ᤂᤠᤜᤢᤴᤛᤠᤒᤠ 9 - LIFOTNT

¹ ᤁᤴ ᤁᤠᤰ ᤐᤠ᤺ᤴᤏᤥ ᤀᤠᤱᤃᤠ᤹ ᤏᤢᤖᤡᤰ ᤏᤢ ᤛᤠ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡᤰᤁᤢᤶᤏᤡᤒᤠ ᤏᤢ ᤛᤠᤶᤕᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡ᤺ᤶᤈᤡᤴ ᤏᤢ ᤆᤡ᤺ᤵᤔᤧᤴᤏᤠᤱ ᤂᤢᤏᤧ᤹ ᤕᤢᤰᤁᤥ ᤁᤳᤋᤢ ᤑᤠ᤹ᤀᤠᤱ ᤏᤡᤛᤢᤱ॥ ᤀᤠᤒᤠᤅᤣ ᤋᤠᤕᤧᤶᤔᤥ ᤌᤣ ᤘᤠ᤹. ᤂᤧᤴ ᤀᤠᤳᤋᤡᤸᤗᤧᤀᤠᤱ ᤔᤧᤏᤡᤛᤢᤴ॥

² ᤂᤧᤸᤗᤧ ᤌᤣᤀᤠᤱ ᤀᤣ᤹ᤀᤣ ᤔᤧᤛᤧᤴᤍᤢᤴ॥ ᤛᤠᤶᤕᤥᤒᤠ ᤏᤢ ᤗᤠᤕᤥᤒᤠ. ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ. ᤛᤢᤳᤌᤥ ᤏᤢ ᤀᤠᤛᤢᤳᤌᤥ ᤛᤡᤍᤢᤱᤈᤓᤠ ᤁᤧᤍᤥᤶᤒᤠ ᤔᤏᤠ ᤏᤢ ᤔᤧᤴᤍᤥ᤺ᤶᤔᤏᤠᤒᤠ ᤁᤧᤖᤧᤰ ᤋ᤹ᤕᤠ᤺ᤴᤏᤡᤴ ᤗᤳᤇᤠ ᤐᤖᤡᤰᤐᤠ ᤆᤥᤰᤗᤥ. ᤗᤠᤕᤥᤒᤠᤴᤏᤢ᤺ᤸᤗᤧ ᤏᤢᤒᤠ ᤔᤏᤠ᤺ᤸᤗᤧ ᤁᤢᤗᤠᤃᤡ ᤌᤣᤀᤠᤱ ᤀᤡᤴᤎᤠ ᤜᤥᤵᤗᤥ. ᤔᤠᤱᤜᤧᤰ ᤔᤧᤴᤈᤥ᤺ᤰᤔᤏᤠᤒᤠᤴᤏᤢ᤺ᤸᤗᤧ ᤁᤧᤈᤥ᤺ᤰᤐᤠᤸᤗᤧ ᤁᤢᤗᤠᤃᤡ ᤁᤢᤈᤰ ᤌᤣᤀᤠᤱ ᤜᤥᤵᤗᤥ॥

³ ᤁᤧᤖᤧᤰᤗᤧ ᤋ᤹ᤕᤠ᤺ᤴᤏᤡᤴ ᤗᤳᤇᤠ ᤐᤖᤡᤰᤐᤠ ᤆᤥᤰ ᤜᤧᤰᤁᤩᤠᤱ ᤁᤴᤏᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤒᤥᤱᤒᤠᤖ ᤁᤧᤒᤵᤐᤠ ᤕᤠ᤺ᤶᤒᤰᤜᤠ᤹ ᤜᤧᤰᤁᤣᤀᤣ ᤋᤠᤵᤑᤧ᤺ᤶᤒᤠ ᤆᤥᤰ॥ ᤂᤠᤶᤒᤣ᤺ᤰᤔᤥ ᤔᤏᤠᤴ ᤘᤠ᤹ᤖ ᤌᤠᤖᤡᤰ ᤂᤧᤸᤗᤧ ᤁᤢᤏᤡᤱᤘᤠᤴ ᤁᤢ᤹ᤀᤡᤓᤧᤶᤔᤠ ᤏᤢ ᤏᤠᤱᤏᤠᤱ ᤌᤠᤵᤌᤠᤵ ᤁᤧᤗ᤹ᤒᤠ ᤆᤥᤰ ᤂᤧᤒᤩᤠᤱ ᤂᤧᤴ ᤜᤰᤆᤄᤳ ᤛᤡᤄᤧᤳᤗᤥ॥

⁴ ᤁᤖ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤏᤡ᤹ ᤀᤡᤰᤛᤠ ᤂᤠᤶᤒᤣ᤺ᤰᤔᤥ ᤁᤧᤜᤡᤱᤒᤠᤀᤠᤱ ᤁᤧᤘᤠ᤹ᤒᤠ ᤔᤏᤠ᤺ᤸᤗᤧ ᤁᤢᤗᤠᤃᤡᤃ ᤁᤢᤓᤠ ᤏᤡᤱᤛᤠᤱ ᤆᤥ᤺ᤰᤔᤠ ᤗᤠᤶ ᤘᤠ᤹॥ ᤗᤳᤇᤠ ᤁᤢᤜᤡᤱᤘᤧᤳ ᤂᤩᤠᤒᤠᤴ ᤁᤧᤛᤡᤒᤠ ᤁᤣᤒᤠᤴᤏᤢ᤺ᤸᤗᤧ ᤏᤢᤒᤠᤖᤥ॥

⁵ ᤌᤣᤀᤠᤱᤓᤧᤸᤗᤧ ᤁᤧᤜᤡᤱᤒᤠᤜᤠ᤹ᤖᤧ ᤀᤠᤏᤡ᤹ ᤀᤠᤛᤡ ᤁᤧᤗ᤹ᤒᤠᤴ ᤔᤧᤏᤡᤛᤢᤖᤥ. ᤁᤖ ᤆᤣ᤺ᤸᤗᤧ ᤌᤣᤀᤠᤱ ᤔᤧᤏᤡᤛᤢᤴᤗᤥ॥ ᤂᤧᤱᤜᤠ᤹ᤖᤧ ᤂᤥᤔᤠ ᤁᤧᤒᤥᤱᤒᤠ ᤌᤢᤶᤄᤥ ᤌᤣᤀᤠᤱ ᤜᤥᤵᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ ᤏᤡᤱᤘᤠ᤹ ᤛᤢᤶᤔᤡᤴᤏᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤛᤡᤖᤥ॥

⁶ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤏᤠ ᤗᤢᤱᤔᤠ᤹ ᤋᤢᤰᤔᤠ. ᤆᤡ᤺ᤵᤔᤠ ᤏᤢ ᤀᤡ᤺ᤳᤇᤡᤱᤔᤠᤴ ᤂᤢᤴᤇᤡ᤹ᤏᤢᤀᤣ ᤛᤡᤀᤠᤱ ᤐᤣ᤺ᤰᤗᤥ॥ ᤂᤧᤱᤜᤠ᤹ᤖᤧ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤒᤥᤱᤒᤠᤖ ᤁᤧᤒᤵᤐᤠ ᤕᤠ᤺ᤶᤒᤰᤁᤥ ᤗᤰ ᤔᤧᤱᤄᤥᤛᤢᤴᤗᤥ॥

⁷ ᤀᤠᤒᤠᤅᤣ ᤗᤠᤶᤔᤥ ᤋᤃᤡ ᤐᤣᤃᤧᤶᤔᤧ᤹. ᤁᤢᤈᤠ ᤆᤧᤶᤔᤧ᤹ᤀᤠᤱ ᤛ᤺ᤳᤋᤧᤶᤔᤧ᤹. ᤛᤣᤈ᤺ᤱᤘᤠ ᤌᤢᤅᤧᤶᤔᤧ᤹ᤀᤠᤱ ᤏᤡᤱᤘᤠ᤹ ᤋᤠᤛᤠᤶᤔᤧ᤹॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ ᤁᤧᤕᤠ᤺ᤶᤒᤰᤁᤥ ᤋᤧᤴᤍᤧ ᤆᤢᤖᤧᤀᤠᤱ ᤘᤠ᤹॥

⁸ ᤛᤍᤠᤍᤡᤱ ᤁᤢᤓᤖᤠ ᤆᤠᤱ ᤆᤠᤰᤂᤧ ᤜᤧᤰᤁᤩᤠᤱ ᤁᤧᤎᤣᤃᤣ᤺ᤰᤁᤥ ᤏᤡ᤺ᤱᤃᤣ᤹ ᤜᤢ᤺ᤳᤋᤧ᤹॥

⁹ ᤀᤠᤑᤠᤸᤗᤧ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤴ ᤌᤣᤏᤠᤎᤣᤒᤠ ᤜᤡᤱᤔᤧᤴ ᤁᤧᤒᤡ᤹. ᤂᤧᤴ ᤌᤠᤖᤡᤰ ᤀᤠᤒᤠᤅᤣ ᤔᤡ᤺ᤶ ᤁᤧᤔᤧᤳᤋᤢᤔᤠ ᤔᤧᤗᤡᤱᤃᤧᤴ ᤁᤧᤔᤣ᤺ᤳᤋᤡᤴᤏᤢ ᤏᤡᤱᤘᤠ᤹ ᤋᤠᤔᤠ ᤜᤡᤱᤔᤴᤏᤥ ᤘᤕᤧ᤹॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤖᤧᤰ ᤛᤩᤠᤱᤔᤧᤴᤍᤠᤱᤒᤠ ᤁᤧᤕᤠ᤺ᤒᤰᤁᤧᤸᤗᤧ ᤁᤢᤗᤧᤰᤘᤠᤀᤥ ᤂᤧᤏᤧ᤹ ᤁᤧᤄᤥᤔᤠ ᤐᤠᤴ ᤂᤧᤶᤔᤩᤠᤰᤗᤰᤗᤥ॥

¹⁰ ᤂᤧᤏᤧ᤹ ᤌᤣ ᤕᤠ᤺ᤶᤒᤰ ᤁᤧᤈᤥᤃᤢ᤹. ᤂᤧᤴ ᤐᤠ᤺ᤴᤏᤥ ᤆᤠ᤹ᤖᤡᤰ ᤛᤩᤠᤱᤔᤧᤴᤍᤠᤱ ᤆᤥᤃᤧ᤹ ᤌᤣᤀᤠᤱᤓᤧᤸᤗᤧ ᤁᤧᤛᤡᤒᤠ ᤗᤠᤈᤣ᤹ᤀᤥ ᤁᤢᤓᤠ ᤕᤠ᤺ᤶᤒᤰ. ᤏᤡᤱᤘᤠ᤹ ᤀᤡ᤺ᤵᤔᤠ. ᤏᤧᤜᤡᤏᤡᤱᤘᤠ᤹ ᤀᤡᤃᤪ ᤛᤡᤰᤁᤢᤶ ᤏᤡᤱᤘᤠ᤹ ᤌᤣᤀᤠᤱ ᤜᤥᤵ ᤜᤧᤰᤁᤩᤠᤱ ᤂᤧᤏᤧ᤹ ᤂᤧᤵᤔᤥᤀᤣ ᤁᤧᤒᤣ᤺ᤰᤗ ᤁᤧᤒᤳ॥

¹¹ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤀᤠᤱᤃᤠ᤹ ᤘᤣ᤹ ᤐᤠ᤺ᤴᤎᤡᤰᤁᤠᤱ ᤏᤡᤛᤢᤱᤅᤠᤱ ᤘᤠ᤹ᤖᤥ॥ ᤗᤥ᤺ᤰᤆᤠ᤺ᤳᤋᤥ ᤜᤠᤖᤠ ᤁᤧᤈᤠᤵᤐᤠᤖ ᤁᤧᤗᤥ᤺ᤰᤐᤠᤜᤠ᤹ᤖᤧ ᤗᤥ᤺ᤰᤆᤠ᤺ᤳᤋᤡᤴ ᤔᤧᤴᤏᤠ᤺ᤴᤍᤢᤴᤗᤥ ᤜᤧᤰᤁᤩᤠᤱ ᤔᤢᤰᤁᤧᤃᤢᤒᤠᤜᤠ᤹ᤖᤧᤀᤠᤱ ᤀᤧᤳᤗᤧᤱ ᤌᤱᤅᤡᤴ ᤔᤧᤴᤏᤠ᤺ᤴᤍᤢᤴᤗᤥ॥ ᤛᤡᤰᤁᤢᤶᤏᤡᤒᤠ ᤔᤏᤠᤜᤠ᤹ᤖᤧ ᤛᤍᤠᤍᤡᤱ ᤛᤠᤵᤐᤥᤰ ᤜᤡᤱᤔᤠ ᤜᤡᤶᤒᤪᤠᤶ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ. ᤆᤠ᤺ᤵᤐᤠ ᤔᤏᤠᤜᤠ᤹ᤖᤧ ᤛᤍᤠᤍᤡᤱ ᤕᤠᤱᤛᤠᤁᤢᤴᤎᤣ ᤌᤰᤔᤠ ᤔᤧᤴᤇᤢᤰᤋᤢᤴᤗᤥ ᤜᤧᤰᤁᤩᤠᤱ ᤛᤢᤶᤒᤥᤎᤠᤒᤠ ᤔᤏᤠᤜᤠ᤹ ᤛᤍᤠᤍᤡᤱ ᤕᤶᤒᤠ ᤋᤠᤰᤑᤣᤀᤥ ᤔᤧᤱᤃᤧᤳᤏᤧᤴᤗᤥ॥ ᤕᤧᤶᤔᤡᤴ ᤏᤢ ᤛᤢᤕᤧᤶᤔᤡᤴ ᤁᤧᤖᤧᤰ ᤛᤶᤎᤠᤱ ᤋᤠᤔᤠ ᤛᤢᤰᤗᤥ॥

¹² ᤂᤧᤴ ᤁᤧᤛᤠᤰᤐᤠ ᤕᤧᤶᤔᤡᤴ ᤀᤠᤑᤠᤸᤗᤧ ᤋᤠ᤹᤺. ᤂᤧᤏᤧ᤹ ᤁᤧᤴᤏᤡᤛᤢᤴᤗᤥ ᤔᤧᤴᤀᤡ᤺ᤳᤋᤣᤒᤠ ᤕᤧᤶᤔᤥ ᤐᤢ᤺ᤴ ᤀᤡᤈᤥᤀᤥ ᤌᤠᤒᤠ ᤜᤧᤰᤁᤣ ᤀᤡᤃᤪ ᤅᤠ᤺ᤴ ᤕᤥ᤺ᤱᤅᤥ ᤌᤠᤒᤠ ᤜᤧᤰᤁᤣ ᤜᤰᤆᤄᤳ ᤔᤏᤠᤜᤠ᤹ ᤛᤶᤎᤠᤱ ᤔᤧᤰᤔᤠᤴ ᤋᤠᤖᤥ॥

ᤀᤍᤱᤏᤢ᤺ᤸᤗᤧ ᤛᤡᤰᤁᤢᤶᤏᤡᤱᤘᤠᤴ ᤕᤶᤒᤠ

¹³ ᤀᤠᤱᤃᤠ᤹ ᤗᤳᤇᤠ ᤘᤣ᤹ ᤐᤠ᤺ᤴᤎᤡᤰᤁᤠᤱ ᤏᤡᤛᤢᤱᤅᤠᤱ ᤘᤠ᤹. ᤁᤴ ᤀᤡᤰᤛᤠ ᤂᤠᤶᤒᤣ᤺ᤰᤔᤥ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤀᤠᤰᤂᤣᤗ᤹ᤖᤡᤰ ᤔᤧᤀᤡ᤺ᤳᤋᤢ᤹. ᤂᤧᤸᤗᤧᤴ ᤗᤳᤇᤠ ᤏᤢᤒᤠ ᤁᤢᤒᤡ ᤏᤡᤛᤢᤱᤅᤠᤱ ᤘᤠ᤹॥

¹⁴ ᤗᤳᤌᤡᤰ ᤆᤢᤰᤛᤠ ᤕᤧᤰᤕᤰ ᤏᤧᤛ᤻ᤛᤧ. ᤂᤧᤴ ᤕᤧᤰᤕᤰᤁᤥ ᤛᤢ᤺ᤸᤗᤡᤰ ᤔᤏᤠ ᤔᤧᤘᤕᤧ॥ ᤗᤳᤌᤡᤰ ᤁᤧᤎᤢᤶᤒᤠ ᤜᤠᤱᤅᤡᤸᤗᤧ ᤕᤧᤰᤕᤰᤁᤡᤴ ᤌᤱᤅᤥ ᤑᤳᤋᤢ॥ ᤕᤧᤰᤕᤰᤁᤡᤴ ᤁᤒᤪᤡᤱ ᤁᤒᤢ ᤜᤧᤰᤁᤩᤠᤱ ᤗᤢᤱᤎᤠᤰᤁᤡᤴ ᤗᤢ᤺ᤴᤍᤢᤀᤠᤱ ᤂᤧᤴ ᤛᤡᤃᤠᤱ ᤗᤠ᤺ᤵᤔᤠ ᤕᤠᤖᤡᤵ ᤐᤥ᤺ᤰᤂᤧ॥

¹⁵ ᤂᤧᤴ ᤕᤧᤰᤕᤰᤁᤥ ᤗᤳᤌᤡᤰ ᤕᤠᤱᤃᤧᤛᤠ᤹ᤒᤠ ᤔᤏᤠ ᤘᤕᤧ ᤁᤖ ᤂᤧᤴ ᤛᤠ᤹ᤖᤡᤰ ᤆᤠ᤺ᤵᤐᤠ ᤆᤥᤃᤧ ᤂᤧᤸᤗᤧ ᤁᤢᤛᤡᤰᤁᤢᤶ ᤏᤡᤱᤘᤠ᤺ᤸᤗᤧ ᤕᤧᤰᤕᤰᤁᤡᤴᤏᤣ ᤋᤠᤱᤛᤧ᤺ᤵᤋᤢ॥ ᤁᤖ ᤂᤧᤴ ᤕᤠᤱᤃᤧᤛᤠ᤹ᤒᤠ ᤔᤏᤠᤴ ᤀᤠᤳᤋᤡᤸᤗᤧᤀᤠᤱ ᤂᤧᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤴ॥

¹⁶ ᤌᤢᤶᤔᤠᤏᤢ᤺ᤸᤗᤧ ᤛᤡᤰᤁᤢᤶᤏᤡᤱᤘᤠᤴ ᤕᤶᤒᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤛᤍᤠᤍᤡᤱ ᤐᤠ᤺ᤳᤋᤢᤱ᤹ ᤁᤖ ᤕᤠᤱᤃᤧᤛᤠ᤹ᤒᤧᤴᤏᤠᤱ ᤛᤡᤰᤁᤢᤶᤏᤡᤒᤠ ᤐᤥᤱᤔᤠ ᤛᤢᤰ ᤑᤠ᤹ᤀᤠᤱ ᤀᤠᤳᤋᤡᤸᤗᤧᤀᤠᤱ ᤔᤧᤀᤡ᤺ᤳᤋᤢᤴ ᤀᤡᤃᤪ ᤂᤧᤸᤗᤧ ᤁᤢᤒᤠ᤺ᤴᤏᤥ ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ ᤔᤧᤒᤡᤖᤢᤴ॥

¹⁷ ᤁᤖᤛᤠᤱ. ᤀᤍᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤁᤧᤀ᤺ᤰᤐᤠᤖ ᤁᤧᤒᤠ᤺ᤵᤐᤠ ᤜᤠᤱᤕᤢᤰᤐᤠᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤶᤔᤠᤏᤢ᤺ᤸᤗᤧᤃ ᤛᤫᤠ᤺ᤳᤋᤠᤱ ᤛᤡᤰᤁᤢᤶᤏᤡᤒᤠ ᤔᤏᤠ᤺ᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤶᤔᤠ ᤏᤢᤒᤠᤖᤥ॥

¹⁸ ᤑᤧᤈᤠᤓᤧᤈᤢᤶᤏᤢ᤺ᤸᤗᤧ ᤕᤖᤡᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤺ᤸᤗᤧ ᤏᤢᤒᤠ ᤕᤠ᤺ᤶᤒᤰ ᤆᤥᤃᤢᤖᤥ ᤁᤖ ᤗᤳᤇᤠ ᤗᤠᤕᤥᤒᤠᤸᤗᤧ ᤕᤖᤡᤰ ᤏᤢᤒᤠ ᤐᤠ᤺ᤴᤜᤠ᤹ ᤔᤧᤱᤔᤠ ᤛᤢᤰᤋᤢᤖᤥ॥