ᤀᤥᤔᤧᤳᤇᤧ ᤂᤧᤱᤜᤠ᤹ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤥ ᤋᤠᤖᤢᤛᤡ॥ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤧᤖᤧᤰ ᤁᤢᤜᤡᤱᤘᤧᤳ ᤌᤰᤛᤠᤐᤢᤛᤠᤜᤠ᤹ ᤀᤠᤰᤋᤱᤒᤠ ᤔᤡᤱ ᤘᤠ᤺ᤳᤋᤢᤛᤡ ᤜᤠᤒᤠ ᤜᤧᤰᤋᤱᤒᤠᤀᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤐᤥ᤺ᤰᤂᤧ॥

²⁰ ᤀᤰᤂᤣᤗ᤹ᤖᤡᤰ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧᤀᤣ ᤁᤧᤖᤧᤰ ᤜᤡᤶᤌᤰᤛᤠᤜᤠ᤹. ᤋᤠᤱᤛᤠᤰᤁᤥ ᤁᤧᤒᤧᤒᤠ ᤐᤢᤛᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤋᤠᤶᤓᤢᤱ ᤌᤰᤛᤠᤜᤠ᤹ ᤔᤡᤱ ᤘᤠ᤺ᤳᤋᤢᤛᤡ॥ ᤁᤖ ᤀᤠᤍᤶᤔᤡᤸᤗᤧ ᤁᤢᤗᤠᤃᤡ ᤂᤢᤏᤧ᤹ ᤂᤧᤶᤍᤢ ᤗᤠ᤹ᤖᤢᤒᤠ ᤁᤢᤓᤠ᤹ᤒᤠᤱ ᤜᤠ᤺ᤳᤋᤠᤱ ᤂᤥᤔᤧᤍᤧᤳᤋᤧᤴ॥

²¹ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤴ ᤔᤢᤖᤢᤰᤂᤢᤖᤢᤰ ᤀᤡᤵᤛᤧᤖ ᤕᤠ᤺ᤴᤍᤢ. ᤜᤧᤰᤁᤩᤠᤱ ᤂᤧᤴ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤸᤗᤧ ᤂᤧᤸᤗᤧ ᤁᤢᤒᤡᤶᤒᤠᤜᤠ᤹ᤀᤥᤏᤢ ᤗᤳᤌᤡᤰ ᤗ᤺ᤳᤋᤢᤀᤠᤱ ᤂᤧᤴ ᤗ᤺ᤳᤋᤢᤒᤠ ᤋᤧᤴᤏᤥ ᤏᤧᤰᤛᤠ᤺ᤸᤗᤧ ᤌᤡᤶᤛᤢᤒᤡᤖᤢ॥

²² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤴᤇᤠᤶ ᤕᤠᤵᤔᤡᤀᤥᤗᤠᤶ ᤗ᤺ᤳᤋᤢᤒᤠ ᤁᤢᤒᤡᤶᤒᤧᤴ ᤔᤧᤴᤇᤢᤔᤠᤎᤡᤰ ᤆᤥᤃᤢᤀᤠᤱ ᤔᤧᤴᤇᤠᤶ ᤕᤠᤵᤔᤡᤀᤥ ᤂᤧᤴ ᤋᤠᤖᤢ॥

²³ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤐᤠ᤺ᤳᤋᤢ. “ᤁᤱᤃ ᤀᤠᤱᤃᤠ᤹ ᤀᤠᤕᤧᤵᤐᤠᤸᤗᤧ ᤁᤢᤕᤧᤵᤐᤠ ᤏᤢ ᤀᤠᤏᤧᤰᤛᤠ᤺ᤸᤗᤧ ᤁᤢᤏᤧᤰᤛᤠᤖᤥ॥ ᤂᤢᤏᤧ᤹ ᤔᤧᤴᤇᤢᤔᤠ ᤔᤧᤵᤔᤠ ᤐᤥᤱᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤃ ᤕᤧᤶᤒᤡᤳᤇᤠᤗᤠᤶ ᤗ᤺ᤵᤔᤏᤠᤔᤠ ᤘᤕᤧᤖᤥ॥”

²⁴ ᤁᤸᤗᤧᤆᤥᤃᤢᤸᤗᤧ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤗᤧᤖᤢᤛᤡᤀᤠᤱ ᤁᤢᤔᤣ᤺ᤳᤋᤡᤴᤏᤢ ᤋᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤳᤇᤠ ᤌᤰ ᤐᤥᤱᤛᤡᤖᤥ॥

²⁵ ᤔᤧᤴᤇᤠᤶ ᤕᤠᤵᤔᤡᤴ ᤏᤢ ᤁᤢᤔᤣ᤺ᤳᤋᤡᤴ ᤏᤧᤵᤔᤠᤱ ᤗᤧᤰᤆᤠ᤹ᤒᤢᤎᤢᤰ ᤘᤕᤧᤇᤡ. ᤜᤧᤰᤁᤩᤠᤱ ᤔᤧᤏᤢ᤺ᤴᤍᤧᤇᤡᤴ॥