ᤂᤠᤜᤢᤴᤛᤠᤒᤠ 5 - LIFOTNT

ᤔᤧᤱᤃᤧᤵᤔᤏᤠ ᤔᤠᤱᤜᤢᤵ ᤆᤥ᤺ᤰᤔᤠ ᤔᤣ᤺ᤴ

¹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤁᤧᤒᤣ᤺ᤰᤁᤡᤸᤗᤧ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤐᤣᤃᤧ᤹॥ ᤕᤠ᤺ᤶᤒᤰ ᤔᤧᤓᤣ᤺ᤴᤍᤢᤖ ᤔᤧᤕᤠᤰᤐᤧᤴ ᤏᤡᤱᤘᤠ᤹ ᤔᤧᤱᤄᤥᤶᤏᤠᤒᤠ ᤀᤍᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤍᤢᤱᤈᤓᤠᤴ ᤋᤥ᤺ᤶᤔᤠᤏᤢ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰ ᤂᤧᤶᤛᤧ ᤐᤣᤃᤧ᤹॥

² ᤁᤢᤒᤠᤴ ᤐᤠ᤺ᤵᤔᤠᤖᤧ ᤗᤠᤃᤡ ᤂᤧᤏᤧ᤹ ᤔᤧᤈᤠᤳᤋᤧᤴᤏᤧ᤹ᤀᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤐᤠᤴ ᤐᤠ᤺ᤵᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥ ᤜᤠᤖᤠᤘᤖᤠ ᤔᤧᤈᤥᤃᤧᤴᤏᤧ᤹ᤀᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤏᤧ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤖᤥ ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤁᤧᤒᤠ᤺ᤴᤏᤧᤴ ᤛᤢ᤺ᤴᤗᤖᤥ॥

³ ᤕᤖᤡᤰ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠᤖᤧ ᤛᤧᤵᤔᤠᤱ ᤐᤥᤱᤗᤥ. ᤕᤖᤡᤰ ᤐᤠ᤺ᤴᤜᤠ᤹ ᤀᤍᤱᤐᤠᤴ ᤐᤥᤱᤗᤥ॥

⁴ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤠᤱᤜᤧᤰ ᤁᤧᤈᤥᤃᤢᤸᤗᤧ ᤂᤧᤴ ᤁᤧᤵᤔᤠᤖᤧ ᤗᤠᤃᤡ ᤔᤧᤛᤢᤛᤧᤴᤏᤧ᤹॥ ᤀᤍᤱ ᤔᤏᤠᤜᤠ᤹ᤏᤢ ᤂᤢᤏᤧ᤹ ᤁᤢᤏᤡᤱᤘᤠ᤹ ᤔᤧᤍᤠᤏᤧᤴ॥ ᤂᤧᤏᤧ᤹ ᤁᤧᤔᤠᤱᤜᤢᤵᤐᤡᤴ ᤁᤧᤳᤋᤧ᤹॥

⁵ ᤔᤠᤱᤜᤢᤵ ᤆᤥ᤺ᤰᤔᤠᤀᤠᤱ ᤔᤧᤱᤃᤧᤵᤔᤠᤏᤢ᤺ᤸᤗᤧᤃ ᤔᤠᤱᤜᤧᤰ ᤔᤧᤴᤈᤥ᤺ᤰᤔᤠᤀᤣ ᤏᤢᤒᤠ ᤐᤥᤱ᤹॥

⁶ ᤂᤧᤏᤧ᤹ ᤀᤠᤵᤑᤣᤰ ᤁᤧᤒᤠᤴ ᤛᤢᤳᤗᤠ᤺ᤸᤗᤧ ᤂᤧᤏᤧ᤹ ᤗᤠᤕᤥ ᤆᤥ᤺ᤰᤔᤠ ᤁᤧᤶᤒᤠᤱᤏᤧᤴᤗ॥ ᤜᤧᤰᤁᤩᤠᤱ ᤔᤠᤱᤜᤡᤶᤔᤥᤒᤠ ᤕᤰᤕᤠᤒᤧᤴ “ᤀᤠᤱᤃᤠ᤹ ᤀᤠᤔᤠᤱᤜᤢᤵᤐᤡᤱᤃ ᤐᤣ᤺ᤴᤍᤧᤀᤠᤱ ᤘᤕᤧ.” ᤑᤠ᤹ᤀᤠᤱ ᤐᤠ᤺ᤴᤔᤧᤀᤳᤋᤧᤴᤏᤧ᤹॥ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤰ ᤐᤥ᤺ᤰᤁᤠᤱ ᤂᤢᤏᤧ᤹ ᤁᤧᤜᤢᤰᤁᤥᤒᤠ ᤕᤠ᤺ᤶᤒᤰᤁᤡᤴ ᤌᤣᤀᤠᤱ ᤔᤧᤰᤂᤢᤖ ᤆᤥ᤺ᤰᤔᤠᤒᤣ᥅

⁷ ᤏᤡᤱᤘᤠ᤹ᤀᤥ ᤕᤖᤡᤰ ᤀᤡ᤺ᤵᤔᤏᤠᤒᤠ ᤕᤖᤡᤰ ᤐᤠ᤺ᤴᤇᤣ᤺ᤰᤘᤠᤜᤠ᤹ ᤜᤏᤧ ᤌᤣᤏᤠᤎᤣᤖᤰ॥ ᤁᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡᤛᤧ᤹ᤀᤥ॥

ᤕᤠᤱᤛᤠᤁᤢᤴᤎᤣ ᤌᤰᤔᤠ ᤜᤏᤧᤖᤰ

⁸ ᤂᤧᤏᤧ᤹ ᤗᤳᤇᤠ ᤌᤢᤶᤔᤥ ᤕᤠᤱᤃᤧᤛᤠ᤹ᤒᤠᤜᤠ᤹ ᤔᤧᤕᤢ᤺ᤳᤋᤢᤛᤡᤒᤠ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤔᤧᤸᤗᤥ᤺ᤴᤍᤢᤴ ᤔᤧᤶᤒᤡᤖᤢᤴᤇᤡᤴᤒᤠ ᤏᤢ ᤂᤢᤴᤇᤡ᤹ ᤂᤥᤔᤠ ᤗᤰᤁᤡᤴ ᤔᤧᤏᤠᤵᤋᤢᤛᤡᤒᤠ ᤁᤧᤏᤡᤛᤢᤏᤧᤓᤃᤪ ᤁᤧᤏᤡᤱᤘᤠ᤹ ᤔᤧᤔᤕᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤕᤢᤰᤛᤠᤒᤠᤜᤠ᤹ ᤛᤶᤎᤠᤱ ᤀᤠᤸᤗᤛᤠᤱ ᤕᤶᤒᤠ ᤕᤢᤰᤛᤠᤒᤠᤜᤠ᤹ ᤔᤢᤖᤠ ᤔᤧᤔᤧᤳᤋᤢᤛᤡᤀᤠᤱ ᤔᤧᤘᤠ᤹. ᤜᤧᤰᤁᤩᤠᤱ ᤂᤢᤴᤇᤡ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤕᤶᤒᤠ ᤕᤢᤰᤛᤠᤒᤠᤜᤠ᤹ᤖᤧ ᤂᤧᤱᤜᤠ᤹ ᤏᤧᤵᤔᤠᤱ ᤀᤥᤔᤧᤔᤧᤳᤋᤢᤛᤡ᤹॥

⁹ ᤗᤠᤈᤣ᤹ᤀᤥ ᤁᤧᤎᤥ᤺ᤰᤐᤠ ᤁᤢᤈᤠᤜᤠ᤹ ᤁᤧᤖᤧᤰᤗᤧ ᤔᤧᤔᤧᤳᤇᤡᤱ. ᤜᤠᤱᤅᤡᤸᤗᤧ ᤀᤠᤵᤑᤣᤰᤁᤠᤱ ᤀᤡᤰᤋᤠᤵᤜᤠ᤹ᤀᤥ ᤗᤠᤶᤒᤠᤀᤣ ᤀᤡᤴᤎᤠ ᤑᤥᤛᤢᤖᤥ॥

¹⁰ ᤀᤠᤳᤋᤡᤸᤗᤧ ᤕᤠᤱᤅᤥ ᤛᤠ᤹ᤖᤡᤰ ᤏᤡᤱᤘᤠ᤹ ᤐᤡᤖᤢ᤹. ᤕᤠᤱᤅᤡᤸᤗᤧ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤕᤥᤖᤢᤴᤗᤥ. ᤀᤠᤳᤋᤡᤸᤗᤧ ᤕᤠᤱᤛᤠᤁᤢᤴᤎᤣᤀᤥ ᤛᤠ᤹ᤖᤡᤰ ᤏᤡᤱᤘᤠ᤹ ᤐᤡᤖᤢ᤹. ᤂᤢᤏᤧ᤹ ᤑᤥᤛᤢᤒᤠ ᤕᤠᤱᤛᤠᤁᤢᤴᤎᤣᤀᤥ ᤀᤠᤓᤧᤸᤗᤧᤀᤠᤱ ᤁᤢᤏᤡᤱᤘᤠ᤹ ᤔᤧᤍᤠᤏᤧᤴ॥ ᤁᤴᤏᤠᤱ ᤌᤣᤏᤠᤎᤣ ᤜᤏᤧᤖᤰᤗᤥ॥

¹¹ ᤕᤠᤱᤛᤠᤁᤢᤴᤎᤣᤴ ᤐᤥᤖ ᤐᤣ᤺ᤰᤁᤡᤸᤗᤧ ᤁᤧᤈᤠᤒᤠ ᤔᤢᤖᤠᤜᤠ᤹ᤀᤠᤱ ᤕᤖᤡᤰ ᤐᤥᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤥᤔᤧᤵᤔᤠᤛᤡᤀᤠᤱ ᤕᤢᤱᤔᤠᤏᤢ᤺ᤸᤗᤧ ᤘᤣ᤹ ᤜᤡᤶᤍᤠᤱᤒᤧᤴ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤌᤣ ᤆᤰᤋᤢᤀᤠᤱᤒᤣ᥅

¹² ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧ ᤛᤢ᤺ᤸᤗᤡᤰ ᤆᤛᤠᤱ ᤀᤡᤃᤪ ᤕᤖᤡᤰ ᤆᤛᤠᤱ ᤁᤢᤈᤠᤏᤢ᤹ᤖ ᤁᤢᤔᤡᤰ ᤕᤢᤖᤥ. ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠᤴ ᤕᤖᤡᤰ ᤁᤢᤕᤠᤱᤛᤠ ᤁᤢᤴᤎᤣ᤺ᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤔᤡᤰᤁᤣ ᤔᤧᤕᤢᤏᤧᤴᤗᤥ॥

¹³ ᤀᤠᤱᤃᤠ᤹ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤎᤡᤰ ᤏᤡᤛᤢᤱᤅᤠᤱ ᤘᤠ᤹ᤖᤥ— ᤔᤏᤠᤴ ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥᤱ. ᤁᤖ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤂᤧᤸᤗᤧ ᤁᤢᤗᤠᤃᤡ ᤏᤢᤒᤠ ᤔᤧᤈᤥᤃᤢᤴᤗᤥ

¹⁴ ᤜᤧᤰᤁᤩᤠᤱ ᤁᤢᤓᤠ ᤁᤢᤍ᤹ᤕᤠᤴ ᤑᤧᤴᤏᤠᤱ ᤗᤧᤱᤜᤱᤅᤥ ᤜᤠᤴᤋᤡ ᤐᤥᤱ᤹ ᤂᤧᤒᤩᤠᤱ ᤁᤢᤏᤢᤵᤔᤥ ᤀᤠᤒᤠᤅᤣ ᤁᤢᤛ᤻ᤛᤠ ᤁᤢᤀᤣᤜᤠ᤹ᤖᤧ ᤗᤠᤃᤡ ᤌᤣᤀᤠᤱ ᤗᤧᤵᤔᤠᤎᤠᤔᤠ ᤔᤧᤛᤢᤰᤋᤢᤴ᤹॥

¹⁵ ᤀᤠᤰᤂᤣᤗ᤹ᤖᤡᤰ ᤔᤧᤴᤇᤠᤶ ᤕᤠᤵᤔᤡᤴ ᤁᤢᤶᤔᤠ᤺ᤸᤗᤧ ᤁᤢᤛᤠᤵᤐᤥ᤺ᤰᤗᤠᤶ ᤋᤠ᤹᤺. ᤜᤧᤰᤁᤣᤗ᤹ᤖᤡᤰᤁᤣ ᤂᤠᤶᤒᤣ᤺ᤰᤔᤥᤗᤠᤶ ᤗᤧᤰᤆᤠᤒᤧᤎᤡ᤺ᤰ ᤏᤢ᤺ᤱ ᤐᤣ᤺ᤰᤗᤥ॥ ᤂᤢᤏᤧ᤹ ᤛᤩᤠᤱᤔᤧᤴᤍᤠᤱ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤗᤠᤶ ᤌᤣᤀᤠᤱ ᤋᤣ᤹ᤔᤠ ᤔᤧᤄᤥᤛᤢᤴ॥

¹⁶ ᤁᤴᤏᤠᤱ ᤛᤠ᤹ᤖᤡᤰ ᤁᤧᤛᤠᤰᤐᤠ ᤋᤢᤰᤂᤣᤖᤥ॥ ᤔᤏᤠᤴ ᤀᤠᤰᤂᤣᤗ᤹ᤖᤡᤰ ᤋᤩᤧ. ᤜᤧᤰᤁᤣᤗ᤹ᤖᤡᤰᤁᤣ ᤐᤣ᤺ᤰᤗᤥ॥ ᤂᤢᤏᤧ᤹ ᤛᤠ᤹ᤖᤡᤰ ᤕᤠ᤺ᤶᤒᤰ ᤆᤥᤰ ᤂᤧᤒᤩᤠᤱ ᤛᤠᤶᤔᤡ᤺ᤳᤋᤧᤴ ᤋᤧᤶᤔᤠ ᤋᤶᤛᤡᤱ ᤆᤥᤃᤢ᤹. ᤏᤡᤴᤎᤠᤛᤣ᤺ᤰᤀᤥ ᤂᤧᤸᤗᤧ ᤌᤣ ᤀᤡᤴᤎᤠ ᤂᤥᤛᤢᤒᤣ᥅ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤕᤠ᤺ᤶᤒᤰᤁᤡᤴ ᤛᤢᤖᤡᤳ ᤁᤣᤈᤱᤅᤥ ᤌᤣᤏᤠᤎᤣ ᤐᤥᤱ᤹॥

¹⁷ ᤂᤢᤏᤧ᤹ ᤁᤢᤜᤡᤱᤜᤡᤱ ᤌᤠᤖᤡᤰ ᤂᤠᤔᤠᤰᤔᤥ ᤏᤢ ᤛᤡᤰᤑᤧᤰᤔᤥ. ᤏᤡᤱᤛᤠᤱ ᤐᤢᤰᤔᤥ. ᤛᤡᤰᤐᤥ᤺ᤰᤔᤥ ᤜᤧᤰᤁᤩᤠᤱ ᤋᤢᤰᤔᤠᤗᤠ᤺ᤰᤔᤠᤀᤥ ᤘᤠ᤹ᤔᤠ ᤐᤥᤱ᤹॥

¹⁸ ᤀᤠᤱᤃᤠ᤹ ᤀᤠᤶᤓᤠ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤱ. ᤔᤏᤠᤴ ᤀᤠᤒᤠᤅᤣ ᤁᤢᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤒᤠ ᤋᤠᤱᤛᤠ ᤁᤢᤜᤡᤱᤔᤴᤏᤥ ᤆᤠᤔᤠ. ᤌᤢᤱᤔᤠ ᤏᤢ ᤀᤠᤒᤠᤅᤣ ᤁᤢᤕᤠ᤺ᤶᤒᤰᤁᤥ ᤛ᤺ᤵᤔᤠᤀᤣ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ॥ ᤜᤠᤒᤠ ᤂᤧᤴᤏᤣ ᤂᤧᤸᤗᤧ ᤁᤢᤄᤥᤔᤠ ᤗᤰ ᤐᤥᤱ᤹॥

¹⁹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤓᤠ ᤔᤏᤠᤎᤡᤰ ᤕᤠᤱᤛᤠᤁᤢᤴᤎᤣ ᤐᤡᤖᤢ᤹ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤥ ᤁᤢᤏᤡᤱᤘᤠ᤹ ᤋᤠᤛᤢ ᤐᤡᤖᤢᤏᤧ ᤑᤃᤪ ᤂᤧᤴ ᤏᤥᤃᤧᤴᤛᤠᤒᤠ ᤐᤥᤱᤅᤠᤱ ᤀᤠᤒᤠᤅᤣ ᤁᤢᤕᤠ᤺ᤶᤒᤰᤁᤥ ᤛ᤺ᤳᤗ॥ ᤂᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤒᤠ ᤐᤷᤎᤠᤶᤗᤥ॥

²⁰ ᤂᤧᤸᤗᤧ ᤁᤢᤜᤡᤱᤔᤴᤏᤥᤒᤠ ᤕᤧᤴᤜᤠ᤹ ᤕᤖᤡᤰ ᤔᤧᤀᤡ᤺ᤳᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤢᤰᤂᤣ ᤁᤧᤈᤠᤒᤠ ᤐᤥᤱᤔᤠ ᤐᤠᤱᤄᤢᤀᤠᤱ ᤘᤠ᤹॥