᥈ ᤌᤡᤛ᤻ᤛᤗᤥᤏᤡᤁᤡ 3 - LIFOTNT

ᤐᤠᤘᤗ ᤋᤢᤘᤠᤖᤧ ᤁᤢᤓᤠ᤹ ᤏᤠ᤺ᤰ

¹ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤁᤢᤏᤢᤵᤔᤥ ᤀᤠᤏᤡᤃᤣ ᤕᤠ᤺ᤶᤒᤣᤀᤥ ᤋᤢᤘᤠ ᤆᤥᤃᤧᤶ ᤀᤠᤒᤡᤖᤧᤶᤔᤧ᤹ ᤑᤠ᤹ᤀᤠᤱ ᤔᤧᤳᤋᤠᤛᤡᤃᤧ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤍᤠᤱᤒᤠᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤁᤠᤰ ᤐᤡᤛᤠᤱ ᤜᤠᤖᤠ ᤛᤧᤖ ᤜᤧᤰᤁᤩᤠᤱ ᤂᤡᤏᤡ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤖᤢᤶᤒᤠ ᤜᤧᤰᤁᤣᤀᤣ ᤘᤣ᤹ᤜᤠ᤹ᤖᤧᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤖᤖᤥ॥

² ᤀᤠᤏᤡᤃᤣ ᤋᤠᤵᤑᤧ᤺ᤶᤒᤠ ᤏᤢ ᤁᤢ᤹ᤀᤡ ᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤵᤔᤡ ᤋᤠᤱᤛᤧ᤺ᤵᤋᤡᤃᤧᤖ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶ ᤀᤠᤒᤡᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧᤃ ᤛᤢᤏᤠᤀᤡᤱᤅᤡᤴ ᤏᤛᤠᤴ ᤔᤧᤴᤈᤥᤃᤢᤴᤗᤥ॥

³ ᤁᤖ ᤍᤠᤱᤒᤠᤱᤃ ᤏᤛᤠ᤺ᤴᤛᤠᤒᤠ ᤆᤥᤰᤗᤥ॥ ᤂᤢᤏᤧ᤹ᤀᤣ ᤂᤡᤏᤡ᤹ ᤁᤢ᤹ᤀᤡᤃᤧᤓᤧ᤹ᤒᤠ ᤔᤠᤑᤧᤴᤛᤠᤶᤔᤥᤗᤠᤶ ᤋᤠᤱᤃᤧᤛᤧ᤺ᤵᤋᤡᤀᤠᤱ ᤁᤧᤎᤢᤶᤒᤠ ᤁᤧᤈᤥᤃᤡ᤹ᤖᤥ॥

⁴ ᤜᤧᤰᤁᤩᤠᤱ ᤀᤠᤏᤡᤃᤣ ᤜᤢ᤹ᤀᤠᤛᤡᤃᤧᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤈᤥᤃᤢᤶ ᤜᤧᤰᤁᤩᤠᤱ ᤁᤧᤍᤠᤒᤠ ᤕᤧᤶᤔᤥᤀᤠᤱ ᤁᤧᤈᤥᤃᤢᤶ ᤁᤧᤗ᤹ᤒᤠ ᤍᤠᤱᤒᤠᤀᤥ ᤋᤠ᤺ᤰᤐᤥ ᤆᤥ᤺ᤰᤁᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥

⁵ ᤜᤠᤖᤠ᤹ ᤍᤠᤱᤒᤠᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡ᤺ᤶᤈᤡ ᤏᤢ ᤂᤪᤡᤛ᤻ᤋᤖᤧ ᤁᤧᤒᤡᤖᤡᤒᤠ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤥ ᤗᤠᤶᤃᤧᤗᤥᤛᤡᤖᤖᤥ॥

ᤗᤧᤶᤛᤫᤠᤒᤠᤜᤠ᤹ ᤛᤠᤶᤍᤡᤱ

⁶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤡᤸᤗᤧ ᤀᤠᤏᤡᤃᤣ ᤂᤡᤏᤡ᤹ ᤀᤡᤱᤈᤠᤱ ᤐᤡᤀᤠᤛᤡᤃᤧ᤹ᤖᤥ॥ ᤀᤠᤳᤋᤡᤴ ᤗᤧᤶᤛᤫᤠᤒᤠ ᤆᤥ᤺ᤰᤁᤠᤱ ᤀᤠᤏᤡᤃᤣ ᤀᤥ᤺ᤴᤎᤠᤰ ᤐᤡᤖᤢᤶᤒᤧᤒᤠ ᤐᤠ᤺ᤴᤏᤥ ᤔᤧᤒᤳᤏᤧᤴ. ᤂᤧᤴᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥

⁷ ᤀᤠᤏᤡᤃᤣ ᤂᤡᤏᤡ᤹ᤏᤢ ᤘᤕᤡᤃᤧᤸᤗᤧ ᤀᤠᤰᤂᤣᤗ᤹ᤖᤡᤰ ᤀᤠᤏᤡᤃᤣ ᤆᤥ᤺ᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱ ᤁᤧᤗ᤹ᤒᤠᤴ ᤏᤢᤖᤡᤰᤁᤠᤱ ᤁᤧᤏᤡᤛᤢᤶᤗᤥ॥ ᤀᤠᤏᤡᤃᤧᤃ ᤂᤡᤏᤡ᤹ᤏᤢ ᤘᤕᤡᤃᤧᤸᤗᤧ ᤗᤧᤶᤛᤫᤠᤒᤠ ᤔᤧᤈᤥᤃᤡᤃᤧᤴ.

⁸ ᤜᤧᤰᤁᤩᤠᤱ ᤀᤠᤏᤡᤃᤣ ᤔᤏᤠᤜᤠ᤹ᤖᤧ ᤔᤧᤒᤡᤖᤡᤃᤧᤒᤠ ᤆᤠᤔᤠ ᤌᤢᤱᤔᤠᤴ ᤁᤢᤔᤧᤸᤗᤢᤱ ᤔᤧᤴᤜᤢᤱᤅᤣ ᤜᤏᤧ ᤔᤧᤈᤠᤶᤒᤧᤴ ᤔᤧᤎᤢᤅᤢᤶᤒᤧᤴᤗᤥ॥ ᤁᤖ ᤂᤡᤏᤡ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤛᤡᤃᤧᤴᤗ ᤑᤠ᤹ᤀᤠᤱ ᤀᤠᤏᤡᤃᤣ ᤛᤧᤴᤍᤡᤰ ᤗᤧᤴᤍᤡᤰ ᤕᤠᤶᤒᤢᤎᤡᤰᤐᤠ ᤐᤥ᤺ᤰᤂᤡᤃᤧᤀᤠᤱ ᤕᤠ᤺ᤶᤒᤰ ᤆᤥᤃᤢᤶᤒᤧᤖᤥ॥

⁹ ᤀᤠᤏᤡᤃᤣ ᤜᤧᤰᤁᤣᤗ᤹ᤖᤡᤰ ᤕᤠ᤺ᤶᤒᤰ ᤆᤥᤃᤢᤶᤒᤧᤒᤠᤱᤃ ᤁᤢᤓᤠ᤹ ᤂᤥᤔᤠ ᤗᤠᤄᤥ ᤔᤧᤃᤳᤋᤢᤶᤒᤧᤴᤏᤠᤱ ᤔᤣ᤺ᤴ. ᤁᤖ ᤂᤡᤏᤡ᤹ ᤗᤠᤃᤡ ᤁᤢᤒᤡ ᤐᤥᤱᤅᤠᤱ ᤂᤡᤏᤡ᤹ ᤕᤠᤵᤔᤡ ᤆᤥ᤺ᤱ ᤁᤧᤀᤡ᤺ᤳᤋᤡᤖ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢᤶᤒᤧᤒᤠᤖᤥ॥

¹⁰ ᤂᤡᤏᤡ᤹ᤏᤢ ᤘᤕᤡᤃᤧᤸᤛᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤴᤍᤧᤶᤔᤏᤠᤒᤠᤸᤗᤧ ᤜᤠᤖᤠ᤹ ᤆᤠᤀᤠᤱ ᤔᤧᤈᤏᤧᤴᤗ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤀᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥

¹¹ ᤌᤣᤀᤠᤱ ᤁᤴ ᤐᤠ᤺ᤴᤜᤠ᤹ ᤔᤧᤳᤋᤠᤛᤡᤃᤧᤒᤠ ᤑᤠ᤹ᤗᤧ ᤂᤡᤏᤡ᤹ ᤗᤢᤶᤔᤥ ᤕᤠ᤺ᤶᤒᤰ ᤔᤧᤴᤈᤥ᤺ᤰᤔᤏᤠᤒᤠ ᤁᤢᤓᤠ ᤗᤧᤶᤛᤫᤠᤒᤠ ᤔᤏᤠᤜᤠ᤹ ᤔᤧᤘᤠ᤹॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤥ ᤏᤢ ᤐᤠ᤺ᤴᤏᤥᤖᤰ ᤜᤢᤰᤔᤧᤃᤣ᤺ᤳᤋᤢ ᤁᤧᤗ᤹ᤒᤠᤴ ᤂᤧᤵᤛᤢᤶᤒᤧᤀᤠᤱ ᤘᤕᤡᤃᤧᤖᤥ॥

¹² ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤀᤡᤱᤈᤠᤱᤃᤧᤴ ᤛᤠᤶᤍᤡᤱ ᤂᤧᤱᤜᤠ᤹ ᤐᤡᤖᤢᤶᤛᤡᤶᤒᤧ᤹—ᤂᤧᤱᤜᤠ᤹ᤖᤧ ᤘᤣ᤹ᤜᤠ᤹ ᤔᤧᤴᤜᤶᤛᤡᤱᤅᤣ ᤀᤠᤒᤠᤅᤣ ᤕᤠ᤺ᤶᤒᤰ ᤔᤧᤈᤥ᤺ᤰᤁᤠᤱ ᤔᤧᤈᤖ॥

¹³ ᤁᤖ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤡᤱᤛᤠᤶᤔᤥ ᤂᤡᤏᤡ᤹ ᤁᤧᤘᤕᤡᤛᤠᤱ ᤛᤢᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤵᤑᤠᤸᤗᤧᤀᤠᤱ ᤔᤧᤏᤠᤛᤧᤶᤔᤡᤴᤏᤧ᤹ᤀᤥ॥

¹⁴ ᤀᤠᤏᤡᤃᤣ ᤁᤴ ᤛᤰᤀᤡᤱᤄᤱ ᤛᤠᤵᤋᤢᤶᤒᤧᤒᤠ ᤐᤠᤴ ᤔᤧᤱᤄᤧᤶᤔᤏᤠ ᤔᤏᤠᤴ ᤂᤡᤏᤡ᤹ ᤗᤢᤶᤔᤥ ᤘᤠ᤹ᤏᤧ ᤑᤠ᤹ᤃᤪ ᤂᤧᤴ ᤏᤢᤖᤡᤰᤁᤠᤱ ᤔᤡᤰᤆᤥ ᤔᤧᤳᤋᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤴ ᤛᤡᤖᤡᤱ ᤔᤖ ᤑᤠ᤹ᤀᤠᤱ ᤂᤧᤴᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥

¹⁵ ᤜᤧᤰᤁᤣᤛᤠᤱ ᤂᤧᤴ ᤏᤡᤱᤔᤡ ᤜᤧᤰᤁᤣᤃ ᤔᤣ᤺ᤴ. ᤁᤖ ᤀᤠᤒᤠᤅᤣ ᤑᤢ᤹ᤏᤢᤛᤠ᤹ ᤁᤢᤀᤡᤛᤡᤰ ᤀᤡ᤺ᤳᤋᤧᤶᤔᤧ᤹ᤖ ᤛᤠᤶᤍᤡᤱ ᤐᤡᤖᤧᤶᤔᤧ᤹ᤀᤥ॥

ᤁᤢᤏᤢᤵᤔᤠ ᤛᤣᤘᤠᤴ

¹⁶ ᤀᤠᤸᤗ ᤛᤏᤠᤖᤢᤱ ᤍᤠᤱᤒᤠᤸᤗᤧ ᤁᤠᤰ ᤐᤖᤡᤰᤗᤠᤶ ᤆᤰᤔᤧᤸᤗ᤹ᤀᤣ ᤛᤏᤠᤖᤢᤱ ᤁᤧᤒᤡᤖᤡᤖ॥ ᤍᤠᤱᤒᤠᤱᤃ ᤂᤡᤏᤡ᤹ ᤁᤧᤖᤧᤰᤏᤢ ᤘᤠ᤹ᤖᤖᤥ॥

¹⁷ ᤀᤡᤱᤃᤠ᤹ ᤐᤠᤘᤗᤖᤧ ᤁᤴ ᤛᤣᤘᤠᤴ ᤀᤠᤒᤠᤅᤣ ᤀᤠᤜᤢᤰᤁᤡᤸᤗᤧ ᤛᤠᤵᤋᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤡᤱᤃᤠ᤹ ᤀᤠᤛᤰᤀᤡᤱᤄᤱᤅᤡᤸᤗᤧᤴ ᤔᤡᤰᤛᤣ᤺ᤴᤏᤡᤴ ᤒᤠ ᤁᤴᤗᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤛᤠᤵᤋᤢᤱᤗ ᤐᤳᤋᤠᤖᤥ॥

¹⁸ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ ᤁᤧᤖᤧᤰᤏᤢ ᤘᤠ᤹ᤖᤥ॥