᥈ ᤛᤠᤵᤔᤢ᤺ᤴᤎᤢᤶ 33 - LIFOTNTᤕᤜᤢᤍᤠᤒᤠ ᤜᤠᤱ ᤔᤏᤛ᤻ᤛᤣ ( ᥈ ᤜᤠᤱ ᥈᥇:᥇-᥏ ) 1 ᤔᤏᤛ᤻ᤛᤣᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤌᤡᤒᤥᤱᤅᤠᤱ ᤋᤱᤒᤣ ᤏᤧᤳᤇᤡ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤅᤠᤒᤥᤱᤅᤠᤱ ᤋᤱᤒᤣ ᤅᤠᤛᤡ ᤜᤠᤱᤕᤢᤰ ᤆᤥᤃᤢ॥ 2 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤏᤠ᤺ᤳᤋᤢᤍᤣᤛᤢᤛᤡᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤁᤧᤗᤧ᤺ᤱᤒᤠ ᤕᤧᤵᤗᤧᤰᤜᤠ᤹ ᤂᤢᤏᤧ᤹ ᤏᤠ᤺ᤳᤋᤢ ᤋᤡᤶᤍᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤂᤢᤏᤧ᤹ ᤜᤠᤒᤠ ᤂᤧᤴ ᤆᤥᤃᤢ॥ 3 ᤂᤢᤏᤧ᤹ ᤁᤢᤶᤒᤠ ᤜᤡᤈᤁᤡᤕᤠ᤺ᤸᤗᤧ ᤗᤢ᤺ᤴᤍᤢᤍᤣᤛᤢᤒᤠ ᤌᤢᤵᤛᤢᤍᤣᤛᤢᤒᤠ ᤌᤧᤃᤢᤜᤠ᤹ᤀᤥᤒᤠ ᤔᤠᤱᤎᤠ᤺ᤴᤜᤠ᤹ ᤂᤢᤏᤧ᤹ ᤕᤠᤶᤔᤥ ᤆᤥᤃᤢ॥ ᤂᤢᤏᤧ᤹ ᤒᤠᤗ ᤔᤠᤱᤜᤠ᤹ᤖᤧ ᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤆᤥᤃᤢ ᤜᤧᤰᤁᤩᤠᤱ ᤀᤛᤣᤖᤠ ᤔᤠᤱᤛᤡᤳᤗᤠᤱᤜᤠ᤹ ᤕᤧᤵᤛᤢ॥ ᤂᤢᤏᤧ᤹ ᤋᤠᤱᤛᤠᤱᤒᤥᤒᤠ ᤁᤧᤖᤧᤰ ᤂᤣᤛᤣᤒᤠᤜᤠ᤹ ᤋᤃᤡ ᤛᤠᤶᤒᤥᤴ ᤑᤴᤇᤡᤱᤅᤠᤱ ᤂᤧᤱᤜᤠ᤹ ᤛᤧᤘᤠ ᤔᤧᤳᤋᤢᤛᤡ॥ 4 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤆᤥᤃᤢ. ᤂᤧᤴ ᤔᤠᤱᤜᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤕᤧ. “ᤕᤖᤢᤛᤗᤧ᤺ᤶᤔᤥᤀᤣ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤘᤠ᤹॥” 5 ᤂᤢᤏᤧ᤹ ᤋᤠᤱᤛᤠᤱᤒᤥᤒᤠ ᤂᤣᤛᤣᤒᤠᤜᤠ᤹ᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤏᤧᤵᤔᤠᤱ ᤗᤰᤂᤢᤶᤔᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤆᤥᤃᤢ॥ 6 ᤂᤢᤏᤧ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤴᤇᤢᤔᤠᤜᤠ᤹ ᤒᤣᤏ-ᤜᤡᤴᤏᤥᤔᤒᤠ ᤏᤧᤏᤧᤒᤠᤍᤧᤴᤏᤥ ᤔᤡᤀᤥ ᤛᤡᤍᤢᤱᤈᤓᤠ ᤆᤥᤃᤢᤛᤡ॥ ᤂᤢᤏᤧ᤹ ᤁᤡᤳᤆᤠᤰ ᤆᤥᤃᤢᤀᤠᤱ ᤌᤢᤶᤕᤠ ᤀᤡᤛᤢ ᤜᤧᤰᤁᤩᤠᤱ ᤂᤠᤃᤧᤀᤡᤰᤐᤠᤜᤠ᤹ ᤏᤢ ᤛᤠᤶᤔᤠᤱ ᤆᤩᤠ᤺ᤱᤜᤠ᤹ ᤔᤢᤖᤠ ᤁᤧᤔᤧᤵᤐᤠᤜᤠ᤹ ᤛᤢᤈᤠ ᤏᤠ᤺ᤰᤋᤢᤛᤡ॥ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤆᤥᤃᤢᤀᤠᤱ ᤂᤢᤏᤧ᤹ ᤁᤢᤛᤠᤰᤁᤧᤴ ᤑᤥ᤺ᤰᤂᤢ॥ 7 ᤂᤢᤏᤧ᤹ ᤆᤥ᤺ᤰᤔᤠ ᤐᤠᤱᤄᤢᤛᤡᤒᤠ ᤏᤠᤘᤠᤀᤡᤳᤗᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤕᤢᤰᤂᤢ. ᤂᤧᤴ ᤔᤠᤱᤜᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤍᤠᤀᤢᤍᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤛᤥᤗᤥᤔᤏᤧᤴ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤘᤕᤧ. “ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤗᤠᤶ ᤛᤣᤃᤢᤱᤒᤠ ᤁᤴ ᤔᤠᤱᤜᤡᤶᤔᤥ ᤏᤢ ᤕᤖᤢᤛᤗᤧ᤺ᤶᤔᤥ ᤀᤠᤓᤧᤸᤗᤧᤛᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤱᤃᤠ᤹ ᤀᤠᤔᤡᤱ ᤕᤢᤰᤂᤢᤱ᤹॥ 8 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤁᤧᤖᤧᤰ ᤀᤠᤀᤡᤱᤈᤠᤱᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤐᤡᤖᤢᤛᤡᤒᤠ ᤌᤡᤶᤜᤠ᤹ ᤏᤢ ᤛᤠᤶᤕᤥᤌᤡᤶᤜᤠ᤹ ᤂᤰᤐᤧᤳ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤔᤧᤏᤠ᤺ᤳᤋᤢ ᤔᤧᤀᤡ᤺ᤳᤋᤢᤏᤧᤓᤃᤪ. ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤐᤡᤖᤢᤱᤛᤡᤱᤒᤠ ᤗᤠᤈᤣ᤹ᤀᤥᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤀᤠᤱᤃᤠ᤹ ᤕᤠᤶᤔᤥ ᤔᤧᤗ᤺ᤳᤋᤠᤴ ᤔᤧᤍᤣᤀᤠᤛᤡᤱᤅᤡᤴ᤹॥” 9 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤔᤧᤰᤂᤢᤛᤡᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ᤺ᤸᤗᤧᤀᤠᤱ ᤔᤏᤛ᤻ᤛᤣ᤺ᤸᤗᤧ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤆᤥᤃᤢᤀᤠᤱ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ ᤋᤠᤵᤑᤧ᤺ᤶᤒᤠ ᤗᤠᤶᤔᤡᤴ ᤔᤧᤏᤠ᤺ᤳᤋᤢᤖ ᤕᤠ᤺ᤴᤍᤢᤛᤡᤖᤥ॥ ᤔᤏᤛ᤻ᤛᤣᤴ ᤗᤠᤕᤥᤗᤠᤶ ᤜᤡᤴ 10 ᤔᤏᤛ᤻ᤛᤣᤴ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ᤏᤢ ᤕᤜᤘᤣ ᤍᤠᤱᤒᤧᤴ ᤐᤠᤖᤧ. ᤁᤖ ᤂᤧᤱᤜᤠ᤹ᤖᤧ ᤂᤧᤶᤄᤧᤶ ᤔᤧᤸᤗᤠᤵᤋᤢᤴ॥ 11 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤎᤰᤔᤥᤒᤠᤜᤠ᤹ ᤑᤧᤳᤋᤢᤛᤡ॥ ᤂᤧᤱᤜᤠ᤹ᤖᤧ ᤔᤏᤛ᤻ᤛᤣᤴ ᤔᤧᤍᤧᤶᤛᤢᤀᤠᤱ ᤂᤢᤏᤧ᤹ ᤁᤢᤴᤒᤥᤀᤥ ᤂᤣ᤺ᤱᤅᤡᤴ ᤔᤧᤓᤳᤇᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤠᤛᤠ ᤌᤰᤁᤪᤱᤅᤡᤸᤗᤧ ᤔᤧᤄᤣ᤺ᤰᤂᤢᤀᤠᤱ ᤒᤣᤒᤡᤗᤥᤏ ᤔᤧᤍᤣ᤹ᤖᤢ॥ 12 ᤂᤢᤏᤧ᤹ ᤋᤢᤰᤂᤣ ᤆᤩᤧ᤺ᤸᤗᤧ ᤕᤜᤘᤣ ᤍᤠᤱᤒᤠ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤓᤠ᤹ ᤏᤠ᤺ᤰᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠ ᤁᤢᤴᤎᤧᤒᤠᤛᤡᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤏ᤺ᤶᤏ᤺ᤶᤒᤠ ᤆᤥ᤺ᤰᤛᤡᤱ॥ 13 ᤜᤧᤰᤁᤩᤠᤱ ᤂᤢᤏᤧ᤹ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤸᤗᤧ ᤁᤢᤒᤣᤗᤡᤴ ᤂᤧᤵᤛᤢᤀᤠᤱ ᤏᤡᤱᤘᤠ᤹ ᤐᤡᤖᤢ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤕᤠᤶᤔᤥ ᤏᤢ᤺ᤰᤋᤢ ᤑᤧᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠᤱᤈᤢᤶᤔᤥ ᤕᤢᤰᤂᤢ॥ ᤂᤧᤒᤩᤠᤱ ᤔᤏᤛ᤻ᤛᤣ᤺ᤸᤗᤧ ᤕᤜᤘᤣ ᤍᤠᤱᤒᤧᤴᤏᤣ ᤏᤡᤱᤘᤠ᤹ᤑᤢᤔᤠᤱᤖᤳᤇ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥᤛᤢ॥ 14 ᤂᤧᤴ ᤀᤣᤃᤠᤱ ᤔᤏᤛ᤻ᤛᤣ᤺ᤸᤗᤧ ᤏᤧᤏᤧᤒᤠᤍᤧᤴᤏᤥ ᤃᤡᤜᤥᤏ ᤆᤫᤠ᤺ᤳ ᤘᤒᤢᤴᤍᤠᤀᤥᤒᤠ ᤏᤠᤶᤎᤠ ᤐᤡᤛᤠᤱᤗᤠᤶ ᤀᤥᤑᤣᤗ ᤁᤥ᤺ᤰᤔᤠᤴ ᤁᤒᤢᤀᤠᤱ ᤅᤠ ᤗᤠᤶᤎᤣ᤺ᤳᤋᤥ ᤌᤠᤖᤡᤰ ᤍᤠᤀᤢᤍᤖᤧ ᤁᤢᤕᤧᤰᤕᤰ ᤗᤠ᤺ᤰᤁᤠᤳ ᤗᤧᤵᤔᤠᤱᤒᤠ ᤗᤢᤱᤎᤠᤰᤁᤡᤴ ᤕᤠᤶᤔᤥ ᤆᤥᤃᤢᤀᤠᤱ ᤂᤧᤴ ᤗᤢᤱᤎᤠᤰᤁᤡᤴ ᤂᤢᤏᤧ᤹ ᤆᤠᤱᤈᤠᤱᤒᤠ ᤛᤧᤳᤋᤢ॥ ᤂᤢᤏᤧ᤹ ᤕᤜᤢᤍᤠᤀᤥᤒᤠ ᤜᤠᤱᤕᤰ ᤁᤧᤏᤧᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤌᤰᤔᤥᤒᤠᤜᤠ᤹ᤀᤠᤱ ᤕᤧᤵᤛᤢᤛᤡ॥ 15 ᤂᤢᤏᤧ᤹ ᤘᤣ᤹ ᤗᤠᤈᤣ᤹ᤒᤠ ᤔᤠᤱᤜᤠ᤹ ᤏᤢ ᤔᤧᤗᤰᤋᤢ ᤔᤧᤄᤥ᤺ᤴᤍᤢᤀᤠᤱ ᤔᤧᤈᤥᤃᤢᤒᤠ ᤏᤠᤘᤠᤀᤡᤳᤗᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤗᤠᤶ ᤗ᤺ᤳᤋᤢᤍᤣᤛᤢ. ᤜᤧᤰᤁᤩᤠᤱ ᤔᤠᤱᤜᤡᤶᤔᤥᤒᤠ ᤁᤥ᤺ᤰᤔᤠᤀᤥ ᤏᤢ ᤕᤖᤢᤛᤗᤧ᤺ᤶᤔᤥ ᤂᤢᤏᤧ᤹ ᤀᤠᤵᤑᤣᤰ ᤆᤥᤃᤢᤒᤠ ᤁᤧᤖᤧᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ᤀᤠᤱ ᤀᤡ᤺ᤰᤂᤢᤍᤣᤛᤢ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤁᤧᤖᤧᤰ ᤕᤧᤰᤕᤰᤗᤠᤶ ᤗᤠ᤺ᤰᤁᤠᤳ ᤗᤠᤵᤐᤢᤱᤍᤣᤛᤢ॥ 16 ᤂᤧᤴ ᤀᤣᤃᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤠᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤕᤠᤶᤔᤥ ᤆᤥᤃᤢᤀᤠᤱ ᤂᤧᤵᤔᤥ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤏᤢᤃᤧᤴ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤕᤜᤢᤍᤠᤴ ᤀᤡᤱᤈᤠᤱ ᤐᤡᤖᤢ॥ 17 ᤜᤶᤓᤛᤠᤱ ᤔᤏᤠᤜᤠ᤹ᤖᤧ ᤌᤧᤃᤢᤜᤠ᤹ᤀᤥᤒᤠ ᤔᤠᤱᤎᤠ᤺ᤴᤜᤠ᤹ᤀᤥ ᤛᤡᤍᤢᤱᤈᤓᤠᤜᤠ᤹ ᤔᤧᤍᤥᤴᤍᤢᤖ ᤔᤧᤘᤕᤧ. ᤁᤖ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡᤖᤰ ᤔᤧᤍᤥᤴᤍᤢᤖᤥ॥ 18 ᤔᤏᤛ᤻ᤛᤣ᤺ᤸᤗᤧ ᤁᤢᤜᤠᤱᤕᤢᤰᤁᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢᤒᤠ ᤁᤢᤍᤢᤘᤠᤴ ᤏᤢ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤌᤢᤶᤕᤠ ᤁᤧᤀᤡᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢᤒᤠ ᤐᤠ᤺ᤴᤈᤠ᤺ᤰᤜᤠ᤹ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ॥ 19 ᤂᤢᤏᤧ᤹ ᤀᤠᤵᤑᤣᤰ ᤏ᤺ᤶᤏ᤺ᤶᤒᤠ ᤆᤥ᤺ᤰᤛᤡᤱᤔᤠᤏᤢ᤺ᤸᤗᤧ ᤋᤃᤡ ᤐᤣᤗᤡ ᤑᤠᤰᤋᤢᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤢᤏᤧ᤹ ᤁᤢᤒᤣᤗᤡᤴ ᤂᤧᤵᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤁᤢᤗᤠᤕᤥᤜᤠ᤹ ᤏᤢ ᤏᤛᤠᤴ ᤗᤧᤰᤂᤢᤀᤠᤱ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹. ᤌᤧᤃᤢᤜᤠ᤹ᤀᤥ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤎᤠ᤺ᤴᤜᤠ᤹ ᤏᤢ ᤀᤛᤣᤖᤠ ᤔᤠᤱ ᤛᤡᤳᤗᤠᤱᤜᤠ᤹ ᤏᤢ ᤏᤠᤘᤠᤀᤡᤳᤗᤠ ᤕᤧᤵᤛᤢᤛᤡᤒᤠ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤠᤃᤧᤀᤡᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ॥ 20 ᤔᤏᤛ᤻ᤛᤣᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣᤀᤠᤱ ᤂᤢᤏᤧ᤹ ᤁᤢᤜᤠᤱᤜᤡᤶᤔᤥ ᤔᤧᤈᤡᤰᤂᤢ॥ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤠᤔᤥᤏᤧᤴ ᤜᤠᤱ ᤐᤥ᤺ᤰᤛᤧᤖᤥ॥ ᤕᤜᤢᤍᤠᤒᤠ ᤜᤠᤱ ᤀᤠᤔᤥᤏ ( ᥈ ᤜᤠᤱ ᥈᥇:᥇᥏-᥈᥌ ) 21 ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤀᤠᤔᤥᤏᤧᤴ ᤏᤡᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤕᤥᤖᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤋᤱᤒᤣ ᤏᤧᤳᤇᤡ ᤜᤠᤱᤕᤢᤰ ᤆᤥᤃᤢ॥ 22 ᤂᤢᤏᤧ᤹ ᤁᤢᤶᤒᤠ ᤔᤏᤛ᤻ᤛᤣ᤺ᤸᤗᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤧᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤂᤢᤏᤧ᤹ ᤜᤠᤒᤠ ᤂᤧᤴᤏᤣ ᤆᤥᤃᤢ॥ ᤂᤢᤏᤧ᤹ ᤁᤢᤶᤒᤠ ᤔᤏᤛ᤻ᤛᤣ᤺ᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤀᤠᤱ ᤂᤧᤱᤜᤠ᤹ ᤛᤧᤘᤠ ᤔᤧᤳᤋᤢᤛᤡ॥ 23 ᤁᤖ ᤂᤢᤏᤧ᤹ ᤁᤢᤶᤒᤠ ᤔᤏᤛ᤻ᤛᤣ᤺ᤸᤗᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤏ᤺ᤶᤏ᤺ᤶᤒᤠ ᤔᤧᤈᤥ᤺ᤰᤛᤡᤱᤅᤧᤴ॥ ᤂᤢᤏᤧ᤹ ᤁᤢᤓᤧᤴ ᤕᤠ᤺ᤶᤒᤰᤁᤡᤴ ᤀᤠᤸᤗᤛᤠᤱ ᤇᤧᤴᤏᤠ ᤛᤠ᤹ᤖᤡᤰ ᤕᤖᤡᤰ ᤐᤥ᤺ᤰᤂᤧ॥ 24 ᤀᤠᤔᤥᤏᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤆᤧᤶᤓᤴ ᤔᤧᤈᤥᤃᤢᤀᤠᤱ ᤂᤢᤏᤧ᤹ ᤀᤠᤵᤑᤣᤰ ᤁᤢᤜᤠᤱᤜᤡᤶᤔᤥᤀᤣ ᤔᤧᤛᤩᤧᤖᤢ॥ 25 ᤂᤧᤒᤩᤠᤱ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤀᤠᤔᤥᤏ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤴ ᤆᤧᤶᤓᤴ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤔᤧᤛᤩᤧᤖᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤕᤥᤛᤡᤕᤠᤜᤴ ᤜᤠᤱ ᤔᤧᤈᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.