᥈ ᤛᤠᤵᤔᤢ᤺ᤴᤎᤢᤶ 7 - LIFOTNT

ᤔᤠᤱᤜᤡᤶᤔᤡᤴ ᤔᤧᤍᤥᤴᤍᤢ

¹ ᤀᤠᤸᤗ ᤛᤥᤗᤥᤔᤏᤖᤧ ᤁᤴ ᤐᤣᤗᤡᤃᤧᤴ ᤋᤢᤘᤠᤴ ᤆᤥᤃᤢᤛᤢᤖᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤡ ᤌᤩᤧ. ᤜᤧᤰᤁᤩᤠᤱ ᤔᤡ᤺ᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤏᤢ ᤘᤣ᤹ ᤛᤡᤍᤢᤱᤈᤓᤠᤜᤠ᤹ ᤌᤩ᤺ᤱ ᤔᤡᤎᤡᤰᤂᤢᤍᤣᤛᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤔᤠᤱᤜᤡᤶᤔᤡᤴ ᤋᤡᤶᤛᤧ॥

² ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤔᤠᤱᤜᤡᤶᤔᤡᤴ ᤋᤡᤶᤛᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤡᤃᤠᤱ ᤗᤠ᤺ᤵᤔᤠ ᤔᤧᤴᤇᤢᤰᤋᤧᤴ॥

³ ᤔᤡ ᤌᤩᤧᤀᤠᤱ ᤐᤳᤇᤧᤒᤠ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤔᤠᤱᤜᤡᤶᤔᤥ ᤗᤠᤛᤧᤀᤠᤱ ᤐᤳᤇᤧᤒᤠ ᤀᤠᤸᤗ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤏᤡᤛᤢᤸᤗᤧ ᤗᤢᤱ ᤑᤧᤔᤏᤠᤒᤠ ᤀᤠ᤺ᤶᤓᤥ᤹ᤀᤥ ᤂᤧᤱᤜᤠ᤹ ᤂᤠᤶᤒᤠᤱᤅᤥ ᤌᤠᤖᤡᤰ ᤛᤠᤒᤴ ᤜᤒᤳ ᤔᤧᤓᤴᤇᤡᤱ ᤜᤧᤰᤁᤩᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤕᤜᤘᤣ ᤍᤠᤱᤒᤧᤴ ᤏᤢᤃᤧᤴ ᤔᤧᤒᤡᤖᤢᤖᤥ. “ᤕᤜᤘᤣ ᤍᤠᤱᤒᤧᤴ ᤁᤧᤏᤢ᤹ᤒᤠ ᤆᤥᤰᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤔᤡ᤺ᤶᤈᤡᤴ ᤛᤍᤠᤍᤡᤱ ᤘᤠ᤹ᤖᤥ॥”

⁴ ᤂᤧᤒᤩᤠᤱ ᤜᤠᤱᤅᤡᤴ ᤏᤢ ᤁᤧᤖᤧᤰ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤔᤧᤍᤥᤴᤍᤢ॥

⁵ ᤛᤥᤗᤥᤔᤏ ᤜᤠᤱᤅᤡᤸᤗᤧ ᥈᥈.᥆᥆᥆ ᤛᤧᤃᤶᤒᤠᤜᤠ᤹ ᤏᤢ ᥇.᥈᥆.᥆᥆᥆ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤛᤡ॥ ᤜᤠᤱᤅᤡᤴ ᤏᤢ ᤁᤧᤖᤧᤰ ᤔᤏᤠᤜᤠ᤹ᤖᤧ ᤁᤶᤓᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤔᤧᤍᤥᤴᤍᤢ॥

⁶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ᤀᤠᤱ ᤏᤡ᤺ᤴᤎᤥ ᤁᤧᤒᤥᤱᤒᤠᤍᤧᤴᤏᤥ ᤔᤧᤕᤧᤶᤛᤡᤱ. ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤧᤘᤠᤛᤠᤶᤗᤥ ᤛᤠᤶᤔᤧᤵᤔᤠ ᤏᤢ ᤏᤢᤃᤧᤴ ᤐᤡᤔᤠᤖᤧ ᤗᤠᤃᤡ ᤂᤢᤏᤧ᤹ ᤆᤥᤃᤢᤒᤠ ᤔᤢᤰᤗᤠᤜᤠ᤹ ᤔᤧᤕᤠᤱᤛᤡᤱᤅᤠᤱ ᤔᤧᤔᤢᤰᤛᤢ ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤢᤖᤥ. “ᤂᤢᤏᤧ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤁᤢᤔᤡ᤺ᤶᤈᤡᤴ ᤛᤍᤠᤍᤡᤱ ᤘᤠ᤹ᤖᤥ॥” ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤛᤠᤔᤠᤜᤠ᤹ ᤔᤧᤕᤠᤱᤛᤡᤱᤅᤠᤱ ᤛᤠᤍᤠᤱᤜᤠ᤹ ᤁᤧᤔᤢ᤺ᤵᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤔᤧᤕᤧᤶᤛᤡᤱ॥ ᤂᤧᤴ ᤕᤧᤶᤔᤥ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤂᤧᤵᤔᤥ ᤔᤧᤕᤧᤒᤧ॥

⁷ ᤂᤧᤴ ᤀᤣᤃᤠᤱ ᤛᤥᤗᤥᤔᤏᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤋᤃᤡᤒᤠ ᤗᤰᤂᤢᤶ ᤗᤢᤶᤔᤥᤒᤠ ᤗᤰᤁᤡᤴ ᤛᤣᤛᤣ ᤆᤥᤃᤢ॥ ᤂᤧᤵᤔᤥ ᤂᤢᤏᤧ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ᤖᤧ ᤁᤢᤛᤥᤳ ᤗᤰᤜᤠ᤹ ᤋᤥ᤺ᤴᤍᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤆᤥᤃᤢᤒᤠ ᤁᤠᤛᤠ᤺ᤸᤗᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ. ᤐᤥᤃᤢᤃᤧᤴ ᤁᤢᤈᤠ ᤏᤢ ᤁᤢᤛᤥ᤺ᤳᤋᤡᤸᤗᤧ ᤁᤢᤗᤰᤜᤠ᤹ ᤔᤧᤜᤳᤋᤢᤴ॥

⁸ ᤁᤶᤓᤗ᤹ᤖᤡᤰ ᤛᤥᤗᤥᤔᤏ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹. ᤗᤧᤒᤥ-ᤜᤔᤠᤋᤗᤠᤶ ᤔᤡᤛᤪᤒᤠ ᤘᤜ᤺ᤱ ᤌᤠᤖᤡᤰᤐᤠ ᤗᤳᤇᤠ ᤕᤶᤒᤠ ᤛᤱᤈᤢᤶᤓᤥᤜᤠ᤹ᤖᤧ ᤂᤧᤴ ᤕᤧᤶᤔᤥ ᤏᤢᤛᤡ ᤕᤧᤴ ᤌᤠᤖᤡᤰ ᤋᤱᤏᤠᤶ ᤔᤧᤍᤥᤛᤢᤖ ᤔᤧᤘᤕᤧ॥

⁹ ᤕᤧᤳᤇᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ ᤆᤢᤶᤗᤢᤱ ᤔᤧᤈᤥᤃᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤗᤧᤳᤋᤡ ᤋᤥ᤺ᤶᤔᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤡᤴ ᤏᤢᤛᤡ ᤕᤧᤴ ᤌᤠᤖᤡᤰ ᤏᤢ ᤋᤱᤏᤠᤶᤔᤡᤴ ᤀᤠᤸᤗᤛᤠᤱ ᤏᤢᤛᤡ ᤕᤧᤴ ᤌᤠᤖᤡᤰ ᤔᤧᤍᤥᤛᤢᤀᤠᤱ ᤘᤕᤧ॥

¹⁰ ᤏᤢᤛᤡᤃᤣᤰᤐᤠ ᤗᤠᤀᤥᤒᤠ ᤏᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤛᤥᤗᤥᤔᤏᤖᤧ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤔᤥ ᤐᤣ᤺ᤰᤔᤠᤖᤧ ᤗᤠᤃᤡ ᤛᤧᤶᤔᤢᤀᤡ ᤐᤡᤖᤢᤛᤡ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤍᤠᤀᤢᤍᤧᤴ ᤏᤢ ᤛᤥᤗᤥᤔᤏᤧᤴ ᤂᤶᤓᤩᤠᤱ ᤂᤢᤏᤧ᤹ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤛᤡᤒᤠ ᤁᤧᤖᤧᤰ ᤏᤢ᤹ᤔᤠᤍᤠᤔᤠ ᤕᤧᤴᤏᤡᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤋᤩᤧᤀᤠᤱ ᤔᤧᤛ᤺ᤳᤋᤧᤖ ᤔᤧᤒᤣᤖᤥ॥

ᤛᤥᤗᤥᤔᤏ ᤜᤠᤱᤅᤡᤸᤗᤧ ᤕᤠᤶᤔᤥ ᤛᤢᤑᤥ ᤏᤡᤛᤢ᤹

¹¹ ᤀᤠᤸᤗ ᤛᤥᤗᤥᤔᤏᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤏᤢ ᤜᤠᤱᤜᤡᤶᤔᤡᤴ ᤆᤥᤃᤢᤛᤢᤖᤢᤸᤗᤧ ᤔᤠᤱᤜᤡᤶᤔᤡᤴ ᤏᤢ ᤂᤢᤏᤧ᤹ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤏᤡᤱᤛᤣᤰ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤠᤱ ᤁᤢᤗᤡᤱᤍᤥ ᤁᤧᤖᤧᤖ ᤆᤥᤃᤢᤛᤢᤖᤢ॥

¹² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤴ ᤛᤧᤴᤍᤡᤰ ᤛᤥᤗᤥᤔᤏᤖᤧᤀᤥ ᤀᤥ᤺ᤴᤎᤠᤰᤛᤡᤱᤅᤠᤱ ᤀᤰᤂᤣ ᤔᤧᤳᤋᤢᤖᤥ— “ᤀᤠᤱᤃᤠ᤹ ᤂᤧᤏᤧ᤹ ᤁᤧᤒᤣᤗᤡᤴ ᤂᤧᤵᤛᤢᤱ. ᤜᤧᤰᤁᤩᤠᤱ ᤁᤴ ᤋᤧᤴᤏᤡᤴ ᤀᤠᤱᤃᤠ᤹ ᤀᤠᤗᤠᤃᤡ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤍᤧᤴ ᤛᤣᤃᤢᤱ॥

¹³ “ᤀᤠᤸᤗ ᤀᤠᤱᤃᤠ᤹ ᤋᤠᤱᤛᤠᤱᤒᤧᤴ ᤛᤢᤒᤢᤱᤅᤠᤱ ᤘᤜᤡᤳ ᤔᤧᤎᤠᤏᤧᤴᤏᤡᤸᤗᤧ. ᤀᤡᤃᤪ ᤗᤠᤈᤣᤴ ᤔᤧᤱᤔᤠ ᤑᤠ᤹ᤀᤠᤱ ᤏᤡ᤺ᤱᤄᤢᤰᤘᤠᤜᤠ᤹ ᤀᤡᤱᤈᤠᤱ ᤐᤡᤖᤢᤱᤛᤡᤱᤅᤡᤸᤗᤧ. ᤁᤡᤃᤪ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤀᤥ ᤔᤠᤱᤍᤢᤰᤔᤠ ᤐᤠᤱᤄᤢᤱ ᤋᤠᤛᤢᤱᤅᤡᤸᤗᤧ.

¹⁴ ᤀᤠᤵᤑᤣᤰ ᤀᤠᤔᤡᤱ ᤁᤧᤒᤠ᤺ᤵᤐᤠ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤆᤢᤱᤈᤡᤃᤧᤴ ᤐᤣᤗᤡ ᤔᤧᤓᤠᤰᤁᤠ. ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤧᤃᤥ᤺ᤳᤋᤠᤀᤠᤱ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤗᤠᤶ ᤔᤧᤏᤢ᤺ᤱᤏᤧᤓᤃᤪ ᤀᤠᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤃᤧᤴ ᤋᤢᤘᤠᤴ ᤂᤧᤵᤛᤢᤱ᤹. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤗᤧᤵᤔᤡ ᤐᤡᤖᤢᤱᤛᤡᤱᤅᤠᤱ ᤂᤢᤴᤇᤡ᤹ ᤗᤠᤈᤣᤴ ᤏᤢ᤹ᤍᤠᤖ ᤆᤥᤃᤢᤱ᤹॥

¹⁵ ᤀᤠᤸᤗ ᤁᤴ ᤋᤧᤴᤏᤥ ᤁᤧᤈᤥᤃᤢᤶᤒᤠ ᤐᤣᤗᤡᤃᤧᤴ ᤋᤢᤘᤠᤴ ᤏᤢᤖᤡᤰᤁᤠᤱ ᤂᤧᤶᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤏᤧᤰᤂᤥ᤹ᤒᤠᤜᤠ᤹ ᤏᤢ ᤀᤠᤔᤡᤰᤜᤠ᤹ ᤜᤱ ᤔᤧᤳᤋᤢᤱ᤹॥

¹⁶ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤂᤧᤵᤔᤥ ᤛᤍᤠᤍᤡᤱ ᤘᤠ᤹ᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤁᤴ ᤔᤠᤱᤜᤡᤶᤔᤡᤴ ᤛᤣᤃᤢᤱᤅᤠᤱ ᤕᤢᤱ᤹. ᤜᤧᤰᤁᤩᤠᤱ ᤂᤧᤴ ᤀᤠᤱᤃᤠ᤹ ᤛᤣᤛᤣ ᤆᤥᤃᤢᤱᤅᤠᤱ ᤕᤢᤱ᤹॥ ᤀᤠᤱᤃᤠ᤹ ᤀᤠᤔᤡᤰᤛᤠᤴ ᤏᤢ ᤀᤠᤱᤃᤠ᤹ ᤀᤠᤏᤡᤱᤘᤠᤴ ᤀᤠᤓᤧᤸᤗᤧᤛᤠᤱ ᤂᤧᤵᤔᤥ ᤘᤠ᤹ᤖᤥ॥

¹⁷ “ᤂᤧᤏᤧ᤹ ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤁᤧᤀᤡ᤺ᤳᤋᤢ ᤁᤧᤏᤠ᤺ᤳᤋᤢᤖ ᤜᤧᤰᤁᤩᤠᤱ ᤛᤠᤶᤕᤥᤌᤡᤶᤜᤠ᤹ ᤁᤧᤏᤠ᤺ᤳᤋᤢ ᤁᤧᤍᤡᤶᤍᤢᤖ ᤁᤧᤶᤒᤠ ᤍᤠᤀᤢᤍᤧᤴ ᤀᤠᤱᤃᤠ᤹ ᤀᤠᤏᤡᤔᤥ ᤗᤠᤱᤄᤣᤃᤧᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤗᤠᤱᤃᤧᤄᤣ᤺ᤰᤏᤣᤃᤪ. ᤂᤧᤏᤧ᤹ ᤁᤧᤜᤠᤱᤕᤢᤰᤏᤠᤴ ᤕᤥᤎᤥ ᤔᤧᤸᤗ᤹ᤔᤏᤠᤒᤠ ᤆᤥᤃᤢᤱ᤹॥

¹⁸ ᤂᤧᤏᤧ᤹ ᤁᤧᤶᤒᤠ ᤍᤠᤀᤢᤍᤧᤴ ᤔᤠᤱᤜᤢᤵᤗᤠᤶ ᤀᤰᤂᤣ ᤔᤧᤳᤋᤢᤱᤅᤠᤱ ᤘᤕᤠᤱᤒᤠ ᤁᤢᤀᤡᤛᤡᤰ. ‘ᤀᤡᤛᤪᤠᤀᤡᤗᤀᤥ ᤜᤠᤱᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤗᤳᤇᤠ ᤔᤏᤠᤖᤧᤀᤠᤱ ᤁᤧᤴᤜᤠᤵᤏᤧᤴ᤹॥’

¹⁹ “ᤁᤖ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱᤒᤠ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤏᤢ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤁᤧᤴᤏᤠ᤺ᤳᤋᤢᤶᤔᤡᤴᤏᤠᤱ ᤂᤧᤱᤜᤠ᤹ ᤁᤧᤗᤧᤖᤢᤶ ᤁᤧᤍᤣᤛᤢᤶ ᤜᤧᤰᤁᤩᤠᤱ ᤁᤧᤒᤣᤃᤡᤀᤠᤱ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶᤔᤠᤱ ᤂᤧᤱᤜᤠ᤹ ᤔᤠᤱᤛᤧᤘᤠ ᤁᤧᤔᤧᤳᤋᤢᤶᤛᤡᤶᤏᤧᤓᤃᤪ.

²⁰ ᤀᤠᤱᤃᤠ᤹ ᤂᤧᤏᤡ᤹ ᤐᤡᤏᤡᤱᤒᤠ ᤀᤠᤗᤠᤈᤣ᤹ᤀᤥᤗᤠᤶ ᤀᤠᤱᤃᤠ᤹ ᤀᤡᤛᤪᤠᤀᤡᤗᤧᤴ ᤁᤢᤒᤢᤱ ᤌᤧᤷᤗᤧ ᤜᤠ᤹ᤕᤠᤰ ᤀᤠ᤺ᤰᤂᤢᤱᤍᤣᤛᤢᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤡᤱᤅᤡᤸᤗᤧ ᤗᤠᤃᤡ ᤛᤣᤛᤣ ᤆᤥᤃᤢᤱᤒᤠ ᤁᤴ ᤔᤠᤱᤜᤡᤶᤔᤡᤴ ᤏᤠ᤹ᤖᤢᤱ᤹॥ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤴ ᤗᤳᤇᤠ ᤆᤧ᤹ᤕᤠ ᤀᤡᤱᤍᤥ ᤔᤧᤵᤔᤠ ᤏᤢ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤆᤥᤃᤢᤱᤗᤥ॥

²¹ ᤁᤶᤓᤗ᤹ᤖᤡᤰ ᤁᤴ ᤔᤠᤱᤜᤡᤶᤔᤡᤴ ᤀᤠᤸᤗᤥ ᤁᤢᤜᤠᤱᤘᤠ ᤁᤢᤔᤠᤱᤘᤠ ᤁᤧᤕᤠᤰᤐᤠ ᤆᤥ᤺ᤰᤛᤠᤱ ᤁᤧᤒᤣ᤺ᤰᤐᤠ ᤁᤧᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤁᤴ ᤔᤧᤏᤡᤛᤢ᤹ ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤡᤱᤗᤧ᤹ᤗᤧ᤹ ᤗ᤹ᤀᤠᤱ ᤀᤰᤂᤣ ᤔᤧᤗ᤹ᤖ ᤐᤠᤴ ᤛᤣ᤺ᤴᤍᤥ ᤔᤧᤈᤥᤃᤢ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤌᤣᤀᤠᤱ ᤁᤴ ᤗᤠᤈᤣᤴ ᤜᤧᤰᤁᤩᤠᤱ ᤁᤴ ᤔᤠᤱᤜᤡᤶᤔᤡᤴᤏᤢ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥᤃᤢᤒᤠᤒᤣ᥅’

²² ᤔᤏᤠᤜᤠ᤹ᤖᤧ ᤀᤰᤋᤱᤒᤠ ᤏᤢᤃᤵ ᤔᤧᤒᤡᤖᤢᤛᤡ᤹. ‘ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤱᤜᤠ᤹ᤖᤧ ᤔᤧᤏᤠ᤹ᤖᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤘᤣ᤹ ᤔᤠᤱᤜᤠ᤹ ᤔᤧᤍᤡᤶᤍᤢ ᤔᤧᤏᤠ᤺ᤳᤋᤢᤛᤡᤀᤠᤱ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡᤖ ᤔᤧᤜᤧᤵᤋᤢᤛᤡᤖ ᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤧᤖᤧᤰ ᤋᤢᤰᤂᤣ ᤗᤠᤰᤂᤣᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤋᤠᤖᤢᤒᤠᤖᤥ॥’”