ᤂᤠᤜᤢᤴᤛᤠᤒᤠ 2 - LIFOTNTᤛᤢᤰᤂᤣᤘᤠ ᤐᤠ᤺ᤴᤜᤠ᤹ ᤌᤣᤏᤠᤎᤣᤖᤰ 1 ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤀᤡ᤺ᤳᤋᤢᤱ. “ᤑᤧᤖᤧ᤹. ᤀᤠᤸᤗ ᤏᤢᤒᤠ ᤐᤠ᤺ᤴᤏᤡᤴ ᤌᤧᤔᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥᤔᤠᤖᤧ ᤗᤠᤃᤡ ᤏᤡᤱᤘᤠ᤹ ᤋᤠᤍᤠᤒᤠ ᤛᤢᤰᤂᤣᤘᤠ᤺ᤴᤏᤢ ᤀᤠᤱᤃᤠ᤹ ᤂᤧᤏᤧ᤹ ᤋᤱᤏᤧᤛᤠ᤹ᤏᤧ॥” ᤁᤖ ᤂᤧᤴᤏᤠᤱ ᤜᤏᤧ ᤌᤣᤏᤠᤎᤣᤖᤧᤳᤇ ᤑᤠ᤹ᤀᤠᤱ ᤋᤛᤡ ᤐᤥ᤺ᤰᤂᤧ॥ 2 ᤀᤠᤱᤃᤠ᤹ ᤐᤠ᤺ᤳᤋᤢᤱ. “ᤀᤣ᤺ᤵᤔᤠ ᤔᤧᤵᤔᤏᤠᤒᤧᤴ ᤀᤍᤱᤐᤠᤴ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤍᤠᤔᤠ ᤛᤢᤰᤂᤣᤘᤠ ᤐᤠ᤺ᤴᤜᤠ᤹ᤖᤧ ᤌᤣ ᤀᤠᤈᤰᤐᤣ᥅” 3 ᤆᤧᤸᤗᤧᤰᤛᤣ᤹ ᤌᤡ ᤌᤢᤱᤏᤢ ᤀᤍᤱᤐᤠᤴ ᤆᤥᤃᤢᤱᤅᤠᤱ ᤀᤠᤱᤃᤠ᤹ ᤀᤠᤵᤑᤣᤰ ᤏᤡᤱᤘᤠ᤹ ᤕᤧᤕᤧᤗ᤹ᤔᤠ ᤋᤶᤛᤡᤱ ᤆᤥ᤺ᤰᤔᤠ ᤁᤥ᤺ᤳᤋᤢᤱ—ᤀᤠᤱᤃᤠ᤹ ᤀᤠᤏᤡᤱᤘᤠ᤺ᤸᤗᤧ ᤀᤠᤸᤗᤛᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤗᤠᤶ ᤗᤠᤶᤗᤥᤛᤠᤱᤗ ᤐᤳᤇᤧ॥ ᤋᤠᤱᤛᤠᤱᤒᤧᤸᤗᤧ ᤁᤢᤛᤡᤃᤠᤱ ᤁᤴ ᤋᤠᤱᤛᤠ ᤆᤵᤗᤧᤰᤘᤠ ᤜᤡᤱᤔᤴᤏᤥ ᤔᤏᤠᤖᤧ ᤗᤠᤃᤡ ᤏᤢᤒᤠ ᤕᤠ᤺ᤶᤒᤰᤁᤡᤴ ᤌᤣᤒᤣ ᤑᤠ᤹ᤀᤠᤱ ᤂᤧᤴ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤏᤡᤱᤘᤠ᤹ ᤆᤥᤃᤢᤱ॥ 4 ᤀᤠᤱᤃᤠ᤹ ᤕᤶᤒᤕᤶᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ—ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤗᤠᤃᤡ ᤜᤡᤶᤜᤠ᤹ ᤆᤥᤃᤢᤱ ᤂᤧᤒᤩᤠᤱ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤗᤣ᤺ᤳᤋᤢᤱ॥ 5 ᤀᤠᤱᤃᤠ᤹ ᤛᤡᤱᤛᤣ᤹ᤀᤡᤰᤜᤠ᤹ ᤏᤢ ᤑᤢᤱᤀᤡᤰᤜᤠ᤹ ᤆᤥᤃᤢᤱ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤖᤧᤰ ᤐᤖᤡᤰᤐᤠ ᤛᤡᤱᤛᤣ᤹ᤜᤠ᤹ᤖᤧ ᤁᤢᤒᤢᤱᤜᤠ᤹ ᤗᤣ᤺ᤳᤋᤢᤱ॥ 6 ᤜᤢᤖᤢᤶ ᤜᤢᤖᤢᤶ ᤗ᤹ᤖᤡᤰ ᤁᤧᤒᤥᤒᤠᤖ ᤁᤧᤒᤵᤐᤠ ᤛᤡᤱᤛᤣ᤹ᤀᤡᤰᤁᤥᤒᤠ ᤛᤡᤱᤒᤢᤱᤜᤠ᤹ ᤆᤫᤠ᤺ᤳ ᤘᤖᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤘᤒᤠᤰᤜᤠ᤹ ᤋᤕᤢᤱ॥ 7 ᤀᤠᤱᤃᤠ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤀᤡᤅᤢᤱᤛᤡᤱ ᤜᤧᤰᤁᤩᤠᤱ ᤀᤠᤜᤡᤶᤔᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤘᤣ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ᤀᤠᤱ ᤔᤧᤘᤕᤧ॥ ᤀᤠᤱᤃᤠ᤹ᤏᤢ᤺ᤸᤗᤧ ᤋᤃᤡ ᤕᤖᤢᤛᤗᤧ᤺ᤶᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤏᤢ᤺ᤸᤗᤧ ᤕᤖᤡᤰ ᤐᤡᤳᤌᤰᤛᤠ ᤗᤢᤵᤜᤠ᤹ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤗᤢᤵᤜᤠ᤹ ᤁᤳᤋᤢᤱᤛᤡᤱ॥ 8 ᤀᤠᤱᤃᤠ᤹ ᤀᤠᤗᤠᤃᤡ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤗᤢᤵᤛᤢᤱ ᤜᤧᤰᤁᤩᤠᤱ ᤜᤠᤱᤜᤠ᤹ᤗᤠᤶ ᤏᤢ ᤋᤧ᤺ᤱᤃᤵᤜᤠ᤹ᤗᤠᤶ ᤕᤠᤱᤛᤠᤁᤢᤴᤎᤣ ᤗᤢᤵᤛᤢᤱ॥ ᤀᤠᤱᤃᤠ᤹ ᤛᤠᤶᤃᤧᤗᤥᤒᤠ ᤏᤢ ᤛᤠᤶᤃᤧᤗᤥᤔᤠᤜᤠ᤹ ᤂᤥᤛᤢᤱᤛᤡᤱ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤁᤧᤍᤠᤔᤠ ᤁᤧᤒᤡᤔᤠ ᤆᤰᤔᤣ᤺ᤳ ᤔᤧᤴᤇᤢᤔᤠ ᤕᤢᤱᤔᤠ ᤜᤡᤶᤎᤡᤰᤁᤠᤱ ᤂᤥᤛᤢᤱ॥ 9 ᤀᤠᤱᤃᤠ᤹ᤏᤢ᤺ᤸᤗᤧ ᤋᤃᤡᤒᤠ ᤁᤧᤖᤧᤰ ᤔᤏᤠᤜᤠ᤹ᤏᤢ᤺ᤸᤗᤧ ᤕᤖᤢᤛᤗᤧ᤺ᤶᤔᤥ ᤀᤠᤱᤃᤠ᤹ ᤐᤕᤶ ᤕᤶᤒᤠ ᤐᤥ᤺ᤰᤂᤠᤱ॥ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤀᤠᤱᤃᤠ᤹ ᤀᤠᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤀᤠᤱᤃᤠ᤹ᤏᤢᤀᤣ ᤘᤕᤧᤖᤥ॥ 10 ᤀᤠᤔᤡᤰᤁᤡᤸᤗᤧ ᤏᤡᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤀᤠᤵᤑᤣᤰ ᤔᤧᤴᤏᤠ᤹ᤒᤠᤱᤅᤡᤸᤗᤥ. ᤀᤠᤳᤋᤡᤴ ᤛᤢᤰᤂᤣᤘᤠ᤺ᤴᤇᤠᤱ ᤂᤥᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤧᤸᤗᤧ ᤔᤧᤏᤠ᤹ᤖᤢᤱᤅᤡᤸᤗᤥ॥ ᤀᤠᤱᤃᤠ᤹ ᤁᤧᤖᤧᤰ ᤀᤠᤕᤠ᤺ᤶᤒᤰᤜᤠ᤹ᤀᤥ ᤀᤠᤏᤡᤱᤘᤠ᤹ ᤋᤩᤧᤖᤥ. ᤜᤧᤰᤁᤩᤠᤱ ᤁᤱᤃ ᤀᤠᤱᤃᤠ᤹ ᤛᤩᤠᤱᤔᤧᤴᤍᤠᤱ ᤆᤥᤃᤢᤱᤒᤠ ᤀᤠᤕᤠ᤺ᤶᤒᤰᤁᤡᤸᤗᤧ ᤌᤢᤶᤄᤥ ᤘᤕᤧᤖᤥ॥ 11 ᤜᤧᤰᤁᤣᤛᤠᤱ ᤀᤠᤜᤢᤰᤁᤡᤸᤗᤧ ᤆᤥᤃᤢᤱᤒᤠ ᤁᤠᤰ ᤕᤠ᤺ᤶᤒᤰᤜᤠ᤹ ᤏᤢ ᤂᤥᤔᤠᤖᤧ ᤗᤠᤃᤡ ᤛᤩᤠᤱᤔᤧᤴᤍᤠᤱ ᤆᤥᤃᤢᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤧᤵᤔᤠᤱ ᤀᤠᤏᤠᤖᤠᤴ ᤜᤡᤛᤢᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤜᤏᤧᤒᤠ ᤆᤥᤃᤧᤖᤥ॥ ᤛᤠᤶᤔᤡ᤺ᤳ ᤁᤣᤈᤱᤅᤡᤴ ᤏᤠ᤺ᤵᤔᤏᤠᤒᤠ ᤜᤧᤰᤁᤣ ᤌᤣᤏᤠᤎᤣ ᤜᤏᤧᤖᤳᤇ. ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤌᤣᤀᤠᤱ ᤁᤢᤈᤰ ᤔᤧᤒᤥ᤺ᤰᤂᤧᤴᤗᤥ॥ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤀᤍᤱ ᤐᤠ᤺ᤴᤏᤡᤴ ᤌᤣᤏᤠᤎᤣᤖᤰ 12 ᤂᤧᤒᤩᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤏᤠᤱᤏᤠᤱ ᤌᤠᤵᤌᤠᤵ ᤗ᤹ᤔᤧᤴ ᤜᤧᤰᤁᤩᤠᤱ ᤀᤍᤱᤐᤠᤴ ᤗᤧᤵᤔᤠᤱ ᤀᤠᤏᤡᤱᤘᤠᤴ ᤜᤡᤛᤢᤱᤗᤥ॥ ᤜᤠᤱᤅᤡᤸᤗᤧ ᤋᤃᤡᤀᤠᤱᤎᤥ ᤆᤥᤃᤢᤕᤢᤖᤢᤒᤠ ᤕᤠ᤺ᤶᤒᤰᤁᤡᤴᤏᤢ᤺ᤸᤗᤧ ᤂᤢᤏᤧ᤹ ᤁᤢᤀᤣᤃᤠᤱ ᤁᤧᤍᤠᤒᤧᤸᤗᤧ ᤘᤣ᤹ ᤕᤖᤡᤰ ᤆᤥ᤺ᤰᤔᤠ ᤛᤢᤰᤋᤢᤒᤡ᥅ 13 ᤀᤠᤱᤃᤠ᤹ ᤌᤣ ᤏᤡᤛᤢᤱᤓᤧᤸᤗᤧ ᤂᤠᤔᤠᤰᤔᤠᤴᤏᤢ᤺ᤸᤗᤧᤃ ᤛᤧᤴᤍᤠᤱᤃᤧᤴ ᤂᤠᤀᤥ᤺ᤵᤔᤧᤴᤏᤣ ᤏᤢᤒᤠ ᤆᤥᤰᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤀᤍᤱ ᤐᤠ᤺ᤴᤏᤡᤴᤏᤢ᤺ᤸᤗᤧᤃ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤏᤢᤒᤠ ᤆᤥᤰᤗᤥ॥ 14 ᤛᤡᤰᤁᤢᤶᤏᤡᤒᤠ ᤔᤏᤠ᤺ᤸᤗᤧ ᤁᤢᤔᤡᤰᤁᤡᤴ ᤁᤢᤎᤧᤃᤣ᤺ᤰᤐᤥ ᤐᤳᤗᤥ ᤁᤖ ᤀᤍᤱ ᤔᤏᤠᤴ ᤂᤠᤔᤠᤰᤔᤥ ᤗᤠᤱᤄᤣ᤺ᤰᤗᤥ. ᤁᤖᤛᤠᤱ ᤂᤧᤱᤜᤠ᤹ ᤏᤧᤵᤔᤠᤱ ᤛᤶᤎᤠᤱ ᤗᤳᤇᤠ ᤐᤖᤡᤰᤐᤠ ᤋᤢ᤺ᤴᤍᤣ᤺ᤴ ᤀᤡᤖᤧᤍᤩᤧᤒᤠ ᤀᤠᤱᤃᤠ᤹ ᤏᤡᤛᤢᤱᤗᤥ॥ 15 ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤀᤰᤂᤣ ᤀᤡ᤺ᤳᤋᤢᤱᤗᤥ. “ᤀᤍᤱᤅᤡᤸᤗᤧ ᤋᤢᤔᤢᤒᤠᤴ ᤀᤠᤱᤃᤠ᤹ ᤀᤠᤛᤶᤎᤠᤱᤅᤠᤱ ᤀᤡᤍᤠᤖᤥ. ᤀᤠᤱᤃᤠ᤹ ᤛᤡᤰᤁᤢᤶᤏᤡᤒᤠ ᤐᤥ᤺ᤰᤂᤠᤱᤒᤠᤴ ᤌᤣ ᤀᤡᤴᤎᤠ ᤐᤥ᤺ᤰᤂᤧᤒᤣ᥅” ᤀᤠᤏᤡᤱᤘᤠ᤹ᤀᤥ ᤐᤠ᤺ᤳᤋᤢᤱ. “ᤁᤴᤏᤧᤴᤏᤠᤱ ᤜᤏᤧ ᤌᤣᤏᤠᤎᤣᤖᤳᤇ॥” 16 ᤌᤣᤀᤠᤱᤓᤧᤸᤗᤧ ᤛᤡᤰᤁᤢᤶᤏᤡᤒᤠ ᤔᤏᤠᤴᤏᤠᤱ ᤀᤍᤱ ᤔᤏᤠᤴ ᤁᤢᤀᤡᤛᤡᤰ ᤕᤖᤡᤰ ᤕᤧᤶ ᤌᤠᤖᤡᤰ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤢᤴᤗᤥ. ᤁᤧᤍᤠᤒᤠ ᤕᤧᤴᤜᤠ᤹ᤀᤥ ᤂᤢᤴᤇᤡ᤹ ᤏᤧᤵᤔᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤛᤡᤖᤥ. ᤀᤍᤱᤅᤡᤴ ᤜᤧᤰᤁᤣ ᤛᤡᤰᤁᤢᤶᤛᤠᤒᤠ ᤔᤏᤠ᤺ᤴᤏᤠᤱ ᤛᤡᤔᤠᤀᤣ ᤐᤥᤱᤗᤥ॥ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤆᤥ᤺ᤰᤔᤧᤴᤏᤠᤱ ᤌᤣᤏᤠᤎᤣᤖᤰ 17 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤜᤡᤱᤔᤧᤴ ᤆᤡ᤺ᤳᤋᤢᤱ. ᤌᤣᤀᤠᤱᤓᤧᤸᤗᤧ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ ᤀᤠᤱᤃᤠ᤹ ᤀᤠᤗᤠᤃᤡ ᤋᤢᤰᤂᤣ ᤗᤠᤰᤂᤣᤖᤳᤇ॥ ᤛᤠᤶᤔᤡ᤺ᤳ ᤁᤣᤈᤱᤅᤡᤴ ᤏᤠ᤺ᤵᤔᤏᤠᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤁᤧᤖᤧᤰ ᤌᤣᤏᤠᤎᤣᤒᤠ ᤆᤥ᤺ᤰᤗᤧᤳᤇ॥ 18 ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤘᤠ᤹ᤒᤠ ᤁᤧᤖᤧᤰ ᤀᤠᤱᤃᤠ᤹ ᤆᤡ᤺ᤳᤋᤢᤱ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤴ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤀᤠᤀᤣᤃᤠᤱ ᤁᤧᤍᤠᤒᤠᤸᤗᤧ ᤁᤢᤗᤠᤃᤡ ᤗᤧᤵᤔᤠ ᤌᤠᤔᤠᤀᤣ ᤐᤥᤱ᤹॥ 19 ᤜᤧᤰᤁᤩᤠᤱ ᤂᤧᤴ ᤛᤡᤰᤁᤢᤶᤏᤡᤒᤠᤒᤡ ᤀᤡ ᤀᤍᤱᤒᤡ ᤑᤠ᤹ᤀᤠᤱ ᤜᤠ᤺ᤳᤗᤧ ᤏᤡᤛᤢᤒᤣ᥅ ᤜᤧᤰᤁᤣᤛᤠᤱ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤀᤠᤱᤃᤠ᤹ ᤛᤩᤠᤱᤔᤧᤴᤍᤠᤱ ᤆᤥᤃᤢᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤸᤗᤧᤀᤣ ᤁᤢᤕᤢᤰᤁᤥ ᤘᤠ᤹ᤕᤠ᤺ᤰ. ᤂᤧᤵᤔᤥ ᤀᤠᤱᤃᤠ᤹ ᤁᤧᤖᤧᤰ ᤆᤥ᤺ᤰᤔᤠ ᤁᤥ᤺ᤳᤋᤢᤱᤒᤠᤜᤠ᤹ ᤏᤢ ᤀᤠᤜᤢᤰᤘᤠᤜᤠ᤹ ᤁᤣ᤺ᤳᤋᤢᤱᤅᤠᤱ ᤕᤠᤰ॥ ᤁᤴᤏᤠᤱ ᤜᤏᤧ ᤌᤣᤏᤠᤎᤣᤖᤰᤗᤥ॥ 20 ᤂᤧᤒᤩᤠᤱ ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤀᤠᤱᤃᤠ᤹ ᤁᤧᤖᤧᤰ ᤕᤠ᤺ᤶᤒᤢᤍᤡᤰ ᤆᤥᤃᤢᤱᤒᤠᤴ ᤀᤡ᤺ᤳᤋᤢᤱᤅᤠᤱ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤏᤡᤱᤛᤠᤱ ᤐᤢᤃᤧ॥ 21 ᤌᤣᤀᤠᤱᤓᤧᤸᤗᤧ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹. ᤏᤧᤜᤡᤏᤡᤱᤘᤠ᤹ ᤏᤢ ᤜᤢᤰᤘᤠᤏᤢ᤹ᤖ ᤁᤢᤓᤠ ᤔᤏᤠ᤺ᤸᤗᤧ ᤕᤠ᤺ᤶᤒᤰ ᤆᤥᤃᤢᤛᤠᤱ ᤂᤢᤏᤧ᤹ ᤂᤥᤛᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤓᤠ ᤘᤣ᤹ᤎᤡᤰᤗᤧ ᤁᤢᤗᤠᤃᤡ ᤗᤧᤵᤔᤠ ᤐᤡᤔᤠᤀᤣ ᤐᤥᤱ᤹. ᤂᤧᤸᤗᤧ ᤁᤢᤗᤠᤃᤡ ᤕᤠ᤺ᤶᤒᤢᤍᤡᤰ ᤆᤥᤃᤢᤒᤠᤀᤣ ᤜᤥᤵ॥ ᤁᤴᤏᤠᤱ ᤌᤣᤏᤠᤎᤣ ᤏᤢ ᤕᤶᤒᤠ ᤋ᤹ᤕᤠᤴ ᤑᤧᤶᤔᤠᤖᤰᤗᤥ॥ 22 ᤏᤠᤶᤔᤡᤸᤗᤧ ᤁᤢᤛᤡᤃᤠᤱ ᤀᤠᤵᤑᤣᤰ ᤕᤠ᤺ᤶᤒᤢᤍᤡᤰᤁᤠᤱ ᤏᤡᤱᤘᤠ᤹ ᤋᤢᤰᤂᤣᤏᤢ ᤆᤥᤃᤢᤒᤠ ᤕᤠ᤺ᤶᤒᤰᤗᤠᤶ ᤔᤏᤠ᤺ᤸᤗᤧ ᤌᤧᤔᤠ᤺ᤴ ᤂᤥᤛᤢᤀᤠᤱᤒᤣ᥅ 23 ᤂᤧᤸᤗᤧ ᤁᤧᤖᤧᤰ ᤁᤢᤕᤧᤴᤏᤥᤒᤠ ᤕᤠ᤺ᤶᤒᤰᤜᤠ᤹ᤃ ᤁᤢᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠᤖᤥ. ᤛᤧᤴᤍᤡᤰᤁᤠᤱ ᤂᤧᤸᤗᤧ ᤁᤢᤏᤡᤱᤘᤠ᤺ᤸᤗᤧ ᤏᤠ᤺ᤶᤛᤡᤱᤔᤠ ᤔᤧᤄᤥᤛᤢᤴ॥ ᤂᤧᤴᤏᤠᤱ ᤜᤏᤧ ᤌᤣᤏᤠᤎᤣᤖᤰᤗᤥ॥ 24 ᤔᤏᤠ᤺ᤸᤗᤧ ᤆᤠᤔᤠ. ᤌᤢᤱᤔᤠ ᤏᤢ ᤁᤢᤕᤠ᤺ᤶᤒᤰᤁᤥ ᤁᤢᤏᤡᤱᤘᤠ᤹ ᤋᤠᤔᤠᤀᤠᤱᤎᤥ ᤘᤣ᤹ ᤕᤖᤡᤰ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴ᤹॥ ᤁᤴᤏᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤥ ᤗᤠᤶᤒᤠᤀᤣ ᤋᤠᤒᤠ ᤀᤠᤱᤃᤠ᤹ ᤏᤡᤛᤢᤱ᤹॥ 25 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤣ᤺ᤴᤏᤣ ᤜᤠ᤺ᤳᤗᤧ ᤆᤠᤔᤠ ᤀᤡᤃᤪ ᤏᤡᤱᤘᤠ᤹ ᤋᤠᤔᤠ ᤂᤥᤛᤢᤀᤠᤱᤒᤣ᥅ 26 ᤀᤠᤳᤋᤡᤴ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤡᤱᤘᤠ᤹ ᤋᤠᤛᤢ᤹. ᤂᤢᤏᤧ᤹ ᤂᤧᤴᤏᤣ ᤛᤡᤰᤁᤢᤶ ᤏᤡᤱᤘᤠ᤹. ᤏᤧᤜᤡᤏᤡᤱᤘᤠ᤹ ᤏᤢ ᤏᤡᤱᤘᤠ᤹ ᤋᤠᤔᤠ ᤐᤠᤴ ᤐᤡᤖᤢ᤹॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠᤒᤠ ᤔᤏᤠᤴ ᤐᤡᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤗᤠᤕᤥᤒᤠ ᤔᤏᤠᤴ ᤕᤠᤱᤛᤠᤁᤢᤴᤎᤣ ᤑᤢᤱᤔᤠ ᤏᤢ ᤗᤢᤶᤔᤠ ᤕᤠ᤺ᤶᤒᤰ ᤐᤡᤖᤢ᤹॥ ᤁᤴᤏᤠᤱ ᤜᤏᤧ ᤌᤣᤏᤠᤎᤣ. ᤛᤠᤶᤔᤡ᤺ᤳ ᤁᤣᤈᤱᤅᤡᤴ ᤏᤠ᤺ᤵᤔᤏᤠᤒᤠ ᤜᤧᤰᤁᤣᤖᤰᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.