᥈ ᤛᤠᤵᤔᤢ᤺ᤴᤎᤢᤶ 9 - LIFOTNT

ᤛᤣᤒᤠᤒᤠ ᤜᤠᤱᤔᤧᤴ ᤛᤥᤗᤥᤔᤏᤖᤧ ᤁᤢᤍᤢᤶᤛᤧ ᤑᤧᤴ

¹ ᤛᤣᤒᤠᤒᤠ ᤜᤠᤱᤔᤧᤸᤗᤧ ᤛᤥᤗᤥᤔᤏᤖᤧ ᤁᤢᤔᤡᤱᤛᤥ ᤁᤢᤎᤠᤱᤛᤥᤴ ᤂᤧᤵᤛᤢ. ᤜᤧᤰᤁᤩᤠᤱ ᤁᤧᤛᤠᤰᤐᤠ ᤁᤧᤛᤠᤰᤐᤠ ᤐᤠ᤺ᤴᤛᤣ᤺ᤴᤍᤥᤜᤠ᤹ ᤌᤠᤰᤋᤢᤀᤠᤱ ᤛᤥᤗᤥᤔᤏᤧᤴ ᤁᤢᤏᤡᤱᤘᤠ᤹ ᤛᤠ᤹ᤔᤠᤖᤧ ᤗᤠᤃᤡ ᤛᤣᤒᤠᤒᤠ ᤜᤠᤱᤔᤧᤴ ᤕᤖᤢᤛᤗᤧ᤺ᤶᤔᤥ ᤌᤠᤅᤧ॥ ᤂᤢᤏᤧ᤹ ᤛᤠ᤹ᤖᤡᤰ ᤕᤖᤡᤰ ᤁᤢᤍᤡ᤺ᤰ ᤁᤢᤍᤡ᤺ᤰ ᤔᤏᤠᤜᤠ᤹ᤏᤢ ᤛᤥᤛᤥᤖᤡᤰ ᤔᤠᤖᤢᤰ. ᤘᤧᤳᤋᤧᤛᤖᤧ ᤛᤠᤶᤔᤩᤠᤱ ᤏᤢ ᤁᤢᤔᤧᤸᤗᤢᤱ ᤁᤧᤄᤡ᤺ᤰᤐᤠ ᤔᤢᤎᤡᤱᤗᤢᤱᤜᤠ᤹ ᤀᤢᤔᤣᤜᤠ᤹ ᤁᤰ ᤁᤢ᤺ᤳᤋᤢᤛᤡᤀᤠᤱ ᤌᤠᤅᤧ॥ ᤂᤢᤏᤧ᤹ ᤛᤥᤗᤥᤔᤏᤖᤧᤀᤥ ᤌᤠᤅᤧᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤥᤗᤥᤔᤏᤧᤴ ᤆᤧᤰᤋᤢ॥

² ᤛᤥᤗᤥᤔᤏᤖᤧ ᤂᤧᤸᤗᤧ ᤁᤧᤖᤧᤰ ᤁᤢᤛᤣ᤺ᤴᤍᤥ ᤐᤠ᤺ᤴᤜᤠ᤹ ᤏᤢᤃᤵ ᤐᤡᤖᤢ॥ ᤏᤢᤃᤵ ᤐᤡᤔᤠᤖᤧ ᤗᤠᤃᤡ ᤀᤠᤳᤋᤡᤴ ᤛᤣ᤺ᤴᤍᤥ ᤐᤠ᤺ᤴᤏᤡᤴᤏᤠᤱ ᤛᤥᤗᤥᤔᤏᤖᤧ ᤁᤢᤗᤠᤃᤡ ᤁᤧᤛᤠᤰᤐᤠ ᤔᤧᤒᤥ᤺ᤰᤂᤧᤴ॥

³ ᤀᤠᤸᤗ ᤛᤥᤗᤥᤔᤏᤖᤧ ᤁᤢᤛᤡᤰᤁᤢᤶ ᤏᤡᤱᤘᤠ᤹. ᤂᤢᤏᤧ᤹ ᤆᤥᤃᤢᤒᤠ ᤜᤠᤱᤜᤡᤶᤔᤡᤴ.

⁴ ᤂᤢᤏᤧ᤹ ᤁᤢᤈᤵᤋᤧᤴᤏᤥᤒᤠ ᤁᤢᤈᤠ᤺ᤴ. ᤁᤒᤪᤡᤱ ᤁᤧᤕᤢᤱᤒᤠ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹. ᤆᤠᤱᤘᤠ᤺ᤴᤜᤠ᤹ᤖᤧ ᤁᤠᤵᤋᤢᤛᤡᤒᤠ ᤂᤢᤏᤧ᤹ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤧᤘᤠᤖᤥᤒᤠᤜᤠ᤹. ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤁᤧᤜᤠᤒᤠᤜᤠ᤹ᤖᤧ ᤔᤧᤈᤠᤰᤂᤢᤒᤠ ᤆᤠᤱᤜᤠ᤹ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤛᤥᤗᤥᤔᤏᤖᤧ ᤋᤥ᤺ᤴᤍᤢᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤛᤣᤒᤠᤒᤠ ᤜᤠᤱᤔᤧᤸᤗᤧ ᤏᤡᤛᤢ. ᤂᤧᤒᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤔᤕᤧ॥

⁵ ᤜᤠᤱᤔᤧᤸᤗᤧ ᤜᤠᤱᤅᤡᤴ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤌᤥᤒᤥ ᤁᤧᤈᤥᤃᤢᤒᤠ ᤐᤠ᤺ᤴᤜᤠ᤹ ᤏᤢ ᤀᤠᤍᤠᤱᤒᤠᤖᤧ ᤁᤧᤛᤡᤰᤁᤢᤶ ᤏᤡᤱᤘᤠ᤹ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤀᤠᤗᤠᤈᤣ᤹ᤀᤥ ᤂᤧᤵᤛᤢᤱᤒᤠ ᤐᤠ᤺ᤴᤜᤠ᤹ ᤛᤧᤰᤂᤠᤖᤳᤇ॥

⁶ ᤁᤖ ᤀᤠᤱᤃᤠ᤹ ᤌᤠᤱᤔᤠᤀᤠᤱ ᤀᤠᤵᤑᤣᤰ ᤀᤠᤔᤡᤰᤁᤡᤸᤗᤧ ᤔᤧᤴᤏᤡᤀᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤛᤠᤴ ᤔᤧᤴᤈᤥ᤺ᤰᤁᤣ ᤘᤕᤠᤱ॥ ᤛᤧᤰᤂᤠᤀᤣ. ᤀᤠᤍᤠᤱᤒᤠᤖᤧ ᤐᤕᤶ ᤕᤶᤒᤠ ᤁᤧᤛᤡᤰᤁᤢᤶ ᤏᤡᤱᤘᤠ᤹ ᤐᤠ᤺ᤴᤏᤡᤴ ᤁᤢᤓᤪᤧ᤺ᤱᤅᤠᤱ ᤀᤠᤱᤃᤠ᤹ ᤔᤧᤶᤔᤧᤳᤋᤣ ᤔᤧᤃᤳᤋᤠᤱᤗᤳᤇ॥ ᤀᤠᤍᤠᤱᤒᤠᤖᤧ ᤁᤧᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤂᤧᤵᤛᤢᤱᤒᤠᤏᤢ᤺ᤸᤗᤧᤃ ᤀᤠᤍᤠᤱᤒᤠ ᤀᤠᤳᤋᤠᤋᤠᤴᤏᤣ ᤐᤕᤶ ᤕᤶᤒᤠ ᤁᤧᤘᤠ᤹ᤖᤳᤇ॥

⁷ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ ᤀᤠᤰᤂᤧᤴ ᤔᤧᤏᤢ᤹ ᤔᤧᤍᤠᤒᤡᤗᤠ᥄ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤌᤡᤰᤕᤠ᤺ᤴᤎᤰ ᤀᤠᤍᤠᤱᤒᤠᤖᤧ ᤁᤧᤕᤠ᤺ᤶᤒᤰᤁᤥ ᤁᤧᤘᤠ᤹ᤒᤠ ᤏᤢ ᤀᤠᤍᤠᤱᤒᤠᤖᤧ ᤁᤧᤛᤡᤰᤁᤢᤶ ᤏᤡᤱᤘᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤄᤥᤒᤠ ᤀᤠᤍᤠᤱᤒᤠᤖᤧ ᤁᤴ ᤁᤧᤛᤢᤜᤠᤱᤕᤢᤰᤐᤠᤜᤠ᤹ ᤛᤠ᤹ᤖᤡᤰ ᤔᤢ᤹ᤀᤡᤛᤠᤒᤠᤛᤡᤖᤥ᥄

⁸ ᤀᤠᤍᤠᤱᤒᤠᤏᤢ ᤁᤢᤏᤡᤱᤘᤠ᤹ ᤁᤧᤍᤠᤒᤠ ᤕᤜᤘᤣ ᤍᤠᤱᤒᤠ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤜᤠᤱᤕᤢᤰ ᤆᤥ᤺ᤰᤛᤧ ᤀᤠᤍᤠᤱᤒᤠ ᤜᤠᤱ ᤕᤢᤰᤋᤡᤱ ᤁᤧᤈᤥ᤺ᤰᤐᤠ ᤁᤢᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤕᤜᤘᤣ ᤍᤠᤱᤒᤠ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖᤖᤥ॥ ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤩᤠᤱ ᤛᤍᤠᤍᤡᤱ ᤀᤡᤛᤪᤠᤀᤡᤗᤧᤴ ᤏᤧᤖ ᤑᤠ᤹ᤀᤠᤱ ᤕᤥᤎᤥ ᤔᤧᤸᤗ᤹ᤔᤏᤠᤒᤠ ᤏᤡᤱᤘᤠ᤹ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤀᤠᤍᤠᤱᤒᤠᤖᤧ ᤁᤧᤘᤠ᤹ᤒᤠ ᤂᤠᤛᤧᤴ ᤁᤧᤈᤥᤃᤢᤖ ᤜᤧᤰᤁᤩᤠᤱ ᤛᤠᤶᤕᤥᤏᤡᤔᤠᤴ ᤀᤠᤵᤑᤠᤸᤗᤧᤛᤠᤱ ᤁᤧᤘᤠ᤹ᤒᤠ ᤁᤧᤈᤥᤃᤢᤖ ᤑᤠ᤹ᤀᤠᤱ ᤂᤢᤏᤧ᤹ ᤀᤠᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤜᤠᤱ ᤁᤧᤈᤥᤃᤧᤀᤠᤱ ᤘᤠ᤹॥”

⁹ ᤂᤧᤴ ᤀᤣᤃᤠᤱ ᤜᤠᤱᤔᤧᤸᤗᤧ ᤛᤥᤗᤥᤔᤏᤧᤴ ᥇᥈᥆ ᤋᤣᤗᤣᤴᤋ ᤛᤠᤶᤔᤩᤠᤱ. ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤠᤖᤢᤰ ᤏᤢ ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱᤜᤠ᤹ ᤐᤡᤖᤢ॥ ᤛᤣᤒᤠᤒᤠ ᤜᤠᤱᤔᤧᤸᤗᤧ ᤛᤥᤗᤥᤔᤏ ᤜᤠᤱᤅᤡᤴ ᤐᤡᤖᤢᤒᤠ ᤕᤠᤖᤡᤰ ᤔᤠᤖᤢᤰᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤶᤒᤥᤱᤅᤣ ᤘᤕᤧ॥

¹⁰ ᤁᤴ ᤁᤧᤖᤧᤰᤏᤢ᤺ᤸᤗᤧ ᤘᤣ᤹ ᤜᤣᤖᤠᤔ ᤏᤢ ᤛᤥᤗᤥᤔᤏᤖᤧ ᤂᤢᤴᤇᤡ᤹ ᤛᤧᤘᤠᤖᤥᤒᤠᤜᤠ᤹ᤖᤧ ᤀᤥᤐᤡᤖᤗᤠᤶ ᤛᤠᤶᤔᤩᤠᤱ ᤔᤧᤎᤠᤰᤋᤢ॥ ᤂᤧᤱᤜᤠ᤹ᤖᤧ ᤋᤄ᤹ᤛᤡᤱᤜᤠ᤹ ᤏᤢ ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱᤜᤠ᤹ᤀᤠᤱ ᤔᤧᤎᤠᤰᤋᤢ॥

¹¹ ᤜᤠᤱᤅᤡᤸᤗᤧ ᤁᤴ ᤛᤡᤱᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤏᤢ ᤜᤠᤱᤜᤡᤶᤔᤥᤒᤠ ᤏᤠᤜᤠᤱᤛᤣ᤺ᤰᤜᤠ᤹ ᤜᤧᤰᤁᤩᤠᤱ ᤛᤠᤶᤃᤧᤗᤥᤒᤠᤜᤠ᤹ᤖᤧ ᤗᤠᤃᤡ ᤀᤴᤔᤣ ᤏᤢ ᤋᤢᤱᤃᤣᤜᤠ᤹ᤀᤠᤱ ᤆᤥᤃᤢ॥ ᤜᤧᤰᤋᤱᤒᤠ ᤛᤠᤔᤠᤜᤠ᤹ ᤕᤜᤢᤍᤠ ᤗᤠᤈᤣ᤹ᤀᤥ ᤋᤃᤡ ᤀᤠᤓᤧᤸᤗᤧᤀᤠᤱ ᤔᤧᤴᤏᤡᤀᤣ ᤘᤕᤧ॥

¹² ᤛᤣᤒᤠᤒᤠ ᤜᤠᤱᤔᤧᤸᤗᤧ ᤌᤠᤰᤋᤢᤀᤠᤱ ᤋᤥ᤺ᤴᤍᤢᤒᤠ ᤌᤥ᤺ᤰᤗᤠᤜᤠ᤹ᤏᤢ᤺ᤸᤗᤧ ᤕᤖᤡᤰ ᤜᤠᤱᤔᤧᤸᤗᤧ ᤀᤡ᤺ᤳᤋᤢᤀᤠᤱ ᤏᤠ᤺ᤰᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤂᤢᤏᤧ᤹ ᤐᤡᤖᤢ॥ ᤂᤧᤒᤩᤠᤱ ᤂᤢᤏᤧ᤹ ᤛᤧᤶᤔᤢ᤹ᤀᤡ ᤐᤥ᤺ᤰᤂᤧᤀᤠᤱ ᤁᤢᤃᤰ ᤁᤧᤃᤢᤒᤠᤜᤠ᤹ᤏᤢ ᤌᤧ᤺ᤰᤐᤧᤳ ᤁᤢᤗᤠᤈᤣ᤹ᤀᤥ ᤏᤢ᤺ᤰᤂᤧᤀᤠᤱ ᤐᤣᤖᤥ॥

ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤕᤠᤱᤛᤠᤁᤢᤴᤎᤣ

¹³ ᤛᤥᤗᤥᤔᤏᤖᤧᤀᤥ ᤋᤱᤒᤣ ᤌᤰᤔᤠ ᤂᤥᤛᤢᤒᤠ ᤕᤥᤏᤢ ᤁᤧᤎᤠᤱᤒᤠ ᤛᤠᤶᤔᤩᤠᤱᤅᤡᤴ ᥌᥌᥌ ᤋᤣᤗᤣᤴᤋ ᤕᤥᤖᤧ॥

¹⁴ ᤂᤧᤴᤏᤢ᤺ᤸᤗᤧ ᤘᤣ᤹ ᤛᤠᤔᤠᤜᤠ᤹ ᤁᤧᤗ᤺ᤵᤐᤠ ᤁᤧᤍᤣ᤹ᤒᤠ ᤏᤢ ᤁᤧᤍᤠ᤺ᤵᤐᤠ ᤗᤧᤱᤜᤱᤒᤠᤜᤠ᤹ᤗᤠᤶ ᤔᤧᤓᤥᤰᤂᤢᤒᤠ ᤕᤠᤱ ᤗᤠᤶᤒᤠᤀᤠᤱ ᤀᤣ᤺ᤱᤕᤠᤱ ᤐᤥᤃᤧ॥ ᤀᤖᤒᤡ ᤗᤠᤈᤣ᤹ᤒᤠ ᤁᤧᤖᤧᤰ ᤜᤠᤱᤜᤠ᤹ ᤏᤢ ᤋᤧᤱᤃᤵᤐᤥᤒᤠ ᤆᤢᤰᤛᤠ ᤜᤠᤱᤜᤠ᤹ᤖᤧᤀᤠᤱ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤔᤧᤍᤠᤖᤢ॥

¹⁵ ᤌᤘᤠ᤺ᤸᤗᤧ ᤑᤧᤔᤏᤠᤒᤠ ᤁᤡᤵ ᤏᤧᤳᤇᤡ ᤕᤶᤒᤕᤶᤒᤠ ᤛᤠᤶᤔᤩᤠᤱ ᤂᤥᤜᤠ᤹ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤌᤃᤢ॥ ᤂᤥ ᤌᤰᤔᤠᤖᤧ ᤗᤠᤃᤡ ᤂᤥ ᤌᤵᤔᤣ ᤌᤘᤠ᤺ᤸᤗᤧ ᤑᤧᤔᤏᤠᤒᤠ ᤁᤡᤗᤥᤃᤪᤠᤔ ᤛᤢᤶᤛᤡᤀᤠᤱ ᤁᤢᤓᤪᤧ᤺ᤱ ᤛᤠᤶᤔᤩᤠᤱ ᤗᤠᤛᤧᤀᤠᤱ ᤘᤕᤧ॥

¹⁶ ᤌᤘᤠ᤺ᤸᤗᤧ ᤑᤧᤔᤏᤠᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᥉᥆᥆ ᤆᤢᤈᤢᤰᤛᤠ ᤂᤥᤜᤠ᤹ᤀᤠᤱ ᤌᤃᤢ॥ ᤂᤥ ᤌᤰᤔᤠ ᥉᥆᥆ ᤛᤠᤶᤔᤩᤠᤱ ᤕᤠᤃᤧ॥ ᤜᤠᤱᤅᤡᤸᤗᤧ ᤗᤧᤒᤏᤠᤏᤒᤠ ᤋᤠᤶᤓᤢᤱ ᤔᤧᤵᤔᤏᤠᤒᤠ ᤜᤠᤱᤜᤡᤶᤔᤥ ᤂᤧᤱᤜᤠ᤹ ᤕᤢᤰᤂᤢ॥

¹⁷ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤕᤶᤒᤠ ᤜᤠᤱᤕᤢᤰᤏᤠ ᤌᤡᤰ ᤆᤥᤃᤢᤀᤠᤱ ᤂᤧᤸᤗᤧ ᤁᤢᤓᤠ ᤁᤢᤗᤰᤜᤠ᤹ ᤋᤰᤔᤡᤒᤠ ᤁᤣ᤺ᤱ ᤏᤢ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤋᤢ॥

¹⁸ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤔᤠ ᤁᤢᤎᤠ᤹ ᤋᤢᤰᤛᤡ ᤏᤠᤜᤠᤱᤛᤣᤰ ᤐᤳᤇᤧ. ᤜᤧᤰᤁᤩᤠᤱ ᤛᤠᤶᤔᤩᤠᤱᤅᤡᤸᤗᤧᤴ ᤁᤢᤍᤥ᤹ᤓᤣ᤺ᤳ ᤌᤡᤰ ᤜᤠᤱᤕᤢᤰᤏᤠᤴᤏᤢ ᤔᤧᤃᤠᤶᤛᤢᤀᤠᤱ ᤐᤳᤇᤧ॥ ᤕᤢᤰᤏᤠ᤺ᤸᤗᤧ ᤏᤠᤜᤠᤱ ᤁᤳᤏᤠᤜᤠᤱ ᤜᤢᤰ ᤏᤠ᤺ᤶᤔᤠ ᤁᤢᤍᤧᤶᤛᤡᤃᤣ᤺ᤰ ᤐᤳᤇᤧ॥ ᤂᤧᤸᤗᤧ ᤁᤢᤕᤠ ᤌᤰᤔᤠ ᤋ᤺ᤰᤐᤧᤳ ᤋ᤺ᤰᤐᤧᤳ ᤁᤧᤕᤧᤵᤐᤠ ᤗᤳᤇᤠ ᤗᤳᤇᤠ ᤂᤡᤖᤡᤱᤒᤠ ᤕᤧᤒᤧ॥

¹⁹ ᤋᤢᤰᤛᤡᤀᤣ ᤏᤠᤜᤠᤱᤛᤣ᤺ᤰᤜᤠ᤹ᤖᤧ ᤏᤠᤜᤠᤱ ᤁᤳᤏᤠᤜᤠᤱ ᤌᤡᤰᤌᤡᤰ ᤗ᤹ᤖᤡᤰ ᤁᤧᤖᤧᤰᤗᤧ ᤌᤡᤒᤥᤱᤅᤠᤱ ᤏᤧᤳᤇᤡ ᤂᤡᤖᤡᤱᤒᤠᤜᤠ᤹ ᤔᤧᤕᤧᤒᤧ॥ ᤀᤠᤳᤋᤡᤴ ᤜᤠᤱᤈᤢᤶᤔᤡᤸᤗᤧ ᤗᤠᤃᤡᤀᤠᤱ ᤁᤴ ᤐᤖᤡᤰᤗᤧᤴ ᤜᤠᤱᤕᤢᤰᤏᤠ ᤀᤠᤓᤧᤸᤗᤧᤀᤠᤱ ᤔᤧᤴᤈᤥ᤺ᤰᤁᤣ ᤘᤕᤧ॥

²⁰ ᤛᤥᤗᤥᤔᤏᤖᤧ ᤁᤢᤎᤢᤱᤔᤠ ᤁᤧᤖᤧᤰ ᤆᤸᤗᤠᤱᤏᤠ ᤂᤥᤷᤕᤠᤜᤠ᤹ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤆᤥᤃᤧ॥ ᤜᤧᤰᤁᤩᤠᤱ ᤗᤧᤒᤏᤠᤏᤒᤠ ᤋᤠᤶᤓᤢᤱ ᤔᤧᤵᤔᤏᤠᤒᤠ ᤜᤠᤱᤜᤡᤶᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤛᤠᤔᤠ ᤐᤢᤔᤠᤜᤠ᤹ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤆᤥᤃᤧ॥ ᤕᤢᤵᤐᤠ᤺ᤸᤗᤧᤴ ᤌᤣᤀᤠᤱ ᤔᤧᤈᤥᤃᤢᤒᤠ ᤜᤥ᤺ᤵᤋᤧ. ᤌᤣᤀᤠᤱᤓᤧᤸᤗᤧ ᤛᤥᤗᤥᤔᤏᤖᤧ ᤁᤢᤕᤧᤶᤔᤥ ᤕᤢᤵᤐᤠ᤺ᤸᤗᤧ ᤁᤢᤔᤧᤴ ᤛᤢ᤺ᤸᤗᤡᤰ ᤘᤕᤧ॥

²¹ ᤜᤧᤖᤠᤔᤖᤧ ᤁᤢᤘᤠᤈᤠ᤺ᤰᤐᤠᤜᤠ᤹ᤏᤢ ᤛᤥᤖᤡᤰ ᤋᤷᤛᤡᤛᤀᤥ ᤁᤧᤒᤣ᤺ᤰᤐᤠ ᤜᤠᤱᤅᤡᤸᤗᤧ ᤁᤢᤘᤠᤗᤠᤎᤠ ᤁᤢᤗᤢᤵ ᤌᤡᤰ ᤔᤧᤘᤕᤧ॥ ᤋᤱᤒᤣ ᤛᤢᤶᤛᤡ ᤛᤢᤶᤛᤡᤖᤧ ᤌᤡᤰᤗᤧᤱ ᤁᤴ ᤗᤧᤱᤜᤱᤒᤠ ᤘᤠᤗᤠᤎᤠ ᤗᤢᤵᤜᤠ᤹ᤖᤧ ᤛᤠᤶᤔᤩᤠᤱ. ᤕᤢᤵᤐᤠ. ᤋᤰᤔᤡᤒᤠ ᤁᤣ᤺ᤱ. ᤂ᤹ᤒᤢᤜᤠ᤹ ᤏᤢ ᤛᤒᤠᤜᤠ᤹ ᤔᤧᤕᤢᤖᤢᤀᤠᤱ ᤔᤧᤏᤢ᤺ᤰᤂᤧ ᤔᤧᤕᤧ॥

²² ᤛᤥᤗᤥᤔᤏ ᤜᤠᤱᤅᤡᤴ ᤕᤠᤱᤛᤠᤁᤢᤴᤎᤣ ᤏᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤘᤣ᤹ ᤜᤠᤱᤜᤠ᤹ᤏᤢ᤺ᤸᤗᤧ ᤌᤥᤎᤥᤰ ᤘᤕᤧ॥

²³ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤣ᤺ᤳᤋᤢ ᤐᤡᤖᤢᤒᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤂᤧᤶᤛᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤜᤠᤱᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ ᤛᤢᤈᤠ ᤏᤠ᤺ᤰᤔᤠ ᤔᤧᤃᤥ᤺ᤳᤋᤢ॥

²⁴ ᤁᤧᤍᤠᤒᤠ ᤁᤧᤖᤧᤰᤗᤧ ᤕᤢᤵᤐᤠ ᤏᤢ ᤛᤠᤶᤔᤩᤠᤱ ᤂᤵᤐᤩᤠ. ᤆᤠᤱ. ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠ ᤜᤧᤰᤁᤩᤠᤱ ᤔᤠᤖᤢᤰ. ᤀᤴ ᤏᤢ ᤀᤴᤕᤥᤰᤜᤠ᤹ ᤋᤱᤒᤣ ᤌᤰᤔᤠ ᤜᤢᤰᤘᤠ ᤔᤧᤍᤠᤖᤢᤀᤠᤱ ᤔᤧᤍᤩᤧ॥

²⁵ ᤛᤥᤗᤥᤔᤏᤖᤧ ᤁᤢᤀᤴ ᤏᤢ ᤁᤀᤴᤗᤠᤎᤠᤜᤠ᤹ᤖᤧ ᤗᤠᤃᤡ ᥊.᥆᥆᥆ ᤀᤴᤕᤧᤵᤏᤠᤜᤠ᤹ ᤏᤧᤛ᤻ᤛᤧ. ᤂᤶᤓᤩᤠᤱ ᤂᤢᤏᤧ᤹ ᥇᥈.᥆᥆᥆ ᤁᤢᤀᤴᤜᤠ᤹ ᤔᤧᤘᤕᤧ॥ ᤂᤧᤱᤜᤠ᤹ᤀᤥ ᤁᤢᤓᤠᤃ ᤂᤢᤏᤧ᤹ ᤀᤴᤗᤠᤎᤠ ᤕᤧᤶᤔᤠ ᤕᤧᤰᤕᤰᤜᤠ᤹ᤀᤥ ᤏᤢ ᤘᤣ᤹ᤜᤠ᤹ ᤂᤢᤏᤧ᤹ᤏᤢᤀᤣ ᤕᤖᤢᤛᤗᤧᤶᤔᤥ ᤕᤧᤵᤛᤢᤛᤡ॥

²⁶ ᤂᤢᤏᤧ᤹ ᤕᤢᤑᤪᤣᤋᤡᤛ ᤘᤜ᤺ᤱᤅᤠᤱ ᤁᤳᤏᤠ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ ᤏᤢ ᤔᤡᤛᤪ ᤗᤠᤈᤣ᤹ᤒᤠ ᤀᤡ᤺ᤴᤍᤥᤀᤥ ᤌᤠᤖᤡᤰᤁᤣ ᤁᤧᤖᤧᤰ ᤜᤠᤱᤜᤠ᤹ᤀᤥ ᤕᤢᤰ ᤆᤥᤃᤢᤀᤠᤱ ᤏᤧᤛ᤻ᤛᤧ॥

²⁷ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤕᤢᤵᤐᤠᤴ ᤗᤢᤱ ᤕᤠᤖᤡᤰ ᤏᤢ ᤛᤠᤶᤔᤠᤱᤛᤡᤱᤜᤠ᤹ ᤁᤥ᤺ᤰᤔᤠᤜᤠ᤹ᤀᤥᤒᤠ ᤋᤠᤶᤓᤢᤱᤒᤠ ᤐ᤺ᤳᤇᤣ᤹ᤒᤢᤱᤜᤠ᤹ ᤕᤠᤖᤡᤰ ᤕᤖᤡᤰ ᤗᤢᤵᤛᤢ॥

²⁸ ᤛᤥᤗᤥᤔᤏᤖᤧ ᤁᤢᤀᤴᤜᤠ᤹ᤃ ᤔᤡᤛᤪ ᤗᤠᤈᤣ᤹ ᤏᤢ ᤘᤣ᤹ ᤁᤧᤖᤧᤰ ᤗᤠᤈᤣ᤹ᤜᤠ᤹ᤗᤠᤶ ᤔᤧᤍᤠᤖᤢᤛᤡᤒᤠᤜᤠ᤹ ᤔᤧᤘᤕᤧᤖᤥ॥

ᤛᤥᤗᤥᤔᤏᤖᤧ ᤁᤢᤔᤠᤛᤡᤱᤔᤠ ᤐᤠᤴ

²⁹ ᤛᤥᤗᤥᤔᤏᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰᤁᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤏᤠᤋᤠᤏᤖᤧ ᤁᤢᤛᤠᤵᤔᤢ᤺ᤴᤎᤢᤶᤔᤥ. ᤜᤧᤰᤁᤩᤠᤱ ᤛᤡᤗᤥᤒᤠ ᤀᤜᤡᤕᤠᤜᤖᤧ ᤐᤠ᤺ᤳᤋᤢᤒᤠ ᤔᤠᤱᤏᤡᤱᤘᤠ᤹ᤐᤠᤴᤏᤥ. ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤢᤕᤠ᤺ᤶᤒᤣᤀᤥ ᤏᤢᤌᤢᤶᤕᤠ ᤁᤧᤀᤡᤒᤠ ᤀᤡᤍ᤻ᤍᤥᤖᤧ ᤁᤢᤛᤢᤑᤥᤀᤥᤒᤠ ᤛᤠᤵᤐᤴᤏᤥ ᤌᤣ ᤐᤥᤎᤰ ᤐᤥ᤺ᤰᤂᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅

³⁰ ᤛᤥᤗᤥᤔᤏᤖᤧ ᤕᤖᤢᤛᤗᤧ᤺ᤶᤔᤥ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤜᤠᤱᤕᤢᤰ ᤆᤥᤃᤢ॥

³¹ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ॥ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤖᤜᤒᤠᤔᤧᤴ ᤜᤠᤱ ᤐᤥ᤺ᤰᤂᤧᤖᤥ॥