᥈ ᤛᤠᤵᤔᤢ᤺ᤴᤎᤢᤶ 32 - LIFOTNT

ᤛᤏᤜᤣᤖᤡᤒᤖᤧ ᤕᤖᤢᤛᤗᤧ᤺ᤶᤔᤡᤴ ᤌᤰᤔᤠ ᤛᤠ᤺ᤳᤋᤢ

¹ ᤜᤡᤈᤁᤡᤕᤠ᤺ᤸᤗᤧ ᤁᤴ ᤁᤧᤖᤧᤰ ᤏᤛᤠ᤺ᤴᤛᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢ ᤛᤢᤖᤢᤀᤠᤱ ᤀᤛ᤻ᤛᤢᤖᤒᤠ ᤛᤏᤜᤣᤖᤡᤒᤧᤸᤗᤧ ᤕᤜᤢᤍᤠᤴ ᤌᤱᤅᤥ ᤑᤳᤋᤢ॥ ᤂᤢᤏᤧ᤹ ᤕᤜᤢᤍᤠᤀᤥᤒᤠ ᤜᤠᤱᤕᤰ ᤁᤧᤏᤧᤒᤠ ᤕᤧᤰᤕᤰᤜᤠ᤹ ᤂᤢᤏᤧ᤹ ᤁᤢᤕᤢᤰᤁᤥ ᤋᤠ᤺ᤵᤔᤠᤖᤧ ᤗᤠᤃᤡ ᤂᤧᤴ ᤕᤧᤰᤕᤰᤜᤠ᤹ ᤁᤒᤪᤡᤱ ᤁᤢᤎᤰᤛᤢᤒᤠᤜᤠ᤹ ᤏᤧᤛ᤻ᤛᤢᤛᤡ॥

² ᤛᤏᤜᤣᤖᤡᤒᤧᤴ ᤑᤧᤖᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤡᤴ ᤑᤵᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤠ᤹ ᤑᤠ᤹ᤀᤠᤱ ᤜᤡᤈᤁᤡᤕᤠ᤺ᤸᤗᤧ ᤏᤡᤱᤘᤠ᤹ ᤂᤥᤛᤢᤏᤢᤔᤧ᤺ᤴᤏᤣ.

³ ᤕᤧᤰᤕᤰᤜᤠ᤹ ᤗᤠᤁᤠᤳᤐᤠ ᤆᤫᤠ᤺ᤳ ᤘᤒᤢᤴᤍᤠᤰᤘᤠᤜᤠ᤹ ᤛᤠᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤌᤰᤛᤢᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤛᤢᤈᤠ ᤏᤠ᤺ᤰᤋᤢᤛᤡ॥ ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤥ ᤂᤢᤏᤧ᤹ ᤔᤧᤓᤠ᤹ᤖᤢ॥

⁴ ᤂᤧᤱᤜᤠ᤹ᤖᤧ ᤕᤖᤡᤰ ᤔᤏᤠᤜᤠ᤹ ᤔᤧᤛᤢᤵᤛᤢᤛᤡᤀᤠᤱ ᤗᤠᤈᤣ᤹ᤗᤠᤶ ᤁᤧᤒᤥᤱᤒᤠᤖ ᤗᤠᤱᤃᤧᤄᤣ᤺ᤰᤐᤠ ᤘᤜ᤺ᤱ ᤏᤢ ᤁᤧᤖᤧᤰ ᤆᤫᤠ᤺ᤳ ᤘᤒᤢᤴᤍᤠᤰᤘᤠᤜᤠ᤹ ᤆᤡᤛᤠᤰ ᤔᤧᤛᤠᤰᤋᤢ॥ ᤂᤧᤱᤜᤠ᤹ᤖᤧ ᤁᤶᤓᤣ ᤔᤧᤒᤠ᤺ᤳᤋᤢ. “ᤀᤛ᤻ᤛᤢᤖᤒᤠ ᤜᤠᤱᤜᤠ᤹ ᤁᤵᤔᤥ ᤔᤧᤓᤧᤴᤏᤠᤱ ᤂᤢᤴᤇᤡ᤹ ᤐᤕᤥ ᤕᤥᤖᤢᤛᤡᤖ ᤌᤣᤀᤠᤱ ᤆᤫᤠ᤺ᤳ ᤔᤧᤄᤥᤛᤢᤖᤒᤣ᥅”

⁵ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤛᤩᤠᤱᤔᤧᤴᤍᤠᤱ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤜᤠ᤹ᤀᤥ ᤁᤧᤎᤢᤵᤐᤠᤍᤧᤴᤜᤠ᤹ ᤆᤠ᤺ᤱᤘᤠ ᤔᤧᤳᤋᤢᤀᤠᤱ ᤂᤧᤵᤔᤥ ᤆᤱᤜᤡᤶᤜᤠ᤹ ᤆᤥᤃᤢ॥ ᤗᤢᤱᤎᤠᤰ ᤗᤠ᤺ᤰᤁᤠᤳ ᤗᤧᤵᤔᤠᤱ ᤂᤢᤏᤧ᤹ ᤘᤣ᤹ ᤗᤢᤱᤎᤠᤰ ᤛᤧᤳᤋᤢ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤁᤢᤕᤧᤰᤕᤰ ᤁᤧᤍᤰᤐᤠ ᤁᤢᤎᤠ᤹ᤁᤢᤎᤠ᤹ ᤗᤢᤱᤎᤠᤰᤜᤠ᤹ ᤁᤧᤎᤢᤶᤒᤠ ᤆᤥᤃᤢ॥ ᤂᤢᤏᤧ᤹ ᤕᤖᤡᤰ ᤑᤧᤈᤢᤶᤓᤧᤕᤠᤜᤠ᤹ ᤏᤢ ᤂᤥᤜᤠ᤹ᤀᤠᤱ ᤌᤃᤢ॥

⁶ ᤂᤢᤏᤧ᤹ ᤔᤏᤠᤜᤠ᤹ᤀᤥ ᤌᤰᤛᤢᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤕᤢᤰᤋᤡᤱ ᤆᤥᤃᤢᤛᤡ. ᤂᤶᤓᤩᤠᤱ ᤔᤏᤠᤜᤠ᤹ ᤕᤧᤰᤕᤰᤁᤥᤒᤠ ᤔᤠ ᤗᤠᤶᤎᤣ᤺ᤳᤋᤥᤒᤠ ᤗᤰᤂᤢᤶᤔᤥ ᤛᤢᤵᤛᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡᤖ ᤂᤧᤱᤜᤠ᤹ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡ—

⁷ “ᤁᤧᤎᤢᤶᤒᤠ ᤏᤢ ᤜᤠᤱᤜᤠᤱ ᤁᤧᤗ᤹ᤒᤠ ᤐᤥ᤺ᤰᤂᤧᤶᤔᤧ᤹॥ ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤑᤧᤳᤋᤢᤛᤡᤒᤠ ᤂᤧᤴ ᤕᤖᤡᤰ ᤌᤰᤛᤢᤒᤠᤜᤠ᤹ᤖᤧ ᤂᤡᤏᤡ᤹ ᤛᤡᤰᤗᤢᤱᤔᤥ ᤁᤡᤔᤠ ᤕᤱᤔᤠ ᤔᤧᤒᤥᤱᤏᤧᤴᤗ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤏᤢ᤺ᤸᤗᤧ ᤀᤠᤸᤗᤛᤠᤱ ᤛᤠ᤹ᤖᤡᤰ ᤔᤢᤰᤛᤠᤶᤛᤠᤒᤠᤎᤡᤰ ᤀᤠᤏᤡ᤹ᤏᤢ ᤘᤠ᤹॥

⁸ ᤂᤧᤱᤜᤠ᤹ᤖᤧ ᤏᤠᤛᤡᤱᤃᤧᤴ ᤌᤰᤗᤠᤀᤥᤖᤰ ᤔᤢᤰᤛᤠᤶ ᤔᤧᤃᤳᤋᤢ. ᤁᤖ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤑᤠ᤹ᤔᤠᤖᤧ ᤗᤠᤃᤡ ᤏᤢ ᤀᤠᤏᤡ᤹ ᤗᤠᤃᤡ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤠᤏᤡ᤹ᤏᤢ ᤘᤠ᤹॥” ᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠ᤺ᤸᤗᤧ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ ᤜᤠᤱᤜᤠᤱ ᤔᤧᤗ᤹ᤖᤧ॥

⁹ ᤂᤧᤴ ᤀᤣᤃᤠᤱ ᤀᤛ᤻ᤛᤢᤖᤒᤠ ᤜᤠᤱ ᤛᤏᤜᤣᤖᤡᤒᤧᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤗᤠᤁᤡᤛᤧᤴ ᤁᤒᤪᤡᤱ ᤔᤧᤃᤒᤢᤀᤠᤱ ᤔᤧᤏᤧᤛ᤻ᤛᤧᤒᤠ ᤕᤧᤶᤔᤥ ᤂᤢᤏᤧ᤹ ᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠᤴ ᤏᤢ ᤕᤖᤢᤛᤗᤧ᤺ᤶᤒᤠ ᤁᤧᤖᤧᤰ ᤕᤜᤢᤍᤡᤜᤠ᤹ ᤁᤴ ᤀᤡᤱᤄᤱᤅᤡᤴ ᤜᤠᤰᤔᤠᤛᤡ ᤑᤠ᤹ᤀᤠᤱ ᤛᤢᤜᤠᤱᤕᤢᤰᤐᤠᤜᤠ᤹ ᤕᤖᤢᤛᤗᤧᤔ ᤐᤠᤱᤄᤢ ᤑᤧᤴᤇᤢᤛᤡ॥

¹⁰ “ᤀᤛ᤻ᤛᤢᤖᤒᤠ ᤜᤠᤱ ᤛᤏᤜᤣᤖᤡᤒᤖᤧ ᤀᤰᤂᤣ ᤐᤠ᤺ᤳᤋᤢ᤹—ᤁᤒᤪᤡᤱ ᤁᤡᤷᤃᤵ ᤁᤵᤔᤏᤠ ᤏᤧᤔᤏᤠᤒᤠ ᤕᤖᤢᤛᤗᤧᤶᤔᤥ ᤁᤧᤕᤢᤱᤒᤠᤜᤠ᤹ᤖᤧ ᤂᤡᤏᤡ᤹ ᤀᤠᤳᤋᤡᤗᤠᤶ ᤀᤠ᤺ᤴᤇᤡᤱᤔᤠ ᤁᤧᤄᤥᤛᤢᤶᤒᤣ᥅

¹¹ ‘ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤌᤠᤔᤠᤗᤠᤶ ᤁᤧᤛᤧ᤺ᤵᤋᤡ᤹’ ᤗ᤹ᤖᤡᤰ ᤜᤡᤈᤁᤡᤕᤠ᤺ᤸᤗᤧ ᤂᤡᤏᤡ᤹ ᤁᤧᤔᤣ᤺ᤳᤋᤡᤸᤗᤧ ᤂᤡᤏᤡ᤹ ᤁᤧᤕᤢᤅᤡᤒᤠᤍᤧᤴᤏᤥᤀᤣ ᤘᤠᤔᤡ᤺ᤰᤔᤠ ᤏᤢ ᤛᤠᤰᤁᤡᤸᤗᤧ ᤛᤧᤵᤔᤠᤖᤧ ᤗᤠᤃᤡ ᤂᤧᤸᤗᤧ ᤂᤡᤏᤡ᤹ ᤀᤡᤱᤗᤧᤰᤁᤥ ᤁᤧᤎᤠᤛᤡᤖ ᤁᤧᤒᤳᤇᤡ᤹॥

¹² ᤌᤣ ᤜᤡᤈᤁᤡᤕᤠ᤺ᤸᤗᤧ ᤂᤢᤏᤧ᤹ᤀᤣ ᤁᤴ ᤁᤣ᤺ᤶᤒ ᤁᤣ᤺ᤶᤒᤠ ᤔᤠᤱᤎᤠ᤺ᤴᤜᤠ᤹ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤗᤢ᤺ᤴᤍᤢᤍᤣᤛᤢᤀᤠᤱ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤴᤏᤠᤱ ᤔᤧᤘᤕᤧᤴᤏᤧᤶᤒᤡ᥅ ‘ᤗᤳᤇᤠᤖᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤠᤱᤛᤧᤘᤠ ᤆᤥᤃᤧᤶᤔᤧ᤹ ᤜᤧᤰᤁᤩᤠᤱ ᤂᤧᤵᤔᤥᤖᤰ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤴᤍᤧᤶᤔᤧ᤹॥’

¹³ “ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤶᤒᤠ ᤀᤠᤴᤎᤧᤒᤠᤛᤡᤖᤧ ᤘᤣ᤹ ᤗᤠᤈᤣ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤌᤣᤎᤣ ᤔᤧᤳᤋᤢᤶᤛᤡᤶᤒᤧ ᤌᤣ ᤂᤧᤴ ᤂᤡᤏᤡ᤹ ᤁᤧᤴᤏᤡᤛᤢᤶᤔᤡᤴᤒᤡ᥅ ᤌᤣ ᤁᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥ ᤌᤠᤔᤠᤗᤠᤶ ᤛᤧ᤺ᤵᤔᤠ ᤔᤧᤛᤢᤰᤋᤢᤒᤡ᥅

¹⁴ ᤀᤠᤱᤃᤠ᤹ ᤀᤠᤶᤒᤠ ᤀᤠᤴᤎᤧᤒᤠᤛᤡᤖᤧ ᤕᤢᤔᤪᤧᤰ ᤔᤧᤔᤧᤰᤂᤢᤛᤡᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ᤀᤥᤒᤠ ᤀᤠᤳᤋᤡᤸᤗᤧ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤁᤢᤔᤏᤠᤜᤠ᤹ ᤋᤠᤱᤛᤧ᤺ᤵᤔᤠ ᤛᤢᤰᤋᤢᤛᤡᤒᤣ᥅ ᤂᤧᤒᤩᤠᤱ ᤀᤠᤓᤣᤗ᤹ᤖᤡᤰ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤂᤡᤏᤡ᤹ ᤔᤠᤱᤅᤡᤸᤗᤧ ᤛᤧ᤺ᤵᤔᤠ ᤁᤧᤛᤢᤰᤋᤡ᤹᥅

¹⁵ ᤂᤡᤏᤡ᤹ ᤁᤶᤓᤗ᤹ᤖᤡᤰ ᤏᤛᤠᤴ ᤁᤧᤗᤧᤱᤒᤠ ᤆᤥ᤺ᤰᤔᤠ ᤏᤢ ᤀᤡᤱᤗᤧᤰᤁᤥ ᤌᤠᤔᤠᤖᤧ ᤗᤠᤃᤡ ᤜᤡᤈᤁᤡᤕᤠᤴ ᤛᤢᤕᤧᤶ ᤔᤧᤒᤡᤖᤧᤶᤔᤡᤴᤏᤧ᤹॥ ᤂᤡᤏᤡ᤹ ᤂᤢᤏᤧ᤹ ᤏᤛᤠᤴ ᤔᤧᤈᤥᤃᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤛᤢᤘᤠᤱᤅᤡᤸᤗᤧ ᤁᤢᤔᤠᤱᤅᤡᤸᤗᤧᤀᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ ᤀᤠᤱᤃᤠ᤹ ᤀᤡᤃᤪ ᤀᤠᤱᤃᤠ᤹ ᤀᤠᤶᤒᤠ ᤀᤠᤴᤎᤧᤒᤠᤛᤡᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤔᤠᤗᤠᤶ ᤛᤧ᤺ᤵᤔᤠ ᤔᤧᤛᤢᤰᤋᤢᤛᤡᤴᤏᤡᤸᤗᤧ. ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤀᤠᤰᤂᤣᤀᤠᤱ ᤋᤠᤱᤛᤧ᤺ᤵᤔᤠ ᤁᤧᤛᤢᤰᤋᤡᤒᤣ᥄”

¹⁶ ᤛᤏᤜᤣᤖᤡᤒᤧᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤜᤡᤈᤁᤡᤕᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤸᤗᤛᤠᤱ ᤇᤧᤴᤏᤠ ᤕᤖᤡᤰ ᤔᤧᤒᤠ᤺ᤳᤋᤢ॥

¹⁷ ᤜᤠᤱᤅᤡᤸᤗᤧ ᤀᤠᤒᤠᤅᤣ ᤀᤰᤂᤣ ᤐᤠ᤺ᤳᤋᤢᤀᤠᤱ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤖ ᤀᤰᤋᤱᤒᤠ ᤛᤠᤵᤐᤣ᤺ᤳᤋᤠᤜᤠ᤹ ᤛᤠᤵᤋᤢ—“ᤀᤠᤰᤂᤣᤗ᤹ᤖᤡᤰ ᤘᤣ᤹ ᤗᤠᤈᤣ᤹ᤒᤠ ᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥ ᤌᤠᤔᤠᤗᤠᤶ ᤛᤧ᤺ᤵᤔᤠ ᤔᤧᤴᤇᤢᤰᤋᤢᤛᤡᤴ. ᤜᤧᤰᤁᤣᤗ᤹ᤖᤡᤰᤁᤣ ᤜᤡᤈᤁᤡᤕᤠ᤺ᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤁᤢᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥ ᤌᤠᤔᤠᤗᤠᤶ ᤛᤧ᤺ᤵᤔᤠᤛᤡ ᤔᤧᤛᤢᤰᤋᤢᤛᤡᤴ᤹॥”

¹⁸ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤆᤥ᤺ᤰᤔᤠᤖᤧ ᤗᤠᤃᤡ ᤕᤖᤢᤛᤗᤧᤔ ᤗᤢᤱᤎᤠᤰᤁᤥ ᤁᤧᤕᤧᤵᤐᤠ ᤔᤏᤠᤜᤠ᤹ ᤜᤡᤒᤪᤢ ᤐᤠ᤺ᤴᤍᤠᤱᤅᤥ ᤁᤡᤔᤠ ᤏᤢ ᤕᤱᤔᤠᤛᤡᤔᤥ ᤌᤠᤔᤠᤛᤡᤖᤧ ᤗᤠᤃᤡ ᤕᤶᤒᤠ ᤀᤡᤰᤗᤠᤀᤥ ᤐᤪᤀ᤺ᤰ ᤐᤪᤀ᤺ᤰ ᤔᤧᤀ᤺ᤰᤋᤧ॥

¹⁹ ᤔᤏᤠᤜᤠ᤹ᤖᤧ ᤜᤢᤰᤁᤡᤸᤗᤧ ᤔᤧᤈᤥᤃᤢᤛᤡᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤘᤣ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤔᤧᤔᤧᤳᤋᤢᤛᤡᤒᤠ ᤜᤧᤰᤁᤣᤀᤣ ᤂᤧᤱᤜᤠ᤹ᤖᤧ ᤕᤖᤢᤛᤗᤧ᤺ᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤔᤧᤳᤋᤢ॥

²⁰ ᤁᤴ ᤕᤧᤶᤔᤥ ᤜᤡᤈᤁᤡᤕᤠ ᤜᤠᤱᤅᤡᤴ ᤏᤢ ᤀᤠᤔᤥᤈᤖᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠᤴ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤀ᤺ᤰᤋᤧᤛᤡᤀᤠᤱ ᤐᤣᤗᤡ ᤑᤠᤰᤋᤧᤛᤢ॥

²¹ ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤗᤠᤀᤡᤱᤒᤠᤎᤡᤰ ᤐᤠᤱᤄᤢᤕᤢᤛᤢᤀᤠᤱ ᤂᤧᤸᤗᤧ ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤁᤢᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤁᤧᤘᤠ᤹ᤒᤠ ᤁᤧᤖᤧᤰ. ᤔᤢᤰᤁᤧᤃᤢᤒᤠ ᤌᤱᤃᤧᤈᤥ᤺ᤰᤐᤠᤜᤠ᤹. ᤗᤠᤶᤗᤥᤒᤠᤜᤠ᤹ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ ᤘᤖᤧᤱᤗᤧᤱ ᤕᤢᤔᤪᤧᤰ ᤔᤧᤰᤂᤢᤛᤡ॥ ᤂᤧᤒᤩᤠᤱ ᤛᤏᤜᤣᤖᤡᤒᤧᤴ ᤁᤢᤏᤠᤎᤩᤧᤀᤠᤱ ᤀᤠᤒᤠᤅᤣ ᤁᤢᤗᤠᤈᤣ᤹ᤀᤥ ᤏᤢ᤺ᤰᤂᤧᤀᤠᤱ ᤐᤣ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤠᤱᤅᤡᤸᤗᤧᤴ ᤔᤠᤱᤜᤡᤶᤔᤥ ᤗᤠᤛᤧᤸᤗᤧ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤀᤥᤒᤠ ᤁᤢᤓᤠᤖᤧ ᤋᤠᤓᤣ᤺ᤸᤗᤧ ᤂᤢᤏᤧ᤹ ᤔᤧᤈᤩᤧᤵᤋᤢ ᤔᤧᤛᤩᤧᤖᤢ॥

²² ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤜᤡᤈᤁᤡᤕᤠᤴ ᤏᤢ ᤕᤖᤢᤛᤗᤧ᤺ᤶᤒᤠ ᤕᤰᤕᤢᤱᤒᤠᤜᤠ᤹ ᤀᤛ᤻ᤛᤢᤖᤒᤠ ᤜᤠᤱ ᤛᤏᤜᤣᤖᤡᤒᤧᤴ ᤏᤢ ᤂᤢᤴᤇᤡ᤹ ᤘᤣ᤹ ᤁᤧᤖᤧᤰ ᤏᤡᤱᤔᤡᤜᤠ᤹ᤗᤠᤶ ᤋᤠᤱᤛᤧ᤺ᤵᤋᤢᤛᤡ॥ ᤂᤢᤏᤧ᤹ ᤁᤧᤖᤧᤰ ᤐᤡᤛᤠᤱᤗᤠᤶ ᤂᤧᤱᤜᤠ᤹ ᤋᤠᤵᤌᤣᤰ ᤕᤠᤶᤎᤣᤰ ᤔᤧᤳᤋᤢᤛᤡ॥

²³ ᤕᤖᤡᤰ ᤔᤏᤠᤜᤠ᤹ᤖᤧ ᤕᤖᤢᤛᤗᤧ᤺ᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤜᤢᤰᤘᤠᤜᤠ᤹ ᤏᤢ ᤕᤜᤢᤍᤠᤒᤠ ᤜᤠᤱ ᤜᤡᤈᤁᤡᤕᤠ᤺ᤸᤗᤧ ᤁᤢᤗᤠᤃᤡ ᤀᤡᤔᤧᤸᤗᤢᤱᤒᤠ ᤁᤢᤔᤧᤴ ᤁᤧᤄᤡ᤺ᤰᤐᤠ ᤔᤡᤰᤋᤥ᤺ᤰᤜᤠ᤹ ᤔᤧᤍᤠᤖᤢ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤠᤶ ᤕᤶᤒᤠ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢᤖᤥ॥

ᤜᤡᤈᤁᤡᤕᤠ᤺ᤸᤗᤧ ᤁᤢᤜᤧᤴᤇᤡᤱᤔᤠ

²⁴ ᤂᤧᤴ ᤀᤣᤃᤠᤱ ᤜᤡᤈᤁᤡᤕᤠᤴ ᤛᤳᤗᤧᤔᤠᤱᤗᤧ ᤋᤢᤃᤧᤀᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤏᤢᤃᤵ ᤐᤡᤖᤢᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣᤴ ᤌᤡᤰ ᤐᤡᤖᤢ॥

²⁵ ᤁᤖ ᤜᤡᤈᤁᤡᤕᤠᤴ ᤁᤧᤜᤧᤴᤇᤡᤱᤒᤠ ᤐᤥ᤺ᤰᤂᤧᤀᤠᤱ ᤘᤕᤧ. ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢᤒᤠᤀᤥ ᤏᤢᤃᤧᤴᤛᤠᤒᤠ ᤔᤧᤒᤥ᤺ᤰᤂᤧᤴ॥ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛᤶᤎᤠᤱ ᤜᤧᤰᤁᤩᤠᤱ ᤕᤜᤢᤍᤠ ᤏᤢ ᤕᤖᤢᤛᤗᤧᤔ ᤛᤶᤎᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤌᤩᤧ॥

²⁶ ᤜᤡᤈᤁᤡᤕᤠ᤺ᤸᤗᤧ ᤁᤢᤜᤧᤴᤇᤡᤱᤔᤧᤸᤗᤧ ᤗᤠᤃᤡ ᤂᤢᤏᤧ᤹ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ ᤗᤠᤕᤥᤗᤠᤶ ᤂᤢᤴᤇᤡ᤹ ᤏᤡᤱᤘᤠ᤹ ᤗᤥᤛᤧ॥ ᤂᤧᤸᤗᤧᤆᤥᤃᤢᤸᤗᤧ ᤜᤡᤈᤁᤡᤕᤠ᤺ᤸᤗᤧ ᤁᤢᤜᤡᤱᤜᤡᤱ ᤌᤠᤖᤡᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤕᤠᤶᤔᤥ ᤂᤢᤴᤇᤡ᤹ ᤛᤶᤎᤠᤱ ᤔᤧᤎᤩᤧᤏᤧᤴᤗᤥ॥

ᤜᤡᤈᤁᤡᤕᤠ᤺ᤸᤗᤧ ᤁᤢᤕᤠᤱᤛᤠᤁᤢᤴᤎᤣ ᤏᤢ ᤁᤢᤔᤡᤔᤡᤍᤡᤱ

²⁷ ᤜᤡᤈᤁᤡᤕᤠ᤺ᤸᤗᤧ ᤕᤖᤡᤰ ᤁᤢᤕᤠᤱᤛᤠᤁᤢᤴᤎᤣ ᤁᤳᤋᤢᤀᤠᤱ ᤘᤕᤧ ᤜᤧᤰᤁᤩᤠᤱ ᤔᤡᤱᤛᤥᤎᤠ᤺ᤱᤛᤥ ᤂᤥᤛᤢᤀᤠᤱ ᤘᤕᤧ॥ ᤂᤢᤏᤧ᤹ ᤁᤢᤛᤠᤶᤔᤩᤠᤱ ᤏᤢ ᤁᤢᤕᤢᤵᤐᤠ. ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱᤜᤠ᤹ ᤏᤢ ᤔᤠᤖᤢᤰᤜᤠ᤹. ᤂᤥᤜᤠ᤹ ᤏᤢ ᤘᤣ᤹ ᤁᤢᤔᤧᤴ ᤁᤧᤄᤡ᤺ᤰᤐᤠ ᤛᤠᤔᤠᤜᤠ᤹ᤖᤧ ᤗᤠᤃᤡ ᤌᤠ᤺ᤱᤜᤠ᤹ ᤆᤥᤃᤢ॥

²⁸ ᤐᤥᤃᤢᤃᤧᤴ ᤁᤢᤈᤠ. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤏᤢ ᤏᤡ᤺ᤱᤃᤣ᤹ᤖᤧ ᤗᤠᤃᤡ ᤆᤠᤎᤠ᤺ᤱᤜᤠ᤹ ᤜᤧᤰᤁᤩᤠᤱ ᤘᤣ᤹ᤘᤣ᤹ ᤐᤖᤡᤰᤐᤠ ᤌᤰᤛᤠᤜᤠ᤹ᤖᤧ ᤗᤠᤃᤡ ᤐᤡᤳ ᤕᤧᤵᤏᤠ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤖᤧ ᤗᤠᤃᤡ ᤂᤖᤜᤠ᤹ᤀᤠᤱ ᤂᤢᤏᤧ᤹ ᤆᤥᤃᤢ॥

²⁹ ᤂᤢᤏᤧ᤹ ᤕᤖᤡᤰ ᤐᤡᤳᤌᤰᤛᤠ ᤗᤢᤵᤜᤠ᤹ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠ ᤗᤢᤵᤜᤠ᤹ᤀᤠᤱ ᤑᤢᤰᤂᤢᤛᤡ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤧᤰᤂᤠᤀᤣ ᤕᤖᤡᤰ ᤕᤠᤱᤛᤠᤁᤢᤴᤎᤣ ᤐᤡᤖᤢᤀᤠᤱ ᤘᤕᤧ॥

³⁰ ᤀᤠᤶᤓᤠ ᤁᤴ ᤜᤡᤈᤁᤡᤕᤠ᤺ᤸᤗᤧᤀᤣ ᤃᤡᤜᤥᤏ ᤆᤫᤠ᤺ᤳ ᤘᤠᤒᤢᤴᤍᤠᤰᤘᤠᤴ ᤌᤥᤜᤠᤱ ᤗᤧᤵᤔᤠᤱ ᤛᤠᤰᤋᤢᤀᤠᤱ ᤕᤥᤜᤠᤱ ᤗᤧᤵᤔᤠᤱ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤡᤸᤗᤧ ᤏᤠᤶᤎᤠ ᤐᤡᤛᤠᤱ ᤜᤡᤔᤠ ᤋᤣ᤹ᤔᤠ ᤐᤠᤱᤄᤢᤛᤡᤀᤠᤱ ᤘᤕᤧ॥ ᤛᤧᤰᤂᤠᤀᤣ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤁᤢᤗᤡᤱᤍᤥ ᤁᤧᤖᤧ॥

³¹ ᤁᤖ ᤒᤣᤒᤡᤗᤥᤏᤒᤠ ᤕᤢᤰᤛᤠᤒᤠᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤜᤠᤱᤗᤠᤀᤡᤱᤒᤠᤜᤠ᤹ ᤗᤠᤈᤣ᤹ᤀᤥ ᤏᤡᤍᤧᤳᤋᤧᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠᤴ ᤛᤣ᤺ᤴᤍᤥᤛᤧ ᤔᤧᤓᤧᤖᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤡᤈᤁᤡᤕᤠᤴ ᤁᤢᤏᤡᤱᤘᤠ᤹ ᤛᤠ᤹ᤔᤠ ᤏᤢ ᤁᤢᤏᤡᤱᤘᤠ᤹ᤀᤥᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤂᤥᤔᤠᤖᤧ ᤗᤠᤃᤡ ᤗᤧᤖᤢᤀᤠᤱ ᤘᤕᤧᤖᤥ॥

³² ᤜᤡᤈᤁᤡᤕᤠ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤜᤠ᤹ ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤁᤧᤒᤵᤐᤠ ᤀᤠᤔᤥᤈᤖᤧ ᤁᤢᤛ᤻ᤛᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤁᤢᤛᤢᤑᤥᤀᤥ ᤛᤠᤵᤋᤧᤀᤠᤱ ᤐᤳ॥

³³ ᤜᤡᤈᤁᤡᤕᤠᤴ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣᤀᤠᤱ ᤂᤢᤏᤧ᤹ ᤍᤠᤀᤢᤍᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤅᤥ ᤁᤧᤏᤧᤒᤠ ᤌᤧᤃᤢᤀᤥ ᤂᤢᤏᤧ᤹ ᤔᤧᤈᤡᤰᤂᤢ॥ ᤂᤢᤏᤧ᤹ ᤔᤠᤛᤡᤱᤒᤠᤀᤥ ᤁᤧᤖᤧᤰ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤛᤥᤎᤢᤱᤜᤢᤰᤘᤠ ᤔᤧᤒᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤔᤏᤛ᤻ᤛᤣᤴ ᤜᤠᤱ ᤐᤥ᤺ᤰᤂᤧᤖᤥ॥