᥈ ᤌᤡᤛ᤻ᤛᤗᤥᤏᤡᤁᤡ 2 - LIFOTNT

ᤍᤠᤱᤒᤠᤴ ᤏᤢ᤺ᤱᤔᤠ ᤕᤢ᤺ᤔᤠ ᤋᤃᤡᤒᤠ ᤜᤡᤴᤍᤥᤰᤜᤠ᤹

^1-2 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤏᤢ᤺ᤱᤔᤠ ᤕᤢᤔᤧᤴ ᤏᤢ ᤂᤢᤏᤧ᤹ᤀᤥ ᤀᤠᤏᤡ᤹ ᤁᤠᤰ ᤏᤛᤠᤏᤡᤒᤠ ᤑᤢᤱᤛᤡᤱᤔᤠᤸᤗᤧ ᤁᤢᤕᤠ᤺ᤶᤒᤣᤀᤥ. ᤍᤠᤱᤒᤠᤖᤧ ᤁᤢᤕᤢ᤺ᤔᤧᤴ ᤐᤥ᤺ᤰᤂᤧ ᤆᤢᤖᤧ ᤑᤠ᤹ᤀᤠᤱ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤵᤔᤠᤀᤠᤱ ᤗᤢᤱᤔᤠ᤹ ᤛᤥ᤺ᤶᤔᤠ ᤔᤣ᤺ᤴᤗᤥ ᤗ᤹ᤖᤡᤰ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥ ᤜᤧᤰᤁᤣᤗ᤹ᤖᤡᤰ ᤁᤢᤓᤠᤖᤧᤃ ᤀᤠᤏᤡᤃᤧᤗᤠᤶᤒᤠ ᤁᤧᤍᤠᤒᤠ ᤔᤠᤱᤏᤡᤱᤘᤠ᤹ᤐᤠᤴ. ᤀᤡᤱᤓᤴ. ᤜᤧᤰᤁᤩᤠᤱ ᤛᤠᤵᤋᤢᤶᤒᤧᤒᤠ ᤛᤰᤀᤡᤱᤄᤱᤅᤡᤸᤗᤧ ᤁᤢᤒᤣᤴ ᤐᤡᤷᤒᤣ᤺ᤴ ᤔᤧᤀᤡ᤺ᤳᤋᤢ ᤔᤧᤒᤠ᤺ᤳᤋᤢᤖᤥ॥

³ ᤁᤖ ᤀᤰᤂᤣᤗ᤹ᤖᤡᤰ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤀᤡᤱᤗᤧᤰ ᤁᤧᤔᤧᤶᤔᤧᤳᤋᤡᤴᤗ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤡᤴ ᤔᤧᤴᤍᤠᤀᤣ ᤘᤠ᤹ᤖᤥ॥ ᤂᤧᤴ ᤕᤧᤶᤔᤡᤴ ᤋᤠᤔᤠᤏᤢ᤺ᤸᤗᤧ ᤋᤃᤡᤃ ᤁᤢᤏᤢᤵᤔᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤕᤶ ᤒᤡᤑᤩᤢᤱ ᤐᤥᤱ. ᤜᤧᤰᤁᤩᤠᤱ ᤐᤕᤶ ᤗᤠᤕᤥ ᤁᤧᤈᤥ᤺ᤰᤐᤠ ᤐᤠᤰᤁᤢᤶᤓᤡᤀᤥ ᤁᤧᤒᤣ᤺ᤰᤐᤠ ᤔᤏᤠᤴ ᤌᤠ᤺ᤶᤛᤡᤱᤗᤥ॥

⁴ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱ ᤏᤢ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤛᤧᤘᤠ ᤔᤧᤈᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤳᤋᤢᤛᤡᤀᤠᤱ ᤁᤠᤰᤏᤢ᤺ᤸᤗᤧ ᤕᤶᤒᤠ ᤗᤧᤱᤛᤡᤱᤗᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ ᤗ᤹ᤖᤡᤰ ᤔᤧᤳᤇᤡᤱᤗ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤥ ᤗᤠ᤺ᤳᤋᤠᤱ ᤕᤢᤱᤛᤡᤱᤗᤥ॥

⁵ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤕᤠᤱᤅᤡᤸᤗᤧᤛᤠ ᤔᤧᤳᤏᤡᤱᤒᤠ ᤁᤴ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤁᤧᤴᤀᤡ᤺ᤳᤋᤢᤶᤔᤡᤴᤒᤡ᥅

⁶ ᤐᤕᤶ ᤗᤠᤕᤥ ᤁᤧᤈᤥᤰᤐᤧᤴ ᤜᤠᤖᤠ᤹ ᤁᤢᤕᤧᤶ ᤁᤧᤳᤋᤠᤱᤗᤰ ᤌᤠ᤺ᤶᤛᤡᤱᤗ ᤑᤠ᤹ᤀᤠᤱ ᤁᤢᤗᤠᤶ ᤁᤧᤛᤠᤰᤐᤧᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤣᤖᤥ॥

⁷ ᤋᤃᤡᤏᤢᤀᤣ ᤗᤠᤕᤥᤸᤗᤧ ᤛᤡᤃᤠᤱᤃᤧᤴ ᤔᤢᤰᤛᤠᤶᤔᤡᤴ ᤕᤠ᤺ᤶᤒᤰ ᤆᤥ᤺ᤰᤏᤢ ᤕᤠᤰ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤗᤠᤶ ᤁᤧᤛᤠᤰᤐᤧᤴ ᤁᤢᤗᤠᤶᤔᤥᤗᤠᤶ ᤔᤧᤱᤄᤧᤳᤋᤣ ᤌᤠᤖᤡᤰ ᤂᤧᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤗᤠ᤺ᤰᤁᤠᤳ ᤔᤧᤎᤠ᤺ᤵᤏᤧᤴᤗᤥ॥

⁸ ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤗᤠᤕᤥ ᤁᤧᤈᤥᤰᤐᤧᤴ ᤌᤠ᤺ᤶᤛᤡᤱᤗᤥ॥ ᤁᤖ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤛᤠ᤺ᤱᤃᤢᤃᤧᤴ ᤛᤰᤔᤠ᤺ᤸᤗᤧ ᤔᤢ᤺ᤳᤋᤢ ᤛᤧᤖᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤢᤔᤠᤸᤗᤧ ᤔᤡᤔᤡᤍᤡᤱᤃᤧᤴ ᤁᤢᤀᤥ᤺ᤴᤎᤠᤰᤁᤡᤸᤗᤧ ᤂᤧᤴ ᤔᤧᤶᤓᤤ ᤆᤥᤃᤢᤖᤥ॥

⁹ ᤐᤕᤶ ᤗᤠᤕᤥ ᤁᤧᤈᤥ᤺ᤰᤐᤧᤸᤗᤧ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤕᤖᤡᤰ ᤐᤖᤡᤰᤗᤧᤴ ᤑᤥᤋᤩᤠᤒᤠ ᤔᤡᤰᤛᤣᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤖ ᤋᤠᤖᤥ॥

¹⁰ ᤂᤧᤸᤗᤧ ᤔᤧᤶᤓᤤ ᤁᤧᤒᤥᤱᤒᤠᤜᤠ᤹ ᤁᤠᤰ ᤐᤖᤡᤰᤗᤧᤴ ᤑᤧᤴᤕᤠ᤺ᤶᤒᤰᤜᤠ᤹ᤖᤧ ᤀᤡᤱᤗᤧᤰ ᤔᤧᤳᤋᤢᤛᤡ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤛᤧᤰᤂᤠᤴ ᤔᤡ᤺ᤶᤈᤡ ᤔᤧᤵᤔᤠᤖ ᤋᤠᤱᤛᤧ᤺ᤵᤛᤡᤱᤔᤠ ᤔᤧᤏᤠ᤹ᤖᤢᤀᤠᤱ ᤔᤧᤘᤠ᤹ᤖᤥ॥

¹¹ ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤖᤠ᤹ ᤀᤡᤱᤗᤧᤰᤁᤡᤴ ᤏᤛᤠᤴ ᤔᤧᤈᤥᤃᤢᤖ ᤑᤠ᤹ᤀᤠᤱ ᤂᤧᤱᤜᤠ᤹ᤀᤥ ᤀᤡᤱᤗᤧᤰᤁᤣ ᤔᤢᤰᤛᤠᤶᤔᤡᤴ ᤐᤠᤱᤄᤢᤖᤥ॥

¹² ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤧᤰᤂᤠᤴ ᤏᤛᤠᤴ ᤔᤧᤴᤈᤥᤃᤢᤴ. ᤁᤖ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤀᤣ ᤂᤢᤏᤡ᤹ ᤛᤡᤖᤠ᤹ᤌᤠᤱᤗᤥ. ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤶᤍᤡᤱ ᤔᤧᤄᤥᤛᤢ᤹ᤖᤥ॥

ᤏᤛᤠ᤺ᤴᤏᤥ ᤔᤧᤶᤔᤢᤴᤏᤣ ᤘᤠ᤹ᤔᤠ

¹³ ᤍᤠᤱᤒᤠᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤣ ᤛᤍᤠᤍᤡᤱ ᤏᤥᤃᤧᤴ ᤐᤡᤔᤠᤀᤣ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤋᤥᤗᤡᤱᤛᤥᤔᤢᤀᤠᤱᤎᤥᤀᤣ ᤛᤣᤛᤣᤔᤠᤱᤅᤡᤸᤗᤧ ᤛᤣᤛᤣᤃᤧᤴ ᤛᤢᤳᤌᤥ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤗᤠᤶ ᤏᤢ ᤛᤧᤰᤂᤠᤀᤥ ᤏᤛᤠᤴ ᤆᤥ᤺ᤰᤔᤠᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤋᤠᤱᤛᤧ᤺ᤵᤛᤡᤱᤔᤠ ᤑᤠ᤹ᤀᤠᤱ ᤁᤧᤛᤣᤃᤡᤖᤥ॥

¹⁴ ᤒᤠ ᤁᤴ ᤐᤠ᤺ᤴᤏᤡᤸᤗᤧ ᤗᤠᤃᤡ ᤀᤠᤏᤡᤃᤣ ᤀᤡᤱᤓᤥᤛᤢᤶᤒᤧᤒᤠ ᤛᤢᤏᤠᤀᤡᤱᤗᤠᤶ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤔᤡᤍᤡᤱᤅᤡᤴ ᤁᤧᤄᤥᤛᤢᤶᤗ ᤑᤠ᤹ᤀᤠᤱ ᤁᤧᤀᤢ᤺ᤳᤋᤡᤒᤠᤖᤥ॥

¹⁵ ᤂᤧᤸᤗᤧᤆᤥᤃᤢᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤀᤠᤏᤡᤃᤣ ᤐᤠ᤺ᤳᤋᤢᤶᤒᤧᤒᤠ ᤐᤣᤗᤡᤃᤧᤴ ᤐᤠ᤺ᤴᤈᤠᤰᤁᤡᤴ ᤏᤢ ᤛᤰᤀᤡᤱᤄᤱᤗᤠᤶᤒᤠ ᤁᤧᤄᤥᤛᤢᤶᤒᤠ ᤏᤡᤛᤠᤶᤔᤡᤴ ᤋᤰᤋᤧᤶᤔᤧ᤹ᤀᤥ॥

¹⁶ ᤀᤠᤸᤗ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋ ᤏᤢ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤁᤢᤗᤢᤱᤃᤢᤶᤒᤠ ᤔᤧᤴᤏᤢᤵᤔᤏᤠᤒᤠ ᤜᤠᤱᤜᤠᤱ ᤏᤢ ᤐᤏᤢᤏᤢᤒᤠ ᤏᤡᤱᤛᤠᤱᤅᤡᤴ ᤀᤠᤒᤡᤖᤧᤖᤥ॥

¹⁷ ᤂᤢᤏᤧ᤹ᤀᤣ ᤂᤡᤏᤡ᤹ ᤜᤠᤱᤜᤠᤱ ᤁᤧᤔᤧᤳᤋᤡᤖ ᤜᤧᤰᤁᤩᤠᤱ ᤁᤠᤰ ᤁᤧᤈᤥᤃᤢᤶᤒᤠ ᤏᤢᤒᤠ ᤕᤠ᤺ᤶᤒᤰᤁᤥ ᤏᤢ ᤁᤧᤒᤠ᤺ᤳᤋᤢᤶᤒᤠ ᤐᤠ᤺ᤴᤏᤥ ᤁᤧᤎᤢᤶᤒᤠ ᤁᤧᤈᤥᤃᤡᤖᤖᤥ॥