᥈ ᤛᤠᤵᤔᤢ᤺ᤴᤎᤢᤶ 34 - LIFOTNTᤕᤜᤢᤍᤠᤒᤠ ᤜᤠᤱ ᤕᤥᤛᤡᤕᤠᤜ ( ᥈ ᤜᤠᤱ ᥈᥈:᥇-᥈ ) 1 ᤕᤥᤛᤡᤕᤠᤜᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤋᤱᤒᤣ ᤕᤧᤳᤇᤡ ᤕᤥᤖᤧ॥ ᤕᤖᤢᤛᤗᤧ᤺ᤶᤔᤥ ᤂᤢᤏᤧ᤹ ᤛᤢᤶᤒᤥᤱᤅᤠᤱ ᤌᤡᤰ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ 2 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤂᤢᤏᤧ᤹ ᤜᤠᤒᤠ ᤂᤧᤴ ᤆᤥᤃᤢ॥ ᤂᤢᤏᤧ᤹ ᤆᤢᤰᤘᤠ ᤑᤧᤱᤘᤠ ᤔᤧᤸᤗ᤹ᤀᤣ ᤂᤢᤏᤧ᤹ ᤁᤢᤛᤢᤎᤧᤒᤠ ᤍᤠᤀᤢᤍᤖᤧ ᤏᤠ᤺ᤳᤋᤢ ᤋᤡᤶᤍᤢᤒᤠ ᤁᤧᤖᤧᤰ ᤗᤠᤶᤜᤠ᤹ᤀᤥ ᤗᤠᤱᤄᤣᤃᤧᤖᤥ॥ 3 ᤕᤥᤛᤡᤕᤠᤜ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤂᤢᤏᤧ᤹ ᤌᤠᤱᤒᤧᤴ ᤘᤕᤧᤸᤗᤧ ᤂᤢᤏᤧ᤹ ᤁᤢᤛᤢᤎᤧᤒᤠ ᤍᤠᤀᤢᤍᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤥ᤺ᤵᤔᤠ ᤜᤱᤔᤠ ᤜᤣ᤺ᤰᤋᤢ॥ ᤜᤧᤰᤁᤩᤠᤱ ᤌᤡᤒᤥᤱᤅᤠᤱ ᤏᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤌᤧᤃᤢᤜᤠ᤹ᤀᤥᤒᤠ ᤔᤠᤱᤎᤠ᤺ᤴᤜᤠ᤹ ᤜᤧᤰᤁᤩᤠᤱ ᤀᤛᤣᤖᤠ ᤔᤠᤱ ᤛᤡᤳᤗᤠᤱᤜᤠ᤹. ᤔᤧᤗᤰᤋᤢ ᤔᤧᤄᤥ᤺ᤴᤍᤢᤀᤠᤱ ᤔᤧᤈᤥᤃᤢᤒᤠ ᤏᤢ ᤔᤧᤕᤥᤴᤍᤢᤀᤠᤱ ᤔᤧᤈᤥᤃᤢᤒᤠ ᤏᤠᤘᤠᤀᤡᤳᤗᤠᤜᤠ᤹ ᤀᤡ᤺ᤱᤔᤠᤍᤣᤔᤠ ᤜᤣ᤺ᤰᤋᤢᤛᤡ॥ 4 ᤒᤠᤗ ᤔᤠᤱᤜᤠ᤹ᤀᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤂᤢᤏᤧ᤹ ᤗᤢ᤺ᤶᤔᤠᤍᤣᤔᤠ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤢᤛᤶᤎᤠᤱᤒᤠ ᤛᤢᤰᤐᤠ ᤜᤠ᤺ᤶᤔᤠ ᤛᤠᤱᤋᤧᤖᤧ᤺ᤱᤜᤠ᤹ ᤁᤢᤶᤈᤡᤰᤔᤠ ᤔᤧᤈᤥᤃᤢ॥ ᤂᤢᤏᤧ᤹ ᤀᤛᤣᤖᤠ ᤔᤠᤱ ᤛᤡᤳᤗᤠᤱᤜᤠ᤹ ᤏᤢ ᤘᤣ᤹ ᤁᤧᤖᤧᤰ ᤏᤠᤘᤠᤀᤡᤳᤗᤠᤜᤠ᤹ ᤜᤧᤰᤁᤩᤠᤱ ᤀᤡᤳᤜᤠ᤹ ᤑᤕ᤺ᤵᤑᤕ᤺ᤵ ᤕ᤺ᤵᤛᤢᤀᤠᤱ ᤂᤠᤵᤐᤢᤌᤩ᤺ᤱ ᤆᤥᤃᤢ. ᤜᤶᤓᤩᤠᤱ ᤂᤧᤴ ᤔᤠᤱᤜᤠ᤹ᤀᤥ ᤛᤡᤍᤢᤱᤈᤓᤠ ᤁᤧᤍᤥᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤜᤠ᤹ᤀᤥ ᤂᤧᤴ ᤁᤢᤶᤈᤡᤰᤔᤠᤜᤠ᤹ ᤛᤧᤛᤢᤍᤣᤛᤢ॥ 5 ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤳᤜᤠ᤹ᤀᤠᤱ ᤂᤢᤴᤇᤡ᤹ᤀᤣ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤍᤣᤛᤢ. ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤂᤢᤏᤧ᤹ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤡᤴ ᤛᤢᤳᤌᤥ ᤆᤥᤃᤢ॥ 6 ᤂᤢᤏᤧ᤹ ᤔᤏᤛ᤻ᤛᤣ. ᤀᤣᤑᤪᤠᤀᤡᤔ. ᤛᤡᤔᤡᤕᤥᤏ ᤏᤢ ᤏᤵᤋᤠᤗᤡ ᤌᤠᤖᤡᤰᤐᤠ ᤕᤧᤰᤕᤰᤜᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤒᤪᤡᤱᤒᤠ ᤁᤧᤎᤢᤵᤐᤠ ᤁᤧᤗᤢ᤺ᤶᤒᤠ ᤐᤠᤱᤕᤰᤜᤠ᤹ᤀᤥ 7 ᤂᤥᤛᤢᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤏᤢ ᤀᤛᤣᤖᤠ ᤔᤠᤱ ᤛᤡᤳᤗᤠᤱᤜᤠ᤹ ᤛᤥ᤺ᤴᤍᤢᤍᤣᤛᤢ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤔᤧᤕᤥᤴᤍᤢᤀᤠᤱ ᤔᤧᤈᤥᤃᤢᤒᤠ ᤏᤠᤘᤠᤀᤡᤳᤗᤠᤜᤠ᤹ ᤂᤢᤏᤧ᤹ ᤁᤢᤶᤈᤡᤰᤔᤠ ᤆᤥᤃᤢ ᤐᤡᤖᤢᤛᤡ॥ ᤀᤡᤛᤪᤠᤀᤡᤗ ᤗᤠᤈᤣ᤹ ᤁᤧᤖᤧᤰ ᤁᤧᤏᤧᤒᤠ ᤛᤢᤰᤐᤠ ᤜᤠ᤺ᤶᤔᤠ ᤛᤠᤱᤋᤧᤖᤧ᤺ᤱᤜᤠ᤹ ᤂᤢᤏᤧ᤹ ᤂᤠᤵᤐᤢᤌᤩ᤺ᤱ ᤆᤥᤃᤢ ᤐᤡᤖᤢᤛᤡ॥ ᤂᤧᤒᤩᤠᤱ ᤂᤢᤏᤧ᤹ ᤕᤖᤢᤛᤗᤧᤔ ᤏᤢ᤺ᤰᤂᤧ ᤋᤩᤧᤖᤥ॥ 8 ᤕᤥᤛᤡᤕᤠᤜ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤗᤠᤈᤣᤴ ᤏᤢ ᤔᤠᤱᤜᤡᤶᤔᤡᤴ ᤛᤢᤳᤌᤥ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤛᤗᤩᤠᤜᤖᤧ ᤁᤢᤛ᤻ᤛᤠ ᤛᤠᤐᤠᤏᤧᤴ. ᤕᤧᤰᤕᤰᤁᤥᤒᤠ ᤕᤢᤰᤛᤠᤒᤠ ᤔᤠᤛᤣᤕᤠᤜᤴ ᤏᤢ ᤜᤠᤱᤈᤢᤶᤔᤥᤒᤠ ᤛᤠᤵᤗᤠ ᤁᤧᤛᤠᤵᤐᤠ ᤕᤥᤀᤠᤜᤠᤈᤖᤧ ᤁᤢᤛ᤻ᤛᤠ ᤕᤥᤀᤠ᤺ᤴ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤧᤴ ᤆᤠ᤺ᤱᤘᤠ ᤔᤧᤳᤇᤧ ᤐᤠᤱᤄᤢ ᤕᤢᤛᤢᤛᤡ॥ 9 ᤗᤠᤶᤎᤣ᤺ᤳᤋᤥ ᤀᤡᤰᤁᤥᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤗᤧᤒᤡᤜᤠ᤹ᤖᤧ ᤔᤏᤛ᤻ᤛᤣ. ᤀᤣᤑᤪᤠᤀᤡᤔ ᤏᤢ ᤀᤡᤛᤪᤠᤀᤡᤗᤀᤥ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ᤗᤠᤶ. ᤜᤧᤰᤁᤩᤠᤱ ᤕᤜᤢᤍᤠ. ᤒᤣᤏᤩᤠᤔᤡᤏ ᤏᤢ ᤕᤖᤢᤛᤗᤧ᤺ᤶᤒᤠ ᤁᤧᤖᤧᤰ ᤔᤏᤠᤜᤠ᤹ᤗᤠᤶ ᤔᤧᤓᤥᤰᤂᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤍᤠᤖᤢᤒᤠ ᤕᤠᤱᤜᤠ᤹ ᤂᤧᤱᤜᤠ᤹ᤖᤧ ᤔᤧᤍᤠ᤺ᤰᤋᤢ ᤜᤧᤰᤁᤩᤠᤱ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤸᤁᤡᤕᤠᤜᤀᤥ ᤔᤧᤒᤣᤀᤠᤱ ᤂᤢᤏᤧ᤹ ᤔᤧᤒᤡᤖᤢ॥ 10 ᤂᤢᤏᤧ᤹ ᤂᤧᤴ ᤕᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤶᤒᤠ ᤗᤰᤐᤧᤴᤛᤠᤒᤠᤜᤠ᤹ ᤜᤢᤰᤛᤢᤵᤋᤢᤛᤡ. ᤂᤶᤓᤩᤠᤱ ᤔᤠᤱᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤧᤴ ᤕᤠᤱᤅᤡᤴ ᤔᤠᤱᤜᤡᤶ ᤆᤠ᤺ᤱᤘᤠ ᤔᤧᤵᤔᤠ ᤏᤢ ᤂᤧᤴ ᤕᤠᤶᤔᤥ ᤁᤧᤎᤢᤶᤒᤠ ᤆᤥ᤺ᤰᤛᤧ ᤀᤥᤃᤵ ᤔᤧᤈᤥᤃᤢ॥ 11 ᤂᤧᤱᤜᤠ᤹ᤖᤧ ᤂᤧᤴ ᤕᤠᤱᤅᤥᤗᤠᤶ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤗᤢ᤺ᤶᤔᤠ ᤐᤣ᤺ᤰᤔᤠᤖᤧ ᤗᤠᤃᤡ ᤔᤧᤗᤧᤖᤢ ᤔᤧᤍᤣᤛᤢᤒᤠ ᤜᤡᤶᤜᤠ᤹ ᤆᤠ᤺ᤱᤘᤠ ᤔᤧᤵᤔᤠ ᤑᤠ᤹ᤀᤠᤱ ᤔᤧᤄᤰᤋᤢᤒᤠ ᤗᤢᤱᤜᤠ᤹ ᤏᤢ ᤐᤧᤖᤧᤶᤛᤡᤱᤜᤠ᤹ ᤜᤧᤰᤁᤩᤠᤱ ᤁᤢᤈᤰᤔᤠ ᤛᤡᤱᤜᤠ᤹ ᤀᤡᤱᤔᤠᤖᤧ ᤗᤠᤃᤡᤀᤠᤱ ᤛᤡᤱᤃᤧᤃᤠᤶᤒᤠᤜᤠ᤹ ᤏᤢ ᤗᤢᤱᤃᤧᤃᤠᤶᤒᤠᤜᤠ᤹ ᤔᤧᤒᤡᤖᤢᤛᤡ॥ 12 ᤁᤴ ᤔᤏᤠᤜᤠ᤹ᤖᤧ ᤁᤢᤍᤥ᤺ᤵᤔᤠ ᤏᤡᤖᤡᤰᤁᤠᤱ ᤕᤠ᤺ᤶᤒᤰ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤔᤖᤠᤖᤡ ᤌᤠ᤺ᤰᤁᤥᤒᤠ ᤗᤧᤒᤡᤜᤠ᤹ ᤕᤜᤋ ᤏᤢ ᤀᤥᤒᤍᤡᤕᤠ. ᤜᤧᤰᤁᤩᤠᤱ ᤁᤜᤠᤋ ᤌᤠ᤺ᤰᤁᤥᤒᤠ ᤈᤁᤖᤡᤕᤠ ᤏᤢ ᤔᤛᤢᤸᤗᤠᤔᤖᤧ ᤂᤢᤴᤇᤡ᤹ ᤕᤢᤰᤁᤥ ᤕᤠ᤺ᤶᤒᤰ ᤔᤧᤈᤥᤃᤢ॥ ᤁᤴ ᤗᤧᤒᤡᤜᤠ᤹ ᤁᤧᤖᤧᤰ ᤔᤢᤰᤗᤠ ᤔᤢᤱᤔᤠ ᤁᤧᤗᤧᤒᤠ ᤔᤧᤘᤕᤧ॥ 13 ᤜᤧᤰᤁᤩᤠᤱ ᤁᤧᤖᤧᤰ ᤐᤖᤡᤰᤐᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤥᤔᤧᤵᤔᤠᤛᤡ ᤕᤠ᤺ᤶᤒᤰᤁᤠᤱ ᤁᤴᤜᤠ᤹ᤖᤧᤀᤣ ᤔᤧᤈᤥᤃᤢ॥ ᤂᤧᤱᤜᤠ᤹ᤀᤥᤒᤠ ᤁᤢᤓᤠ ᤛᤢᤜᤠᤱᤔᤡᤒᤠ. ᤛᤠᤵᤗᤠ ᤁᤧᤛᤠᤵᤐᤠ ᤏᤢ ᤁᤢᤓᤠ ᤗᤠᤶᤎᤣᤳ ᤁᤧᤃᤥᤒᤠ ᤔᤧᤘᤕᤧᤖᤥ॥ ᤛᤠᤶᤕᤥᤌᤡᤶ ᤛᤠᤵᤐ᤺ᤴᤏᤧᤴ ᤔᤧᤄᤥᤛᤢ 14 ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤍᤠᤖᤢᤒᤠ ᤕᤠᤱᤅᤡᤴ ᤀᤥᤔᤧᤔᤧᤳᤋᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤛᤠᤶᤕᤥᤌᤡᤶ ᤛᤠᤵᤐ᤺ᤴᤏᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤸᤁᤡᤕᤠᤜ᤺ᤸᤗᤧ ᤂᤥᤛᤢ॥ 15 ᤂᤶᤓᤩᤠᤱ ᤜᤡᤸᤁᤡᤕᤠᤜ᤺ᤸᤗᤧ ᤛᤢᤜᤠᤱᤔᤡᤒᤠ ᤛᤠᤐᤠᤏᤧᤴ ᤀᤰᤂᤣ ᤔᤧᤳᤋᤢ. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤛᤠᤶᤕᤥᤌᤡᤶ ᤛᤠᤵᤐ᤺ᤴᤏᤧᤴ ᤂᤥᤛᤢᤱᤅᤠᤱ ᤘᤠ᤹॥” ᤜᤧᤰᤁᤩᤠᤱ ᤜᤡᤸᤁᤡᤕᤠᤜ᤺ᤸᤗᤧ ᤂᤧᤴ ᤛᤠᤵᤐᤴᤏᤡᤴ ᤛᤠᤐᤠᤏᤧᤴ ᤐᤡᤖᤢ॥ 16 ᤛᤠᤐᤠᤏᤧᤸᤗᤧ ᤂᤧᤴ ᤛᤠᤵᤐ᤺ᤴᤏᤧᤴ ᤜᤠᤱᤅᤧᤀᤥ ᤋᤣ᤹ᤖᤢᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤆᤥ᤺ᤰᤔᤠ ᤁᤧᤒᤠᤱᤄᤢᤛᤡᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤀᤠᤍᤠᤱᤒᤠᤖᤧ ᤁᤧᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤔᤧᤈᤥᤃᤢᤖ ᤔᤧᤕᤠᤰ॥ 17 ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤁᤧᤕᤢᤱᤒᤠ ᤕᤠᤱᤜᤠ᤹ ᤔᤧᤍᤣ᤹ᤖᤢᤀᤠᤱ ᤕᤶᤒᤠ ᤗᤰᤐᤧᤴᤛᤠᤒᤠᤜᤠ᤹ ᤏᤢ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤔᤧᤒᤡᤖᤢᤛᤡᤀᤠᤱ ᤘᤠ᤹॥” 18 ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤸᤁᤡᤕᤠᤜ᤺ᤸᤗᤧ ᤂᤢᤏᤧ᤹ ᤗᤳᤇᤠ ᤛᤠᤵᤐᤴ ᤐᤡᤖᤢᤒᤠ ᤐᤠ᤺ᤴᤏᤧᤴᤏᤠᤱ ᤛᤢᤜᤠᤱᤔᤡᤒᤠ ᤛᤠᤐᤠᤏᤧᤸᤗᤧ ᤜᤠᤱᤅᤡᤴ ᤆᤧᤰᤋᤢ॥ ᤂᤢᤏᤧ᤹ ᤂᤧᤴ ᤛᤠᤵᤐ᤺ᤴᤏᤧᤴ ᤜᤠᤱᤅᤡᤸᤗᤧ ᤁᤢᤍᤃᤡ ᤏᤡᤖᤢᤒᤡᤖᤢ॥ 19 ᤜᤠᤱᤅᤡᤸᤗᤧ ᤛᤠᤶᤕᤥᤌᤡᤶ ᤛᤠᤵᤐᤴᤏᤥ ᤛᤠᤵᤋᤧᤒᤠ ᤐᤠ᤺ᤴᤜᤠ᤹ ᤂᤧᤵᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤈᤠᤱᤜᤠ᤹ ᤌᤧ᤺ᤰᤂᤢ॥ 20 ᤜᤧᤰᤁᤩᤠᤱ ᤂᤢᤏᤧ᤹ ᤜᤡᤸᤁᤡᤕᤠᤜ. ᤛᤠᤐᤠᤏᤖᤧ ᤁᤢᤛ᤻ᤛᤠ ᤀᤜᤡᤁᤠᤔ. ᤔᤡᤁᤠᤖᤧ ᤁᤢᤛ᤻ᤛᤠ ᤀᤒ᤻ᤍᤥᤏ. ᤛᤢᤜᤠᤱᤔᤡᤒᤠ ᤛᤠᤐᤠᤏᤧᤴ ᤏᤢ ᤜᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤀᤛᤠᤕᤠᤜᤴ ᤁᤴ ᤀᤡᤱᤈᤠᤱᤜᤠ᤹ ᤐᤡᤖᤢᤛᤡ— 21 “ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤗᤠᤃᤡ ᤜᤧᤰᤁᤩᤠᤱ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤀᤥ ᤀᤠᤸᤗᤛᤠᤱ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠᤜᤠ᤹ᤖᤧ ᤗᤠᤃᤡ ᤂᤧᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤍᤥᤛᤧᤶᤔᤧ᤹॥ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤶᤒᤠ ᤏᤢ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤍᤧᤴᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥ᤺ᤰᤔᤠᤴ ᤀᤠᤏᤡ᤹ ᤛᤶᤎᤠᤱ ᤌᤩᤧᤀᤠᤱ ᤘᤠ᤹॥” 22 ᤜᤡᤸᤁᤡᤕᤠᤜᤴ ᤏᤢ ᤜᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤧᤛᤢᤛᤡᤒᤠ ᤔᤏᤠᤜᤠ᤹ ᤜᤠᤱᤜᤡᤶᤔᤥᤒᤠ ᤆᤠᤱᤘᤠ᤺ᤴᤜᤠ᤹ ᤀᤥᤃᤧᤔᤧᤵᤐᤠ ᤜᤛᤖᤠ᤺ᤸᤗᤧ ᤁᤢᤶᤔᤧᤴᤇᤠ᤹ ᤋᤥᤂᤋᤖᤧ ᤁᤢᤛ᤻ᤛᤠ ᤛᤸᤗᤢᤔᤖᤧ ᤁᤢᤔᤣᤳ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤔᤠ ᤜᤢᤸᤍᤠᤀᤥ ᤐᤠᤴ ᤛᤣ᤺ᤴᤍᤥᤔᤠᤖᤧ ᤗᤠᤃᤡ ᤔᤧᤒᤣ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥᤒᤠ ᤁᤢᤛᤱ ᤐᤠᤱᤈᤢᤶ ᤗᤰᤁᤥ ᤕᤢᤅᤧ॥ 23 ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤶᤓᤠ ᤁ᤹ᤕᤥ ᤘᤠ᤹—ᤂᤡᤏᤡ᤹ ᤀᤠᤱᤃᤠ᤹ᤀᤥ ᤁᤧᤒᤠᤱᤒᤠ ᤔᤏᤠᤴ ᤔᤧᤳᤋᤧᤶᤔᤧ᤹. 24 ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤕᤜᤢᤍᤠᤒᤠ ᤜᤠᤱᤅᤡᤸᤗᤧ ᤁᤢᤍᤃᤡ ᤔᤧᤏᤡᤖᤢᤒᤠ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤔᤠᤱᤍᤣ ᤛᤠᤱᤃᤪᤠᤜᤠ᤹ ᤁᤧᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤁᤴ ᤋᤧᤴᤏᤥ ᤏᤢ ᤂᤧᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤔᤧᤰᤔᤠᤛᤡᤔᤧᤴ ᤋᤠᤖᤢᤱ᤹॥ 25 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤏᤠ᤹ᤖᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤘᤣ᤹ ᤔᤠᤱᤜᤠ᤹ᤀᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤀᤠᤱ ᤘᤠ᤹. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤜᤢᤰᤁᤡᤸᤗᤧ ᤔᤧᤈᤥᤃᤢᤒᤠ ᤐᤠ᤺ᤴᤜᤠ᤹ᤗᤠᤶ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥᤰᤂᤢᤀᤠᤱ ᤘᤠ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤁᤸᤗᤧ ᤁᤢᤛᤶᤎᤠᤱ ᤌᤠᤛᤢᤱ᤹ ᤜᤧᤰᤁᤩᤠᤱ ᤂᤧᤴ ᤆᤡᤈᤡ ᤕᤧᤶᤕᤧᤶ ᤔᤧᤒᤥᤱᤏᤧᤴ॥’ 26 ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤍᤥᤔᤠᤖᤧ ᤗᤠᤃᤡ ᤂᤡᤏᤡ᤹ ᤁᤧᤒᤠᤱᤒᤠ ᤕᤜᤢᤍᤠᤒᤠ ᤜᤠᤱᤅᤡᤴ ᤀᤠᤶᤓᤠ ᤁᤴ ᤐᤠ᤺ᤴᤏᤧᤴ ᤔᤧᤳᤋᤧᤶᤔᤧ᤹. ‘ᤀᤠᤍᤠᤱᤒᤠᤖᤧ ᤁᤧᤄᤧᤵᤛᤢᤒᤠ ᤀᤡᤱᤄᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤒᤠ ᤁᤴ ᤐᤠ᤺ᤳᤋᤢ᤹— 27 ᤐᤠᤴ ᤏᤢ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤏᤡᤱᤘᤠᤴ ᤕᤠᤖᤡᤵ ᤐᤥ᤺ᤰᤂᤧ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴ ᤗᤠᤈᤣᤴ ᤏᤢ ᤁᤵᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤁᤧᤄᤧᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤧᤏᤧ᤹ ᤏ᤺ᤶᤏ᤺ᤶᤒᤠ ᤁᤧᤒᤥ᤺ᤰᤂᤧ. ᤜᤶᤓᤩᤠᤱ ᤀᤠᤱᤃᤠ᤹ ᤀᤠᤍᤃᤡ ᤂᤧᤏᤧ᤹ ᤆᤢᤱᤈᤡᤃᤧᤴ ᤁᤧᤒᤥᤰᤂᤧᤀᤠᤱ ᤂᤧᤏᤧ᤹ ᤁᤧᤈᤠᤱᤅᤡᤴ ᤁᤧᤎᤧ᤺ᤰᤂᤢᤀᤠᤱ ᤀᤠᤱᤃᤠ᤹ ᤀᤠᤍᤃᤡ ᤔᤧᤖᤡᤱ ᤁᤧᤎᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤀᤠᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹॥ 28 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤢᤎᤧᤒᤠ ᤁᤧᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤑᤢᤱᤏᤧᤀᤠᤱ ᤂᤧᤏᤧ᤹ ᤁᤧᤏᤡᤱᤘᤠ᤹ ᤋᤢᤰᤂᤣ ᤔᤧᤴᤈᤠᤀᤣ ᤁᤧᤶᤈᤡᤱ᤹॥ ᤁᤴ ᤋᤧᤴᤏᤥ ᤏᤢ ᤁᤵᤔᤥ ᤁᤧᤕᤢᤱᤒᤠᤜᤠ᤹ᤀᤥ ᤀᤠᤱᤃᤠ᤹ ᤋᤠ᤺ᤵᤔᤠ ᤆᤥᤃᤢᤱᤒᤠ ᤔᤧᤰᤔᤠᤛᤡᤔᤧᤴ ᤂᤧᤏᤧ᤹ ᤁᤧᤔᤡᤰᤁᤡᤸᤗᤧ ᤏᤡᤔᤠ ᤁᤧᤱᤄᤥᤛᤢᤴ᤹॥’” ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤁᤴ ᤏᤢᤃᤵ ᤐᤠ᤺ᤴᤏᤧᤴ ᤕᤥᤛᤡᤕᤠᤜᤀᤥ ᤔᤧᤍᤣ᤹ᤖᤢᤖᤥ॥ 29 ᤂᤧᤴ ᤀᤣᤃᤠᤱ ᤜᤠᤱᤅᤡᤸᤗᤧ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤛᤥᤖᤡᤰ ᤆᤢᤶᤔᤠᤖᤧ ᤗᤠᤃᤡ ᤀᤢ᤺ᤳᤋᤢᤛᤡ॥ 30 ᤂᤢᤏᤧ᤹ ᤕᤜᤢᤍᤠᤒᤠ ᤔᤏᤠᤜᤠ᤹. ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹. ᤆᤢᤰᤐᤠ ᤕᤶᤒᤠ ᤁᤧᤖᤧᤰ ᤔᤏᤠᤜᤠ᤹ᤏᤢ ᤛᤥᤛᤥᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤌᤥ᤺ᤰᤛᤡᤱ ᤐᤣ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤄᤥᤛᤢᤒᤠ ᤔᤠᤱᤜᤢᤵ ᤛᤠᤵᤐᤴᤏᤥᤒᤠ ᤁᤧᤖᤧᤰ ᤐᤠ᤺ᤴᤈᤠ᤺ᤰᤜᤠ᤹ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤖ ᤂᤢᤏᤧ᤹ ᤏᤡᤖᤢ ᤐᤡᤖᤢᤛᤡ॥ 31 ᤜᤶᤓᤩᤠᤱ ᤛᤡᤳᤗᤠᤱᤅᤡᤸᤗᤧ ᤁᤢᤒᤣᤛᤠᤱ ᤕᤧᤶᤛᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤡᤶᤔᤠ ᤏᤢ ᤂᤢᤏᤧ᤹ ᤁᤢᤀᤡᤅᤈᤠ᤺ᤱᤜᤠ᤹. ᤁᤢᤎᤡᤶᤜᤠ᤹ ᤜᤧᤰᤁᤩᤠᤱ ᤁᤢᤀᤡᤱᤍᤳᤜᤠ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ ᤏᤢ ᤏᤡᤱᤘᤠ᤺ᤸᤗᤧ ᤀᤡ᤺ᤵᤔᤠ ᤏᤠ᤺ᤵᤔᤠ. ᤜᤧᤰᤁᤩᤠᤱ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤈᤠ᤺ᤴᤜᤠ᤹ ᤁᤧᤵᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤠᤱᤜᤢᤵᤐᤡᤴ ᤕᤠᤶᤔᤥ ᤁᤢᤛᤱ ᤆᤥᤃᤢ॥ 32 ᤂᤧᤴ ᤀᤣᤃᤠᤱ ᤒᤣᤏᤩᤠᤔᤡᤏ ᤔᤏᤠᤜᤠ᤹ ᤏᤢ ᤕᤖᤢᤛᤗᤧ᤺ᤶᤔᤥ ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰᤏᤢ ᤂᤧᤴ ᤔᤠᤱᤜᤢᤵᤐᤡᤴ ᤁᤧᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤔᤠᤱᤜᤧᤰ ᤆᤥ᤺ᤰᤔᤠ ᤐᤠᤱᤄᤢᤛᤡ॥ ᤕᤖᤢᤛᤗᤧᤔᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱ. ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤜᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤀᤡᤛᤡ᤺ᤰ ᤁᤴ ᤔᤧᤈᤥᤃᤢ॥ 33 ᤕᤥᤛᤡᤕᤠᤜ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤋᤧᤱᤃᤵᤜᤠ᤹ᤀᤥᤗᤠᤶ ᤕᤠᤶᤃᤧᤛᤡᤱᤒᤠ ᤂᤰᤐᤧᤳ ᤏᤠᤘᤠᤀᤡᤳᤗᤠᤜᤠ᤹ ᤀᤡ᤺ᤰᤂᤢᤍᤣᤛᤢᤛᤡ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤀᤥ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠ ᤔᤧᤵᤔᤠ ᤐᤠᤱᤄᤢᤛᤡ॥ ᤂᤢᤏᤧ᤹ ᤁᤢᤜᤡᤱᤜᤡᤱ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤜᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤡᤶᤔᤠ ᤏᤠ᤺ᤵᤔᤠᤗᤠᤶ ᤀᤣᤃᤠᤱ ᤔᤧᤴᤏᤢ᤺ᤰᤛᤧᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.