᥈ ᤛᤠᤵᤔᤢ᤺ᤴᤎᤢᤶ 35 - LIFOTNTᤕᤥᤛᤡᤕᤠᤜ᤺ᤸᤗᤧ ᤋᤱᤏᤠᤶ ᤋᤥᤛᤢ ( ᥈ ᤜᤠᤱ ᥈᥉:᥈᥇-᥈᥉ ) 1 ᤕᤥᤛᤡᤕᤠᤜ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤕᤖᤢᤛᤗᤧ᤺ᤶᤔᤥ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ ᤋᤥᤛᤢ॥ ᤌᤡᤰᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤥᤒᤠ ᤔᤧᤸᤗᤢᤰᤛᤠ᤺ᤳᤋᤡᤴ ᤔᤧᤛᤩᤧᤖᤢ॥ 2 ᤂᤢᤏᤧ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤠ᤺ᤶᤒᤰᤁᤥ ᤕᤢᤰᤋᤡᤱ ᤆᤥᤃᤢᤛᤡ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡ॥ 3 ᤂᤢᤏᤧ᤹ ᤕᤜᤘᤣ ᤍᤠᤱᤒᤠᤀᤥ ᤁᤧᤍᤥ᤺ᤴᤇᤡᤱᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤁᤧᤜᤢ᤹ᤒᤠ ᤗᤧᤒᤡᤜᤠ᤹ ᤔᤧᤳᤋᤢᤛᤡ. “ᤀᤡᤛᤪᤠᤀᤡᤗᤒᤠ ᤜᤠᤱ ᤍᤠᤀᤢᤍᤖᤧ ᤁᤢᤛ᤻ᤛᤠ ᤛᤥᤗᤥᤔᤏᤖᤧ ᤆᤥᤃᤢᤒᤠ ᤔᤠᤱᤜᤡᤶᤔᤥ ᤛᤣᤛᤣ ᤛᤴᤍᤥᤰᤁᤡᤴ ᤕᤢᤰᤂᤧᤶᤔᤧ᤹॥ ᤂᤧᤴ ᤂᤡᤏᤡ᤹ ᤑᤰᤋᤠᤱᤅᤥ ᤐᤱᤔᤠᤃᤵᤔᤠ ᤔᤧᤏᤢ᤹ᤏᤧᤴ᤹॥ ᤀᤠᤸᤗᤃ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤠ᤺ᤶᤒᤰ ᤆᤥᤃᤧᤶᤔᤧ᤹॥ 4 ᤀᤡᤛᤪᤠᤀᤡᤗᤒᤠ ᤜᤠᤱ ᤍᤠᤀᤢᤍᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤛᤥᤗᤥᤔᤏᤖᤧ ᤁᤧᤒᤡᤖᤡᤒᤠ ᤛᤠᤵᤔᤏᤠᤒᤠ ᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ᤖ ᤂᤡᤏᤡ᤹ ᤔᤏᤠᤛᤢᤶᤜᤠ᤹ ᤁᤢᤀᤡᤛᤡᤰ ᤜᤡᤶᤛᤕᤱ ᤜᤡᤶᤛᤕᤱ ᤆᤥ᤺ᤰᤁᤠᤛᤡᤶᤔᤧ᤹ᤀᤠᤱ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹॥ 5 “ᤂᤡᤏᤡ᤹ ᤜᤡᤶᤒᤣᤛᤠᤱᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤵᤔᤥ ᤁᤢᤗᤰ ᤁᤢᤗᤰ ᤐᤥ᤺ᤰᤂᤧᤶᤔᤧ᤹ᤀᤠᤱ ᤔᤏᤠᤜᤠ᤹ ᤑᤠ᤹ᤔᤠᤛᤡᤖᤧ ᤗᤠᤃᤡ ᤛᤣᤛᤣᤒᤠᤍᤧᤴᤏᤥ ᤕᤧᤒᤠᤶᤔᤧ᤹॥ 6 ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤥᤒᤠ ᤔᤧᤸᤗᤢᤰᤛᤠ᤺ᤳᤜᤠ᤹ ᤛᤩᤧᤖᤧᤶᤛᤡᤶᤔᤧ᤹. ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤢᤳᤌᤥ ᤆᤥ᤺ᤰᤁᤠᤛᤡᤶᤔᤧ᤹ᤀᤠᤱ ᤔᤥᤛᤠᤴ ᤗᤠᤶᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤁᤧᤒᤡᤖᤡᤒᤠ ᤜᤧᤰᤁᤣ ᤂᤡᤏᤡ᤹ ᤜᤡᤶᤒᤣᤛᤠᤱᤒᤠ ᤑᤢ᤹ᤏᤢᤛᤠᤜᤠ᤹ᤖᤧ ᤗᤠᤃᤡ ᤔᤧᤸᤗᤢᤰᤛᤠ᤺ᤳᤜᤠ᤹ ᤕᤠᤖᤡᤵ ᤆᤥᤃᤧᤶᤛᤡᤶᤔᤧ᤹॥” 7 ᤕᤥᤛᤡᤕᤠᤜ᤺ᤸᤗᤧ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤥ ᤂᤧᤵᤔᤥ ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠ ᤔᤧᤴᤈᤥᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤀᤠᤵᤑᤣᤰ ᤁᤢᤕᤠᤱᤛᤠ ᤁᤢᤴᤎᤣᤗᤠᤶ ᤜᤧᤴᤇᤡᤱ ᤛᤢᤶᤒᤥᤱ ᤔᤧᤸᤗᤢᤰᤜᤠ᤹ ᤏᤢ ᤔᤧ᤺ᤴᤍᤠᤜᤠ᤹ ᤜᤧᤰᤁᤩᤠᤱ ᤜᤧᤴᤇᤡᤱ ᤛᤢᤶᤛᤡ ᤐᤡᤳᤌᤰᤛᤠᤜᤠ᤹ᤀᤠᤱ ᤐᤡᤖᤢᤛᤡ॥ 8 ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧᤀᤠᤱ ᤔᤏᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ᤖᤧ ᤗᤠᤃᤡ ᤀᤠᤒᤠᤅᤣ ᤏᤡᤱᤘᤠ᤹ᤗᤠᤶᤒᤠᤒᤠ ᤜᤢᤰᤘᤠ ᤔᤧᤒᤡᤖᤢᤛᤡ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤕᤢᤰ ᤁᤧᤈᤥ᤺ᤰᤐᤠ ᤜᤡᤸᤁᤡᤕᤠᤜ. ᤈᤁᤖᤡᤕᤠ ᤏᤢ ᤕᤜᤡᤀᤣᤗᤖᤧ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤡᤸᤗᤧ ᤗᤠᤃᤡ ᥈.᥌᥆᥆ ᤆᤢᤈᤢᤰᤛᤠ ᤌᤰᤛᤠᤜᤠ᤹ ᤏᤢ ᥉᥆᥆ ᤐᤡᤳᤌᤰᤛᤠᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤒᤡᤖᤢᤛᤡ॥ 9 ᤜᤧᤰᤁᤩᤠᤱ ᤁᤥᤏᤏᤩᤠᤜ ᤏᤢ ᤂᤢᤏᤧ᤹ ᤁᤢᤴᤛᤠ᤹ᤛᤡ ᤛᤔᤠᤕᤠᤜ ᤜᤧᤰᤁᤩᤠᤱ ᤏᤋᤏᤣᤗ. ᤂᤶᤓᤩᤠᤱ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤜᤛᤒᤩᤠᤜ. ᤕᤜᤡᤀᤣᤗ ᤏᤢ ᤕᤥᤈᤠᤒᤠᤍᤖᤧ ᤆᤥ᤺ᤰᤕᤢᤶᤓᤥ ᤂᤥᤔᤠ ᤛᤡᤍᤢᤱᤈᤓᤠ ᥋.᥆᥆᥆ ᤆᤢᤈᤢᤰᤛᤠ ᤌᤰᤛᤠᤜᤠ᤹ ᤏᤢ ᥋᥆᥆ ᤐᤡᤳᤌᤰᤛᤠᤜᤠ᤹ ᤗᤧᤒᤡᤜᤠ᤹ ᤔᤧᤒᤡᤖᤢᤛᤡ॥ 10 ᤔᤠᤱᤛᤧᤘᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤏᤡ᤺ᤴᤎᤥ ᤐᤥ᤺ᤰᤂᤧᤆᤢᤖᤧᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ᤃ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤔᤏᤠᤛᤢᤶᤜᤠ᤹ ᤜᤧᤰᤁᤣ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤕᤧᤒᤠᤶᤔᤧ᤹ ᤔᤧᤳᤋᤢᤛᤡᤒᤠ ᤋᤧᤴᤏᤥ ᤔᤧᤕᤧᤶᤛᤡᤱ॥ 11 ᤂᤧᤒᤩᤠᤱ ᤗᤧᤒᤡᤜᤠ᤹ᤖᤧ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤥᤒᤠ ᤔᤧᤸᤗᤢᤰᤛᤠ᤺ᤳᤜᤠ᤹ ᤔᤧᤛᤩᤧᤖᤢᤛᤡ. ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤛᤠᤔᤠᤰᤂᤡ᤺ᤴ ᤇ᤻ᤘᤠ᤺ᤰ ᤜᤢᤱᤔᤠᤍᤣᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤒᤡᤖᤢᤛᤡ. ᤜᤧᤰᤁᤩᤠᤱ ᤂᤧᤴ ᤌᤰᤛᤠᤜᤠ᤹ᤖᤧ ᤁᤢᤜᤥᤖᤡᤰᤐᤠᤜᤠ᤹ ᤔᤧᤎᤡᤰᤋᤢ॥ 12 ᤂᤧᤱᤜᤠ᤹ᤖᤧ ᤔᤥᤛᤠ᤺ᤸᤗᤧ ᤁᤢᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤢᤀᤡᤛᤡᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤠᤖᤧ ᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤎᤢᤱᤈᤓᤠᤜᤠ᤹ ᤗᤠ᤺ᤳᤗᤠ᤺ᤳ ᤔᤧᤛᤧᤴᤍᤢ ᤔᤧᤒᤡᤖᤢᤛᤡ. ᤜᤧᤰᤁᤩᤠᤱ ᤐᤡᤳᤌᤰᤛᤠᤜᤠ᤹ᤀᤠᤱ ᤔᤧᤛᤧᤴᤍᤢ ᤔᤧᤒᤡᤖᤢᤛᤡ॥ 13 ᤂᤧᤱᤜᤠ᤹ᤖᤧ ᤌᤡᤶ ᤁᤢᤀᤡᤛᤡᤰ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤥᤒᤠ ᤛᤠᤴ ᤔᤡᤀᤥ ᤔᤧᤀᤥ᤹ᤖᤢ. ᤜᤧᤰᤁᤩᤠᤱ ᤛᤣᤛᤣ ᤜᤢᤰᤘᤠᤜᤠ᤹ᤃ ᤑᤛᤡ. ᤂᤵᤐᤩᤠ ᤏᤢ ᤂᤣ᤺ᤰᤕᤠᤀᤥ ᤔᤧᤎᤧᤴᤍᤢᤀᤠᤱ ᤂᤧᤱᤜᤠ᤹ ᤂᤰᤐᤧᤳ ᤜᤠᤖᤠᤜᤠᤖᤠ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡ॥ 14 ᤂᤧᤴ ᤀᤣᤃᤠᤱ ᤜᤠᤖᤢᤏᤖᤧ ᤁᤢᤎᤠ᤺ᤰᤁᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤢ᤺ᤴᤇᤡᤰ ᤌᤧᤶᤒᤠᤀᤣ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤛᤠᤛᤥ᤺ᤳ ᤋᤥ᤺ᤶᤔᤠᤀᤥ ᤛᤡ᤹ᤔᤧᤴᤇᤡ᤹ ᤔᤧᤕᤠᤃᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤃᤡ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤗᤠᤃᤡ ᤛᤠᤜᤠ᤹ ᤁᤢᤗᤰ ᤔᤧᤛᤧᤴᤍᤢ॥ ᤁᤶᤓᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤏᤢ ᤜᤠᤖᤢᤏᤖᤧ ᤁᤢᤎᤠ᤺ᤰᤁᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤗᤠᤃᤡ ᤛᤠᤗᤰᤜᤠ᤹ ᤕᤠᤖᤡᤵ ᤔᤧᤈᤥᤃᤢ॥ 15 ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤀᤡᤈᤠ᤺ᤱᤅᤥ ᤔᤢᤖᤠᤔᤧᤔᤧᤳᤋᤢᤛᤡᤒᤠ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤋᤧᤴᤏᤥ ᤁᤧᤘᤠ᤹ᤒᤠ ᤀᤠᤛᤠᤐᤖᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠ ᤛᤠᤶᤗᤥ ᤛᤠᤶᤃᤧᤔᤧᤵᤐᤠ ᤗᤧᤒᤡᤜᤠ᤹ ᤀᤠᤶᤓᤠ ᤁᤴᤜᤠ᤹ᤀᤣ ᤔᤧᤘᤕᤧᤖᤥ—ᤀᤠᤛᤠᤐ. ᤜᤣᤔᤠᤏ ᤏᤢ ᤜᤠᤱᤅᤡᤸᤗᤧ ᤁᤢᤎᤢᤶᤕᤠ ᤁᤧᤀᤡᤒᤠ ᤕᤍᤢᤋᤢᤏ॥ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ ᤗᤧᤒᤡᤜᤠ᤹ᤖᤧ ᤂᤧᤱᤜᤠ᤹ᤖᤧ ᤜᤢᤴᤇᤡ᤹ ᤗᤠᤃᤡ ᤕᤠᤖᤡᤵ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤔᤠ ᤗᤠᤶᤎᤣᤳ ᤌᤰᤔᤠᤒᤠ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤴ ᤗᤧᤵᤔᤠ ᤔᤧᤒᤥ᤺ᤰᤂᤧᤴ॥ 16 ᤁᤴ ᤐᤖᤡᤰᤗᤧ ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ ᤋᤥᤔᤠ ᤏᤢ ᤕᤜᤘᤣ ᤍᤠᤱᤒᤠᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤀᤥᤒᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤡᤴ ᤁᤧᤖᤧᤖ ᤂᤧᤴ ᤕᤧᤶᤔᤥ ᤔᤧᤈᤥᤃᤢ॥ 17 ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤴ ᤕᤧᤶᤔᤥ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ ᤔᤧᤍᤥᤛᤢ. ᤜᤧᤰᤁᤩᤠᤱ ᤏᤢᤛᤡ ᤕᤧᤴ ᤌᤠᤖᤡᤰ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶ ᤔᤧᤍᤥᤛᤢ॥ 18 ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤛᤔᤢᤀᤣᤗᤖᤧ ᤁᤢᤕᤧᤶᤔᤠᤱ ᤁᤳᤌᤥ ᤁᤴ ᤐᤖᤡᤰᤗᤧ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ ᤀᤡᤛᤪᤠᤀᤡᤗᤀᤥ ᤀᤠᤓᤧᤸᤗᤧᤀᤠᤱ ᤔᤧᤴᤍᤥᤀᤣ ᤘᤕᤧ॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤗᤧᤒᤡᤜᤠ᤹ ᤏᤢ ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹ᤏᤢ ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠ ᤁᤧᤖᤧᤰ ᤕᤜᤢᤍᤠ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠᤏᤢ ᤛᤥᤛᤥᤖᤡᤰ ᤕᤥᤛᤡᤕᤠᤜ᤺ᤸᤗᤧ ᤋᤥᤛᤢᤒᤠ ᤜᤧᤰᤁᤣ ᤀᤡᤛᤪᤠᤀᤡᤗᤒᤠ ᤘᤣ᤹ ᤀᤠᤳᤋᤡᤴ ᤜᤠᤱᤜᤠ᤹ᤖᤧᤀᤠᤱ ᤁᤴ ᤐᤖᤡᤰᤗᤧ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶ ᤀᤠᤓᤧᤸᤗᤧᤀᤠᤱ ᤔᤧᤴᤍᤥᤀᤣ ᤔᤧᤘᤕᤧ॥ 19 ᤕᤥᤛᤡᤕᤠᤜ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤁᤴ ᤆᤥ᤺ᤰᤕᤢᤶᤓᤥ ᤂᤥᤔᤠ ᤋᤱᤏᤠᤶᤔᤡᤴ ᤔᤧᤍᤥᤛᤢᤀᤠᤱ ᤘᤕᤧᤖᤥ॥ ᤕᤥᤛᤡᤕᤠᤜ ᤜᤠᤱᤅᤡᤴ ᤔᤠᤛᤡᤱ ( ᥈ ᤜᤠᤱ ᥈᥉:᥈᥎-᥉᥆ ) 20 ᤁᤴᤜᤠ᤹ ᤁᤧᤖᤧᤰ ᤀᤣᤃᤠᤱ ᤕᤥᤛᤡᤕᤠᤜ᤺ᤸᤗᤧ ᤁᤶᤓᤗ᤹ᤖᤡᤰ ᤔᤠᤱᤜᤡᤶᤔᤥᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤋᤱᤛᤢᤛᤢᤖᤢᤸᤗᤧ ᤔᤡᤛᤪᤒᤠ ᤜᤠᤱ ᤏᤣᤁᤥᤴ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤁᤷᤁᤔᤡᤛ ᤕᤧᤰᤕᤰᤁᤡᤴ ᤌᤱᤅᤥ ᤑᤵᤔᤠᤖᤧ ᤗᤠᤃᤡ ᤗ᤺ᤴᤍᤧ ᤌᤠᤅᤧ. ᤜᤧᤰᤁᤩᤠᤱ ᤕᤥᤛᤡᤕᤠᤜᤴ ᤂᤧᤴᤏᤢ ᤌᤰᤛᤧ ᤐᤣ॥ 21 ᤁᤖ ᤏᤣᤁᤥᤸᤗᤧ ᤁᤶᤓ ᤔᤧᤳᤋᤢᤛᤡᤀᤠᤱ ᤂᤢᤏᤧ᤹ᤀᤥ ᤜᤠᤱᤗᤠᤀᤡᤱᤒᤠᤜᤠ᤹ ᤐᤠᤱᤄᤢ ᤋᤠᤛᤢᤛᤡ. “ᤕᤜᤢᤍᤠᤒᤠ ᤜᤠᤱᤅᤣ. ᤀᤠᤍᤠᤱᤒᤠ ᤏᤢ ᤀᤠᤱᤃᤠ᤹ ᤗᤢᤶᤔᤥ ᤌᤣ ᤂᤧᤔᤠ᤹ ᤘᤠ᤹ᤀᤡ᥅ ᤀᤠᤀᤡᤴ ᤀᤠᤱᤃᤠ᤹ ᤀᤠᤍᤠᤱᤒᤠᤏᤢ ᤌᤧᤔᤠᤀᤠᤱ ᤂᤧᤔᤠ᤹ ᤜᤥᤵ. ᤁᤖ ᤀᤠᤱᤃᤠ᤹ ᤀᤠᤳᤋᤡᤴᤜᤠ᤹ᤏᤢ ᤌᤱ ᤆᤥ᤺ᤰᤁᤠᤖ ᤐᤳᤋᤠ ᤂᤧᤱᤜᤠ᤹ᤏᤢᤖᤰ ᤂᤧᤔᤠ᤹ ᤘᤠ᤹॥ ᤀᤠᤱᤃᤠ᤹ ᤜᤠᤖᤠ ᤐᤣᤃᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤳᤋᤠᤱᤅᤠᤱ ᤘᤠ᤹. ᤁᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤶᤒᤥ᤺ᤰᤁᤧ᤹. ᤂᤢᤏᤧ᤹ ᤀᤠᤱᤃᤠ᤹ ᤗᤧᤵᤔᤠᤱ ᤘᤠ᤹. ᤔᤣ᤺ᤴᤏᤧᤓᤃᤪ ᤂᤢᤏᤧ᤹ ᤀᤠᤍᤠᤱᤒᤠ ᤂᤠᤵᤐᤢᤌᤩ᤺ᤱ ᤁᤧᤈᤥᤰ॥” 22 ᤜᤧᤰᤁᤣᤛᤠᤱ ᤕᤥᤛᤡᤕᤠᤜᤴ ᤂᤢᤏᤧ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤀᤡ᤺ᤳᤋᤢᤒᤠᤗᤠᤶ ᤏᤢ᤺ᤱᤔᤠ ᤔᤧᤍᤧᤴᤍᤧᤴ. ᤁᤖ ᤏᤣᤁᤥ᤺ᤴᤏᤢ ᤋᤧᤴᤎᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤢᤈᤠᤱᤜᤠ᤹ ᤗᤧᤰᤋᤢ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤣᤁᤥᤴ ᤔᤧᤳᤋᤢᤒᤠ ᤀᤡᤱᤈᤠᤱᤅᤡᤴ ᤂᤢᤏᤧ᤹ ᤂᤧᤶᤔᤠ ᤔᤧᤍᤧᤴᤍᤧᤴ. ᤜᤧᤰᤁᤩᤠᤱ ᤔᤃᤡᤍ᤻ᤍᤥᤒᤠ ᤏᤧᤏᤧᤒᤠᤍᤧᤴᤏᤥ ᤌᤱ ᤆᤥ᤺ᤰᤛᤧ ᤂᤢᤏᤧ᤹ ᤂᤡᤔᤥ ᤌᤠᤛᤡᤱ॥ 23 ᤂᤧᤒᤩᤠᤱ ᤋᤥᤱ ᤗᤡ ᤁᤧᤃᤵᤐᤠᤜᤠ᤹ᤖᤧ ᤕᤥᤛᤡᤕᤠᤜ ᤜᤠᤱᤅᤡᤴ ᤔᤧᤀᤠᤒᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤰ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤋᤧᤴᤎᤱ ᤁᤧᤒᤥᤱᤒᤠᤍᤧᤴᤏᤥᤗᤠᤶ ᤗᤠ᤺ᤰᤁᤠᤳ ᤀᤠᤗ᤺ᤳᤋᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤁᤠ᤺ᤴᤍᤠᤱ॥” 24 ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤀᤴᤗᤠᤎᤠᤀᤥᤗᤠᤶ ᤔᤧᤗ᤺ᤳᤋᤢ ᤜᤧᤰᤁᤩᤠᤱ ᤂᤢᤏᤧ᤹ ᤏᤧᤳᤇᤡᤃᤣᤰᤐᤠ ᤁᤢᤀᤴᤗᤠᤎᤠᤀᤥ ᤔᤧᤃᤣ᤺ᤳᤋᤢᤀᤠᤱ ᤕᤖᤢᤛᤗᤧᤔ ᤔᤧᤎᤠᤰᤋᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥᤀᤣ ᤕᤃᤢᤈᤱᤛᤡ ᤐᤣᤀᤠᤱ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤎᤠᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤅᤥ ᤔᤧᤏᤧᤛ᤻ᤛᤢ॥ ᤜᤧᤰᤁᤩᤠᤱ ᤁᤧᤖᤧᤰ ᤕᤜᤢᤍᤠ ᤏᤢ ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹ ᤔᤧᤖᤡᤱ ᤔᤧᤎᤰᤋᤧ॥ 25 ᤕᤷᤔᤡᤕᤠ᤺ᤸᤗᤧᤀᤠᤱ ᤕᤥᤛᤡᤕᤠᤜ᤺ᤸᤗᤧ ᤁᤢᤗᤠᤃᤡ ᤔᤧᤖᤡᤱᤎᤰᤔᤠ ᤛᤠᤶᤗᤥᤜᤠ᤹ ᤛᤠᤵᤋᤢ॥ ᤛᤠᤶᤗᤥ ᤛᤠᤶᤃᤧᤔᤧᤵᤐᤠᤜᤠ᤹. ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠ ᤂᤰᤐᤧᤳᤗᤧ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤁᤴ ᤔᤧᤖᤡᤱᤎᤰᤔᤠ ᤛᤠᤶᤗᤥᤜᤠ᤹ᤀᤥ ᤕᤥᤛᤡᤕᤠᤜᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ᤹॥ ᤁᤴ ᤔᤧᤖᤡᤱᤎᤰᤔᤠ ᤛᤠᤶᤗᤥᤜᤠ᤹ ᤀᤡᤛᤪᤠᤀᤡᤗᤀᤥ ᤗᤳᤇᤠ ᤌᤠ᤺ᤰᤕᤢᤌᤡᤶ ᤐᤥ᤺ᤰᤛᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤔᤧᤖᤡᤱ ᤛᤠᤵᤐᤴᤏᤥ ᤁᤴᤜᤠ᤹ ᤂᤥᤍᤧᤳ॥ 26 ᤕᤥᤛᤡᤕᤠᤜ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤵᤐᤠ ᤁᤢᤀᤡᤛᤡᤰ— 27 ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰᤁᤣ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.