ᤍᤠᤏᤡᤀᤧᤗ 2 - LIFOTNTᤏᤒᤢᤁᤍᤏᤣᤛᤖᤧᤸᤗᤧ ᤁᤢᤛᤧᤵᤔᤠᤱ 1 ᤏᤒᤢᤁᤍᤏᤣᤛᤖᤖᤧ ᤕᤢᤰ ᤆᤥᤃᤢᤒᤠ ᤏᤡᤛᤡᤃᤣᤰᤐᤠ ᤋᤱᤒᤣᤀᤥ ᤂᤢᤏᤧ᤹ ᤛᤧᤵᤔᤠᤱᤜᤠ᤹ ᤔᤠᤰᤋᤢ॥ ᤂᤢᤏᤧ᤹ ᤁᤢᤏᤡᤱᤘᤠ᤹ ᤆᤠᤖᤠᤔᤧᤀᤠᤱ ᤂᤢᤏᤧ᤹ ᤀᤡᤶᤔᤠᤀᤣ ᤔᤧᤛᤢᤰᤋᤧᤴ॥ 2 ᤁᤸᤗᤧᤆᤥᤃᤢᤸᤗᤧ ᤜᤠᤱᤅᤡᤸᤗᤧ ᤔᤠᤰᤋᤢᤒᤠ ᤛᤧᤵᤔᤠᤱᤜᤠ᤹ ᤆᤧᤰᤔᤠᤛᤡᤖᤧ ᤗᤠᤃᤡ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹. ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠ ᤁᤧᤔᤧᤵᤐᤠᤜᤠ᤹. ᤕᤧᤒᤠᤜᤠ᤹ ᤏᤢ ᤂᤠᤃᤧᤀᤡᤰᤐᤠᤜᤠ᤹ ᤀᤢ᤺ᤳᤋᤧᤶ ᤋᤠᤖᤧᤶᤛᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ॥ ᤀᤠᤸᤗ ᤂᤧᤱᤜᤠ᤹ ᤔᤧᤍᤩᤧᤀᤠᤱ ᤜᤠᤱᤅᤡᤸᤗᤧ ᤁᤢᤍᤃᤡ ᤔᤧᤕᤧᤶᤛᤡᤱ. 3 ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤗᤳᤇᤠ ᤛᤧᤵᤔᤠᤱ ᤔᤠᤰᤋᤢᤱᤅᤠᤱ ᤘᤠ᤹॥ ᤂᤧᤸᤗᤧ ᤀᤠᤱᤃᤠ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤌᤩᤠᤱᤗ ᤕᤠ᤺ᤴᤍᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤒᤣᤴ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤀᤠᤏᤡᤱᤘᤠ᤹ ᤘᤠ᤹॥” 4 ᤂᤧᤒᤩᤠᤱ ᤂᤠᤃᤧᤀᤡᤰᤐᤠᤜᤠ᤹ᤖᤧ ᤀᤖᤠᤔᤡ ᤐᤠ᤺ᤴᤍᤠᤱᤅᤥ ᤜᤠᤱᤅᤡᤴ ᤔᤧᤔᤧᤳᤋᤢ. “ᤐᤕᤶ ᤜᤠᤱᤅᤣ ᤁᤧᤎᤠ᤺ᤰ ᤆᤠ᤹ᤖᤖᤥ᥄ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤜᤠ᤹ ᤁᤧᤛᤧᤵᤔᤠᤱᤅᤡᤴ ᤀᤠᤈᤧᤰᤋᤧ᤹. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤸᤗᤧ ᤁᤢᤒᤣᤴ ᤜᤴᤍᤢᤶ ᤐᤡᤀᤠᤛᤡᤃᤧ᤹॥” 5 ᤜᤠᤱᤅᤡᤸᤗᤧ ᤂᤧᤴ ᤂᤠᤃᤧᤀᤡᤰᤐᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹—ᤂᤡᤏᤡ᤹ ᤀᤠᤱᤃᤠ᤹ ᤔᤠᤰᤋᤢᤱᤒᤠ ᤛᤧᤵᤔᤠᤱᤅᤡᤴ ᤏᤢ ᤂᤧᤸᤗᤧ ᤁᤢᤒᤣᤴ ᤜᤶᤔᤠ ᤁᤧᤴᤇᤢᤰᤋᤢᤶᤔᤡᤴᤏᤧᤓᤃᤪ. ᤂᤡᤏᤡ᤹ ᤁᤢᤈᤰᤋᤠ ᤁᤢᤗᤧᤶᤍᤠ ᤁᤧᤒᤥ᤺ᤰᤂᤡᤖ ᤕᤠ᤺ᤴᤏᤡᤱ᤹ ᤜᤧᤰᤁᤩᤠᤱ ᤂᤡᤏᤡ᤹ ᤜᤡᤶᤎᤠ᤺ᤱᤜᤠ᤹ ᤂᤠᤵᤐᤢᤌᤩ᤺ᤱ ᤐᤥᤱᤗ ᤕᤠ᤺ᤴᤍᤢᤱ᤹॥ 6 ᤁᤖ ᤂᤡᤏᤡ᤹ ᤀᤠᤱᤃᤠ᤹ ᤀᤠᤛᤧᤵᤔᤠᤱᤅᤡᤴ ᤏᤢ ᤂᤧᤸᤗᤧ ᤁᤢᤒᤣᤴ ᤁᤧᤜᤴᤍᤢᤶᤏᤧᤓᤃᤪ. ᤀᤠᤱᤃᤠ᤹ᤗᤠᤶ ᤂᤡᤏᤡ᤹ ᤔᤡᤰᤐᤣᤜᤠ᤹ ᤏᤢ ᤌᤢᤶᤄᤥᤜᤠ᤹ ᤜᤧᤰᤁᤩᤠᤱ ᤕᤶᤒᤠ ᤔᤡᤱᤛᤥ ᤀᤡᤱᤎᤠᤱ ᤁᤧᤄᤥᤛᤢᤶ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤛᤧᤵᤔᤠᤱᤅᤡᤴ ᤏᤢ ᤂᤧᤸᤗᤧ ᤁᤢᤒᤣᤴ ᤀᤠᤈᤧᤰᤋᤧᤶᤔᤧ᤹॥” 7 ᤕᤠᤶᤔᤥ ᤌᤡᤰᤗᤧᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤐᤕᤶ ᤜᤠᤱᤅᤡᤸᤗᤧ ᤁᤧᤛᤧᤵᤔᤠᤱᤅᤡᤴ ᤁᤧᤛᤧᤘᤠᤖᤥᤒᤠᤜᤠ᤹ ᤀᤠᤈᤧᤰᤋᤧ᤹ ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤸᤗᤧ ᤁᤢᤒᤣᤴ ᤜᤴᤍᤢᤶ ᤐᤡᤀᤠᤛᤡᤃᤧ᤹॥” 8 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤏᤢᤃᤵ ᤐᤡᤖᤢᤛᤡ. “ᤀᤠᤱᤃᤠ᤹ᤗᤠᤶ ᤂᤡᤏᤡ᤹ ᤕᤧᤶ ᤁᤧᤏᤠ᤺ᤰᤋᤢᤶᤔᤠᤱ ᤏᤠᤶᤍᤣᤛᤡᤱᤔᤠ ᤁᤧᤃᤥ᤺ᤳᤋᤢᤶᤗ ᤁᤧᤘᤕᤡ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤛᤧᤰᤂᤠ ᤏᤡᤛᤢᤱᤅᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤌᤣ᤺ᤴ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ ᤂᤧᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹॥ 9 ᤂᤡᤏᤡ᤹ ᤀᤠᤱᤃᤠ᤹ ᤀᤠᤛᤧᤵᤔᤠᤱᤅᤡᤸᤗᤧ ᤁᤢᤒᤣᤴ ᤁᤧᤴᤜᤴᤍᤢᤶᤔᤡᤴᤏᤧᤓᤃᤪ ᤂᤡᤏᤡ᤹ ᤗᤠᤃᤡ ᤗᤳᤇᤠᤖᤰ ᤂᤢᤶᤍᤡᤱ ᤘᤠ᤹॥ ᤂᤧᤴ ᤕᤠᤰᤏᤠᤶᤔᤡᤴ ᤗᤧᤱᤒᤡᤗᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤔᤠᤱ ᤂᤡᤏᤡ᤹ ᤔᤧᤴᤘᤠ᤹ᤔᤏᤠᤒᤠ ᤏᤢ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤀᤡᤱ ᤁᤧᤍᤱᤄᤢᤶᤔᤠᤱ ᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤛᤧᤵᤔᤠᤱᤅᤡᤴ ᤀᤠᤈᤧᤰᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤸᤗᤧ ᤁᤢᤒᤣᤴ ᤜᤶᤔᤠ ᤁᤧᤛᤢᤰᤋᤢᤶ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱ᤹॥” 10 ᤂᤠᤃᤧᤀᤡᤰᤐᤠᤜᤠ᤹ᤖᤧ ᤜᤠᤱᤅᤡᤴ ᤏᤢᤃᤵ ᤔᤧᤒᤡᤖᤢ. “ᤐᤕᤶ ᤜᤠᤱᤅᤡᤸᤗᤧ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤆᤥ᤺ᤰᤔᤠ ᤁᤧᤛᤢᤰᤐᤠ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤴᤏᤠᤱ ᤜᤥᤵ॥ ᤀᤠᤰᤂᤩᤠᤰ ᤐᤕᤶ ᤕᤶᤒᤠ ᤏᤢ ᤔᤢᤰᤛᤠᤶᤛᤠᤒᤠ ᤆᤥ᤺ᤰᤛᤠᤱ ᤀᤠᤳᤋᤡᤴ ᤜᤠᤱᤅᤡᤸᤗᤧᤀᤠᤱ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ ᤀᤡᤃᤪ ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠ ᤁᤧᤔᤧᤵᤐᤠᤜᤠ᤹ ᤁᤡᤃᤪ ᤂᤠᤃᤧᤀᤡᤰᤐᤠᤜᤠ᤹ ᤀᤰᤋᤱᤒᤠ ᤐᤠᤴ ᤀᤠᤵᤑᤠᤸᤗᤧᤀᤠᤱ ᤏᤠ᤺ᤰᤋᤢᤛᤡᤒᤠ ᤜᤥᤵ॥ 11 ᤐᤕᤶ ᤕᤶᤒᤠ ᤜᤠᤱᤅᤡᤸᤗᤧ ᤛᤣ᤺ᤴᤍᤥ ᤁᤧᤈᤥᤃᤢᤒᤠ ᤁᤴ ᤛᤧ᤺ᤴᤗᤠᤵᤐᤡᤴ ᤛᤠ᤹ᤖᤡᤰ ᤁᤧᤛᤠᤰᤐᤠ ᤆᤥᤰ॥ ᤔᤠᤱᤜᤠ᤹ᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤸᤗᤧᤀᤠᤱ ᤁᤴ ᤐᤠ᤺ᤴᤏᤡᤴ ᤐᤕᤶ ᤜᤠᤱᤅᤡᤴ ᤆᤧᤰᤔᤠ ᤁᤧᤴᤇᤢᤰᤏᤧᤴ॥ ᤂᤧᤴ ᤔᤠᤱᤜᤠ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤧᤴᤘᤠ᤹ᤏᤧᤴ॥” 12 ᤁᤸᤗᤧᤆᤥᤃᤢᤸᤗᤧ ᤜᤠᤱᤅᤡᤴ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ ᤜᤧᤰᤁᤩᤠᤱ ᤂᤢᤏᤧ᤹ ᤒᤣᤒᤡᤗᤥᤏᤒᤠ ᤁᤧᤖᤧᤰ ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠᤜᤠ᤹ ᤛᤡᤔᤧᤸᤗᤧ ᤂᤢᤶᤍᤡᤱ ᤐᤡᤔᤠᤛᤡ ᤀᤡᤱᤈᤠᤱ ᤐᤡᤖᤢᤛᤡ॥ 13 ᤁᤶᤓᤗ᤹ᤖᤡᤰ ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠᤜᤠ᤹ ᤛᤡᤔᤧᤸᤗᤧ ᤂᤢᤶᤍᤡᤱ ᤐᤡᤔᤠᤛᤡ ᤀᤡᤱᤈᤠᤱ ᤗ᤺ᤴᤍᤧ ᤜᤧᤰᤁᤩᤠᤱ ᤍᤠᤏᤡᤀᤧᤗᤧᤴ ᤏᤢ ᤁᤢᤴᤍᤣ᤺ᤱᤒᤠᤜᤠ᤹ᤀᤠᤱ ᤛᤧᤵᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ ᤀᤢ᤺ᤵᤔᤠᤛᤡᤖᤧ ᤗᤠᤃᤡ ᤔᤏᤠᤜᤠ᤹ ᤔᤧᤒᤠᤱᤄᤢᤛᤡᤖᤥ॥ 14 ᤀᤠᤸᤗ ᤜᤠᤱᤅᤡᤸᤗᤧ ᤁᤢᤎᤰ ᤁᤶᤒᤪᤠᤱ ᤁᤧᤔᤧᤵᤐᤧᤸᤗᤧ ᤁᤢᤎᤰᤔᤥᤒᤠ ᤀᤷᤕᤥᤁᤧᤴ ᤒᤣᤒᤡᤗᤥᤏᤒᤠ ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠᤜᤠ᤹ ᤛᤡᤔᤧᤴᤗᤧ ᤂᤢᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤗ᤺ᤴᤍᤧᤸᤗᤧ. ᤍᤠᤏᤡᤀᤧᤗᤖᤧ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤛᤠ᤹ᤖᤡᤰ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤴ ᤐᤠᤴ ᤛᤣ᤺ᤴᤍᤥᤛᤢ. 15 “ᤜᤠᤱᤅᤡᤸᤗᤧ ᤌᤣᤀᤠᤱ ᤀᤰᤋᤱᤒᤠ ᤁᤧᤀᤠ᤺ᤵᤐᤠ ᤀᤡᤱᤈᤠᤱ ᤗ᤺ᤳᤋᤢᤒᤠᤒᤣ᥅” ᤂᤧᤒᤩᤠᤱ ᤀᤷᤕᤥᤁᤖᤧ ᤍᤠᤏᤡᤀᤧᤗᤧᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤧᤰᤋᤢ॥ 16 ᤁᤴ ᤂᤧᤵᤛᤢᤀᤠᤱ ᤍᤠᤏᤡᤀᤧᤗᤧᤴ ᤜᤠᤱᤅᤡᤸᤗᤧ ᤁᤢᤍᤃᤡ ᤐᤣ ᤜᤧᤰᤁᤩᤠᤱ ᤛᤧᤵᤔᤠᤱᤅᤡᤸᤗᤧ ᤁᤢᤒᤣᤴ ᤆᤧᤰᤔᤠ ᤑᤠ᤹ᤀᤠᤱ ᤕᤧᤶ ᤂᤥᤔᤠᤖᤧ ᤗᤠᤃᤡ ᤐᤣᤗᤡ ᤑᤠᤰᤋᤢ॥ 17 ᤂᤧᤒᤩᤠᤱ ᤍᤠᤏᤡᤀᤧᤗᤧᤴ ᤁᤢᤜᤡᤶᤔᤥ ᤏᤢ᤺ᤰᤂᤧᤀᤠᤱ ᤂᤧᤴ ᤐᤠ᤺ᤴᤏᤡᤴ ᤜᤏᤏᤩᤠᤜ. ᤔᤡᤛᤠᤀᤣᤗ ᤏᤢ ᤀᤈᤷᤕᤠᤜ ᤁᤢᤴᤈᤢᤶᤜᤠ᤹ ᤆᤧᤰᤋᤢᤛᤡ॥ 18 ᤒᤣᤒᤡᤗᤥᤏᤒᤠ ᤘᤣ᤹ ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠᤜᤠ᤹ᤏᤢ ᤂᤢᤏᤧ᤹ ᤜᤧᤰᤁᤩᤠᤱ ᤁᤢᤴᤈᤢᤶ ᤁᤢᤴᤍᤣ᤺ᤱᤜᤠ᤹ ᤛᤥᤖᤡᤰ ᤛᤡᤔᤠ ᤔᤧᤒᤥᤱᤏᤧᤴᤗ ᤑᤠ᤹ᤀᤠᤱ ᤁᤴ ᤛᤡᤒᤡ᤹ ᤐᤠ᤺ᤴᤏᤡᤴ ᤐᤠ᤺ᤵᤔᤠᤖᤧ ᤗᤠᤃᤡ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤗ ᤑᤠ᤹ᤀᤠᤱ ᤂᤢᤏᤧ᤹ᤏᤢ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤁᤢᤴᤈᤢᤶ ᤁᤢᤴᤍᤣ᤺ᤱᤜᤠ᤹ ᤐᤣᤗᤡ ᤑᤠᤰᤋᤢᤛᤡ॥ 19 ᤛᤧᤴᤍᤡᤰ ᤛᤢᤑᤥᤀᤥ ᤁᤴ ᤛᤡᤒᤡ᤹ ᤐᤠ᤺ᤴᤏᤡᤴ ᤍᤠᤏᤡᤀᤧᤗᤖᤥ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧ॥ ᤂᤧᤒᤩᤠᤱ ᤍᤠᤏᤡᤀᤧᤗᤖᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤑᤥᤛᤢ॥ 20 ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤓᤧᤸᤗᤧᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤴ ᤀᤡᤱᤎᤠᤱ ᤐᤥᤱᤗᤖᤥ॥ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤔᤢᤰᤛᤠᤶᤔᤡᤴ ᤂᤢᤏᤧ᤹ᤀᤡᤴᤏᤣᤖᤥ॥ 21 ᤂᤢᤏᤧ᤹ᤀᤣ ᤕᤧᤶ ᤏᤢ ᤕᤠᤰᤘᤠᤜᤠ᤹ ᤗᤧᤰᤂᤢᤖᤥ॥ ᤂᤢᤏᤧ᤹ᤀᤣ ᤜᤠᤱᤜᤠ᤹ ᤜᤠᤱᤕᤢᤰᤏᤠᤀᤥ ᤕᤢᤰᤂᤢᤛᤡᤖᤥ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤂᤧᤱᤜᤠ᤹ ᤂᤧᤳᤋᤢᤛᤡᤖᤥ॥ ᤂᤢᤏᤧ᤹ ᤛᤡᤰᤁᤢᤶᤛᤠᤒᤠᤜᤠ᤹ ᤏᤧᤜᤡᤏᤡᤱᤘᤠ᤹ ᤐᤡᤖᤢᤛᤡᤖᤥ ᤂᤧᤒᤩᤠᤱ ᤂᤠᤛᤡᤱ ᤁᤧᤏᤡ᤺ᤵᤐᤠᤜᤠ᤹ ᤛᤡᤰᤁᤢᤶ ᤏᤡᤱᤘᤠ᤹ ᤐᤡᤖᤢᤛᤡᤖᤥ॥ 22 ᤂᤢᤏᤧ᤹ ᤁᤢᤒᤣ ᤁᤧᤕᤠᤰᤐᤠ ᤐᤠ᤺ᤴᤜᤠ᤹ ᤏᤢ ᤛᤡᤒᤡ᤹ᤒᤠ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ. ᤂᤠᤔᤠᤰᤔᤥ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤂᤢᤏᤧ᤹ ᤏᤡᤛᤢᤖᤥ ᤜᤧᤰᤁᤩᤠᤱ ᤀᤥ᤺ᤳᤋᤡ᤺ᤴ ᤂᤢᤏᤧ᤹ᤀᤥ ᤕᤠᤱᤎᤥᤰᤗᤥ॥ 23 ᤀᤠᤛᤢᤎᤧᤒᤠ ᤀᤠᤎᤠ᤺ᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤂᤧᤏᤧ᤹ ᤏᤢᤃᤧᤴ ᤐᤡᤏᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤠᤖᤠ ᤑᤥᤛᤢᤱᤗᤥ. ᤂᤧᤏᤧ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤀᤠᤱᤃᤠ᤹ ᤔᤢᤰᤛᤠᤶ ᤁᤧᤒᤡᤖᤠᤱᤅᤠᤱ ᤘᤠ᤹ᤖᤥ॥ ᤀᤠᤏᤡᤃᤣ ᤂᤧᤏᤧ᤹ ᤏᤠ᤺ᤰᤁᤠᤛᤡᤃᤧᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤀᤥᤛᤣ᤺ᤴᤃᤧᤎᤠᤰᤋᤠᤱᤅᤠᤱ ᤘᤠ᤹ᤖᤥ ᤂᤧᤏᤧ᤹ ᤜᤠᤱᤅᤡᤸᤗᤧ ᤁᤢᤛᤧᤵᤔᤠᤱᤅᤡᤴ ᤀᤠᤏᤡᤃᤣ ᤕᤠᤵᤔᤡ ᤀᤥ᤺ᤴᤃᤧᤎᤠᤰᤋᤧᤀᤠᤱ ᤘᤠ᤹ᤖᤥ॥” ᤍᤠᤏᤡᤀᤧᤗᤖᤧ ᤛᤧᤵᤔᤠᤱᤅᤡᤸᤗᤧ ᤁᤢᤒᤣᤴ ᤜᤴᤍᤢ 24 ᤂᤧᤒᤩᤠᤱ ᤒᤣᤒᤡᤗᤥᤏᤒᤠ ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠᤜᤠ᤹ ᤛᤧᤵᤔᤠᤛᤡ ᤑᤠ᤹ᤀᤠᤱ ᤜᤠᤱᤅᤡᤸᤗᤧ ᤔᤢᤖᤠᤔᤧᤳᤋᤢᤒᤠ ᤀᤷᤕᤥᤁᤀᤥ ᤍᤠᤏᤡᤀᤧᤗᤧᤴ ᤐᤣᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤒᤣᤒᤡᤗᤥᤏᤒᤠ ᤛᤡᤰᤁᤢᤶᤛᤠᤒᤠᤜᤠ᤹ ᤔᤧᤛᤧᤖᤧᤛᤧᤴᤏᤧ᤹॥ ᤀᤠᤱᤃᤠ᤹ ᤜᤠᤱᤅᤧᤀᤥ ᤋᤣ᤹ᤖᤠᤱᤅᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤢᤏᤧ᤹ ᤁᤢᤛᤧᤵᤔᤠᤱᤅᤡᤸᤗᤧ ᤁᤢᤒᤣᤴ ᤆᤧᤰᤋᤢᤱ᤹॥” 25 ᤜᤧᤰᤁᤩᤠᤱ ᤀᤷᤕᤥᤁᤖᤧ ᤂᤡᤔᤥ ᤍᤠᤏᤡᤀᤧᤗᤧᤴ ᤜᤠᤱᤅᤧᤀᤥ ᤋᤣ᤹ᤖᤢᤀᤠᤱ ᤔᤧᤳᤋᤢ. “ᤕᤜᤢᤍᤠᤗᤠᤶ ᤁᤧᤓᤧᤶᤒᤠ ᤔᤧᤍᤧᤶᤛᤢ ᤔᤧᤓᤧᤳᤋᤢᤛᤡᤒᤠᤜᤠ᤹ᤀᤥ ᤀᤠᤱᤃᤠ᤹ ᤔᤏᤠᤎᤡᤰ ᤋᤢᤔᤢᤱᤅᤠᤱ ᤘᤠ᤹. ᤂᤢᤏᤧ᤹ ᤜᤠᤱᤅᤡᤸᤗᤧ ᤁᤢᤛᤧᤵᤔᤠᤱᤅᤡᤸᤗᤧ ᤁᤢᤒᤣᤴ ᤆᤧᤱᤔᤠ ᤛᤢᤰᤋᤢ᤹॥” 26 ᤜᤠᤱᤅᤡᤸᤗᤧ ᤍᤠᤏᤡᤀᤧᤗᤧᤴ (ᤂᤢᤏᤧ᤹ ᤁᤢᤔᤡᤱ ᤒᤣᤗᤋᤛᤈᤖᤀᤠᤱ ᤘᤕᤧ) ᤛᤣ᤺ᤴᤍᤥᤛᤢ. “ᤌᤣ ᤀᤠᤱᤃᤠ᤹ ᤔᤠᤰᤋᤢᤱᤒᤠ ᤀᤠᤛᤧᤵᤔᤠᤱᤅᤡᤴ ᤐᤠ᤺ᤵᤔᤠ ᤏᤢ ᤂᤧᤸᤗᤧ ᤁᤢᤒᤣᤴ ᤂᤧᤏᤧ᤹ ᤜᤶᤔᤠ ᤁᤧᤛᤢᤰᤋᤢᤒᤡ᥅” 27 ᤍᤠᤏᤡᤀᤧᤗᤖᤧ ᤏᤢᤃᤵ ᤐᤡᤖᤢ. “ᤐᤕᤶ ᤜᤠᤱᤅᤡᤸᤗᤧ ᤛᤧ᤺ᤴᤃᤧᤍᤥᤛᤢᤒᤠ ᤛᤡᤒᤡ᤹ ᤐᤠ᤺ᤴᤏᤡᤸᤗᤧ ᤁᤢᤒᤣᤴ ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠ. ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠ ᤁᤧᤔᤧᤵᤐᤠ. ᤁᤡᤳᤆᤠᤰ ᤁᤧᤈᤥ᤺ᤰᤐᤠ ᤀᤡᤃᤪ ᤌᤢᤶᤔᤩᤠ ᤁᤧᤀᤡᤒᤠ ᤀᤠᤳᤋᤡᤸᤗᤧᤀᤠᤱ ᤁᤢᤒᤣ ᤜᤶᤔᤠ ᤔᤧᤛᤢᤰᤋᤢᤴ᤹. 28 ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤡᤱᤘᤠ᤹ᤑᤢᤔᤠᤱ ᤘᤠ᤹. ᤂᤢᤏᤧ᤹ ᤛᤡᤒᤡ᤹ᤒᤠ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤎᤠᤱ ᤆᤥᤃᤢ᤹॥ ᤂᤢᤏᤧ᤹ ᤁᤧᤍᤠᤒᤠ ᤕᤧᤶᤔᤥ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤐᤕᤶ ᤜᤠᤱ ᤏᤒᤢᤁᤍᤏᤣᤛᤖᤧᤴ ᤀᤥᤛᤣ᤺ᤴᤎᤠᤰᤋᤢᤀᤠᤱ ᤘᤠ᤹॥ ᤀᤠᤍᤠᤱᤒᤠ ᤏᤧᤳᤏᤠᤀᤥ ᤁᤧᤛᤥ᤺ᤴᤇᤡᤱᤅᤠᤱ ᤁᤧᤏᤧᤛ᤻ᤛᤧᤸᤗᤧ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤀᤥ ᤁᤧᤔᤠᤰᤋᤢᤒᤠ ᤛᤧᤵᤔᤠᤱᤅᤡᤴ ᤏᤢ ᤁᤧᤏᤡᤛᤢᤒᤠ ᤛᤢᤑᤥᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ— 29 “ᤐᤕᤶ ᤜᤠᤱᤅᤣ. ᤀᤠᤍᤠᤱᤒᤠ ᤏᤧᤳᤏᤠᤀᤥ ᤁᤧᤛᤥ᤺ᤴᤇᤡᤱᤅᤠᤱ ᤁᤧᤏᤧᤛ᤻ᤛᤧᤒᤠ ᤕᤧᤶᤔᤥ ᤋᤠ᤺ᤴᤍᤡ ᤌᤣ ᤐᤥᤱᤒᤡᤗᤠ ᤑᤠ᤹ᤀᤠᤱ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ ᤋᤠ᤹ᤈᤧᤰᤂᤧ. ᤜᤧᤰᤁᤩᤠᤱ ᤛᤡᤒᤡ᤹ ᤐᤠᤴ ᤀᤥᤛᤣ᤺ᤴᤎᤠᤱ ᤁᤧᤈᤥ᤺ᤰᤐᤧᤸᤗᤧ ᤋᤠᤕᤧᤶᤔᤥ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤃᤧᤎᤠᤰᤋᤧᤀᤠᤱ ᤘᤠ᤹॥ 30 ᤀᤠᤱᤃᤠ᤹ᤗᤠᤶ ᤁᤴ ᤛᤡᤒᤡ᤹ ᤐᤠ᤺ᤴᤏᤡᤸᤗᤧ ᤁᤢᤒᤣ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧᤒᤠᤴ ᤀᤠᤱᤃᤠ᤹ ᤘᤣ᤹ ᤁᤢᤜᤡᤱᤘᤧᤳ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤏᤢ᤺ᤸᤗᤧ ᤕᤖᤡᤰ ᤛᤡᤰᤁᤢᤶᤛᤠᤒᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ ᤔᤣ᤺ᤴ. ᤁᤖ ᤀᤠᤍᤠᤱᤒᤠ ᤐᤕᤶ ᤜᤠᤱᤅᤡᤸᤗᤧ ᤁᤧᤛᤧᤵᤔᤠᤱᤅᤡᤸᤗᤧ ᤁᤢᤒᤣᤴ ᤜᤴᤗ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤀᤥ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤖ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧᤀᤠᤱ ᤘᤠ᤹॥ 31 “ᤐᤕᤶ ᤜᤠᤱᤅᤣ. ᤀᤠᤍᤠᤱᤒᤠᤖᤧ ᤀᤥᤃᤧᤔᤧᤳᤋᤢᤖ ᤁᤧᤒᤳᤇᤧᤸᤗᤧ ᤕᤶᤒᤠ ᤀᤡᤳ ᤌᤡᤰ ᤕᤧᤒᤧᤒᤠ ᤁᤧᤏᤡᤛᤢ॥ ᤁᤴ ᤀᤡ᤺ᤳᤋᤡᤴ ᤛᤠ᤹ᤖᤡᤰ ᤕᤶᤒᤠ ᤏᤢ ᤛᤧᤸᤗᤧᤱ ᤛᤧᤸᤗᤧᤱ ᤁᤧᤀᤥ᤺ᤵᤐᤠ ᤏᤡᤍᤧᤳᤋᤧ ᤜᤧᤰᤁᤩᤠᤱ ᤁᤢᤏᤠᤖᤠᤴ ᤁᤡᤵᤔᤠᤃᤧᤄᤢᤒᤠ ᤆᤥᤃᤧ॥ 32 ᤂᤧᤴ ᤀᤡ᤺ᤳᤋᤧᤸᤗᤧ ᤁᤢᤎᤧᤃᤣᤰᤐᤠᤴ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ. ᤁᤢᤛᤱᤒᤵᤔᤠᤴ ᤏᤢ ᤁᤢᤜᤢᤰᤜᤠ᤹ ᤕᤢᤵᤐᤠ. ᤁᤢᤛᤠᤵᤐᤥ᤺ᤰᤁᤡᤴ ᤏᤢ ᤁᤢᤗᤠᤱ ᤛᤧᤒᤱᤒᤠᤴ ᤁᤠᤛᤠ. 33 ᤁᤢᤗᤠᤱᤜᤠ᤹ ᤑᤧᤴᤈᤣ᤹ ᤜᤧᤰᤁᤩᤠᤱ ᤁᤢᤗᤠᤱ ᤋᤠᤵᤐᤣ᤹ᤜᤠ᤹ ᤁᤢᤓᤠ ᤑᤧᤴᤈᤣ᤹ ᤏᤢ ᤁᤢᤓᤠ ᤐᤛᤠᤰᤁᤧᤛᤠᤰᤐᤠ ᤂᤠᤶᤔᤡᤴ ᤑᤢᤵᤔᤏᤠᤀᤠᤱ ᤆᤥ᤺ᤰᤔᤏᤠᤒᤠ ᤆᤥᤃᤧ॥ 34 ᤀᤠᤍᤠᤱᤒᤠᤖᤧ ᤀᤥᤃᤧᤔᤧᤳᤋᤢᤖ ᤁᤧᤒᤳᤇᤧᤸᤗᤧ ᤕᤠᤰᤐᤣ᤹ᤀᤥᤗᤠᤶ ᤕᤶᤒᤠ ᤗᤢᤱᤎᤡᤰ ᤔᤏᤠᤜᤠ᤹ᤖᤧ ᤔᤧᤴᤇᤢᤀᤣ ᤂᤰᤋᤧ ᤕᤧ॥ ᤁᤴ ᤗᤢᤱᤅᤡᤴ ᤑᤧᤴᤈᤣ᤹ ᤏᤢ ᤐᤛᤠᤰᤁᤧᤛᤠᤰᤐᤠ ᤂᤠᤶᤔᤡᤸᤗᤧ ᤆᤥ᤺ᤰᤔᤏᤠᤒᤠ ᤂᤧᤴ ᤀᤡ᤺ᤳᤋᤡᤸᤗᤧ ᤁᤢᤗᤠᤱᤅᤥ ᤋᤥ᤺ᤰᤋᤧ ᤂᤧᤒᤩᤠᤱ ᤂᤧᤴ ᤑᤕ᤺ᤵᤑᤕ᤺ᤵ ᤕ᤺ᤵᤛᤢᤍᤣᤛᤢ॥ 35 ᤂᤧᤒᤩᤠᤱ ᤂᤧᤴ ᤑᤧᤴᤈᤣ᤹. ᤐᤛᤠᤰᤁᤧᤛᤠᤰᤐᤠ ᤂᤠᤶ. ᤁᤠᤛᤠ. ᤕᤢᤵᤐᤠ ᤏᤢ ᤛᤠᤶᤔᤩᤠᤱᤜᤠ᤹ ᤌᤡᤰᤗᤧᤱᤗᤧ ᤁᤢᤶᤈᤡᤰᤔᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤜᤠᤱᤘᤠᤔᤠ ᤕᤧᤶᤔᤥ ᤆᤠ ᤌᤠᤶᤔᤠᤍᤧᤴᤏᤥᤗᤠᤶ ᤆᤠ᤺ᤸᤗᤧ ᤁᤢᤛᤡᤵᤜᤠ᤹ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤑᤢᤳᤗᤢᤶ ᤑᤧᤛᤢᤍᤣ᤹ᤖᤢᤒᤠ ᤁᤢᤀᤡᤛᤡᤰ ᤂᤧᤴ ᤘᤖᤧᤱᤗᤧᤱ ᤑᤧᤛᤢᤍᤣ᤹ᤖᤢ॥ ᤁᤖ ᤂᤧᤴ ᤀᤡ᤺ᤳᤋᤥ ᤁᤧᤍᤥ᤺ᤰᤐᤠ ᤗᤢᤱᤅᤡᤴ ᤕᤶᤒᤠ ᤐᤥ᤺ᤰᤂᤧᤖ ᤐᤣᤀᤠᤱ ᤁᤥ᤺ᤰᤔᤠ ᤑᤠᤱᤈᤱ ᤐᤥ᤺ᤰᤂᤧ ᤜᤧᤰᤁᤩᤠᤱ ᤂᤧᤸᤗᤧ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤋᤧᤵᤋᤢ॥ 36 “ᤛᤧᤵᤔᤠᤱᤅᤡᤴ ᤜᤠᤒᤠ ᤁᤴᤗᤥ. ᤜᤧᤰᤁᤩᤠᤱ ᤀᤠᤸᤗ ᤐᤕᤶ ᤜᤠᤱᤅᤡᤴ ᤁᤸᤗᤧ ᤁᤢᤒᤣᤴ ᤆᤧᤰᤁᤠᤛᤡᤃᤧ᤹॥ 37 ᤀᤠᤍᤠᤱᤒᤠᤀᤣ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤐᤕᤶ ᤜᤠᤱ ᤁᤧᤘᤠ᤹॥ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤠᤱᤒᤠᤴ ᤜᤠᤱᤈᤢᤶ. ᤜᤠᤱᤘᤠ ᤔᤠᤱᤘᤠ. ᤔᤢᤰᤛᤠᤶ ᤏᤢ ᤔᤡᤔᤡᤍᤡᤱ ᤁᤧᤒᤡᤖᤧᤀᤠᤱ ᤘᤠ᤹॥ 38 ᤂᤢᤏᤧ᤹ ᤀᤠᤍᤠᤱᤒᤠᤖᤧ ᤁᤧᤜᤢᤰᤁᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤢ ᤁᤢᤒᤢ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤋᤠᤱᤛᤠᤱᤒᤥᤒᤠ ᤐᤢᤛᤠᤜᤠ᤹ ᤁᤧᤒᤡᤖᤧᤀᤠᤱ ᤘᤠ᤹॥ ᤂᤧᤱᤜᤠ᤹ ᤀᤠᤳᤋᤥ ᤀᤠᤳᤋᤥ ᤔᤧᤘᤠ᤹. ᤂᤢᤏᤧ᤹ ᤂᤧᤱᤜᤠ᤹ ᤛᤶᤎᤠᤱ ᤂᤧᤏᤧ᤹ ᤕᤢᤰ ᤁᤧᤒᤡᤖᤧᤀᤠᤱ ᤘᤠ᤹॥ ᤂᤧᤴ ᤛᤠᤶᤔᤩᤠᤱ ᤌᤧᤃᤣᤰᤐᤠᤱᤃ ᤀᤠᤍᤠᤱᤒᤠᤴᤏᤣᤖᤥ॥ 39 “ᤀᤠᤍᤠᤱᤒᤠᤖᤧ ᤁᤧᤀᤣᤃᤠᤱ ᤋᤠ᤺ᤴᤍᤡ. ᤀᤠᤍᤠᤱᤒᤠᤖᤧᤴᤏᤢ᤺ᤸᤗᤧ ᤔᤡᤛᤠᤰ ᤆᤢᤰᤐᤠ ᤁᤢᤔᤢᤰ ᤁᤧᤕᤠᤰᤐᤠ ᤜᤠᤱᤈᤢᤶ ᤌᤡᤰ ᤐᤥᤱ᤹॥ ᤂᤧᤴ ᤀᤣᤃᤠᤱ ᤁᤠᤛᤠᤒᤠ ᤛᤢᤶᤛᤡᤃᤣᤰᤐᤠ ᤜᤠᤱᤈᤢᤶᤔᤡᤸᤗᤧ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠᤱᤕᤢᤰ ᤆᤥᤃᤢ᤹॥ 40 ᤁᤢᤏᤢᤵᤔᤥ. ᤑᤧᤴᤈᤣ᤹ ᤕᤠᤖᤡᤰ ᤁᤧᤎᤢᤶᤒᤠ ᤗᤡᤛᤡᤃᤣᤰᤐᤠ ᤜᤠᤱᤈᤢᤶ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤑᤧᤴᤈᤣᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤶᤈᤡᤰ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤧᤸᤗᤧ ᤘᤣ᤹ ᤁᤧᤖᤧᤰ ᤔᤧᤰᤂᤢᤛᤡᤀᤠᤱ ᤑᤢᤳᤇᤡᤱᤈᤩᤠᤱ ᤆᤥᤃᤢᤛᤡ᤹॥ 41 ᤀᤠᤍᤠᤱᤒᤠᤖᤧ ᤁᤸᤗᤧ ᤁᤢᤗᤠᤱᤜᤠ᤹ ᤏᤢ ᤁᤢᤗᤠᤱᤈᤥ᤺ᤰᤜᤠ᤹ ᤁᤢᤓᤠ ᤐᤛᤠᤰᤁᤧᤛᤠᤰᤐᤠ ᤂᤠᤶ. ᤁᤢᤓᤠ ᤑᤧᤴᤈᤣᤸᤗᤧ ᤆᤥ᤺ᤰᤔᤏᤠᤒᤠ ᤁᤧᤏᤡᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤁᤴ ᤁᤧᤛᤧᤶᤒᤠ ᤜᤠᤱᤈᤢᤶ ᤐᤥᤱ᤹. ᤜᤧᤰᤁᤣᤛᤠᤱ ᤀᤠᤍᤠᤱᤒᤠᤖᤧ ᤑᤧᤴᤈᤣᤴ ᤐᤛᤠᤰᤁᤧᤛᤠᤰᤐᤠ ᤂᤠᤶᤔᤡᤴᤏᤢ ᤑᤢᤳᤇᤡᤱᤒᤠ ᤁᤧᤏᤡᤛᤢᤒᤠ ᤁᤢᤀᤡᤛᤡᤰ ᤁᤵᤔᤥ ᤁᤢᤓᤠ ᤑᤧᤴᤈᤣᤴ ᤁᤧᤎᤢᤶᤒᤠ ᤐᤥᤱ᤹॥ 42 ᤂᤧᤴ ᤗᤠᤱᤈᤥ᤺ᤰᤜᤠ᤹ ᤁᤢᤓᤠ ᤑᤧᤴᤈᤣ᤹ ᤏᤢ ᤁᤢᤓᤠ ᤐᤛᤠᤰᤁᤧᤛᤠᤰᤐᤠ ᤂᤠᤶᤔᤡᤸᤗᤧᤴ ᤐᤳᤇᤧᤒᤠ ᤁᤢᤀᤡᤛᤡ᤺ᤰᤁᤣ ᤁᤴ ᤜᤠᤱᤈᤢᤶᤔᤡᤴ ᤁᤢᤓᤠ ᤁᤧᤎᤢᤶᤒᤠ ᤏᤢ ᤁᤢᤓᤠ ᤔᤧᤴᤎᤢᤶᤔᤏᤠᤒᤠ ᤐᤥᤱ᤹॥ 43 ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤑᤧᤴᤈᤣᤴ ᤐᤛᤠᤰᤁᤧᤛᤠᤰᤐᤠ ᤂᤠᤶᤔᤡᤴᤏᤢ ᤐ᤺ᤴᤍᤧᤒᤠ ᤁᤧᤏᤡᤛᤢᤒᤠ ᤁᤢᤀᤡᤛᤡᤰ ᤔᤏᤠᤜᤠ᤹ᤀᤠᤱ ᤁᤧᤒ᤺ᤶᤒᤠ ᤔᤧᤴᤇᤠᤶ ᤛᤢᤘᤠᤱ ᤔᤧᤒᤥᤱᤅᤠᤱ ᤑᤧᤴᤈᤣᤴ ᤐᤛᤠᤰᤁᤧᤛᤠᤰᤐᤠ ᤂᤠᤶᤔᤡᤴᤏᤢ ᤔᤧᤍᤱᤏᤧᤶᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤶᤒᤥᤱᤏᤧᤴ॥ 44 “ᤁᤴ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤔᤥ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤠᤱᤈᤢᤶ ᤌᤡᤰ ᤆᤥᤃᤢ᤹. ᤂᤧᤴ ᤜᤠᤱᤈᤢᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤘᤣ᤹ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤔᤧᤈᤢᤰᤏᤧᤴ॥ ᤁᤸᤗᤧ ᤂᤧᤴ ᤜᤠᤱᤈᤢᤶᤜᤠ᤹ ᤁᤧᤖᤧᤰ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡᤀᤠᤱ ᤏᤢᤵᤛᤢᤛᤡ᤹. ᤁᤖ ᤂᤧᤴ ᤜᤠᤱᤈᤢᤶᤔᤡᤴ ᤛᤍᤠᤍᤡᤱ ᤀᤠᤓᤧᤸᤗᤧᤀᤠᤱ ᤔᤧᤏᤢᤵᤏᤧᤴ॥ 45 ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤡᤸᤗᤧ ᤔᤧᤴᤇᤢᤀᤣ ᤕᤠᤰᤐᤣ᤹ᤀᤥᤗᤠᤶ ᤂᤰᤋᤧ ᤕᤧᤒᤠ ᤗᤢᤱᤅᤡᤸᤗᤧ ᤑᤧᤴᤈᤣ᤹. ᤁᤠᤛᤠ. ᤐᤛᤠᤰᤁᤧᤛᤠᤰᤐᤠ ᤂᤠᤶ. ᤕᤢᤵᤐᤠ ᤏᤢ ᤛᤠᤶᤔᤩᤠᤱᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤒᤠ ᤀᤠᤍᤠᤱᤒᤠᤖᤧ ᤁᤧᤏᤡᤛᤢᤒᤠ ᤗᤢᤱᤅᤡᤸᤗᤧ ᤁᤢᤒᤣᤴ ᤜᤠᤒᤠ ᤁᤴᤗᤥ॥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤍᤠᤒᤠ ᤕᤧᤶᤔᤥ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤐᤕᤶ ᤜᤠᤱᤅᤡᤴ ᤀᤥᤛᤣ᤺ᤴᤃᤧᤎᤠᤰᤋᤧᤀᤠᤱ ᤘᤠ᤹॥ ᤂᤧᤴ ᤛᤧᤵᤔᤠᤱᤅᤡᤴ ᤛᤧᤰᤂᤠᤒᤠ ᤏᤢ ᤂᤧᤸᤗᤧ ᤁᤢᤒᤣᤴ ᤏᤛᤠᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤆᤥᤰᤗᤥ॥” ᤜᤠᤱᤅᤡᤸᤗᤧ ᤍᤠᤏᤡᤀᤧᤗᤧᤴ ᤜᤠᤱᤛᤧᤶ ᤐᤡᤖᤢ 46 ᤂᤧᤒᤩᤠᤱ ᤏᤒᤢᤁᤍᤏᤣᤛᤖ ᤜᤠᤱᤅᤡᤴ ᤂᤠᤶᤒᤠᤱᤅᤥ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤍᤠᤏᤡᤀᤧᤗᤧᤴ ᤛᤧᤘᤠ ᤔᤧᤳᤋᤢ ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢ. ᤂᤧᤴᤏᤢ ᤛᤥᤛᤥᤖᤡᤰ ᤜᤢᤰᤘᤠᤕᤠᤱ ᤐᤡᤖᤧᤶᤔᤧ᤹. ᤛᤢᤰᤐᤠ ᤜᤠ᤺ᤴᤍᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ॥ 47 ᤜᤠᤱᤅᤡᤸᤗᤧ ᤍᤠᤏᤡᤀᤧᤗᤧᤴ ᤔᤧᤳᤋᤢ. “ᤛᤧᤰᤂᤠᤀᤣ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤜᤧᤰᤁᤩᤠᤱ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤍᤠᤱᤒᤠ ᤏᤢ ᤛᤡᤒᤡ᤹ ᤐᤠ᤺ᤴᤜᤠ᤹ᤖᤧ ᤁᤢᤒᤣ ᤁᤧᤜᤶᤒᤠ ᤆᤥ᤺ᤰᤗᤧᤳᤇ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤴ ᤛᤡᤒᤡ᤹ ᤐᤠ᤺ᤴᤏᤡᤸᤗᤧ ᤁᤢᤒᤣᤴ ᤜᤶᤔᤠ ᤁᤧᤛᤢᤰᤋᤢ॥” 48 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤍᤠᤏᤡᤀᤧᤗᤧᤴ ᤌᤥᤎᤥᤰᤐᤠ ᤋᤠᤰᤑᤠᤀᤥ ᤕᤢᤰᤂᤢᤀᤠᤱ ᤀᤡᤔᤧᤸᤗᤢᤱᤒᤠ ᤔᤡᤰᤋᤥ᤺ᤰᤜᤠ᤹ ᤐᤡᤖᤢ॥ ᤜᤠᤱᤅᤡᤸᤗᤧ ᤂᤢᤏᤧ᤹ ᤒᤣᤒᤡᤗᤥᤏᤒᤠ ᤋᤧᤱᤃᤵᤐᤥ ᤕᤢᤰᤛᤠᤒᤠ ᤆᤥᤃᤢ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤛᤡᤰᤁᤢᤶᤛᤠᤒᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤋᤢᤶ ᤗᤠᤶᤗᤥᤒᤠ ᤆᤥᤃᤢ॥ 49 ᤂᤧᤴᤏᤢ᤺ᤸᤗᤧ ᤘᤣ᤹ ᤍᤠᤏᤡᤀᤧᤗᤖᤧ ᤜᤠᤱᤅᤡᤴ ᤐᤣᤗᤡ ᤑᤠᤰᤋᤢ ᤜᤧᤰᤁᤩᤠᤱ ᤛᤍᤪᤁ. ᤔᤣᤛᤁ ᤏᤢ ᤀᤒᤣᤍ᤻ᤏᤃᤥᤴ ᤒᤣᤒᤡᤗᤥᤏ ᤋᤧᤱᤃᤵᤐᤥ ᤂᤧᤱᤜᤠ᤹ ᤜᤠᤱᤕᤢᤰᤐᤠ ᤕᤢᤰᤋᤡᤱ ᤆᤥᤃᤢᤛᤡ॥ ᤍᤠᤏᤡᤀᤧᤗᤧᤴ ᤀᤠᤒᤠᤅᤣ ᤜᤠᤱᤜᤡᤶᤔᤥᤀᤣ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.