᥈ ᤛᤠᤵᤔᤢ᤺ᤴᤎᤢᤶ 31 - LIFOTNT

¹ ᤁᤴ ᤛᤥᤛᤥ᤺ᤳᤗᤖᤠᤱᤅᤡᤴ ᤆᤢᤖᤧᤸᤗᤧ ᤂᤧᤵᤔᤥ ᤁᤧᤈᤢᤶᤒᤠ ᤁᤠᤰ ᤀᤡᤛᤪᤠᤀᤡᤗᤡᤜᤠ᤹ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤔᤧᤒᤣᤀᤠᤱ ᤂᤧᤱᤜᤠ᤹ ᤁᤧᤖᤧᤰ ᤕᤢᤔᤪᤧᤰ ᤔᤧᤶᤔᤧᤱᤅᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤛᤣᤛᤣ ᤗᤢᤱᤜᤠ᤹ ᤁᤢᤶᤈᤡᤰᤔᤠ ᤔᤧᤕ᤺ᤵᤛᤢ ᤜᤧᤰᤁᤩᤠᤱ ᤀᤛᤣᤖᤠ ᤔᤠᤱ ᤏᤠᤘᤠᤀᤡᤳᤗᤠᤜᤠ᤹ ᤔᤧᤗᤢ᤺ᤴᤍᤢ ᤔᤧᤍᤣᤛᤢ॥ ᤁᤧᤖᤧᤰ ᤕᤜᤢᤍᤠ ᤏᤢ ᤒᤣᤏᤩᤠᤔᤡᤏ ᤜᤧᤰᤁᤩᤠᤱ ᤀᤣᤑᤪᤠᤀᤡᤔ ᤏᤢ ᤔᤏᤛ᤻ᤛᤣᤒᤠ ᤁᤣ᤺ᤶᤒ ᤁᤣ᤺ᤶᤒᤠ ᤔᤠᤱᤎᤠ᤺ᤴᤜᤠ᤹ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤕᤴᤇᤢ ᤔᤧᤍᤣᤛᤢ॥ ᤂᤧᤶᤔᤩᤠᤰ ᤔᤧᤈᤥᤃᤢ ᤔᤧᤛᤢᤖᤢᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤁᤧᤖᤧᤰ ᤂᤢᤴᤇᤡ᤹ ᤀᤠᤵᤑᤣᤰ ᤕᤧᤰᤕᤰᤜᤠ᤹ᤀᤥ ᤏᤢ ᤐᤠᤗᤠᤶᤒᤠᤒᤠ ᤗᤠᤈᤣ᤹ᤀᤥ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥

ᤔᤠᤱᤛᤣᤘᤠᤖᤧ ᤗᤠᤃᤡ ᤁᤢᤈᤠ ᤔᤧᤍᤠᤖᤢ

² ᤂᤧᤴ ᤀᤣᤃᤠᤱ ᤜᤡᤈᤁᤡᤕᤠ᤺ᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤂᤢᤴᤇᤡ᤹ ᤕᤠ᤺ᤶᤒᤰ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤀᤡᤃᤪ ᤗᤧᤒᤡᤜᤠ᤹ ᤁᤢᤗᤢᤵ ᤁᤢᤗᤢᤵ ᤆᤥᤃᤢᤛᤡᤀᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ. ᤋᤱᤈᤢᤶ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ. ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ. ᤏᤢᤃᤧᤴ ᤐᤡᤔᤠᤖᤧ ᤗᤠᤃᤡ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤗᤠᤶᤎᤣ᤺ᤳᤜᤠ᤹ᤀᤥ ᤁᤢᤏᤠᤖᤠ ᤑᤥᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ᤀᤥ ᤂᤢᤏᤧ᤹ ᤂᤧᤱᤜᤠ᤹ ᤔᤢᤖᤠ ᤔᤧᤳᤋᤢᤛᤡ॥

³ ᤋᤠᤏᤠᤶ ᤏᤢ ᤕᤢ᤺ᤴᤇᤡᤰ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ. ᤜᤧᤰᤁᤩᤠᤱ ᤛᤒᤠᤌ. ᤗᤠᤍᤢᤵ ᤏᤢ ᤆᤥ᤺ᤰᤔᤠ ᤏᤡ᤺ᤴᤎᤥ ᤁᤧᤒᤥᤱᤒᤠ ᤋᤱᤏᤠᤶᤜᤠ᤹ᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤢᤀᤡᤛᤡᤰ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤕᤠᤱᤛᤠ ᤁᤢᤴᤎᤣᤜᤠ᤹ᤀᤥᤗᤠᤶ ᤗ᤺ᤳᤋᤢ ᤐᤡᤖᤢᤛᤡ॥

⁴ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤁᤢᤛᤠᤶᤕᤥᤌᤡᤶᤔᤡᤴ ᤆᤰᤔᤧᤸᤗ᤹ᤀᤣ ᤔᤧᤏᤠ᤺ᤳᤋᤢᤖ ᤑᤠ᤹ᤀᤠᤱ ᤜᤠᤱᤅᤡᤸᤗᤧ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤗ᤺ᤵᤔᤠ ᤁᤧᤒᤥᤱᤒᤠ ᤗᤰᤜᤠ᤹ ᤂᤢᤴᤇᤡ᤹ ᤔᤧᤗ᤺ᤳᤋᤢᤖ ᤑᤠ᤹ᤀᤠᤱ ᤔᤧᤳᤋᤢᤛᤡ॥

⁵ ᤜᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡᤏᤢᤔᤧ᤺ᤴᤏᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤥᤃᤢᤃᤧᤴ ᤁᤢᤈᤠ. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ. ᤈᤤᤋᤢᤏ ᤏᤡ᤺ᤱᤃᤣ᤹ ᤏᤢ ᤛᤰᤘᤠᤄᤢ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤁᤥ ᤁᤧᤎᤥ᤺ᤰᤐᤠ ᤋᤃᤡ ᤁᤧᤍᤢᤶᤒᤠ ᤁᤢᤈᤠᤜᤠ᤹ ᤜᤢᤰᤘᤠ ᤔᤧᤍᤠᤖᤢ॥ ᤂᤧᤱᤜᤠ᤹ᤖᤧ ᤘᤧᤳᤋᤧᤛᤖᤧ ᤁᤢᤈᤠᤜᤠ᤹ ᤁᤧᤖᤧᤖ ᤌᤡᤒᤥᤱᤗᤰ ᤔᤧᤍᤠᤖᤢ॥

⁶ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧᤀᤠᤱ ᤐᤡᤳᤌᤰᤛᤠᤜᤠ᤹ᤖᤧᤴ ᤌᤡᤒᤥᤱᤗᤰ ᤏᤢ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤍᤥᤴᤍᤢᤒᤠ ᤁᤧᤖᤧᤰ ᤁᤢᤈᤠᤜᤠ᤹ᤖᤧᤴ ᤌᤡᤒᤥᤱ ᤗᤰᤜᤠ᤹ ᤔᤧᤍᤠᤖᤢᤀᤠᤱ ᤔᤧᤗᤢᤵᤛᤢ॥

⁷ ᤂᤧᤱᤜᤠ᤹ᤖᤧ ᤛᤢᤶᤛᤡᤃᤣᤰᤐᤠ ᤗᤠᤀᤥ ᤗᤢᤶᤔᤠ ᤔᤧᤜᤣ᤺ᤰᤋᤢᤀᤠᤱ ᤏᤢᤛᤡᤃᤣᤰᤐᤠ ᤗᤠᤀᤥ ᤔᤧᤛᤢᤖᤢ॥

⁸ ᤜᤡᤈᤁᤡᤕᤠᤴ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤔᤧᤍᤩᤧᤀᤠᤱ ᤂᤧᤴ ᤔᤧᤗᤢᤵᤛᤢᤒᤠ ᤁᤢᤈᤠᤜᤠ᤹ ᤔᤧᤏᤡᤛᤢᤸᤗᤧ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤏᤢ ᤂᤢᤏᤧ᤹ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤏᤢᤃᤧᤴ ᤔᤧᤒᤡᤖᤢᤛᤡ॥

⁹ ᤁᤴ ᤔᤧᤗᤢᤵᤛᤢᤒᤠ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤜᤡᤈᤁᤡᤕᤠ᤺ᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤛᤣ᤺ᤴᤍᤥᤛᤢᤛᤡ॥

¹⁰ ᤛᤠᤍᤥᤁᤖᤧ ᤁᤢᤎᤠ᤺ᤰᤁᤥᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤀᤈᤷᤕᤠᤜ᤺ᤸᤗᤧ ᤏᤢᤃᤵ ᤐᤡᤖᤢ. “ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤢᤰᤘᤠᤜᤠ᤹ ᤔᤧᤍᤠᤖᤢᤒᤠ ᤕᤧᤶᤔᤠᤱᤎᤥ ᤆᤠᤔᤠᤖᤧ ᤗᤠᤃᤡ ᤀᤠᤏᤡᤃᤣ ᤐᤕᤥ ᤕᤥᤖᤡᤃᤧᤀᤠᤱ ᤏᤖᤧᤀᤠᤱᤅᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤁᤴ ᤕᤖᤡᤰ ᤐᤠ᤺ᤴᤜᤠ᤹ ᤏᤖᤧᤀᤠᤱ ᤘᤠ᤹ᤖ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤔᤏᤠᤜᤠ᤹ ᤕᤖᤡᤰ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤀᤠᤱ ᤘᤠ᤹॥”

¹¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤆᤠᤎᤠ᤺ᤱᤜᤠ᤹ ᤕᤠᤖᤡᤵ ᤆᤥ᤺ᤰᤔᤠᤖᤧ ᤗᤠᤃᤡ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ ᤕᤠᤖᤡᤵ ᤔᤧᤈᤥᤃᤢ॥

¹² ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤏᤡᤖᤡᤰᤁᤠᤱ ᤂᤢᤴᤇᤡ᤹ ᤀᤠᤒᤠᤅᤣ ᤀᤠᤒᤠᤅᤣ ᤜᤢᤰᤘᤠᤜᤠ᤹. ᤌᤡᤒᤥᤱ ᤗᤰᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤔᤧᤗ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤔᤧᤍᤠᤖᤢ॥ ᤂᤧᤴ ᤐᤠ᤺ᤴᤜᤠ᤹ ᤁᤧᤍᤧᤶᤒᤠ ᤁᤧᤈᤥ᤺ᤰᤐᤠ ᤗᤰᤐᤧᤴᤛᤠᤒᤠ ᤗᤧᤒᤡ ᤁᤥᤏᤏᤩᤠᤜᤴ ᤘᤕᤧ. ᤜᤧᤰᤁᤩᤠᤱ ᤁᤢᤴᤛᤠ᤹ ᤛᤡᤔᤡᤴ ᤂᤢᤏᤧ᤹ ᤁᤢᤛᤡ᤺ᤰᤋᤥᤒᤠ ᤁᤢᤓᤠ᤹ᤒᤠᤱ ᤘᤕᤧ॥

¹³ ᤜᤡᤈᤁᤡᤕᤠ ᤜᤠᤱᤅᤡᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠ ᤀᤈᤷᤕᤠᤜ᤺ᤸᤗᤧ ᤁᤥᤏᤏᤩᤠᤜᤴ ᤏᤢ ᤂᤢᤏᤧ᤹ ᤁᤢᤴᤛᤠ᤹ ᤛᤡᤔᤡᤴ ᤑᤠ᤹ᤔᤠᤖᤧ ᤗᤠᤃᤡ ᤕᤜᤡᤀᤣᤗ. ᤀᤈᤈᤩᤠᤜ. ᤏᤜᤋ. ᤀᤛᤠᤜᤣᤗ. ᤕᤖᤡᤔᤥᤋ. ᤕᤥᤈᤠᤒᤠᤍ. ᤀᤣᤗᤡᤀᤣᤗ. ᤕᤡᤛ᤻ᤔᤁᤩᤠᤜ. ᤔᤜᤋ ᤏᤢ ᤒᤏᤠᤕᤠᤜᤴ ᤕᤢᤰᤋᤡᤱ ᤆᤥᤃᤢᤛᤡᤀᤠᤱ ᤘᤕᤧ॥

¹⁴ ᤕᤜᤘᤣ ᤍᤠᤱᤒᤧᤴ ᤔᤧᤒᤡᤖᤢᤒᤠ ᤐᤠ᤺ᤴᤜᤠ᤹ ᤏᤢ ᤔᤧᤗ᤺ᤳᤋᤢᤒᤠ ᤜᤢᤰᤘᤠᤜᤠ᤹ ᤑ᤺ᤱᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤔᤧᤍᤠᤖᤢᤒᤠ ᤏᤡᤱᤘᤠ᤹ᤗᤠᤶᤒᤠᤒᤠ ᤜᤢᤰᤘᤠᤜᤠ᤹ ᤗᤧᤒᤡ ᤕᤡᤶᤏᤠ᤺ᤸᤗᤧ ᤁᤢᤛ᤻ᤛᤠ ᤏᤠᤱᤃᤧᤴ ᤗᤠᤶᤎᤣ᤺ᤳᤋᤥᤒᤠ ᤗᤠᤶᤎᤣᤳ ᤁᤧᤃᤥᤒᤠ ᤁᤥᤖᤧ᤺ᤸᤗᤧ ᤁᤢᤗᤰᤐᤧᤴᤏᤥ ᤘᤕᤧ॥

¹⁵ ᤁᤢᤗᤢᤵ ᤁᤢᤗᤢᤵ ᤁᤢᤀᤡᤛᤡᤰ ᤕᤶᤒᤠ ᤏᤢ ᤆᤢᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤁᤧᤗᤠ᤹ᤒᤠ ᤂᤥᤔᤠ ᤗᤰ ᤑ᤺ᤱᤔᤠ ᤐᤡᤔᤠᤛᤡᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤀᤥ ᤀᤍᤏ. ᤔᤡᤏᤩᤠᤔᤡᤏ. ᤕᤣᤛᤢᤀ. ᤛᤔᤠᤕᤠᤜ. ᤀᤔᤷᤕᤠᤜ ᤏᤢ ᤛᤁᤏᤩᤠᤜ᤺ᤸᤗᤧ ᤏᤡᤖᤡᤰᤁᤠᤱ ᤁᤥᤖᤧᤴ ᤔᤧᤓᤠ᤹ᤖᤢ॥

¹⁶ ᤔᤡᤱᤛᤪᤠᤀᤥ ᤂᤢᤴᤇᤡ᤹ ᤔᤡᤱ ᤛᤠᤵᤋᤧᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤆᤰᤔᤧᤸᤗ᤹ᤀᤣ ᤁᤧᤒᤵᤐᤠᤀᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤋᤱᤒᤣ ᤛᤢᤶᤛᤡ ᤁᤧᤕᤥᤒᤠ ᤏᤢ ᤂᤧᤴᤏᤠᤱᤎᤥ ᤕᤖᤡᤰ ᤋᤱᤒᤣ ᤁᤧᤃᤧᤵᤐᤠ ᤕᤧᤶᤒᤡᤳᤇᤠᤜᤠ᤹ ᤁᤧᤖᤧᤰ ᤂᤢᤴᤇᤡ᤹ ᤗᤢᤵ ᤏᤢ ᤂᤢᤴᤇᤡ᤹ ᤗᤰᤐᤧᤴ ᤁᤢᤀᤡᤛᤡᤰ ᤂᤥᤔᤠ ᤗᤰᤁᤡᤴ ᤂᤧᤱᤜᤠ᤹ᤖᤧ ᤔᤧᤓ᤺ᤰᤂᤢ ᤔᤧᤒᤡᤖᤢᤛᤡ॥

¹⁷ ᤂᤧᤴᤏᤢ ᤛᤥᤛᤥᤖᤡᤰ ᤔᤡᤱᤛᤪᤠᤀᤥ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤛᤕᤱ ᤁᤢᤀᤡᤛᤡᤰ ᤂᤢᤴᤇᤡ᤹ ᤔᤡᤱ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤏᤡᤒᤥᤱ ᤋᤱᤒᤣ ᤁᤧᤕᤥᤒᤠ ᤜᤧᤰᤁᤩᤠᤱ ᤂᤧᤴᤏᤢ᤺ᤸᤗᤧ ᤕᤖᤡᤰ ᤋᤱᤒᤣ ᤁᤧᤕᤥᤒᤠ ᤗᤧᤒᤡᤜᤠ᤹ ᤁᤧᤖᤧᤰ ᤂᤢᤴᤇᤡ᤹ ᤀᤠᤵᤑᤣᤰ ᤗᤢᤵᤐᤥ ᤏᤢ ᤗᤰᤐᤧᤴ ᤁᤢᤀᤡᤛᤡᤰ ᤂᤢᤴᤇᤡ᤹ ᤂᤥᤔᤠ ᤗᤰᤜᤠ᤹ ᤂᤧᤱᤜᤠ᤹ᤖᤧ ᤔᤧᤓ᤺ᤰᤂᤢ ᤔᤧᤒᤡᤖᤢᤛᤡ॥

¹⁸ ᤁᤴ ᤔᤡᤱᤛᤪᤠᤀᤥᤒᤠ ᤛᤠᤵᤐᤴᤜᤠ᤹ᤀᤥ ᤔᤡᤱ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤛᤱᤈᤢᤶᤓᤥᤀᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ ᤏᤢ ᤂᤢᤴᤇᤡ᤹ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ᤀᤠᤱ ᤁᤠᤰ ᤗᤰ ᤔᤧᤓ᤺ᤰᤂᤢ ᤔᤧᤒᤡᤖᤢᤛᤡᤀᤠᤱ ᤘᤕᤧ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤠᤵᤑᤣᤰ ᤀᤠᤵᤑᤣᤰ ᤌᤡᤶ ᤁᤧᤖᤧᤖ ᤛᤣᤛᤣᤛᤠᤱᤛᤠᤱ ᤔᤧᤈᤥ᤺ᤰᤛᤡᤱ॥

¹⁹ ᤜᤧᤰᤁᤩᤠᤱ ᤕᤧᤰᤕᤰᤜᤠ᤹ᤖᤧ ᤁᤢᤕᤠᤁᤢᤕᤠᤒᤠ ᤐᤠᤱᤈᤢᤶᤜᤠ᤹ᤀᤥ ᤏᤢ ᤘᤣ᤹ ᤁᤢᤓᤠ ᤐᤠᤱᤓᤣ᤹ᤀᤥ ᤁᤧᤕᤢᤱᤒᤠ ᤜᤠᤖᤢᤏᤖᤧ ᤁᤢᤎᤠ᤺ᤰᤁᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤗᤠᤶ ᤕᤧᤶᤒᤡᤳᤇᤠ ᤌᤰᤔᤠ ᤏᤢ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤛᤪᤠᤀᤥ ᤔᤡᤱ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤀᤠᤱ ᤁᤧᤖᤧᤰ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤗᤰ ᤐᤡᤔᤠᤛᤡᤖᤧ ᤗᤠᤃᤡ ᤔᤏᤠᤜᤠ᤹ ᤔᤢᤖᤠ ᤔᤧᤔᤧᤳᤋᤢᤛᤡ॥

²⁰ ᤜᤡᤈᤁᤡᤕᤠ᤺ᤸᤗᤧ ᤕᤜᤢᤍᤠ ᤁᤧᤖᤧᤰᤁᤣ ᤁᤶᤓᤗ᤹ᤖᤡᤰ ᤕᤠ᤺ᤶᤒᤰ ᤆᤥᤃᤢ॥ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤥ ᤌᤣ᤺ᤴ ᤏᤢᤒᤠ. ᤁᤢᤍᤥ᤺ᤵᤔᤠ ᤏᤢ ᤏᤛᤠ᤺ᤴᤛᤠᤒᤠ ᤘᤕᤧ. ᤂᤢᤏᤧ᤹ ᤂᤧᤱᤜᤠ᤹ᤀᤣ ᤆᤥᤃᤢ॥

²¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤥ ᤏᤢ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶᤔᤡᤴ ᤜᤧᤰᤁᤩᤠᤱ ᤁᤢᤎᤡᤶᤜᤠ᤹ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤀᤥ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤰᤛᤢᤀᤠᤱ ᤁᤧᤖᤧᤰ ᤏᤡᤱᤘᤠ᤹ᤖᤧ ᤕᤠ᤺ᤶᤒᤰ ᤆᤥᤃᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤐᤥ᤺ᤰᤂᤧᤖᤥ॥