᥈ ᤛᤠᤔᤢᤀᤧᤗ 9 - LIFOTNT

ᤍᤠᤀᤢᤍ ᤏᤢ ᤔᤐᤡᤒᤥᤛᤣᤋ

¹ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤛᤣ᤺ᤴᤍᤥᤛᤢᤛᤡ. “ᤛᤠᤘᤗᤖᤧ ᤁᤢᤜᤡᤶᤛᤕᤱᤀᤥ ᤀᤠᤸᤗᤛᤠᤱ ᤁᤢᤓᤠ ᤜᤡᤅᤧᤀᤠᤱ ᤘᤠ᤹ᤒᤡ᥅ ᤁᤢᤓᤠ ᤜᤡᤅᤧᤀᤠᤱ ᤘᤠ᤹ᤏᤧᤓᤃᤪ ᤈᤥᤏᤠᤌᤠᤏᤖᤧ ᤁᤢᤗᤧᤰᤘᤠ ᤀᤠᤱᤃᤠ᤹ ᤂᤧᤴᤏᤢ ᤏᤛᤠ᤺ᤴᤛᤠᤒᤠ ᤐᤥᤱᤅᤠᤀᤠᤱ ᤗᤢᤱᤔᤠ᤹ ᤋᤢᤰᤋᤢᤱ᤹॥”

² ᤀᤠᤸᤗ ᤛᤠᤘᤗᤖᤧ ᤁᤢᤜᤡᤶᤛᤕᤱᤅᤥ ᤛᤡᤘᤠ ᤔᤧᤵᤏᤠᤒᤠ ᤗᤳᤇᤠ ᤛᤣᤘᤠᤖᤥᤒᤠᤎᤡᤰ ᤘᤕᤧ॥ ᤜᤧᤰᤁᤩᤠᤱ ᤂᤧᤴ ᤍᤠᤀᤢᤍᤖᤧ᤹ᤀᤥ ᤔᤧᤀᤢ᤺ᤳᤋᤢ॥ ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤛᤡᤘᤠᤏᤧᤒᤡ᥅” ᤂᤧᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤛᤡᤒᤠᤴ ᤀᤠᤱᤃᤠ᤹ᤀᤣᤖᤥ॥”

³ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤐᤠ᤺ᤳᤋᤢ. “ᤛᤠᤘᤗᤖᤧ ᤁᤢᤜᤡᤶᤛᤕᤱᤀᤥ ᤜᤠᤳ ᤁᤢᤜᤡᤱᤘᤧᤳ ᤘᤠ᤹ᤒᤣ᥅ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤆᤥᤃᤢᤱᤒᤠ ᤔᤠᤱᤜᤢᤵ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤧᤴ ᤗᤢᤱᤔᤠ᤹ ᤋᤢᤰᤋᤢᤱ᤹॥” ᤛᤡᤒᤠ᤺ᤸᤗᤧ ᤔᤧᤳᤋᤢ. “ᤀᤥᤖᤥ. ᤈᤥᤏᤠᤌᤠᤏᤖᤧ ᤗᤳᤇᤠ ᤁᤢᤛ᤻ᤛᤠ ᤘᤠ᤹॥ ᤂᤧᤸᤗᤧ ᤏᤧᤵᤔᤠᤱ ᤁᤢᤗᤠᤱ ᤁᤧᤛᤰᤐᤠ ᤆᤥᤰ॥”

⁴ ᤜᤠᤱᤅᤡᤸᤗᤧ ᤛᤣ᤺ᤴᤍᤥᤛᤢ. “ᤂᤢᤏᤧ᤹ ᤀᤠᤳᤋᤠᤴ ᤘᤠ᤹᥅” ᤜᤧᤰᤁᤩᤠᤱ ᤛᤡᤒᤠ᤺ᤸᤗᤧ ᤔᤧᤳᤋᤢ. “ᤂᤢᤏᤧ᤹ ᤗᤥ-ᤍᤣᤒᤠᤖ ᤔᤧᤵᤏᤠᤒᤠ ᤋᤧᤴᤏᤥ ᤀᤔᤡᤀᤣᤗᤖᤧ ᤁᤢᤛ᤻ᤛᤠ ᤔᤠᤁᤡᤖᤖᤧ ᤁᤢᤜᤡᤶᤔᤥ ᤘᤠ᤹॥”

⁵ ᤂᤧᤸᤗᤧᤆᤥᤃᤢᤸᤗᤧ ᤜᤠᤱᤅᤡᤸᤗᤧ ᤗᤥ-ᤍᤣᤒᤠᤖᤀᤥ ᤔᤏᤠ ᤐᤠᤱᤄᤢᤛᤡᤀᤠᤱ ᤀᤔᤡᤀᤣᤗᤖᤧ ᤁᤢᤛ᤻ᤛᤠ ᤔᤠᤁᤡᤖᤖᤧ ᤁᤢᤜᤡᤶᤔᤥᤗᤠᤶ ᤂᤧᤴ ᤔᤧᤍᤠᤖᤢ॥

⁶ ᤛᤠᤘᤗᤖᤧ ᤁᤢᤶᤔᤧᤴᤇᤠ᤹ ᤈᤥᤏᤠᤌᤠᤏᤖᤧ ᤁᤢᤛ᤻ᤛᤠ ᤔᤐᤡᤒᤥᤛᤣᤋᤧᤴ ᤍᤠᤀᤢᤍᤖᤧ᤹ᤀᤥ ᤁᤧᤖᤧ. ᤜᤧᤰᤁᤩᤠᤱ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤜᤠᤱᤅᤡᤴ ᤛᤧᤘᤠ ᤔᤧᤳᤋᤢ॥ ᤍᤠᤀᤢᤍᤖᤧ ᤔᤧᤳᤋᤢ. “ᤔᤐᤡᤒᤥᤛᤣᤋᤀᤣ᥄” ᤂᤧᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤴ ᤁᤵᤔᤥ ᤘᤠ᤹ᤀᤠᤖᤥ॥”

⁷ ᤍᤠᤀᤢᤍᤖᤧ ᤐᤠ᤺ᤳᤋᤢ. “ᤔᤧᤃᤡᤛᤧᤴᤏᤧ᤹॥ ᤂᤧᤏᤧ᤹ ᤁᤧᤶᤒᤠ ᤈᤥᤏᤠᤌᤠᤏᤖᤧ ᤁᤢᤗᤧᤰᤘᤠ ᤗᤢᤱᤔᤠ᤹ ᤋᤢᤰᤏᤧ॥ ᤀᤠᤱᤃᤠ᤹ ᤁᤧᤴᤎᤧᤒᤠ ᤛᤠᤘᤗᤖᤧ ᤁᤧᤖᤧᤰ ᤁᤢᤗᤠᤈᤣ᤹ ᤁᤢᤛᤡᤱᤒᤢᤱᤜᤠ᤹ ᤏᤢ᤺ᤰᤋᤢᤱ ᤐᤡᤏᤧ॥ ᤂᤧᤏᤧ᤹ ᤜᤠᤱᤅᤡᤸᤗᤧ ᤁᤢᤈᤠ ᤆᤠᤈᤠᤔᤠᤍᤧᤴᤏᤥ ᤀᤠᤱᤃᤠ᤹ᤏᤢ ᤁᤧᤕᤢᤱᤅᤠᤱ ᤀᤠᤓᤧᤸᤗᤧᤛᤠᤱ ᤁᤧᤈᤖᤥ॥”

⁸ ᤔᤐᤡᤒᤥᤛᤣᤋᤖᤧ ᤕᤠᤶᤔᤥ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢᤖ ᤐᤠ᤺ᤳᤋᤢ. “ᤀᤠᤱᤃᤠ᤹ ᤜᤠ᤺ᤳᤋᤠᤀᤠᤱᤒᤣ᥅ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤩᤠᤒᤠ ᤜᤧᤰᤋᤱᤒᤠ ᤁᤧᤛᤡᤒᤠ ᤔᤏᤠᤴ ᤀᤠᤍᤠᤱᤒᤠᤖᤧ ᤌᤣᤀᤠᤱ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠᤒᤣ᥅”

⁹ ᤂᤧᤒᤩᤠᤱ ᤍᤠᤀᤢᤍᤖᤧ ᤛᤠᤘᤗᤖᤧ ᤁᤢᤛᤧᤘᤠᤖᤥᤒᤠ ᤛᤡᤒᤠ᤺ᤴ ᤂᤢᤏᤧ᤹ᤀᤥ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤁᤧᤴᤍᤠᤱᤒᤠᤸᤗᤧ ᤁᤢᤶᤔᤧᤴᤇᤠ᤹ᤀᤡᤴ ᤛᤠᤘᤗ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤒᤠ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤴ ᤀᤠᤸᤗᤥᤛᤠ ᤐᤡᤖᤢᤱᤗ ᤐᤳᤋᤠ॥

¹⁰ ᤜᤧᤰᤁᤩᤠᤱ ᤂᤧᤏᤧ᤹. ᤁᤧᤛ᤻ᤛᤠᤜᤠ᤹ ᤏᤢ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ ᤂᤢᤏᤧ᤹ ᤁᤢᤗᤠᤈᤣ᤹ ᤁᤢᤛᤡᤱᤒᤢᤱᤅᤥ ᤕᤠᤴ ᤁᤧᤔᤕᤡᤀᤠᤱ ᤂᤧᤴ ᤗᤠᤶᤒᤠ ᤁᤧᤎᤥ᤺ᤰᤐᤠ ᤁᤢᤈᤠᤴ ᤁᤧᤴᤍᤠᤱᤒᤠᤸᤗᤧ ᤁᤢᤛᤢᤘᤠᤱᤅᤡᤴ ᤐᤡᤔᤠ ᤐᤥᤱ᤹॥ ᤜᤧᤰᤁᤩᤠᤱ ᤔᤐᤡᤒᤥᤛᤣᤋ. ᤂᤧᤏᤧ᤹ ᤁᤧᤴᤍᤠᤱᤒᤠᤸᤗᤧ ᤁᤢᤶᤔᤧᤴᤇᤠ᤹ᤀᤡᤸᤗᤧ ᤀᤠᤱᤃᤠ᤹ᤏᤢ ᤕᤢᤱᤅᤠᤱ ᤆ᤹᤺॥” (ᤛᤡᤒᤠᤖᤧ ᤌᤡᤒᤥᤱᤅᤠᤱ ᤅᤠᤛᤡ ᤁᤢᤛ᤻ᤛᤠ ᤏᤢ ᤏᤡᤒᤥᤱ ᤁᤢᤛᤧᤘᤠᤖᤥᤒᤠ ᤔᤧᤘᤕᤧ॥)

¹¹ ᤜᤧᤰᤁᤩᤠᤱ ᤛᤡᤒᤠ᤺ᤸᤗᤧ ᤜᤠᤱᤅᤡᤴ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤀᤡᤱᤈᤠᤱ ᤁᤧᤒᤡᤖᤠᤱᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤁᤧᤖᤧᤰ ᤆᤥᤃᤢᤱ᤹॥” ᤂᤧᤸᤗᤧᤆᤥᤃᤢᤸᤗᤧᤀᤣ ᤜᤠᤱᤅᤡᤸᤗᤧ ᤁᤢᤛ᤻ᤛᤠᤜᤠ᤹ᤀᤥ ᤗᤳᤇᤠ ᤜᤠᤱᤛᤠ ᤁᤢᤀᤡᤛᤡᤰ ᤔᤐᤡᤒᤥᤛᤣᤋᤖᤧ ᤍᤠᤀᤢᤍᤧᤴᤏᤢ ᤛᤥᤖᤡᤰ ᤆᤠᤔᤠ ᤜᤣ᤺ᤰᤋᤢ॥

¹² ᤔᤐᤡᤒᤥᤛᤣᤋᤖᤧ ᤔᤡᤁᤠ ᤔᤧᤵᤏᤠᤒᤠ ᤗᤳᤇᤠ ᤆᤢᤰᤛᤠ ᤁᤢᤛ᤻ᤛᤠ ᤘᤕᤧ॥ ᤛᤡᤒᤠ᤺ᤴ ᤏᤢ ᤁᤢᤜᤡᤶᤛᤕᤱᤜᤠ᤹ ᤁᤧᤖᤧᤰ ᤔᤐᤡᤒᤥᤛᤣᤋᤖᤧ ᤁᤢᤛᤧᤘᤠᤖᤥᤒᤠ ᤔᤧᤒᤥ᤺ᤰᤂᤧ॥

¹³ ᤜᤧᤰᤁᤩᤠᤱ ᤔᤐᤡᤒᤥᤛᤣᤋᤧᤴ ᤕᤖᤢᤛᤗᤧᤔ ᤕᤢᤱᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤈᤠᤔᤠᤍᤧᤴᤏᤥ ᤜᤠᤱᤅᤡᤴᤏᤢᤀᤣ ᤕᤢᤅᤧᤀᤠᤱ ᤂᤢᤏᤧ᤹ ᤁᤢᤈᤠ ᤆ॥ ᤂᤢᤏᤧ᤹ ᤏᤧᤵᤔᤠᤱ ᤁᤢᤗᤠᤱ ᤁᤧᤛᤰᤐᤠ ᤘᤕᤧᤖᤥ॥