᥈ ᤛᤠᤔᤢᤀᤧᤗ 2 - LIFOTNTᤕᤜᤢᤍᤠ ᤗᤠᤈᤣ᤹ᤀᤥ ᤍᤠᤀᤢᤍᤧᤴ ᤜᤠᤱ ᤐᤥ᤺ᤰᤂᤧᤒᤠ 1 ᤁᤴ ᤀᤣᤃᤠᤱ ᤍᤠᤀᤢᤍᤖᤧ ᤕᤜᤘᤣ ᤍᤠᤱᤒᤧᤴ ᤀᤰᤂᤣ ᤔᤧᤳᤋᤢ. “ᤀᤠᤱᤃᤠ᤹ ᤕᤜᤢᤍᤠᤒᤠ ᤗᤳᤇᤠ ᤕᤧᤰᤕᤰᤁᤥ ᤐᤣ᤺ᤰᤁᤠᤒᤡ᥅” ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤌᤥ ᤐᤣᤃᤧ᤹॥” ᤍᤠᤀᤢᤍᤖᤧ ᤕᤠᤶᤔᤥ ᤛᤣ᤺ᤴᤍᤥᤛᤢ. “ᤀᤠᤳᤋᤡᤴ ᤕᤧᤰᤕᤰᤁᤥ ᤐᤣ᤺ᤰᤁᤠᤒᤣ᥅” ᤕᤜᤘᤣ ᤍᤠᤱᤒᤧᤸᤗᤧ ᤕᤠᤶᤔᤥ ᤏᤥᤃᤵ ᤐᤡᤖᤢ. “ᤌᤥ ᤜᤧᤒᤪᤥᤴᤏᤥ ᤐᤣᤃᤧ᤹॥” 2 ᤂᤧᤸᤗᤧᤆᤥᤃᤢᤸᤗᤧ ᤕᤡᤈᤖᤣᤗ ᤁᤧᤕᤢᤱᤔᤠ ᤍᤠᤀᤢᤍᤖᤧ ᤁᤢᤔᤣᤳ ᤀᤜᤡᤏᤥᤶᤔᤧᤴ ᤏᤢ ᤁᤠᤷᤔᤣᤗᤒᤠ ᤏᤠᤒᤠᤗᤖᤧ ᤁᤢᤔᤣᤔᤣᤍᤢᤔᤠ ᤀᤒᤡᤃᤣᤗᤧᤴ ᤂᤢᤏᤧ᤹ᤏᤢ ᤛᤥᤖᤡᤰ ᤋᤣ᤹ᤖᤢᤛᤡᤀᤠᤱ ᤂᤧᤵᤔᤥ ᤐᤣ॥ 3 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤢᤎᤰᤛᤢᤒᤠᤜᤠ᤹ᤀᤠᤱ ᤂᤢᤴᤇᤡ᤹ ᤔᤣ᤺ᤳ ᤛᤠᤜᤠ᤹ᤏᤢ ᤁᤧᤖᤧᤰ ᤋᤣ᤹ᤖᤢᤛᤡ. ᤂᤧᤒᤩᤠᤱ ᤂᤧᤱᤜᤠ᤹ ᤜᤣᤒᤪᤥᤏ ᤏᤢ ᤂᤧᤵᤔᤥᤒᤠ ᤕᤧᤰᤕᤰᤜᤠ᤹ᤀᤥ ᤕᤢᤱᤔᤠ ᤔᤧᤜᤣ᤺ᤰᤋᤧ॥ 4 ᤜᤧᤰᤁᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤍᤩᤧᤀᤠᤱ ᤕᤜᤢᤍᤠᤒᤠ ᤛᤢᤘᤠᤱ ᤛᤶᤎᤠᤱ ᤍᤠᤀᤢᤍᤧᤴ ᤜᤠᤱ ᤔᤧᤈᤥᤃᤢ॥ ᤕᤠᤒᤣᤛ ᤃᤡᤗᤠᤍᤒᤠ ᤔᤏᤠᤜᤠ᤹ᤖᤧ ᤛᤠᤘᤗᤧᤴ ᤔᤧᤗᤢᤵᤋᤢᤀᤠᤱ ᤘᤕᤧ ᤑᤠ᤹ᤀᤠᤱ ᤍᤠᤀᤢᤍᤧᤴ ᤔᤧᤔᤧᤳᤋᤢ॥ 5 ᤂᤧᤒᤩᤠᤱ ᤍᤠᤀᤢᤍᤖᤧ ᤂᤧᤱᤜᤠ᤹ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤢᤛᤡ. “ᤂᤡᤏᤡ᤹ ᤍᤠᤱᤒᤠ ᤛᤠᤘᤗ ᤗᤧᤵᤔᤠᤱ ᤗᤢᤱᤔᤠ᤹ ᤋᤢᤰᤔᤠ ᤕᤠ᤺ᤶᤒᤰ ᤀᤥᤛᤣ᤺ᤴᤎᤠᤱ ᤁᤧᤈᤥᤃᤢᤶᤒᤠ ᤏᤢ ᤂᤢᤏᤧ᤹ ᤁᤧᤗᤢᤵᤋᤢᤶᤒᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤱᤘᤠ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤖᤖᤥ॥ 6 ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤀᤠᤵᤑᤠᤗᤧᤛᤠᤱ ᤌᤎᤵ ᤔᤧᤸᤗ᤹ᤔᤏᤠᤒᤠ ᤔᤡ᤺ᤶᤈᤡ ᤁᤧᤔᤧᤳᤋᤡᤒᤠᤴ ᤏᤢ ᤂᤢᤏᤧ᤹ ᤏᤛᤠ᤺ᤴᤛᤠᤒᤠ ᤆᤥ᤺ᤰᤐᤠᤴ ᤀᤥᤛᤣ᤺ᤴ ᤁᤧᤎᤠᤰᤋᤡᤖ. ᤜᤧᤰᤁᤩᤠᤱ ᤂᤡᤏᤡ᤹ ᤛᤠᤘᤗᤧᤴᤏᤢ ᤁᤧᤈᤥᤃᤢᤶᤒᤠ ᤐᤠ᤺ᤴᤏᤥ ᤀᤠᤱᤃᤠ᤹ᤀᤠᤱ ᤂᤡᤏᤡ᤹ᤏᤢ ᤏᤢᤒᤠ ᤕᤠ᤺ᤶᤒᤰ ᤆᤥᤃᤢᤱ॥ 7 ᤀᤠᤸᤗ ᤂᤡᤏᤡ᤹ ᤜᤢᤰᤜᤠ᤹ ᤁᤧᤎᤢᤶᤒᤠ ᤐᤥᤱᤗ. ᤜᤧᤰᤁᤩᤠᤱ ᤜᤠᤱᤜᤠᤱ ᤗ᤹ᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤍᤠᤱᤒᤠ ᤛᤠᤘᤗᤧᤴ ᤛᤩᤧᤀᤠᤱ ᤜᤥᤵ. ᤜᤧᤰᤁᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤂᤢᤴᤇᤡ᤹ ᤜᤠᤱ ᤔᤧᤈᤥᤃᤠᤱᤅᤠᤱ ᤘᤠ᤹ᤖᤥ॥” ᤀᤡᤛ᤻ᤒᤥᤛᤣᤋᤧᤴ ᤀᤡᤛᤪᤠᤀᤡᤒᤠ ᤜᤠᤱ ᤐᤥ᤺ᤰᤂᤧ 8 ᤜᤠᤒᤠ ᤁᤴ ᤗᤢᤶᤔᤥ ᤛᤠᤘᤗᤖᤧ ᤁᤢᤎᤰᤔᤥᤒᤠ ᤏᤣᤖᤧᤸᤗᤧ ᤁᤢᤛ᤻ᤛᤠ ᤀᤒᤏᤣᤖᤧᤸᤗᤧ ᤛᤠᤘᤗᤖᤧ ᤁᤢᤛ᤻ᤛᤠ ᤀᤡᤛ᤻ᤒᤥᤛᤣᤋᤧᤴ ᤔᤜᤏᤥᤶᤔᤥ ᤋᤠᤖᤢ. 9 ᤜᤧᤰᤁᤩᤠᤱ ᤃᤡᤗᤠᤍ. ᤀᤛᤢᤖ. ᤕᤡᤈᤖᤣᤗ. ᤀᤣᤑᤪᤠᤀᤡᤔ ᤏᤢ ᤒᤣᤏᤩᤠᤔᤡᤏ ᤂᤧᤶᤒᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤀᤥ ᤜᤠᤱᤕᤢᤰ ᤆᤥᤃᤢ॥ 10 ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥ᤺ᤰᤂᤧᤸᤗᤧ ᤀᤡᤛ᤻ᤒᤥᤛᤣᤋᤧᤴ ᤗᤡᤒᤥᤱ ᤋᤱᤒᤣ᤹ ᤕᤥᤖᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤋᤱᤒᤣ᤹ ᤏᤧᤳᤇᤡ ᤌᤠᤖᤡᤰ ᤜᤠᤱᤕᤢᤰ ᤆᤥᤃᤢ॥ ᤜᤧᤰᤁᤣᤛᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧᤃ ᤍᤠᤀᤢᤍᤧᤴᤏᤣ ᤔᤧᤍᤡᤶᤍᤢ॥ 11 ᤜᤧᤰᤁᤩᤠᤱ ᤜᤧᤒᤪᤥᤴᤏᤥ ᤕᤜᤢᤍᤠ ᤛᤢᤘᤠᤱ ᤛᤶᤎᤠᤱ ᤍᤠᤀᤢᤍᤖᤧ ᤋᤱᤒᤣ᤹ ᤏᤢᤛᤡᤀᤠᤱ ᤁᤢᤓᤪᤧ᤺ᤱ ᤌᤠᤖᤡᤰ ᤜᤠᤱᤕᤢᤰ ᤆᤥᤃᤢᤖᤥ॥ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤗᤢᤶᤔᤥ ᤌᤱ ᤐᤥ᤺ᤰᤂᤧ 12 ᤏᤣᤖᤖᤧ ᤁᤢᤛ᤻ᤛᤠ ᤀᤒᤏᤣᤖᤧᤸᤗᤧ ᤛᤠᤘᤗᤖᤧ ᤁᤢᤛ᤻ᤛᤠ ᤀᤡᤛ᤻ᤒᤥᤛᤣᤋᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤔᤜᤏᤥᤔᤗᤠᤶ ᤃᤡᤒᤥᤏ ᤗᤧᤵᤔᤠᤱ ᤐᤣ॥ 13 ᤜᤧᤰᤁᤩᤠᤱ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤕᤥᤀᤠᤒᤖᤧ ᤍᤠᤀᤢᤍᤖᤧ ᤁᤢᤎᤰᤛᤢᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤜᤧᤒᤪᤥᤏᤗᤠᤶ ᤌᤠᤛᤡᤱᤅᤠᤱ ᤐᤣ॥ ᤂᤧᤱᤜᤠ᤹ ᤃᤡᤒᤥᤏᤒᤠ ᤘᤖᤰᤁᤥ ᤔᤧᤍᤢᤔᤧ. ᤜᤧᤰᤁᤩᤠᤱ ᤌᤡᤰᤁᤡᤸᤗᤧ ᤘᤖᤰ ᤁᤳᤏᤠᤜᤠᤱ ᤗᤧᤵᤔᤠᤱ ᤏᤢ ᤘᤣ᤹ᤀᤡᤸᤗᤧ ᤘᤖᤰ ᤏᤠᤜᤠᤱᤍᤠᤱ ᤌᤱ ᤆᤥ᤺ᤰᤔᤠ ᤕᤠᤖᤡᤵ ᤔᤧᤒᤥ᤺ᤰᤂᤧ॥ 14 ᤀᤒᤏᤣᤖᤧᤸᤗᤧ ᤕᤥᤀᤠᤒᤧᤴ ᤔᤧᤳᤋᤢ. “ᤂᤧᤏᤧ᤹ ᤏᤢ ᤀᤠᤱᤃᤠ᤹ ᤌᤠᤱᤒᤧᤴ ᤀᤠᤔᤏᤠᤜᤠ᤹ᤀᤥ ᤗᤳᤇᤠ ᤗᤳᤇᤠ ᤀᤠᤴᤇᤡ᤹ ᤋᤃᤠᤱ ᤌᤰᤛᤡᤖ॥” ᤕᤥᤀᤠᤒᤖᤧ ᤔᤧᤳᤋᤢ. “ᤗᤢ ᤐᤥᤱ. ᤂᤧᤱᤜᤠ᤹ᤖᤧ ᤜᤠᤒᤠᤜᤧᤰᤁᤣ ᤆᤥ᤺ᤰᤛᤢᤖ॥” 15 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤔᤧᤒᤥᤃᤧ. ᤜᤧᤰᤁᤩᤠᤱ ᤒᤣᤏᤩᤠᤔᤡᤏ ᤏᤢ ᤛᤠᤘᤗᤖᤧ ᤁᤢᤛ᤻ᤛᤠ ᤀᤡᤛ᤻ᤒᤥᤛᤣᤋ ᤗᤧᤵᤔᤠᤱᤒᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤜᤧᤰᤁᤩᤠᤱ ᤍᤠᤀᤢᤍ ᤗᤧᤵᤔᤠᤱᤒᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤗᤳᤇᤠ ᤗᤳᤇᤠ ᤀᤠᤒᤠᤅᤣ ᤋᤧᤴᤏᤥ ᤔᤧᤕᤧᤶᤛᤡᤱ॥ 16 ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤂᤢᤏᤡ᤹ ᤏᤡᤱᤔᤡᤜᤠ᤹ᤖᤧ ᤌᤧᤃᤣ᤺ᤰᤐᤥ ᤔᤧᤍᤧᤶᤛᤢᤛᤡᤀᤠᤱ ᤋᤠᤓᤣ᤺ᤸᤗᤧ ᤛᤠᤵᤐᤥ᤺ᤰᤁᤥ ᤔᤧᤎᤢᤒᤢᤛᤡ॥ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤌᤡᤰᤗᤧᤱᤗᤧ ᤛᤥᤖᤡᤰ ᤔᤧᤛᤩᤧ॥ ᤂᤧᤸᤗᤧᤆᤥᤃᤢᤸᤗᤧ ᤃᤡᤒᤥᤏᤒᤠ ᤂᤧᤴ ᤋᤧᤴᤏᤡᤴ ᤜᤣᤸᤁᤋ-ᤜᤈ᤻ᤈᤢᤖᤡᤔ ᤔᤧᤔᤧᤳᤋᤢ॥ 17 ᤂᤧᤴ ᤕᤧᤴᤏᤥ ᤛᤠ᤹ᤖᤡᤰ ᤕᤶᤒᤠ ᤌᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤒᤏᤣᤖᤧᤴ ᤏᤢ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤍᤠᤀᤢᤍᤖᤧ ᤁᤢᤎᤰᤛᤢᤒᤠᤜᤠ᤹ᤏᤢ ᤜᤠᤖᤡᤔᤧᤍᤩᤧ॥ 18 ᤛᤖᤢᤕᤠᤜᤖᤧ ᤛᤢᤶᤒᤪᤠᤱ ᤁᤢᤛ᤻ᤛᤠᤜᤠ᤹ ᤕᤥᤀᤠᤒ. ᤀᤒᤡᤛᤤ ᤏᤢ ᤀᤛᤠᤜᤣᤗ ᤂᤧᤵᤔᤥ ᤔᤧᤘᤕᤧ॥ ᤀᤛᤠᤜᤣᤗᤧᤴ ᤋᤧᤶᤒᤣ᤹ᤀᤥ ᤐᤧ᤺ᤱᤘᤠᤏᤢ᤺ᤸᤗᤧ ᤆᤠᤳᤋᤢᤖ ᤁᤧᤗᤥ᤺ᤰᤐᤠ ᤘᤕᤧ॥ 19 ᤂᤢᤏᤧ᤹ ᤆᤢᤰᤘᤠ ᤑᤧᤱᤘᤠ ᤀᤠᤳᤋᤠᤴᤏᤠᤱ ᤔᤧᤴᤜᤡᤛᤡᤱᤅᤣ ᤀᤒᤏᤣᤖᤧᤴ ᤏᤠ᤺ᤳᤋᤢᤖ ᤐᤣ॥ 20 ᤜᤧᤰᤁᤣ᤺ᤸᤗᤧ ᤀᤒᤏᤣᤖᤧᤴ ᤂᤢᤏᤧ᤹ ᤁᤢᤀᤣᤃᤠᤱ ᤜᤡᤛᤡᤱᤅᤠᤱ ᤀᤥᤔᤧᤳᤋᤢᤀᤠᤱ ᤔᤧᤳᤋᤢ. “ᤀᤛᤠᤜᤣᤗᤀᤣ. ᤂᤧᤏᤧ᤹ᤀᤣᤒᤡ᥅” “ᤀᤥᤖᤥ” ᤗ᤹ᤖᤡᤰ ᤂᤢᤏᤧ᤹ ᤔᤧᤳᤋᤢ॥ 21 ᤀᤒᤏᤣᤖᤧᤸᤗᤧ ᤔᤧᤳᤋᤢ. “ᤆᤢᤰᤘᤠ ᤀᤡᤃᤪ ᤑᤧᤱᤘᤠ ᤗᤧᤵᤛᤠᤱ ᤐᤣᤃᤧ᤹ᤀᤠᤱ ᤌᤠᤱᤒᤧᤴᤜᤠ᤹ᤀᤥ ᤗᤳᤇᤠ ᤋᤧᤶᤛᤧᤀᤠᤱ ᤂᤧᤸᤗᤧ ᤁᤢᤓᤧᤈᤠ ᤁᤢᤍᤰᤁᤠ᤺ᤳᤜᤠ᤹ ᤏᤠᤵᤋᤧ᤹॥” ᤁᤖ ᤀᤛᤠᤜᤣᤗᤖᤧ ᤂᤢᤏᤧ᤹ ᤏᤠ᤺ᤵᤔᤠ ᤔᤧᤗᤧᤖᤢᤴ॥ 22 ᤜᤧᤰᤁᤩᤠᤱ ᤀᤒᤏᤣᤖᤧᤸᤗᤧ ᤀᤛᤠᤜᤣᤗᤧᤴ “ᤀᤠᤱᤃᤠ᤹ ᤏᤠ᤺ᤵᤔᤠ ᤗᤧᤖᤠᤱᤅᤧ᤹” ᤔᤧᤳᤋᤢᤖ ᤛᤠᤶᤍᤡᤱ ᤐᤡᤖᤢ॥ ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤌᤣᤀᤠᤱ ᤛᤧᤳᤏᤧᤒᤣ᥅ ᤂᤧᤏᤧ᤹ ᤛᤧᤳᤏᤧᤀᤠᤱ ᤁᤧᤶᤓᤢ᤹ ᤕᤥᤀᤠᤒᤧᤴ ᤀᤠᤰᤂᤣᤗ᤹ᤖᤡᤰ ᤀᤠᤏᤠᤖᤠᤴ ᤀᤥ᤺ᤴᤎᤠᤰᤋᤢᤱᤒᤠᤒᤣ᥅” 23 ᤁᤖ ᤀᤛᤠᤜᤣᤗᤧᤴ ᤏᤢ᤺ᤱᤔᤠ ᤔᤧᤍᤧᤴᤍᤧᤴ. ᤜᤧᤰᤁᤣ᤺ᤸᤗᤧ ᤀᤒᤏᤣᤖᤧᤸᤗᤧ ᤔᤧᤴᤜᤡᤛᤡᤱᤅᤣ ᤀᤣᤃᤠᤱᤗᤠᤶ ᤗᤠ᤺ᤰᤁᤡᤸᤗᤧ ᤑᤧᤱ ᤗ᤹ᤖᤡᤰ ᤗᤧᤵᤋᤢᤍᤣᤛᤢᤀᤠᤱ ᤂᤧᤸᤗᤧ ᤁᤢᤛ᤻ᤛᤠᤵᤐᤥ᤺ᤰᤁᤡᤴ ᤑᤩᤠᤰ ᤗᤛ᤻ᤛᤢ. ᤗᤠ᤺ᤰᤁᤡᤴ ᤁᤢᤀᤣᤃᤠᤱ ᤗ᤺ᤴᤍᤧ. ᤜᤧᤰᤁᤩᤠᤱ ᤂᤢᤏᤧ᤹ ᤗᤠᤶᤔᤥᤀᤣ ᤜᤷᤈᤢ᤹ ᤆᤥ᤺ᤴᤍᤧᤀᤠᤱ ᤛᤩᤧ॥ ᤀᤛᤠᤜᤣᤗᤧᤴ ᤆᤥ᤺ᤴᤍᤧᤀᤠᤱ ᤛᤩᤧᤒᤠᤍᤧᤴᤏᤥ ᤁᤧᤃᤧᤵᤐᤠ ᤁᤧᤖᤧᤰ ᤂᤧᤵᤔᤥᤀᤣ ᤔᤧᤏᤠ᤺ᤶᤛᤡᤱ॥ 24 ᤁᤖ ᤕᤥᤀᤠᤒ ᤏᤢ ᤀᤒᤡᤛᤤᤖᤧ ᤀᤒᤏᤣᤖᤧᤴ ᤜᤠᤒᤠ ᤏᤠ᤺ᤳᤋᤢᤛᤡᤀᤠᤱ ᤐᤳᤇᤧᤛᤡ॥ ᤜᤧᤰᤁᤩᤠᤱ ᤏᤠᤶ ᤗᤠᤛᤧᤖ ᤐᤳᤇᤧᤸᤗᤧ ᤂᤧᤱᤜᤠ᤹ ᤀᤶᤔᤠᤒᤠ ᤃᤡᤜ ᤁᤢᤒᤣᤛᤠᤱᤒᤠ ᤁᤥ᤺ᤰᤔᤠᤀᤥ ᤔᤧᤃᤧᤖᤧ. ᤂᤧᤴ ᤃᤡᤒᤥᤏᤒᤠ ᤔᤢᤖᤧᤰ ᤂᤠᤖᤧᤰ ᤕᤧ᤺ᤱᤄᤠᤍᤧᤴᤏᤥᤒᤠ ᤗᤠᤶᤔᤥ ᤏᤧ᤹᤺॥ 25 ᤒᤡᤏᤩᤠᤔᤡᤏᤡᤜᤠ᤹ ᤀᤒᤏᤣᤖ ᤗᤧᤵᤔᤠᤱ ᤔᤧᤓᤢᤱᤛᤡᤱ. ᤜᤧᤰᤁᤩᤠᤱ ᤗᤳᤇᤠ ᤁᤥ᤺ᤰᤔᤠᤸᤗᤧ ᤁᤢᤈᤱᤎᤠᤱ ᤌᤱᤗᤧ ᤗᤠᤃᤡ ᤕᤠᤖᤡᤵ ᤔᤧᤒᤥ᤺ᤰᤂᤧ॥ 26 ᤜᤧᤰᤁᤣ᤺ᤸᤗᤧ ᤀᤒᤏᤣᤖᤧᤴ ᤀ᤺ᤰᤋᤧᤀᤠᤱ ᤕᤥᤀᤠᤒᤧᤴ ᤔᤧᤳᤋᤢ. “ᤌᤣ ᤋᤠᤓᤣ᤺ᤸᤗᤧ ᤀᤠᤓᤧᤸᤗᤧᤛᤠᤱ ᤔᤏᤠᤜᤠ᤹ ᤔᤧᤰᤂᤢᤛᤡᤒᤠᤒᤡ᥅ ‘ᤀᤠᤒᤠᤅᤣ ᤑᤢ᤹ᤏᤢᤛᤠ᤹ᤜᤠ᤹ ᤀᤠᤸᤗ ᤔᤧᤏᤠ᤺ᤳᤋᤧᤶᤛᤡᤶᤔᤧᤴᤏᤧ᤹’ ᤁᤧᤔᤧᤳᤋᤢᤛᤡᤀᤠᤱ ᤂᤧᤏᤧ᤹ ᤁᤧᤔᤏᤠᤜᤠ᤹ ᤁᤧᤴᤏᤢ᤺ᤰᤋᤢᤴᤛᤡᤶᤒᤠᤒᤡ᥅” 27 ᤕᤥᤀᤠᤒᤧᤸᤗᤧ ᤔᤧᤳᤋᤢ. “ᤛᤧᤰᤂᤠᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤐᤠ᤺ᤳᤋᤢᤱ᤹. ᤂᤧᤏᤧ᤹ ᤁᤴ ᤐᤠ᤺ᤴᤏᤡᤴ ᤁᤧᤶᤒᤠ᤺ᤳᤋᤢᤴᤏᤡᤸᤗᤧᤃ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤋᤠ᤺ᤴᤍᤡᤰ ᤋᤠᤏᤠᤶ ᤌᤠᤖᤡᤰᤛᤠᤱ ᤏᤠ᤺ᤵᤔᤠ ᤔᤧᤸᤗᤧᤖᤢᤛᤡᤴᤔᤧᤴ॥” 28 ᤜᤧᤰᤁᤩᤠᤱ ᤕᤥᤀᤠᤒᤖᤧ ᤌᤢᤳᤋᤢᤖᤡᤵᤐᤧᤴ ᤔᤢ᤺ᤳᤋᤢᤀᤠᤱ ᤔᤢᤰᤂᤢ. ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤏᤠ᤺ᤵᤔᤠ ᤔᤧᤗᤧᤖᤢᤛᤡ. ᤂᤶᤒᤩᤠᤱ ᤌᤱ ᤐᤥᤱᤔᤠ ᤆᤰ ᤗ᤹ᤖᤧ॥ 29 ᤜᤧᤰᤁᤩᤠᤱ ᤀᤒᤏᤣᤖᤧᤴ ᤏᤢ ᤁᤢᤔᤏᤠᤜᤠ᤹ ᤀᤖᤠᤒᤠᤗᤠᤶ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤗᤠᤱᤔᤧᤄᤣᤃᤧᤖ ᤔᤧᤒᤣᤀᤠᤱ ᤂᤧᤱᤜᤠ᤹ᤖᤧ ᤕᤷᤍᤏ ᤋᤧᤶᤒᤣ᤺ᤴ ᤔᤧᤏᤠ᤺ᤰᤂᤢ. ᤜᤧᤰᤁᤩᤠᤱ ᤋᤠᤏᤠᤶ ᤀᤠᤰᤂᤥᤰ ᤌᤠᤖᤡᤰ ᤗᤠᤱᤔᤧᤄᤣᤃᤧᤖ ᤔᤜᤏᤥᤔ ᤔᤧᤃᤧᤖᤧ॥ 30 ᤕᤥᤀᤠᤒᤖᤧ ᤀᤒᤏᤣᤖᤧᤴ ᤏᤠ᤺ᤵᤔᤠ ᤗᤧᤖᤢᤀᤠᤱ ᤁᤢᤎᤰᤛᤢᤒᤠᤜᤠ᤹ ᤛᤢᤵᤛᤢᤛᤡ. ᤜᤧᤰᤁᤣ᤺ᤸᤗᤧ ᤀᤛᤠᤜᤣᤗᤧᤴᤏᤢ᤺ᤸᤗᤧ ᤘᤣ᤹ ᤌᤡᤒᤥᤱᤅᤠᤱ ᤑᤠᤱᤛᤡ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ ᤔᤧᤜᤥ᤺ᤵᤋᤧ॥ 31 ᤁᤖ ᤍᤠᤀᤢᤍᤖᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤀᤒᤏᤣᤖᤧᤴ ᤁᤧᤍᤡᤶᤒᤠ ᤒᤡᤏᤩᤠᤔᤡᤏᤖᤧ ᤁᤢᤔᤏᤠᤜᤠ᤹ ᤁᤡᤵ ᤛᤢᤶᤛᤡᤀᤠᤱ ᤋᤢᤰᤐᤥᤱ (᥉᥌᥆) ᤔᤧᤛᤧᤖᤢᤛᤡᤀᤠᤱ ᤘᤕᤧ॥ 32 ᤂᤧᤱᤜᤠ᤹ᤖᤧ ᤀᤛᤠᤜᤣᤗᤧᤴ ᤔᤧᤃᤢᤕᤢᤀᤠᤱ ᤔᤧᤍᤣ᤹ᤖᤢ. ᤜᤧᤰᤁᤩᤠᤱ ᤒᤣᤌᤗᤧᤜᤧᤶᤔᤥ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤒᤣᤛᤠᤱ ᤔᤧᤗᤢᤵᤋᤢ॥ ᤂᤧᤴ ᤀᤣᤃᤠᤱ ᤕᤥᤀᤠᤒᤧᤴ ᤏᤢ ᤁᤢᤔᤏᤠᤜᤠ᤹ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤗᤠᤱᤔᤧᤄᤣᤃᤧᤀᤠᤱ ᤋᤠᤏᤠᤶ ᤜᤧᤒᤪᤥᤴᤏᤥ ᤔᤧᤃᤧᤖᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.